((2 ))

يوم الاربعاء رجعت خالتي وجات عندنا .. قلت لكم صاير لها شي ماصدقتوني .. لازم نكتشف علشان اذا فيه مجال نساعدها .. طبعا حاولت مع خالتي تقول لي .. يمين يسار فوق تحت ورى وقدام ولا قالت شي .. مصيرها تعترف أدري فيها ماتقدر تخبي عني شي .. خايفه صاير لها شي او مريضه .. بس ملامحها كانت عاديه جدا طبيعيه يعني مو متضايقه ولا مبسوطه .. عجيب امرك ياخالتي .. انتظري بس اتفرغ لك ...
يوم الاربعاء جاء زوج خالتي مع ميشو وأخذوني علشان خالتي تعبانه بصراحه كنت خايفه ان مايرجعوني قبل يوم الجمعه .. المهم لأول مره أروح بيت خالتي ولابنام عندهم بعد !!
زوج خالتي تركني مع خالتي طول الليل والصبح يكون هو مع ميشو .. كنت خايفه يصير لها شي لأني اعتبرها مثل أمي .. الحلو في الموضوع ان ابو مشعل أكبر مني بكثير وبحسبة ابوي فـ ماأتحجب عنه .. وميشو اصغر مني وكمان مااتحجب عنه يعني تقدرون تقولون مااخذه راحتي ..وكأن خالتي مشاعل امي وميشو اخوي .. حطيت القماش على جبهتها وجلست اناظرها .. خلوني شوي اكلمكم عنها ..
عندها حنان كبير يشمل الكل مو بس على ولدها الوحيد .. تزوجت وهي تقريبا في ثاني ثانوي وماكملت سنه الا وهي حامل بميشو أضطرت تاكل حبوب منع حمل علشان تكمل دراستها ويوم انها خلصت ماقدرت تحمل .. مسكينه ياخالتي مابقى مستشفى بالخُبر مارحتي له .. الله يعينك .. شلت القماش من على راسها وبدلته وتميت اناظرها .. وادعي ربي يشافيها .. الساعه عشر دخل ابو مشعل وميشو وتطمنوا عليها وراحوا ينامون .. حطيت يدي على راسها وبديت اقرى المعوذات والفاتحه وآية الكرسي وبعض الايات اللي سمعت عنها لها مفعول قوي وسريع .. حرارتها شابة ضو الله يعينها ..
الساعه 2 الليل صحيتها علشان تاكل الحبوب اكلتهم ورجعت نامت .. طلع علي الصبح وانا جالسه معها .. رحت صليت ودعيت لها مع ابوي وامي .. ورجعت لسريرها لقيتها صاحيه .. ابتسمت لها ..
قالت : صباح الخير ..
قلت : صباح الفل .. أصلح لك فطور ؟!
قالت : انتي باقي صاحيه من البارح ؟! ..
أدري اني لو قلت لها ايه بتقول لي روحي نامي ولاتسوين لي فطور .. فـ حبيت أكذب .. أستغفرك يارب ..
قلت : لا طبعا .. قالولك انتي اميره نسهر لجل راحتك ؟؟ رحت نمت وتوني صاحيه ..
ابتسمت : لا تكذبين ..!
قلت : لا ماأكذب .. تبين فطور ؟؟
ردت : خلي الفطور على جنب .. قولي واللي خلق السما والأرض نمت البارح ..
وطيت راسي .. قالت : قسم بالله اني صرت احسن .. روحي نامي ..
قلت : قسم بالله مافيني النوم .. غمزت لها : تبين تشوفين الحبيب وحشك ؟!
ضحكت : وجع ساروه لا تقولين كيذا .. خايفه عليك ..
ابتسمت : نسهر على راحتكم ياخالتي .. انا بروح اصلح لنا فطور وبنادي الحبايب ..
طلعت وانا اسمع ضحكتها في اذوني دعيت ربي ان تتشافى قبل يوم الجمعه .. المهم رحت لميشو لقيته مع ابوه نايمين ..
تقربت منه وصرخت : ميشوو ..
نقز : بسم الله الرحمن الرحين .. اعوذ بالله منك يابليس ..
مديت يدي له : البشاره ..
صرخ : احلفي أمي صحت ؟! ..
قلت : قسم بالله وتضحك بعد ..
وقف وطلع .. لفيت لقيت ابو مشعل صاحي فشله شافني اهبّل في ميشو ..
قال : خير ساره .. مشاعل صاير لها شي ؟! ..
قلت : شف ياخالي انا جاسه اشكي على مرتك .. أول ماصحت اقول لها تبين فطور .. تقول لا روحي نامي .. تدري ليه ؟؟ صارحتني انها .. وهمست : مشتاقتلك مووت لك ..
صرخ : صحت ؟؟
قلت : تو الناس ..
قام وراح لها .. والله تمنيت لو انا فعلا من ذي الاسره .. المهم رحت وصلحت الفطور وصعدته لهم .. أول مادخلت تكلمت خالتي ..
قالت : وجع ساروه اش قايله له ؟
هزيت كتوفي : مو حرام ماأقول له ؟؟ انتي بنفسك قلتي ذا الحكي ولا تنكرين .. ناظرت ميشو وغمزت له ..
قال خالي : صدق مشاعل ؟؟
ولعت خالي احمر .. ههههه استحيت على عمري ..
وقلت : أخليكم براحتكم ..
ميشو : هههههههههههااااي يمه كبرتوا ..
خالي : شف الذوق تطلع مو مثلك .. والتفت لي : شكرا وماقصرتي والله لو انك أصغر من مشعل ...
كمل ميشو : زوجتك له هههه حفظتها ..
قطب خالي : ليه ؟؟
ميشو : لأن أمي دايم تقولها وتقهرني فيها .. الحين انا آخذ ساره ؟ بربك يبه تبي عيالنا كله يضحكون ؟!
خالتي : ويضحكون ؟؟!
ميشو : اهبل مع هبلا ..
قلت بابتسامه : انا طالعه يلا ميشو ..
أخذت ميشو وطلعت معه ونزلت اصلح له فطور .. ماأخبي عليكم اني تعبانه وهلكانه بس استحي انام معاهم .. انتبه علي ميشو .. وذا الشي فعلا احرجني وقال لي انام بغرفته عادي .. قسم بالله اني استحيت بس نعسانه .. رحت غرفته .. متغير علي المكان مو قادره انام .. تقلبت بس مو جايني نوم .. قبل شوي كنت نعسانه اش فيني ؟! .. رحت لمكتبته وأخذت كتاب وقريته ولا نعست .. سمعت صوت نغمة راشد " هلي لا تحرموني منه " طنشت اكيد جوال ميشو .. ملزم ذا الرجال إلا يرد غصب .. حطيت راسي على المخده ورحت بسابع نومه ..

*
*
*

صحيت على صوت ميشو يصحيني ..
قلت : كم الساعه ؟!
ميشو : أذن العصر ..
فزيت : ياربيه ماصحيتني للظهر ليه ؟؟
ابتسم : صحيتك .. حتى امي قالت اكيد تعبانه خلوها تكمل ..
نقزت وتوضيت وصليت ولما خلصت ..
قلت : أمك نامت ولا باقي صاحيه ؟!
قال : باقي مع الحبيب .. المشكله ماعندي احد اسولف معه قهر ..
قلت : تعالي صحيح نت حاط نغمة هلي لا تحرموني منه ؟؟
قال : لا .. ليه ؟؟
قلت وانا ابتسم : والله يوم اني جيت بنام أزعجني كنت بقوم أقول لك عنه .. بس قلت أعاقبه لأنه ماخلاني انام
ماخلصت كلامي الا واشوفه ميت ضحك .. جلست أضحك معه بهستريا وماقدرت اوقف عن الضحك ..
قال : وين كان االجوال ؟!
اشرت له على المكتب ..
قال : أووف جوال ابوي خلنا نفتش ..
ماأقول لكم ماجاني فضول أعرف مين المتصل بس فكره خطيرهلو عرف خالي اني فتشت في جواله يعني مو حلوه كيذا ..
قلت له : مشعلووه لاتسويها ..
طنش كلامي وفتحه .. جاني فضول : مين اللي متصل ؟!
رفع حاجب : خير اخت ساره ؟؟ سلامات ؟!
انقهرت منه : ميته عاد ابي اعرف ..
ورحت جهة السرير وجلست على الطرف وانا قالبه وجهي ..
جاوبني : لا تزعلين ذي عمتي ليلى اكيد تبي تتطمن على امي ..
سكت عنه ورحت غرفة خالتي أسولف معاها .. شوي ودخل ميشو ..
وقفت : ابي ابتعد دامه معك ..
استغربت خالتي : خير ؟؟! اش فيكم ؟! اش صاير قالبين ؟؟ الصبح اش حلاتكم !!
ميشو : لاتزعلين كنت امزح معك خلاص عاد ماصارت ..
سكتت عنه ومارديت قسم اني كاتمه ضحكتي لا افتشل بينهم ..
خالتي : خير اش سويت بعد ؟؟
طنش سؤال امه وقال : آسف والله مااكررها ..
هزيت راسي .. خالتي : مشعل جاوبني اش سويت لها ؟!
ابتسمت لخالتي : عادي اخو واخته هوشات عاديه ..
ابتسم ميشو : رضيتي ؟!
قلت له : بشرط بقول لامك عن السالفه ..
وفعلا خبرتها بالسالفه جلست ساعتين تقريبا تضحك علينا .. شي يضحك فعلا ..
خالتي : طيب مين اللي كان متصل على ابوك ؟!
ضحك : عمتي ليلى تقول توها عارفه انك تعبانه .. قلت لها انك صرتي بخير قالت خبر ابوك انها عازمتنا الليله على بيتهم وبس ..
قلت : طيب انا بلم اغراضي واذا ممكن ترجعوني بيت خالي ..
ميشو : ليش ياحظي مو رايحه معانا ؟!
قلت : عمتك لو عمتي ؟؟ خلاص !!
ميشو : ترى قلت لها انك معنا وقالت مشتاقه تبي تشوفك ..
هزيت كتوفي : اعتذر لي منها أكيد خالي مبيرضى اني اروح .. هو بالموت رضى اجي عندكم بعد اروح بيت عمتك ؟!
ابتسمت خالتي : بس فشله .. طيب تجين معنا وانا اضمن لك ان محد يدري عنك ؟؟
المشكله ياخالتي ان لو خالي درى حرقني او ذبحني وماأدري اي وحده فيهم وماأستبعد يموتني بالحرق .. والمشكله الثانيه اني محتاجه ارجع قبل يوم الجمعه حتى اضبط اموري واجهز لي لثام وعبايه مثل الناس .. بس كيف اقولك ياخالتي كيف ؟؟!
ميشو : هاا .. اش قلتي ؟ ترى بنطلع بعد اذان المغرب بنصف ساعه يعني تقريبا ست ونصف .. تجين معنا ؟؟
خالتي : مشعل خلنا بروحنا شوي ..
خالتي ياقلبي والله اعذريني ولا تضغطين علي ماتدرين اش قد انا مشتاقه ليوم الجمعه اللي هو بكره .. لوجات عزيمتها في وقت ثاني كان مستعده اروح والله ..
خالتي : فيك شي ساره ومستحيه تقولينه قدام مشعل ؟؟ تكلمي الحين ..
قلت : ياخالتي افهميني انا مابي اروح لأسباب كثيره أوها خالي ..
قالت : طيب اعطيني سبب ثاني يخليني اقتنع ليه ترفضين دعوتها ..
رفعت اصبعي لها ..
قالت : عادي .. بس اتمنى لو مره تشوفك .. كل مره احكي لهم عنك يشتاقون يشوفونك لو بس نظره ..
ابتسمت : قد مره قلت لك انك عندك شي اسمه عناد وانا وارثته منك ؟!
قالت : لا حبيبتي انتي ماورثتيه مني .. من ابوك الله يرحمه ..
وانفتحت سيرة ابوي .. أول معلومه أعرفها غير اسمه محمد العلي .. كمل ياخالتي ابي اعرف عنه لو شي بسيط ..
قلت : اش كمان فيه ابوي ؟!
هزت كتوفها : هذا اللي اعرفه .. ويلا قومي البسي عبدالله ينتظرنا تحت ..
هزيت راسي .. مافيه اي مجال اتكلم واعرض رايي بكل صراحه ان شاء الله ارجع بيت خالي يارب .. ابي اعرف بس اش الموضوع الخطير .. تأففت من داخلي ولبست الملابس وتعطرت ولبست حجابي وحطيت العبايه على يدي ونزلت فيها ..

جلسنا تقريبا ربع ساعه وأذن وصلينا وطلعنا .. أش اقول لكم عن بيت هذي الليلى ماشاء الله الله يزيدهم نعمه يارب .. قسم اني ماقد شفت مثله ولا في الاحلام ..

/
\
/

مقآطع من الجزء القآدم /

رد علي : نايف متصل يقول يبيك ..
*
قال : اش فيك أوقفي شوي خليني أخلص ..
همست : خايفه من اللي داخل ..
*

.: نهاية الجزء الرابع :.