عرض مشاركة واحدة
  #11  
قديم 10-17-2016, 03:14 PM
 

(( 2 ))
سمعت خالتي تقول : مشعلوه ليش جالس هينا قم يامال اللي منيب قايله قم فشلتنا ..
ابتسمت : سيبك منو ياخالتي أحيانا هوا يقفل تفكيره ..
ميشو : هيهيهي يعني ينقال لك المحقق كونان جبتيها مع وجهك ؟
قال فيصل : عندك اعتراض ياولد الخاله .. ساره احلا بنت واعقل بنت بالدنيا ..
خالتي : صادق فيصل .. قم احسن ما اهفك كف ..
ميشو : يمه لا تحرميني من السعاده ..
خالتي : ألحين جلستك على الارض عندك سعاده ؟! ..
ميشو : يمه يقولون الجنه تحت اقدام الامهات ألحين انا جالس بالجنه وناسه ..
مروى : أجل أذا كيذا بقوم أنا اجلس عند رجل امي ..
حسيت بغصه الكل يقول أمي الا انا .. الله يرحمها ان شاء الله حسيت ان الدموع تستعد للنزول كتمتها وابعدت فيصل عن رجلي وصعدت غرفتي ,,
الكل عندهم ام و أبو الا انا .. لا أم ولا ابو .. نزلت دموعي وكأنها شلال رحت للمرايا وجلست جنبها أراقب الدمعه كيف تنزل وتشق طريقها على خدي .. شي يؤلم الصراحه .. انفتح الباب ودخل فيصل ..
قال : تحسستي من الكلام اللي انقال تحت ؟! ..
هزيت راسي بـ لا : بس تعبت شوي ..
جلس على السرير : لا تكذبين حسيت لك لأني مثلك ..
كابرت : أبد فيصل شي تعودت عليه من يوم انخلقت على ذي الدنيا صار عندي شي عادي ..
سمعته يقول : لا ساره .. اذا انا الرجال ماتحملت ابد كيف ببنت حساسه مثلك ؟ أنا جلست معها سنتين انتي ولا حتى شفتيها .. كيف ماتحسين بالغصه ؟؟

أخذت ملابسي ودخلت اتحمم والمويا تختلط بدموعي اش ذنبي اول ماافتح عيني على الدنيا ما أشوف امي ولا ابوي ؟؟ خلصت وطلعت مالقيت فيصل .. قفلت الباب وجففت شعري ورولته .. مشكله اذا نسيت اني انتظر ذا اليوم .. خلصت رحت للكاسيتات اللي عندي واخذت اغنية امي لراشد وحطيتها حسيت اني محتاجه اتكلم .. مسكت دفتر وكتبت :..

أمي ..!
يآ أرق الكلمآت ..
وأعذبهآ على لسآني ..
ياأجمل المعآني ..
ويآ أحلاآ الحروف ..
أمي ..!
يآ نبع الحنآن الصآفي ..
كم اشتقت لكِ ..
يرآودني الحنين لرؤيتكِ مجددآ ..
وتجول بي الأحزآن لذكر اسمك ..!
ن :. نبع الحنآن ..!
هـ :. همسآت عذبه ..!
آ :. أحآسيس مفقودهـ ..!
ل :. لحن العشق ..!
أمي ..!
أرآكي وسط أحلامي حلماً جميلاً ..
يبتسم لمبسمي ..
ويشاركني أفرآحي والأحزآن ..
إن كآن فيهآ أفرآح ..
حضن دآفئ ,,
يستقبلني في أي وقت ...
وأذن صآغيه ,,
تستمع لأتفه الأمور وأعظمهآ في حيآتي ..
فم نآطق ,,
ينصحني ويواسيني ..
ويدين مشتاقتين لتقبيلها ..
ورجل ..,
أحتمي عندهآ من النيرآن ..
أمي ..!
لم أعد أبصر أو أسمع ..
هل ترحلين قبل رؤيتي وسماع بكائي ؟!
هل ترحلين قبل تقبيلي وحضني ؟!
هل ترحلين قبل مسح دموعي ؟!
هل ترحلين ؟؟
أظن أنكِ تسمعين حديثي وبكآئي ..
ومتأكدهـ تمآماً من عدم استطآعتك للإجآبه ..
وإن حآولتي ذلكـ ,,
لأنكِ وبكل أسف ..
رآآحلــه ...!!

ماقدرت اكمل كتابه من كثر الدموع وقفلت الدفتر .. سمعت صوت الاذان صليت ودعيت لها أكيد هي محتاجه أني ادعي لها .. وأبوي كمان .. ياحظك يافيصل شفت أمك وابوك وانا ولا شي .. غسلت وجهي وناظرت الساعه سبع ودقيقه أممم باقي وقت على الساعه 9 .. لفيت حجابي بحيث ماتبين الرولات ونزلت تحت وانشغلت بتحضير العشا
شفت خالي يتقرب قام قلبي يدق بقوه منه كان يبي يشيل حجابي ..
صرخت : أرجوك ..
والله لو انه فتحه قسم لأروح فيها .. ظل يناظرني نظرات غريبه غمضت عيوني أدري انه بيصفعني أو شي كيذا .. فتحت عيني مالقيته قدامي حمدت ربي ورحت المقلط وسألت عنه قالوا انه له نصف ساعه طالع .. معقول ؟! قسم اني مو فاهمه شي .. كيف طالع وانا شفته قسم اني شفته .. ابتعدت عن المقلط وكملت شغلي بعدين جلست على الكرسي وحطيت يدي على راسي بعدين قمت وعملت العصير .. ناظرت الساعه ثمان الا خمس .. الحمدلله خلصت قبل الموعد المحدد .. رحت المقلط لقيتهم متجمعين ..
قلت : صلحت العشا .. وينه خالي ؟؟
خالتي : صعد غرفته يتحمم ويرجع ..
انتظرناه وفعلا على الوقت المحدد .. أكلت فطاير بس بعدين قمت وصعدت لفيصل .. كويت له ملابسه ونزلت وكأن الموضوع عادي .. مر الوقت بسرعه وجات تسع الا ربع .. اتصل عبدالله على خالتي وقال لها انه جاي بالطريق .. فـ الضيوف جايين في الطريق .. ارتبكت بس حاولت اهدي نفسي صعدت غرفتي بحجه اني تعبانه ..

*
*

ورحت لبست العدسات وحطيت الكحله والقلوس ومكياج خفيف أسود .. فتحت شعري من الرولات ورتبته تقريبا كان جزء صغير من شعري متسلل بجرأه وشقاوه على وجهي .. لفيت الحجاب وطلعت طليت من الدرج لقيت خالتي تودعهم .. دخلت غرفتي وجلست أطل ..
شفت نايف ..
همست له : نـايف !!
أعطاني ظهره وقال : آمري ؟؟!
قلت : اذا وصلوا ناديني .. طيب ؟!
قال : طيب بس بسرعه لأن ابوي اتصل عليهم ..
قلت : انا خلصت بس مابي حد يشوفني على ابو اني نايمه ..
سمعته يقول : طيب انا رايح اغير ملابسي ..
ابتعد وقفلت الباب وقفت عند المرايا ورشيت عطر أخذت أكسسوار لليد وحطيته باليمين جنب الساعه انتظرت تقريبا سبع دقايق وانطرق الباب ..
همست : مين ؟!
سمعته يقول : اطلعي برى عند الزرع ..
قلت : طيب ..
عدلت عبايتي وتأكدت من شكلي وحجابي أقصد لثامي .. تسللت وطلعت تخبيت ورى شجره كبيره .. شوي وطلع نايف لي .. شفته يتلفت يمين ويسار ..
همست : نايف ..
كأنه سمعني وجاء لي ..
قال : جاهزه ؟!
قلت : ايه ..
رفع عينه بيتأكد وظل فتره يناظرني .. بعدين قال : اقري المعوذات على نفسك لا يحسدونك
خلاص يانايف أرجوك انا قلبي يدق بقوه وانت كيذا تزيد سرعته ..
مد لي لصقات : خذي ذا لفيه على اصبعك المحترق ..
ناظرته : كيف ؟! ..
اشر لي ان اعطيه يدي وفعلا لفه لي ..
ثم قال : خذي ذا جوالي ابدق عليك اذا طلع فيصل ..
قلت : وخالي وينه ؟!
ابتسم : لاتخافين قال لي انه عنده شغل ..
ابتسمت وأخذت جواله : مشكور ..
ابتعد عني وتركني مع خوفي وارتباي .. وأخيرا بعرف السر .. انتظرت شوي ثم سمعت " عشان الحب واللي بيني وبينك .. عشان الحب ... " طبعا رفضت المكالمه ودخلت المقلط ..

*
*
*

شفت شاب تقريبا بعمر فيصل ماأتوقع سمع صوت الباب ..
قلت : السلام عليكم ..
رفع عينه وظل يناظرني فتره استحيت منه .. وقلت : السلام عليكم ..
كأنه انحرج : وعليكم السلام .. خير ؟!
قلت بجرأه : اسمعني ارجوك .. باختصار انت كل يوم جمعه تيجي وتاخذ فيصل مين انت ؟؟ ووين تاخذه ؟ وليش كل يوم تاخذه اصلا ؟!
ناظرني : انتي مين ؟! ..
ارتبكت ياربيه اش اقول له ؟ ..
سمعته يقول : انتي مروى صح ؟!
خيبه فيصلوه مخبر أخوياه عنها وجع ان شاء الله .. سكت فتره ..
ثم قلت : ممكن تخبرني وين تاخذه ؟!
تكتف : يهمك تعرفين ؟!
قلت له : أكيد ..!
ابتسم : فيصل عندك روحي اسأليه !!
وجع ذا اش فيه ؟! مايفتهم ..
ابتسمت وناظرته : أنا ماسألتك علشان تقول لي كيذا انا سألتك ابي اعرف ..
ضحك : ليه تسألين ؟!
دخلت خصلات شعري بغرور : فيصل عندي اقدر أسأله بس مابيه يحس اني اراقبه ..
ابتسم وجلس فتر يناظرني .. قلت مابنزل عيني علشان لا يحس اني منكسره صحيح استحيت بس عادي ..
انقهرت : بنتاظرني كثير ؟!
قال : اش تبيني اطالع وانتي واقفه على راسي ؟!
شوي واقوم اذبحه .. سمعت نايف " فيصل الحين بتروح ؟؟! "
اخترعت وقلت : اسمع لاتخبر فيصل اني جيت لك ابدا ارجوك ..
سمعته يقول : ليش ؟
هذا اللي برتكب فيه جريمه : مو شغلك واسكت ..
وطلعت من الباب وتخبيت ورى الشجره ..
شوي وشفته طالع كنت بدخل البيت بس شفت فيصل طلع وراه يعني علشان لا احس يطلع بعده .. تأكدت انهم طلعوا ودخلت البيت صعدت غرفتي لقيت ورقه أول مادخلت على الارض عند الباب مباشره " خبريني بالنتايج انتظرك بنفس الوقت والمكان .. ولد خالتك " تركت الورقه ورحت ضبطت أموري ..

/
\
/

مقآطع من الجزء القآدم /
ابتسم : طيب ما اخذتي اسمه رقمه عنوان بيتهم ؟!
*
سمعتها تقول : ماقالت لك مروى لحد يدخل ؟!
*
سمعته يقول : اليوم مابتروحين لا انتي ولا مروى المدرسه تفهمين ولا لا ؟!
*
رفع عينه لي ورجع ناظر الأرض وهمس : مروى .!!


.: نهاية الجزء السآدس :.