طلعنا من الفرصة وحطيت ادامي كتاب التاريخ وانا ناطرة يجي الاستاذ، ورجعت برمت عند قمر الليل، علما اني بعرف انو بيحب نوال وهي رفيقتي المقربة بس ما عم اقدر انساه، بس اطلع فيه وهو مبتسم بموت ببسمتو، للاسف هالابتسامة الجذابة من نصيب نوال، قاعدة حدو ومش شايل عينو عنها، طلعت فيها لشوفها عم تطلع فيني متضايقة، برمت وجي لادام لاتهرب من نظراتها الي، شكلها شافت نظرتي الذايبة بحبيبها، معاش برمت لعندهم وفجأة اجتاحتني كآبة كبيرة

فاتت هبلة من شلتنا عالصف وهي عم تقول مستعجلة: "اجا الاستاذ اجا الاستاذ" سكت الكل وقعدت هي محلها ونوال رجعت لمحلها حدي وفجأة بيفوت عالصف وقح البرية وبيقعد عطاولة الاساتذة، قمت معصبة وانا عم هاجم: "ما عنا فيزيك اليوم، هلاء عنا تاريخ"

رفقاتي شكلهم كانو بدهم يعترضو كمان بس لما شافوني هيك قالو "كفيتي ووفيتي" اطلع فيني الاستاذ بملل رجع قال هو عم يأشر لتلميذ حتى يعطيه كتابه ليشرح فيه "شكرا عالترحيب الحار، على كل حال استاذ التاريخ غايب والادارة طلبت مني علمكم فيزيك هالحصة لانكم متأخرين بالمنهاج"

رد عليه التلميذ الي طلب يستعير كتابو: "متل ما بتعرف اليوم ما عاساس عنا فيزيك، فما جبت معي الكتاب"

شرد الاستاذ شوي رجع بعتو على شعبة تانية ليستعير منهم كتاب، قمت انا واعترضت:
"انا ما بعرف افهم الشرح اذا الكتاب مش ادامي"

طلع فيني الاستاذ باستخفاف وقلي: "عاساس رح تفهمي لو الكتاب كان ادامك، حافظي على عقلك بالواقع بعدان طالبي بكتاب ادامك"

عصبت وبرمت وجهي عنو منزعجة فقام قمر الليل واعترض لنفس السبب واضاف على كلامي انو هو قادر يحافظ على عقلو بالواقع، ومن بعدو اعترض نص الصف، تأفف الاستاذ من ازعاجنا رجع قال للتلميذ الي رح يطلب الكتاب انو يجيب مجموعة كتب ليكون في كتاب واحد لكل شخصين عالاقل، راح واجا ووزع الكتب علينا وبلش الاستاذ الشرح، ولما اخيرا خلص اختار اصعب تمارين ليتحدى فيه قمر الليل ليشوف اديش بيقدر يحافظ على عقلو بالواقع وقال:

"لنشوف اديش اجت فايدة وجود الكتاب ادامك، اطلع حل المسألة رقم خمسة قمر الليل..."

هون انا انصدمت، والصف بلش يتهامس، رفع الاستاذ نظرو بسرعة واطلع فيني مصدوم من اللقب الي هرب منه بالغلط وانا احمريت واصفريت واخضريت، حاول يتدارك الموقف بسرعة وقال:

"قصدي اريج، اطلعي حلي..."

هون انا شكرت ربي لان ما اصر على قمر الليل، ما بدي الطلاب يربطو اللقب بايمن لا من بعيد ولا من قريب، والا اذا وقع دفتر ذكرياتي بالغلط بايد شي حدا منهم بتنكشف كل اسراري، وقفت من المقعد وطلعت عاللوح بينما همس الطلاب صار يزيد بدل ما ينقص، معقول ما مرت عليهم الخدعة؟!... امري لله، ان شاء الله ما يكتشفوا شي

وقفت ادام اللوح مسطولة، بسبب الي صار بهاللحظة معاش عرفت ركز، او انا هيك فكرت، لان كل المسائل بالنسبة الي متل بعضهم فما عرفت انه اختار اصعب مسألة، اطلع فيني الاستاذ قلي:

"شو؟ استفدتي من وجود الكتاب ادامك؟..."

اطلعت فيه معصبة وقلتلو من بين اسناني بعد ما احمرو خدودي: "كل الحق عليك... لو انك ما قلت شي مش لازم تقوله كنت رح اقدر ركز بكل سهولة، بس..."

قطع كلامي وقلي:

" انسي، ارجعي من مطرح ما جيتي..."

رجعت معصبة وطلب من ايمن يطلع يحل المسألة، طلع وصار يفكر وحلها بعد تفكير، واطلع بالاستاذ، ابتسم الاستاذ وقال:

"على الاقل البعض ما بيحكي عالفاضي، ارجع ايمن لمكانك"

حمل حالو ورجع عم يتبختر كأن عم يقاهر فيني وبلش الاستاذ يشرح حل المسألة للصف، انا بكل الحالات متل ما قال الاستاذ، وجود الكتاب ادامي او عدمه متل قلتها، كرمال هيك قررت اتناسى الشرح وفش خلقي بدفتر الذكريات، من حسن حظي انو مقعدنا شوي ورا، فما بيقدر يلاحظني بسهولة، الاغلب يفكرني عم اكتب حل المسألة

طلعت دفتر الذكريات وطلعت كل شي بقلبي من هالاستاذ، انا خلقة معصبة منو بسبب الي اكتشفو مبارح، انو بيكرهني من اول ما التقينا لاني بشبه خطيبتو، وهلاء الموقف الي حطني فيه، بيصر ديما يحرجني ويضايقني بس لانس بشبه خطيبتو، قاعد ينتقم منها فيني، طب انا شو ذنبي اذا هي تخلت عنو، يروح ينتقم منها هي، وفوق هيك كان عشوي بيفضح واحد من اهم اسرار دفتر ذكرياتي

بينما كنت عم اكتب بلاحظ شي طويل واقف حدي، اطلعت لفوق لشوف وقح البرية عم يطلع فيني متكتف معصب، سكرت الدفتر عالسريع محرجة، سحبو من ايدي وقلي "كرمال هيك ما عم تعرفي تنتبهي للدرس؟ الافضل خليه بعيد عنك لكانت خلصت الحصة"

اخذ الدفتر معو وحطو على طاولتو وهو عم يقول معصب: "بتمنى تنتبهي للشرح احسن هالمرة، السنة عندك تقديم رسمي، انتبهي لمصلحتك انت..."

برمت وجي عنو، عاساس كتير مهتم، كل الي بيهمو يهيني ادام الكل ليحقق انتقامو مني لان ما قدر ينتقم منها، رجعني صوتو وهو عم ينبهني لانتبه للشرح، عملت حالي منتبهة بينما عقلي عم يفور منو ومن تصرفاتو ومش قادر يركز الا باختراع طريقة اجرامية لانتقم منو، بس للاسف الشغلة رح تضل ضمن الخيال، لان لو قتلتو او عذبتو باشرس الطرق رح فوت عالحبس وضيع مستقبلي، على كل حال هو استاذ بديل، فترة قصيرة وبيرجع بيسافر ليكمل دراستو وبخلص منو...

رن الجرس وطلع الاستاذ من الصف وانا شكرت ربي لان خلصت هالحصة على خير، فاتت معلمة البيولوجي، رغم اني بكره المواد العلمية الا اني كنت حب هالحصة، ورغم فشلي بالمواد العلمية الا اني كنت انجح بهالمادة ولو عالحفة او على كم علامة فوق الحفة، اخيرا قدرت ابتسم مجرد ما شفت وج المعلمة وارتخى عقلي شوي بعد ساعة تشنج ومرت بقية الحصص على خير

قبل ما اطلع من المدرسة حسيت في شي غريب عم يصير، نوال وايمن كاينين مش طبيعيين، تنينهم معصبين وهو راح بدونها بلا ما يحكيها او يعطيها وج، وهي مشيت متضايقة، مدري شو بهم، اسرعت لعند نوال وقلتلها:

"يا خاينة، لشو الصداقة، راجعة لحالك عالبيت، قولي عندي صديقة يوميا عم ترجع لحالها بسبب حبيبك، بما انك اليوم راجعة لحالك خبريني حتى نرجع سوا..."

اطلعت فيني نظرة احتقار بحياتها ما استعملتها مع حدا، عاساس هي البنت الطيبوبة، بس هالمرة كانت مش طبيعية وفجاة بتقلي

"انت عم ترجعي لحالك يوميا؟ كل يوم بشوفك راجعة مع استاذ الفيزيك، حلكم ترتبطو بقى حاجي تعملو قلق للصف وتسمولنا بدننا..."

الصراحة كلامها صدمني، بغض النظر عن طريقتها بالكلام، بتحكي بكل ثقة كأنها واثقة اني بحب وقح البرية، بعدان ارتبطت فيه او لا هي ليش هيك مزعوجة، لا تكون بتحبو من ورا ضهري، بتحبو او لا مش ذنبي، ما في شي بيني وبينو، سارعت لدافع عن نفسي وانفي كلامها بس زلة لسان وقح البرية اليوم فوتتني بالحيطان، قالتلي:

"وبشو بتشرحي لطشة الاستاذ اليوم؟ فيكي تنكري انو تغزل فيكي؟...
وانت شو كانت ردة فعلك؟ احمرو خدودك وبس...
علما انك مش بنت مسكينة او جبانة، لو الشغلة ما عجبتك كنتي نشرتيه متل ما بتعملي بالعادة، اذا بتحبو بعد ارتبطو وريحونا بقى حاجي مقعدينا على اعصابنا..."

بعصبية صرخت:
"وليش بدي قعدكم على اعصابكم، شو كاينة قاعدة عقلوبكم حتى تنشغلو فيني وبارتباطي فيه او بغيرو، هيدا شأني انا بتمنى ما تتدخلو فيني..."

رفعت راسها معصبة وقالت:
"وبتقوليلي لشو الصداقة وياخاينة!...
وينك من هالكلام هلاء... "

راحت وتركتني وراها وانا مصدومة مش قادرة استوعب كل شي صار اليوم فجأة، رجعت للبيت وكبيت حالي عالتخت وراسي عم يبرم من كثرة احداث اليوم، قمت متكسلنة لسجل الي صار قبل ما انسى، فتحت شنطتي، قعدت فتش على دفتر الذكريات وما لقيتو، فتشت عليه اكتر من مرة وعالفاضي بالاخر تذكرت انو حدا غبي اخذو مني بنص الحصة وحطو عطاولتو ورجعت عالبيت ونسيت اخذو، رح اضطر انطر لبكرا لاقدر استرجعو، بتمنى بهالوقت ما يلاقيه حدا قبلي بالاخص قمر الليل، لانو اذكى من وقح البرية، اكيد رح يكتشف الالغاز، ورح انفضح، فكرت شوي بالموضوع رجعت ابتسمت

معقول لو اكتشف اني بحبو يمكن يصير يحبني هو كمان، ابتسمت بحماس ورجعت فكرت، عالاقل الوقح بيكون خدمني بشي، فاذا بهالحالة لنتأمل انو الوقح يلاقي الدفتر وما يلاقيه حدا غيرو، علما انو الباقيين غباية، الاغلب يفكرو ان قمر الليل هو الاستاذ لان مفكرينا منحب بعض، او عالاقل هو بيحبني، بالاخص بعد الي صار اليوم، بس اذا القمر قرا مذكراتي حيعرف اني ما بحب الوقح ويمكن يفكر فيني، حسب ما اذكر انو هو طلب خبر نوال عن مشاعرو بعد حصة الفيزيك، احتمال كان يحبني بس لان فكر الاستاذ بيحبني وفكرني بحبو غيير رأيو او يمكن طلب مني خبر نوال بس ليختبر مشاعري، ولما خبرتها صدق اني عنجد ما بحبو وضل مع نوال...

تأففت وكبيت حالي عالتخت مرة تانية، ما بعرف ليش بحب عيش بالاوهام ديما، كان الصبح واضح انو بيحبها، نظراته الها وابتسامتو، ما في اوضح من هيك، خليني بلا ما اتأمل شي منو احلى ما اكلها بخعة جديدة منو، الاولى كانت كافية، لو كنت وقتها شوي اشجع من هيك وخبرتو عن مشاعري، هلاء خلص راحت علي، لازم اتقبل الموضوع كرمال رفيقتي...

شكلي رح اضطر فتش عشي تاني اتسلى فيه اليوم غير دفتر ذكرياتي

سؤال:
1 -ليش هيك حكت نوال مع اريج بهالطريقة علكا انها بنت لطسقة وطيوبة واريج صديقتها المفضلة؟

2- شو توقعاتكم للفصل القادم

هالفصل يمكن كان شوي ممل
بس الاغلب الفصل القادم يكون حماسي ^^
يعني حافظو على معنويات عالية
في امان الله خ