 السلام عليكم ورحمة الله وبركاته،
شخبارج فريال؟ عساج طيبة؟
حبيت تنسيقج هادي والألوان فاتحة تريح العين.
الأطفال صعب الواحد يفهمهم، الشي اللي يفرحهم بلحظة ممكن جدا يزعلهم بلحظة ثانية.
والمصيبة الأكثر الأطفال العصبيين.
على كثر مادرست مقررات عن نفسية الأطفال على كثر ماحسيت اني مافهمتهم :\.
وانا اقرا الموضوع تذكرت طفولتي، واعترف اني كنت طفلة جدا عصبية.
كنت وايد اغربل امي وارفع ضغطها، لدرجة حزات كانت تتركني وطبعا لاني عنيدة وعصبية اقعد اصيح لساعات.
وبعد ماعرفت انه الصياح مايفيد، قلت ليش اعور راسي واصيح صج ، خل اسوي روحي اصيح،
وبالنهاية ولا شي جاب نتيجة لما عقلت وتركت الدلع عني  .
على طاري الرسم على الجدران؟ ياما تفننت انا واخواني فيه . ومسكينة امي كانت كل فترة تتصل بالعمال عشان يصبغون الطوف . ونرجع احنا ونرسم على الجداران وتتكرر المسألة .
الشي الوحيد اللي اقدر اقول انه الحل هو الصبر،
الاطفال يبيلهم طوالة بال، لانه معالجة العصبية بالعصبية مارح تفيد. بالعكس بتزيد المشكلة.
والمفترض انه قريب الطفل (سواء كان احد والديه او اخوانه) مايصف الطفل بالعصبية والدلع، ليش؟
لانه اذا الطفل كرر التصرف وانا كل مرة اقول انه عنيد او عصبي، اهو بنفسه راح يرجع سبب تصرفه للعناد والعصبية. بما معنى اكبر غلط ممكن نسويه بهالحالة انه نحط اسم او وصف للحالة اللي صايدته.
مثال اذا كل مرة جفت الياهل يشخبط على الجدران، وكل مرة اقوله وقف هالعناد او وقف دلع، الطفل لا شعوريا بيقعد يفكر "انا اسوي هالشي لاني عنيد".
طبعا هالشي غلط لان مانبيه يفسر أفعاله بهالطريقة، نبيه يفهم انه تصرفه غلط ولازم يصححه. كأني طلعت عن الموضوع شوي 
يعطيح العافية ماقصرتي 
التعديل الأخير تم بواسطة مَنفىّ ❝ ; 06-11-2018 الساعة 11:56 PM |