وشوي جات فجر وراحت مع طلال ودخلها المجلس ودخلت فجر ورجولها تتصاقع في بعض ومنزله عيونها..
فيصل شاف فجر وطير عيونه فيها كانت طالعه ولا اروع لابسه فستان ابيض فيه موجات وردي خفيفه..وكان مخصر على جسمها ووسيع من تحت..كان سيور وفتحة الصدر شوي كبيره.ومسويه تسريحه بسيطه كان مرفوع منه جزء ومسويته تكسير(مثل نانسي عجرم) والميك اب كان هادي وساحر في نفس الوقت..
فيصل: هلا والله وغلا ومرحبا تفضلي..
فجر ميته من الحيا: زاد فضلك ..
وتوها بتجلس مسك فيصل يدها وجلسها..فجر ثبتت في مكانها من الحركه حتى التنفس ما عاد صارت تتنفس ..تبي تاخذ نفس ما قدرت لما ترك فيصل يدها..
فيصل كان يطالعها وكأن وده يحفرها بعيونه ويشبع نظراته منها ..يحس ما وده يرمش عشان ما تفوته لحظه...
فجر منزله عيونها .ولما رفعت عينها عليه لقته يطالعها وبنظرات بتاكلها الا شوي...ونزلتها بسرعه..
فيصل: فجر قلبي ارفعي راسك..
فجر قال قلبي ولا ما قاله داخت وراحت عالم ثاني ورفعت راسها شوي..
فيصل: ايه كذا احلى ............وشلونك وش اخبارك.
فجر: الحمد لله...وانت؟؟
فيصل: انا...انا من يوم شفتك وانا بخير..
فجر ابتسمت ابتسامه صغيره بس تدوخ..
فيصل: آآآآه يا قلبي...والله قلبي يعورني.
فجر طالعته بخوف: وش فيك؟؟
فيصل: ابتسامتك تبي توقف قلبي..
فجر: اجل خلاص ما راح ابتسم..
فيصل قرب منها لما صار خلاص ما بينهم شي وتقريبا وجه في وجهها وهمس في اذنها: ليش تخافين علي..
فجر من قرب منها وهي تحس اطرافها جمدوا والدم وقف في راسها وثبتت في مكانها وقالت بصوت يمكن هي ما تسمعه:اكيد...
فيصل بعد عنها شوي: اه يا قلبي اليوم يوم فرحك فجر تخاف عليك..
دق الباب..
فيصل : من ذا النشبه..
طلال: النشبه انا يا النسيب..
فيصل : وش تبي؟؟
طلال: ما ودك تلبسها الخاتم..
فيصل: ايوه صح"وناظر فجر شافها لابسه الشبكه ومابقى الا الخاتم" ليش ما خليتيني البسك..
فجر استحت ونزلت راسها..
فيصل : ما عليه الجايات اكثر..
فجر خلااااااص ما عاد قلبها يتحمل اكثر ودها تقوم وتركض الا مالا نهايه..
طلال: لا تحرج اختي تراها مو متعوده..
فجر طالعته بنظره بمعنى شغلك بعدين...
طلال: ادري ادري والله يا فجر بتذبحني بسبتك يا النسيب بس خذوا الخواتم ولبسوا بعض ترى عندي اشغال..
خذا فيصل الخاتم ومسك ايد فجر حس فيها تنتفض وبارده طالعها وهو مبتسم..
فجر من يوم مسك ايدها وهي تحس انها انشلت من كل شي من التفكير والحركه والدم كل شي فيها وقف الا قلبها..
ولبسها فيصل الخاتم وبعدها قعدت فجر تطالع يد فيصل نست وش تسوي فيها وفيصل كان يستنها..
طلال:ياهوووووووه خلصينا ترى ورانا شياب ازعجونا..
فجر صحت من اللي كانت فيه واخذت الخاتم وما مسكت يد فيصل ودخلت الخاتم وودها يدها ما تلمس ايده ودخل الخاتم في اصبعه..بس فيصل مسك ايدها وباسها..
فجر قعدت تطالع فيصل وبعدها طلال..
طلال ابتسم وطلع:ترى المصوره بتجي بعد شوي..
فجر ارتاعت:من قال؟؟؟
طلال: نوف قالت..
فجر في نفسها"هين اوريك يا نويف تسوينها فيني"
ودخلت المصوره وصارت تطلب منهم يسون حركات وفجر ما بقى فيها شي من صغرها من الحيا..
طلعت فجر واخير وراحت عند البنات وفيصل طلع عند الرجال وقبل كل هذا جا فواز وسحب فيصل سحب عشان يطلع..
&&&&&&&&&&&&&
البنات
ماسكين فجر تحقيق..وش قلتي وش قال وش سويتي ووش سوا..
فجر ذكرت نوف:نويف تعالي هنا..
نوف عرفت وش تبي منها بس سوت نفسها ما تدري:خير..
فجر:من قال لك تجبين مصوره..
نوف: انا!!! من قاله..
فجر: احلفي بس..طلال قال لي..
نوف: هذي والله فكرة العنود..
لفت فجر على العنود لقتها مبتسمه:عنيد وش هالحركات..
العنود: هذ جزاي اللي قلت عشان الذكرى...الا ما قلتي لي متى بتطلع الصور عشان اتفرج عليها..
فجر: هين تفرجين عيلها..
ريم: فجر لا عاد لاتقولين..كفايه ما قلتي لنا وش صار بعد ما راح تخلينا نشوف..
فجر: ايه احسن تستاهلون..
عبير: صح كلامك يا فجر بس بتوريني انا وياك لحالنا..
فجر: مسكينه حتى انتي..
نوف: والله يكسرون الخاطر ..حرام..
دق موبايل ريم..
ساره: هلا والله..
ريم: اهلين سويره وشلونك..
ساره: سوير في عينك..هاه وش اخبار العروس..
ريم: ساره اسمعي..شوي واتصل عليك..الحين بيشغلون الاغاني وماراح اسمعك..
ساره: اوكي...
وفي نفس الوقت..
سليمان: ابتصل على مها اشوف خلصوا ولا لأ..
تركي: ما ظنيت..
سليمان: بتأكد.........الوووو..
مها: اهلين..
سيمان: اطلعي باكلمك برى شوي..
مها: طيب بس راح اتاخر شوي..
سليمان: اوكي بس مو مره تراني انطرك..
راح سليمان ووقف بعيد شوي عند مدخل الحريم ..وريم طلعت عشات تكلم ساره لان داخل ازعاج...
طلعت وعيونها على موبايلها وتتصل عل ساره....سليمان شاف احد طالع توقع انها مها ..ويوم شاف ريم انهبل اليوم طالعه غير عن كل مره كانت عذااااب.
ريم كانت لابسه فستان حرير اخضر..لف على الرقبه وفتحة الصدر طويله ونص الظهر طالع وفي الخصر حزام ذهبي روعه ..وبعدين قصير لحد الركبه ولا بسه سندل ربط اخضر وفيه كرستالات ذهبي ..ومسويه ميك اب ذهبي خيالي وتسريحه بسيطه رافعه نص شعرها ومسويته تكسير وفي النهايه شريطه ذهبيه واخضر ..ومن قدام على جنب شريطه صغيره ذهبيه..
سليمان فاتح فمه ومطير عيونه وريم تتجه له وهي ما درت عن هوى داره..
ريم: اهلين سوير..
ساره: اهلين رويم كيفك..
ريم: والله وش اقول لك ماني مبسوطه..
ساره: افااا ليش؟؟؟
ريم: عشاني اليوم ما شفت س
سليمان بصوت هادي: افاا ليش رورو زعلانه من زعلها..
ريم تلفت يمين ويسار تبي تتأكد انه حقيقه: هاه..
سليمان: اقول ليش رورو زعلانه من زعلها..
ريم"يعني ما تدري":ما شفت...ماشفت ساميه..
سليمان استغرب: ساميه!!!
ريم : ايه ساميه صديقتي من ايام الابتدائي..
سليمان: اهااا..
ريم نست انها ما تغطت او بالاصح ما تسترت..
سليمان يطالعها ويحاول يشيل عينه عنها بس ما قدر ..
ريم حست ان نظراته غريبه وبعدها انتبهت لعمره: خلاص اوكي انا بروح..
سليمان: طيب ابي اقولك شي..
ريم: آمر..
سليمان بصوته العذب: اليوم طالعه ملكة جمال اقري على نفسك..
ريم حست انها بتتطير من الفرحه وابتسمت له: تسلم عيونك الحلوه..
ودخلت ريم وطلعت مها..
سليمان شاق الخشه ومفهي وما يدري وينه فيه..
مها: نعم سليمان بغيت شي..
سليمان: نعم انتي وش تبين..؟؟
مها: سليمان وش فيك انت متصل علي وش تبي؟؟
سليمان: انا متصل ما اذكر<<شكله فقد الذاكره..
مهاعصبت: اذا قصدك تستهبل ترى مو رايقه لك..
سليمان تذكر: ايه صح كنت بسألك خلصتوا؟؟
مها: عشان كذا مطلعني صدق انك سخيف..لا ما خلصنا..
سليمان: طيب اذا خلصتوا اتصلوا علي اوكي..
مها: زين..
ودخلت عند الحريم.....ريم من دخلت وهي في عالم ثاني ..
العنود: رويم وش فيك فاتحه فمك..على الاقل سكريه..
ريم: ما اقدر..
العنود: ليش؟
ريم: كذا ما اقدر..
العنود: تبيني اساعدك...
ريم: تصدقين اني اليوم مبسوطه بشكل مو طبيعي..
العنود: حتى انا بشكل خيالي واكيد اللي باسطك اللي شاكه فيه..
ريم قررت تعترف للعنود اذا اعترفت لها: طيب انا راح اقولك اذا قلتي لي وش عندك..
العنود: اوكي اذا رحنا بيتنا انشا الله راح يكون يوم الاعترافات..
وبعد كذا دخلوا الحريم للعشا وكان بوفيه كامل ..فيه كل اللي يحبه قلبك..
وبعد العشا راحوا الحريم وما بقى الا الاهل..
ام مشاري: ما اقول الا الله يسعدهم ويوفقهم..
ام فيصل: امين..
ام فواز: امين اهم شي التوفيق..
&&&&&&&&&&&&&&&&&&&&&&&&
عند البنات
شجون:واخيرا يا فجر صرتي مرت اخوي..
فجر مستحيه: هههههه..
نوف: فجر تصدقين لحد الان ما صدقت وما استوعبت انك تزوجتي..
فجر: طيب عادي مو لازم تصدقين..
العنود: الله يعينك يا فجر سمعت ان فيصل شري وعصبي وايده طويله ويطق على اتفه الاسباب..
فجرخافت: لالا ما اتوقع انه كذا.. لا تخوفيني..
شجون: ما عليك منها اصلا هي غايره منك وفيصل اخوي اطيب واحن قلب في الدنيا..
فجر: ادري زوجي واعرفه زين..
ريم: بدينا بدت حركات اني ادافع عن زوجي..
رغد: خلونا شوي من فجر بكره تجهزوا عشان دبي..
الهنوف: واااااي وناااسه..
العنود: انا شنطتي مجهزتها من امس..
ريم: الله..من امس وش دعوه..
العنود: يقال لكم متحمسه..
ريم: وعبير؟؟
العنود: يعني ما تعرفينها امي اللي ترتب شنطتها ..هي ما تشتهي تسوي شي..
عبير: العنود والله فيني النوم خلينا نرجع..
ريم: صح ذكرتيني بروح اقول لامي اني بنام عندكم..
رغد: بتنامين؟؟
ريم: ايوه..
رغد: انا معك...
ريم: ياربيه وانا وين ما اروح انتي وراي وراي ..ياربي وش هالعيشه..
رغد: اعصابك بعدين وش دخلك فيني انا حره انام في أي بيت يعجبني..
ريم: كيفك انا راح انزل اقول لامي ..العنود تعالي معي..
العنود: يله..
نزلوا عند ام مشاري..
ريم: ماما..ماما..
ام مشاري: هلا ..
ريم: ماما ..ممكن تخليني انام عند عمي اليوم..
ام مشاري: وش حقه تنامين عندهم..بعدين ارجعي البيت وجهزي شنطتك واغراضك..
ريم: اذا على الشنطه بكره برجع بيتنا من الظهر واجهزها..بس الله يخليك خليني انام عندهم..
ام مشاري: روحي خلاص عورتي راسي..
ريم: هيّّّّّّّّّّّّّّّّّّّّّّّا عاشت امي..
العنود: مشكوره خالتي يجي منك اكثر..
ام مشاري: ليش ذابحه ابوك انا..
العنود: مو هم يقولونها..
ام مشاري: روحي الله يهديك ترى راسي بينفجر منكم..
ريم: والله انك تحفه يا بنت عمي هذي يقولونها اذا سبك احد..
العنود: اهاااا وانا على بالي يجي منك اكثر يعني شي زين..
ريم: امشي امشي ادري ان مخك قوطي..
العنود تضربها: انا مخي قوطي...
ريم: لالا خلاص مخك درج ولا يهمك..
العنود: ريم ترى وصلت معي ترى بأرفسك لين توصلين بيتنا وفي السرير بالتحديد..