هذيك انا متربعه بين نجمين
وهذا مجالي مبعد عن مجالك
لاتتعب النظرة لاتتعب العين
ماني على يمناك ولا شمالك
تسمع صدى صوتي ولاعارف وين
وتشوفني طيف يعانق خيالك
لو تعتذر لو ترمي حبال تكفين
تقصرعن كفوف المسامع حبالك
انا لقيت اللي يعوضني سنين
ما قلت لك( يافلان) بلقى بدالك؟
هذاك ترجح كفته بالموازين
يوم انتشلني من بحور المهالك
وبل الخفوق بمزنة العطف واللين
واطري عليه بطاري ما طرالك؟
وكان الرجا في رجعتي لك بحرفين
تقول (حب) ؟ اقول لك كيف حالك؟
ليه؟ومتى؟ وشلون عني تغيبين؟
الفاظ يتعب منها طول بالك
اسمع كلامي واترك الجيم والسين
كلمه واظني قبل ذا قلتها لك
ل اني عزيزة نفس بنت الغزيزين
هذا الجواب اللي يدور سؤالك