والله العظيم الموضوع خطير .. صدق في أشياء كثيرة أشوفها غلط بس اسكت 
واقول انا مالي دخل (( كل واحد عقله في راسه يعرف خلاصه)) من اليوم بلا خلاص بلا بطيخ
والله كلامها صحيح مية بالمية الله يوفقها دنيا واخرة ياناس المجتمع تغير مع الاسف للاسوى
انا بعد ماقريت هالموضوع لن ارسل اي رسالة فيها قلة ادب واسال الله ان يتوب علينا
واذا فيه احد من الاعضاء الكرام يبي يرسل شي ينفع الاعضاء المشتركين نرحب فيه
والله الموضوع طويل جدا جدا جدا لكنه جميل وانصحكم بقرأته
.الله اكبر الله اكبر الله اكبر
ما اقدر اقول الا
لا فض فوك
ياليت تنشر لاكبر عد ممكن
أفضل بريد وصلني هذا العام بدون مبالغة
السلام عليكم ورحمة الله وبركاته
حياكم الله
هذا أول موضوع لي في هذا المنتدى
ومتفائلة أنه يتثبت ويلاقي صدى حلو
لأني عارفة رقي العقليات اللي بأحاورها
أنا لي شهرين أقرأ في هذا المنتدى
وبصراحة حاسة إني بين صديقاتي
أبهرني تعاونكم
وأهنيكم على المشرفات
ندخل في الموضوع.. وراح أتكلم بعفوية وتلقائية
لأن الكلام اللي يطلع من القلب مباشرة يدخل القلب
أنا بنوتة عمري 23
تغيبت عن مجتمعنا السعودي 8 سنوات
ورجعت له من شهرين
بصراحة تفاجأت وانصدمت من التغيرات اللي حاصلة
في المجتمع بكل فئاته وطبقاته .. في النوادي الرياضية..في الأسواق..والأهم في الجامعات والمدارس..وفي المنتديات والمدونات
تمنيت أني ألقى المجتمع تطور للأمام..أو تقدم للأفضل
لكني للأسف لقيت النقيض
رجوع خطوااات للخلف..من جميع النواحي
قد يكون كلامي فيه غلظة شوي
بس يقول لك المثل
يا بخت من بكاني وبكى الناس علي
ولا من ضحكني وضحك الناس علي
تساؤلات كثيرة أرددها بيني وبين نفسي وما ألقى لها أي جواب
وأنا متأكدة أنها تتردد على كل رزين وعاقل شرواكم
هل لما زادت رفاهية الحياة يزداد تخلفنا؟؟
هل لما تطورالعلم وتسهلت الطرق له يزداد جهلنا؟؟
ليه صرنا مجتمع سطحي
لاهم ولا رؤية ولا رسالة ولا هدف من الحياة
التفكير والتركيز على المنظر والمظهر
فيه كاريكاتير أول ما شفته زعلت
لكن ألحين حسيت إنه أبلغ من كتب ممكن نكتبها
الكاريكاتير يمثل شعوب العالم
فمثل الشعب السعودي
بكرتونات مزينة وإذا فتحتيها لقيتيها فاضية
وهذا واقع البنات اليوم مظهر ومنظر
ولو تقولين لها 1 ×1 كم؟
تنحت
لو تقولين لها وش آخر كتاب قريتيه؟
قالت هااااه
"بغض النظر عن الروايات التافهة اللي طايحين فيها هالفترة"
-----------
لو نص هوس المظاهر هذا كان على عقولنا لكنّا أنجح الشعوب
لأنه ببساطة كل شيء متوفر عندنا
لا ناقصنا مال ولا قدرات عقلية
------------------
الأجانب فلوسهم رايحة على تعليم عيالهم وتثقيفهم وصحتهم
تلقين راتب الأب والأم ضئيل ومستحملين شظف العيش عشان يرسلون ولدهم برى يدرس شهادة عليها القيمة
بينما عندنا يستحملون الديون والأقساط عشان تسوي زواج كله إسراف وتبذير وآخرته الناس طالعة منتقدة
وإلا ديون وأقساط عشان تقول صيفنا برى شهر كامل
والله أعرف وحدة شخصيا تقول السفر بالنسبة لي عذاب لأننا إذا سافرنا
طول السفر طقاق أنا وزوجي وأنا أحرسه لا تناظر وهو يحرسني لا تناظرين ..قلت طيب خلوا سفركم لبلدان محافظة أو لا تسافرون حطوا فلوسكم في البيت تغيير ديكورات وأثاث
عصصصبت قالت خيييير سلايفي لين سولفوا أصير بينهم ما سافرت
وإلا إذا سولفوا صديقاتي إلا أنا ما سافرت وش بيقولون عني
!!!!!!!
مافيه تعليق
-----------------------
أنا لما جيت بعد هذي المدة توظفت في بنك
ولاحظت إنه إذا جت العميلة أم ساعة ألماس فخمة وشنطة قوتشي الكل يتبادر لخدمتها
وإذا جت العميلة اللي مظهرها ما فيه بهرجة.. تستجدي الموظفات يجون يساعدونها
والمضحك في الوضع إني ألاقي العميلة البسيطة ما شاء الله حسابها شي وشويات..وهذي أم البهرجة حسابها بالسالب(عليها قروض وسيارات تقسيط)..وعنوانها يا إما شقة وإلا أجار
مو انتقادي على القرض ولا على السكن انتقادي
هو إنك مكلفة نفسك بالديون والقروض عشان شويتين نظرة إعجاب من الناس
بس ما ألومك لكن ألوم المجتمع اللي صار سطحي..يحكم عليك بموديل جزمتك