| في الجامعه كانت عبير وريم وصديقتهم مشاعل مع بعض ...
عبير : "للحين ما تدرين من اللي بتكون خطيبة خالد "
ريم : "ما ادري للحين ......ما اتمنى احد يكون مرة اخوي الا انتي ..."
مشاعل اللي كانت عارفه كل شئ :"اخطبيني انا لاخوك ...شوفي اش ملحي ..."
عبير بغيره : "من زينك ..."
مشاعل مازحه :" انتي ليش تغارين ..."
عبير : "مشاااااعل ...ترى نفسيتي اليوم زفت"
مشاعل عشان تغير الموضوع : "ما سألتيني اش صار مع سعود"
عبير : "نسيت قولي اش صااار"
ريم : "لحظه ...لحظه انا صايره مثل الاطرش في الزفه اش السالفه ..."
مشاعل : "امس كنت انا وعبير في السوق ...وواحد رمى رقمه علينا ...واخذنا الرقم والبارح كلمته ....ياويل قلبي يازين صوته وسوالفه اللي تسحر ...."
ريم اللي ماشدها في الموضوع الا شي واحد : "عبير انتي تاخذين ارقام من شباب ..."
تفاجئوا ردت مشاعل عشان تنقذ صديقتها : "لا...عبير تقول اخلاقها ما تسمح ..."
ابتسمت ريم : "وهي صادقه وبعدين انتي مكالماتك ذي بتوديك في داهيه ..."
مشاعل : "اسكتي انتي واللي يعافيك ...انتي لوتجربين مره ...كان تنسين الملل اللي تشكين منه ..."
ريم : "لااااا انا مرتاحه في مللي بس انتي اللي ...."
مشاعل مقاطعه : "الموضوع كله تسليه ما يتعدى المكالماااات...."
هزت ريم راسها بعدم اقتناع..........
%%%%%%%%%%%%%%%%%
-"ترى البيت من من دونك ما يسوى...قلل هالسفريات..."
ابتسم لها بحنان :"لها الدرجه تشتاقين لي ..."
-"اكيد اشتاق لك منت ابو عيالي...."
-"ابوعيالك بس .."
ابتسمت وسوت نفسها مو فاهمه قصده :"اش اكثر من ابوعيالي"
-"تدرين يابدريه احسن ادور لي وحده تحبني كزوج مهو (وهو يقلدها ) ابوعيالي "
بدريه : "مواااافقه بس بشرط ..."
عبد الله وهو يقرب منها ومسوي نفسه فرحان :"اشرطي على كيفك كم بدريه عندي ..."
بدريه: "تكون على ذوقي ..."
عبد الله : "هونت مابي اتزوج..."
بدريه:"ههههههههه لها الدرجه ذوقي مو حلو .."
عبد الله :"تبين الصدق ....ذوقك مو حلو....بس انتي اللي حلوه..."
بدريه : "صرت الحين حلوه من اللي قبل شوي متلهف على الزواج ؟؟؟"
عبد الله :" ههههههه ...الا على طاري الزواج سمعت انه جاري البحث عن عروسه هاليومين..."
بدريه : "مسرع توصلك الاخبار من قال لك..."
عبد الله :" من غيرها نظر عين ابوها رهوفه عطتني البارح وانتي في المطبخ الموجز والاخبار بالتفصيل .."
بدريه :" ثرثاره ما ادري على منو طالعه...المهم مثل ما وصلك خالد وافق يتزوج ... وامي وخواتي شايلين يدهم من الموضوع....ووكلوا لي هالمهمه الصعبه"
عبد الله :" هههههه صايره خطابه..."
بدريه : "اي خطابه الله يهديك...تصدق مسؤليه كبيره بالذات ان قلب خالد لازل متعلق في عبير وما وافق الا عشان خاطر ابوي ...واخاف اظلم بنت الناس معاه...."
قطعت كلامها لما شافت رهف داخله .....قامت رايحه المطبخ..
بدريه : "رهف نادي اختك للغدا..."
رهف وهي متجهه لابوها :"تقول لاتنادوني مالي نفس ..."
استغربت بدريه لانها لاحظت ان امل من اول ما دخلت وجهها معتفس ...ومبين انها متكدره...
وهي تكلم زوجها: "انا طالعه لامل ..."
عبد الله :"انا ما دام معي رهف ما اسال عن احد ..."
بدريه : "خلها تنفعك دلوعتك ..."
رهف : "يمه لايكون تغارين ...."
بدريه: "هههههههه الحمد لله وليش اغار ...."
رهف:"ماادري بس احساسي يقولي......"
بدريه وهي طالعه:"مو دايم يكون احساسك صادق..."
فتحت الباب وتفاجأت لما شافتهاعلى السرير وبمريول المدرسه ودافنه راسها في المخده ...
امل : "رهف قلت لك ماابي غدا..."
بدريه : "امل اشفيك ...تعبانه يمه .."
رفعت راسها لما شافت امها : "لا يمه انا بخير ..."
بدريه :" اجل اشفيك ... ابوك توه واصل من السفر البارح المفروض اول يوم يتغدى معانا فيه نكون مجتمعين"
امل :"يمه والله مالي خاطر في شي ..."
جلست على السرير وحطت يدها على كتفها :" انتي اكيد فيك شي اذا ما قلتي لامك لمن تقولين ..."
ولانها ماتخبي عن امها اي شي خبرتها بكل اللي صار لبسمه ....
بدريه :" الله على الظااالم اللي ما يخاف ربه في هاليتيمه ..."
امل :" مسكينه يمه والله تقطع القلب...."
بدريه:"ومتى يرد هالشايب من السفر..."
امل:"بعد شهر....ان شاء الله مايرد..."
بدريه:"حرام عليك ياامل تدعين عليه اكيد له اهل يحبونه..."
امل:"هو لو فيه خير ماخطب بنت في عمر بناته"
بدريه:"ياامل الحياه قاسيه وفيه ناس عايشين بس يدورون اللي يريحهم وما يهتمون في غيرهم..."
امل :"مااتخيل بسمه تقضي بقية عمرها مع رجال كبر ابوها احس هالشي ممكن يقضي عليها"
بدريه:"حتى انا مااتخيلها...."
امل:"انتي يمه لو شفتيها اليوم كان تقطع قلبك عليها..."
بدريه تتنهد:"ياليت في يدنا شي نقدر..."
سكتت لانه طرى على بالها فكره ممكن تنقذ بسمه بس تنفيذ هالفكره في مغامره كبيره ممكن بدل ماتنقذ بسمه تضيعها...
%%%%%%%%%%%%%%%%%
وهو في الشركه ويفكر في اللي صار ويقول اكيد انا استعجلت المفروض ما وافقت
بس لما فكر في السعاده اللي شافها في عيون ابوه حس انه ما غلط في قراره...
تنبه على دقت الجوال كان من رقم غريب...
خالد: الو ...
......... -
خالد بضيق : الووووووووو
-بصوت متردد:"خالد" ...
خالد وهويفكر في الصوت:" معك خالد "..
"-ما عرفتني ياخالد "
خالد بعد تفكير رد وهو متفاجاء لانه اول مره تتجراء تكلمه بعد فسخ الخطبه :"عبيييييييير"
عبير : "ايه عبير ياخالد اشلونك ..."
خالد وهو حاس انه لازم ينهي المكالمه رغم فرحته بسماع صوتها: "خير عبير فيه شي .."
عبير بحزن: "صدق ياخالد انك بتخطب ..."
خالد : "ايه بخطب عندك ماااانع ..."
عبير : "ليه ياخالد ...انا خطوبتي ..."
خالد مقاطعا : "شئ ما يهمني ...وبعدين انسي هالرقم .."
ماعطاها مجااال ترد وسكر التلفون في وجهها ....
%%%%%%%%%%%%%%%%%%
-مبروك مدااام انتي حامل..
انصدمت وهي تسمع الممرضه وجلست على الكرسي.....يالله انا ناقصني الحمل الحين...حست بيد حانيه على كتفها....
-"العنود اشفيك يمه اكلمك ماتردين..."
العنودوهي تصيح:"ما سمعتي يمه اش قالت الممرضه..."
ام فيصل:"سمعتها يابنيتي....والحمد لله اللي يجي من الله زين...."
العنود:"كنت شياله هم نايف ونواف والحين ادري ان فيه واحد ثالث في الطريق..."
ام فيصل:"اللي بيعيشهم بيعيشه وانا امك..."
العنود:"صعب يمه يعيشون بعاد عن ابوهم....."
ام فيصل:ا"بوهم الله يسامحه"
العنود في خاطرها الله يسامحك يامحمد عقب كل السنين اللي عشتهم معك ضيعت نفسك وضيعتنا معاك...
اشرايك صح اللي ناويه اسويه ولا غلط...
عبد الله : "والله يابدريه ما ادري ....بس انتي موقفك صعب ....اخاف بدل ما تكحلينها تعمينها للأثنين..."
بدريه :" ياعبد الله بالنسبه لخالد عندي مطلق الحريه للاختيار وصدقني لو ما قلبه مشغول مستحيل كان يلاقي احسن من بسمه وابوي مستحيل يخطب عبيرلخالد مره ثانيه....اما بسمه ياتتزوج هالشايب اللي جابه لها عمها او خالد اللي بيكون مناسب لها من كل النواحي الا الحب الاول اللي مع الايام يقدر ينساه....وبعدين في خالد ميزه ثانيه
ان عمها مستحيل يرفضه ..".
عبد الله:"بس لا تنسين يابدريه ان بسمه من عايله بسيطه ويمكن هالشي يفرق مع اهلك.."
بدريه:"اهلي وخصوصا ابوي اهم شي تكون من اصل طيب..."
عبد الله:"فيه مشكله ثانيه البنت اكيد منكسره واتوقع تكون شخصيتها ضعيفه واخوك الافضل له وحده لها شخصيتها و..."
قاطعته بدريه وهي تفكر:"تصدق بسمه على رغم حياتها لما اشوفها في المدرسه وفي حفلة نهاية السنه استغرب كان الكل يعجب بقوة شخصيتها وحسن القائها بنت محبوبه من الجميع..."
عبد الله:"موغريبه تكون كذا وانتي ادرى بحياتها عند عمها.."
بدريه: "بس لا تنسى انها عاشت في بيت ابوها الله يرحمه حياه كريمه ويمكن هذا اللي معطيها القوه اللي تظهر بها احيانا"
عبد الله:"بس ماتخافين اخوك يحطم هالقوه الباقيه عندها.."
بدريه:"وهذا اللي مخليني متردده"
عبد الله : "انا اقول اذا كنتي واثقه من اخوك ماراح يرفض ...شاوري البنت وشوفي ردها..."
بدريه وهي تفكر :" لازم ادور طريقه اخليها تجي بيتنا حتى اشاورها...."
عبد الله:"بس لا تخبين أي شي خصوصا انه كان خاطب ..."
******************************
ام عبد العزيز وهي تكلم زوجها :"اليوم بنروح العصر بيت ابو مازن بيجون اهلها وعزمتنا ..."
ابو عبد العزيزبعد اهتمام : "الباب يفوت جمل ..."
هند : "يمه كلنا بنروح ..."
ام عبد العزيز : "لان بدريه مأكده علي تجون"
هند : "بس بسمه خليها تنثبر يمه في البيت ..."
ام عبد العزيز بحزم :"لا بتروح ...اش بيقولون اذا تركنها في البيت ...."
ام عبد العزيز يهمها كلام الناس وتحب تظهر قدامهم انها حنونه على بسمه ...
%%%%%%%%%%%%%%%%%%%
-"اقول صدق الاخبار الحلوه اللي سمعناها ..."
خالد بضيق : "لا تقول الخطوبه.... هم ما صدقوا قلت ايه..... ونشروا الاخبار تصدق انت الثاني اللي تسألني اليوم .."
فهد :"من الاول اللي سألك ..."
خالد بارتباك: "واحد من الشباب ...بس انت من قال لك ؟؟"
فهد : "اللي يسمعك يقول اني غريب ما كني ولد عمك ...بعدين اذا انت ماقلت لي اخبارك لازم انا ادورها من مصادر موثوقه بس اللي ما عرفته تعيسة الحظ اقصد سعيدة الحظ من تكون؟"
خالد :"تعيسه في
فهد : "ما قلت من المزيونه .."
خالد :" اقول احترم نفسك لا تقعد تتغزل في حرمتي اللي ما ادري للحين من هي ..."
فهد : "ههههه ايه اكيد قاعدين يدورن لك عروسه بمواصفات خاااصه .."
خالد : "أي مواصفات خاصه ...عقبها ما احد يملى العين ..."
فهد :"اقول خل عنك الحب الاول وخرابيطه وعيش حياتك ..."
خالد : "وانت يالحبيب متى بتعيش حياتك ..."
فهد وهو سرحان : "قريب ان شاء الله...خالد بغيت اقول لك شي بس متردد..."
خالد:"وليش تتردد من متى هالادب ما شاء الله"
فهد:"بصراحه العنود متلومه فيك وتقول اكيد اهي السبب في كل اللي صار..."
خالد:"لا العنود مالها دخل وبعدين ابو محمد هو اللي فسخ الخطبه وابوي زعل وتعرف الوالد اذا زعل..."
فهد:"يااخي ما تدري يمكن في الامر خيره..."
خالد:" يمكن....الا اشلونها العنود عقب ما طلقها محمد..."
فهد يتنهد:" حالتها حاله...سبحان الله عقب سنين من الحب والعشره الطيبه يتغير عليها..."
خالد:"تصدق حتى انا احس محمد له فتره متغير بس ماادري اش السبب..."
فهد هو ولد عم خالد الكبير (عبد الرحمن ) عياله هم فيصل 38سنه متزوج
العنود 34سنه واخيرا فهد عمره 28سنه
فهد يعتبر هو صديق خالد الروح بالروح واقرب عيال عمه له...
%%%%%%%%%%%%%%%%%%%%
كانوا قاعدين في بيت بدريه الحريم سوااالف وضحك والبنات الجو متكهرب بينهم ...
بسبب الغرور اللي في ريم اللي تحس انه قاعده مع ناس مو من مستواها....
اما امل وبسمه كانوا منبسطين مع بعض رغم الحزن اللي تحاول تخفيه بسمه في قلبها...
ام عبد العزيز : "كيف الجامعه معك ياريم ..."
ريم بعدم اهتمام : "ماشي الحال ....يالله ملل في بيتك يابدريه ...لو مجتمعين في بيتنا ماكان حسيت بملل...."
بسمه : "لو كان في بيتكم ماكان شفناكم ..."
ريم :" وهذ هو المطلوب...."
استحت بسمه ونزلت راسها... بنات عمه انبسطوا على رد ريم ..انقهرت امل من خالتها : "والله احنا ما تحلى لنا القعده الا في بيتنا ( وهي تنا ظربسمه ) ولا تحلى الا مع حبايبنا"
رهف :" وبعدين لو سمحتي لا تغلطين على بسمه "
بسمه حبت تلطف الجو: "اشلونك مع التؤم ياساره"
ساره :"متعبين (وهي تبتسم ) بس يازينه من تعب"
بسمه :"ياحلوهم ...بالذات ريناد تجنن اموت فيها "
ساره : "ايه اكيد طالعه قمر على امها"
ريم : "الا قولي طالعه على خالتها ريم "
ام خالد :" اشلون سحر ياام عبد العزيز ماجاتكم قريب من جده "
ام عبد العزيز : "طيبه الله يسلمك بتجي عقب الامتحانات"
ام خالد : "ايه هانت مابقى الاشهرين ...سلمي عليها اذا اتصلت "
ام عبد العزيز : "الله يسلمك"
بدريه :"عن اذنكم يمه انتي وام عبد العزيزانا بروح المطبخ ...(التفتت على البنات) ...احد يقوم يساعدني .."
ما حبت تحدد احد وتمنت اللي في بالها يصير ..
بسمه (وهي قايمه )"انا بروح معك .."
رهف : "حتى انا يمه بساعدك"
بدريه : "انتي اطلعي شوفي اخوك محمد اذا صحى من النوم ...بدلي ملابسه ونزليه ..."
رهف بضيق :" ان شاء الله يمه .."
بعد ما طلعوا من الصاله مسكت يد بسمه ودخلتها غرفة المكتب وسكرت البااااب....
%%%%%%%%%%%%%%
-"تدرين اليوم انك بغيتي تفضحيني قدام ريم ..."
مشاعل : "عاد انتي ليش تخبين عنها .."
عبير :" يعنى ما تدرين ...هذي لو درت اكيد بتقول لاخوها ....ولو درى خالد ا نسي انه يفكر يتزوجني في يوم من الايام..."
مشاعل : "للحين ما فقدتي الامل..."
عبير : "ولا بفقده ...حتى لوخطب ...ما رح يتزوج الا انا ... عشان كذا كوني حذره قدام ريم ..."
مشاعل:"طيب واللي يخلي ريم تكلم شباب"
عبير:"مستحييييييل"
مشاعل :"وليش مستحيل.."
عبير:"احنا صحيح بنات خالات بس حياتي غير عن حياتها..."
مشاعل:"مشاء الله شرح وافي عزيزتي..... فهمت الحين.."
عبير:"هههههه يعني انا عادي اطلع متى مابغيت اكلم ولا احد يسأل من تكلمين بس هي مستحيل تطلع الامع امها او خالد او وحده من خواتها..."
مشاعل:"مالت عليك وتبغين تتركين هالحريه وتتزوجين واحد متشدد..."
عبير:"ياحبيبتي بيدي اخليه يتغير"
مشاعل:"مشكله الثقه الزايده...الحين خليه يرجع يخطبك مره ثانيه وعقب غيريه على كيفك..."
عبير:"بيخطبني مره ثانيه وبيكون لي ومستحيل اخلي وحد ثانيه تتهنى فيه(وهي تتنهد)...بس تصدقين اليوم كلمته وما عطاني وجه"
مشاعل:"معقووووله"
عبير:"بس اعرف خالد من متى يحبني ولا كلمني الا يوم ماخطبني مسوي فيها شريف وما يرضى علي الا مايرضاه على خواته"
مشاعل :"طلعنا عن موضوعنا المهم طيب واللي يخلي ريم تكلم شباب..."
عبير : "ياشيخه روحي ...هالشي مستحيل يصير"
...مشاعل وهي تفكر :" صدقيني مو مستحيل والايام بيننا ..."
%%%%%%%%%%%%%%%
-"وهذا هو الموضوع اللي بغيت اعرف رايك فيه ...."
بسمه وهي متفاجأه: "والله ما ادري بس انتي علشان تنقذيني من هالشايب... تعرضين علي الزواج من اخوك..."
بدريه: "يابسمه انا ماراح الاقي احسن منك زوجه لاخوي وبعدين انا فهمتك وضعه كيف....هو كان خاطب بنت خالتي بس زواجه منها صار مستحيل.."
بسمه:"اكيد هو قلبه لازال متعلق فيها..."
بدريه:"انا مااقدر اكذب عليك واقول لا...بس خالد بتزوج سواء كنتي انتي اوغيرك وصدقيني مستحيل احصل لخالد احسن منك..."
بسمه:"خايفه يابدريه بموافقتي اظلمه معي..."
بدريه:"مااقدر ااثر على قرارك بس تأكدي ان خالد ماوافق الا لما صار عنده قبول لفكرة الزواج "
بسمه:"طيب بنت خالتك اللي تحبه احس حراااام يصير فيها كذا"
بدريه:"عبير بنت ماتفكر الافي نفسها وحبها لخالد لانه الافضل ولوكان لقت افضل من منه كان بسهوله تخلت عنه"
بسمه:" ما ادري احس اني في دوامه ماني قادره افكر..."
بدريه:"خذي وقتك....انا مااطلب ردك الحين انتي استخيري ربك واللي مرتاحه عليه سويه ولما توصلين لقرار قولي لي وصدقيني غلاك ما راح ينقص لوكان جوابك الرفض...."
وهي سرحانه: "ان شاء الله يصير خير ..."
__________________
هلاليه وافتخر والي مو عاجبه ينتحر ويكتب على قبره منقهر
وتحيه للهلال
http://www.shbab1.com/2minutes.htm الرجاء من كل من قراء هذا النص توزيعه وشكرا |