الحلقـــه الثانيــه
((1))
<< فــي بيتنـــا هــزه >>
ضحـــى
صحيــت علــى صـوت انفجــار قــوي ناظــرت بساعـة المنبـــه اللي يوم شغالـه ويوميــن عطلانــه كانت سبــعه المغــرب نزلت من سريري بســـرعه بشــوف وش السالفــه وأنا بطلــع مع باب الغــرفه سمعت صــوت انفجــار ثانــي حسيت الارض من تحت رجــولــي تتحــرك,,, لااااااااا هــذا أكيــد شــي كايـد كنت اركض وأنا انزل مع الدرج صقعت بهنــد اللي طالعــه .. سألتهــا وأنا امسكهـا لتطيــح ...
ضحــى :وش صــار ..؟!
هنــد :مأدري تونــي صاحيــه وأفــرش اسنـاني ماحسيت الابصــوت أنفجـار وبلعـت المعجــون من الرعبــه ....
وكملـت :شكلــه الفــرن ..!!
ونزلت ركــض وأنا اركض وراهـا مثــل الهبــلا .. اول ماوصلنــا المطبــخ طلعـت منــه شوق ...
شــوق برعــب :زلــزال ...!!!َ
هنــد :يعنــي مو الفـــرن ... اجــل الصخـانه ..؟؟!
وراحـت تركض لفــوق وحنـا وراهــا بــس تذكــرت شــي خــلانــي أمسكهــا مع قميصهـا واوقفهـا عن الركــض وصــرخت عليــه تستغبــي علــي ذي ...
ضحــى :غبيــه أنتـي أي صخـان وحنـا فالصيف جالسه من الصبح تطـامريــن من محـل لثانــي وأنا بغبـاء احلقك ...
هنـــد: يعنــي هـذا ذنبــي أنــي كنت أحاول أختصــر عليكم الوقت وعـرف وش سبب الانفجـرات هــذي ...
شــوق برعــب :ياويلــي لايكـون تفجيــر ارهـابي ...
الصــراحــه مـت من الضحـك عليهــا أفكـارها اغبـاء من الغبـاء نفســه تذكـرني يالطالبات اللي ادرســهم ...
سمعتهـا تسألتنـي .. شـوق :ليش تضحكـين ..؟!
ضحــى بسخـريـه واضحــه :اضحــك علـى غبـائي كيف ماتوقعــت انه تفجيــر تــدرين عنــد أماكن استــراتجيــه يفجـرون فيهــا مثـل دكان ابــوبكــر مغسلة يعقــوب ومحــطة صالــح ...
وقطــع كـلامي تفجيــر بعــد لفت أنتبــاهي لمصــدر الصــوت وماكان بذاك القــوه وشكــل اللي قبلــه ماكانــوا بذيك القــوه بــس لأنهــم جـو فجــأه ... طلعــت للحـوش ولفيــت على البيـت وشفت اللــي ماتوقعتــه ...
ضحــى :هــذا انتـــم ..!!!
سارا بصدمــه :صحيتـــي ...
صحيتــي ياويــلي ودي اذبحهــا على هالبــرود اللحيــن كل هالخــرعه وباالاخيــر يطلعــون هــم ...قلت وأنا أخــذ منهــا كيس المتفجــرات اللي بيدهـا :أنتــوا متــى بتـوبون عــن هالتصـرفات وأخــرتهـا معكــم يعنــي ...وبعــدين
مــن وين جبتـوهـا هذي غاليــه ...
منيــر :أنا جبتهــا من بيتنــا ...
ضحــى:ماشاءالله وبيتكــم صار مخــزن للبيــع المفتجــرات ... وكملت بأستهـزاء :والله مأدري لــو بكــره يطلـعون بيتكــم بالأخبــار لأنهــم مخبــأ للتصنيـع اليورانيــم ..!!!
ودخلــت عنهــم وان اسمــع احتـجاجاتهــم المكتــومــه ... والا هـذا اللي ماتوقعتــه أنــي اصحــي بهالـطريقه المفــزعه من النــوم ...
دخلـت للمطبــخ وجلسـت اســوي قهــوة المغــربيــه دخلـت علـي شدن :ماما أبــي حـلاوه ...
وبعــدين معهـا هذي مليــون مــره قلت لهــا أنا مو ماما بــس مصـره كلـه من مشاعــل هي اللـي تدزهــا علــي ...
وعطيتهــا حــلاون من اللي رافعتهــا لهـا ...
ضحــى :روحــي العبــي بالصـاله ...
شدن بدلــع :لا بجلــس معك ...
ضحــى :حتــى انا بطلــع وبتجلسين معــي بس بـرى ...
شدن :ماما متــى بدرس ...
ياربــي وبعـدين معهــا هذي ماتـشوفنــي الا وتسألنـي هالسؤال ..!!!
ضحــى :بعــدين ياماما بعــدين لاكبـرتي ...
شدن :بــس أنا كبيــره أكبــر كثــر من كذا ...
قلت لهـا وأن اشيل الصينيــه وطلـع فيهـا للصـاله ...
ضحـــى :روحــي نادي خـواتك من برى ...
شــدن :هـم فالصاله ..
سكت عنهـا ماكملــت مناوشــه واصلا ً أول ماشفت خواتــي المحتـرمات نسيت موضوعهــا وطحـت فيهم تهــزيء بـس ياليتهـا تنفــع ...
بعــد القهــوه جلست علــى مكتبــي وبديــت احضــر دروس بكــره .. والباقيــن كانــوا يتابعــون مسلسل مدبلــج بــس أيــش شي ماينشــاف وشيف والمشكلــه كل المــوجودين مراهقيــن وأطفــال والخبــلات ذولــي ولاطــرى عليهــن يفكـــرن يحتـرمن انفسهــن متسدحات لـي تحت التفلزيــون ويتفــرجن يــوم ماشفت ان عنــدهن نيـه يحتـرمن حالهــن .. قمـت وبـدون سابق أنذار فصلــت الفيش ومأنتبهــت الاعيــون الكـل علـي حتى شــدن ...
ســارا :خيـر ان شاءالله ليــه طفيتيــه لاتكـونين تبينــا نذاكــر ...
ضحــى :لاحبيتــي مأبيك تذكــرين ابيك تحتـرمين حالك اللحيــن ممكــن تقوليــن كيف تابعــين هالاشيــاء والاطفــال ذولــي عنــدك ...
وعـد بأعتــراض :من الاطفــال لايكــون تقصــدينــي تـرى أناعمــري 13 سنــه يعنـي كبيـره ...
ضحــى بطنـازه :لابســم الله عليك كبيــره ... أحــد تكلــم عنـك أنتــي ...
منيــر : عادي اصــلاً عيــال منيــره الصغار يتابعــون كل شــي ...
سارا بلقـافه :وجابـــر ...
قلت لهــا والشرار يتطـاير من عيــوني هذي متــى بتستحــي على وجهــا ..
ضحــى :وانتـي وش دخلــك بالرجال ...!!
سارا :أخــاف علــى أخــلاقه بعــدين من بترضــى فيــه ...
كنت بــردعلــيه بـس صوت التفلـون قطـع كلامــي رحت لمكتـبي ورديت عليــه ... كانت أم كايـد تسأل عن منيــر لأن الليـل دخـل وهـو مارجــع للبيتهــم ...
بعـد ماقفلـت منهـا قلت لمنيــر والعيــون كلهـا علــي ..
ضحـى :أمك تسأل عنــك ..؟!!
منيــر: لامــاني برايــح ليــن يطلعــون جابــر وقيــس ...
ضحــى :لا منيــر عيب أمك متصـله تسأل عنــك ..
منيــر :اصلاً هــي ماسألت عنــي الا تبينــي اجيب لهــم خبـز ولبــن للعشــاء اعـرفهم مايسألــون عنـي الا يبــون يرسلـوني خل تـرسل عيالهــا المتــرززيــن عنــدها ...
سارا :والله لو انــي منك ماروح ان شاءالله يمــوتون جــوع ...
شفــتو اللعــانه بتخلــي الولد يتمــرد علــى أهلــه ...
ضحــى :أجــل بتخلينـا نمــوت جــوع اليــوم ومأنتـي جايبـه لنـا خبـز ... ترى اليــوم دورك أنتــي و وعــد ..
وعــد بأعتـراض :لاااااااا أنا قبل أمــس ...
ضحــى :ماتبغيــن مصـروف لاتـروحيــن ...
هــزت راسهــا بانصيــاع ....
ضحــى :طيب وش تحتــرون روح اللحيــن ...
×××××××××××××××××××××××××××
((2))
<< صدق تحبينــه ..!!>>
ســارا
لبســت عباتــي بـروح اجيـب خبــز من عنــد الخبــاز عــلى أوامــر الست ضحــى مع أنا نقــدر نتصــل ونخلــي السواق يجيــب لنــا بس على قـولت ضحــى زيادة مصــاريف ... وبعــدين وش ورانا نأخذلنـا لفـه بالحـاره ونغيــر جــو وطلــع معنــا منيـــر .. قضينــا الوقت بسوالف والضحك واستهبــال ويوم وقفنـا عنــد الخباز منيــر راح يشتــري لنـا الخبــز ..
وحنــا واقفيــن سمعــت وعــد تغنــي ناويللك علــى نيــه وتضحــك ويوم طالعــت ويــن نتطالــع شفت جابـــر.. قلت لــوعـد بصـوت مسمــوع
سـارا :وانا اشــوف دقات قلبــي زادت فجــأه ....
وعــد ويـدها علـى قلبهــا:قلبــي آآآه ياقلبــي ...
كتمت ضحكتــي يوم شفـته صد لجهــه الثانيــه وشكلــه مغتاض منــا ...
وعــد بصوت عالي :سارا أنتــي من صدقك تحبينــه ..
لاااااااا مستحيــل ياويلــي يالفضحيــه هذي وش قالت احس وجهـي طاح بالارض والناس كلهـا تطالعــني حسبي الله عليهــا تــرى أحــس مــو الناس تطالعنـي صدق...
وجـابر جالس يطالعنـا بالصدمــه مع أنهـا ماقالت اسمــه بس الكلمــه لحالهـا قويـه لااا وقـدامــه ...
جانا منيــر بعـد ماشتــرى الخبــز ... وشكــل جابر انصــدم بالكلمــه وماعبــر منيـر الحمـدالله ولاكان مابيأكلــه الا مرمر ...
رجعنــا لبيتنــا بالســلام .. بعـد العشـاء جلسنــا نتابــع فلم ومرمر معنـا كان ينتظــر ليـن أخوانــه يطلــعون للأستـراحه اللي يسهـرون فيهــا وطلـع لبيتهــم .. والبنـات نامــوا علـى الساعـه وحده لأن عنــدهم دومات ...الساعــه ثلاث دخلــت علينـا ميشــو ...
مــلاك :لا بعــد لوتأخــرتي شوي ...
ميشــو ضحكــت بمجاغه واشرت بيدها يعنــي أنهـا مسطلــه بتنـام مالهـا خلق ... أختـي مشاعـل هـذي حالتهـا غريبــه ماتنـام ليــن يمــر 24 ساعــه الوقت اللي صحـت فيـه واذا نامت علـى الكثيـر 6ساعات أيــه صح ماتـدرون عنهـا شي خـل اعرفكــم عليـهم اختـي مشاعـل عمـرها 22سنــه تـدرس بالجامعـه أي قسـم مأدري بس شي أتـوقع له دخـل بالانجليــزي عندنا فالبيت مانسميهـا الا القطــوه علــيها عيون ماتقـولون ال عيــون اقطــوه مافيـه فرق بينهـا وبين روبي قطـوتها ..دايم بلبسهـا و بتصـرفاتهـا تحسونهـا متشــرده واللقـبين ذولي معهـا من كانت صغيــره أذكــر كـأن أحد يناديهـا بالالقـاب ذولي ولصقن فيهـا لليــومنــا هــذا ..ولاتســألـوني من الشخص اللي كـان ينـاديهـا كــذا لأنــي مأدري ..؟!! .. وقتهـا أنا كنت صغيــره يعنــي عنـدي عذر بجهلــي لهالمــوضوع بس لـو سألتـوها هـي أكيد بتجاوبكــم ... ولاشــي اللي صدق بيصدمكم لــون عيــونهـا ازرق ... من ويــن جابتــه مأدري بــس الاكيــد أن امهـا سعــوديه وانتــوا حزروا عـاد من ويــن جابتـه..؟؟!!.. مع ان لـون العيــون اللي منتشـر بين خواتـي البنـي والعسلــي ماعــدى ميشـو عيونهـا زرق ونـوف عيـونها ســود ...
لاااااااااا نص الفلـــم فاتنــي كله منكــم ...
××××××××××××××××××××
((3))
<<..ماضينــا يلاحقنــا .. >>
ضحـــى
فزيت من نومــي بعـد الكـابوس اللي شفتــه وأنا مرعـوبه لفت نظـري النور اللي جاي من الشباك لاااا مستحيـل معقوله طلـع النهار الساعه كـم والمنبـه الزفت هـذا ليـه مادق مايبغى لهـا ذكاء اكيد مافيه بطاريه ...
طالعت بالسـاعة يدي اللي كانت بجنبـي على الطـاوله لامستحيـل ست ونص ...
بعـدها بعشـر دقايق كنـت بغرفـة سارا ومــلاك ...
:سـارا اصحـي خلصينـي ,,اوف بلوه مو راضيـه تصحـى شوف البنت غطت راسهـاوانقلبت على الجنب الثانـي ولاماعبـرتني ..
صرخـت بأعلـى صوت اقدر عليـه :سـارا وصمخ انشـاءالله ..
فتحت عيونها الكبـار وبكسـل قالت :خير انشاءالله اتوقع اني تاركه الدراسـه من اربع سنوات ولاكل هذا كان حلم ..
ياربي من هالانسانه حتـى وهي نايمـه فايقه ...
مو وقت رواقتكـ اللحين اسمـع وش بقولكـ انا متأخره على المدرسـه وبروح مع اسواق يعنـي اذا صحـوا خواتكـ خليهن يارجعن يكملـن نومتهـن مافيه مدرسـه ...
هزت راسهـا بلاهـه ورجعـت راسهـا على المخـده ...
نومـت جـدي ...
ركبت السياره واعصابـي مشدوده لأن اليــوم الثلاثاء وأن الثلاثاء والاربعاء عنــدي انتداب بمدرســه بشمـال الرياض وبيتنـا بجنـوبه يعنـي يبغـى لـي وقت علـى بال ماصـل ومع هالزحمـه والسواق اللي كنه يمشـي على بيض يارب عديهـا على خيـر انا ماضمـن نفسـي لو المديره حاولت تخصـم منـي الله يصبـرني على هالانسـانه مادري وش هوله حاطـه دوبهـا ودوبـي كل شـي عنـدها المركـز والمـال والجـاه وحاسدتنـي قال ايش املكـ الشخصيـه اللي تحلـم فيهاطول عمـرهاتحسب هالشخصيـه جاتنـي بالفطـره مادرت انه من هول ماقاسيتـه من عمـري 17سنـه وأنا شايـل حمـل ماشالوه طـوال الشوارب الله يكفينـي شرها بس ,,انا بس لو تضبط معـي فكـرت الدروس الخصوصيـه بـس الناس ماتقتنـع فينـي لانـي سعـوديه يبغون اجنبيـات مـع إن شـرحي لايعلـى عليـه بـس الشكـوى لله ...
تنهــدت بمـراره كــل هـالتـوتر مل امه داعــي احسـن شي بحالتـي هــذي الاستـرخاء ..قلت لسفــر يشغــل الاماكــن ... أحـب اسمعهـا على الصبــح استغفـر لله ياربــي مع ان المفـروض هـذا مايصيـر بس الشكوى لله ...
-------------
سارا
حسيت بالصوت ينادينـي من بعيـد طنشتـه لين زاد صار مزعج فتحـت عيوني وشفت ضحـى قدامـي كانت تقول كلام مافهمـت منـه شـي ويوم طفشتني هزيت راسي عشان اصـرفهـا وهي طالعه قالت كلمـه وحده بـس اللي فهمتهـا :..(نـومـت جــدي..)
من طلعت ضحـى لي ساعه وأنا اتقلب ماجانـي نوم ..
اوف أكيـد ماراح يجينـي نوم وحنـا بشهـر الثنيـن ومافيـه مكيفـات وبعـدين مع هالحاله رميت اللحـاف وأنا قرفانه ...
اروح اشوف التلفزيون يمكن القى فيه شـي ينتابع ...
نزلت لصاله تحـت شفت الشيخـه شهـدماسكـه التلفون اللـي اصلاً استقبــال وضحكها مالي الدنيـا مويقولون لوغاب القط العب يافار أكيد تكلـم اللي ماينسمـى مادري وش تاليتهامـع هالبنت ... والله خايفـه عليهـا من اللي بيجيهـا لودرت ضحـى أكيـد بطين عيشتهـا يارب مايجـي هاليوم مابغـى ضحـى تندم على المعروف اللي مسويتـه فينـا والا هـي مو مكلفـه فينـا ماذكـر أن ابونا اسمـه ضحـى ...
رجعت للارض للواقـع يوم حسيت بوسـه قويه علـى خـدي ..
قلت وأنا امسح خـدي بقـرف :مــلاك يامصخك ....
قالت توأمـي الغثيث :وش فيـه نصفي الثاني مبوز على الصبح .؟!
قلت لهـا :قرفانـه امانه مامليتي من هالحـاله وبعـدين ماعاد اتحمل هالحـر احس بصيـر داجاجـه محمـره ...
شوفو الخبلـه قالت بتلذذ وهـي تمـرر لسـانهـا على شفايفهـا
مــلاك:اممممممممم اح علـى الدجاج ياشيخـه حرام عليك سيلتـي لعابي الله يالدنيـا أبونا اللـي املاكـه ماليـه الدنيـاوفلوسـه كثـر التراب وحنـا مولاقيـن نأكـل ..
قلت لهـا وان احس بالشفقـه عليهـا :ومـن ويـن جبتـي هالكلام ياحكيمـة زمانكـ إنتـي مصدقـه النـاس أبوك تلقينـه عـدمان حافي منتف ولامارمانا هالرميـه ...
ضحكـت وغمضت عيونهـا وجلست تحلـم احــلام اليقظــه
مــلاك :
تبيــن الصـراحه انا مادري ليــش هالفكــره موقادره أطلعهـا من راســي أن ابونـا مليونيــر بس رمــاينـا ومخلينـا نعيش هالعيشــه
عشــانا بنــات اعتـراض علـى حكمـة ربـه مو راضـي باللي قسمـه له تزوج خمـس مرات وماجاءله الولد اللي يحلـم فيـه فالرمـانا والله اعلـم كـم تزوج مره بعـد وكـم من عيال شـرد ...
قلت وأنا فاقده صبـري خلاص فكينـا من هالسالفـه اللي ماتسبب لنـا الا الالـم والعـذاب ,,,مريتـي على جدتـي ...
بس من قال مــلاك تسكت رجعتنا لنفس الموضوع ...
مــلاك:أنا مادري ليش متحملينهـا للين اللحيـن مارمينـاها بالدار العجـزه حنـا ناقصين حمـل ماحنـا بصايرين احسن من عيالها اللي من طاحت ماسألوا عنهـا ,,أنا مستحيـل انسى اللي كانت تسويه فينـا وحنا صغـار وتعذيبهـا لنا وكنـا حنـا اللي ابعـدنا عنهـا ولـدها ليل ونار تدعي علينـا وعلى امهـاتنا ...
صرخـت فيهـامن القهـــر ليش نكــران الجميــل علـى الاقل هـي الوحيــده اللي ماتنكـرت لنـا..
سـارا:أنتي انسـانه من ايش مخلوقـه قلبك اللي بصدرك هذا ايش صخـر بدال ماتشفقين عليهـا وتبرينهـا بتحطينها بدار العجزه ارحمــوا من فــي الارض يـرحمكـم من فـي السمـاء ...
جانـي صوت شهـد اللي مادري من متـى جالسـه معنـى
شهــد :معها حق حنا مو مكلفين فيهـا ..
ماتحملت وقاحتها فالكـلام اصلاً هالانسـانه هـذي ماتنزللي من زور سـارا:انتي عاد آخـر من يتكلم مابقى الا أنتـي يالفاسـده بتعلمينـا وش نسوي بعـدين اللي متكفله فيهـا ومتكفله فينا كلنـا ضحـى للمعلـوميـه ...
شفت الصدمـه على وجـه شهد والدمـوع اللي تجمعت بعيونهـا بس رافضـه تنزل ...
قالت والعبـره خانقتهـا ادري جرحتهـابـس لازم تفــوق
شهــد:قولي عن اللي تبيـن فاسده ماعليه فاسـده ليـه وش كان المتوقـع من وحـده طلعت علـى الدنيـا لاتـريبـه ولااهتمـام تربيـة مع خواتي المراهقات والمسؤال عنـي أكبـر منـي بخمـس سنوات لاتطالبنـي بشـي انا ماتربيت عليـه .. ليش أنا لقيت أحـد اذا غلطـت يقول اوقفـي حدك الاهالخط ماتجاوزينـه يعلمنـي الصح من الخطـأ..
مواحنـا ضحيـة الدنيـا أجـل خل تحملنا بنسوي اللي نبـي بنتمـرد على الحيـاه بكبرهـا ليه غيرنا عايش مرتاح وحنـا حتى اللقمـه محسوبـه علينـا وزياده علـى كـذا لاأم ولاأب وليتنـا يتامــى لاحنـا يتمتنـا الدنيـا اذا كان ابونا اللي هـو أبونـا نفانا ولاأعتـرف فينـا تبغيـن الناس تعتـرف فينـا ..أنتــي عشتـي اللي عشنـاه شفتـي البنـات فالمـدرســه كيف مايتقـربون منـا وكأنــه مكتـوب علينـا (قــف ..خطــر ) النــاس كلهـا حاكمــه علينـا بالخـراب والفجــور حتـى قبل مايعـرفونا علــى حقيقتنـا قولي لأي أحـد يسألك عـن اسمــك أنا سارا بنت مبـارك الـ .... وبيفــرون منـك وكان فيك جــرب أو مـرض معــدي .. لـو كنتــي اصـلح وحـده بالدنيـا بس قولــي لهـم من أنتـي ماراح يصدقــون اللي يشفـونه بعيـونهـم بيصدقــون أنك من بنات مبــارك اللي رماهـن أبوهن وماسأل عنهـن وعايشـات بلارقيب ...
حنـا وجـودنا فهالدنيـا غلطــه تعـرف وش معنـى غلطــه ..>> وصـرخت بآخـر كلمـــه ...
قال نواف اللي متكتف وواقف بالزاويـه بعيده فالصاله ..
بصوته الخشن اللي كانت تصنعـه لين صار طبيعي
نــواف:اناودي افهـم
أنتـوا ليش تحبـون تعذبـون انفسكــم بالكــلام هـذا ليـه تفكـرون بالنـاس ولاطريتـو علـى بالهـم يعتبـرونا غلطـة اجتازوها وكملـواحيـاتهـم وحنـا واقفيـن عند هالنقطـه ونعيـد ونزيـد فيهـا ,,انا مريح بالي من زمـإن ...لأني من طلعت علـى هالدنيـا وضحـى هـي ابوي وأمـي وماعترف بغيـرهم لأم ولأب ....
وكلكــم لازم تاخـذون هالنقطــه انسـوا إن لكــم أحـد فهالحيـاه غيـر ضحـى وخلوهـا ابونا وأمنـا وكل اهلنـا ...
والله كنت بوقف وصفق له هلانسـان رغـم كل تصرفاته الطايشـه الا أنها لاتكلم بالعقل والمنطق رغـم صغـر سنه مقنع صادق يتكلـم من قلب مجـروح ..علــى فكــره أخــوي نـواف هـو اختــي نوف فهمتــوا شــي ...!!!
××××××××××××××××××××××××××
((4))
<< ...فالمــدرسـه فالبيــت ...>>
ضحـــى
دخلــت غرفـة المعلمــات وهـي واصلـه اتش معــي وش هالمعـامله الزفت الي تعاملنا فيها المديره على ايش شايفه نفسهـا هلانسـانه يعنــي هي ناقصتهـا بعد الحمدالله انها ماجابت خصـم لراتب لأنه لحضتها كـل الكبت اللي فينـي بفجـره فيهـا من زين حالتنـا المـاديه عشـإن تخصم منـي بعـد الحمـدالله إن اليوم ماعنـدي الحصــه الاولــى ولاصـدق مادري وش بسوي ,ووالأحلـى بالموضوع إن غرفـة المعلمـات فاضيـه كلن بحصتـه يعنـي اقـدر اخذ راحـتي بتفكيـر بمشـاكلنـا بس من قال إنـي محظوظـه توني بس بجلـس على الكرسـي دخلت علـي ابلـه عطيـات بدون حتـى سلام :فينك يأبله ضحـى تأخرتي ليـه دالمعلمـات ماخلوكيش بحالك اطعوك من الافتـراء بيألوانكـ متسيبـه ومابتحلليش المرتب اللي بتاخزيـه وانا باولهـم ياقماعه الغايب عزروه معـه وهم مش راضين يفهمـوا دنا كنت متأكــده انك حدومــي ..
يمــه عليهـا هالمصـريه اكبر نصابه فالعالم العربي كلـه أكيـد هي اللي جالسه تحش فينـي وترميـه على غيرها مع إن الباقيات مايقصـرن بس هي اعوذ بالله منهاماتخلي احد بحاله ...
رديت عليهـا وانفخ غرتـي اللي طاحت على عيونـي عشان ترجـع على ورى ضحــى:استـاذه عطيات لوسمحتـي بحظـر ممكن تكرمين علـي وتسكتيــن ...
حسيت أنها انحـرجت بـس طقاق يطقها انا صريحـه وماعرف اجـامل ...
طلعـت وهي تعتـذر انها عطلتنـي عن شغلي بـس انا عارفــه انهـا بتاطعنـي حتت من السب اول فرصـه تسمح لها ...
اوووووه خلـونا منهـا انا عنـدي بلاوي اكبــرمن سخافات عطيـات اللحيـن علاج جدتـي اللي مخلـص يبيلـه فوق الالفيـن انا من وين اجيبهـا يالرب ولاخـواتـي وطلبـاتهـن لو سارا ومـلاك مكملات الكليـه يمدينـا استفدنا من مكافئتهن بس وش اقـول الشكـوى لغيـر الله مذلـه وهـن هذا اللي يبنه ..الله يثبت خواتـي الباقيات ويكملــن دراستهـن أنا موناقصه بلاوي بعــد .....ولا اللي قاصـي ظهـري صـدق شدن هالطفـله
الي متحملـه معنـى هالعيشـه اللي ماتنطـاق وخايفــه عليهـا من كـلام الناس صـدق هـي بنت عمتـي بس والله عمـري ماعتبرتها غيـر وحده من خـواتـي تحملـت رعايتهـاوهي طفلـه عمـرها سنـه لوكنت أكبـرشـوي بذاك الوقت كنت اعتبرتهـا مثـل بنتـي مواختـي ...
أخاف لدخلتهـا المدرسـه تسمـع كــلام يجرحهـا أنا لازم احميـها بس كيف وانا نفسـي موقادره احميـهـا ...
الامتــى بظـل شايلــه هالحمـل يارب .....
صحيـت على رنـة جوالــي وسمعـت صـوت الرجــه سارا قلت بخــوف :سـارا صار فيكـم شـي من وين تكلـمين ..؟!
قالت سارا وشكلهـا تأكــل :من بيت العجـوز أم كايدووه ...
قلت بقهـر تسب بالمـره وهي فبيتها بس شكلها موجالسه عندها ولاماقالت هالكلام اعرف سارا صح رجه بس محترمه ...
ضحــى:طيب ليـه متصله احد منكم فيه شــي ..
سارا بـرود :لابـس اسطوانة الغاز فظـت ..
ياربـي من هالبنت المتخلفـه شتبي بالغازعلــى حد خبــري ماعنـدهم شي يطبخــونه...
ضحــى:اللحيـن متصـله عشان هالشي السخيف بعدين وش تبغون بالغاز عندكم شـي تطبخــونـه ,, وكملت بأستهـزاء:لايكــون بس نزلت عليكــم هبــه من السمـاء ...
سارا:يعنـي مانشرب شـاي ..
ضحـى:عمـركم ماشربتم شاي مو انتم اللي رميتـوا غلايـة الكهـرباء ..
شهقـت وكنـي متهمتها بجريمـة قتل..
سارا:والله موانا هـذي اشـواق اللي تقـول مضـره بالصحـه ...
تاففت بمـلل وأناصبـر نفســي الصبــر يارب اصبــر
ضحــى:عندك شـي ثانـي غير هالسخافات.؟!
××××××××××××
ســـارا
اووف منهـا هالانسـانه كلـه جديه ماتمـل من هالجديـه مومنهـا من الرياضيات التـي تدرسهـا الله يعين الطالبات اللي درستهـم قلت لهـا باستهبـال وأنا داريـه بتعصـب علــي
سـارا:أيــه ..
سألتنـي بعصبيــه موقلت لكــم هــي كذا ضحـى بالفلفل الحــار ...
ضحــى:وش بعــد..؟!
ضحكـت وقلت سـلامتك ورقعت السماعه بوجهـا قبل ماتسبقنـي ..
لفيت بنظـري على صالة جيرانا وع مـوحلـو بيتهم بيتنـا أحلـى مـع إنـه صايـر كنـه صحـراء لاننا بعنـا اغراض كثيره منـه بالحـراج .. جلست افكــر ارقى فــوق ودور غــرفة جابــر بس بعــدين خفت الطيح فينــي منيره ويـن اودي وجهــي منهـا وهي صــح تعطينـا وجــه بس واضح عليهـا أنهـا ماتبــي تقرب منـا ...
لبسـت عباتــي وبصــوت عالــي ودعت أم كايد اللي بالمطبــخ وزياده ماتسـمع زين فرددت الكـلام ثلاث مرات وهي كله تقـول هاه هاه بالاخيـر طنشتهـا وطلعـت ...
وانا بطلـع مع باب الشـارع طلـع بوجهـي كايدوه وهـو رايح فيهـاوكـإن معـه مخده وبطـانيـه ...
قال وهي يترنح بمشيتـه ويمطط كلامـه
كايد : يـ ـوه بعـ ـد اغلطـ ـت فالبيـ ـت أنتـوو كم بيت عنـ ـدكم تونـ ـي شفتك بالبيت الاخضـ ـررر اللحـ ـين شجابـ ـك هنيـه لاتطرردينـ ـي برقـ ـد بحوشكـ ـمممم ..
حمــدت ربـي على نعمــة العقـل وزفيـته عن طريقـي
تعــودنا انشـوفه بهالحـاله الصـراحـه يكسـر خاطـري الخمـر يسـوي بــلاوي ...
دخلـت بيتنـا وشفت خـواتـي جالسات تحت النخـل بالحـوش ..
توني افسـخ عباتـي صرخـت المرجوجـه تو مـلاك لأنـي أنا ون
مــلاك:تعالـي سارونه فاتكـ لقينـا كايـدوه السكـران نايـم تحت النخلـ ...
صرخـت بذعــر من حقهــم الناس يشتبـوهن فينـا وحنا مخلين بيتنـا سبيـل ..!!!
ســارا:خيبـه تخيبــه هالسكيـر بيجيب لنا الشبهـات ..
مــلاك:افا عليكـ برد خاطركـ فيه نـواف ...
قلت بحمـاس الصـراحـه يعجبنـي نوافـوه بـس جابـر أكثــر ..!!
سارا:بعـدهلــي نـواف هـذا العشـم والله ...
وقلــت بحالميــه ..
سارا :آآآه لو اللي غلطـان فبيتنــا جابــر ...
مــلاك بالصدمــه :لهــدرجــه سارا.. الصـراحه طحتـي من عينــي ...
سارا :عســى ماتكسـرت بس ...
مــلاك :لاويـن تكسـرين مع هالشحــوم ...
الشحــوم الصـراحه شكيت بنفســي ورحت اركض علــى المـرايــه ماشفت شــي بشكـل متغيـر بــس بعــد للحيــن شاكــه رحت اوزن بـس وزنـي كان نفســه ماتغيــر 45 اما النكتــه ميشــو وزنهــا 39 الصــراحه شكلهـا يحـزن كأنهـا جايه من مجاعات افريقيـا ...
××××××××××
((5))
<< ..نلعـب بالسكــه..>>
مــلاك
وش تبـوني اقـول لكــم صح أنتو مصـدوميـن بـ سـارا مثلـي انا للحيــن واقفـه بالحـوش تحت تأثيـر الصدمــه الصــراح بديـت اخاف علـى سارا مـن جابـرووه يخـوفي يخطفهـامنـي وتصيـر اتحبـه أكثـرمنـي بس انا توامــها حتـى لو مانشبـه بعض كثيـر .. معقـوله يجــي يوم وتحبـه اكثـر منــي الموضوع هــذا شغـل بالي لدرجــة انـي مأنتبهـت أنــي واقفــه بالحـوش وتحت الشمــس وماسمعـت صوت مرمر يوم كــان ينـادينـي ...
منيــر :ملااااااااااااااااااااااااااااااك .. وجع مــلاكوه ملوكـه ..اوف ملاك صـرتي صمخــه ...
قلت لـه بعد مافقت ...
مــلاك :خيـر وش تبــي لايـكون اليـوم بعــد مارحــت للمــدرسـه ..
منيــر :لا والله رحت بـس انحشت .. وطلــع لسـانه بأحــراج .. حـركته هذي تجننــي دايـم يسويهـا لأنحــراج .. دايـم أتمنــى لويكــون منيـر أخــوي لأنــي أحبــه كثيــر ...
مــلاك :رحـت للمــدرسـه هاااه علـى مين تلعبـها ...
وجلسنـا نغنـي :علـى مين تلعبهـا علـى ميـن يأبـن النـاس
عيــوني تعذبهـا ولاتحـرم الاحســاس
تجينــي وتهـواني وترحـل وتنســانـي
وترجـع علـي ثانـي شعـورك غريـب أحسـاس
دخلنـا وحنـا نغنيهـا بالصـاله وهنـاك شفنــا سارا جالسـه توزن ...
منيــر :بالرميــل انتبهـي لاتكسـري الميـزان ...
التفت علينـا سارا بعصبيـه ..
سارا :ناقصتك أنت ..حـرام خليتـوني اشك بنفســي بعـدين كيف يتزوجنـي جابــر ...
شفت الصدمــه بعيـون منيــر وقال وهـو مو مصدق ...
منيــر :خبلــه أنتـي مالقيتـي الاجابــر بـس الحمـدالله ماقلتـي قيـس واذا كنتـي متلهفـه علـى الزواج لهدرجـه انتظـرينـي ليـن اكبـر وتزوجك ...
سارا بالضحكــه :هذا وأنا متلهفــه اجـل لوكنت صدق بنتظـرك بتقـول انتظـري لين اشيب ...
منيــر :أنا اشيب مستحيــل مايليق علــي ...
سارا :ايه صـح تـرى البنات اليـوم ماراحـوا المدرســه ...
صدق اللي قال قلنـا القـط جـانا ينـط ..لأن بـس سارا كملـت جملتهـا نزلـوا نوافو و وعـد مــن فوق ..
وعــد بالدهشـه :مرمر هنــا والله ونـاسـه امشـو نلعب كـوره بالسكــه ..
نـواف :والله فرصــه لغاب القط العــب يافأر ...
وطلعــوا يلعبــون بالسكــه.. الصـراحــه غبنــتهـم تمنيـت ارجــع والعـب بالسكــه مثـل زمان اللي يسمعنــي يقـول من كبــري اصلاً لــو أطلــع اللحيـن وألعــب محــد داري عنـي اصلاً شكلــي صغيـرونـه مايـوضح علــي ... ياشيخـــه ..!!!
سـارا:ملاكــي امــشي نتفـرج عليــهم من الدريشــه ..
جلسنــا نتفــرج عليهـم وهـم يلعبــون حافييــن والغبـار مغطيهــم .. وفجـأه صار اللي ماكان فالحسبــان جاء قيــس وكان يمشــي رجـل لأنــه يوقف سيـارته الـ bm
بــرى الحـاره لأنــه يخاف عليهـا تعـرفون حارة فقـــر ... المهـم خلونا منــه سارا حسيتهـا مو طبيعيــه لأنهـا جلست تنـادي عــلى وعــد ونواف ومنيـــر بقــوه ويوم مانتبهــوا لهــا طلعـت تركض لهــم وتأشــر على قيــس تبيـهم يدخلــون بس هــم مافهمــوا عليهـا وقيــس يوم شافهـا طلعت صار يركض
عشـان يسبقهـا علـى منيــر ... من مكـاني هــذ شفت سارا كيف زادت رجفتهــا وصراخهـا زاد وكانت تحـاول تدخلــهم بالقــوه
وفجـأه الموقف تشــربك وماشفت الايد قيــس اللي ماسكــه شعــر ســارا ويهــزها ... قبــل شـوي كنت أتمنــى نرجــع للأيام السكــك بس اللحيــن العــن نفــسي لها لأمنــيه لأنـا بنرجــع معها للأيـام اللي كان فيهــا قيــس يذوق سـارا أصناف العذاب ...
مــن زمان كنت احــس أن قيـس يتلذذ بضـرب سارا وأكبــر دليـل اللي شفتــه اليوم بعيــونـي قيس حتــى مالمــس أاخــوه لاكـان جاي من بعيــد وعينــه على شعـر سارونــه جعــل يده للقــص ...
نهــاية الحلقـــه الثانيـــه