@،،الـنـزف التـاسع و العـشــرون،،@ *بعد أيام*
في بيت أم العنود/
جلست ياسمين في غرفتها..مصدومه من اللي سوته..
من أيام تفكر..من يوم كلمها خالها عن ماجد..كانت بترفض..متأكده إنها بترفض..
لكنها طلبت وقت تفكر بس عشان ما يقولون إن اللي سواه فيها سيف عقدها..لكنها شافت أمها كيف ارتاحت أول ما سمعت هالخبر..حتى خالها ناصر كان متحمس له وهو يتكلم عنه..طبعا لأنهم ما يعرفون عنه اللي هي تعرفه..
بس مع كل هذا ما تدري كيف وافقت..هي وافقت على ماجد..بعد أسبوعين تصير زوجته..
اعترفت إنها تأثرت باللي قاله..لأن زواجها هو الشي الوحيد اللي ممكن يخليهم يرضون على سيف و أهله..و هي بنفسها شافت راحتهم يوم وافقت..(كل هذا حلو..بس كيف بأعيش مع ماجد هذا اللي ما فكرت فيه؟ ولو ما استحملته..كيف اتطلق مره ثانيه؟...بأنجبر اتحمله! ليتني ما ما وافقت)
ما مرت لحظات..على موافقتها..إلا و هي نادمه..بس وش يفيد الندم..
في بيت أم فارس/
كانت أسيل في غرفتها..تفكر باللي سمعته من أمها..بعد الامتحانات بيحددون موعد زواجها..زواجها من نادر..تذكرته و سرحت بالشعور اللي تحسه اتجاهه..(معقول قدر يطلع فيصل من حياتي..معقول نسيت فيصل خلاص؟)
ما ارتاحت و هي تطري فيصل..تحس صارت تكره تفكيرها فيه..(ليه اكرهه؟ عشاني نسيته خلاص؟ أو لأني مو قادره انساه)
فتحت درجها و طلعت صورة نادر..و صارت تتأمل ملامحه.. و تتذكر صوته..و حنانه..(احس بإحساس جديد ناحيته..مادري اسميه حب؟ أو تعود؟ أو راحه لأنه ما يشبه فيصل بشي...مادري حبيته أو بس تقبلت وجوده بحياتي)
كانت محتاره باللي تحس فيه..و مو قادره تفهم شعورها..اتجاه الاثنين..
في بيت ماجد/
كان ماجد في غرفته..جالس ساكن من يوم سكر من ناصر..(وافقت؟ ياسمين وافقت علي؟)
مع انه تقدم لها..بس ما كان عنده أي أمل إنها بتوافق..حتى بعد اللي قاله..لكنها وافقت..
ضحك بصوت عالي..كان للحين مو مصدق..و راح بسرعه لغرفة ورد..يبي أحد يشاركه فرحته..و دامه متأكد إن العروس ما عندها نفس هالفرحه..راح لورد..
دخل و شافها تقرأ في مجلة أطفال..مشى عندها و ضمها بقوه..و ضمته و هي تضحك..
ماجد: ورد أنا أحبك كثيييير
ورد: و أنا بعد أحبك كثييير
ماجد يتركها عشان يقدر يشوف وجهها: عندي لك خبر حلو
ورد بحماس: وشو؟
ماجد: اممم ما اشتقتي لياسمين
ورد ابتسمت لكنها كشرت: اشتقت لها...بس هي ما تبينا
ماجد: أنا خطبتها و وافقت بعد اليوم بتشوفينها على طول
ورد شهقت: بس..بس هي زوجة عمو سيف
ماجد يبتسم: صارت مشاكل كذا و تركوا بعض
ورد فرحت: يعني هي وافقت عليك؟؟
ماجد: ايه
ورد مو مصدقه: يعني تتزوجها و تعيش معنا على طول
ابتسم ماجد على اللي تقوله..كان فرحان بس إنها وافقت..ما وصل تفكيره لليوم اللي بيعيشون فيه مع بعض..و تكون له..يشوفها كل لحظه..و يسمع صوتها بكل وقت..
في سيارة فارس/
عرف بخطبة ياسمين..لأنه الوحيد اللي كان للحين على اتصال بخاله..مع كل زعله ما كان يقدر يزعل على فارس..لكنه ما كان يعطيه أي فرصه يتكلم عن سيف أو اهله..أو يحاول يبرر له موقفهم..و فارس اتفهم غضبه و حزنه..و تركه للوقت..(يمكن خطبة ياسمين تخفف من زعلهم؟ يمكن يرضون بعدها على أهلي؟)
فكر في جوري..كل ما حاول يقرب منها..يطلع له سبب يبعده عنها..(أخاف ما نجتمع في يوم أبدا يا جوري..أبي اعرف للحين مهتمه فيني؟ أو جرح مازن نساك حتى حبي؟)
خاف يكون حظه معها مثل حظ خاله مع أمها..يخاف يعيش عمره يتمناها..و ما يحصلها..يخاف يطول هالخلاف..و يتقدم لها أحد و توافق مثل ما وافقت ياسمين..(معقول تكون تعقدت من اللي سواه سيف..ولو تقدمت لها ترفض؟)
كان دائما يفكر فيها..و يتسائل عن شعورها..و يخاف تروح لغيره..
في سيارة طلال/
كانوا راجعين من عند أهله اللي كانوا عازمينهم على العشاء..عشان وحده من خالاتهم زايرتهم..و هنا كانت مشكلة لينا..مو في خالته..في بنت خالته..تتذكر إنها شافتها يوم زواجها..بس ذاك اليوم ما كانت تفكر بأي شي..و لا منتبه لشي..لكن اللحين..هي مهتمه..مهتمه بطلال و كل شي يتعلق فيه..و انتبهت إن بنت خالته كانت تمون عليه..و تسولف معه..
تذكرت سهى..كيف قدرت تأخذ فيصل من أسيل مع إنه كان يحبها..يعني لو هاذي فكرت تأخذ طلال..بتقدر تاخذه بسهوله..لأنها بتعوضه عن الحب اللي فاقده معها..
التفتت تشوفه..فكرت تسألها عنها..لكن تراجعت..خافت يحس إنها غيرانه منها..لكن هالشي خلاها تفكر..لو حاولت تاخذه منها..بيتركها..أكيد ماراح يتركها..بس معقول يفكر يتزوج عليها..يتزوج وحده يحبها..هو بنفسه يختارها..وحده مو ملزوم فيها غصب..
هالشي خلاها تتضايق كثير..حست إن أمانها اللي كانت تظن إنه موجود ماله أي أساس..(معقوله تسوي فيني كذا يا طلال؟ ولو ما قدرت تسويه..بيكون عشاني؟ أو عشان يوسف بعد؟)
طلال: لينا وش فيك ساكته؟
لينا: فيني نوم
طلال: خلاص اللحين نوصل..و ترتاحين
*من بكره*
في شقة سيف/
دق جواله..و شاف رقم ماجد..
سيف: مرحبا
ماجد: هلا سيف مساء الخير
سيف: مساء النور
ماجد: وش أخبارك؟
سيف: الحمدلله بخير
ماجد: كنت أبي اقولك شي..أبي تعرفه مني قبل تسمعه من أحد
سيف بإستغراب: خير ان شاء الله؟
ماجد: أنا خطبت و ملكتي بعد أسبوعين
سيف بفرح: والله! ألف مبروك..ما بغيت؟
ماجد: الله يبارك فيك..بس ما سألت مين العروس؟
سيف بإستغراب: ليه؟ أنا اعرفها؟
ماجد : ايه
سيف: مين؟؟
ماجد بتردد : ياسمين
سيف انصدم: ياسمين؟!! ليه؟
ماجد: كيف ليه؟ يضايقك هالشي؟
سيف: لا بس...بس وش معنى هي؟
ماجد: بصراحه أنا كنت مفكر اتقدم لها من قبل لأن ورد تحبها و متعلقه فيها
سيف ابتسم: الله يوفقك يا ماجد..أنت تستاهل كل خير..و دامك أنت اللي اخذت ياسمين الكل بيتطمن عليها معك..و أنا أولهم
ماجد..(المهم هي تتطمن معي)
سكر منه سيف..و جلس سرحان..جت عنده نجود..
نجود: سيف وش فيك؟ الاتصال ضايقك؟
سيف يبتسم: بالعكس ريحني
نجود تبتسم معه: خير إن شاء الله؟
سيف: ياسمين انخطبت و ملكتها بعد أسبوعين
نجود بفرح: صدق؟
سيف: ايه..و اللي خطبها ماجد
نجود انصدمت: ماجد صديقك؟!
سيف: ايه
نجود: الله يوفقها معه..على الأقل يخف ذنبها علينا
سيف: تحسين بالذنب اتجاهها؟
نجود: مو بس هي..هي و أنت و أهلك كلهم..أنا جيت و فرقت بينكم يا سيف..عشان كذا ما ألومهم لو كرهوني العمر كله..بس اللي اتمناه انهم يرضون عليك
سيف يضمها: لا تقولين كذا يا نجود..صدقيني أنتي و ياسمين اللي مظلومين بهالسالفه..أنا الظالم مو أنتي..ماكان المفروض اتركك من البدايه..و ما كان المفروض اتزوجها و أنا كل تفكيري كان معك
نجود تضمه: أنت آخر واحد ممكن أحد يلومه يا سيف..أنت طيب..أنت أطيب قلب عرفته بهالدنيا
في بيت أم عمر/
طلع عمر من البيت و شاف راشد واقف عند سيارته..من الصبح ما كانوا موجودين..و من وقفة راشد حس إنه ينتظر أحد يطلع و بيروحون..لأن باب البيت كان مفتوح..راح و سلم عليه..
عمر: اليوم كله ما كنتوا في البيت عسى ما شر؟
راشد: ما قالت لك مساهير؟
عمر: تقول لي عن ايش؟
راشد يتنهد: جدتي أم أبوي تعبانه بالحيل و طلبت تشوفنا حنا و أمي..اعتذرت من أمي..و اعتذرت مننا لأنها كانت السبب فهالقطيعه بيننا...عماني خايفين عليها ما يبون أي شي يضايقها و يأثر على صحتها..عشان كذا يوم طلبت من أمي نجلس عندهم ما قدرت أمي ترفض(يكمل بحزن) جهزت لنا شقه كامله في بيتها مع إنها بحاله سيئه و مو عارفين تعيش لبكره أو لا
عمر بتأثر: الله يقومها بالسلامه..عن اذنك يا راشد لازم اروح
راشد: أمي و مساهير بيطلعون اللحين ماتبي تسلم عليهم؟
عمر يروح: بعدين
تركه عمر و راح..و راشد يطالعه بإستغراب..كيف انقلب وجهه بلحظه..طلعت مساهير و أمها و راحوا مع راشد..
و في الطريق..
راشد: شفت عمر قبل شوي..يسأل وين كنا..ما قلتي له يا مساهير؟
مساهير: نسيت و انشغلت بحالة جدتي
أم راشد: الله يقومها بالسلامه
سكتت مساهير و هي تفكر بعمر..استغربت ليه ما دق عليها بعد ما عرف..تدري انه ما يحب تروح لعمانها..و استغربت انه ما عارض هالشي..(يمكن لأنها مسألة تعب؟ أكيد ماراح يعترض على روحتي..بس مادري ليه مو مرتاحه لسكوته..يمكن زعل لأني ما قلت له؟...بس كيف ادق عليه و أنا من زمان ما كلمته؟)