بعد الغياب/ الجزء المئة وثلاثة عشر..
#أنفاس_قطر#
بعد صلاة العشاء...
سعود ومحمد قاعدين على البحر المنطقة الخالية اللي ورا منطقة الأبراج...
محمد من لما طلعوا وهو ساكت.. وهذا هو الحين قاعد على الشاطئ ساكت..
سعود كان يروح ويجي وفي رأسه فكرة كانت تعذبه..
فكرة تلتهم مشاعره كنار محرقة يتزايد اشتعالها في كل دقيقة
ماقدر يتحمل خلاص..
طبع مسج وأرسله...
وقتها كانت دانة قاعدة مع امها تحت.. يتفرجون على التلفزيون...
رن موبايل دانة بمسج.. رقع قلبها بعنف لما شافت اسم سعود قبل تفتح المسج.. بيد مرتعشة وقلب أكثر ارتعاشا فتحت المسج:
" تكفين دانة
قولي أنه موضوعنا ماله دخل
برفض مزنة لمحمد"
دانة حست بألم عميق وهي تحس بألم سعود
وإحساسه بالذنب في شيء هو ماله علاقة فيه
سعود كان قاعد في السيارة
والأبواب كلها مفتوحة
وهو يشعر بالتوتر في انتظار رد دانة
بعد أقل من دقيقة رنة مسج
" والله العظيم إنه رفض مزنة لشخص محمد
وأنه موضوعنا ماله علاقة من قريب وإلا بعيد"
سعود حس براحة.. لكنه حس بألم أكبر
(ليه محمد وش فيه كشخص؟؟)
طبع لها مسج
" وممكن اعرف وش هي ردت في محمد من الردى؟"
دانة عارفة إنه سعود مو مرتاح لين يعرف السبب
فحبت تجاوبه بطريقة لبقة
ومن ناحية ثانية قررت ماتقول له على سالفة إنه محمد يخز مزنة لما يشوفها
لأنها من معرفتها لسعود مستحيل يعدي موضوع مثل هذا لمحمد..
طبعت له مسج
" محشوم أبو سعيد من الردى
لكن مزنة تشوف إن محمد عاطفي بزيادة
وشخصيته لينة زيادة عن اللزوم
على خلفية اللي صار له يوم حادث سالم"
سعود سكت..
حس بالحزن العميق إن محمد يتحاسب على وفائه لصديقه
وحنانه وطيبة قلبه.... شيء مايعيب رجولته اللي ماتخفى على حد...
(لكن وش يقول؟؟ مايقدرون يجبرون البنت على شيء ماتبيه)
****************
بعد كم يوم..
الصبح
نورة كانت عند جواهر..
نورة كانت شايلة ماجد وتلاعبه برقة: ماشاء الله تبارك الله على ذا الماجد.. القلب ينفتح له عشان يتربع فيه..
وعقب كملت وهي تمصمص: مشتهية ليمون جواهر فديتج.. دقي الجرس اللي جنبج خلي وحده من الشاينيز اللي عندج تجيب لي صحن فيه ليمون مقطع..
جواهر ضحكت برقة: ان شاء الله عمتي.. نخل الشاينيز يجيبون لج ليمون..
وعقب كملت باستفهام: الا انتي وش فيج على الليمون.. كل يوم تبين ليمون..
نورة وهي لاهية تلاعب ماجد: ما أدري مشتهيته..
جواهر ماحبت تعطي نورة أمل على خلفية إنها مشتهية ليمون بس..
سألتها بطريقة عادية: متى اخر دورة شهرية جاتج نورة..؟؟
نورة وعقلها مع ماجد: المفروض ذا الايام تجي تتأخر يوم.. تتقدم يومين.. خلاص على وصول..
جواهر لما جاتها الشغالة.. طلبت منها تجيب الليمون وشيء ثاني من حمامها اللي فوق..
بعد دقايق الخدامة جابت الشغلتين..
حطت الليمون على الطاولة قدام نورة..
وعطت الشغلة الثانية لجواهر..
جواهر لنورة اللي حطت ماجد في كرسيه وبدت تمص الليمون: نورة قومي هاج..
نورة وهي لاهية في الليمون: شنو هاني؟؟
جواهر برقة ومساندة: تيست حمل..
******************
دانة وتهاني في استراحة الاطباء
تهاني مددت انتدابها للصحة المدرسية سنة زيادة
دانة تشرب قهوتها وتسأل تهاني برقة: وش اخبار مرضاش اليوم...؟؟
تهاني تضحك: الله يقلع دارهم ذا البزارين.. جننوني.. اللي يبكي واللي يضرب.. وكله كوم واللي سواها علينا اليوم كوم..
دانة تضحك: من جدش؟؟
تهاني وهي ميتة من الضحك: والله العظيم.. المسكين كان مرعوب.. ماشفت إلا السيول اللي غرقت الكرسي..
دانة بتعاطف: حرام.. أكيد انحرج ياقلبي عليه..
تهاني بابتسامة: ايه والله انحرج المسكين..
دانة قامت تحط كوبها على الطاولة.. ثم رجعت تجلس..
سألتها تهاني بنبرة خاصة: ماغيرتي رايج؟؟
دانة بنبرة عادية: في شنو؟؟
تهاني باهتمام: في دكتور سعد؟؟
دانة بضيق: تهاني حبيبتي قلت لش ألف مرة سكري ذا الموضوع..
تهاني هزت كتوفها: بكيفج.. بس حبيت أقول لج.. ان دكتور سعد عنده امل أنج تغيرين رايج
******************
في بيت أبو صالح...
فاطمة نازلة من فوق....
اليوم ماعندها الا محاضرة وحدة.. والدكتور معتذر
فاليوم قاعدة في البيت
أبو صالح وأم صالح قاعدين تحت يتقهون..
أبو صالح خلص سؤال عن ثاني
ماخلى حد ما سأله..
وطلب من ناس ثانين يسألون له بعد..
الكل مدح فيه.. ومدحوا حفاظه على صلاته وقوة شخصيته
وإنه عنده خير كثير
لكنهم بعد قالوا لهم أنه شايف حاله شوي وأنه هذا هو عيبه الوحيد..
أبو صالح ما اعتبر هذا عيب لأنه شافه نوع من الثقة بالنفس
وخصوصا أنه جلس مع ثاني بنفسه
وشاف إن اعتداده بنفسه شيء ينبع من طبيعته
لاهو مستقبح ولا مبالغ فيه..
وقعدته وسوالفه تدل على رجولته ومافيه عذروب..
وحتى أم صالح صارت مقتنعة بأفكار زوجها
هذي كانت أفكار أبو صالح.. وقت ماوصلته فاطمة وحبت رأسه ورأس أمها وهي تقول: صباح الخير باباتي.. صباح الخير ماماتي..
أبو صالح طالع فاطمة بحنان: فطوم.. تعالي اقعدى يمي يبه..
فاطمة جلست جنب أبوها وهي تحضن ذراعه وتحط رأسها على عضده..
أبو صالح وهو يمسح شعرها: فطوم ياج معرس خوش ريال والله.. ريال الله أرسله لنا من السماء
فاطمة تصلبت يدها على يد أبوها وردت بسرعة مفاجئة.. رد أشبه بقنبلة انفجرت وسط السكون: أنا موافقة..
أبو صالح ابتسم وهو مستغرب موافقتها السريعة بدون حتى ماتعرف من هو..
وماعرف الأفكار اللي دارت في عقل فاطمة خلال ثانية واحدة...
فاطمة لما سمعت أبوها يقول إنه جاها رجّال فيه خير قررت توافق بسرعة عشان تسكر الباب على ثاني
" إذا اتصلت أخت الشيخ ثاني بن ناصر مرة ثانية عطيتها رقم أبوي... خل الحقير يتفاجأ أني مخطوبة إذا يا .. وأبرد حرتي فيه شوي"
وماعرفت فطومة الأمورة "إن من هرب من شيء ماذبحه إلا هو" مثل مايقول مثلنا..
أبوها بتردد: توافقين كذا حتى بدون تعرفين من هو..
فاطمة بثقة: مو أنت تقول إنه ريال فيه خير.. وأنت موافق عليه..
أبوها بثقة: أنا أشهد أنه فيه خير.. وريال مامنه اثنين.. وأنا فعلا موافق عليه..
فاطمة بثقة ونعومة: وأنا عقب رأيك مالي رأي...
أبو صالح بود: يعني نحدد يوم للملجة؟؟
فاطمة قامت تطلع وهي تقول بخجل: كيفك يبه..
**************
بعد دقايق.. فاطمة كانت تسوي مكالمة جماعية شبكت فيها مها ومنيرة..
فاطمة بمرح مخلوط بالخجل: العانس بتلحق بركبكم.. أنا انخطبت..
منيرة بصدمة: من؟؟ اللي شفناه عند باب الدكتورة جواهر في المستشفى؟؟
فاطمة بعصبية: يخسى هو وويهه.. ماعاد إلا ذاك الوقح الحقير..ليه خلصوا ريايل الدوحة..
مها بفرح: زين وش اسمه؟؟ واشلون؟؟
فاطمة بارتباك: تصدقون ما اعرف اسمه..
منيرة باستغراب: أشلون تجي ذي؟؟ تنخطبين لواحد ماتعرفين اسمه..
فاطمة ببراءة: ماطر ببالي أسال.. أبوي قال لي ياج ريال فيه خير...
قلت موافقة عشان أقطع الطريج على الحقير إذا يا...
أبيه يي يخطب يقول له أبوي أني انخطبت.. أبي أهينه مثل ماهانني..
مها وهي تضحك: شكلش مكثرة من شوفة الأفلام يالخبلة
فيه وحدة توافق على العرس عشان تحر واحد ماشافته إلا مرة وحدة...
هذي حياتش يالمرجوجة.. مايصير تقررينها بذا الطريقة..
فاطمة تبتسم: خليني أضرب عصفورين بحجر...
بانخطب لواحد فيه خير وأبوي مقتنع فيه..
وفي نفس الوقت أبرد حرتي في ثاني الكلب...
وبعدين أبوي كان يرفض ناس وايد بدون مايقول لي..
وهذيه أول مرة يقول لي.... معناته أنه هذا أحسن واحد ياه..
وعقب كملت بخجل: تدرون ودي أعرف اسمه.. بس استحي أروح لأبوي أسأله..
#أنفاس_قطر#
.
.