مساء الخير على الجميع
انا حاب مره اشكر هالموقع على فكرته الحلوة
- روايات وقصص الانيمي -
من جد كان خاطري بشي زي كذا لانو في راسي الكثير مثلي افكار
وابداعات ومن يدري يمكن يكونون كتاب مايندرى


مساء الخير على الكل الحلوين والحلوات والشبابين والبناتات اللطيفات << بدينا بالتميلح
انا ديدي تشان اصغر عضو من اعضاء المنظمه اللطيفه حقتنا (( الاكاتسوكي ))
اللي مايعرف معنى اكاتسوكي يعني الغيمه الحمره
واحنا كلنا لابسين بشوت - بشوت يعني هذا اللي يلبسونه الرجاجيل في العيد والعرس ^_^ اي ستره - حمرا انا جالسه الحين اكتب << حسيت انه بثالث ابتدائي
المهم .. انا عندي دفتر شرته لي امي .. هي طبعا شرته علشان اذاكر واكتب فيه مو اجلس اتفلسف واكتب مذاكرتي بس ماعليه تستاهلون .. وانا بحكيكم عن حياتي
الخاصه وكيف عايش انا وربعي وان شاء الله عاد تنبسطون
اول شي بعرف لكم عن ربعي واللي بحش فيهم لكم في هذا الدفتر وهم
ايتاشي : _ ياثقل دمه _ ا ا .. اقصد واحد من ربعي المقربين حيل .. طويل .. مفهي _ مفهي يعني مسطل مايدري وين الله قاطه _ بس قلبه طيب بس يبط كبدي ساعات
هو يحب ياكل المشاوي كثير _ مطيح عند الركن اللبناني وبيت الكباب وهلم جرا _ وهوايته متابعه المسلسلات القديمه وكلمته المشهوره _ يجب الله المطر _
ساسوري : وهذا بعد واحد من اعز ربعي يعجبني فزاع _ يعني لو طلبت منه مساعده يجيك يركض مايصدق يشم ريحه هوشه _ بس انه قليل ادب ولسانه طويل وشايف
نفسه ومغازلجي _يحب يجذب انتباه البنات _ مسوي فيها رجيم ورجيم وبقاله حارتنا كله تحت سريره
توبي : هالانسان غثيث ويستخف دمه ولاصق فيني ويرفع لي ضغطي بس ساعات يكسر خاطري لانه يحبني حيل بس بنفس الوقت حمار يدورها من الله علشان بس
يتمسخر علي
باين : او ناجاتو بالاصح ياحليله عاقل بزياده مدمن كورة ويشجع برشلونه بشغف وعند شيستر شيتا الوجبه المفضله _ هذاك البطاطس اللي علي صورة نمر _ قليل
كلام بس ان تكلم يموت من الضحك
كونان : يازينها .. احم احم هذي نسرة المجموعه .. مزعجة .. مغروره .. ونحيسه _ يعني راسها يابس _ اهلها جايبينها علشان انا اشتغل عندها سواق ياديدي جيبني
ياديدي وديني وكل هذا من غلطه عمري اللي سويتها _ مره من المرات كسرت لمبه سيارتي وبغى ابوي ينحرني عالعيد وصلحتها لي والين يومك تعايرني _
هيدين : هذا اكسل مخلوق في الكره الارضيه منه لو الجدار يتحرك هو مايتحرك 24 ساعه منسدح و وكلمته المعتاده (( مالي خلق ))
اوكي هذي كانت البدايه
اتمنى انو تكون يومياتنا حلوة وتنبسطون منها


***********
STORY 1
"مهمه عاجله "
صحيت الصبح على صوت جوالي _ ولكم ان تتخيلو كيف صوت جوال طايح كم مره وطايح بالمويا 700 مره _ عاد مو زلام اقولكم جوالي بلاك بيري لانو اللي في مثل حالتي
24 ساعه مافيه رصيد وخدمه البلاك بيري تساعدني .. المهم واقوم وانا كاره نفسي وعيوني حمر وارد
****
انا : يالله صباح خير نعم
توبي : صباح وشو يا صباح.. انت الساعه 2 ونص يابابا
انا : الله المستعان .. طيب انت مين ؟
توبي : خخخخخخخخخخخخ شكلك لسه ماصحصت انا خويك توبي الفتى الطيب
انا : والله وماقالت طيب !! طيب ياطيب شعندك .. الا صحيح توبي ؟ من وين الرصيد .؟ هاااااااااااااا من وراي اشوف
توبي : اسكت لقيت عشره طايحه في صالته بيتنا وخذتها وشحنت
انا : اعوذ بالله .. على طول مااصدق الاخ اي يشوف يشفطه
توبي : هههههههههههههههه ماعلينا الحين تعال ورانا شغل
انا : وش قالك قائدنا السحليه _ اورتشيمارو _ وش يبي بعد
توبي : يبيني نودي صندوق كتب لواحد من اقاربه في المدينه المجاورة
انا : واحنا نشتغل تكاسي نوصل كتب وماادري وشو من جده هذا ؟؟
توبي : والله عاد هذا اللي عندي انا وبصراحه انا ماعندي الا الله ثم انت
انا : وطقم قوارير الفيمتو الباقين ؟؟ _ يقصد الاكاتسوكي اللي لابسين اسود_
توبي : ايتاشي دقيت عليه قال يجيب الله المطر وسكر بوجهي و وكونان عصبت علينا وقالت : لا والله اروح واجي واكسر ظهري وباين اليوم مباراه برشلونه والله
لو يحترق بيتهم مادرى وهايدن مايرد من اساس وساسوري قلت له تعال قال ماعندي بنزين قلت له بنعبي قال ماعندي سيارة قلنا بيوصلنا قال ماعندي رجول !!
وقام يستخف دمه لين لاعت كبدي وسكرت
انا : والحل
توبي : الحل انك تجي وياي يابطل انتا لانك احسن واحد وبيعطينا علاوه على رواتبنا 500 ريال وش رايك ؟
انا : خلاص خلاص طيب يللا البس واتروش واجيك
توبي : خلاص ان شاء الله .. ديدي ديدي
انا : نعـــــــــــــم !!
توبي : قول كباب
انا : - بدينا بالاستهبال - كبــــــــــــــاب
توبي : امك تاكل تفاحه هههههههههههههههههههه !! طوط طوط
****
يمديكم على اصدقائي صراحة يجننون وبالاخص هذا اللي اسمه توبي .. انا ماادري هو صاحي ولا شارب الله اعلم .. اجل كباب .. امك تاكل تفاحه !! الله لايبلانا


المهم واصحى وانا اسحب رجولي اللي تعورني وامشط شعري _ والله يبي لي اطلع بدعايه هيد ان شولدرز بدال الشغل مع ذولي اللي مايتسمون !!! _ والبس
لبسي واطلع واهم شي لاتفوتكم سيارتي _ كامري 2009 ذهبيه واللوحه خ ب ل 999 _ وياعمري عليها تصفر من البنزين _ فاضيه مافيها بنزين _
الخلاصه اني سندت ظهري على السيارة واتفرج على بيتنا الحلو واشوف احد من اهل الله _ اهلي _يعطيني فلوس علشان اعبي بنزين , طبعا ابوي مر ولا كانه
شايفني يسلم على القطو اللي يلعب بحوش بيتنا ولا يسلم علي ^ شدعوه يبا عطنا وجه السلام لله ^ ولا من دري ولا من شاف !!

ويمر كذا بالصدفه واحد مااحب اشوفه بس والله من شفته قاعد يعد فلوسه حبيته ^ سبحان الله ^
***
انا : جارااااااااااااااااااااااااااااااااااااااااااا
جارا : ياليل الازعاج . . الواحد مايعرف يعد فلوسه بهل الحارة ولاوشو
انا : ياحبي لك حياك اقلط عندنا
جارا : لا والله مشكور
انا : لا والله تشرب قهوتك عندنا .. حلفت حلفت
جارا : اسمع اذا تتوقع اني بعطيك فلوس .. انت وسيارتك هذي .. مشمخه ومصدومه وحالتها حاله روح روح الله يستر عليك
انا : دام كذا اجل توكل على الله قبل لا اكفخك
جارا : ههههههههههههه والقهوه
انا : انت لو تدخل عندي الحين اسبحك بدلة القهوه اللي جوا _ يعني بيكبها عليه _
******
وراح هالبايخ بطريقه وانا استنى احد يرحمني مافي الا قطو اسود يطالعني بكل احتقار وانا اقول كش كش وهو يمسح راسه ويلحس شعره ^ حتى القطاوة شافت نفسها


وبعد شوي تجيك الغاليه حلوة اللبن امي .. وانط عليها واحضنها واصيح وهي تطالعني خايفه
امي : وش فيك ياولد خوفتني الله يقطع عدوك
انا : يما تكفين ارجوكي تكفين النجده
امي ( وهي تطلع بوكها) : اشوف كم عندي واعطيك .. اوف فقر فقر وش اسوي فيك ؟
انا ( ابتسامه خبيثه ) : اخر مره يما
امي : انت كل يوم اخر مره .. عن النصب وتوكل على الله لاتسوي لي فلم هندي .. خذ هاك 100 ريال .. خذ 20 وجيب عشا لاخوانك بـ 80
انا : ابشري يما مااجي الا وبيدي احلى عشا - على اساس اني باخذ مكافئه من الشغل 500 قلت اوريهم اني مو فقر وبيجيب لهم عشا محترم -
امي : والله العظيم لو تنسى بخليك تغسل الحوش

***


واحب راس امي _ طبعا مايصلح اسير قطو اكل وانكر لازم عاد اسير مؤدب واشكرها _ واحط رجولي بسرعه وسبحان الله ولا توبي الخبل مدبر الفلوس قبلي وجايني
بسيارته وهو يقولي : ادري وجههك فقر تعال اركب . وركبت معاه بسرعه وجينا نروح للبوس وفي الطريق
انا : من وين دبرت السيارة انتا ؟؟
توبي : هذي سيارة باين عطيته كارت الجزيره وقال خذ سيارتي بس لاتخربها
انا : على خير هههههههههههههههههه الا بالله شوف ذيك اللي واقفه هناك ماكانها كونان !!
توبي : الا بلى هي .. وتقول عندي موعد طبيب اسنان وهي في السوق النصابه !!
انا : هذا اللي فالحه فيه تعبانه وظهري يعورني بس الاسواق ماشاء الله اول وحده
شوي ويتصل علي رقم غريب انا : مين ؟؟
: يعني من اللي بيتصل عليك انت وهالوجه .. هارون الرشيد ... انا ايتاشي
انا : هههههههههههههههه هلا اتوش .. خير وش عندك داق من رقم غريب .. بعدين وش فيك معصب ماهي عوايدك
ايتاشي : ابوي هاوشني وعطاني محاضره في كيفيه توفير المصروف وعدم الاعتماد على الاخرين وماادري وشو
انا : عندنا وعندكم خير _ يعني حتى ديدي دايم يجيه تهزيء من ابوه عن هالموضوع _
ايتاشي : يجيب الله المطر .. المهم .. رايحين توصلون الكتب لاوروتشمارو
انا : اي بالله رايحين .. تجي ويانا يالطيب ؟
ايتاشي : حشا لله اول شي امي تبيني اوديها السوق واختي تبي اجيب فستانها .. وشغالتنا تبي اشوف ان كان جاتها رساله وعمتي ..
انا : خلاص خلاص وصل يعطيك العافيه
توبي : سلم لي على اتوش وقوله لاينسى يوصل الكيك لامي
انا : ايتاشي وصل الكيك لام توبي ... الا صحيح انت وش دخلك بام توبي ؟؟
ايتاشي : ان شاء الله ان شاء الله , وش دراني ياديدي انابوصل وبس يللا باي
****************

وصلنا بيت البوس اوروتشمارو _ اسمه طويل واحنا الاكاتسوكي نسميه بوس شاورما _ عاد البيت ماشاء الله حدث ولا حرج يطرد فيه الخيل .. فله 3 ادوار
ومسيح وملحق _ مو مثل بيوتنا .. تحس من كثر الزحمه الجيران بيجون ينامون عندنا _ والمدام قاعده تشرب شاهي وماسكه الجوال وتحش . هذي شفتي فستانها
وهذي من زين كشتها ..يوم شافتنا قالت : هلا والله بعيالي حياكم يما تعال شربو شاهي حياكم .. تبون عاد الصدق !! ليتنا نشتغل وياها ولا نشتغل عند بوس شاورما
ماامدنا نقعد بسم الله الا تجينا كورة طايره وتضرب راس توبي .. التفت توبي ولا واحد من عيال بوس شاورما .. طبعا مابيده حيله الا انه يطالعه ويبتسم علشان
ماينذبح وانا بعد جاتني بنتهم الصغيره وشدت شعري وطالعتها وابتسمت .. والمشكله المدام تضحك وتقول :ياحليلهم عيالي الله يحفظهم .. وحنا نشرب شاهي وناكل
بسكوت وساكتين , عاد البنوته ماخلتني بحالي جات
وقالت : انت وش اسمك ؟؟ ليش جايين بيتنا _ تعرفون الصغار ونحاستهم _
عاد انا جاوبتها : انا ديدرا ياحلوة انا اشتغل مع ابوك
قالت : وع اسمك بايخ _ من زين اسمك ابوك عاد بوس شاورما _
انا : حبيبتي انتي الله يحميك
تخصرت البنت وقعدت تتفلسف : تشتغل مع ابوي يعني انت خدام ابوي ههههههههههههههههههههههههههههههههه ياخدامه
انا ارتفع ضغطي واحمرت عيوني وانهبلت بس مسكت نفسي لاينقطع رزقي وطنشت _ طبعا البنت ماسكتت ظلت طول الوقت تقول خدام ابوي خدام ابوي _ تلوموني بعد
ليش مو ناوي اتزوج !! .. وبعد نص ساعه من الازعاج والقلق .. جا البوس
البوس : هلا والله بالرجاجيل .. ها جاهزين للمهمه ؟
انا : ابد رهن اشارتك يازعيم انت تامر !!
البوس : اسف والله بتعبكم معاي بس انا مااثق اودي الاغراض هذي بالفيديكس _ شركه عالميه لتوصيل الطرود _ ابيكم انتم تودونها
توبي : افا تعبك راحه والله
البوس : في سيارتين فيها كتب كل واحد منكم يسوق سيارة ابيكم توصلونها لاخوي وهالحمير الباقيين _ الاكتسوكي اللي قاعدين بالبيت _ انا بكلفهم بشغله احلى
شوي ولا تنط بنت بوس شاورما تقول : يبا يبا بروح لعمي الله يخليك ابي اروح
البوس : خلاص ياحبيبتي خلي امك تجهز اغراضك
انا طلعت عيوني من مكانها .. بس هديت قلت لالا خلاص بتركب مع توبي
البوس : مع مين تبين تركبين حبيبيتي ؟
انا ( بيني وبين نفسي ) : الله يخليك مو انا !! لاتختاريني تكفين
البنت باعلى صوت : بركب مع خدام ابوي _ واشرت علي _
لا لا مستحيل بموت انا .. انا وهي في بيتها مو متحملها شلون لو تكون معي !!


بكذا نكون خلصه الجزء الاول من كل القصه الاولى _ كل قصه جزئين _ ان شاء الله تكون عجبتكم انتظر تعليقاتكم _
akatsuki boy