| وهذا البارت الرابع
الجزء الرابع :
في اليوم الثاني واللي هو يوم الأثنيـن .
الساعة 8 الصبـاح .. في غرفـة نـدى و لينـا
نـدى تصحي لينـا : ليوون يلا اصحي
لينـا تلف للجهة الثانية : بليز نـدى اتركيني انام
نـدى وهي تسحب اللحاف : والله ودي بس وراك جامعة
لينـا ترجع تاخذه : لا ما عندي
نـدى : كم الساعة تبدأ محاضرتك ..؟؟
لينـا : 10
نـدى ابتسمت : أجل اخليك تنامين
لينـا : وانا وش اقول من الصبح
نـدى : هههههههه تيب بس حاولي تصحين بدري عشان ما تتأخرين على محاضرتك
لينـا : ورربي ادري ... بس خليني انام بليــز
نـدى ابتسمت : اوكي .. باي
طفت الأنوار وطلعت .... ولينـا كملت نومتها ( :
.................................................. .........
تحت في الكافتيريا ..
نـدى جاتهم : صباح الخير
البنات : صباح النور
روان بتأفف : وين لينـا بعد ..؟
نـدى : لينـا ما راح تروح
مي : ليه تعبانه ؟؟
نـدى : لا بسم الله عليها .... بس محاضرتها تبدأ الساعة 10 تو الناس على روحتها
مي : اهااا فكرت فيها شي !
نـدى : لا ما فيها
حلا جاتهم بسرعه : سوري يا بنات تأخرت عليكم
روان بسخريه : والله زين اعترفتي .؟!
حلا ناظرتها بس ما علقت.
نـدى : الا وين فرح ..!!
مي : يعني ما تدرين انها بنفس تخصص لينـا
نـدى ضربت راسها بـ خفيف : يؤ نسيت
روان تناظر الساعة وقالت بعصبية : بسررعه ترى تأخرت
الهنوف : طيب طيب خلصنا
روان اتركتهم وطلعت برى ..
نـدى : وش فيها !!
مي : شوي وتبدأ محاضرتها
نـدى : اجل ليه واقفين يلا تحركوا
الهنوف بملل : جاتنا الثانيه
حلا تلف الشيلة على راسها : بلا تعليقات
الهنوف : طالع من يتكلم .!
حلا بطرف عين : نعم
الهنوف ابتسمت : لا ولا شي
حلا سمعتها بس ماتبي تجادل ... عشان ما تأخرهم
طلعوا من السكـن وعلى طول ع الجامعة ,,
.................................................. .............
في نفس المنطقـة بس في مكان ثاني .
فارس يمشط شعره وهو يدندن وهو حده فرحان إن اللحين بيروح يشوف خطيبته .
( مستغربين ..! بس ما راح اخرب عليكم ) .
نزل من الدرج وهو يغني اغنية ايه أحبك لـ راشد الفارس.
ايه احبك واعترافي لك كفاية ... نبض قلبي وانشغالي هو الدليل
يا هوا نفسي ويا غاية منايا ... في ظليم النبع حبـ .........
سمعه اخوه وقطع عليه جوه : الأخ رايق
فارس ابتسم في وجه اخوه وجلس ع الكنب :
أنا رايق وجوي رايق ولا فيني أي ضيقه ... وأنا أحبك ولجل حبك صرت أعشقها حياتي
سعود : وكاشخ بعد ... وين على الله !؟
فارس بشوق : بروح اشوفها.
سعود بهودء : مين ؟!
فارس : يعني مين بالله ؟؟
سعود بنفس الهدوء : مـروهـ !!
فارس : فديت قلبها.
سعود ناظر الفراغ مده طويله .. يفكر في مشاعر اخوه لما يدري عن مروه ما وده يحطمه او يكسر قلبه بس هذا هو الواقــع ..!
سعود بهدوء يخوف : فارس
فارس ناظره : هلا
سعود : مروه
فارس خاف من هدوئه : وش فيها مروه ..؟! صاير لها شيء
سعود : سلامتك ... ولا شي
فارس : أجـل
سعود خذ نفس : مروه تزوجت بـ واحد ثاني
فارس ما استوعب : هاا
سعود ناظره : تزوجت
فارس ضحك وهو مو مستوعب : امزح على غيري
سعود هز راسه : فارس انا من جدي اتكلم
فارس وقف : سعود بلا جنان
سعود تنهد ..
فارس : سعود انت عارف وش تقول ..؟؟
سعود : هذا اللي صار
فارس جلس ع الكنب ... وهو أبد مو مستوعب اللي سمعه .. صررخ في وجه سعود ولأول مره
نزلت أخته فجر بسرعه من الدرج يوم سمعت صوت الصرخه : خير وش صار ؟؟
يوم شافت شكل فارس تأكدت انه عرف بالموضوع .. ونزلت راسها
فارس تقدم لـ فجر بهدوء : الحكي هذا صدق ..!؟
فجر تقدمت لـ عنده : فارس الله يعوضك بـغـ.........
فارس قطع كلامها وقال بحده : صحيح اللي قاله ؟!
فجر بلعت ريقها وقالت بصوت خافت : إيـه
فارس غمض عيونه و قال : يصير خير
وطلع بسرعه من البيت ..
فجر بصوت عالي وهي تلحقه : فااااارس لحظه ... لا تتهور
بس صوت سكرة الباب هزت البيت هز ..
فجر راحت لـ سعود : سعود روح الحقه .... اخاف يروح لـ بيت عمي ويسوي مصيبه
سعود : بزر هو يروح بيت عمي ويتهاوش معه ... هو عارف ان كل هذا قسمة ونصيب ومروه مو مكتوبه له خلااص
فجر دمعت عيونها : ايه بس انت ما شفت شكله واضح ان ناوي على شي
سعود يطمنها : لا تخافين فارس عاقل ولا يسويها
فجر : طيب قول لـ أبوي خليه يكلمه.
سعود : في ايش يكلمه انتي الثانية .. خليه يستوعب الصدمة اللي جاته أول
فجر تدعي على مروه : كل منك انتي الله ياخذك .... لو صار في اخوي شي والله ما راح اسامحك
سعود : فجر ما يحتاج تقولين هـ الكلام على بنت عمك .. كل شي مكتوب ومافي اعتراض علي قسمة ربي
فجر : آمن بالله ... بس هي كانت تحب فارس وش اللي غير اللحين ؟!
سعود تركها وصعد فوق : اللي غير ان مروه ماهي من نصيبه ... فكينا زين
فجر مسحت دموعها و راحت للتلفون تتصل على بنت خالتها واللي هي توأم روحها وتقولها اللي صار.
.................................................. ...........
نرجع لـ لينـا وفرح في السكـن ,,
دق المنبه عند الساعة 9 بالضبط .. و قامت سبحت ولبست وجلست ع الكنبة اللي بـ غرفتها
لينـا تكلم نفسها ( يا ترى أقول لـ نـدى عن سالفة روان وارتااح ... ولا أسكت! .. تنهدت .. بقولها عن سالفة أحمد ... أخاف يضحك عليها ولا شي وبعدين بتصير السالفة فيني .. طيب واذا زعلت روان ..؟! اووف ياربي منك يا روان لو إني ما سمعت كلامك أحسن لي اوف) خذت شنطتها وعبايتها ونزلت تحت في الكافتيريا.
.................................................. ....
في الجامعـة عند البنات ... في الكـلاس
روان من اول ما دخلت الكلاس وهي ترسل بلوتوث للبنات في بعضهم يستقبلون وفيه بعضم لا على قولتها ( ثقال دم ) .
شافتها الدكتوره وصغرت عيونها : روااان
روان رفعت عينها وهي للحين ماسكة الجوال : نعم
الدكتوره : بتعملي إيه ..؟!
روان ابتسمت : ولا شيء
الدكتوره وهي تحاول تناظر : واللي بأيدك ده إيه ؟!
روان تستهبل : اهااا قصدك الجوال .. ايه والله مدري شفيه ازعجني البلوتوث واحد ورى الثاني
الدكتوره : إئفلي الموبايل دلوئتي ..؟!
روان رجعت ناظرت الجوال : سوري
الدكتوره رفعت حاجب : إيه !! ( يعني نعم ! ) هع
روان ناظرتها وابتسمت : سوري ما اقدر
الدكتوره تأشر ع الباب : تفضلي انتي مطروده
روان ما صدقت على الله بس سوت نفسها انها تبي تجلس : ليه دكتوره ..!؟ وش عملت
الدكتوره : بتعملي نفسك ما عملتيش حاقه ... وانتي بتهرقي عليا ( تسوين نفسك ما عملتي شي وانتي تستهبلين علي )
روان كتمت ضحكتها : وانا وش سويت ..!؟
الدكتوره عصبت : خودي موبايلك وتفضلي
روان قامت : اكيد باخذه اجل اخليه
الدكتوره : وكمان بتردي ... انتي مطروده لمدة يومين
روان ماتت من الفرحه .. وبسرعه طلعت من الكلاس وراحت تبشر البنات <<< اما بشاره
.................................................. .........
عند نـدى في الكلاس ..
طول الوقت وهي تناظر الساعة .. توها داخله من شوي ( متى بخلص من هـ المحاظره .. طفشت وربي )
اللي جنبها حست انها طفشانه .. فحبت تونسها و فتحت بلوتوثها وخذت تدور ع الاسماء ..ابتسمت
( مشاء الله عليهم .. كلهم فاتحين ... طيب ياربي وين اعرفها هذي اللحين ).
شافت أسم شذها ( لـ كبريائي رواية ) شكت انها هي .. وارسلت لها.
دقت نغمة جوالها وفتحتها .. من " تعبت أعطي " ( شكلك طفشانه )
رفعت حاجبها وتلفتت يمين وشمال وشافتها تبتسم .. وابتسمت لها
" لـ كبريائي رواية " ( ههههه وش دراك )
" تعبت أعطي " ( واضح من شكلك ههههه)
" لـ كبريائي رواية " ( من جد طفشت ... الا أنا أول مره أشوفك ! )
" تعبت أعطي " ( بس أنا مو أول مره ^_^ )
" لـ كبريائي رواية " ( غريبـة ! )
" تعبت أعطي " ( لا غريبة ولا شي ... بس أنا أول مره أجلس هـ المكان ويمكن بعد انتي ما انتبهتي لي )
" لـ كبريائي رواية " ( يمكن )
" تعبت أعطي " ( انتبهي .. الدكتوره تناظرنا )
" لـ كبريائي رواية " ( أجل باااي )
" تعبت أعطي " ( باي )
نـدى قفلت بلوتوثها وانتبهت <<< مؤدبه
تمت المحاضرة ثلاث ساعات تقريبا.. وطلعت ^_*
................................................
مـر اليوم على خير ,,, وجات الساعة 2 في الليل.
قاعده تناظر نفسها بالمراية ومستانسه على عمرها : يمه أهبل
رن جوالها بـ نغمة الحب خالد .. شافت الرقم غريب وماردت
بس الجوال مازال يرن .. استغربت ( من هذا اللي داق في نص الليل ..!)
ردت : آلـوو
الطرف الثاني : ......................
مروه : آلو نعم .. مين معي ؟!
الطرف الثاني بهدوء : مروه ..!
مروه عرفت الصوت واللي مستحيل تنساه .. وكيف تنساه وهو صوت حب حياتها .. الصوت اللي أسرها وأنساها كيانها .. صوت عشيقهـا..!
مروه بهدوء : فارس
فارس : تذكرتي صوتي ..؟!
مروه ماردت ..
فارس : مروه
مروه خذت نفس : نعم
فارس بهدوء : الكلام صحيح ..؟!
مروه بلعت ريقها : آسفه
فارس غمض عيونه ..
مروه كملت : ما وفيت بوعدي لك
فارس : ليـه !!
مروه دمعت عيونها : مافي سبب ..!
فارس : الا أكيد فيه ..!
مروه : فارس اللي صار صار وأنا اللحين على ذمة رجال ومابي أخونه
فارس ابتسم بضيق : وتخونيني ..؟!
مروه وعيونها قامت تذرف دموع : انت تركتني
فارس بـ وله : بس قلبي معاك ..!
مروه : مو بس كذا ... انشغلت عني بدراستك ولا فكرت فيني
فارس : ومن قال ..؟!
مروه مسحت دموعها : قلبي يقول
فارس : مروه هذا مو سبب انتي وعدتيني اني اكون لك ... والاهل يعرفون بـ هالشيء
مروه : الناس قامت تتكلم عني وأهلي بعد عايروني وأمـي ............. سكتت
فارس : وش فيها ..؟!
مروه بلعت غصتها : فارس إنساني ..!
فارس : .......................
مروه : إنساني خلاص ... أنا مو لك ولا مكتوبه لك
فارس : أتمنى انك بعد تنسيني
مروه قامت تنزل دموعها ..
فارس بضيق : الله يوفقك ويسعدك مع غيري
مروه ماتحملت وقفلت الجوال بـ وجه ( لازم تذكرني فيك ) .
فارس ناظر الجوال وابتسم والغصة واقفة بقلبه ( الله يوفقك )
.................................................. ...
في نفس اللحظه ... في غرفة نـدى ولينـا
قاعده تتقلب في السرير وعفسته فوق تحت .. حاولت تنام بس مو قادره النوم طاير من عيونها
ودها تنزل تحت وتتمشى برى بس تخاف لحالها.. ناظرت لينـا اللي واضح انها غرقانه نوم لانها ما نامت من اول ما جات العصر .
نـدى قامت من سريرها بهدوء وراحت لـ عندها وقامت تهزها بخفيف : لينـا
لينـا عشان نومها خفيف سمعت بس ما ميزت الصوت : هممم
نـدى بهدوء : اصحي أبغاك بكلمة
لينـا فتحت عيونها بصعوبه : اللحين ..!
نـدى ابتسمت : إيه اللحين
لينـا خافت : ليه احد صاير له شي ..؟؟
نـدى : لا سلامتك .. بس أبغاك ضروري
لينـا باستغراب : تيب .... وقامت ودخلت الحمام ( الله يكرمكم )
نـدى ابتسمت ( لو تعرفين وش أبيك فيه ... كان ذبحتيني )
لينـا يوم طلعت : نعم نـدى خوفتيني
نـدى رجعت خصل من شعرها لـ ورى أذنها وقربت من لينـا : ليووون قلبي
لينـا : بدام فيها قلبي ... أكيد وراها مصلحه
نـدى : هو يعني مو مصلحه مصلحه .. بس اذا تحبيني بتنفذينه
لينـا : الله يستر منك
نـدى شبكت اصابع ايدينها بـ بعض : بصراحه أنا مو جايني نوم .. وأبيك تطلعين معي برى نتمشى
غمضت عيونها بسرعه لأن أكيد بتاخذ ضربة من لينـا ..
انتظرت تشوف ردة فعلها بس ما شافت رد .. وفتحت عيونها بشويش وشافتها تناظرها بـ برود
نـدى استغربت : لينـا
لينـا : تدرين كيف ..!؟
نـدى بـ برائه : إيش ..!!
لينـا ابتسمت : بطلع معك لاني أصلا شبعت نووم
نـدى فتحت عيونها : حلففي
لينـا ضحكت : ههههههههه وربي
نـدى : الحمدلله
لينـا : بس مره ثانيه لا تعيدينها
نـدى غمزت لها : اوكي
لينـا ابتسمت هي اصلا فيها النوم بس ماحبت تكسر بخاطرها وبعدين هي قامت يعني ماله داعي إنها تستكثر عليها ..
نـدى : يلا خلينا ننزل
لينـا : وكيف بنطلع يا ذكية .. والباب مقفل
نـدى ضربت راسها : يؤؤ نسيت
لينـا ضحكت : ههههههههه هذا من زود الحماس
نـدى : بنطلع يعني بنطلع
لينـا : وريني كيف ..؟!
نـدى بخبث : تشكين في هذا ..! وأشرت على عقلها
لينـا خافت : تكفين مابي اتهور معك
نـدى : مثل ما تهورتي وهربتي ... احنا برضوا بنتهور وبنطلع
لينـا : ايه بس اخاف نغرق
نـدى بابتسامه خبيثه : بدام أنا معك لا تخافين
لينـا بلعت ريقها : لو اني ماسمعت كلامك أحسن لي
نـدى فتحت الباب بهدوء : اششش بدون صوت ... مابي أحد يحس
لينـا حطت يدها على فمها وهزت راسها.
طلعوا من الغرفة بخفة كأنهم سارقين شي .. والممر كان مظلم ويخـوف
نـدى بلعت ريقها وقالت بهمس : ليه المكان كذا يخوف .. ؟!
لينـا متمسكة بذراع نـدى وبنفس الهمس : يعني الساعة 2 في الليل وش تترجين ..؟
نـدى : اششش .. كملوا طريقهم ونزلوا من الدرج بهدوء وحذر .. ويوم وصلوا الدرجة الاخيره شافوا نور من مطعم اللي في الكافتيريا ..
لينـا بهمس : يا ويلي من اللي هنا ..؟!
نـدى : غريبه ليه تاركين الكافتيريا مفتوحه بـ هالوقت !
لينـا : من الغبي اللي بيتركها مفتوحه ... الا قولي هذا واحد جاي يسرق
نـدى ضربت راس لينـا بخفيف : وكيف بيدخل يا ذكيه ... بينط من الشباك مثلا
لينـا : كل شي جايز
نـدى حست ان الشخص بيطلع ومسكت لينـا وتخبوا تحت الطاولات ..
لينـا تأشر لها ( مين ..! )
نـدى تسكتها ( ما ادري اششش )
نـدى حاولت تناظر من هذا الشخص بس ما قدرت لان المكان ظلام .
أما لينـا قدرت تميز الشخص من النور العاكس اللي من الشباك ... وعرفت انها بنت من شعرها
لينـا بخفيف : عرفت مين ..؟!
نـدى تقصر صوتها : مين ؟؟
لينـا : هي بنت بس مدري مين بالضبط ..!
نـدى : شكلها راحت إمشي يلا
لينـا تشد ملابس نـدى : خايفه
نـدى بلعت ريقها : مو أكثر مني
طلعوا من تحت الطاوولة وراحوا للمطعم وشافوه مقفل .. ناظروا بعض باستغراب
لينـا : هذي يا حمده يا نجاة ؟!
نـدى : أو وحده من البنات سرقت المفتاح !
لينـا بتفكير : تتوقعين مين !؟
نـدى : وإحنا بنصير المحقق كونان على غفلة .. خلصينا نبي نطلع
لينـا : طيب كيف .!! بنسرق المفتاح
نـدى : لا طبعا .. بنقفز من الشباك
لينـا : هااا
نـدى : من قال ها سمع .. يلا بسرعة
لينـا : طيب انتي أول
نـدى : اوكي خلاص
راحوا عند الشباك وفتحوه بشويش عشان ما يطلع صوت.
لينـا : تخيلي ان في احد يراقبنا
نـدى وهي تحط رجلها : وحنا مسوين شي غلط يعني ؟؟
لينـا : وش دراهم ان نيتنا زينه ... طبعا بيروح بالهم بعيد
نـدى : كل من يرى الناس بعين طبعه
لينـا ابتسمت .. وقامت تتلفت يمين وشمال تشوف اذا في احد جاي ولا لا
نـدى بعد ما خلصت : يلا انزلي
لينـا : اوكي ... وقفزت بسرعه
خلوا الشباك مفتوح .. عشان يرجعون وهم في بالهم ان مافي احد شافهم ..!
لكن هيهااااااات .. مشت البنت بهدوء لعند الشباك وبكل برود سكرته وقفلته من داخل
وبإبتسامة خبث ( وريني شطارتك يا نـدى ) . وصعدت فوق ولا كأنها عامله شي.
نـدى بإنتعاش : وااااو الجو رووعـه
لينـا ابتسمت : ايه مرره
نـدى قاعدة تناظر القمر وتبتسم .. ولينـا نفس الشيء
نـدى بهدوء : قمرين في وقت واحد مشكلة ..!
لينـا : احم شكرا
نـدى بطرف عين : ومن جاب طاريك أصلا
لينـا : لا تقولين انك انتي القمر الثاني !
نـدى : مافي شك
لينـا : ههههههههه تضحكين على نفسك
نـدى بجديه وهي مقابله لينـا : جد ليوون أنا حلوه ..؟؟
لينـا رفعت حاجبها : وش طاري عليك هـ السؤال ..!
نـدى تنهدت : سؤال جـاء في بالي
لينـا بصراحه : ممم إنتي ما تعتبرين حلوه مثلي يعني
نـدى رفعت حاجب : تكفين الجمال مقطعك
لينـا : عندك شك ..؟!
نـدى تسكتها : لا لاا خلصينا أنا إيش ..!!
لينـا : ممم يعني إنتي عندك خاصيه حلوه ماحد عنده من البنات اللي في الشله
نـدى تحمست : وش هي ؟؟
لينـا : ممم إنتي جذابه ومملوحه بس ما تعتبرين جميله لا طبعا
نـدى تحطمت : لا تقولين
لينـا : يا غبية الصفة هذي تخلي الشباب يموتون فيك
نـدى بـ فرح : جد !!
لينـا : إيه أكيد يعني إنتي لما تكونين ثقيلة مع الشباب وجذابة .. تصيرين مثل المغناطيس ينجذبون لك ^_^
نـدى تنهدت : لا تقعدين توهميني في أشياء تافهة ... يعني أنا فارسة أحلام كل واحد وش هـ الغباء
لينـا : لا طبعا ... بس أغلب الصفات اللي يتمنونها موجودة فيك
نـدى بفضول : وش هي الصفات ؟!
لينـا : مممم إنتي هاديه وخجولة وطبعك كتومة ... يعني بعض الرجال ما يحب الوحدة اللي طول الوقت تهذر فوق راسه وتطلع كل اللي في قلبها وما تعطيه مجال يقول شي
نـدى ابتسمت : كأني وحده بتزوج عن قريب وقاعدة تعطيني نصايح
لينـا : وش دراك يمكن يجيك واحد ما تتخيلنه إلا في الأحلام
نـدى : هههههههههه لا ما أظن
لينـا : ما تعرفين وش اللي مكتوب لك !
نـدى : بهذي صادقه ..!
لينـا : تخيلي يجيك دكتور أو مهندس أو ضابط برزتـه أو كابتن طيار ..؟
نـدى : ههههههههه كابتن قويه شوي
لينـا : ههههههههه من جد وش دراك ..!؟
نـدى : تركينا من هـ السوالف خلينا ندخل
لينـا : أوكي يلااا
راحوا للشباك ... ولينـا حاولت تفتحه بس ما فتح
لينـا : وش فيه هذا ما يفتح ..!
نـدى : ما خليت إلا إنتي تفتحينه.
لينـا بطرف عين : شقصدك ..؟!
نـدى وهي تحاول تفتحه : ولا شي
لينـا ابتسمت : ورينا شطارتك اللحين
نـدى : يارربي مش راضي يفتح
لينـا بخوف : نـدى
نـدى وهي تحاول قد ما تقدر : نعم
لينـا تمسكت بملابسها : مو إحنا خلينا النافذه مفتوحه ..!
نـدى ناظرتها : إيه
لينـا : مين اللي سكرها ..؟!
نـدى : قولي مين اللي قفلها من داخل
لينـا بخوف : شقصدك ..؟!
نـدى بلعت ريقها : في أحد شافنا
لينـا : طيب يمكن تسكرت لحالها
نـدى : بس مستحيل تنقفل لحالها
لينـا شوي وبتبكي : يمــه
نـدى خايفه أكثر من لينـا بس حاولت تسوي نفسها عادي
لينـا : وش بنسوي اللحين ..؟!
نـدى ناظرتها وعيونها واضح فيها الخوف : ما ادري
...............................................
خلص الجزء ..
وش هي توقاعتكم للجزء الجاي ...؟! |