| وهذا البارت السادس
ان شاء الله تعجبكم الاحداث
الجزء السادس :
يوم الثلاثاء .. الساعة 6 ونص الصباح
رن المنبه اللي في جوالها .. بس ما حست عليه
روان أزعجها صوت المنبه وحطت راسها تحت المخده : طفووه
فرح : .................. <<<< لا حياه لمن تنادي
روان بصراخ : فرررررررررح
فرح فتحت عيونها ورجعت غمضتهم .. مو حاسه بالدنيا
روان ما ستحملت صوت المنبه وقامت طفته : فرررح
فرح فتحت عيونها بشويش : نعم
روان : أخيرااا
فرح كشرت : نعم وش تبين ؟!
روان : بدامك ما تجلسين على صوت المنبه ... ليه تحطينه ؟!
فرح قامت وأسندت ظهرها ع المخده ومدت ايدينها لـ فوق : صباح الخير
روان صباح النور .. صح النوم
فرح تتثاوب : وش فيك معصبه ؟!
روان بقهر : هذي اللي بتجنني
فرح بابتسامه : ليه !!
روان شدت على ايدينها من القهر : أحر ما عندي أبرد ما عندك
فرح : وش فيك طيب ؟!
روان بصراخ : مرره ثانيه لا تحطين المنبه ... طير النووم من عيوني
وبسرعه دخلت الحمام ..
فرح رفعت حاجب : وش فيها هذي ؟! <<< من جد نايمه ^_^
...........................................
في غرفة لينـا نـدى ,,
حلا حاطه راسها ع المكتب ونايمه ... ونـدى نايمه ع الكرسي جنب لينـا ولينـا في السرير
شكلهم غرقانين نووم . بس دخول روان بدفاشه خلتهم يصحون بروعه ..
روان رفعت حاجبها : في شي غريب ؟!
نـدى عصبت : ما تعرفين تدخلين بهدوء ... روعتيني يا دووبه
روان ناظرت حلا : وش مجيبك هنا ؟!
حلا بهدوء : مالك شغل
روان رفعت حاجب : نعم !
حلا ابتسمت : صباح الخير اول
روان عوجت فمها : صباح النور
لينـا بتعب : روان ماعندك ذوق ولا ماعندك ؟!
روان : شقصدك !؟
لينـا : ما تعرفين تدقين الباب قبل ما تدخلين ... ولا وشوو
روان جلست ع الكنب وحطت رجل على رجل : طبعا اعرف ... بس انتوا عاتي
نـدى تدخل الحمام : لا والله مو عاتي
روان : الا حلا وش عندك هنا ؟!
حلا : سالفه طويله ... الا كم الساعة ؟؟
روان تناظر ساعتها : 7 الا ربع
حلا تروح لـ عند لينـا : يلا ليوون عطيني يدك
روان باستغراب : وش هـ الدلال الزايد ؟!
حلا : بدال ما تتمصخرين علينا تعالي ساعديني نشيل لينـا
روان : ليه !!
حلا : أمس طاحت بالحمام على ظهرها وبعدين ما قدرت توقف ولا تمشي
روان شهقت : من جدك !!
حلا : لا من كذبي
روان بسرعه لـ عند لينـا : سلامتك يا بعد قلبي ... وش اللي يألمك ؟؟
لينـا ابتسمت ابتسامه صفرا : ولا شي يا حياتي لا تخافين علي
روان : تيب كان صحيتووني كان عرفنا نتصرف
حلا : لا ما حبينا نخوفكم ... بس انتي روحي خبري حمده بالموضوع نبي ناخذها ع المستشفى
روان : اوكي ......... وبسرعه نزلت تحت
نـدى طلعت من الحمام : وش رايكم ننادي الاسعاف عشان يشيلونها
حلا : هذه أحسن طريقه لانها مو عارفة توقف اصلا
لينـا دمعت عيونها : شكلي بصير عاجزه طول عمري
نـدى بسرعه : بسم الله عليك ... الله لا يقوله
حلا بحنان : ان شاء الله بتخفين وبتصيرين احسن
لينـا لفت للجهة الثانية : انتوا تبون تواسوني عشان ما اتضايق على حالي ... وانا عارفه ان فيني كسر وبصير معاقه
نـدى مسكت يد لينـا : لا تتخيلين اشياء مشئومه ... انتي بعدك شباب والعمر عندك طويل اذا الله بلغك
لينـا مسحت دموعها : خايفه من بكره
حلا : انسي بكره وفكري باليوم
لينـا : يا ليت أقدر
حلا ابتسمت : بتقدرين ان شاء الله
.................................................. .
في مكتب حمـدهـ ,,,
حمده : ومتى صار هـ الكلام ؟!
روان : أمس بـ الليل
حمده وقفت : تعالي خلينا نشوف
طلعت من مكتبها .. وصعدت فوق لـ غرفة لينـا ونـدى
دخلت الغرفة شافت كل البنات متجمعين في الغرفة
حمده : وش فيكم متجمعين هنا ؟!
مي : جاين نشوف صاحبتنا
حمده : شدعوه ما فيها الا العافيه
نـدى : ان شاء الله ... بس نبي ناخذها ع المستشفى
حمده : خير ان شاء الله
حلا : سلامتك .... بس هي مو قادره توقف وحنا خايفن عليها فنبي ناخذها ع المستشفى
حمده : ايه معليه ... بس بنتين تروح معها
كل البنات : أنااا
حمده ابتسمت : لا ما يصير .... بس بنتين تروح
نـدى : أنا اللي بروح معها
مي بسرعه : وأنا بعد
حمده : خلاص اجل ... بس بنادي إيمان تروح معكم انتوا لحالكم لااا
حلا ابتسمت : مشكوره
حمده : هذا واجبي ... وابتمست في وجه لينـا ... سلامتك ان شاء الله خير
لينـا بابتسامه صفرا : ان شاء الله
وطلعت ..
روان بسرعه : مي ماله داعي تروحين معهم .. خليني أنا أحسن
مي تخصرت : يا سلااام وش معنى انتي يعني ؟!
روان : لا بس احس اني انا افضل ... بليييز
مي بعناد : لا
روان : وانا ليش اخاذ رايك بروح يعني بروح
فرح : فكوونا انتي وياها مو وقت خناق ... ما تشوفون حالة لينـا كيف !!
روان بوزت : تيب
حلا : ها ندق ع الاسعاف ولا تشيلونها إنتوا
الهنوف : لا تدقون ... لان ما راح يدخلونكم كووكلم
نـدى : أجل والحل ؟!
الهنوف : في كرسي متحرك تحت حطوها فيه ومشوها
لينـا لفت وجها للجهه الثانيه : دقوا ع الاسعاف أحسن
نـدى ناظرتها بحزن : براحتك
لينـا بسرعه : إيه أهم شي راحتي
ريمـه كانت موجوده معهم : بس مو الصح إن أهلك يعرفون ؟!
لينـا بسرعه التفت : لا أهلي لااا
مي : ليه !!
لينـا : بس أهلي لا ... أكيد بينزلوني للشرقيه لا مابي
ريمـه : بس لازم يعرفون
لينـا صرخت في وجها : قلت لااا ما تفهمين
ريمـه خافت من ردتها ..
فرح : خلاص لينـا ما يصير خاطرك الا طيب
لينـا : اطلعوا برآ
البنات : !!!!!
لينـا بصراخ : ما تفهمون اطلعوا برآ
نـدى : لينـا مالـ............
لينـا : انتي بالذات اطلعي مابي اشوفك
نـدى علامات التعجب في وجها : !!!!
حلا : لينـ...........
لينـا : أقولكم اطلعوا مابي اشوفكم
مي عصبت : ترى احنا مالنا ذنب تعصبين علينا وتطردينا ... هذا اللي ربي كاتب لك وبعدين انتي ما تعرفين وش فيك عشان تتضايقين كل هـ القد
لينـا : انتي اصلا ما عندك احساس ... لو انتي في محلي كان حسيتي فيني وعلى قولتهم اللي ايده بالماي مو مثل اللي ايده بالنار
مي : اللحين أنا ماعندي احساس ..؟!
لينـا ناظرت الجهه الثاني : كل واحد عارف نفسه
مي غرقت عيونها : الله يسامحك
وطلعت بسرعه ..
الهنوف تضايقت : لينـا ليه كذا ؟!
فرح : ما يسوى عليك تزعلين وتزعلينا معاك
لينـا : خلاص اطلعواا
إيمان تدخل : وش هـ الصراخ ؟!
حلا ابتسمت بإرتباك : لا ولاشي
إيمان : طيب اللي بيجي مع لينـا يلبس عباته ولبسوها معكم الاسعاف جاي في الطريق
نـدى بسرعه : تيب ثواني
لبسوا لـينـا عباتها بصعوبه ... وفي ثواني جاء الاسعاف وخذوها ع المستشفى
.................................................. .
قاعد يتصفح المجله وباله مو معه .. مو من عادته يصحى هـ الوقت ولا عادته ينام بدري بس التفكير يطير النوم .
نزلت أمه من الدرج بجلابيتها الناعمة حق طلعات الصبح ^_^
طلال قام وحب راسها : صباح الخير يا الغاليه
أم طلال تجلس ع الكنب : صباح النور ... غريبه من وين الشمس طالعه ؟!
طلال ابتسم : قلت اصحى بدري اونس امي شوي
أم طلال : عيارتك تضحك علي !
طلال : ههههههههههه وأنا أقدر أضحك على أمي حبيبتي وكل دنيتي
أم طلال تضربه بخفيف : يمه منك يا العيار
طلال ابتسم : افااا ... أنا عيار ؟!
أم طلال : عيار ونص ... على أبوك طالع موب سهل
أبو طلال كان توه نازل ويوم سمع أسمه : وش فيه أبو طلال بعد ؟!
أم طلال ابتسمت : والله مافيه الا الزين
أبو طلال يتنحنح وهو يكلم طلال : شفت أمك وش حلاتها اليوم ... بس ما تقول هـ الكلام الا اذا تبغى شي ... وناظرها ... آمري وش تبين
أم طلال : الله يسامحك بس .. يعني ما ادلعك الا اذا بغيت شي
أبو طلال : والله كلووكم يالحريم كذا ... ينخاف منكم
أم طلال : لا يا عيوني انتوا اللي ينخاف منكم ... احنا مساكين على نياتنا وانتوا يا غافلينكم الله
أبو طلال يضيع السالفه لان عارف اذا بيرد عليها ما راح يخلصون : اقول يا مره .. الفطور
أم طلال : إيه ضيع السالفه تبي تفتك من حنتي
أبو طلال : افاا يالغاليه أنا ابي افتك منك ومن حنتك ... اصلا مو محليتك غير حنتك بس الله يعافيك الفطور وراي دواام
أم طلال تكلم طلال وهي واقفه : اقولك طالع على ابوك عيار مايحب الا نفسه
أبو طلال : لااا حول ... ترى اقوم
أم طلال : لا لااا خلاص اللحين الفطور يكون جاهز
وبعد ما راحت ..
أبو طلال : ايه اللحين انتي ام طلال ... والله انتوا يالحريم ما تصلح لكم الا العين الحمرا
طلال ابتسم على كلام ابوه وهو يناظر الفراغ .
أبو طلال لاحظ سكوته ماهو من عادته : طلال
طلال انتبه : هلا
أبو طلال : خير يابوك فيك شي ؟!
طلال ابتسم : لا سلامتك يا الغالي
أبو طلال : أبد مانت بطبيعي اليوم قاعد بدري وساكت مو من عادتك
طلال : مشغول مع معاذ ... وأنا اللحين انتظر رده
أبو طلال : في ايش ؟!
طلال ابتسم : كل شي بوقته حلوو
أبو طلال : عسى بس شي زين
طلال : وانا اسوي غير الزين ... طبعا زين وبيعجبك
أبو طلال : الله يوفقك
طلال : آمين ان شاء الله
أم طلال من بعيد : يلا الفطور جاهز
أبو طلال يوقف : يلا جايين
جلسوا يفطرون ... وابو طلال وام طلال قاعدين يسولفون وطلال يسولف معهم مره ويسكت مره كل تفكيره باللي قاله له معاذ .. هو وده بس متردد ... يعني بيحس نفسه غلط بس تشجيع معاذ وربعه له تحمس بالشغله .
.................................................. ..........
في المستشفى ..
الدكتور طلع من الغرفة من هنا .. ونـدى وروان بسرعه لـ عنده
نـدى بسرعه : طمنا دكتور
الدكتور هز راسه : للاسف كسر في العمود الفقري
روان شهقت ..
ونـدى مو مستوعبه وش قال : هااا
إيمان : طيب دكتور هي كيف حالها ؟!
د : هي كويسه بس انا لسى ما قلت لها .. حاولوا تفهموها وضعها
روان : يعني ماراح تتعافى
د : في حل واحد بس ؟!
نـدى وروان بسرعه : وش هو ؟!
د : تعمل عمليه بس العمليه ................
روان قاطعته بسرعه : مستعدين ندفع كل التكاليف
نـدى : واذا العمليه ما تعمل الا برى راح نسفرها
الدكتور ابتسم : المشكله مو في التكاليف ... المشكله من العمليه نفسها
نـدى بخوف : شقصدك دكتور ؟!
د بأسف : نسبة نجاحها ضعيفه جدا واذا ما نجحت راح يسبب لها شلل طول عمرها
روان : شلل !!
إيمان : لا حول ولا قوة الا بالله
نـدى : مافي خيار ثاني ؟!
د : للاسف هذا هو الحل
روان : طيب يعني لو سوينها برى ممكن تنجح !؟
د : حتى لو كان برى ... راح يقولون لكم نفس الكلام
إيمان : مشكور دكتور تعبناك معنا
د : هذا واجبي ... عن اذنكم
نـدى غرقت عيونها : يا عمري يا لينـا
روان دمعت عيونها : الله يساعدك
إيمان تهديهم : وش فيكم يا بنات ان شاء الله لينـا بترجع مثل اول واحسن ... والعمليه ان شاء الله بتنجح
نـدى : يعني ناويين تسون العمليه ؟!
إيمان : اذا وافقت ليش لا احنا ماراح نخليها كذا ونقول لها بتتعافين .. احنا لازم نساعدها وهي لازم تصبر وتشد حيلها وتحمد ربها مهما كانت النتايج ... واهلها لازم يعرفون بالموضوع وراحت تتصل ع المبنى تخبر حمده عشان تتصل بـ ولي أمرها .
نـدى تلوم نفسها: أنا السبب !!
روان تمسح دموعها : لا يا نـدى هذا ربي اللي كاتبه لها ماحد المتسبب في المكتوب
نـدى تبكي : بس أنا اللي طحت عليها أنا اللي مامسكت نفسي
روان تبكي معها : انتي مالك ذنب
نـدى : ماراح اسامح نفسي لو صار لها شي .... أكيد هي اللحين مو مسامحتني
روان : نـدى لا تقولين هـ الكلام ... انتي مالك دخل لو ربي كاتب لها تمشي تشمي انتي مالك سبب !
نـدى : ادخلي انتي وخبريها .. انا مالي عين اناظرها
روان : نـدى انتـ ............
نـدى قطعت كلامها : قولي لها روان
روان تنهدت ودخلت داخل وهي ماهي عارفه كيف بتقول لها .
..............................................
في السكن عند البنات ..
حلا جالسه ع الكرسي وقاعدة على اعصابها .. وفرح تروح وتجي ينتظرون يتصلون
رن جوال الهنوف .. وبسرعه شالته
الهنوف بفرح : اتصلوا
كل البنات تجمعوا عليها .. وقالوا لها تحط سبيكر
الهنوف : هلا نـدى ... وش قالوا ؟!
نـدى وصوت بكيها واضح : كسر في العمود الفـ...بلعت ريقها... الفقري
البنات شهقوا ..
حلا : قولي انك تمزحين ؟!
نـدى : في احد يمزح بـ هالاشياء
مي : تيب هي كيف حالها ؟! درت بالموضوع
ندى : روان داخل عندها تقول لها
الهنوف دمعت عيونها : يابعد قلبي ... اكيد زعلانه
ريمـه تدخلت : بس ما قالوا لكم ان في عمليه او علاج ؟!
ندى بصوت مخنوق : الا فيه
ريمـه فرحت : تيب كويس
ندى : بس نسبة نجاحها ضعيف ويمكن اذا ما نجحت
حلا شدت على يدها : كملي
ندى بكت : يجيها شلل
فرح حطت يدها على فمها : لاااا
حلا بحزن : يعني مافي امل
ندى بصوت مخنوق : ان شاء الله فيه
ريمـه تضايقت : الله يساعدها
ندى : آمين ... يلا مع السلامه
الهنوف بسرعه : اذا قلتوا لها طمنوني .. اوكي
ندى : اوكي باي
الهنوف : باي
يوم سكرت .. البنات جاتهم حالة اكتئاب وطول الوقت ساكتين وقلبهم متقطع على لينـا.
.................................................. .
السـاعة 11 الظهـر .. في الشرقيـه
قاعد يناظر التلفزيون ولا كأنه يناظره .. لان باله في شي ثاني
جات اخته من وراه وغمضت عيونه .
زياد تأفف : عارف انك انتي .. ابعدي يدك
أمل ابتسمت بس مابعدت يدها .. جات اختها لبنى اللي عمرها 6 سنوات وقعدت جنب اخوها
لبنى ببرائه : تيب مين انا ؟!
زياد ابتسم : لبنى ... بس اللي وراي أمل
أمل ابعدت يدها : ووجع كيف عرفت يا الدووب
زياد : عارف حركاتك
أمل قعدت قباله : مادريت
زياد : وش هو ؟!
أمل : ردوا على أمي
زياد فهم قصدها بس حب يستهبل : مين !!
أمل : تستهبل مع وجهك
زياد : اقولك مين !
أمل : يعني مين بالله خطيبتك
زياد بهدوء : يعني
أمل :يعني وافقت .. اجل بترفضك اصلا ماراح تلقى واحد مثلك
زياد ابتسم : زين اعترفتي ان مافي احد مثلي
أمل : اقول لا تصدق بس اجاملك شوي
زياد : ما يحتاج تجاملين .. واثق من نفسي
أمل : ياربي ع الثقة .. لا تصدق حالك بقوه يمكن ما تعجبها
زياد رفع حاجبه : قولي هي ما تعجبني
أمل بحماس : لا ترى هي حلوه .. بيضه وشعرها بني وناعم اقول اسم على مسمى
ازياد مو مهتم : اهاا
أمل : بس انها هاديه ومغروره مررره مو شايفه حد
زياد تحمس بس ماحب يبين : مغروره ؟!
أمل : ايه مره
زياد : وش دراك ؟!
أمل : صديقتي بنت عمتها معها في السكن وكل الاخبار تجيني
زياد : اهاا
أمل : بس احسكم مع بعض غلط
زياد رفع حاجبه : ليه .. مو عاجبينك ولا مو عاجبينك ؟!
أمل : هههههههههه لااا بس انت وهي مغرورين ومو شايفين اللي جنبكم هذا غير انكم هادين يعني اتوقع بيجيكم ولد سايلنت ههههههههههه
زياد : ها ها ها بايخه ما تضحك
أمل : سخيف مره وهي اسخف على فكره
زياد طنشها ..
أمل : أناني وماتحب الا نفسك
زياد ولا كأنه يسمعها
أمل انقهرت : يمه منك تعرف تقهر
زياد يلعب بجواله .. وهو مبسووط على قهرها
أمل حبت تقهره وكلمت لبنى اللي تلعب بعروستها : لبنى قلبوو
لبنى رفعت عيونها : نعم
أمل : تدرين ان في واحد جنبي مليق مره وثقيل دم واللي بياخذها أثقل وأثقل
زياد يكمل بهدوء : وتدرين ان في وحده تبي تقهرني بس مو عارفه كيف
أمل شدت على يدها : وتدرين ان هذا شايف نفسه بس مدري على وشو
زياد : وتدرين ان هذا أسم
أمل قامت : وتدرين ان اخوك اكرهه
زياد ابتسم : تدرين ان الشعور متبادل
أمل بقهر : يمه منك تقهررر
زياد ناظرها : مره ثانيه لا تحاولين على شي مانتي بقده
أمل : ان شاء الله تجيك وحده تكسر خشمك يارب
زياد : وان شاء الله يجيك واحد يقص لسانك ويعلمك الادب
أمل من بين اسنانها : زياااادوه اسكت احسن لك
زياد ابتسم : قبل ما تسكتين اول
أمل استسلمت : اصعد فوق احسن لي
زياد ابتسم من داخله ( ماتعرفين كيف تستفزين ) ..
لبنى اللي مو فاهمه ولا شي : زياد
زياد خذها في حظنه : عيونه
لبنى ببرائه : انت بتتزوج ؟!
زياد ابتسم : ايه وبجيب وحده حلوه تلعبك وتسولف معك
لبنى بفرح : وش اسمها ؟!
زياد : حلا
لبنى : الله اسمه حلوو
زياد : انتى احلى يا قلب زياد
لبنى سكتت فتره وبعدين اسألته سؤال ما يخطر على باله .. وهي بدون تفكير قالته
لبنى : زياد
زياد : نعم يا عيونه
لبنى ببرائه : انت تحبها ...؟!!
انتهى الجزء ..
وش هي توقعاتكم للجزء الجاي !
زياد وش راح يرد على لبنى ؟؟
ولينـا وش هو ردة فعلها لما تدري ؟!
وطلال وموضوع معاذ ..؟!
وفارس بينسى مروه ؟! ويبدأ حياه جديد
وباقي بطلاتنا ,,, بتعرفون الاحداث في الجزء السابع
آتمنى يعجبكم البارت |