| مسكت الريم ساره وحاولت تهديها لان ساره كانت منهاره لانها فقدت خالد وحست ان خالد كرها .
بعد ما قالت ساره لخالد انها قررت تنهي اللي بينهم من علاقه عشان خوفها من فهد انه يؤذيهم ..
الريم راحت توصل ساره بيتهم لان ساره طول الطريج وهي تصيح .. لانها عرفت ان احلامها الحلوه ماتحققت ..لانها خسرت الانسان الوحيد اللي صدق حبته من الطفوله..
دخلت ساره البيت وهي منهاره وفتحت الباب وشافت امها قاعده في الصاله ..
ساره وهي تصيح وتركض عند امها: امايه امايه ..خلاص خلاص راح خالد .
الام مستغربه وهي تحظن ساره : شو بلاج يا ساره ..
ساره وعيونها وارمه من الصياح : امايه انا قلت لخالد اني بنهي اللي بينا عشان فهد .
الام : وشو رد عليج
ساره : ما فهمني .. توقع اني ما ابيه ..
الام وهي تمسح على شعرساره: لا يا بنتي اكيد هو بيفهمج .. بس هو قال هالكلام لانه معصب ..
ساره : بس انا والله يا امايه ما احب فهد ..انا سويت كل هذا لاني اخاف علج وعلى حياة خالد .
الام : ادري ادري يا بنتي .. والله فاهتنج .. بس انتي لاتسوين في عمرج جذي ..
ساره بعدها تصيح ..
الام : بس يا ساره ماعرفت انج ضعيفه لهالدرجه.
ساره وهي تصد لامها: كيف كيف يا امايه بعيش ويا انسان انا ما احبه .
الام : لا يا ساره انا اعرفج عدل .. قلبج طيب .. وانتي ماتكرهين حد
ساره بعصبيه : عمري ما كرهت حد صح .. بس فهد غير..انا صدق اكرهه لانه دمر مستقبلي انا وخالد ودمر سعادتي.. والله راح يندم .
وراحت ساره غرفتها وهي معصبه وتصيح ..
الام قلبها يتقطع على ساره .. لانها عمرها ماشافت ساره بهالحال ..
اما بيت قوم خالة ساره ..
هند ونوره كانو قاعدين بالصاله ويا امهم .
ونوره قالت لامها السالفه كلها ..
الام وهي زعلانه : والله دنيا .. يا سبحان الله كنا نتوقع ان حياة ساره وخالد بتكون من اروع القصص ..
نوره : يحليلها ساره .
هند بعصبيه : ليش يحليلها ساره .. قولي خالد المسكين .
نوره : لا تنسين ان اصعب شي على الانسان ان يعيش مع شخص ما يحبه وقلبه مع غيره .
هند : والله محد قالها تسوي جذي.
نوره وهي منقهره من كلام هند: والله تعرفين ليش ساره سوت جذي ما يحتاي اعيد وأكرر يا انسه هند
هند : سااااكته
الام : لا والله ساره طلعت أصيله .. صدق كبرت في عيني
نوره رافعه حواجبها ومستغربه : يعني يا امايه انتي مب زعلانه من ساره .
الام " لا يا بنتي ليش ازعل منها .. بالعكس اللي سوته ساره شي افتخر فيه .. صح ان قلبي يعورني على ولدي خالد .. بس ساره بعد ضحت بحبها لانها ماتبى خالد يتأذى .. وهذا صدق دليل الحب يا بنتي
نوره : هي والله صدق تحبه .. بس شو فايدة الحب الحين
الام تدور على خالد : نوره
نوره : خير يا امي
الام : وينه خالد ما اشوفه
نوره تتنهد : ااااااااااه .. يا امايه ..
الام قامت من مكانها ومسكت قلبها : وي باسم الله على ولدي شو فيه
نوره : لا لا يا مايه ما فيه شي .. بس خالد من بعد ماقالتله ساره انها بتنهي اللي بينهم وهو في غرفته ما طلع منها .
الام : ولله .. عيل خلا اروح اشوف شو فيه .. اخاف يستوي في خالد شي
نوره : باسم الله على اخويه .
الام راحت ونوره وهند وياها .. وراحو غرفة خالد .
الام تدق على باب غرفته : خالد خالد يا امي افتح الباب
خالد هو متساند على السرير وعيونها تدمع يذكر كل لحظه بحياته مع ساره تذكر يوم كانو صغار ..كان كله يدافع عنها يوم أي حد يضاربها ..كان معروف بحبه لها من الصغر.. ويوم كبر احلامه كبرت وحبه زاااد ...
خالد وهو يكلم عمره : كيف يا ساره بعيش بدونج ..وانا رسمت احلامي وحياتي ومستقبلي معاج ..تخيلتج تكونين الحبيبه والصديقه والزوجه ..وهو( يضرب على الوساده) وكل شي راح راح راح ..
الا بعدها تدق الباب : خالد خالد
خالد صد صوب الباب وحس ان احد يناديه وراح مسح دموعه لانه ما يحب يبين لحد انه منهار ..
خالد راح فتح الباب وحالته صدق كانت صعبه: خير يا امي
الام تشوف خالد وقلبها تقطع على خالد .. لاول مره تشوف حالته جذي شكله متبهدل ..وعيونه فيها الف لوم وحزن .
الام ما قدرت تقول شي غير : خالد .. الدنيا بعدها مستمره يا ولدي
خالد : يا امي .. الدنيا مستمره معاكم ..بس بالنسبه لي الدنيا مب مستمره من بعد ساره
نوره ما قدرت تستحمل اكثر و بالذات يوم شافت اخوها على هالحال وعلى طول ادمعت .وحاولت انها تخفي دموعها.
الام : خالد قوم يا ولدي اطلع من الغرفه و روح تعشى وبعدين ارتاح ونام
خالد وبنرة حزن : يا امي الله يخليج .. ما ابي شي خليني بحالي
الام : ما اقدر يا ولدي اخليك بهالحال .
خالد : امي عشان خاطري .. ما ابي اكلم حد ..خلووووووني بروحي .
نوره مسكت امها : امي خليه بروحه .. لين ما يهدى شوي
الام تشوف خالد : خلاص يا ولدي راح اخليك على هواك .. بس كل دقيقه بيي بطمن عليك
خالد : الله كريم ..وعن اذنج يا امي .
وراح صكر الباب ..ورد غرفته وهو متضايق ..
الام دمعت عيونها ...نوره راحت عند امها ومسحت دموع امها .
نوره : لا يا امايه .. لاتضعفين جدام خالد ..
الام : ما اقدر يا بنتي اشوف حالة اخوج واسكت ..شكله يقطع القلب
نوره : ادري ادري ..بس ايام ان شاء الله وبتمر على خير
الام : على خير ان شاء الله ..
الام : يا يالله يا بنتي انا بروح غرفتي ارتاح .
نوره : اوكي يا امي .
نوره تصد لهند : شو فيج سرحانه .
هند بتردد: ها ...ممم..ما فيني شي بس بروح غرفتي يالله باي .
هند كانت تفكر كيف سالم بيي هالاسبوع وبيخطبها .. والبيت متقلب ..
وفكرت انها تكلم سالم وتقوله خلا يتاخر شوي وما يخطبها هالاسبوع لين الاوضاع تستمر بخير..
أما فهد كان بغرفته والساعه تقريبا 11 ونص مساء ودخلت عليه الريم من بعد ما وصلت ساره البيت وكانت الريم متضايجه بحالة ساره وخالد .
الريم تشوف فهد بحزن : اشحالك فهد
فهد كان قاعد يشوف التلفزيون وأول ما شاف الريم ركض عندها : هلا الريم زين ييتي .
الريم مستغربه : ليش ؟ في شي
فهد : الصراحه كنت بقولج .. اشحال ساره ..ما شي اخبار عنها
الريم : قصدك اخبار عنك
فهد ابتسم : فاهمتني يالريم
الريم : كيف ما افهم اخويه
فهد : في شي يديد
الريم تتنهد : اااااااااااااااااااه .. قول في اشياء
فهد : اشياء تفرح .
الريم : والله هالاشياء تزعل العالم كله بس تفرح ...
فهد : تفرح منو
الريم : تفرحك يا فهد
فهد مستانس : والله ليش شو صار
الريم: ساره قررت انها تزوجك وانفصلت نهايئا عن خالد
أول ماسمع فهد هالسالفه تم يناقز وصارخ وكان صدق طاير من الفرح وراح حضن الريم من الفرحه ..
الريم : فهد فهد شوي شوي بطيحني
فهد : واخيرا واخيرا يا الريم تحققت احلامي ..ساره فديتها ساره بتكون لي.
الريم كانت مستانسه لان اول مره من يوم فهد رد من السفر وهي تشوفه مستانس .
الريم : يعلني يا اخوي مانحرم منك (وادمعت)
فهد يشوف الريم بتعجب: افا يالريم هذا وقت الصياح .
الريم وهي تمسح دموعها : لا يا اخوي هاي دمعه الفر ح .. اول مره اشوف ابتسامتك .
فهد يبتسم ويحب الريم على راسها : تسلمين يالغاليه .. يا اختي الحبيبه .
فهد ماسك عقاله وغترته .. ويبى يطلع .
الريم : وين وين بتروح هالوقت.
فهد مستعيل : بروح عند مروان ربيعي بقوله احلى حدث صار بحياتي .
الريم تشوف ساعتها : بهالوقت ؟
فهد : الحين تقولين الساعه 4 الفير .. أي وقت المهم ابي اطير بالشارع ابي ابين للعالم اني مستاااااااااااااااااااانس .
الريم : زين شوي شوي عالطريج مب تسرع يا اخوي
فهد : ان شاء الله يا احلى اخت يالله مع السلامه.
الريم : بحفظ الله يا اخوي .
الريم كانت صدق متضاجه على خالد وعلى ساره .. بس يوم شافت ابتسامت اخوها وفرحته ..نست كل شي ..
راح فهد واتصل في مروا ن ..
فهد وهو طاير من الفرحه : مروان اشحالك
مروان : باسم الله .. شو فيك ما شي سلام عليكم ولا شي
فهد : مب متفيج لشي الحين .
مروان : الله يستر
فهد : مروان وينك انت
مروان : توني موصل الاهل البيت .
فهد : خلاص تعال الحين عند البحر
مروان : شوووووووووو .. بهالوقت
فهد : شو فيك بعده الساعه ماصارت 12 ونص يالله
مروان خلاص ياينك الحين .
فهد : اترياك . |