| أما في دبـــــــــــــي:
نوره بعد ما ردت من العياده راحت عند عبدالله
عبدالله وهو يرمس تلفون
نوره تاشر له وتقوله بصوت واطي : ابيك بسرعه
عبدالله يشوفها ومستغرب
نوره : يالله
عبدالله يكلم ربيعه : زين عيل اخليك يا بو علي ان شاء الله اكلمك مره ثانيه ..
عبدالله : بلاج يا عمري .. احسج وايد متحمسه
نوره والابتسامه في ويها : عندي لك خبر حلو
عبدالله : الله يكثر من الاخبار الحلوه.. ها قولي شو استوى
نوره : اليوم رحت العياده عشان اطمن اذا اقدر احمل ولا لاء .. قالت لي الدكتوره ان ما عندي شي يمنع الحمل يعني اقدر احمل متى الله راد
عبدالله : الحمد لله .. بس لش مستعيله على الحمال يا عمري تونا مكملين شهرين
نوره : بس كنت خايفه وابي اطمن .. وايد فرحانه
عبدالله تقرب من نوره وخذها بحضنه : الله يعطينا يارب عشان اشوف الفرحه دوووم ما تفارقج
نوره وهي مستحيه : والله لا يحرمني منك يا اغلى انسان عندي ..
*.. نوره سعادتها كبيره لانها وايد كانت تحاتي من ان شي يصير ويمنع الحمل بس اطمنت اكثر يوم الدكتوره بشرتها ان ما في شي يمنع الحمل عندها ..
اما في بيت ام خالد ..
خالد رد من عند ربعه ودخل الصاله : السلام عليكم
ام خالد وبو خالد : السلام عليكم ورحمه الله وبركاته
راح خالد وباس فوق راس والديه : عيل وين ام ساره
ام خالد: خالتك في غرفتها
خالد : وين هند عيل
ام خالد : اعتقد في غرفتها بعد
خالد : راحت ربيعتها
ام خالد :هيه من زمان
خالد راح غرفة هند ويدق الباب
هند كانت يالسه على الكمبيوتر ومن الخوف صكت بسرعه الكمبيوتر..
خالد يدق الباب : هند فتحي الباب انا خالد
هند وهي متوتره تفتح الباب: ها خالد شو بغيت
خالد دخل غرفتها : شو تسوين
هند بتوتر : ها ممم مما شي بس يالسه في غرفتي
خالد : زين سمعي بقولج شي
هند : خير
خالد : انا بكون وياج صريح .. انا مب مرتاح لربيعتج
هند عاقده حواجبها : منو منى
خالد : اللي يت اليوم بيتنا .. مب مرتاحلها ابدا
هند وهي معصبه : ليش يلست وياها عشان ترتاح لها
خالد : احيانا من الشكل نقدر نحكم على الشخص
هند : ليش بلاها
خالد : شي انسانه محترمه .. ما تلبس الشيله وحاطه مكياج كامل والعطر لاخر الدنيا والعبايه ماعرف ليش لابستنها اذا عباتها مفتوحه بالكامل واللبس ولا كانها مسلمه ...
هند : وانت متى لحقت تشوفها
خالد : لا تنسين انها سلمت عليه وانا فجاه شفتها
هند : بس الاشكال تخدع
خالد : اوكي اذاالاشكال تخدع .. اسلوبها مبين شفتي كيف سلمت عليه وشفتي نظراتها ودلعها ..الانسانه المحترمه تكون ثجيييييييله وما تكون بهالشكل
هند بصريخ : بس انا مرتاحتلها وما يهمني راي حد ثاني
خالد بعصبيه : بس انا اكبر واعرف شو الصح والخطا ترى يا هند الربيعه اللي سمعتها مختربه تخرب رباعتها وترى البنت ماعندها الاسمعتها واذا سمعتها راحت مب بس هي بتضيع حتى اهلها بيضيعون
هند : والله انك مكبر السالفه يا خالد
خالد: انا حذرتج ..واذا يا هند عرفت ان ربيعتج سمعتها مب زينه والله راح تندمين .. بالذات اذا كنتي تعرفين هالشي
هند : خالد لاتنسى اني مخطوبه وانا حره بتصرفاتي
خالد بعصبيه : شوووووووووو .. لا حبيبتي مب يعني انج مخطوبه تسوين اللي تبين
هند : وانت يعني اكيد ما بترتاح .. انت ماترتاح الا مع حبيبة القلب اللي قصت عليك وودرتك
خالد مسك ذراع هند بالقووو : سمعي لا تقارنين ساره بهالانواع ولا ترمسين عنها الا بالزين سمعتي ولا بتوشفين شي ما شفتيه
هند : ااااااي ايدي هد ايدي يا خالد عورتني
خالد هد ايدها : وبعدين ساره ما تساوي ظفر منى ربييعتج وظفر بنات العالم
هند معصبه وما قدرت تقول شي لانها خافت من عصبية خالد ..
خالد وهو يبى يطلع صد صوب هند وياشر بصبعه : انا راح اسال عن منى واذا عرفت عنها شي مب زين غصبن عنج راح تودرينها ويا ويلج يا هند اذا عرفت انج تعرفين عنها شي وساكته
طلع خالد وهو معصب
اما منى فمنقهره من كلام خالد وتهديده لها ..
منى وهي تكلم نفسها : والله راح اقهرك يوم من الايام مثل ما قهرتني يا خالد
**********************
في بلجيـــكا
فهد وهو ماسك ايد ساره عشان تنزل من الباخره : شوي شوي يا عمري اخاف اطيحين
ساره وهي رافعه ملابسها : وي زياااااغ .. اخاف اطيح في البحر
فهد : لا تخافين وانا وياج يا عمري .. لاتنسين اني سباح ماهر
ساره بعد مانزلت من الباخره ..
ساره : الحمد لله وصلنا
فهد: الصراحه كان يوم وايد حلو
ساره : صدقك وايد استانست
فهد : ان شاء الله دوم اشوف الفرحه مالي قلبج
ساره تبتسم
فهد : يالله نرد شقتنا
ساره : يالله
وبعد ما خذو التاكسي ووصلو جريب شقتهم
فهد: ساره يمكن دقايق
ساره : وين بتروح بعد ... لا تقول يوعان
فهد : ههههههههههه لا مب يوعان بس دقايق
راح فهد بسرعه وياب ورده حمراء
فهد وهو ماسك الورده الحمراء : تفضلي يا اغلى وارق واحلىزوجه في الكون كله
ساره وهي تاخذ الورده وبابتسامه :تسلم يا فهد
فهد : تصدقين الورده مستانسه وايد
ساره : ليش
فهد : لانها لامست ايدينج الحلوه
ساره ويها احمر : فهد بس عاد
فهد : اوووه سوري نسينا ان الحلوه خجوله .. فديت الحيا منج
ساره وهي تمشي : فهد يالله بروح الشقه
فهد :لحظه لحظه بييه وياج
.. ساره في البدايه كانت قاسيه عليه وايد بس ما تقدر تقاوم رومانسيه فهد وكلامه وصدق احساسه.. بس هذا مب يعني انها نست خالد
ساره بعد ماراحت الشقه
ساره بدلت ملابسها ولبست جلابيه راقيه وحلوه بدرجات البيج ..
ساره راحت غرفة فهد وهي واقفه عند باب فهد : فهد فهد
فهد وفي ايده كتاب : هلا يا عمري تفضلي
ساره بخجل تدخل : سوري على الازعاج
فهد : يالله على هالرسميات .. يا حلوه انتي مرتي .. يعني لا ازعاج ولا شي.. بالعكس قربج هو اللي يفرح قلبي
ساره وهو تشوف الكتاب : شو في ايدك
فهد : كتاب اشعاري .. كل ما يستوي عندي شي احب اكتب
ساره /: يمكن اقرا ه
فهد : مممممممممممم مب الحينه ..خلا يتحقق اللي في بالي بعدين بعطيج
ساره : شو اللي في بالك
فهد : لاحقه يا عمري .. بعدين بخبرج ان شا ءالله
ساره : اوكي على راحتك .. فهد بتصل في امايه
فهد : اوكي يا عمري اتصلي فيها ..
ساره : بس ماعرف وين موبايلي
فهد : خلاص انا بتصل على موبايلج عشان تعرفين مكانه
فهد خذ موبايله ويتصل في ساره
ساره وهي واقفه عنده وتسمع صوت موبايلها: اسمع موبايلي يرن بس ماعرف وين
فهد : روحي شو في وينه اكيد بغرفتج
ساره راحت ادور موبايلها وحصلته في الصاله
فهد : ها حصلتي
ساره :هيه حصلت مشكوور
فهد : افا عليج ما سوينا شي
ساره راحت تتصل في امها .
امها يالسه مع ام خالد وهند
ساره : الو امايه
ام ساره : فدييييييييت عمرج يا ساره
هند تصد ومنقهره ..
ساره : شحالج امايه وشحال خالتي وبنات خالتي
ام ساره : الكل يسال عنج يا ساره انتي جيف حالج وحال فهد ريلج
ساره : كلنا بخير
ام ساره : وينكم انتو الحنيه في المانيا
ساره : لا ما بنروحها .. مستانسين وايد في بلجيكا قلنا خلا انتم هناك احسن
ام ساره : ان شا ءالله دومج تكونين مستانسه
ساره : ان شاء الله .. والله اشتقتلج يا امايه موووت
ام ساره : وانا اكثر يا عمري
فهد ياي عند ساره وياشر ان يبى يكلم ام ساره
ساره : اقول امايه لحظه فهد يبى يكلمج
ام ساره : هيه عطيني
فهد : سلام عليج عمتي
ام ساره : هلا بولدي فهد .. شحالك
فهد : بخير مدامج بخير .. وشو الاخبار عندكم ان شاء الله مرتاحين
ام ساره : الحمدلله مرتاحين ومشتاقيلكم يالله متى بتردون وايد طولتو
فهد : ان شاء الله جريب
فهد: ما تامرين علينا بشي يا عمتي
ام ساره: ما وصيك على ساره لا تزعلها ولا شي تراها بنتي الوحيده
فهد : ساره بعيوني عمتي لا توصين حريص ..
ام ساره / تسلم يا ولدي والله يسعدكم
فهد: سلمي على الكل
ام ساره : يوصل ان شاء لله
ام ساره بعد ما صكت من عندهم
ام خالد : ها شو اخبارهم
ام ساره : يسلمون عليكم
ام خالد : الله يسلمهم من الشر
هند : شو وينهم في المانيا صح
ام ساره : لا في بليجكا
هند : غريبه سمعت يقولون اسبوع بلجيكا واسبوع المانيا والحينه كملو تقريبا 10 ايام
ام ساره : تقول ساره انهم مستانسين هناك وايد ومرتاحين
هند : ماشا ءالله الاخت مرتاحه
خالد توه طالع من غرفته ومتكشخ يبا يطلع
ام خالد : على وين يا خالد
خالد : بروح بمر على ربيعي محمد
هند وهي تبى تقهر خالد: اقول خالد ما سمعت اخر الاخبار
خالد كان واقف عند الباب عشان يطلع يصد لهند : خير
هند بدلع : يقولون ان ساره بتم هنك اكثر في شهر العسل ولا بعد ساره مرتاحه واااااااااااايد هناك وما تبى ترد .. واذا هي مرتاحه هذا دليل انها تحبه ولازم تحبه كيف ماتحبه وهم هناك بروحهم ولا بعد حد يقدر يشوف جمال فهد وما يحبه
خالد عيونه كلها غضب وحزن وقهر ويطلع وهو معصب
ام خالد بصوت واطي : ليش قلتيله يا هند
هند وهي واقفه : ابي اقهره مثل ما قهرني اليوم
راح خالد وركب سيارته والقهر مالي قلبه وهي يضرب بايده على السكان والدمعه بعيونه : معقوله يا ساره نسيتي وعدنا معقوله يا ساره نسيتيني ..لازم اكلم ساره واتاكد منها ..
خالد خذ الموبايل عشان يتصل في ساره وهاي اول مره : خالد اتصل فيها اكثر من مره بس موبايلها مغلق
خالد وهو يكلم نفسه ومعصب: مغلق هذا دليل انج ما تبين حتى ازعاج من حد يعني صدق انج مرتاحه هناك .. معقوله يا ساره نسيتيني ...
راح خالد يمر ورا ربيعه محمد والحزن بملامحه
محمد وهو يركب السياره : وينك يا ريال تاخرت وايد من متى وانا اترياك
خالد ما يصد لمحمد ولا شي ساكت ..
محمد بعد ماركب السياره : خالد بلاك
خالد بحزن وهو يشغل السياره: مافيني شي
محمد مستغرب .. من سكوت خالد وهو كل الدرب ساكت ولا يبتسم
وخالد وهو يسوق ..ماقدر يركز بسواقته
ولا مفجـــــــــــــــــأه
كان يبى يدعم السياره اللي جدامه وضرب بريك بصوت عالي .. حتى راسه ضرب بخفيف على السكان
محمد وهو ماسك خالد: خالد خالد بلاك فيك شي
خالد وهو ماسك راسه : اخ لا ما فيني شي.. انت فيك شي تعورت
محمد : لا الحمد لله ما فيني شي .. صح حسيت اني بطلع من الدريشه بس الحمد لله ماتعورت
خالد : اسمحلي
محمد : بلاك يا خالد شو فيك ..
خالد بعصبيه : ماعرف ماعرف
محمد : شكلك وايد تعبان ..قوم حرك السياره على صوب عشان انا اسوق بدالك ..
خالد : لا عادي
محمد : اي عادي الله يهديك زين ما سوينا حادث شكلك تعبان وماتقدر تسوق ..وقف على صوب عشان انا اسوق واوديك البيت ترتاح
محمد ساق بدال خالد .. لان خالد كان وايد تعبان والقهر بقلبه
محمد وصل خالد البيت .. وقاله خلا يتصل فيه بعد ما يكون بخير
خالد وصل البيت .. والكل استغرب لانه توه طالع وغريبه بسرعه رد
ام خالد قامت من مكانها : بلاك خالد
خالد وهو ببطئ يمشي.. : ما شي بس شوي تعبان ابي انام
ام ساره : غريبه تنام بهالوقت زين تعشى قبل ماتنام
خالد : ما اشتهي العشى بس ابي انام محد يوعيني ولا يدق عليه الباب
ام خالد : على راحتك يا ولدي
خالد دخل عرفته وهو متساند على الباب والدموع بعيونه ويكلم نفسه : لا مستحيل يا ساره تكونين ناستني .. انتي الامل اللي بقلبي .. مستحيل تنسين وعدنا .. انا لج وانتي لي يا ساره ..
ام خالد وهي خايفه على خالد : بلاه خالد شو صارله
هند ساكته وبخاطرها تقول : اكيد يوم سمع خبر ساره جي صار له .. حشى مب حب اللي يحبها .. بس يستاهل عشان مره ثانيه ما يقهرني
اما خالد فماقدر ينام وهو يتجلب يمين يسار وذكريات ساره ماتفارق خياله .. والدموع بعيونه
بعد ما خالد رد البيت ما طلع من الغرفه كله يفكر بساره .. ومتضايق وايد .. ويتخيل ان ساره نسته وتحب فهد .. |