| ساره قامت قبل فهد .. وهي حاسه بالصداع
ساره شافت فهد متبهدل في رقاده لان الغنفه اصغر منه ..
راحت ساره وبدلت لبست جلابيه راقيه ..
الريم دقت الباب : ايه يالله بسكم رقااااد شوفو الساعه كم
ساره كانت تبى تفتح الباب بس تذكرت ان فهد نايم على الغنفه والريم بتشوف وبتشك ..
ساره راحت عند فهد : فهد فهد
فهد بصوت غليظ :: ها شو مستوي
ساره : فهد الريم يايه
فهد وشعره ناقز من الرقاد اول ما سمع الريم نقز : ها شو الريم
ساره : هيه تبى تدخل
فهد خذ اللحاف وبسرعه بسرعه خش اللحاف وغسل ويه عشان الريم ما تشك ان فهد ينام على الارض ..
ساره فتحت الباب : هلا بالريم
الريم : صباح الخير لاحلى معاريس في الدنيا كلها
ساره بابتسامه : صباح النور يا اغلى اخت عندي
الريم : يالله قومو حبايبي .. ترى امج متصله كم مره عشان العزيمه اليوم بيت خالتج ام خالد
ساره بتعب : والله
الريم : بلاج ساره .. شي انتفاخ تحت عيونج
ساره : هيه مصدعه والبارحه مانمت
الريم : كنتي تصيحين
ساره بتوتر : ها .. لا منو قال بس شوي تعبانه
الريم فاهمه ساره وتعرف اذا هي متضايقه ولا لاء لان ساره ربيعتها من الطفوله ..بس ماحبت تتدخل بحياتها
ساره : عيل بقول حق فهد عشان يتجهز
الريم : خلاص اوكي بس افطرو او ل شي بعدين الغدى هناك
ساره : اوكي حبيبتي
ساره صكت الباب
فهد وهو يسحي شعره ..
ساره من غير نفس : اليوم معزومين بيت خالتي
فهد تغيرت ملامحه وبخاطره : من اولها
ساره : لازم اتيه فضيحه ..
فهد : هيه اكيد .ما برد طلب امج
ساره تبى تطلع من الغرفه
فهد ناداها : ساره
ساره وقفت وماصدت صوبها
فهد : على الاقل هناك بيني انج مهتمه فيه او جامليني عشان محد يشك انج متضايجه مني او انج للاسف بعدج ما تبيني
ساره راحت من عنده
اما فهد فخذ المشط ورماه على الارض ويكلم نفسه وهو منقهر : شو اللي غيرج يا ساره شو اللي غيرج .. محلاتج وانتي في السفر شو صار فيج ..متى بتحسين فيه يا ساره متى بتبادليني الشعور متى ..
##############################
محمد وهو في غرفته سرحان يتذكر الريم ومستانس لانه شافها ..
محمد يكلم نفسه : انا لازم اكلم امي عشان تخطبلي الريم اخاف تروح عني لازم باسرع وقت
محمد راح عند امه وشافها تفطر
محمد راح باس فوق راس امه : صباح الخير يا احلى ام
الام : صباح النور
محمد : وين ابوي
الام: توه خلص فطوره وراح الصاله
محمد : اقول امايه ابي اقولج شي
ام محمد وهي ماسكه كوب الحليب : الله يعين .. صباح الله خير شو في راسك يا محمد
محمد يبتسم ابتسامه خبث: امايه الصراحه وباختصار ابي اتزوج
الام فتحت عيونها وهدت كوب الحليب: شووووووو
محمد : ليش مستغربه .. جي اول مره واحد يتزوج
الام : الحينه ياييني من صباح الله خير وتقول ابي اتزوج صدق انك متفيج
محمد : هي ياامايه مدام شيخه رفضتني خلاص خلا ادور غيرها
الام: زين بدور لك وحده ثانيه بس اصبر عليه
محمد : لاااااااااااااااا .. انا عندي وحده
الام عاقده حواجها : والله عيال اخر زمن ..
الام عاقده حواجها : والله عيال اخر زمن ..
محمد : .. تذكرين قلت لج من زمان وحده اسمها الريم ابيها قلتي لا ..لاني حق شيخه وقلتي اذا شيخه ما تباك بتخطبيلي اللي اباها صح
الام : والله اني شاكه فيك
محمد يبلع ريجه : ليش
الام : اخاف انت مسوي خطه عشان شيخه ترفضك .. عشان تزوج الريم صح
محمد عرق من التوتر : ها .. لا لا منو قال
الام قامت من مكانها : هيه اكيد جذي مسويه .. ( تهدد بصبعها )) يا ويلك يا محمد لو طلعت مخطط ويا شيخه ولا ويا حد عشان ترفض شيخه وتاخذ الريم لو عرفت انك انت الا ماتبى شيخه بزعل عليك ..
محمد سكت ما قال شي ..فتح عيونه وسكت
الام راحت غرفتها
محمد بخاطره (( لا بلاه توهقت .. كنت ابي اكحلها عميتها .. اخاف تسال شيخه وشيخه تقولها واتوهق . بعدين مااخذ الريم .. يالله شو هالحاله
##########################
ساره بعد ما فطرت راحت واتلبست احلى ما عندها عشان العزيمه ..
اما فهد فلبس الكندوره والغتره والعقال ..
والاثنين الضيق والحزن بقلبهم
وردو على الجفاء والحزن ..
بعد ماساره تلبست وفهد بعد
علشان يروحون بيت ام خالد ..
وهم في السياره مع الريم طبعا ..
ساره ساكته ولا تعلق على شي .. اما فهد فهو منقهر من ساره ومن جفاها
الريم يالسه وراء وتشوف الاثنين وتقول في خاطرها(( الحينه هذيله اشكال معاريس يايين من شهر العسل ))
الريم تبى تغير الجو : هيه صح تذكرت فهد دكتوره ناديه اتصلت
فهد ابتسم وصد وراء : والله
ساره مستغربه ..
الريم : هي تسلم عليك وايد وتقول طمنها عليك ..
فهد : هي والله من زمان ما كلمتها
فهد يصد لساره : هاي دكتوره ناديه اللي كانت تعالجني من الطفوله وهي ( بحزن ) دكتوره نفسيه
ساره شافت فهد بنظره تعجب ..ساره بخاطرها (( يعني هو صدق من الطفوله عنده اكتئاب ومرض نفسي))
الريم تنغز ساره : وهي قالت خلا مرت فهد تخلي بالها على فهد .. لان فهد محتاج للرعايه والحب وبهالطريقه راح يتشافى بسرعه .
ساره كانها ما سمعت شي وهي عرفت بقصد الريم ..
بعد ما وصلو بيت ام خالد
الكل كان في الاستقبال واولهم ام ساره طبعا
وبعد ما دخلو وبعد ما سلمو
ساره قاعده على الغنفه وهي تعبانه
نوره : بلاج ساره احسج تعبانه اليوم
ساره : ماعرف بلايه احس بالضيج
نوره : افا في وحده يايه توها من شهر العسل وجذي حالتها .. مع انج ما شاء الله محلوه وايد
ساره تبتسم وتصد : تسلمين عيونج الاحلى
نوره : اول مره فهد وعبدالله ييلسوون مع بعض
ساره : هي صح هم في الميلس صح
نوره: هيه ..
• عبدالله وفهد*
•
عبدالله : زين يا ريال شفناك
فهد : هي والله اسمع عنك بس ما اشوفك .. بالذات ابوك وايد يمدحونه الناس واكيد الولد مثل ابوه بيكون
عبدالله استانس : تسلم هذا من ذوقك وطيب اصلك
عبدالله : زين وانت وين تشتغل
فهد : والله انا تخصصي الهندسه
عبدالله : يا سلام يعني مهندس ماشاء الله ..
فهد : بس عندي بعد بزنس
عبدالله : لا لا غلبتني عيل
فهد : هههههههههههههه
عبدالله : تصدق سالفتي مثل سالفتك
فهد : ليش
عبدالله : انا ماخذ زوجتي عن طريق الصدفه والحب من اول نظره وانت بعد
فهد بخاطره (( محد مثلي انا .. انا مب بس احب ساره انا اعشق التراب اللي تمشي عليها )
فهد : هيه صح سبحان الله
في الصاله
هند : اقول ساره بقول شي بس لا تزعلين
ساره تصد : لا اكيد ما بزعل تفضلي
هند : الصراحه ريلج ماشاء الله احلو وايد صار احلى بالف مره من قبل
ساره صدت صوب ثاني : مشكوره
هند : اخاف تغارين
ساره : لا حبيبتي ما اغار ولا شي
هند فاتحه عيونها : والله لو ريلي جان قفلت عليه الباب ما خليته يطلع ماشاء الله عليه وسيم ما تخافين حد من البنات تخطفه منج
ساره تضحك باستهزاء : ههههههههه والله ياريت وحده تخطفه مني
هند بتعجب : صدق ترمسين ولا تتغشمرين
ساره ما تبى تبين انها مب مهتمه في فهد : لا لا اتغشمر .. بس الريال اذا هو بشخصيه ..ما ينخاف عليه حتى لو بين مليون وحده
هند : هيه والله فديت خطيبي
نوره بعصبيه صدت : الحينه شو ياب خطيبج بالسالفه حد قال انه غاوي
هند : غاوي بنظري .. وبعدين ماعرف فجاه تذكرته
نوره : وبعد شوهالرمسه شو بعد فديت خطيبي استحي على ويهج ما صار ريلج وانتي جي تتفدينه
هند : والله عادي انا ما تغزلت الا في خطيبي الا
ان شاء الله بعد اسبوع بيكون ريلي لان ملجتنا جريبه
نوره تهز راسها يمين يساره : والله بنات اخر زمن
هند : اقول جني وايد معطتنكم سالفه خلا اروح غرفتي بكرامتي
نوره : والله زين تسوين ..ياريت من زمان رحتي
هند قامت وهي تشوف نوره بطرف عينها : صدق يوم تزوجتي استويتي دفشه
نوره تضحك : هههههههههه ..
نوره تصد لساره وتشوفها سرحانه : ها وين وصلتي استراليا ولا بلجيكا
ساره : هي والله ذكرتيني بلجيكا صدق كانت حلوه وشعبها طيبين
نوره : زين الحمد لله ابتسمتي
ساره : اقول نوره شو الاخبار ..اخاف حملتي وما قلتيلي
نوره تغيرت ملامحها حست بالحزن ونزلت راسها : لا
ساره : اسمحيلي حبيبتي مب قصدي ازعلج .. بس عادي ليش هالحزن انتو بعدكم ..
نوره : هيه وانا فحصت وقالو ما فيه شي
ساره : الحمد لله يعني تاخر طبيعي حمدي ربج ما فيج شي ..والله كريم حبيبتي
نوره : ان شاء الله ..تعرفين ان خالد يمكن يطلعونه اليوم
ساره استغربت : والله
نوره : هيه هو طلب سوى حشره في المستشفى الا يطلعونه وقالو احتمال اليوم ان شاء الله يطلعونه ..
ساره : بس هو بعده تعبان
نوره : هيه بس الدكتور قال بيطلع بس بشرط انه يرتاح وما يطلع من الغرفه ولا يتعب عمره
ساره : زين الحمد لله
نوره : ساره جاوبيني بصراحه انتي تحبين فهد ولا بعدج ساره تتنهد : ااااااه ماعرف شو اقولج ..فهد تغيرت تصرفاتي وياه في شهر العسل لاني عرفت انه انسان رومانسي درجه اولى وغير عن جي انه طيب وعمره ما زعلني مع اني احيانا اتعمد اقسى عليه عشان يزعل مني بس بعد اييه يراضيني .. بس كحب لا .. انا يمكن استلطفه بس بعدني ما حبيته
نوره : غريبه بهالمواصفات اللي قلتيلي عنه لازم تحبينه .. تعرفين ليش ما حبيتيه .. يمكن لان هاجس خالد بعده يلاحقج ..لو شوي خالد يبتعد عنكم صدقيني بتحبينه
ساره : ماعرف ماعرف شو اقولج ..
نوره : عيل قومي خلا نيلس ويا امي وامج قبل ما يزعلون عنا
ساره : يالله
#################### |