| وفي اليوم الثاني
ساره قامت قبل فهد .. وعلى طول راحت عند الريم لانها فرصه تكلم الريم عن محمد
ساره راحت غرفة الريم وهي تدق الباب
الريم كانت واعيه بس تشوف التلفزيون
الريم راحت تفتح الباب ..وشافت ساره
الريم بابتسامه : هلا والله بمرت اخويه
ساره : هلا فيج .. شو لا يكون نايمه
الريم : لا واعيه .. من زمان ..( تاشر بايدينها ) تفضلي
ساره : دام فضلج حبيبتي
الريم: شو تريقتي
ساره : لا والله بعدني ما فطرت .. لاني اباج بسالفه ضروريه وما ابي فهد يعرف
الريم عاقده حوايبها : شو مستوي
ساره : مب مستوي الا الخير .. تعرفين محمد
الريم : اي محمد
ساره : محمد ربيع خالد
الريم قلبها دق : هيه بلاه
ساره : يفكر يخطب وحده
الريم وقفت : زين وانا شو دخلني
ساره انزين ليش وقفتي يلسي خلااكمل
الريم يلست ..
ساره : يفكر في وحده من زمااااااان ..
الريم : وبعدين
ساره : الريم بلا عبط يعني اونج ما فهمتيني
الريم : وانا شو دراني شو تبين تقولين .. واحد يفكر يخطب انزين وبعدين
ساره : محمد يا حبيبتي من زمان يحبج ويفكر يخطبج
الريم ماعرفت شو تسوي وشو تقول ويها استوى احمر واخضر : ها شوو منو انا
ساره : ههههههههههه .. بلاج ..
الريم : ساره لا تتغشمرين ويايه
ساره : والله ما اتغشمر .واتكلم وياج بكل جديه
الريم : يفكر يخطبني انا ..وانتي شو دراج
ساره : محمد كلم خالد .. وخالد قالي انا .. المهم هو يبى يعرف رايج اذا ما عندج مانع بييه يخطبج ..
الريم وقفت ويها احمر ..
ساره : وين بتروحين
الريم بخجل : ممما عرف بروح ..مم
ساره : انا اللي بطلع حبيبتي خذي راحتج ..وفكري عدل .. اذا موافقه عليه خلي اييه يخطبج ..
الريم منزله راسها ومستحيه
ساره قبل ما تروح صدت : ترى على فكره يالريم
الريم رفعت راسها ..
ساره : محمد ما يتعوض .. وهو معرووف من زمان ويا خالد ونعرف عنه كل شي ..
الريم ..ساكته
ساره بابتسامه : وانا متاكده انج بتوافقين ( غمزتلها ) صح
الريم صدت صوب ثاني وابتسمت
ساره طلعت من الغرفه وهي مستانسه للريم وايد ..
الريم لامه ايدينهاالاثنتين عند قلبها وبفرح تقول : معقوله يا محمد انت تباني وتفكر فيه .. يعني نفس الاحساس .. بس عمري ما توقعت انك بتخطبني .. توقعت بس اعجاب ..
فهد قام من رقاده ويوم يشوف السرير ما يشوف ساره
فهد وعيونه نص مفتوحه : وين ساره عيل
فهد راح يغسل ويه ..
ساره دخلت الغرفه
فهد طلع من الحمام : ساره حبيبتي وين كنتي
ساره : مممممممممم كنت عند الريم
فهد : ليش بلاها
ساره : ما فيها شي بس رحت اسولف وياها
فهد : وليش ماقومتيني
ساره : ما حبيت ازعجك
فهد اتقرب من ساره : ساره حبيبيتي
ساره : نعم
فهد : شو رايج اليوم نروح المزرعه
ساره مستغربه : المزرعه ..ليش عندك مزرعه
فهد : لا مب مزرعتي .. مزرعة الوالد الله يرحمه ومزرعة عمي
ساره : اها
فهد : شو رايج حبيتبي نروح هناك رووعه والله ما بتملين بتشوفين احلى شي
ساره : شو
فهد : الحصااان
ساره : عندك حصان
فهد : هي من زمان .. اموت فيه
ساره : والله انت تركب حصان شي حلو
فهد :الحصان ربيعي من زمان
ساره : شو اسمه
فهد : اسمه ( boss) ؟؟
ساره : بوس
فهد : هيه يعني الزعيم
ساره : شي حلو
فهد : هناك ما تملين شي حوض وانواع ثانيه من الحيوانات ..شو رايج انا وانتي والريم نروح
ساره: ممممممممممممم
فهد : يالله يا عمري ..
ساره : ليش لا ..خلا نشوف المزرعه والحصان ترى احب الحصان وايد
فهد : يعني نفس ريلج
ساره استحت : ..
فهد : عيل يالله نفطر ونروح هناك ..
ساره : الظهر .
فهد : ترى شي غرف في المزرعه يعني مثل الشاليه
ساره : اها اوكي عيل بروح اخبر الريم
ساره : اها اوكي عيل بروح اخبر الريم
فهد : يالله انا بترياج تحت عسب نفطر اوكي يا بعد هلي
ساره :اوكي
نوره تشوف عبدالله يقرى الجريده
نوره وهي يايبه كوب الحليب : الله الله على المثقف
عبدالله يبتسم : بعد ما تعرفين ريلج يحب يعرف الاخبار
نوره : زين عيل اسمع اخر اخباري
عبدالله يصد لنوره: اونه نوره يايبه اخبار .. يعني انتي استويتي اخبار متنقله
نوره : هههههههههههه ..زين شو رايك يا عمري اليوم نعزم امك وابوك واختك على الغدى برع في احلى المطاعم
عبدالله :يا سلااام فكره حلوه .. بس صعبه اختي مريم اتيه ..لانها في بوظبي ويبالها وقت لين اتيه
نوره: مممممممممم زين عيل بنخلي العزيمه على العشاء ..
عبد الله : خلاص ولا يهمج
نوره : عيل روح اتصل في اختك عسب تعزمها
عبدالله : لا يا عمري انتي صاحبة هالفكره يعني انتي اللي لازم تعزيمينهم ..عسب يعرفون ان زوجتي الحبيبه تفكر فيهم
نوره : اونه
عبدالله : فديت نوره اللي تفكر باهلي
نوره : ترى اهلك هم اهلي
عبدلله : فديييييييتج والله ..
نوره: عبدالله بس عاد
عبدالله: اونها استحت
نوره: وليش ما استحي
عبداللخ : خلاص انا ريلج لازم ما تستحين
نوره : حتى لو ريلي بعد استحي ..
عبدالله : زين عيل روحي اتصلي في مريم اختي ومره وحده بنخبر امايه وابوي على العزيمه ..
نوره : اوكي
##################################
هند وهي تفطر راحت عند امها
هند : امايه بقولج شي
الام : شو بغيتي
هند : الصراحه سالم البارحه قالي انه يبى يطلع ويايه
الام عاقده حياتها : اليوم
هند : هي ليش لاء
الام : ماعرف لازم اكلم ابوج واخوج
هند : وليش اخويه .. الاهم ابويه
الام : مب حلوه نسوي شي بدون ما يعرف
هند : ما بي تقولين لخالد
خالد طلع من الغرفه وراح يحب راس امه : صبحج الله بالخير يا امايه الغاليه
الام : صبحك الله بالنور حبيبي
خالد : ها يالعروس شو اخبارج
هند بدلع : اخباري ميه بميه بخير الحمد لله
الام : خالد
خالد توه يالس ويصب الحليب : هلا امايه
الام :: سالم يبى يطلع مع هند اليوم
خالد هد فلاس الحليب : شووو
هند : هيه يبى يطلع ويايه ..وهالشي مب غريب لا تنسى انه ريلي
خالد :توكم مالجين ..وبعدين اذا يبى يطلع وياكم ..لازم على الاقل حد يكون موجود اخته ولا اي حد
هند بعصبيه : ليش ان شاء الله طالعه مع واحد غريب .. وبعدين ليش نوره خليتها تطلع مع عبدالله
خالد : الصراحه عبدالله ما يتقارن مع سالم ..عبدالله معرووف باخلاقه ودينه ..اما سالم فما سمعنا شي طيب
هند وصلت حدها : والله هالشي ما يخصه بسالفتنا ..وبعدين سالم تاب عن هالسوالف ..واغلبية الشباب قبل الزواج جي واخس يمكن بعد
خالد : المهم انا واحد ما اثق في سالم
الام : ما عليه يا خالد خلهم مب كل يوم بيطلعون
خالد : امايه هذا سالم ما داش خاطري والصراحه ما احب يطلع ويا هند بروحهم
هند : بس نحن مالجين يعني حلال وعادي
خالد : حلال صح .. بس مب عادي عندي ما اثق فيه هند وقفت من مكانها ودموعها اربع اربع : انت دوم جي تفرق بيني وبين نوره كل شي لنوره عادي وانا لا ..
راحت هند تصيح بغرفتها ..وهي تصيح
الام : لا حول ولا قوه الا بالله..ما عليه يا خالد خلهم يطلعون ..
خالد : امايه هند صغيره بعدها ماتعرف بين الصح والغلط واخاف اذا خليتهم بروحهم سالم يقص عليها ووو ( نزل راسه خالد استحى يقول جدام امه باللي يقصده ))
الام : هي صح صغيره بس ما اتوقع لهالدرجه ساذجه وماتفرق بين الصح والغلط
خالد : ماعرف شو اقول بس انا مب مرتاح من سالم واذا يبون يطلعون بروحهم يطلعون بعد العرس .
.الام : وهند شو نقولها ما فينا على حشرتها ..المشكله انك خليت نوره وهالشي اللي يخليها تحس بالفرق
خالد : امايه عبدالله غير وسالم غير
الام : ماعليه خلها مره بالاسبوع وساعتين بس اوكي
خالد : مب المشكله بالساعات .. ما ابيهم يطلعون ويا بعض بروحهم
الام : ماعليه خلهم يطلعون ..الا هي ايام وترى عرسها ان شاء الله جريب ..
خالد وقف : خلاص سوو اللي تبونه
الام : ما تريقت يا خالد
خالد : سدت نفسي هالبنت
الام : عسى الله يهديكم ويسعدكم ..
ساره وهي تجهز الاغراض عسب المزرعه
فهد : ها يا عمري جهزتي الاغراض
ساره : ليش نحن بنام هناك
فهد : تبين هالشي
ساره : لا .. بس جي أسال
فهد : على هواج يا عمري .. بس نحن بنروح اليوم لين المساء .. شو رايج
ساره : اوكي
فهد : اقول يا بعد هلي جهزي ملابس السباحه
ساره رفعت راسها : بتسبح هناك
فهد : افا عليج تبين اودر الحوض الغاوي
ساره : اوكي .. بس ماعرف وين ملابسك
فهد : بالكبت باخر السده
ساره : اوكي
الريم تدق الباب : ادخل
فهد : حياج يالريم
\الريم : اقول ساروه شو رايج نييب انواع الحلويات هناك
فهد : ليش حد قال انا بنتم هناك اسبوع \
الريم : ماتعرف اني اموت على الحلويات
ساره : انا جهزت كل شي ..
الريم : يالله بسرعه ما عندي صبر
فهد : حشى حشى هذا وانتي رايحه قبل وجي عيل ساره حبيبتي شو تقول
الريم : اكيد بتحب هالمكان
ساره : والله حمستوني ارووح ..وانتي يا الريم ما عندج حصان
الريم : مممممممم لا .. اخاف اركب الحصان مع اني احبهم
فهد :يالله انا جهزت كل شي .. يالله نروووح
ساره وهي مبنده الشنطه .. : يالله
*************************
خالد يتصل في نوره ..
نوره : هلا اخويه
خالد : شحالج اختي
نوره : بخير مدامك بخير
خالد : اقول اختي اتصلي في ساره . ترى ربيعي محمد ذابحني يبى يعرف ردها
نوره : خلاص الحينه بتصل فيها وبرد عليك
خالد : اترياج يا عمري .. اقول اقول نوره
نوره : هلا
خالد : سلمي عليها
نوره عصبت : خالد هالكلام قبل ما ساره تزوج ... قبل يمكن اسلم عليها .. بس الحينه اسمحلي مب حلوه
خالد : والله انا ما اعتبر انها متزوجه
نوره : انت ما تعتبر هالشي يمكن .. بس الواقع يا خالد يقول انها متزوجه وما ابيك تزعل مني بس الصراحه استحي اقول ان خالد يسلمج عليج ..
خالد تضايق: زين زين ما ابيج تسلمين عليها .. المهم
خالد تضايق: زين زين ما ابيج تسلمين عليها .. المهم قوليلي رد الريم اوكي
نوره : اوكي اخويه
نوره اتصلت في ساره
ساره وهي تقفل باب غرفتها
نوره : شحالج يا بنت خالتي
ساره : بخير الله يسلمج وانتي شحالج
نوره : شو تسوين
ساره : والله بطلع الحينه
نوره تشوف الساعه .. : الحينه الظهر وين بتروحين
ساره : نبى نروح المزرعه فهد والريم بالسياره يتريوني
نوره : كشخه .. احب المزرعه
ساره : يالله حياج الله
نوره : الله يحييج تسلمين .. المهم ما بطول عليج بختصر لج .. شو قلتي حق الريم
ساره : هيه قلت لها ..
نوره : والله شو قالت
ساره : استحت وما قالت شي .. والسكوت علامة الرضا
نوره : والله زين الحمد لله .. تستاهل الريم ..عيل بروح اتصل في خالد عسب يبشر ربيعه محمد
ساره : ..يالله ان شاء الله نسمع اخبار حلوه عنهم ..
نوره : ان شا ء الله ..زين حبيبتي يالله مشكوووره ..
ساره : العفو حبيبتي .. مع السلامه ..
|