الجزءالثاني
* 2 *
بعد صلاة العصر رحنا للملعب
فعلا كان فيه شباب كثير مجتمعين ,,, لعبنا المباراه
المغرب جلست انا وابراهيم نرتاح شوي
انا = ابراهيم وش كان يقصد صالح يوم قال لخالد الى الحين ماشفت ابوك .؟
ابراهيم = الصراحة مدري ,,, انا خالد هذا ماعرفه زين ولا اشوفه الا من
عطله لعطله
انا = اها
ابراهيم = وش رايك نرجع
انا = نصلي العشا ونرجع
ابراهيم = طيب صار
بعد الصلاة رجعنا
كان نا مليان بالاطفال يلعبون
دخلت البيت ومالقيت فيه الا خلود ومعاذ
استغربت انا متأكد اني ماشفت اخواني برا
انا = خلود وين سالم وسلمى .؟
التفت علي خلود مستغربة
خلود = برا ,,, ماشفتهم وانت جاي .؟
انا = لا
وطلعت مرة ثانية من البيت
وقفت عند الباب ولا شفت احد منهم
غريب ,,, شفت مجموعه بنات صغيرات يلعبن
رحت لهن ولا شفت سلمى عندهن ولا حتى سالم
اف وين راحوا
= خالد
التفت لمصدر الصوت
وكانت سلمى راكبه بالسيارة المرسيدس بمكان الراكب ومطلعة راسها من
الدريشة وتناديني
وش جابها هذي هنا
رحت لها وانتبهت ان خالد بالسياره وبحظنه سالم و يتفرجون على شي ولما
قربت كان الي يتفرجون فيه جوال ,,, وسالم يكركر من الضحك
سلمى = خالد و خالد هههههههه 2 خالد
وقفت عند باب الراكب وفتحت الباب وانا معصب
بطرف عيني شفت خالد يشوفني مستغرب
انا = سلمى انزلي ,,, سالم انزل اشوف ,,, معليش خالد من اليوم وانا
ادورهم والحين وقت نومهم تعرف بكرة مدارس
سلمى = انا مادرس
انا = انزلي وانتي ساكتة
سالم = خالد بس شوي بشوف هذا وبعدين اروح انام
انا بعصبية = وش تشوف .؟
اخذ سالم الجوال من يد خالد ومده لي يوريني الي يشوفه
سالم = هذا ,,, يضحّك ,,, بشوفه بس شوي
انا = قلت لك رح البيت
خالد = خلاص سلّومي رح نام بكرة مدرسة
سالم = يوه ,,, مدرسة مدرسة مدرسة كل يوم مدرسة
خالد = ههههههههههه ايه كل يوم مدرسة
نزل ونزّل سالم معه وانا نزّلت سلمى
قلت لسالم وسلمى
انا = يله اشوف قدامي
راحوا يركضون ودخلوا البيت
التفت على خالد ,,, لقيته يقفل سيارته ,,, مدري ليه ماني مرتاحله
انا = بأي سنه تدرس .؟
التفت لي
خالد = بثالث ثانوي ,,, مع السلامة
ودخل بيت خاله ,,, استغربت وش فيه ذا ,,, معقول زعل لأني اخذت اخواني
منه
يوّلي ,,, مو مرتاحله اصلا
رجعت البيت ,,, وحنا نتعشى سألت سالم وسلمى
انا = وش كنتوا تسون مع خالد .؟
سالم = ماسوينا شي
سلمى = ركبنا معه السيارة ورانا جواله فيه اشياء تضحك مره وفيه
العاب
انا = من متى وانتم معه .؟
سالم = من شوي
انا = قال لكم شي .؟
سالم = ماقال شي
قلت له احذره
انا = سالم
فعلا خاف
سالم = قال بأي سنه تدرس و قال وقال
و برطم وسكت
انا مستغرب = وش قال .؟
خلود = خالد وش فيك خل سالم ياكل
انا بعصبية = سالم وش قالك خالد .؟
سالم = سأل ابوي وينه .؟
انصدمت وقفوا اخواني كلهم عن الاكل انسدت نفسهم مثل مانسدت نفسي ,,,
سد الله نفسك ياخالد
انا بألم = وش رديت عليه .؟
سالم = قلت انا ماعندي اب وام
بكت خلود بصمت
سلمى = خالد حنا ليه مالنا ام واب مثل صديقاتي .؟
قلت لها اصرفها
انا = يله روحوا ناموا بكرة مدرسة
وقمت عنهم رايح غرفتي
خالد ماسأل سالم هالسؤال إلا انه عارف من خاله اننا ايتام
ليه يستعبط ويسأل بزر ويجرحه بسؤال مثل وجهه
ان ماوريته بكرة ,,, اكيد بيدرس بنفس مدرستنا وين بيروح يعني
دخل سالم علي الغرفة ودخل فراشه
انا = صليت .؟
سالم = لا
انا = ليه
سالم = توني صغير
انا = لا والله احلف
سالم = والله
اف
انا بعصبية = كيفك اقعد لا تصلي
في المدرسة دورت على خالد ولا شفته ولا حبيت اسأل عنه
وحنا راجعين كالعادة انا وماجد وابراهيم وصالح
ابراهيم = صالح مادرس خالد اليوم .؟
صالح = من خالد .؟
ابراهيم = خالد تركي قريبك
صالح = وانا وش دراني عنه
ماجد = قريبك
صالح بعصبية = يخسي ماهو قريبي
استغربت كره صالح له
انا = طيب وش فيك معصب
صالح = زوج عمتي يصير خاله ,,, ياخال ابوي حك ظهري ,,, ماهو قريبي
سكت وسكتنا ,,, وصلنا نا ,,, وانتبهت ان سياره خالد ماهي موجودة
دخلت البيت وكان فاضي رحت لبيت ابو سعد عشان اجيب سلمى ومعاذ
ورجعنا ,,, لقيت سالم رجع البيت وكان لابس بدلته الرياضة بس
انا مستغرب = متى جيت .؟
سالم = تو ,,, خالد شف
وأشر على ركبته وكانت بدلته متمزقة من عند الركبة
فهمت عليه
انا = خل خلود تخيطه ماني شاري شي
سالم زعلان = لا ابي اشتري وحدة جديدة
سالم = لا ماني شاري ,,, خيط هذا وخلاص
سالم = لا خالد لا ابي اشتري وحدة جديدة كل اصدقاي شروا جديدة الا
انا وبعدين انت ماشريتلي شنطة بعد مانت شاريلي بدلة ( وقعد يصيح ) ابي
وحدة جديدة
ضاق صدري مامعاي الا 100 ريال اخربها بدله ,,, وش يفهمه ذا الحين
انا بعصبية = سالم قلت لا يعني لا
وطلعت من عنده وانا متضايق شسوات الحين لازم القى وظيفة لازم
سالم طلباته كثيرة وخلود بعد لكن ساكته عن الاشياء الي يخصها لكن ادري
انها تبي ,,, سشوات .؟
العصر طلعت من البيت وانا الدنيا مسودة بعيني
شسوات الحين الشهر الي فات لقيت وظيفة لكن حارس سوبرماركت و كانت
الفترة من العصر الى الساعة 3 في اليل
اترك اخواني لحالهم من العصر الى الساعة 3 في اليل .؟
صعبه ,,, ماقدر اتركهم ,,, شسوات الحين ,,, اترك الدراسة واشتغل حارس
في الفترة الصباحية والا وشلون
مالي ألا أكد
بس وشلون أكد وانا مامعي سياره ,,, ليتني مابعت سيارتي ياليت
بعد تفكير طويل بهمي
رجعت البيت وانا مقر اطلب سيارة احد جيراننا واغيب بكرة عن المدرسة
واروح أكد طوال اليوم لين احصل مبلغ يسدني على الاقل يومين ,,, مع اني
عارف ان ماورا المكدة مكسب ,,, كل الي اكسبه يروح بنزين للسيارة ,,,.
لكن ان شاء الله ماني كاد الا بوسط المدينة اما الي يبون توصيلهم خارج
المدينة ماني موصلهم ,,, ماعندي حل الا كذا
وصلت نا على اذان المغرب لقيت اخواني سلمى وسالم يلعبون كالعادة مع
اطفال زيهم
رحت المسجد وصليت ورجعت البيت
وبعد العشا بفترة طلعت من البيت عشان اطلب سيارة احد جيراننا
جيت ابروح لابو عبد الله بس تذكرت خالد وشفت سيارته واقفه
لا لا ماني رايح لابو عبد الله اخاف يطلعلي الخايس خويلد
ورحت لابو سعد واستأذنت منه سيارته ليوم كامل
وطلعت من عنده ورجعت للبيت
وقلت لخلود
انا = خلود تراني بكرة ماني راجع للبيت الا أخر اليل لا تحتروني لا
على الغدا ولا على العشا
والتفت لسالم
انا = سالم اذا رجعت بكرة من المدرسة هات معك سلمى ومعاذ من بيت ابو
سعد ,,, مفهوم
سالم = طيب
خلود = ليه وين بتروح .؟
انا = بكد
خلود = وشلون ماعندك سيارة .؟
انا = اخذت سيارة ابو سعد
خلود = وبتأخر .؟
انا = مدري على حسب
يوم الاثنين
غبت عن المدرسة وطوال اليوم وانا اكد اوصل هذا واوصل غيره اروح جنوب
المدينة واوصل شخص لشمالها لكن كل الي وصلتهم 6 اشخاص
اكثرهم يبون توصيل خارج المدينة ,,, وليتني كسبت مبلغ زين ,,, ماصفالي
من المكدة بسبب البنزين الا 140 ريال
بعد صلاة العشا كنت تعبان وهلكان ونعسان مانمت اليوم بطوله وفوق هذا
جوعان
خلني ارجع البيت واشوف اخواني يمكن محتاجين شي ثم ارجع أكد مرة ثانية
لأخر اليل
دخلت الحارة وماشفت سالم وسلمى يلعبون مع الاطفال
دخلت البيت
انا = السلام عليكم
خلود مستغربة = خالد ! وعليكم السلام ,,, مو تقول بتجي أخر اليل .؟
انا = برجع مرة ثانية بس جوعان ,,, سويلي أي شي
التفت على سالم وسلمى ومعاذ لقيتهم يلعبون بالعاب اول مرة اشوفها
سلمى تلعب بعروسه كبيرة نوعا ما
وسالم يلعب بسيارة على شكل همر كبيرة
استغربت وسألتهم
انا = وش هذا .؟
خلود = وش .؟
انا = وش الالعاب هذي .؟ من وين .؟
ترك سالم لعبته وراح شوي وجا ومعه بدلة رياضية جديدة
سالم بفرح = خالد شف ,,, اليوم اخذني خالد للسوق وشرالي بدلة وسيارة
وسلمى شرالها هذا ( وأشر على الدمية )
انا مستغرب = مين خالد .؟
سالم بغرور = خالد صديقي
اخذت مدة عشان استوعب ,,, نقزت شيطاني قدامي ,,, الحين انا غايب عن
المدرسة وطوال اليوم تحت الشمس أكد وتعبان وحارم نفسي عن النوم بس عشان
اوفر قيمة احتياجاتهم
وأخر شي ,,,,,,,,,,,,,,,,,,,,,,
توجهت لسالم بعصبية وعطيته كف وقعدت اضربه
انا = وش قلت انا ,,, مو قلت لا تاخذ شي من احد
واخذت اضربه ,,, طلعت كل التعب و الجوع الي احس فيه ,,, وقعدت اضرب
سالم
اسب واشتم وابرد كبدي فيه
جت خلود وقعدت تجرّني عنه
خلود بخوف = خالد بس ابعد عنه خالد ,,, هو جا استاذن مني ابعد ابعد
تركت سالم والتفت لخلود
انا بعصبية = انتي كنتي تدرين انه راح للسوق .؟
خلود وهي خايفة مني = ايه
دفعتها على ورا
انا بعصبية = وانا رايح اكد لمن .؟ ليش خليتيه يروح ليش
خلود بخوف = قال ابروح مع خالد وسمحتله
عصبت وعطيتها كف
انا = وليش تسمحينله ليه وانا معلمك اني ابروح اكد
ليه
بكت ,,, التفت على سالم الي الى الحين يصيح
انا = متى رحت معه ياحمار
يبكي ولا رد علي
انا بعصبية = متا
خلود وهي تبكي = العصر
سألت سالم
انا بعصبية = معكم احد .؟
سالم وهو يبكي وخايف مني = سلمى
تفاجأت ,,, سلمى بعد ,,, التفت على سلمى و لقيتها هي الثانية تصيح
عصبت اكثر ,,, ان ماوريتك ياخالد
طلعت بعصبية من البيت ورحت لبيت ابو عبد الله ,,, ان ماطحنت عظامك
ياخالد ,,, امس جارح الولد بسؤال مثل وجهه والحين يتصدق عليه ,,, ان
ماوريتك
لقيت سيارته واقفة ,,, وضربت الجرس بعصبية ,,, طلع لي ابو عبد الله
حاولت اكون طبيعي قدامه
انا = السلام عليكم
ابو عبد الله = هلا وعليكم السلام ياهلا والله بخالد تفضل تفضل ياحيا
الله خالد
انا = تسلم ياعم لكن ماعليك آمر تناديلي خالد
ابو عبد الله = خالد رايح للدكان مرسلته العجوز الحين يجي اقلط
حظه فلت مني لكن وين يروح
انا = اجل مرة ثانية انا بس بغيت خالد ان جا ياعم قلّه اني بغيته
ابو عبد الله وهو يشر على مكان وراي = هه هذا هو جا
التفت وراي لقيت خالد لابس بنطلون جنز وفنيله سودا ومعه كيسه ,,, ذا
مايلبس إلا بناطيل ماعمري شفته لابس ثوب ,,, مالت عليه وعلى شكله
قرب خالد وقف عندنا ,,, هالمره مهمل نفسه شعره الطويل صاير حوسه
خالد بهمس = السلام عليكم
استغربت صوته متغير
ابو عبد الله = وعليكم السلام
والتفت ابو عبد الله لي
ابو عبد الله = وهذا خالد جا ,,, اقلط ياحياك الله
انا = تسلم ياعم لكن بغيت خالد بحاجة
والتفت لخالد لقيته ماسك راسه بيد ويالله يفتح عيونه كأنه مصدع
خالد بتعب = بغيتني انا .؟
ابو عبد الله لخالد
ابو عبد الله بخوف = خالد فيك شي ياولدي .؟
خالد = لا ياخال ,,, تعب بسيط ,,, ماعليك
ابو عبد الله = آكلت دواك .؟
هز خالد راسه بلا
ابو عبد الله بتنهيده = الله يهديك
استغربت دوا ,,, وش دواه
التفت لي خالد وكأن زاد عليه الألم
خالد بتعب = اعذرني خالد مصدع وتعبان
وراح وسلم على راس خاله
خالد = اعذرني ياخال تعبان وابي انوم ,,, شف هذا وش يبي ,,, ( وهو يشر
لي )
ابو عبد الله = تعشى اول ياولدي
خالد = ماشتهي
وراح ,,, ياسلام ,,, الحين انا جاي له يروح ويتركني ,,, مالت عليه
احرجني قدام ابو عبد الله
انا متفشل = جاي له ياعم يتركني ويروح
ابو عبد الله = والله مادري وش اقولك ياولدي ,,, اعذره وانا عمك خالد
عنده صداع مزمن يجيه من فتره لفتره ( تنهد ابو عبد الله وكمل بحزن) بعض
الاحيان يفقد وعيه ,,, ادعله وانا عمك ان الله يشفيه ,,, انا وامه
مالنا غيره
انصدمت صداع مزمن ويفقد وعيه
انا مستغرب = وش صداع مزمن ,,, آآآآ ,,, ليه وش عنده بالضبط ياعم
.؟
ابو عبد الله = والله مدري ياولدي ماجاله هالمرض إلا بعد حادث صار له
بالرياض
صدمه ثانية حادث ,,, واخذت وقت عشان استوعب
انا = آآآ ,,, الله يشفيه ,,, طيب انا استاذن مع السلامة
ابو عبد الله = محتاج شي ياخالد اعتبرني زي ابوك لا تستحي
انا = تسلم ياعم ماحتاج شي ,,, مع السلامة
رجعت وانا افكر بخالد
حادث و صداع مزمن لدرجة يفقد وعيه
اها توني افهم ,,, دايم اشوف على وجهه التعب لكن مانتبهت انه بسبب
مرض كنت اظن انه هو شكله كذا ,,, بس صح وش يقصد ابو عبد الله انه ماله
وامه الا خالد ,,, يعني خالد ماله اخوان .؟ وإلا وشلون
اول مادخلت البيت خاف مني سالم وهو مازال عليه آثار الصياح
جلست بحجرة التلفزيون وانا الى الحين افكر بخالد
خلود = خالد تبي اجيب العشا الحين .؟
تذكرت اني جوعان
انا = ايه
وحنا نتعشى سألت سالم
انا = سالم خالد قال لكم شي .؟
خلود بخوف = خالد خلاص عاد ماصارت ,,, آآآآ ,,, ضربتني و ضربت سالم بس
عشان بدله وكم لعبة ,,, ماصارت
انا = ايه خلاص صار الي صار ,,, بس انا ابي اعرف وش قالهم خالد
والتفت لسالم
انا = سالم وش تكلمتوا عنه .؟
سالم بخوف = ماتكلمنا عن شي بس ودانا للسوق ودخلنا الالعاب ولعبنا شوي
ورجعنا بس
انا = طيب هو وشلون عرف انك تبي بدلة .؟
سالم = انا علمته
عصبت وجيت بهاوشه لكن وش اسوي اذا الله بلاني باخو بقرة مثل سالم
انا بعصبية = كل ابلع
كملت عشاي وانا افكر فيه
يضحك مع اخواني ويكلمهم وانا يتهرب مني
كل ماحاولت اكلمه تركني وراح ,,, ليه .؟
رجعت السيارة لابو سعد ورجعت البيت انام