* 15 *
يوم السبت
كنت في الدوام وطلبني مديري يشوفني ,,, الله يستر هالمدير مايطلبني الا اذا بغى يهاوش
قبل انتهاء الدوام بربع ساعة رحت للمدير
انا = طلبتني
وبدون مقدمات وهو يشر على الكمبيوتر الي قدامه
المدير = بالكمبيوتر عندي تبين لي انك مدخل بيانات خاطئة لمريض ,,, هذا اخر انذار لك مفهوم ,,, يله تفضل شف شغلك
انا = آآآ ,,, أي بيانات
المدير بعصبية = وماتدري بعد ,,, رح راجع الملفات والبيانات الي بالكمبيوتر وبتعرف خطأك ,,, تفضل
رحت للكمبيوتر في العمل وراجعت كل ملفات المرضى الي سجلوا عندي ,,, ولاحظت خطأ لواحد من المرضى لكن خطأ تافه ,,, حتى مدري وشلون لاحظه ,,, بدل ماكتب اسم جد المريض عامر كتبت عمر ,,, طيب اسم جده يعني موب لازم اخطيت فيه والا ماخطيت اف
انتهى الدوام وطلعت من المستشفى ,,, والمشكلة يقول هذا آخر انذار لي ,,, سترك يارب
انتبهت ان خالد ماجاني كعادته ,,, الحين وشلون بيمرني كالعادة والا اخذ ليموزين
اتصلت عليه ومارد ,,, لا ,,, لا يكون مغمى عليه ,,, ورجعت اتصل عليه مرة ثانية بخوف
خالد = الوه
الحمد الله رد ,,,
انا = السلام عليكم
خالد = وعليكم السلام ,,, هلا خالد
استغربت صوته متغير وكأن ماله نفس يتكلم
انا = وينك .؟
خالد = موجود ,,, بغيت شي .؟
استغربت دايم يمرني من دون ماطلب منه ,,,
انا مستغرب = آآآآ ,,, بتمرني .؟
خالد = خلص دوامك .؟
انا مستغرب = ايه
خالد بتنهيدة = مانتبهت للوقت ,,, خلاص الحين اجي
انا = اذا كنت مشغول خلاص اباخذ ليموزين
خالد = لا لا ,,, دقايق وانا عندك ,,, مع السلامة
وسكر بوجهي ,,, ناظرت جوالي مستغرب ,,, وش فيه هذا
بعد ربع ساعة جاني ,,, ركبت وحرك خالد السيارة
خالد بهمس = آسف خالد تأخرت عليك
انا = لا عادي ,,, خالد لا تكون تعبان وانا ازعجتك
هز راسه بلا وسكت
طوال الطريق وحنا ساكتين وكل شوي التفت لخالد والقاه يسوق وهو سرحان ,,,
انا = خالد عسى ماشر وش تفكر فيه
خالد بهمس = مافكر بشي
يهمس بصوت خفيف جدا,,, بصعوبة سمعته ,,, وش فيه هذا ,,, امس وش زينه يضحك ويسولف
وصلنا الشقة وحنا ساكتين ,,, وسألت خالد قبل نزل
انا = خالد عسى ماشر وش فيك ,,, وينلي وناصر ضايقوك بشي .؟
خالد بهمس = لا
انا = تعبان .؟
خالد = لا
انا = اجل وش فيك .؟
التفت لي بنظرة حزينة
خالد = هذا انا قدامك مافيني شي خلنا نزل
نزل ودخل العمارة ,,, اجل وش فيه ,,, لا يكون عنده مشكلة ثانية ولا قالي عنها ,,, حياة هالولد غريبة
نزلت ولقيت خالد يحتريني عند المصعد بفكر سارح وبنظرات حزينة ,,, ياربي وش ورا نظرات الحزن هذي
لا الغني مرتاح ولا الفقير مرتاح
وحنا في المصعد رن جوالي ,,, القيت نظره عليه وكان رقم غريب
انا = الو
= السلام عليكم
انا = وعليكم السلام هلا اخوي
= هذا جوال خالد .؟
انا = أي نعم معك خالد
= معك ابوعبد الرحمن
اوه ,,, هالديانة وراي وراي
انا = آآآ ,,, آمر
فتح المصعد وطلعنا وقفنا عند باب الشقة كل هذا وخالد مازال سرحان
ابو عبد الرحمن = امهلت ابوك الله يرحمه وامهلتك سنتين عشان ظروفكم الي تمرون فيها ,,, اظن سنتين كافيه
انا = ماقصرت ياعم انا الحمد الله لقيت وظيفة وهالشهر اقدر اسدلك 500 وان شاء الله يكون كل شهر اسدلك 500 وش قلت ياعم
ابو عبدالرحمن = زين زين ,,, كذا ترجعون ولو شي بسيط خلاص ارسل لك رقم حسابي وتحوله لي ,,, بارك الله فيك مع السلامة
انا بتنهيدة = مع السلامة
سكرت عنه والتفت لخالد الي نسيت انه يحتريني ,,, فتحت باب الشقة ودخلت اول شي عشان اخذله درب
ولقيت بالصالة خلود وسالم يلعبون بالبلاستيشن وسلمى تتفرج عليهم
خلود ونظرها على التلفزيون = جيت .؟
انا = لا رحت ,,, اطلعي عن الصالة شوي ,,, خالد معي
خلود = اصبر شوي بس المرحلة ذي
انا بعصبية = وش اصبر ,,, الرجال واقف يحتري
خلود بعصبية = اف
وقفت العبة وطلعت
دخلت خالد للمجلس وطلعت رايح للصالة وشفت بطريقي معاذ رايح لخالد
رحت لخلود الي دخلت المطبخ مندسة عن خالد
انا = خلود مصدع ابي شاي وخلي سالم يجيبه لنا للمجلس
ورحت لغرفتي واخذت كتبي ناوي احل واجباتي بالمجلس مستواي نازل خلني احل الواجبات يمكن يرقع شوي على الاقل
دخلت المجلس وتفاجأت بالي قدامي
لقيت خالد ضام معاذ لصدره ومغمض عيونه حتى انه مانتبه لي اني دخلت
جلست قريب منه شوي ,,, وانتبه لي خالد
خالد مستغرب = وش الي معك .؟
انا = شوفت عينك
حالد = تحل الواجب .؟
انا = ايه
خالد = انا اخر شي افكر فيه الواجبات
انا = رحت لمدرستك اليوم .؟
خالد = لا
انا = والى متى الغياب ,,, لا تنسى انك بثالث
تنهد وسكت
بديت احل وانشغلت عن خالد بواجباتي ,,,, وبعد لحظات سمعت خالد يكلم معاذ
خالد = رصني معاذ (وضم معاذ لصدره اكثر) رصني كذا ,,, رصني بقوة
حاولت مارفع نظري ,,, وحطيت نفسي مشغول وماني منتبه له وصرت اشوفهم بطرف عيني
شفت خالد يحط ذراعين معاذ الصغيرة حول رقبته عشان معاذ يضمه ,,, عانقه معاذ شوي وتركه
خالد بترجي = لا معاذ رصني
حاول فيه خالد و يوم شاف معاذ مافهم عليه ,,, وهو يرفعه شوي ويضمه ,,, ودس وجهه بصدر معاذ ,,,
رفعت راسي له مستغرب ,,, ليش يبي معاذ يضمه
اخذ شوي وهو داس وجهه ,,, لين تضايق منه معاذ
ابعد وجهه عنه وجلس معاذ بحضنه وعطاه جواله عشان معاذ يسكت
نزلت راسي يعني ماشفت شي ,,, وبطرف عيني شفت خالد سرحان بوجه معاذ
استغربت وش فيه خالد اليوم ,,, رفعت راسي وسألته
انا = خالد وش فيك .؟
رفع خالد راسه لي بطئ وبنظرات حزينة
خالد = كم مرة تسألني هالسؤال .؟
انتبهت ان جوال خالد تنور شاشته بيد معاذ ,,, كان جواله على الصامت
انا = فيه احد يتصل عليك
اخذ الجوال من معاذ ونزله عن حضنه وانسدح على الكنب ,,, ولأن الكنب خاص لجلوس شخصين ومايصلح للتمد عليه حط خالد رجله على يد الكنب والرجل الثانية منزلها بالارض
انا = ليش ماترد على جوالك .؟
خالد = مو مهم
انا = طيب وش تفكر فيه ,,, من يوم مامريتني وانت سرحان ,,, فيك شي .؟
خالد بملل = قلتلك مافيني شي ,,, حل واجباتك
دخل سالم ومعه الشاي نزله وجا بيطلع
انا = وين وين تعال صبلي وصب لخالد
صب لنا سالم وراح يركض يلحق عى البلاستيشن ,,, اشوى بعد البلاستيشن صرت ماسمع تضمراتهم
القيت نظرة على خالد ولقيته سرحان ,,, اموت واعرف وش فيه ,,, اخاف وينلي مأذيه بشي
مرت دقايق وانا احل واجباتي لين خلصت ,,, اف اخيرا مابغيت
رفعت راسي لخالد ولقيته نايم ,,, بسم الله متى نام هذا
قمت وطلعت من المجلس ورجعت كتبي لغرفتي وجلست بالصالة ,,, خله ينام شوي على الاقل ,,,
كانوا الى الحين خلود وسالم يلعبون بالصالة جا معاذ وبدون مقدمات جلس بحظني
خلود = غريبة اشوفك جالس بالصالة ,,, راح خالد .؟
انا = لو كان بيروح ,,, كان اول من يعرف انتي ,,, لأنك لازم تطلعين من الصالة عشان هو يتعدى للبا
خلود = يعني ماراح
انا = ايه
خلود = طيب قل ماراح وبس يعني لازم تشرح
انا = لأن سؤالك غبي
خلود = طيب وانت ليش جالس هنا وخويك بالمجلس .؟
انا = خالد نايم
التفت لي خلود مستغربة
خلود = بينام عندنا .؟
انا = لا ,,, اباخذ شوي واقومه ,,, الا اذا بغى ينام عندنا كيفه انام معه بالمجلس
خلود = طيب تعال العب معي سالم مايعرف يلعب
سالم بعصبية = انتي الي ماتعرفين
قمت واخذت اليد من سالم غصب عنه ,,, الحمد الله والشكر صاروا الكبار يلعبون والصغار يتفرجون
مرت نص ساعة وانا وخلود نلعب ,,, بعدها قمت ودخلت المجلس
ولقيت خالد على وضعه نايم ,,, وقفت عنده اتأمله
الهالات واضحة تحت عيونه ,,, لا يكون فيه حمى ,,, حطيت يدي على راسه وكانت حرارته عادية
عجيب اجل وش فيه ,,, القيت نظرة على الساعة ,,, اوه قربت 2
انا = خالد خالد قم
مديت يدي وهزيته شوي ,,, فتح عينه مستغرب وجلس
خالد مقطب حواجبه = نمت ( وطلع جواله من جيب بنطلونه يشوف الساعة ورفع راسه لي منصدع ) ليه خليتني انوم لهالوقت
انا = عادي تقدر تنام هنا بس الاحسن تنام على الارض وانا ابجيب لك لحاف ومخدة
قام خالد
خالد = لا ,,, بطلع
انا = ماتبي تقولي وش فيك اليوم .؟ مانت طبيعي
خالد بملل = خذلي درب بطلع
انا = طي
قاطعني معصب
خالد بعصبية = خذلي درب
اخذتله درب وطلع ,,,
وش فيه هذا اليوم ,,, ياترا وش وراك بعد ياخالد
يوم الاحد
وانا في المدرسة كنت مكسل مالي خلق لشي ,,, صالح مدري وينه وابراهيم مشغول في النشاط
في نهاية الدوام المدرسي جاني ابراهيم وصالح
صالح = خالد اصبر قبل تطلع ابسألك ,,, شفت خالد امس .؟
انا بعدم استيعاب = من خالد .؟
ابراهيم = خالد تركي ,,, اليوم الفجر جاني العم ابو عبد الله خايف عليه يبيني ادور على خالد ,,, وعدت ابو عبد الله ادور عليه بعد ماطلع من المدرسة ,,, تكفى اذا كنت تدل مكانه دلني عليه
شسالفة
انا مستغرب = هاه ,,, شسالفة عيدوا من الاول ماني فاهم شي
ابرهيم = خالد مختفي من امس ماشفناه ,,, وابو عبد الله يحتريه
صالح = امس ماجا للبيت ابد ولا شفناه
ابراهيم = نتصل عليه مايرد ,,, ابو عبد الله مسكين الفجر شوي ويترجاني ادور عليه ,,, تكفى اذا كنت تعرف مكانه والا وين راح دلنا عليه
فتحت فمي مستغرب وش فيهم هذولي
انا = خالد سهران عندي امس
طالعوا بعض مستغربين
صالح بعصبية = عندك وحنا ندور عليه وساكت
ابراهيم = ليه ماعلمتنا او اتصلت علينا ,,, صالح من امس وهو يدوره
انا = وانا وش دراني انكم تبونه ,,, وبعدين هو مرني الساعة 9 في اليل بعد ماطلعت من الدوام وسهر عندي شوي وراح لبيته
طالعوا بعض مرة ثانية
انا = يعني العصر كان في بيته وبعد ماطلع من عندي رجع للبيت مرة ثانية
صالح مستغرب = لا ,,, خالد من فجر السبت ماطب البيت واليوم الاحد ,,, قبل شوي اتصل علي ابو عبد الله وعلمني انه الى الحين ماجا ,,, يعني له يومين
انا = وليه ماتصلتوا علي طيب .؟
صالح = وحنا وش يدرينا انه عندك ,,, نخبرك يإما بالدوام يأما بيتك
انا = خالد كل يوم اشوفه ويسهر عندي
طالعوا بعض مرة ثانية
ابراهيم وصالح = كل يوم .؟
انا = ايه ,,, شسالفة ,,, انا متأكد انه طلع من عندي الساعة 2 رايح لبيت خاله
صالح = اقولك ابو عبد الله قبل شوي اتصل علي يقول ماشافه
طلعت جوالي ابتصل على خالد
ابراهيم = من اليوم اتصل مايرد علي
حطيت الجوال على اذني احتري رد خالد
خالد بصوت هادي = الوه
نزلت التلفون عن اذني وكلمت ابراهيم
انا = هذا هو رد
ابراهيم = ياسلام انا مايرد علي ,,, قله ابو عبد الله يبيه
حطيت الجوال باذني
انا = خالد وينك .؟
خالد = وش بغيت .؟
انا = خالد ابو عبد الله يدورك وخايف عليك ,,, امس يوم طلعت من عندي وين رحت.؟
خالد = انت وينك فيه.؟
انا = بالمدرسة ,,, بس بنطلع الحين
خالد = مع السلامة
وسكر بوجهي ,,, انصدمت ,,, ورجعت اتصل عليه مرة ثانية ولا يرد
ابراهيم = هاه وش قال .؟
انا = ماقال شي والحين اتصل عليه ولا يرد
التفت لصالح
انا = صالح ,, خالد ماترك بيت خاله الا بسببك اكيد متهاوش معه
صالح = لا والله ماقلت له شي ,,, وبعدين اقولك خالد طلع من فجر السبت يعني طوال يوم امس ماشفناه
ابراهيم = ماعتقد انه بسبب صالح ,,, لأن ابو عبد الله يتصل وخالد منطشه مايرد عليه
اها تذكرت خالد امس ماكان طبيعي وجواله كان يرن على الصامت ,,, بس فعلا كان منطشه
ابراهيم = خالد تكفى دلني وين مكانه ,,, لو تشوف ابو عبد الله يوم جاني الفجر شوي ويصيح خايف عليه ,,, وانا مواعده القاه
انا = العصر مرني ونروح ندوره
ابراهيم = طيب
انا متأكد انه طلع من عندي الساعة 2 في اليل بس كان على بالي انه بيروح لبيت خاله ,,, عجيب اذا مانام امس بيت خاله اجل وين نام
رجعت الشقة وانا افكر بخالد وباختفائه المفاجئ