* 20 *
بدر بعصبية = وش تقوله انت
خالد بألم = مالك دخل ,,, اتركني
بدر بعصبية = انا مالي دخل
وضرب وجه خالد بقوة عدة مرات بمرفقه
علي = بدر اصبر شوي خلنا لين نزل ,,, السيارات الحين تشوفنا
فيه شي بعد غير هذا حرام عليكم
بعد كلمة علي تركه بدر واعتدل خالد بجلسته ولاحظت الدم يطلع من فمه او خشمه ماميزت المهم نص وجهه ينزف دم ,,, واحتمال خشمه
رفع خالد فنيلته يمسح الدم عن وجهه وبعدها احنى راسه لحد رجليه يغطي وجهه بيأس
فجأة شميت ريحة سيجارة ,,, تلفت ولقيته عبد العزيز يدخن ,,, التفت بخوف لخالد
الي رفع راسه لعبد العزيز ,,, وشفت بوجهه الخوف وهو يشوف عبد العزيز يدخن
راكان باستهزاء = خلودي لك اسبوع مارحت مدرستك ماقلتلنا مغيرها والا وشلون.؟
التفت خالد له وسكت
علي = هههههههههههههه خايف خايف ياراكان قلتلك لا ترسله بس ماطعتني
رفع بدر يده وضرب فخذ خالد اليسرى بقوة
بدر بعصبية = اذا سألناك جاوب
مسك خالد رجله بألم وحاول يبعدها عن بدر وشره
راكان = ليه ماصرت تروح .؟ ( ورفع يده وعطى خالد كف طير وجهه ناحيتي ) لا تسفهني وانا أسألك
علي وهو يتلفت = راكان عطه مناديل خله يمسح الدم الي بوجهه ,,, ياجماعة السيارات تشوفنا ,,, اخاف يشكون ,, اصبروا لين نزل
عبد العزيز = الدرايش الي ورا مظلله ماحد منتبه ,, لا تخاف
علي = ايه بس شف راعي السيارة الي بجنبنا يشوفنا
تلفت راكان شوي
راكان = صادق علي ,,, خلاص بدر اصبر شوي ( واخذ كرتون المنديل ورماه بوجهه خالد ) خذ امسح خشتك
تلفت خالد للسيارت وبعدها هجم على بدر عشان يلفت النظر لسيارتنا
علي بخوف = ابعده بدر عنك بيفضحنا
شفت راكان يمد جسمه بالكامل لخالد ومسك شعره وجره بعنف خلا خالد يميل على ورا وصار وجهه بين المرتبتين الاماميتين واخذ راكان يعطيه من هالبكوس بوجهه وصدره وبدر مستلم رجله ,,, شكله حالف يكسرها
شفت علي يرفع قبضة يده لكن مسكته باخر لحظه ومنعته قبل يضرب خالد
انا = لا تكفى
لكن من وين ادافع عن خالد وهم اربعه وحنا اثنين ,,, اذا منعت هذا عنده البقية
مسك علي ذراعي بقوة
علي بعصبية = انت لا تدخل ودورك جاي ,, اصبر بس خلنا نزل ( والتفت لراكان وبدر الي الى الحين وهم طاحين بخالد ضرب ) بس انت واياه
راكان وانفاسه سريعة = بدر بس بس ( وتلفت للسيارت شوي وبعدها مسك راس خالد ودفعه عشان يرجع لمكانه )
مسكه بدر وجلسه بمكانه غصب عنه
اخذ خالد مكانه وهو يئن ويتألم ,,,
واخيرا سكتوا عنه
التفت لخالد بقلة حيلة ,,, وشفت الدم يغطي فمه ومغمض عيونه بقوة ويتألم من رجله الي ماسكها
اخذت كرتون المنديل الي طاح تحت رجولي ومديته على خالد ,,,
التفت خالد لي بصمت وصار يطالعني وانا اطالعه وانا مستغرب ليش يطالعني كذا واتمنى اعرف وش يفكر فيه الحين
وبعدها نزّل نظره على كرتون المنديل الي معي ودفع يدي بعيد
خالد = منهم هم مابيه
ورفع فنيلته يمسح وجهه
بدر بعصبية = وهو مايبيك ( وضرب فخذه )
نقز خالد من الضربة
خالد بألم = آآآآآآه
واضح من النقزة ان فخذه صارت ماتتحمل ضرب اكثر ,,, حسبي الله عليك يابدر حسبي الله عليك
علي بعصبية = بدر وش اقول انا .؟ ياخي اصبر خلاص قربنا نوصل
انتبهت اننا صرنا نبتعد عن المباني السكنية اكثر لين وصلنا لاخر محطة في الديرة على طريق الرياض ,, محطة ماوراها الا صحراء ,,, وقفت السيارة ورا المحطة وصار يفصلنا عن المحطة جدارها الخلفي
راكان = علي نزّل هذا وخلك معه لا يفلت منك ( ونزل شماغه )
شفت علي يتلطم بشماغه وبدر سوا مثله اما عبد العزيز عليه بنطلون ونزل وراح للبا الوراني من جهة بدر
عبد العزيز = يله بدر نزّل خويلد
سحبني علي يبي يطلعني من السيارة ,,, وضربته
انا بعصبية = اترك وش تبون
لف خالد يديه حولين بطني عشان مايسحبني علي
خالد بصراخ = قسم بالله ماتلمسون منه شعرة
وقعد خالد يسحبني داخل السيارة وعلي يسحبي برا السيارة
فجأة تركني خالد وسحبني علي بقوة برا السيارة ,,, دفعني راكان وجا بمكان علي ,,, التفت لخالد اشوفه وينه
ولقيت بدر وراكان كلهم بالمرتبة الورانية فوق خالد وطايحين فيه ضرب وعبدالعزيز واقف عند الباب ويشارك بالضرب
التفت لعلي وضربته بقوة على وجهه عشان يتركني وفعلا فلت منه ورجعت للسيارة ابعد هالوحوش عن خالد
لكن مامداني امسك راكان الا وعلي ساحبني مرة ثانية
علي بعصبية = عبد العزيز عبد العزيز تعال امسك معي هذا تعال
جا عبد العزيز يركض وجروني بعيد عن السيارة وسندوني على الجدار وقفوا معي يمنعوني عن أي حركة
المكان مضلم الا من نور خافت جدا جاي من المحطة مع نور السيارة الي نورها مسلط علينا
التفت للسيارة بالاخص احاول اشوف خالد ,,, لقيت بدر وراكان بالمرتبة الورانية ومنحنين على خالد يضربونه اما خالد ماشوفه ,,, تألمت لحاله
علي = نزلوه خلصونا
شفت بدر يطلع من السيارة وهو يسحب خالد بعنف ,,, وجو متوجهين لنا
شفت خالد يعرج وبدر وراكان ماسكينه من الجانبين وسندوه على الجدار بجنبي ,, وعلي مازال ماسكني
التفت لخالد و مازال خشمه ينزف ,,, رفع فنيلته مرة ثانية يمسح الدم عن وجهه
خالد وانفاسه سريعة = وش تبون ليه لاحقيني .؟
بدر = ليه تبلغ علينا .؟
راكان = جاين نربيك يوم ابوك مارباك
انا بعصبية = من زين تربية ابوك عاد
التفت لي راكان بعصبية ومادريت فيه الا وهو يعطيني كف طير وجهي ناحية علي
دفعه خالد معصب
خالد بعصبية = قلتلكم مالكم دخل فيه
لكن عبد العزيز مسك يد خالد ولواها ورا ظهره
بدر = قل ,,, ليه بلغت علينا .؟
خالد بصراخ = تدخلون استراحتي بدون علمي وتبوني اسكت ( ودفع عبد العزيز عشان يفك يده )
تركه عبد العزيز وطلع السيجارة من فمه وعطاها راكان
عبد العزيز = اسمع حبيب ألبي الاستراحة اعتبرها لنا من الحين وطالع وخلني اشوفك تبلغ علينا ,,, تسمع
خالد بعصبية = لا ماسمع ,,, وان دخلوتها مرة ثانية بابلغ ,,, وش عندك
من يوم ماخذ راكان السيجارة من عبد العزيز وهو ينفث الدخان بشراهه بوجه خالد متعمد ,,, ولأني بنجنب خالد ملاصق له يجيني شوي من الدخان ,,, انا عن نفسي انكتمت وشلون خالد
علي بعصبية = ابي اعرف انت وش صارلك ماكنت كذا نسيت مين الي كان يجهز السهرة والا اذكرك .؟
بدر باستهزاء = شكله فضل هذا علينا ( وضرب راسي للجدار الي وراي بتقليل قيمة )
انا بألم = آآآآآه وخر ( ودفعت يده ) ياخي مالكم دخل فيه يمشي مع الي يمشي ويترك الي يترك
رص علي ذراعي اكثر
علي = انت اسكت لا تتدخل بشي مايعي***
لاحظت على خالد يلصق فيني اكثر لين صار نص ظهره على صدري
خالد بعصبية = خالد مالكم دخل فيه كلموني انا وبس
لفيت يدي الحرة حولين بطنه كمحاولة فاشلة مني لحمايته
راكان بسخرية = ليه حبيبي خايف على البنوتة الي وراك .؟
انكتم خالد من دخان سجارته
خالد = كتمتني بريحتك ( ودفع راكان على ورا )
علي بسخرية = الله تطورات ,,, صارت ريحة الدخان تكتمك
قرب راكان فمه من فم خالد ونفث الدخان فيه
خالد ماتحمل حركته ,, وعطاه كف قوي طير وجهه
على قد مافرحت بالصفعة على قد ماخفت على خالد يوم شفت راكان وبدر يسحبون خالد ويطرحونه بالارض بعنف ويركبون فوقه
بدر جالس على بطنه وراكان حاط ركبته على صدر خالد
وخالد الغالي ماشوف منه الا رجليه
تقدمت خطوة بروح ابعدهم عنه بس فجأة حسيت بالة حادة تغز بطني ,,, نزلت نظري اشوف
وانصدمت والتفت بخوف لعلي
انا بخوف = علي ابعد السكينة عني ,,, وين عايشين حنا .؟
علي = اثبت بمكانك ولا تتحرك والا دخلتها فيك اكثر
انا بترجي = علي الله يرحم والديك ,,, خالد ,,, خالد ياعلي بحكم صداقته القديمة معك
علي = شكلك مشتهي تكون نهايتك اليوم
انا بترجي = علي
علي بعصبية = اسكت اقول
التفت لخالد بألم لقيتهم يكلمونه وهم فوقه بلا رحمة ,,, اسمعه يرد عليهم بس ماميز من كلامه شي ,,, وكل شوي اشوف قبضة يد بدر ترتفع وتهوي بخالد والله اعلم وش تصيب
التفت لعلي مرة ثانية
انا = وش تبون فيه ,,, بدل ماتشجعونه على التوبة ت
وغز علي السكينة بطني اكثر
علي بعصبية = انت بتسكت والا وشلون .؟
انا بألم = آآآه خلاص خلاص عورتني
وفعلا خف السكينة عني ,,, فجأة سمعت صرخة خالد
التفت له مفجوع
انا بصدمة = خالد
شفت خالد يحك رجلينه بالارض بشكل هستيري دليل على الألم و مازلت اسمع صراخه
انا = علي ,,, علي الله يرحم والديك ( والتفت لعلي ) اتركني اتركني ( وحاولت اسحب يدي منه )
شفت بدر يقوم ويطلع شي من جيبه وبعدها جلس بعنف على بطن خالد ,,, وخالد المسكين يحاول يدافع عنه نفسه ويحاول يمسك راس بدر برجله وهو يصارخ
انا = ياخي فك فك ( ودفعت علي لكن مازال متمسك فيني ,,, ورص السكينة بطني اكثر )
علي بعصبية = انت ماتفهم .؟ ( والتفت لعبد العزيز ) وانت رح امسك خالد عن بدر بسرعة
وراح عبد العزيز وجلس على رجلين خالد عشان يثبتها بالارض
انا بعصبية = ابعد ابعد ( وانا احاول افلت من علي لكن النذل رص السكينة بطني مرة ثانية )
انا بألم = آآآه عورتني ( وابعد علي السكينة عني شوي )
علي بعصبية = هذا آخر مرة لك والا مايحصلك طيب ,,, تفهم .؟
فجأة سمعت صرخة قوية من خالد ,,, اقوى من الصرخة الاولى
شوي واصيح
انا بصوت ضعيف = خ خالد
سمعت علي يسألني
علي = وين ساكن خويلد .؟
مارديت عليه فاضي يسأل
علي بعصبية = رد وين ساكنين بالضبط .؟
شفت بدر يشر لعبد العزيز على فخذ خالد اليسرى كأنه يقول شف شغلك ,,, صارخت بعبد العزيز
انا بصراخ = لا لا عبد العزيز يرحم والديك لا
وكأني اقول عليك فيه
استلم عبد العزيز فخذ خالد وقعد يضرب فخذه بقوة وبدون رحمة
انا بصوت باكي وبعصبية = قسم بلغ عليكم يالكلاب ,, فك فك
وانصدمت وانا اسمع خالد يناديني
خالد بصراخ = خالد خالد خالد
تألمت لحاله ,,, تستنجد فيني ياخالد وانا مابيدي شي اسويه لك ياغالي ,,, آآآه ياخالد آآآه
خالد بصراخ = لا لا لا خالد آآآه خالد
عصبت ودفعت علي بقوة عني ,,, لكن بحركة سريعة من علي جرح يدي بسكينته وطرحني بالارض وجلس فوق بطني
علي وهو يوجه السكينة لوجهي = وش اسويبك الحين هاه
التفت لخالد الي صارت المسافة بيني وبينه ابعد من قبل وماشوف الا الوحوش الي فوقه ,,, وخالد ماشوفه ,, ماشوفه ,, ماشوفه
بكيت غصب عني ,,, وانا اشوفهم يضربون خالد بدون رحمة وانا اسمع صراخ خالد يخف ويخف
شفت عبد العزيز يقوم و يتوجه لي وبعدها انهالوا علي بالضرب ,,, علي وعبد العزيز علي ,, وبدر وراكان على خالد
قاومتهم لين ضعفت حسيت كل جسمي تكسر,,, وانا اقاوم واقاوم
مدري كم مر علينا من الوقت
اخيرا قاموا علي وعبد العزيز عني وتوجهوا لخالد او بالاصح لبدر وراكان ,,, بضعف التفت لهم وانا اسمع اصواتهم وماقدرت اميز شي من شدة الدوران الي احس فيه
شفت واحد منهم يفتش بجيوب بنطلون خالد المتمد بلا حركة ,,, بعدها ركل فخذه ومشوا متوجهين لسيارتهم
وراحوا
صار المكان مظلم الا من نور خافت جدا جاي من المحطة خاصة بعد نور السيارة الي كان مسلط علينا وتعودت عيوني عليه ,,, اخذت وقت عشان تتعود عيوني على الظلام وحاولت احبي لخالد ,,, لكن ماقدرت بسبب الدوران الي احس فيه ,,, التفت لخالد واشوفه متمد ,,, ناديته ولا يرد علي
انا بصوت باكي = خ خالد ,,, خالد
اخ احس جسمي مكسر ,,, دورت على جوالي و حمدت الله انه مازال بجيبي ,,, وطلعته واتصلت على ابراهيم بيد ترتعش ,, بعد فترة رد علي واسمع عنده ازعاج
انا = ابراهيم الحق ابراهيم تعال تعال
ابراهيم = خالد ,,, بسم الله الرحمن الرحيم ,,, وش فيه صوتك الله يكفيني شرك
انا بصوت باكي = ابراهيم تعال خالد
ابراهيم بخوف = خالد وش فيك .؟
انا = تعال عند المحطة ال ,,, تعال بسرعة بدر و خ خالد تعال تعال ( وبكيت )
ابراهيم = وش تقول انت ,,, اهدى شوي وكلمني زين
انا = تعال عند المحطة تعال بسرعة
ابراهيم = عند محطة وش .؟
انا = محطة ال ,,, حنا وراها تعال بسرعة الله يخليك
ابراهيم = طيب طيب يله الحين جاي
وسكرت عنه ,,, جلست بصعوبة ورحت احبي لخالد لين وصلت عنده ودموعي منعت عني الرؤية ,,, مسحت دموعي احاول اشوف خالد
فنيلته الزيتيه تحولت للون الاحمر الغامق
انا = خالد
حطيت يدي على صدره,,, وحسيت بسائل حار لزج يبل يدي ,,, رفعت يدي بصدمة وبخوف
انا بصوت باكي = خالد رد علي خالد
انفاسه ثقيلة ويئن ويحرك رجله اليمنى بحركات بطيئة وبضعف
انا = خالد رد علي
نص وجهه ينزف ,,, وفرحت لما سمعته يناديني
خالد بألم وبانفاس ثقيلة = خ خال د
انا = اسمعك خالد اسمعك ,,, اتصلت بابراهيم ,, الحين يجي خالد تسمعني
خالد بألم = صدري خالد صدري آآآه يدي راسي ,,, خالد رجلي رجلي
حطيت يدي على صدره وانحنيت عليه والصقت خدي بخده ,,,
انا = حسبي الله عليهم ,,, الله ينتقم منهم ياخالد الله ينتقم منهم
اسمع انفاسه ثقيلة ويئن بشدة وينادي باسمي
مدري كم مر من الوقت ,,, وانا يإما اجلس او انحني عليه لين سمعت جوالي يرن
ابتعدت عن خالد وجلست
انا = آلوه
ابراهيم = خالد وينكم ,, هذا حنا عند المحطة بس مانشوفكم
انا = تعال ورا المحطة ,,, حنا ورا المحطة تعال بسرعة بسرعة
سكر بوجهي وبعد 5 دقايق شفت نور السيارة تكبس علينا وقفت السيارة بسرعة
وشفت ابراهيم ينزل و ثنين معه ويركضون متوجهين لنا
احنيت راسي على خالد عشان يسمعني
انا = خالد جو جو ياخالد ,,, تحمل شوي ,,, خالد تسمعني
خالد بألم = صدري صدري ,,,
بعد ماعبّر كل واحد منهم عن صدمته عرفت ان الي مع ابراهيم صالح وماجد
ماجد بصدمة = خالد ( وجلس بجنبه بصدمة ويتحس صدره وبطنه ) خالد من سوا فيكم كذا ,,, خالد
صالح = موب وقته الحين شيله شيله معي ( ورفع رجلين خالد )
خالد بألم وبصراخ = آآآآآآآه رجلي رجلي
ابراهيم بصدمة = حسبي الله ونعم الوكيل ( وانحنى على خالد وشاله من عند صدره )
خالد بألم وبصراخ = آآآآآه لا لا صدري
كل ماحركوه صرخ بألم ,,, بعد ماحاولات شالوه وحطوه بالسيارة
جا ماجد عندي ومسكني يساعدني على الوقوف
ماجد = خالد قم تقدر تمشي ,,, قم
قمت بتعب ويدي ترتعش ومشيت بمساعدة ماجد ,,, فتح لي الباب الخلفي ,,, ولقيت صالح جالس وخالد متمد وراسه على رجل صالح ,,, ماعرفت وين اجلس ,,, خالد ماخذ المكان كله
نزّل ماجد رجل خالد اليسرى على ارض السيارة حتى يسوي لي مكان
خالد بألم = آآآآآه رجلي ماجد لا
ماجد بخوف = اوه آسف عورتك .؟
انا = ماجد خلاص خل المكان له روحوا وصلوه للطواري بسرعة
صالح بعصبية = اركب بسرعة خالد ينزف وانت قاعد تسولف
ماجد = اركب خالد سويتلك مكان اركب
جلست ورجل خالد اليمنى ورا ظهري ورجله اليسرى منزلها على ارض السيارة قدامي ,,, حاولت اتحاشى خالد وبالاخص رجله ,,, اخاف المسها وتعوره اكثر ,,,
ركب ماجد قدام وبسرعة البرق انطلق ابراهيم بالسيارة
جلس ماجد بالعكس على المرتبة عشان يشوفنا وبدا التحقيق معي
ماجد = خالد شسالفة من سوا فيكم كذا ( والتفت لابراهيم ) ولع المبة انت
واول ماشغل ابراهيم نور السيارة الداخلي ,,, انصدمنا بالي شفناه ,,, قبل كان ظلام ولا انتبهنا لخالد زين
كان خالد غارق بدمه فنيلته الزيتيه تحولت بالكامل للاحمر الغامق وينزف نزيف حاد من عند صدره وفنيلته متمزقة من عند الصدر ويده اليسرى مغطاه بالدم والخدوش بوجهه بكل مكان هذا غير فمه وخشمه مغطى بالدم
صالح بخوف = لا يكون طاعنينه الحمير ( والتفت لي تفحصني بعيونه شوي ) خالد من سوا فيكم كذا
ولا انتظر مني رد ,,, نزل شماغه ومسح وجه خالد وبعدها حط الشماغ على صدر خالد يمنع النزيف ,,, بس المشكلة مايدري وين الاصابة بالضبط ,,, مازال صدر خالد ينزف
صالح بصراخ = عطوني شماغ ثاني
نزل ماجد شماغه وعطاه صالح
ماجد = يده اليسرى تنزف بعد
صالح بعصبية = لا الدم الي بيده من نزيف صدره
ماجد = الا ,,, وخر اشوف وخر
وحشر ماجد نفسه وجا عندنا للمرتبة الورانية
تألم خالد يوم صار ماجد ملاصق له
خالد بألم = آآآه ماجد يدي يدي ابعد
صالح = ماجد خلنا نزل قميصه ماني عارف من وين النزيف بالضبط
وحاولوا ماجد وصالح ينزلون فنيلة خالد من دون مايتأذى
ومع محاولاتهم وصراخ خالد المتألمة نزلوا فنيلته بصعوبة ,,, وانصدمنا بالي شفناه
صالح بعصبية = وش ذا ,,, لاعبين فيه الحمير
ماجد مطير عيونه وساكت
صدر خالد مجروح جرح عرضي عميق تبدا من نص صدره الى جنبه الايسر سببت فتحة كبيرة وعريضة مفزعة مع طعنة في اليد اليسرى
ماجد بصدمة = خ خ
صالح مرتبك = ينزف ,, ماجد شكلهم قاطعين عرق وقف النزيف بسرعة
وحطوا شماغين على صدر خالد يحاولون يوقفون النزيف وخالد يصرخ ويتألم
ابراهيم حاول يلتفت لنا
صالح بصراخ = طالع قدام لا تصدم فينا
ابراهيم مرتبك = وشفيه خالد بشوف
صالح بعصبية = سوق وانت ساكت
ماجد بصدمة = صالح شف ( واشر على بطن خالد )
نزلت نظري للمكان الي اشر له ماجد وانصدمت
انا بصدمة = لا
حارقين بطنه بالسيجارة ,,, ورجع على مسامعي صراخ خالد واستنجاده فيني ,,, بكيت وانا اذكر صراخه وهو يحك رجله بالارض بشكل هستيري ,,, ماكنت ادري ماكنت ادري ياخالد سامحني
ماتحملت اشوفه بهالصورة ,,, احنيت راسي عليه ولفيت يديني حولين خصره وغطيت وجهي بطنه وانا ابكي
انا = سامحني ياخالد سامحني ,,, خذلتك سامحني خالد سامحني انا السبب
ماجد مرتبك = خالد اهدى شوي ان شاء الله بسيطة الحمد الله الاصابات ماهي قاتلة ياخالد اهدى شوي
صالح بصراخ = بسرعة ابراهيم بسرعة خذ طريق مختصر للمستشفى ياخي ماحنا قادرين نوقف النزيف بسرعة لشوتك الحين
ابراهيم = وش تبيني اسوي اطير ,,, المسافة بعيدة حاولوا توقفون النزيف بأي شكل
سمعت خالد يصرخ بضعف
خالد = لا لا مابي المستشفى ابي البيت ودوني البيت لا لا البيت البيت
صالح بعصبية = وش بيته انت الثاني اسكت لشوتك
خالد = مابي مستشفى ,, نزلوني نزلوني ( وحاول يقوم بس عجز )
رفعت راسي عنه مستغرب
ماجد مستغرب = خالد اهدى شوي وش فيك خايف ,,, الحين نوصل اصبر شوي
خالد = لا مابي مستشفى ,,, ابراهيم نزلني نزلني ابروح البيت نزلني
انا بألم = خالد انت تنزف
خالد = لا لا
ماجد = خالد اصب
وقاطعه بصراخه
خالد بصراخ = مابي ,,, ابي البيت ابي البيت ,,, ابراهيم وقف وقف
وقف ابراهيم السيارة بجنب الطريق والتفت لنا مستغرب
ابراهيم = وين نوديه الحين هذا ثاني مرة يعي يروح المستشفى
تذكرت يوم خالد يغمى عليه بيتي ,,, صح عيا يروح المستشفى وهذا المرة الثانية ,,, معقول يخاف من المستشفيات
ماجد عصب وضرب راس ابراهيم
ماجد بعصبية = وانت تسمع كلامه امش بسرعة
ابراهيم = مايبي المستشفى طيب وش اسويبه
ضرب صالح راس ابراهيم
صالح بعصبية = امش لشوتك
انطلق ابراهيم بالسيارة وخالد يصارخ بضعف نزلوني نزلوني
وصلنا اخيرا للمستشفى ونزلنا خالد ودخلوه غرفة العمليات
جلست على الكرسي بتعب ونزلت راسي بحزن وانا احتري خالد يطلع ,,, وكل شوي يرجع لمسامعي صراخه واستنجاده فيني ,,, وكل شوي ترجع لذاكرتي صورة خالد وهم فوقه بين ضرب وحرق وطعن وسلخ وانا قاعد اتفرج عليه
جا عندي ماجد وجلس بجنبي
ماجد = خالد الحمد الله اصاباته ماهي قاتلة ,,, احمد ربك ولا تجزع وخالد ان شاء الله بخير
جا صالح وجلس بجنبي من الجهة الثانية
صالح = خالد ممكن تفهمنا وش صار لكم ومن الي سوا فيكم كذا
جا ابراهيم وقف قدامي
ابراهيم = تقول الممرضة قبل شوي ان الدكتور سوى بلاغ للشرطة وهم على وصول ,,, خالد فهمنا شسالفة
مدري ليه تذكرت رولا وهي تترجى خالد مايسافر ,,, آآآه يارولا تعالي شوفي وش صار لاخوك ,,, بكيت اكثر وصورة خالد ترجع لذاكرتي مرة ومرتين وثلاث
صالح = خالد ان شاء الله انه بخير ومثل ماقال ماجد الاصابة الحمد الله ماهي خطيرة ,,, بس فهمنا الحين وش الي صار
كنت ابكي بصمت ومارد على احد لين ملوا مني وسكتوا ,,, مرت نص ساعة وخالد ماطلع ,,, واصروا علي الشباب اعالج الجرح الي بيدي والكدمات الي بوجهي ورجعت احتري خالد يطلع
= السلام عليكم
رفعت راسي للي سلم وكان الضابط ومعه عسكري
الجميع = وعليكم السلام
الضابط = جائنا بلاغ قبل شوي عن اعتداء وشروع بالقتل
وعلمتهم بالسالفة كلها وانهم كانوا يدورون عليه من اكثر من اسبوعين وان هذا مو اول اعتداء عليه ,,, احرقوه قبل هالمرة
الضابط = طيب تعرف اسمائهم
انا = ماعرف اسمائهم بالكامل
الضابط = استدعوا ابوه يمكن يفيدنا
صالح = ابوه مسافر
الضابط = طيب اخوه
صالح = ماله اخو
الضابط = طيب أي احد قريبه المهم يعرف يفيدنا
صالح = انا قريبه
ابراهيم بعصبية = الحين صرت قريبه ,,, اسكت بس اسكت
اتصل ابراهيم باخوه فايز وطلب منه يجيب ابو عبد الله للمستشفى
ابراهيم = الحين يجي خاله اكيد يعرف اسمائهم
وبعد مدة من الانتظار طلع خالد من غرفة العمليات لكن ماسمح لنا الدكتور بزيارته الا بعد ساعة على الاقل
جا ابو عبد الله مفزوع لما عرف الي صار بخالد
حاولوا الجماعة يهدونه لكن مافيه فايدة وخاصة لما شاف ثوب ماجد الملطخ بدم خالد انهار وصار مثل المجنون يبي يشوف ولده
مسكين ماجد شاتوه الشباب برا المستشفى عشان يروح يغير ,,, وجا بعد ربع ساعة
حاول الضابط يحق مع ابو عبد الله لكن ابو عبد الله منهار ولا اخذ منه لا حق ولا باطل
طلبنا مرة ثانية من الدكتور يسمح لنا نشوفه واخيرا وافق ,,, ودخلنا عليه
كان خالد نايم او مغمى عليه مدري بالضبط المهم انه موب حاس فينا ,,, راح عنده ابو عبدالله ملهوف ,,, وصار يقبل وجه خالد وهو يبكي ,,,, يقبله بكل مكان ماترك بوجه خالد مكان الا وقبله ,,, خده جبهته خشمه رقبته وطوّل على هالحال
جابله فايز كرسي بجنب السرير عشان يجلس وبعد ماحاولنا فيه يهدا ,,, جلس ابو عبد الله وهو يتحسب ويتحوقل ويبكي
الضابط = الحمد الله على سلامة ولدك ياخال
مارد عليه ابو عبدالله مازال يتحسب ويتحوقل وهو يتأمل خالد
التفت الضابط للدكتور عشان يشرح له نوع الاصابات وكان الدكتور سعودي
كشف الحاف عن خالد ,,, وشفنا لزقة كبيرة تغطي من نص صدر خالد الى جنبه الايسر بالعرض ,,, ولزقة صغيرة نوعا ما على مكان الحرق بطنه وعضده الايسر ملفوف بشاش ,, هذا غير وجهه المليان كدمات وخدوش
الدكتور = تعرض لطعنة باليد اليسرى ,,, ( وأشر على صدر خالد ) والاصابة هنا بلغية بعض الشئ تعرض لقطع وريد وخطنا مكان الاصابة والمريض يحتاج لاسبوع كامل على الاقل لراحة تامة وعدم الجلوس ( واشر على بطنه ) اما الاصابة هنا تعرض لحرق بسجارة نظفنا الجرح عن التبغ وعالجناه وان شاء الله يكون بخير ,,, بالاضافة الى الضرب المبرح الي تعرض له
الضابط = واضح من المعتدين انهم ينون تعذيبه دون قتله
الدكتور = هذا الي ظهر لي
ماتحمل ابو عبد الله وقام من كرسيه ورجع يقبل وجه خالد ورقبته وصدره ,,, وبحنان يملى الغرفة قبّل ابو عبد الله الزقة الكبيرة الموجودة بصدر خالد بحنان يحس فيه كل الموجودين
شهق ابراهيم متأثر والتفت له ولقيته على وشك يصيح ويحاول يحط نفسه عادي وبدا يكح متعمد عشان يغطي عن الشهقة الي طلعت منه غصب عنه
الضابط = الحمد الله على سلامته ,,, اتمنى تتعاون معنا ياخال ,,, تتهم احد ومن تتوقع .؟ اتمنى تتجاوب معنا
ابو عبد الله وهو يبكي = حسبي الله ونعم الوكيل فيهم ,,, ولدي بيروح من يدي وانا ماني قادر احميه
فايز = يحميه الله ياعم بس تع
وقاطعه
ابو عبد الله = تهاوش معهم مرتين بالرياض قبل هالمرة ,,, بس هم عيال ضباط نشتكي عليهم ويطلعون منها ,,, ولدي بيروح مني ( ومسح على الجهة السليمة من صدر خالد بحنان وكمل ) طلبت يكمل دراسته عندي بس وصلوله حسبي الله عليهم
الضابط = عطنا اسمائهم
وعطاهم الاسماء بالكامل الا اسم علي مايعرفه
انا = قالي خالد مرة ماهي اول مرة يقبضون عليهم ,,, لهم واسطات تطلعهم بسهولة
الضابط = الواسطات يأخ ماتمشي معي ,,, القانون قانون
انا = بس هم عيال ضباط
الضابط = ان شاء الله عيال امراء مايهمني
صالح = احلا ياقوي
عطى الضابط صالح نظرة خلت صالح يندس ورا فايز
فايز = طيب واذا انمسكوا بالرياض .؟
الضابط = البلاغ جا عندي هنا ,,, راح اعمل تعميم الآن وان شاء الله راح يقبض عليهم في منطقتنا اما اذا انقبض عليهم بالرياض فهذا خارج سيطرتي
صالح = يعني ماستفدنا شي يمكن يطلعون منها هالمرة ويتعرضون لخالد مرة ثانية
الضابط = نعم احتمال ,,, بهذي الحالة نحتاج يتعاون معنا خالد ونعمل كمين لهم حتى نتمكن من القبض عليهم هنا في منطقتنا بعيد عن واسطتهم المعتمدين عليها في الرياض ,,, وانا ان شاء الله ماراح اتهاون في معاقبتهم
ابو عبد الله بخوف = لا تبوني اخاطر بولدي ,,, لا لا اذا كان مافيكم خير تبعدون شرهم عن ولدي ,,, بخليه يكمل دراسته بمنطقة ثانية ول
الضابط = اهدأ رجاءا ياخال ,,, مافيها مخاطرة عليه ان شاء الله
الدكتور = اتمنى تكملون التحقيق برا ازعجكم المريض
ابو عبد الله بعصبية = ماني سامح لكم تستعملون ولدي كمين ,,, هذا وحيدي
حاولوا فيه يهدونه ويفهمونه انه مافيه خطر عليه ان شاء الله لكن مانفع رافض وبشدة الفكرة
الدكتور = ازعجكم المريض اطلعوا لو سمحتوا
اصر ابو عبد الله يرافق مع خالد لكن بعد محاولات من الجميع اقتنع يرجع لبيته
سلمت على خالد النايم وطلعنا ,,, وانا صورة خالد ترجعلي اكثر من مرة ,,, وبديت احس بالندم ,,, جبان انا جبان ,,, خذلته وهو بأمس الحاجة لي ,,, ماراح اسامح نفسي ,,,
رجعنا لسيارة ابراهيم وهناك شفنا آثار خالد ,,, المرتبة الورانية غرقانة بدمه وهذي فنيلته وهذي الشمغ الملطخة بالدم ,,, بكيت ,,, ليتني ماخذلتك ,,, كنت اتفرج عليك وساكت ,,, انا جبان جبان
رجعت للشقة وانا هلكان ومتنرفز من كل شي ,,, واحساسي بالندم كل شوي يزيد خاصة لما تذكرت يوم مرني خالد بعد دوامي وطلب نروح المكتبة وانا عيت وقلت لا مالي نفس وراح خالد للمقهى عشاني ,,, عشاني انا ,,, ليتني ماعيت ورحنا للمكتبة ياليت ,,, كان مالقونا بدر وراكان بالمقهى
سمعت تفحيط داخل الشقة ,,, التفت لمصدر الصوت وماكان تفحيط كانت شهقة خلود يوم شافت شكلي متبهذل
خلود بصدمة = وش هذا ,,, من سوا فيك كذا
اف مالي نفس اعيد الشرح يكفي الضابط حق معي لين كرهت نفسي
انا بضيق = هوشة بسيطة ,,, جوعان خلود حطيلي عشا
مسكت يدي يوم شافت الشاش الي يلفها
خلود = هذي هوشة بسيطة اجل لو هوشة قوية وش بتسون .؟
انا = عاد هوشة صارت وانتهت خلاص ,,, تراي تعبان مالي خلق لشي
خلود = ماخبرك راعي هوشات
انا بضيق = اف وصرت من الحين راعي هوشات عندك مانع
خلود مستغربة = طيب قلي شسالفة .؟ ليش متهاوش .؟ ومع من .؟
تذكرت خالد وصورته قدامي واستنجاده فيني
انا = مع شباب يبون خالد وتهاوشنا معهم ,,, ارتحتي الحين ,,, روحي حطيلي عشا تعبان وابي انام
سكت خلود شوي
خلود مستغرب = شباب يبون خالد ,, انت وش عليك .؟
انا بعصبية = يوه خلود ,,, قلتلك تعبان ومالي خلق لشي ,,, روحي عطيني أي شي ابلعه جوعان
مازالت تطالعني مستغربة
انا بضيق = شكلك راعية طويلة ,,, بروح اتسبح وابدل
مشيت عنها لكن وصلني صوتها معصبة
خلود بصراخ = خالد خالد خالد ,,, متى نفتك من خالد هذا ,,, اف اذانا ,,, وصلت حتى تتهاوش مع شباب ,,, ولا ,,, يبون خالد مايبونك انت ,,, وش عليك منهم ان شاء الله يذبحونه ,,, انت لا تتدخل فيهم
التفت لها معصب
انا بعصبية = خالد وش اذاك فيه .؟ ,,, هو ماهو على راسك ,,, هذا بدل ماتدعين له يطلع من المستشفى بالسلامة تقولين ان شاء الله يذبحونه ,,, وفارقي عن وجهي تراها واصلة معي
خلود بعصبية = ان شاء الله مايقوم ابد ,,, الله ياخذه ونفتك منه
سكت منصدم اعوذ بالله وش هالدعوة ,,, الرجال بحاجة لدعواتنا له بالسلامة وهي تدعي عليه الله ياخذه
توجهت لها معصب ومسكت شعرها
انا بعصبية = ان سمعتك تعيدينها مرة ثانية وريتك شي ماشفتيه بحايتك ياحمارة ,,, خالد وقف معي وقفة رجال والشقة الي انتي عايشة فيها هو الي دافع اجارها بالكامل هذا بدل ماتدعين له بالسلامة تدعين عليه
ودفعتها
خلود وهي تبكي = من يوم مامات ابوي ماعمرك مديت يدك علي ,,, والحين عشان خويك هذا تضربني
وراحت لغرفتها وسكرت على عمرها
جلست بتعب ومسكت راسي بين يدي ,,, اف ادري اني غلطان بس ماتحملت اسمع دعوتها عليه ,,, يكفي اني خاذله تقوم اختي بعد تدعي عليه