* 28 *
بعد صلاة العشا
رحت للحارة عشان اشوف خالد وش وضعه
وصلت هناك وشفت ابراهيم وصالح ومعهم ماجد واقفين بال كالعادة وطاقينها سوالف ,,, رحت لهم وسلمت على ماجد
ابراهيم بابتسامة = هاه جاي لخالد ,,, صح .؟
التفت لابراهيم وهزيت راسي باية
ابراهيم = اجل حنا بعد نبي نروحله ,, ماندري وش فيه ,, ماطلع ابد من البيت حتى بالصلوات ماشفناه
استغربت بس سكت ولا علقت
صالح بقهر = اخ يالقهر عمتي عندنا بعد ماسافر عمي للرياض والحين خالد ماخذ راحته بالبيت
ابراهيم مستغرب = طيب واذا
صالح بقهر = اقولك ماخذ راحته بيت عمتي
ابراهيم = بيت عمتك يصير بيت خاله
ماجد = صالح مافهمت عليك ,,, طيب واذا خالد صار بالبيت لحاله يعني انت ماتقدر تدخل بيت عمتك ,,, وبعدين تراك مانت محتاج للبيت ياخي ,,, بيت ابوك هذا هو ,,, اما خالد اهله بديره وهو بديرة واكيد يحتاج للبيت
ابراهيم بطرف عينه = صويلح اشم ريحة نذاله
صالح = عمتي ماتاخذ راحتها بيتها ,,, واضطرت تجي عندنا عشان هالعلة ,,, المفروض هو الي يطلع لين يجي ابو عبد الله ,,, مو هو الي يقعد وهي الي تطلع
ماجد مستغرب = اكيد ,,, مايجوز يجلسون بمكان واحد ,, هو مو محرم لها وهي ماهي محرم له ,,, وابو عبد الله ماهو موجود
صالح = ياخذ شقه يذلف يدبر عمره ماعلينا منه
ماحد فاهم صالح كثري
انا بعصبية = عمتك اشتكت لك من خالد
صالح بضيق = لا ,, بس
انا بعصبية = خلاص اجل انطم واسكت ادري فيك تبي تنغص على خالد وبس ,,, ياخي كم مرة اقولك اتركه بحاله الي فيه كافيه
صالح بسخرية = وش الي فيه كافيه ,,, أكل ومرعى وقلة سنعه
هذا الكلام معه ضايع ,,, رحت متوجه لبيت ابو عبد الله وابراهيم وماجد معي ولحقنا النشبة صويلح ,,, ضربت الجرس وانتظرنا يفتح ولا فتح ,,, ضربت مرة ثانية وانتظرنا ولا فتح
انا مستغرب = وش فيه ليه مايفتح .؟
ماجد مستغرب = مدري اتصل فيه شف
صالح = اكيد ماخذ راحته بالبيت
ابراهيم بضيق = اسكت انت اسكت
طلعت جوالي واتصلت بخالد ولا رد ,,, اتصلت مرة ثانية ولا رد ,,, خفت وش فيه لايكون مغمى عليه
انا بخوف = مايرد
طلع ابراهيم جواله واتصل عليه اخذ شوي وبعدها جاه الرد
ابراهيم = الو ,,, هلا خالد
استغربت يرد على ابراهيم ولا يرد علي ,,, نزلت راسي بضيق ,, شكله ماخذ بخاطره مني بسبب التهمة والضرب الي اليوم هذا غير اني فتنت عليه عند ابو عبد الله ( تنهدت ) لا حول ولا قوة الا بالله ,,, والله ماعلمت ابو عبد الله الا عشانه
ابراهيم = وينك افتح الباب ,,, ايه انا الي اطق ,,, يله يله افتح ,,,, ليه وشفيك ,,, ( تنهد ) ماحنا مطولين ,, يله
وسكر الجوال
ماجد = ليه وش فيه .؟
ابراهيم = يقول تعبان .؟
شكلي لو ارجع احسن خالد ماراح يستقبلني اكيد ,,, بس لازم اشوفه واعتذر منه ,,, وبنفس الوقت مابي اعتذر قدام الشباب ,,, مابيهم يعرفون الي صار لانهم اكيد راح يتهمونه مثل ماتهمته انا
انتبهت للبا ينفتح ويطل خالد علينا
وجهه حزين والهالات واضحة اكثر واضح عليه التعب وصدره يرتفع وينزل كأنه يحس بكتمه وعيونه ناعسة ,,, وعليه ملابسه ماغيرها
اول ماشافني خالد طالعني شوي وبعدها لف عني والتفت للبقية
خالد بتعب = هلا ,,, حياكم
ابراهيم وماجد = الله يحيك
صالح بقهر = هيه انت ,,, المفروض انا اقولهم حياكم هذا بيت عمتي
كشر خالد بضيق من غثاثة صالح وفسح الطريق لنا عشان ندخل ,,, الصراحة ترددت ادخل والا لا ,,, بس لما شفتهم دخلوا دخلت ,, ودخلنا المجلس وجلسنا
ماجد = خالد وش فيك شكلك تعبان مرة
ابراهيم = تبينا نوديك المستشفى .؟
خالد بتعب = مايحتاج
صالح = هذا دايم تعبان اصلا ,,, ودي مرة بس يقول ماني تعبان
التفت خالد لصالح وطالعه شوي وبعدها نزل راسه بحزن
ابراهيم = خالد ماعليك منه ,,, دخل الكلام من هنا وطلعه من هنا
ماجد = ابو خلّود ماع
وسكت منصدم من حركة خالد وانصدمنا حنا بعد
يمسح دموعه بيده وهو منزل راسه بشكل محزن
انا بصدمه = خالد
قام ماجد وجلس بجنبه
ماجد بصدمة = خالد وشفيك ,, لا يأثر عليك كلام هالخبل
يمسح دموعه ويشاهق ويحاول مايبكي اكثر
خالد بصوت باكي = صالح معه حق ,, انا مريض ( وحط راسه بحضن ماجد بشكل يائس) انا مريض ,,, مريض
انصدم ماجد اكثر ورفع راسه وهو متأثر من حركة خالد ,,, التفت ابراهيم لصالح واشر على رقبته ,, يعني حسابك بعدين ,,, صالح لف وجهه عنا وسكت ,,, التفت لخالد مرة ثانية وهو الى الحين حاط راسه بحظن ماجد ويبكي بصمت ,,, وش فيه صاير يائس كذا اذا كان عن مشكلة الاستراحة فمشكلتها محلولة ان شاء الله ,,, خالد صاير دايم حزين دايم تعبان ايه صالح ماكذب خالد دايم تعبان ,, ودي اعرف وش المرض الي فيه ,,, ابو عبد الله يقول عنده صداع مزمن وخالد مرة قالي وحنا بمكة مرضه مرض صداع عادي ,,,
( نزلت راسي ) صح ,, اسماء ادوية خالد مسجلها عندي بالجوال عشان اسأل بس انشغلت ولا سألت
اخذ خالد شوي وبعدها رفع راسه عن حضن ماجد منحرج منا
خالد بحزن = آسف ياشباب ,, بس ,,, ( وسكت )
ماجد = ماعليك خالد
ابراهيم = كل داء وله دواء ,,, وانت الحمد الله مستمر بعلاجك وان شاء الله تتشافى من هالصداع الي دايم يجيك
منزل راسه وساكت
صالح = خالد والله ماكنت اقصد ,,, انت تعرفني احب اتهاوش مع أي احد ومعك انت بالذات ,,, من يوم ماعتدوا عليك الشباب وانا ساكت عنك عشان العملية الي فيك بس والا انا احتريك تطيب عشان نتهاوش ,,, والله اني اشتقت لهاوشنا ودي انك تتشافى ونرجع نتهاوش زي قبل
طيرت عيوني بصالح ,,, وش صاير بالدنيا ,, صالح بشحمه ولحمه يعتذر من خالد
ماجد مستغرب = احلى يعرف يتأسف
ابراهيم بضيق = امحق تأسف ,, وش قال قال ودي تتشافى ونرجع نتهاوش
ابتسمت صالح طيب وشري بنفس الوقت ,,, التفت لخالد ولقيته سرحان ( تنهدت بحيرة ) كله سرحان ويفكر ودايم مهموم,, ودي اعرف وش يفكر فيه ,, بمصيبة الاستراحة والا بوينلي والا بكلام صالح والا بأيش بالضبط
اخذنا شوي عنده وبعدها قمنا
ابراهيم = يله نستاذن ابو خلّود ,,, بكرة مدارس
ماجد بضيق = اف ياحياة الشقا
طلعنا للحوش وخالد معنا وانا امشي وراهم احتري الشباب يطلعون ,, ودي اكلم خالد لحالنا
لما شفت الشباب طلعوا لل وانا اوقف عند الباب والتفت لخالد
انا = خالد ادري انك ماخذ بخاطرك مني ,, انا آسف والله ,,, ادري اني تصرعت وظلمتك
رفع خالد راسه وطالعني
خالد بحزن = ظلمتني وماخليت لي فرصة ادافع عن نفسي
قربت منه وسلمت على راسه محاولة اعتذار
انا بحرج = خالد والله الصور اول ماشفتها طيرت عقلي ,, آسف ,, سامحني ياغالي والله اني آسف
خالد بضيق = عطني مفتاح سيارتي
انا مستغرب = ليش .؟
خالد = وش الي ليش ,, سيارتي
انا = ادري ,, بس اقصد وين بتروح .؟
خالد = مالك دخل فيني ,,, اروح وين ماروح
انا بتنهيدة = حقك
وطلعت المفتاح وعطيته اياه
خالد بتنهيدة = ليش كذبت على خالي وقلت اني بروح لبدر
انا = وانا ماكذبت ,, انت فعلا بتروح لبدر
خالد = انا قلت ابروح للاسترحة ماقلت ابروح لبدر
انا = وبدر وينه ,, انت بنفسك قلت انهم ياخذون راحتهم باستراحتك
خالد بعصبية = جاني خالي العصر وهاوشني وحلف علي اني ماودي اهلي للرياض ,, كله منك
مديت يدي ومسكت يده اليسرى بترجي
انا = لا تعصب ,, انا والله ماعلمت خالك الا لمصلحتك ,, مشكلة الاستراحة لازم بكرة نلقى لها حل ,, بكرة لازم نروح للضابط ,, على فكرة هو وش اسمه .؟
طير خالد عيونه فيني
خالد بصدمة = بتبلغ علي ياخالد .؟
قطبت حواجبي مستغرب
انا = ابلغ عليك .؟
خالد بخوف = ليش تبي تروح للضابط .؟ تبي تعلمه عن الاستراحة والي فيها .؟
انا = لا ,,, نبي نستعجله ويعلمك وشلون تسوي الكمين لبدر والي معه ,, هم كانوا ساكتين لين تتشافى والحين مافيه فرصة نأجل الموضوع اكثر
خالد = انا ماني فاضي لبدر الحين
انا = مو تبي تروح للاسترحة .؟
خالد = الا
انا = خلاص اجل ,,, لازم تفتك من بدر اول عشان تقدر تدخل الاستراحة
خالد = ياسلام استراحتي هذي ,,, ادخلها بأي وقت ماعلي من بدر وغيره
رفعت يدي وحطيتها على راسه
انا = هالراس وشلون يفكر .؟
نزل خالد يدي بضيق
خالد = ماني فاضي لبدر الحين ,, ناصر معه الصور واخاف يبلغ علي ,,, من العصر اتصل بناصر ولا يرد
استغربت وليه مايرد عليه ان شاء الله ,, لا يكون بيسويها فعلا ,,, الله يستر
انا بخوف = خالد لازم نستعجل وتسوي الكمين باسرع وقت ,, خالد افهم علي الله يخليك ,, انت لازم اول تتخلص من بدر وربعه عشان مايتعرضون لك مرة ثانية وتقدر تدخل استراحتك ,,, قسم بالله ماراح يرحمونك ان شافوك
سكت خالد ولا رد علي
انا = وش اسمه الضابط ,, بكرة لازم نروح له
خالد = أي ضابط .؟
زفرت بضيق وش فيه هذا مخه مقفل اليوم
انا بملل = الضابط الي كان متابع قضيتك وانت بالمستشفى
خالد = ابو سامي
انا = اها ( ونزلت نظري اشوف عضده ) وشلون يدك الحين .؟
خالد = مالك دخل
اخذت نفس احاول اهدي نفسي
انا = العصر طلبت مني اجيب شاش ونسيت ,,, لفيت يدك بشاش نظيف والا بعده على قطعه الشماغ
خالد = لا
طيرت عيوني فيه
انا = وش الي لا ,, لا تقول قطعة الشماغ ملفوفة بيدك الى الحين
خالد = ماني فاضي اغيرها
انا = من الظهر الى الحين .؟ صاحي انت ,,, الشماغ ماهو مثل الشاش ياغبي
خالد بملل = خالد والله اني تعبان مالي حيل اوقف عند الباب اكثر ,, ممكن تطلع .؟
رفعت حواجبي مستغرب مالك حيل حتى توقف ,, لازم اروح للصيدلة واسأل عن ادوية خالد ,, الفضول بيذبحني ,, ومنها اجيب لهالغبي شاش
انا = بطلع ,,, بس لا تنام بمر الحين الصيدلية واجيبلك شاش الف يدك المعفنه
خالد = انت المعفن
طلعت من البيت وتفاجأت بالشباب واقفين يحتروني
ابراهيم = تعال خالد تعال
جيتهم مستغرب وقفت عندهم
انا مستغرب = هلا
ماجد = خالد انت اقرب واحد لخالد واكيد تعرف وش عنده
ابراهيم = اول شي قل لنا تصالحتوا .؟
انا = قلتلك خالد عزيز وغالي علي لا يمكن ازعل منه
ابراهيم = لا بس استغربت قبل شوي رد علي بالجوال ولا رد عليك ,, قلت يمكن الى الحين متزاعلين
ابراهيم مايفوته شي ماشاء الله عليه
ماجد = خالد وش المرض الي عنده ,,, هالخبل اسأله ويقول مدري ,, كنه مو قريبه ( وأشر على صالح )
صالح = وانا وش يدريني ,,, يقول عندي صداع وعمي ابوعبد الله يقول عنده صداع بسبب الحادث الي صارله قبل سنه
ابراهيم = ليش ماترد
التفت لابراهيم وانا بالي ماهو معي
انا = وانا بعد مدري
ابراهيم = علينا
انا = والله يابراهيم اني مدري سألته مرة وقال نفس مايقول دايم ,,, عندي صداع
ابراهيم بتفكير = انا غير أسأل واشوف ,,, بس وشلون أسأل مدري ( والتفت لصالح ) تعرف اسم الطبيب الي يتعالج عنده او المستشفى او أي شي نسأله
صالح = وانا وش يدريني
ماجد بعصبية = انت وش تعرف بالله قلّي وش تعرف ,,, لا بالمدرسة فالح وتعرف شي ,, ولا عن اهلك تعرف شي ,,, قلّي وش تعرف هاه قل
رفع صالح يده لماجد بتهديد
صالح بعصبية = بتسكت انت والا الفعك الحين
ابراهيم بملل = هدوا العب شباب
انا بملل = انا مشغول الحين ,, مع السلامة
ورحت عنهم رايح للصيدلة مشي ,, بعدها مشوار ربع ساعة عن الحارة مشي
وصلت الصيدلية وشريت شاش وبعدها طلعت جوالي وفتحت على اسماء الادوية الي كاتبها بالملاحظات ومديتها على الصيدلي
انا = معليش يالطيب ودي اعرف هالادوية تصرف لأيش
استغرب الصيدلي الي كان مصري واخذ الجوال يقرا الاسماء وبعدها رفع راسه لي
الصيدلي = الادوية ليك .؟
انا = لا
الصيدلي = لمين .؟ وعمرو كام .؟
اخاف اقول لصديقي ويقول هذي خصوصيات واخاف اقول لاخوي ويسألني اسأله خاصة ماعرفها عن خالد ويكتشف بعدها هالصيدلي اني اكذب
انا بتردد = مو ,,, مو لحد
الصيدلي = وبتسأل ليه .؟
انا = آآآ ,, لا بس كذا ,, انا وشسمه ,,, ايه ,, انا بسنة اولى جامعة وابي اتثقف بس
ابتسم الصيدلي
الصيدلي = آآه يعني انته بسنة اولى صيدله او تمريض او ايه بال**ط
والله البلشة يعني لازم التحقيق ,,,
انا = باقي ماشسمه ,,, أأأ ( وسكت مدري وش اقول )
الصيدلي = بتئول ايه .؟
انا = بسنة اولى صيدله
الصيدلي بابتسامة = ماشاء الله تبارك الله ,,, حازر يابني
وراح شوي وجا معه مجموعة ادوية ,, لايكون صدق اني ابتثقف
الصيدلي = انا بئولك هوا الصراحة بعض الادوية الي بتسأل عنها مش عندي دلوئدي الصراحة ,,, بص ,, ده مهدئ ,, وده كمان مهدئ بس ده ائوى مفعول من ده وهوا مايستخدمش الا عند الزوم ولو تبص على تركي
انا بملل = اختصر يرحم والديك ,,, ابي اعرف الادوية لأي مرض وبس وكثر الله خيرك
الصيدلي = يابني لازم تعرف تركيبات ده وفرئو عن ده ,,, انته بالمستئبل ب
انا بملل = ادري ادري ,,, بس اختصر ,,, فهمنا ثنين منهم مهدئ ,,, الباقيات لأيش .؟
الصيدلي = أمرك عجيب يابني ,, حازر حئولك ,,, ثنين مهدئ ,, واحد حبوب منومة ,, واح
انا بصدمة = وش ,, حبوب منومة .؟
الصيدلي = آه حبوب منومة تصرف لبعض المرضى النفسين مش كلهم يعني
انا = بس هو مافيه مرض نفسي
الصيدلي = ايه .؟ ,,, من هوا الي مافيه مرض نفسي
انا مرتبك = آآآ ,, معليش كمل ,,, ثنين مهدئ واحد حبوب منومة طيب والباقي .؟
الصيدلي مستغرب = فيك ايه اتخديت كزا ليه .؟
انا = لا ولا شي ,, ماكملت الباقي لأيش .؟
اخذ الصيدلي الجوال وأخذ يأشر على كل اسم
الصيدلي = ده وده مهدئات بس بيختلفوا من ناحية التركيب والمفعول والاستخدام وغيرو ,,, وده حبوب منومة ,, وده علاج مايصرفش الا يعني بعيد الشر بعيد الشر عني وعنك وعن جميع المسلمين مايصرفش الا لمرضى السرطان وده ع
شهقت وطيرت عيوني فيه ,, واقل من الثانية تجمعت الدموع بعيوني لا شعوريا
انا بألم = وش ,, س
ونزلت دموعي غصب
انصدم الصيدلي
الصيدلي منصدم = ايه مالك ,, فيه ايه .؟
انا بصوت باكي = من متى ,,, وشلون صار و من متى .؟ ماحد قال لنا ,,, دايم اسأله يقول عندي صداع ,, بس ماعمره قال عندي سرطان ,,, انت مانت متأكد صح .؟ من متى قلّي .؟
الصيدلي مستغرب = ايه هوا الي من امتى ,,, فيك ايه
انا = سرطان ( وبكيت غصب عني )
الصيدلي = بتبكي .؟ ايه مالك يابني ,, آه ده علاج للسرطان معئول انته حساس كدا ,, ئول ربنا يشفيهم ,, انته الصراحة ماتصلحش تدخل لا صيدلة ولا تمريض ولاحاجة ,,, انته رئيئ بشكل
اخذت الجوال ولفيت عنه
الصيدلي = ايه مالك ,, مش عاوز تكمل والا ايه
طلعت من الصيدليه و انا اسحب رجليني سحب
آآآآه ياخالد
آآآه ياغالي
توني افهم الحزن الي اشوفه بعيونه ,, توني افهم مدى التعب الي يحس فيه
( المرض هد حيلي وماترك لي قوة )
جلست على الرصيف يوم تذكرت كلمته ,,, توني افهم معناها ,, المرض هد حيلك ياغالي ,,, من متى قلّي ,,, وليش ماعلمتنا ,,, ابو عبد الله ماعمره جاب سيرة السرطان بلسانه معقول مايدري ,,, او المرض جديد معك ومايمدي احد يدري
( حطيت يديني على راسي ) لا مو معقول ,, طيب سرطان وين بالضبط
( رفعت راسي بخوف ) لا يكون الصداع الي يعاني منه هو السرطان ,, اعوذ بالله معقول السرطان براسه ,,, ( بكيت بألم ) يعني المرض مو جديد عنده طيب من متى .؟
ابو عبد الله وصالح يقولون جاه الصداع من الحادث الي صار له قبل سنة ,,, معقول المرض معاه من سنة وساكت
معقول ياخالد كاتم هالخبر بصدرك من سنة ولا علمت احد حتى خالك ,,, او هو جديد وانت بنفسك ماعرفت عنه
انتبهت على جوالي يرن وطلعته من جيبي وانا مالي نفس لشي
( البيت يتصل بك ) اف اكيد خلود
انا بهمس = هلا
خلود = خالد وينك ,, ترا بنتعشى عنك ,,, من الصلاة ماجيت ,, وينك .؟
انا = تعشوا لا تحتروني
سكت خلود شوي
خلود = خالد وش فيه صوتك
بغيت ابكي اكثر يوم سألتني ,,, اخذت نفس اهدي نفسي
انا = مافيني شي
وسكرت بوجهها
( المرض هد حيلي وماترك لي قوة )
( حطيت يديني على راسي ) مابي اتذكرها مابي ,, كل شوي ترجع كلمته بالي
هالصيدلي مايدري ,, ايه اكيد مايدري ,, لا خالد ولا ابو عبد الله ولا حتى صالح جابوا كلمة سرطان بلسانهم
بس وشلون ,,, يقول واحد من الادوية تصرف لمرضى السرطان ,,, معقول دكتور يصرف لخالد علاج مو له
قمت وطاح الشاش بالارض ,,, اف مالي نفس اروح لخالد الحين ,,, مابي اشوفه
اخذت الشاش ورحت مرغم لبيت ابوعبد الله ,,, اكيد يحتريني الحين عشان هالشاش ,,, ليتني مارحت للصيدل ليتني بقيت على عماي
ضربت الباب وطلع لي خالد
مديت الشاش له بصمت
خالد = مابتلفه لي ,, ماعرف لحالي
انا بهمس = هاه ,,, ايه
خالد مستغرب = وشفيك خالد ,, عيونك حمر .؟
سكت عنه ولا رديت
فسح خالد الطريق لي عشان ادخل
ودخلني غرفته بالملحق ,,, نزل خالد بلوزته وجلس على السرير وانا الى الحين واقف
وين السرطان بالضبط ومن متى ,,, وليه ماعلم احد ,, معقول ابو عبد الله يدري ,,, بس خاله ماعمره جاب سي
خالد = خالد وش فيك واقف ,,, يله تعال ,,, ابي انوم بكرة مدرسة
جلست بجنبه على السرير بصمت وفكيت قطعة الشماغ الي لفيتها له اليوم الظهر ,, كانت مليانه دم وبصعوبة فكيتها
انا بهمس = تبيني اوديك المستشفى ,,, انفتك كم غرزة ولازم يرجعون يخطونها
خالد = ومن الي فكها غيرك ,, يقالك خايف علي الحين يالجحش
نزلت راسي واخذت الشاش الي بحظني وبديت افك القرطاس عنه بصمت
خالد = خالد وش فيك .؟
رفعت راسي وبديت الف عضده بصمت
خالد = مارديت علي
انا = ارد عليك وش اقول
خالد = قلتلك ياجحش بالعادة ترد علي ياثور
انا = زعلان لاني ماقلت لك ياثور ,,, شكله صالح اعداك
خالد = متى تبينا نروح لابو سامي ,,, الصباح انا ماقدر عندي مدرسة وضروري اروح ماقدر اغيب اكثر
انا = من ابو سامي .؟
خالد = وش فيك نسيت ,, الضابط
انا بضيق = صدق انك فاضي
طير خالد عيوني فيني مستغرب
خالد = الحين انا الي فاضي والا انت ,,, من الي قبل شوي يقول لازم نروح لابو سامي عشان الكمين ومادري ايش ,,, والا انا مابي اروح للضابط ولا غيره ودي اروح للاسترحة باسرع وقت واطلّع هالبلاوي الي فيها ,,, بس انت علمت خالي علي وخليته يمنعني
انا = ايه لاني مابيك تروح للاسترحة الحين وبدر فيها
خالد = ايه بتجنني انت ,,, توك تقول صدق انك فاضي
انا بضيق = اوه خالد كلمة قلتها وانا متضايق وخلاص
خالد = طيب متى تبينا نروح .؟
انا بضيق = العصر يعني متى ,,, الصباح مدارس
انتهيت من لف عضده وطالعت صدره بمكان الخياطة ,,, الحمد الله مافيه ولا غرزة انفكت
انا = وشلونه صدرك .؟
حط خالد يده على صدره يلمس الخياطة
خالد = تعورني شوي ,,, وخاصة اذا اخذت نفس تنشد اكثر وتعورني
انا = طيب وشلون بتسوق السيارة بكرة ويدك تع
خالد بضيق = اوه خالد ,,, الحمد الله ان خالي مو هنا والا كانت علوم ,,, اقدر اسوق عادي
انا بضيق = طول عمرك عنيد
انسدح خالد على السرير من دون مايلبس بلوزته
خالد = سكر باب ال اذا طلعت
قمت وطلعت للحوش ,,, انتبهت ان بيت ابو عبد الله كل لمباته طافيه ماعدا الملحق والحوش
رجعت لغرفة خالد اسأله
انا = خالد البيت مافيه الا انت .؟
التفت خالد لي مستغرب من رجوعي المفاجئ
خالد = شوفت عينك ,, خالي بالرياض وخالتي عند اخوها ابو محمد
انا = ومن سوا عشاك اليوم .؟
خالد = ماشتهي شي
انا = يعني ماتعشيت .؟
خالد = مابي ,, مالي نفس