جيت وجلست على سريره
انا بابتسامة = طيب بكرة غداك عندي
خالد = آآ ,,, لا مايحتاج مابي اكلف عليك
انا بابتسامة = لا كلافة ولا شي ,, بكرة تطلع من مدرستك على شقتي على طول
خالد = خالد والله مايحتاج ,,, امر أي مطعم صدقني مايحتاج والله
حطيت يدي على بطنه وانا ابتسم له بحنان
انا = نحتريك بكره على الغدا لا تتأخر
ابتسم خالد وهز راسه باية
قمت وطاحت عيني على الادوية المتنثرة على طاولته ورجع لي الالم ,,, دايم اشوف الادوية على طاولته وعادي عندي ,,, كنت على عماها ولا ادري وش فيه ,,, والحين كل ماشفت علاجاته تألمت
خالد = خالد وش فيك .؟
انا = هاه لا ولا شي ,,, مع السلامة
طلعت من البيت ورحت للشقة ولقيت اخواني يحتروني على العشا
وبصعوبة تهربت من اسألت خلود
انا = خلود بكرة زيدي في الغدا ,,, خالد بيتغدا عندنا بكرة
سكت ولا ردت علي
يوم السبت
ماكان لي نفس لشي ابد ومانمت الا ساعتين قبل الفجر ,,, طوال اليل وانا افكر بخالد وكل يوم ترجع لي كلمته ( المرض هد حيلي وماترك لي قوة )
حتى الشباب تهربت منهم ولا تمشيت معهم ولا كلمتهم
ياليت الصيدلي غلطان ,, ياليتني ماسألته اصلا
الظهر
جانا خالد للشقة بعد ما اتصل علي يتأكد انا موجود والا لا
وهالمرة عليه ثوب وشماغ بس ما اخفى التعب الواضح فيه
( تنهدت بألم ) الله يشفيك ياغالي
دخلته المجلس وانا اهلي وارحب فيه اشجعه ,, مدري وش فيه مستحي ,, مع انه ماهي اول مرة يدخل شقتي وكل شوي يقول مايحتاج تكلف على تفسك ومادري ايش
فرحوا فيه اخواني الصغار لما عرفوا انه بيتغدا عندنا
جلس سالم بجنبه وسأله
سالم = خالد رولين وينهي .؟
خالد بابتسامة = راحت للرياض
سالم = ليه .؟
خالد = هي تدرس هناك ,, هي بثالث اكبر منك بسنه
سلمى = وانا ابي ادرس
انا = لاحقه على الغثا
خالد = قل ان شاء الله
انا = ان شاء الله
بعد الغدا
جلسنا نشرب الشاي
خالد = اسمع خالد لا تعلم خالي اننا بنروح لابو سامي ,, تكفى
انا = من ابو سامي .؟
خالد بعصبية = ايه ابو سامي الضابط وش فيك دايم تنسى
انا = آآآ ,,, ايه صح نسيت ياخي ,, لا وش اعلم خالك ادري انه بيعي
خالد = مدري عنك ,, انت بكل شي تعلم خالي
انا بعصبية = ياخي انا ماعلمت خالك الا لمصلحتك لاني اعرفك عنيد ,, ومايعرف يجيب راسك الا خالك ,, فهمت والا افهمك
خالد = اف والله اني على اعصابي ابي اروح للاسترحة الحين ,,, والله اني خايف ياخالد خايف ,,, ناصر مايرد علي ,,, دايم اذا اتصلت عليه يرد علي بسرعة اما الحين لا
انا = وهذا مايرد عليك ليه ,,, لايكون بيبلغ .؟
زفر خالد بضيق وسكت
انا = ابتصل عليه الحين واشوف
وطلعت جوالي واتصلت على الزفت ,, شوي ورد
انا = الو
التفت خالد لي بسرعة وقام وجا عندي
ناصر = هلا ابو خلّود
انا = ناصر بالمختصر وش تبي .؟
سكت شوي
ناصر = عيادة الاستاذ خالد تركي وينقل كل شي باسمي
التفت لخالد بضيق
انا = طيب وليش ماترد عليه
ناصر = خالد تركي اعرفه ,,, لسانه طويل ولا يحشم احد
انا = وانت تعرف الحشيمة
ناصر بتهديد = وين تبيني اروح اول للهيئة والا للشرطة
انا = لا ناصر اصبر ,,, طيب لك الي تبي ( شوي ومادريت الا بكس على بطني ) آآآه ( والتفت لخالد الي عطاني بكس ونزلت الجوال عن اذني وكلمت خالد بعصبية ) وش فيك .؟
خالد بهمس = ليش تقولّه لك الي تبي .؟
انا بعصبية = اصبر ( ورفعت الجوال لاذني ) الو
ناصر = هو عندك اجل
سمعنا ,,, ضربت فخذ خالد بقهر على تسرعه وغبائه
انا = اسمع ناصر قلتلك لك الي تبي بس اصبر عليه شوي خالد يدرس وماهو فاضي نقل ملكية والخرابيط هذي والامتحانات ماباقي لها شي
ناصر = العب غيرها حبيبي ,, انا دكتور مايقدرون يضحكون علي بزارين توهم بالثانوي
مسكت اعصابي ولا رديت عليه ,,, شكله فعلا داهية ,,, انا ابيه يصبر لين نروح للاسترحة ونطلع البلاوي منها
انا = ماحد ضاحك عليك بس اصبر علينا شوي على الاقل ثلاث اسابيع على الاقل يعني ,,, امتحانات ومدارس وانت تعرف نقل الملكية ماتمر بيوم والا يومين ,,, اصبر
سكت ناصر شوي حسيته يفكر
ناصر = طيب نصبر ,, اسبوعين بس ,,, الاسبوع الثالث يجي للرياض ونتفق على كل شي ,,, انا ابعطيه حقه وبالمبلغ الي يبيه ,,, انا حقاني واعرف الحق
ايه واضح حقاني وبقوة
انا بضيق = مع السلامة
وسكرت عنه
فتح خالد فمه بيتكلم ,,, بس سبقته
انا = اص ولا كلمة ,,, كل الي قلته له تسليك ,,, لين نلقى حل
طالعني خالد شوي وبعدها قام
انا = وين رايح .؟
خالد = للبيت
مسكت ثوبه وجريته اجلسه غصب
انا = اجلس بس اجلس ,,, الصلاة ماباقي لها الا ساعة وبعدها بنروح لابو سامي ,, اقعد هنا
خالد = بس والله تعبان ابرتاح
التفت له وسألته بحذر
انا = ليه من وش تعبان.؟
خالد = توني جاي من المدرسة وابنوم ,,, وانت ماتبي تنوم بعد .؟
انا = اقولك ماباقي الا ساعة ,,, اذا نمت وقمت بعد ساعة بتعبني هالساعة ماتريحني ,,, وبعدين وشوله تروح للبيت ,,, البيت فاضي مافيه احد ,, تروح هناك وش تسوي
نزل خالد شماغه وقام وجا عند الكنب الكبير وتمد عليه
انا = الحين يذن لا تنوم ( وانتبهت لنفسي) اقصد لا تنام شفت اعديتني (وابتسمت)
ضحك خالد وهو يفك ازارير ثوبه
خالد بابتسامة = مابنوم
فجأة سمعنا صوت قدوم رسالة بجوال خالد
طلع خالد جواله من جيبه وبدا يقرا الرسالة
خالد = شف النذل
انا = وش .؟
خالد = ناصر يقول كم سومك على العيادة .؟
انا = رد عليه تسليك
خالد = لا والله ماني براد عليه ,,, وخله يسوي الي يسوي
انا = بيبلغ
خالد = انا ماسويت شي ,,, والي حط البراميل بالاستراحة اكيد ناصر
انا = يمكن ناصر ويمكن بدر ويمكن بعد عامل الاستراحة ماحد يدري ,,, بس كله بيطيح على راسك انت ,,, انت ماعندك دليل واحد تثبت براءتك اما ناصر عنده صور وفيديو تضيعك
سكت ولا رد
انا = رد عليه ياخي تسليك ,,, عطه امل انك خلاص بتبيعله العيادة عشان مايتهور ويبلغ عليك
اخذ خالد الجوال بضيق وقعد يكتب
انا = ماكلمت وينلي .؟
خالد = اوه ماني فاضيله الثاني ,,, خلني افتك من ناصر اول
انا = ناصر وينلي هدفهم واحد
خالد = اكيد بس توني ادري انهم طمعانين بالعيادة ( ونزل الجوال على بطنه )
انا = وش كتبت
اخذ خالد الجوال ورماه علي ومسكته
فتحت الرسايل المرسله
ولقيته مرسل هالغبي
( اسومها بعشرة مليون تبيها والا فارق )
رفعت راسي بصدمة
انا = بعشرة مليون
رد علي يكمل
خالد = تبيها والا فارق
ضحكت عليه
انا = والله انك خبل ,,, تعتقد بيشتريها بعشرة مليون صاحي انت ,, بيبلغ عليك على طول بس عشان يضغط عليك تنزل
خالد = العيادة تدخل ودخلها في الشهر ماتقل عن 200 الف ,,, العيادة مشهورة وبحي مشهور وفيها احدث الاجهزة وكل شهر يفتحون غرفة العمليات وتجرى اكثر من عمليتين او ثلاث عمليات بالشهر
انا بصدمة = مشاء الله تبارك الله 200 الف بالشهر ,,, خالد حرام تبيعها
تنهد خالد وسكت
انا = حسبي الله عليه عارف عنها كل شي ,,, عشان كذا خط ودبر ,,, اجل اكيد هو الي حط البراميل بالاستراحة ,, ماهو بدر ولا العامل
خالد بهمس = اكيد
انا = خالد ليه ماعمرك ذكرت ابوك ولو مرة ,,, خالد قل لابوك يمكن يلقالك حل
طالعني خالد شوي وبعدها غمض عيونه وتنهد وسكت وطول وهو ساكت
بالتالي سكت عنه بس فجأة رد
خالد = محتاجله ,,, ( وفتح عيونه وطالع السقف بحزن ) محتاج لحنانه ,,, محتاج لتوجيهاته ,,, ( ورفع يده اليمنى حسيته يتخيل ) ابيه يضمني ,,, ابي احس بوجوده ( وتغير صوته ) خالد والله اني تعبان محتاجله ,,, تعبت من الهم ,,, ابي اشكيله ,, ابي اقوله عن وينلي ,,, ابي اقوله عن ناصر ,,, ابي اعلمه عن بدر وراكان ابي ارتاح ( طالعني وعيونه تلمع ) تكفى قلّه خالد محتاجلك ,,, قلّه ابيه يضمني ولو مرة ,,, خالد انا محتاجله بس هو وينه ( وبكى ) وينه .؟ خالد والله اني تعبان ,,, تعبان ابي ارتاح ,,, خالد تكفى طلبتك ,,, ذكره فيني ,,, طلبتك خالد قلّ
بكيت غصب عني وقمت وجلست بالارض عنده ودخلت يديني تحت ظهره وضميته
انا بصوت باكي = بس خلاص اسكت لا تكمل
لف خالد يده اليمنى على ظهري ورصني ولأول مرة اسمعه يبكي بصوت مسموع
خالد وهو يبكي = مقهور مقهور ياخالد ,,, ماني قادر اتحمل اكثر ,,, متى يغمى علي متا ,,, ماحس بالراحة الا اذا اغمى علي ,,, خالد تك
رصيته اكثر
انا بصوت باكي = بس خلاص اسكت
سكت بس اسمع صوته وهو يبكي بألم
اخذت شوي ورفعت راسي عنه اطالعه وسلمت على راسه
انا = لو اخليك تنام احسن ,,, وبمرك بعد شوي اقومك ( وابتسم له بحنان )
هز خالد راسه باية وعلى طول غطى عيونه بذراعه عني
قمت وطلعت من المجلس ودخلت غرفتي ,, هذا وانا ماسألته عن المرض هو صحيح والا لا ,,, وشلون اسأله ,, الولد يائس كاره الدنيا ,,, تعب من كثر الهم والمشاكل
بعد صلاة العصر
رجعنا انا وخالد للشقة بعد ماصلينا بالمسجد ,, دخل خالد للمجلس وانا رحت لخلود
انا = خلود بطلع ,,, تبين شي اجيبه معي
خلود = نو ,,, بس لو تاخذ اخواني معك وخاصة معاذ تسوي خير ,,, بكرة علي امتحان انجليزي ومادري وشلون بذاكره اف
انا = سالم وسلمى اقدر ابعدهم عنك ,,, ارميهم بحارتنا يلعبون لين اجي واخذهم بس معاذ وين تبيني اوديه ,,, احسن حل نوميه
خلود بضيق = شبعان نوم
انا بمزح = اضربيه لين يبكي ,, واذا بكى اكيد بينام
خلود = هههههه حلوة ,,, اجل كل يوم بضربه
سكت ,, لو امي فيها خير لك ياخلود كان ماتخلت عنك وانتي بأمس الحاجة لها
ابتسمت يوم تذكرت ان فيه عامل مشترك بين خالد وخلود
خلود مستغربة = وش فيك تضحك .؟ ضحكنا معك
انا بابتسامة = تدرين ,,, اكتشفت شي مشتركين فيه انتي وخالد
خلود = خالد خويك .؟
انا = ايه
خلود مستغربة = وشي .؟
انا بابتسامة = خالد محتاج لابوه وابوه لاهي عنه ,,, وانتي محتاجة لامي وامي لاهيه عنك
سكت خلود ولا ردت
طلعت من عندها ورحت للمجلس ولقيت خالد جالس بالارض ويلاعب معاذ
انا = يله انت الثاني امش .؟
قام خالد
خالد = ليه من الاول .؟ ( وابتسم )
انتبهت لنفسي ,, اقصد بالاول خلود ,,, لفيت وجهي عنه ,,, ابتسامته هذي اكيد عرف اني اقصد اختي
انا = امش وانت ساكت
طلعنا من الشقة وتوجهنا لمركز الشرطة قاصدين ابو سامي
وصلنا عند مكتبه ودخلنا عليه وبعد السلام والتعريف
انا = يوم كان خالد بالمستشفى قلت مافيه حل الا الكمين ,,, وخالد مستعد الحين
التفت ابو سامي لخالد مستغرب
ابو سامي = تشافيت من العملية ,, مامر عليك الا اسبوعين
خالد = ايه تشافيت ,,, مستعد اسوي الي تبونه مني والحين
ابو سامي = معاك تقرير من المستشفى .؟
خالد مستغرب = وش تقريره ,,, وش دخل المستشفى
ابو سامي = نشوف راي الدكتور ان كان صحتك تسمح والا لا .؟
خالد مستغرب = ليه وش نوع الكمين
انا مستغرب = مو انت تقول خالد ماعليه الا انه يستدرج الشباب يجون للمنطقة هنا وانتم تقبضون عليهم
ابو سامي = صح بس على أي اساس نقبض عليهم ,,, لازم يكون فيه سبب
انا = سالخين الولد قدامك ,,, هذا مو سبب
خالد = وش سالخينه انت الثاني ,,, شايفني خروف عندك
التفت لخالد
انا = اسكت انت ( والتفت لابو سامي )
ابو سامي = سلخوه صح بس قب
خالد = ايه تراي بديت اشك اني خروف صدق
ابتسم ابو سامي وهو يمسك نفسه مايضحك يحافظ على هيبته
ابو سامي بابتسامة = نقصد اعتدوا ( والتفت لي ) هم اعتدوا عليه صح بس قبض عليهم لهذا السبب بالرياض,,, بس المعتدى عليه الي هو خالد ماتابع القضية ,,, لا هو الي تابعها ولا احد من اقاربه تابعها ,, صار هالشي والا لا .؟
خالد = مارحت لاني اعرف انهم عندهم واسطة بتطلعهم
ابو سامي = فاهم عليك ,,, بس انا اقصد قضية الاعتداء انتهت بتنازل المعتدى عليه الي هو انت
انا = خالد ماتنازل
ابو سامي = خالد ماتنازل ,, بس ماتابع قضيته وما طالب بحقه يعني كأنه متنازل ,, يحاكمون الطرف الثاني وهو مافيه طرف اول اصلا
التفت لخالد معصب
انا بعصبية = انت ليه مارحت لهم وقتها وطالبت بحقك منهم
خالد = لاني عارف اني بخسرها من البداية
انا بعصبية = انت مشكلتك هاليائس الي انت عايش فيه ( والتفت لابو سامي ) دبرنا تكفى ,,, الشباب داخلين استراحته بالقوة
شهق خالد بخوف ونادى باسمي بهمس
خالد بهمس = خالد
استغربت وش فيه خاف
انا مستغرب = وش .؟
التفت خالد لابو سامي
خالد بخوف = لا استراحتي مافيها شي ,, بس ابي افتك منهم ,,, استراحتي مافيها شي ابد
ابتسمت عرفت ليش خايف ,,, خاف ابو سامي يعرف عن الي بالاستراحه ,, الغبي نسى ان استراحته بالرياض وابو سامي هنا والرجال يبي يقبض عليهم هنا يعني ابو سامي ماهو مستخدم الاستراحة للقبض عليهم ابد ,,, ماله داعي هالخوف
ابو سامي مستغرب = عندك استراحة .؟
خالد بخوف = لا
انا = بالرياض ماهوب هنا
ابو سامي = وش الفايدة انا ابي اقبض عليهم هنا ,,, حنا نقدر نقبض عليهم بالرياض بس ماراح نستفيد شي بسبب واستطهم المعتمدين عليها هناك
تنهد خالد بارتياح ,, واشر لي بيده يعني اوريك
انا = وش بتسوي اجل .؟
ابو سامي = لكم عليهم قضية ثانية ومانتهت الى الحين ,, يعني مثلا سارقين سيارة منكم ,, او أي شي ثاني
انا = لا
التفت ابو سامي لخالد
ابو سامي = انا ودي انك تستدرجهم هنا وتخدعهم بكمين بسيط كسرقة سيارتك مثلا ونقبض عليهم
خالد = ايه اقدر استدرجهم ابشوف واحاول
انا = اصبر انت ( والتفت لابو سامي ) وشلون يعني مافهمت عليك وشلون كسرقة سيارتك مثلا ,,, وش نوع الكمين الي تبي خالد يسوي
ابو سامي = حنا عشان نقبض عليهم ,, لازم نورطهم بتهمة يإما بتهمة سرقة سيارته او بالاعتداء عليه مرة ثانية
انا مستغرب = وليه هذا كله ,, هو عليه يستدرجهم وانتوا اقبضوا عليهم ,,, ماهي صعبة
ابو سامي = ونقبض عليهم بتهمة أيش ,,, انهم دخلوا القصيم ,,, كل الناس يدخلون القصيم ماهي بتهمة هذي
انا = بتهمة الاعتداء عليه الي قبل اسبوعين ,, والا هذي ماتعتبرونها شي
ابو سامي = الي قبل اسبوعين انتهت ,,, قبض عليهم وطلعوا منها وانتهت بتنازل خالد
انا = خالد ماتنازل
ابو سامي = بس سكت عنهم ولا راجعهم ,,, يعني كأنه متنازل
انا = وش السوات اجل .؟
ابو سامي بضيق = اروح ارجع اعيد الكلام مرة ثانية
سكت افكر ,,, وشلون يعني يبي خالد يطيح معهم بهوشة ثانية والا وشلون
انا = وشلون يعني ,,, يتهاوش معهم مرة ثانية عشان تقبضون عليهم .؟
ابو سامي = او يسرقون سيارته مثلا
انا بسخرية = ياسلام ,,, تبيه يتصل على بدر ويقول تعال بالله اسرق سيارتي
والتفت لخالد معصب
انا بعصبية = ماتقول شي ,, ليه ساكت
خالد = وش تبيني اقول ,, انا مستعد لأي شي
انا بسخرية = اجل اتصل على بدر وقله تعال اسرق سيارتي ,, بيقبضون عليك الشرطة
ابو سامي = يأخ ممكن تهدى شوي ,, وشوله اسلوب الاستهزاء هذا
انا = مدري عنك ,,, قل كلام يدخل العقل
ابو سامي = خالد عنده حلين ,,, يإما يتعارك معهم ,,, او يدبر كمين يخليهم يسرقون سيارته ,,,, واذا تعارك معهم حنا بنراقبهم من البداية ونقبض عليهم على طول يعني مافيه خطر على خالد ان شاء الله ,,, بس المشكلة بالعم ابو عبد الله رافض الفكرة نهائي
خالد = ماعليك من خالي اصلا هو الحين بالرياض
انا = كلها يوم وبيجي ان شاء الله ويمديه بالطريق الحين مايمديك تسوي الكمين بدون علمه
ابو سامي = يوم كان خالد بالمستشفى جا عندي وكان معصب يقول شيل الفكرة من راسك ,,, حاولت افهمه بس للأسف الخوف مسيطر عليه
انا بهمس = مسكين اكيد بيخاف على خالد ,,, ماله عيال غيره
التفت ابو سامي لخالد
ابو سامي = انت خلاص تشافيت ,,, يعني تقدر مثلا لو اضطرينا انك تدخل معهم بهوشة ,, تقدر تواجهم
خالد = ايه اقدر ,, انا تشافيت خلاص ,,, ومستعد لأي شي
( المرض هد حيلي وماترك لي قوة ) كلمتك هذي ياخالد
ماقدرت تواجهني وانا واحد ,,, بتواجهم وهم اربعه
انا = لا ماتشافى ,,, وماهو مستعد
خالد بعصبية = خالد
سكت ابو سامي مستغرب من تصرفنا بس سكت يجارينا
ابو سامي = اجل لازم نلقى طريقة يسرقون سيارته هنا
وسكتنا
نزلت راسي افكر ,,, طيب ليه انا مادخل معهم بهوشة ,, ايه ليه لا ,, وهو يقول بيكونون مراقبينهم من البداية ,,, يعني بداية الهوشة بيتم القبض عليهم ,,, يعني مافيه خطر
رفعت راسي والتفت لابو سامي
انا = طيب انا بدخل معهم بهوشة واقبضوا عليهم
خالد = لا
ابو سامي = يعرفونك .؟ ,,, يعني بيجون للرياض بس عشان يتهاوشون معك
خالد بعصبية = انا صاحب المشكلة وانا الي احلها ,,, انت مالك دخل ,,, انت عندك اخوانك يحتاجونك
انا = مافيه خطر مثل ماقال ابو سامي
خالد بعصبية = قلت لا يعني لا
ابو سامي بملل = صح انت صاحب المشكلة واصلا الشباب يبونك انت حسب مافهمت من اسباب الاعتداء الاول عليك ,,, بس انت تشافيت تماما عشان تقدر تبدا
خالد = ايه تشافيت
انا = لا ماتشافى
خالد بعصبية = الا اقدر
انا بهدوء = لا مايقدر
ابو سامي بعصبية = بس انت واياه ,, ( والتفت لخالد ) ورني مكان العملية
خالد مستغرب = وش .؟ ليه .؟
ابو سامي = ابشوف الاصابة برت والا لا
خالد = برت ,,,, انا ابخص
ابو سامي = ورني اشوف
لف خالد وجهه عنه بضيق وسكت
ابو سامي = مو معقول طعنه تبرى خلال اسبوعين هذا غير الجرح العميق الي بصدرك
انا = والحل .؟
ابو سامي = يستدرجهم خالد يسرقون سيارته مثلا ,, اقول مثلا ,,, او فعلا مثل ماقلت تدخل انت معهم بهوشة اذا كنت انت متأكد انهم بيجون للرياض عشانك ,,, واكرر ترا مافيه خطر عليك ان شاء الله ,,, حنا بنراقب المكان وبداية الهوشة بنقبض عليهم
انا = خلاص اجل ,, حليناها
خالد بصراخ = لا مو خلاص ( وقام معصب ) انت مالك دخل ,,, بدر وراكان مشكلتي انا مو مشكلتك انت ,,, وانا اعرف ادبر نفسي معهم ( والتفت لابو سامي ) خلاص بتصل عليهم استدرجهم ,,, وارد لك خبر ( وطلع معصب )
التفت لابو سامي وسكت
ابو سامي = برت الاصابات الي فيه .؟
انا = لا
ابو سامي = العم ابو عبد الله ماهو راضي ,,, واخاف يصير لخالد شي ويشتكي
انا = خل خالد يستدرجهم ويصير خير ( وقمت )
ابو سامي = ليه ماتصبرون شوي
انا بتنهيدة = نبي نهي السالفة بس ,,, مع السلامة
رجعنا انا وخالد للحارة وطوال الطريق كل ماحاولت اكلمه يسكتني بالتالي سكت عنه
وصلنا بيت ابو عبد الله ودخلنا غرفة خالد وطاحت عيني على الادوية مرة ثانية
خالد = ابروح ابدل
واخذ بنطلون من الدولاب وراح للحما ,,, اخذت احد الادوية وجلست على السرير ,,, وشلون اسأله الحين ,,, وشلون ابدأ معه الكلام اصلا
شوي وطلع خالد وعليه بنطلونه الجيشي الي شراه من مكة وراح للدولاب مرة ثانية عشان ياخذ بلوزة ,,, وشلون اسأله الحين وشلون
انا = خالد
خالد = خلاص اسكت بدر وشلته مالك دخل فيهم انت
تنهدت بضيق
انا = مابي اكلمك عن موضوع بدر ,,, عندي موضوع ثاني ابي اكلمك فيه
التفت خالد لي مستغرب وسكت
انا بحزن = خالد وش المرض الي فيك ,,, تكفى ريحني
رفع خالد حواجبه بسخرية
خالد بسخرية = الحين هذا موضوع
انا = وش المرض الي معك
خالد = صداع عادي
انا = لا مو عادي ,,, لو عادي ,, ماكلت كل هالادوية عشانه
خالد بسخرية = صاير دكتور على غفلة ( ولبس بلوزته )
انا بحزن = لا يكون ( وتنهدت ) لا يكون السرطان
رفع خالد راسه لي وطير عيونه فيني وسكت
انا بحزن = ليه ماترد ,, السرطان .؟
يطالعني وساكت
انا = رد الله يخليك ,, قل لا
نزل خالد راسه
خالد = لا
انا = خالد أسألك جد انا
خالد = انت قلت قل لا وقلت لا
انا = خالد
جلس بجنبي على السرير وسكت
انا = رد علي
خالد = الحمد الله على كل حال ,,, بس وشلون عرفت
شهقت بصدمة وطيرت عيوني فيه وغصب عني تجمعت الدموع بعيوني
انا بصوت باكي = خالد وشلون ,,, من متى ,,, خالد قل كلام غير هذا
خالد بحزن = المرض تمكن مني خلاص ,,, لي سنة وانا اعاني منه ياخالد ,,, كل يوم واضعف اكثر ,, كل يوم ويزيد المرض علي اكثر ,,, العلاج الي تشوفه مجرد مسكنات وعلاج لايودي ولايجيب ,,, ونسبة نجاح العملية قليلة ,,, مالي علاج ( والتفت لي ودموعي على خدي ) لا تبكي ,,, بكيت انا على نفسي ايام وشهور ,,, ادع الله يشفيني بس ,,, يمكن دعواتك مستجابة ( ونزل راسه )
بصعوبة طلع صوتي
انا بصوت باكي = وامك وابو عبد الله .؟
خالد = ماحد يدري عني ,,, ماعلمت امي ولا علمت خالي ,,, من يوم الحادث جاني المرض بعده بشهر او شهرين ماذكر بالضبط بس تكتمت الخبر عنهم ,,, كل ماحاولت اعلمهم اتراجع ,,, اصلا وشوله اعلمهم
انا = وين .؟
أشر خالد على راسه
خالد بحزن = بالراس ,, والصداع كل يوم يزيد ,,, حتى نظري ضعف
سكتنا وانا ماني قادر اقول شي ,,, آآآه ياخالد من سنة
قمت بصمت وطلعت من البيت ورحت لشقتي
توني افهم سبب اليائس الي انت عايش فيه ياغالي ,,, توني افهم ليه ماتحملت كلمة صالح لك اليوم ,,, توني افهم