جا سعودي شكله راعي المحل الي بجنبنا
وبعد السلام
السعودي = والله يالحبيب قبل نص ساعة طاح السعودي راعي المحل هذا واتصلنا على الاسعاف وشاله
شهقت بصدمة
انا = وش ,,, تقصد خالد .؟
السعودي = والله ماعرف اسمه ,, المحل جديد ولا تعرفت عليه الى الحين ( ورفع نظره يقرا الوحة وبعدها التفت لي ) ايه اسمه خالد
انا بخوف = والعامل وينه .؟
السعودي = راح معه ,, وانا قفلت المحل ,,, ان شاء الله انه طيب ,,, انت تعرفه
طلعت جوالي واتصلت على خالد بس على طول سكرته ,,, صدق اني غبي اتصل فيه وهو مغمى عليه اكيد ماراح يرد ,,, التفت للرجال
انا = لأي مستشفى راحوا .؟
السعودي = مستشفى الملك فهد ,,, انت تعرف راعي المحل .؟
انا بخوف = خالد اخوي ( ومشيت مسرع بس الرجال مسكني قبل اتعداه )
السعودي = مدام انك اخوه ,,, خذ هذا مفتاح المحل ( وطلع المفتاح من جيبه ) والله يطمنكم عليه
انا = جزاك الله خير
وركبت السيارة مسرع وخلال نص ساعة وانا بالمستشفى ,,, سألت عنه
ورحت مسرع للدكتور المسؤول عنه
انا بخوف = دكتور طمني
الدكتور = انت اخوه .؟
اخاف اذا قلت لا ,, يقول عطني رقم قريبه مثل ماصار معي مع الدكتور الي بالرياض
انا = ايه انا اخوه
الدكتور = والله مدري وش اقولك ,,, اظن تعرف ان اخوك عنده ورم .؟
انا بحزن = ايه ادري ,,, بالراس
الدكتور = بالدماغ ,,, طيب ليش ساكتين ,,, المرض منتشر بجسمه ويوم عن يوم يزيد المرض عنده وانتم ساكتين ,,, ليش اخوك الى الحين مابدا بالكيماوي .؟
سكت ومارديت عليه
الدكتور = ليش اخوك الى الحين مابدا بالكيماوي .؟ المريض حالته خطيره بسبب الاهمال ,,, ممكن افهم ليش ماتعالجه .؟
مارديت عليه
الدكتور = هو الحين بالغيبوبة ودخلناه العناية قبل ربع ساعة بس حتى نتابع حالته
انا بحزن = طيب هو دايم يغمى عليه ماهي اول مرة ,,, ليش مكبر السالفة ومدخله العناية
رفع الدكتور حواجبي ممستغرب
الدكتور = انت اكيد اخوه .؟,,, ياخي انا اقولك المريض حالته خطيره تقول مكبر السالفة
وشلون الحين اخاف يطول بالعناية ومايطلع من المستشفى الا بعد بومين او اكثر ,,, وش اقول لابو عبدالله اذا سأل عنه ,,, لازم اشوف خالد لازم
انا = دكتور تكفى ابي اشوفه
الدكتور = مو الحين ,,, المريض يحتاج عمليه عاجلة ,, تعال معي لمكتبي ابيك توقع على الموافقة
انا بصدمة = وش عملية ,,, ليه .؟
الدكتور بملل = ياخي اخوك حالته خطيرة والمرض منتشر بجسمه والعملية عشان استأصال الورم من الجهاز الهضمي
انا بصدمة = وش دخل الجهاز الهضمي والورم براسه
الدكتور = هذا بداية الورم كان بالدماغ ,,, وبسبب الاهمال انتشر المرض بجسمه ,,, تعال معي وقع ,,, أي تأخر ماهو من صالح المريض
ومشى قدامي بس انا ظليت واقف بمكاني ,, التفت لي الدكتور يوم شافني ماتبعته وجا
الدكتور = شكل المريض انت ماهو اخوك ,,, يابن الناس اقولك تعال اخوك حالته خطره واي تأخر ماهو من صالحه
انا ماني اخوه واخاف اذا طلعت بطاقتي يكتشف الكذبه ,, هذا غير ان خالد يمكن يرفض العملية مثل ماهو رافض العلاج بالكيماوي
انا وشوي واصيح = طيب اصبر لين خالد يقوم
الدكتور مستغرب = ليش .؟
انا = دكتور تكفى خالد معي عن الكيماوي ويمكن يعي عن العملية بعد ,, اصبر لين خالد يصحى
الدكتور = بس
انا = تكفى ,,,
وقعدت اترجاه لين اقتنع ,,, بس هالدكتور ازفت من الدكتور الي بالرياض ,,, هذا عيا يخليني اشوف خالد ,,, ترجيته ونشبت بحلقه وماش عنيد
بالتالي رجعت للمحل بعد ماخذت العامل واخذت جوال خالد ومحفظته من الممرض
جوال خالد لازم يصير معي ,,, اخاف يتصل ابو عبدالله عليه ويرد احد الممرضين ويعرف
وصلت العامل للمحل ورجعت الشقة وانا متضايق ,,, صح خالد المفروض يروح بكرة لاهله بالرياض ,,, اكيد عندهم خبر ويحترونه ,,, ياربي وش اسوي
خالد يمكن يطول بالمستشفى ,,, اول راح يقعد بغيبوبة ومايصحى الى من بكرة ,,, وبعدها بيسوي عملية يعني ماراح يطلع من المستشفى الى بعد ثلاث ايام وش اقول لاهله
ربي سترك
وقفت السيارة ورا العمارة عشان اذا دوّر ابو عبدالله عن خالد مايشوف سيارته عندي ,,, ولقيت سالم بال ويلعب بالسيكل مع الي كبره ,,, هذا الي يبيه سالم ,,, كل يوم اشوفه يشوف اخوياه معاهم سياكل الا هو واليوم تحقت امنيته
دخلت الشقة وجلست مع اهلي شوي وانا متضايق ومالي نفس لشي حتى العشا ماتعشيت ,, والي زاد ضيقي ضيق امي فرحانه لفرح سالم وسلمى على هداياهم الي شروها اليوم وكل شوي تمدح في خالد وتشكره وتوني انتبه انه شاري لمعاذ هديه وماشفتها الا الحين
ماصبرت اجلس عندهم اكثر ورحت لغرفتي احاول انام مع ان الساعة توها 11
جتني امي لغرفتي يوم حست بضيقي بس ماعلمتها عن خالد اخاف تعلم ام عبدالله وام عبدالله تعلم ابو عبدالله ويعرف ,,, اف انا مادري ليش خالد مايعلم اهله ,,, صدق انه غبي
فجأة رن جوالي ,,, القيت نظره عليه ( ابراهيم يتصل بك )
انا بضيق = هلا ابراهيم
ابراهيم = هلا فيك ,,, وينكم ماهو اليوم المفروض تفتتحون محلكم ,,, رحت انا والشباب بعد صلاة العشا ومالقينا احد ,, حتى العامل ماهوب فيه
تلعثمت مدري وش اقول ,,, صح انا نسيت المحل المفروض اروح اقابل المحل خاصة ان الشباب كلهم عارفين ان اليوم افتتاحه
انا مرتبك = آآآآ ,,, بكرة بكرة ان شاء الله
ابراهيم = ليش غيرتوا رايكم .؟
انا = لا ,,, مافيه شي ,,, بس تونا انتبهنا ان فيه اشياء ناقصة ,,, وخلاص كملناها ,, بكرة ان شاء الله ,,, يله ابراهيم مع السلامة ,,, اشوفك بكرة
سكت ابراهيم
ابراهيم = على خير ,, مع السلامة
وسكرت عنه
حاولت انام وعجزت ,,, مدري ليش متضايق ,,, عملية واهله مايدرون عنه ,,, وشلون اتصرف ,,, اعلم ابو عبد الله والا وش اسوي
حطيت جوال خالد على الصامت
وبعد ساعة من التفكير والهواجيس نمت
الخميس ,,, الفجر
القيت نظرة على جوال خالد ,, ولقيت مكالمات لم يرد عليها 23 ,,, ترددت افتحها بس توكلت على الله وفتحتها ,,  9 من ( الغالي ) ابو عبدالله والباقي من ( هذا بيت عمتي )
استغربت وش الرقم هذا الي مخزنه خالد باسم ( هذا بيت عمتي )
فتحت الاسم عشان اشوف الرقم ,, وانفجرت بالضحك ههههههههه هذا رقم صالح مسكين خالد تعقد من صويلح لدرجة انه خزن رقمه بكلمة صويلح الي دايم يقولها له ( هذا بيت عمتي ) هههههههههه
تنهدت بحزن مافقده الا اهل بيته ,,, شي طبيعي جا الفجر وهو الى الحين ماجاهم
القيت نظرة على جوالي ولقيت مكالمات من ابو عبدالله وصالح ,,, اشوى اني ماسمعته ,,, ياربي وش ارد عليه اذا سألوني عنه
الله يعيني ,,,, اكيد بيجوني ويسألوني عنه ,,, وش اقول وش ارد عليهم ,,, اقول خالد بالعناية وبعدها يعرفون عن مرضه وخالد الخبل مايبي احد يعرف
الساعة 10
اخذت لموزين ورحت للمستشفى ,,, طبعا ماقدر استخدم سيارة خالد اخاف احد يشوفها معي ويسألني عنه
وصلت المستشفى وتضايقت اكثر لما قالوا لي انه الى الحين بالغيبوبة ,,, ولا قدرت اروح للدكتور اخاف اذا شافني يغصبني اوقع على العملية وانا مدري وش راي خالد ,,, والمشكلة خالد لازم يروح لاهله بالرياض او على الاقل يصيرعندهم خبر انه ماراح يجيهم
جلست بالمستشفى لين اذن الظهر وبعدها رجعت للشقة, وجوال خالد ماوقف عن الاهتزاز
كل شوي يهتز بجيبي ,,, ماقدرت اخليه بالشقة اخاف يشوفه سالم والا سلمى او امي ويعرفون انه جوال خالد معي
العصر
قررت افتتح المحل وكأن خالد موجود والله يعيني اذا جا صالح وسأل عنه
وطوال العصر والمغرب وانا على اعصابي ودي اروح لخالد واتطمن عليه بس اخاف الشباب يجون الحين ومايلقوني وبعدين عاد وش يفكني من اسألتهم
ياربي مدري خالد صحى والا بعده ,,, سوا عملية والا بعده ,,, ودي اروح واتطمن
العشا
فعلا جو الشباب ,,, ابراهيم وصالح وماجد وهالمرة معهم فيصل
ويوم شاف صالح ان خالد ماهو معي
صالح مستغرب = هذا وين راح حتى بالمحل ماهو موجود ( والتفت لي ) خالد ماشفت خالد ,,, من طلعته العصر امس ماشفناه
تلعثمت مدري وش اقول
ابراهيم = حنا توقعنا نشوفه هنا ,,, ابو عبدالله بلّش صالح يبيه يدوره ,, ماشفته .؟
انا مرتبك = آآآ ,, لا ماشفته ( والتفت لصالح ) خالد ماهو بزر ,,, متى مايبي يرجع البيت رجع ,, لا تخاف
صالح = ومن يفهّم عمي ابو عبدالله ( وكنه تذكر كلمتي وكمل بعصبية ) وبعدين من قالك اني خايف عليه
ابراهيم بضيق = خالد عليه طلعات ,,, تذكرون يوم يختفي ذيك المرة
ماجد = يمكن راح للرياض ,,, لاتنسون حنا بالعطله
صالح = لا ماهو بالرياض ,,, امه كل شوي تتصل على عمي وتسأل عنه ,,, ومايرد على اتصالاتنا
فيصل = شكل خويكم شايف نفسه
التفت لفيصل وسكت ,,, مدري ليه مايداني خالد ,,, خالد اصلا مايعرفه ولا عمره كلمه
اتصل علي ابو عبدالله وسأل عنه وقلت اني ماشفته ولا اعرف وينه ,,, حسيت اني نذل ,, واضح من صوت ابو عبدالله انه خايف عليه وانا الي مافي قلبي رحمة ماعلمته ,,, ياربي شسوي
ابراهيم = خالد اتصل على خالد يمكن يرد عليك ,, كذا فجأة اختفى
انا مرتبك = انتم وش فيكم ,, خلاص هو رجال واعرف بنفسه منا ,, يمكن مشغول والا شي ,,, متى مابغى يرجع رجع
ابراهيم = ايه بس ابو عبدالله بلش صالح ,,, الصراحة انا بعد اخاف يجيني ويبلشني ,,, اتصل شفه وينه يمكن يرد عليك
اتصلت بخالد مجاراه لهم ,,, شوي واهتز جوال خالد بجيبي
انا مرتبك = مايرد
صالح مستغرب = غريب ,, وين ذلف هذا
جلسوا الشباب شوي وراحوا ,,, اخذت شوي وبعدها اخذت لموزين راجع للشقة
القيت نظره على جوال خالد الي ماوقف عن الاهتزاز ابد
ولقيت مكالمات بالهبل لم يرد عليها ,, فتحتها
بعضها من الغالي ( ابو عبدالله ) وبعضها من ابراهيم وماجد وبعضها من هذا بيت عمتي ( صالح ) وبعضها من مامي ( ام خالد ) بس لفت نظري اسم غريب من بين المكالمات ( رنا )
استغربت من رنا هذي الي تتصل عليه ,,, اول ماتعرفت على خالد قالي انه تاب عن المغازل ,,, طيب هذي وش ,, يمكن اخته ,,, وابتسمت الا صح يمكن اخته
رولا ,, رولين ,,, رند الرضيعة ,,, وهذي بحرف الراء
وهو له اربع اخوات
وضحكت مستانس على اكتشافي الذكي والخطير وعلى ربطي بالاسماء مع الاسم الجديد
اهتز الجوال بيدي مرة ثاني
( مامي يتصل بك ) ,,, مسكينه امه ,,, ياترا وش بيصير فيها لو تعرف عن ولدها وعن مرضه
شهقت ,,, صح اليوم الخميس المفروض اليوم وهو عندهم حسب ماقالي خالد ,,, وانا اقول ليش اكثر الاتصالات اليوم من امه اكيد خافت عليه ,,, واكيد هي على نار الحين ,, تخاف صار فيه شي بالطريق
والله حرام علي ليش ماعلمهم ,, وهم الحين على اعصابهم والله اني نذل ,, الله يسامحك ياخالد ليش تسوي باهلك كذا
ماقدرت ازوره العصر,,, مادري هو صحى والا لا ,,, هو وافق على العملية والا لا ,,, والمشكلة الحين الوقت متأخر وممنوعة الزيارة
الجمعة
استغربت اتصالات فايز الملحة بجوال خالد ,,, غريب وش يبي فايز والغريب فيه رقم مخزن بجوال خالد باسم ( حماة الفضيلة ) ,, هذي اكيد الهيئة
وكلهم يتصلون عليه بشكل ملح ,, وانا المشكلة ماقدر ارد ,,, ودي اعرف وش فيه
العصر رحت للمستشفى وعلى طول دخلت على الدكتور ,, ابشوف خالد ابشوفه وابن امه يمنعني ,, ذيك المرة نشبت بحلقه وعيا ,,, الحين يانا ياهو
انا = بشوف خالد
الدكتور = تقدر تشوفه
ايه خاف
الدكتور = بس اجلس لازم نتكلم اول
انا = وافق خالد على العملية .؟ ( وجلست )
الدكتور = قبل تشوفه لازم اقولك على شي ,,, واتمنى تعذرنا لأن مالقينا حل الا كذا
خوفني كلامه
انا بخوف = وش
الدكتور = اضطرينا نقيد يدين اخوك
شهقت متفاجئ
انا = وش ,,, ليه وش شايفه قدامك مجنون تربطه
الدكتور = يابن الناس اسمعني خلني اعلمك باسبابنا
سكت احتريه يتكلم
الدكتور = خالد نفسيته دمار ,,, يائس كاره نفسه ,,, رفض العملية ورفض الكيماوي ,,, ماستجاب معنا بالعلاج ,,, نفسيته دمار دمار
نزلت راسي بيأس ,,, لا حول ولا قوة الا بالله
انا بحزن = طيب ماهو عذر تربطونه كنه كلب عندكم ,,, حرام عليكم
الدكتور = اربع مرات يشيل المغذي عنه ,,, نحطه له ويشيله ,,, وضرب احد الممرضات الفلبينيات ,,,, هذا غير انه حاول يهرب من المستشفى ,,, اسف اني اقول لك هالكلام عن اخوك بس وش نسوي اضطرينا نقيده والمشكلة امس ماحد زاره منكم حتى نعطيكم خبر
انا بحزن = امس الصبح زرته
الدكتور = الصباح امس كان بغيبوبة وماصحى الا العصر وعلى فكره ماجته حالته وصار يتصرف بالاسلوب هذا الا بعد ماستأذنته بالعملية ,,, فار وعصب وبعدها صار يتصرف تصرفات مجنونة
انا = خلني اشوفه تكفى
الدكتور = ان شاء الله ( وطلع ورقه من درج مكتبه ) بس اول ابيك توقع على العملية
انا مرتبك = هاه ,,, بس انت تقول خالد رافض
الدكتور = اخوك بنفسيته التعبانة هذي اكيد بيرفض ,,, خالد نفسيته دمار ويائس من الحياة كلها ,,, انت اخوه وتقدر تاخذ هالقرار ,,, لازم توقع ,,, اسمك لو سمحت ورقم بطاقتك
هذا الي خايف منه ,,, لا والمشكلة اسمي خالد بينهبل الدكتور اخوان واسمهم خالد
انا مرتبك = آآآآ ,,, طيب اصبر شوي خلني اشوف خالد واحاول اقنعه ( وقفت ) يله استاذن
الدكتور = اصبر ياخ
بس طلعت بسرعة وخليته ,,, سألت عن غرفته ودخلت عليه
لقيته متمد قدامي على السرير ومتلحف ,,, قربت منه ,,, نايم ولاف وجهه بالجهة الثانية وملامحه هادية واضح عليه التعب ,, طالعت يديه ( تنهدت ) فعلا مربطينه ,, يده اليمنى مربطه بحديدة السرير الايمن ويده اليسرى مربطه بحديدة السرير الايسر وعليها المغذي ,,, حرام عليهم شكله ضعيف ,,, شكله مايقدر حتى يشيل مخده ,,, ليش يربطونه
انحنيت عليه وسلمت على خده ,,, حس فيني خالد وفتح عيونه والتفت لي وطالعني شوي وهو ساكت
انا بابتسامة = الحمد الله على سلامتك ( وسلمت على خده الثاني )
خالد بعصبية = طلعني
بسم الله الرحمن الرحيم توني اقول شكله ضعيف
خالد بصراخ = طلعني مثل مادخلتني طلعني
انا بعصبية = كل تبن ماهو انا الي دخلتك
خالد = ماعلي ,,, طلعني طلعني
وقعد يحاول يحرر نفسه ويصارخ بصوت عالي ( طلعني )
حطيت يدي على فمه وقربت وجهي من وجهه
انا بعصبية = خالد وش فيك ,,, وشلون تبيهم يطلعونك وانت تتصرف كنك مجنون ( وابعدت يدي عن فمه )
خالد بتعب = طلعني تكفى خالد ,,, لازم اطلع ,,, انا مواعد اهلي اجيبهم الخميس ,,, تكفى خالد تكفى ,,, طلعني
حطيت يدي على راسه وابتسمت له
انا = طيب اليوم الجمعه ,, يوم واحد ماراح يضرهم
خالد = بس اكيد امي خايفه علي الحين ,,, وخالي بعد من يفكني منه
من ناحية امك وخالك الله يعينك ,,, حرقوا جوالك من الاتصالات
انا = اسمع ابو خلّود ,,, جوالك معي اضطريت اخذه ,,, وش رايك تكلمهم الحين ,,, ابو عبدالله قالب الدنيا عليك يدورك ,,, كلمه وكلم امك وطمنهم
خالد وهو يجاهد دمعته = غصب عني ,,, والله اني مواعد امي اجيبها الخميس بس والله غصب عني ,,, انا مريض مريض ماصلح لشي ( وبكى بصمت )
لا حول ولا قوة الا بالله
انحنيت عليه وضميته
انا = انت الغلطان ليش ماتعلمهم عن مرضك وتعالج ,,, الي تسويه بنفسك حرام
خالد بصوت باكي = خايف ,,, خالي متعلق فيني ,,, وامي بعد مابي اعلمهم ,,, مالهم غيري ,,, خلني اموت وهو مايدرون عني احسن ,,, ابي اموت
ضميته بقوة
انا = بس خالد
خالد بصوت باكي = فكني خالد فكني
رفعت عنه
انا = ان شاء الله بس اوعدني ماتصرف تصرفات مجنونة
خالد بصراخ = بطلع فكني بسرعة ,,, الحين وقت زيارة اقدر اطلع وماحد داري عني
انا = خالد
خالد بصراخ = فكني فكني ,,, لازم اروح للرياض فكني
انا = كلم امك الحين واعتذر لها وسافر لها بكرة ,,, لا تتعب نفسك ,,, حرام الي تسويه بنفسك ياخالد حرام
خالد = فكني طيب ,,, وشلون اكلمها وانا مربط كذا
انا = ادري فيك تبي تهج ( وطلعت جواله من جيبي ) مخزن رقم امك تحت أي اسم .؟ واعذرني تراي فتحت المكالمات التي لم يرد عليها بجوالك
وخالد بعصبية = وليش تفتحها ياجحش
انا = مدري الصراحة ,,, وترا فايز والهيئة اليوم مدري وش عندهم كل شوي يتصلون عليك ,,, اخاف استجد جديد بموضوع ناصر
خالد = وليش مارديت .؟
انا = تبيني ارد وهو جوالك ,, بيسألوني عنك بعدين
خالد = انت ماعلمت احد عني .؟
انا = ايه
خالد بتعب = زين سويت ,,, مابي احد يعرف ,,, صدقني ماني قادر اعلمهم عن مرضي
انا = كلم امك الحين وطمنها عليك
خالد = فكني طيب
خالد ضعيف واقدر امنعه اذا بغى يهج ,, الله يهديه ليه مايبي يتعالج بس والله معذور كل شي فوق راسه ,,, امه من جهه وخاله من جهه وفوق هذا مايعرفون عن أي شي
فكيت رباط يديه واخذ خالد الجوال مني وجلس
خالد = ابتصل بامي اذا طلعت من المستشفى والحين ابطلع ,,, ماعلي منكم
انا = والعملية .؟
خالد = أي عملية
انا = ماقالك الدكتور انك محتاج عملية يستأصلون الورم من الجهاز الهضمي ,, خالد المرض انتشر بجسمك وانت مهمل نفسك
خالد = ويعني واذا استأصلوها يعني خلاص تشافيت ,,, انا ميت ميت
مديت يدي وضربت راسه
انا بعصبية = انا يوم من الايام باذبحك
خالد = احسن ,, ( وجا بيفك المغذي بس مسكت يده )
انا بعصبية = لا تخليني اربطك مرة ثانية ,,, تبي تطلع تقدر تطلع بدون ماتهج
خالد مستغرب = وشلون .؟
انا = خالد اوعدني اذا جبت اهلك من الرياض تدخل المستشفى وتسوي العملية ,, اوعدني خالد
خالد = صاحي انت ,, المرض براسي صح صرت احس بعوار بطني بس المرض براسي ,,, يعني اذا استأصلوا الورم ماراح يستأصلونه من راسي ,,, يعني كذا والا كذا ميت ميت
انا بحزن = خالد ليش يائس ,,, الش
ورن جوال خالد
القى خالد نظره على جواله
خالد = هذا فايز ( ورد عليه ) هلا ,, وعليكم السلام ,, الحمد الله ,, آآآ ,,, لا ماختفيت بس ,, آآآآ ,,, المهم بغيت شي ,,, جوالي ماكان عندي ,, آمر فايز بغيت شي ,,, وش ,, الله 10 آلاف دفعه وحدة ,,, لا ,,, ايه متأكد ,,, راتبه بالشهر 800 ريال وما اسلمه يد بيد احوله لحسابه تعرف هو بالرياض وانا هنا وصعب اروح كل شهر واسلمه الراتب ,,, انا متأكد انه ناصر الكلب ,,, ايه مافيه غيره طبعا ,,, ايه خلهم ياخذون راحتهم ,,, خلهم يحقون معه ,,, صدق انه خاين واسم على غير مسمى ,,, تسلم فايز وماقصرت انت والهيئة ,, هاه ,,, آآآ ,, ايه ان شاء الله برجع لخالي الحين ,,, لا بس ,,, آآ كنت ,,, ( والتفت لي ) كنت كاشت مع الربع ,,, ههههه عاد ,, تسلم ,, مع السلامة
انا = شسالفة .؟
خالد = يقول فايز ان الهيئة اليوم كشفوا حساب صادق ولقت محول للهند 10 ألاف دفعه وحدة
انا = عشر الاف مرة وحدة ,,, من وين له .؟
خالد = اكيد احد معطيه هالمبلغ واكيد نويصروه
انا = يمكن هذا تجميع راتبه
خالد = لا ,,, يوم كشفوا الحساب شافوا كل شهر يحول للهند 600 ريال او 500 ريال وراتبه 800 ,,, الا باحد الشهور حول للهند 10 الاف دفعه وحدة ,, والله لو يطير ويوقع ماجمع ب 800 عشر الاف خلال كم شهر ,,, هم الحين بيحقون معه ويشوفون من الي عطاه هالمبلغ
ابتسمت
انا = الحمد الله قربت طيحت ناصر
وفرحت لما شفت ابتسامته بس ماطول بالابتسامة كشر بوجهي
خالد بعصبية = وانت قلي وشلون اطلع من دون ماهج ,, ابي اطلع الحين الحين
انا = بسم الله الرحمن الرحيم اللهم سكنهم مساكنهم ,, ياثور انت كل شي عندك بالقوة ,,, ناد الدكتور الحين وقل ابي اطلع على مسؤليتي وخلاص ,, صح اننا بنتعب وحنا نقنعه بس احسن من انك تهج
خالد = يوه
انا = اوعدني خويلد ترجع تسوي العملية
خالد = مايحتاج
انا = ترا اعلم ابو عبدالله عن مرضك
خالد بعصبية = وش ,, تهددني انت وجهك
انا = جاك العلم
وطلعت انادي الدكتور ,,, وجلسنا انا وخالد نص ساعة وحنا نحاول فيه ,,, لين وقع خالد على الخروج على مسؤوليته
اخذ خالد بنطلونه وراح للحما عشان يبدل ملابس المستشفى ,,, شوي وطلع وجا عند السرير واخذ فنيلته
طاحت عيني على مكان الجرح ,,, ابتسمت الحمد الله تشافت بشكل واضح بس الى الحين آثرها بارز بصدره
انا = تراك وعدتني ترجع للمستشفى وتسوي العملية
مارد علي خالد ولبس فنيلته بصمت
وحنا راجعين للحارة اتصل خالد بامه
خالد = هلا ,,, انا طيب ,, والله اني طيب ,,, يم ,, آآ ,,, كن ,,, قس ,,, طي ( وسكت يسمعلها )
ابتسمت شكلها تهاوشه ليش مايرد عليها
خالد = هذا انا اكلمك قسم بالله اني طيب ,,, ك ,,, طيب يالغالية خليني اتكلم ,,, اول شي جوالي كان آآآ ,,, كان آآآ ,, كان ضايع مني وتوني لقيته ( والتفت لي ) ثاني شي كنت ,,, آآآ ,,, اقصد كانت سيارتي متعطله وتوهم صلوحها ,, لا لا لا لا والله مب حادث ,,, يمه خلاص ان شاء الله الفجر وانا عندكم ,,,
مديت يدي وضربته مع كتفه بقوة
خالد = لا والله لا تعب ولا شي ,,, بعدين انا مواعدكم امس بس مدري السيارة خربت طيب تبين شي يالغالية ,,, لا بس عندي واحد نشبه ,, لا مب صالح ,, يله مع السلامة ,,, ان شاء الله مع السلامة
وسكر عنها والتفت لي معصب
خالد بعصبية = ليش تضرب .؟
انا بعصبية = وش قلت انا ,,, ماقلتلك ارتاح اليوم ولا تسافر الا بكرة
خالد = مالك دخل
انا بصراخ = انت نظرك ضعيف ,,, وشلون تسوق وانت ماتشوف
خالد = مالك دخل
انا بعصبية = وتوك طالع من المستشفى بعد
خالد = مالك دخل
اخذت نفس اهدي نفسي ,,, بيطلعني من طوري هالخبل
انا بعصبية = مالي دخل مالي دخل ,,, اذلف
وصلنا لشقتي اخذ خالد سيارته بس ماسمحت له يسوق ,,, خالد تعبان مرة كل شوي يتألم من راسه ,,, حتى لو كانت المسافة قصيرة شكله بيصدم على طول وهو على هالحال
ركبنا سيارته رايحين للحارة
انا بضيق = متى بتسافر للرياض انت وجهك .؟
خالد بتعب = بعد صلاة العشا
انا مستغرب = بعد شوي بيذن العشا ,, يعني بتروح الحين .؟
خالد بتعب = لا اباخذ شوي واروح ,,, وبعدين انت وش دخلك ,,, كيفي انا اسوي الي ابي
سكت عنه ودخلنا الحارة ,,, وبعدها رجعت مشي لشقتي وانا افكر
مدري وشلون امنعه يسافر |