عيون العرب - ملتقى العالم العربي - عرض مشاركة واحدة

**مؤمن الرشيدي** · #1 12-26-2011, 11:49 PM

الشين دربه بالسهوله تجي فيه
ولاّ الوفا ماكل شخصٍ يطوله .

. والطيب أهل الطيب تفهم معانيه
تشوف فعل الطيب عز وبطوله .

. جاتك علومي والشعر فكر يبنيه
يامحمد اشرب والقرائح هطوله .

. شفت السحاب اللي تلاشت مواريه
مثل الليالي ماتوقّف عجوله .

. واللي نسى طبعه ويترك أراضيه
ماهي غريبه ماينوّخ ذلوله .

. العقل زينه لاتضيّع موانيه
تبحر في بحر الزيف عرضه وطوله .

. والشهم لامنه غلط لاتجافيه
ابحث عن الأسباب لو هي ملوله .

. قدّم عليه عتاب وبعض المشاريه
تنال حقك والصفا في سهوله .

. ولاّ الردي ياخوك اصحى تصافيه
يجهل معانِ الطيب وناسه جهوله .

. في منخل الشرهات تعجز تصفّيه
طبعه لئيم وللدناءه فضوله .

. احرص على اللي دين ربي مباديه
الدين ساسه من منابت اصوله .

. الصاحب اللي بالطهاره مرابيه
ثابت على مبداه كامل فصوله .

. والجار له حقوق احذر تأذيه
احمي حدود الجار لأقفت رحوله .

. وافشِ سلام الله واحرص تبدّيه
ترى احترام الناس ساس الرجوله .

. ولاشفت لك مبلي وكلن حكي فيه
كلن يجيب العلم يرضي ميوله .

. ادعي له الله من شقا الهم يهديه
هرج القفا لاتسمعه لاتقوله .

. نصائح الوالد عسى الرب يبقيه
اعطى دروسه من سنين الطفوله .

. واليوم اصيغ القاف واسلوبه ارويه
جملة نصائح والمواعظ حلوله .

. الشامخ اللي نقتديبه ونغليه
له في صميم الوقت صوله وجوله .

. واللي شرح معنى التسامح بياديه
واللي سرج بارض الرجوله خيوله .

. وصلاة ربي عد ماحل طاريه
على خليل الله أحمد رسوله .

للشاعر...
وليد بن فهيد...