زياد نزل عيونه بالارض احترام : اوكي الدكتور يقول مالازم يتعرض لاي تعب او زعل .((وسكت ثم كمل)) انتو عندكم أخوان؟؟
فجر: لا اخوي الثاني مسافر برا يدرس
زياد: اجل يالله ارجعكم البيت
جوري: لاااااااااااا ابي عند سلمان
شادن اللي واقفه جنبهم : جوري حبيتي سلمان نايم وماراح يخليكم الدكتور تدخلون عنده قبل بكره
فجر: ايه صح ويالله نرجع البيت نرتاح شوفي ماما تعبانه خليها ترتاح روعتيها بصياحك
زياد يكلم شادن : اوكي انتظركم بالسياره صح انها صغيره بس تكفي ان شاء الله
فجر: لا حنا معنا سيارتنا
شادن: مهبوله؟؟؟ قولي الاولى سلمكم ربي من نقاط التفتيش مو كل مره تسلم الجره((وتلتفت لزياد)) تخيل تبي تسوق السياره وترجع
زياد: عطوني مفاتيحها اوديكم وارجع آخذها
فجر عطت المفاتيح لشادن عشان تعطيها زياد.. أخذها زياد وتحرك على سيارته شغلها وشغل المكيف عشان يمديها تبرد قبل يجون
ام سلمان مو قادره توقف نادت فجر وحده من الممرضات وقالت لها : نبي كرسي متحرك نودي ماما للسياره
الممرضه : سنو هادا سستر هادا ممنوع
فجر دورت شنطتها مالقتها طلبت من البنات 10 ريال وعطتها السستر عشان تودي امها ولما وصلوها السياره حاولو يركبون امهم ورا بس ماقدرو عشانها ثقيله
نزل زياد: لالا ركبوها قدام عشان ماتتضايق بالقعده
وقعدو يعافرون فيها البنات ..هو صعب يتدخل لأنها حرمه غريبه عليه ايلين ركبوها السياره
فجر بعد ماركبت امها وبدون شعور : يمه سوي ريجيم
امها اللي كانت شايله هم ولدها بس ضحكت من كلمة بنتها: شلتك ببطني تسع شهور
زياد كاتم ضحكته وركب
وركبو البنات ورا فوق بعض وقامت وريف توصف له البيت لين نزلهم
زياد: وريف .. شادن .. انت خلوكم داخل ابروح اجيب السياره لثانيه وآخذكم
شادن: اوكي
أخذ زياد تاكسي ويوم وصل مواقف المستشفى مو عارف السياره ولا شكلها ولا لونها ولا حتى لوحتها
طلع جواله واتصل على وريف
وريف: هاه نطلع
زياد: وريف وش سيارة صديقتك؟
وريف ضحكت تذكرت يوم فجر ساقتها: همر
زياد يتلفت حوله : الهمر البحري؟؟؟
وريف : ايه بالضبط
زياد كان قريب من السياره وشاف اللوحه: احلىىىىىىىىىى
وريف: وشهو
زياد: اللوحه هـ م ر 777
وريف: ههههههههههههه تميز يابوي
زياد فتح السياره وقبل يركب شاف محل السواق شنطة بنت وخر الشنطه وركبها وحرك .. وصل لبيت ام سلمان اتصل على زياد:هلا شدون اطلعو يالله
شادن: زين اللحين نطلع
ام سلمان: اسمحولي غربلتكم معي بآخر هالليوله
شادن: لا اشدعوه ياخالتي اهم شي سلامة سلمان
فجر قربت من وريف: اسمحيلي ياقلبي تعبناك
وريف ابتسمت: تعبك راحه يالله سلام
وسلمو على بعض وطلعو لـزياد
وريف بعد ماركبت ورا: اسمحلنا يا زياد روعناك
زياد: اشدعوه انتو خواتي .. وهم مساكين ماعندهم احد
وريف : ههههههههههههههههههههههههههههههههههههههه
شادن عرفت تفكير وريف: ههههههههههههههههههههه
زياد: خير؟؟ قلت شي غلط؟؟
وريف: لالا سلامتك بس تتوقع من ودانا المستشفى؟
زياد: من؟
وريف: فجر
زياد: لا للحين ما أذن الفجر
وريف: هههههههههههههههههههههههههههههههههههههاااي حلوه
زياد: وشو
وريف للحين تضحك ...قالت شادن: فجر البنت اللي معها المفاتيح
زياد: اها اسمها فجـ وشهوووووووو هي اللي جابتكم؟؟
وريف: أيــــــــه هههههههه ركبت السياره وشغلتها ويالله لحقناها
زياد:مهبوله هي ....؟؟ ليش تسوق اشوى اللي ماصار لكم شي
شادن: لا سواقتها ممتازه بس كانت مسرعه
وريف: تلومونها ؟؟؟ هذا ابوهم اللي مربيهم تخيلي كان يشتغل ويدرس من الابتدائي عشان يصرف عليهم .. تخيلي انه بالليله الوحده يقوم مره او مرتين يتطمن عليهم
شادن ابتسامتها من تحت الغطا توصف حالها .. ماشاء الله عليه والله رجال
زياد: ماشاء الله عليها والله انها كفو ما اهتمت بكلام الناس ولحقت اخوها.. شوفي بكره اكيد راحه من المدرب انا بوديهم المستشفى بس وحده منكم تكون معي لزوم المحرم
وريف: انا بروح يكفي تعبنا شادن معنا ..
شادن نفسها تروح بس بأي صفه!!!
زياد: خلاص اللحين تنامين والساعه 9 تقومين نوديهم مايصير ياخذون تكاسي وهم بس بنات
رجعو البنات للبيت ووريف كانت بنص الصاله اتصلت لفجر تخبرها انهم بيمرونهم الساعه 9 موعد الزياره
فجر: والله اني متفشله منكم
وريف: اشدعوه لو احنا كان سويتو معنا اكثر من ((وفجأه سكتت))
وماسمعت فجر الا صوت صفعه وبعدها انقفل الجوال
وريف ماسكه خدها وتناظر بزوجة خالها : وش تبين اللحين
ام زياد: وربي ان ما اعتدلتي يالصايعه يالحقيره لأطردك للشارع اللي لميتكم منه
وريف : ماني صايعه انا كنت مع زياد
ام زياد: وتقولينها بعد ياقليلة الادب ((ومسكتها مع شعرها)) خربتي ولدي يالخربانه
وريف: ولدك ياهانم اخوي بالرضاعه اذا ماتدرين
ام زياد تنحت باللي تسمعه..وريف استغلت سكوتها وكملت: ولا وين تدرين وانتي يامسافره ياطالعه
ام زياد كان ردها بتفله((وانتو بكرامه)) على وجه وريف اللي طلعت راحت تركض لغرفتها .. والله اني استحملت عشانك يمه .. والله اني صبرت عشان لا أكدرك يايمه .. متى نطلع من هنا ونفتك آآآآآآآآآه ياقلبي..
فتحت الوورد وكتبت..
((لصوت الأنين مكانا مميزا في أذني ..
لمنظر الدم النازف ..روعة في عيني ..
...حاولت تكتب بس اصابيعها ما طاعت .. اففففففف قفلت الصفحه بعصبيه ولا حفظت الكلام وشبكت الماسنجر
عبد العزيز فاتح الماسنجر له يوم وعليها ماشافها .. كان فاتح الماسنجر وقاعد عالكنبه يذاكر ..وفجـأه سمع صوت تنبيه دخول احد ناظر لقاها حاطه نكها ((تــــــــــــــــــــــــــعــــــــــــــــــبـ ــ ـــــــــــــــــــــــــــــــــــت))
هو كان نكه ((يارب وفقني بدراستي ورجعني ديرتي بالسلامه))
يارب وفقني بدراستي ورجعني ديرتي بالسلامه:
سلام
تــــــــــــــــــــــــــعــــــــــــــــــبـــ ـــــــــــــــــــــــــــــــــــت:
هلا
يارب وفقني بدراستي ورجعني ديرتي بالسلامه:
عسى ماشر وش فيك خواطر؟
تــــــــــــــــــــــــــعــــــــــــــــــبـــ ـــــــــــــــــــــــــــــــــــت :
والله تعباااااااااانه والله تعباااااااانه
((عبد العزيز إعتدل في جلسته .. عسى ماشر؟؟؟))
تــــــــــــــــــــــــــعــــــــــــــــــبـــ ـــــــــــــــــــــــــــــــــــت:
كله منها الحقيره مرة خالي انا صار لي اربع سنين اتعذب واشوف الذل والهوان بس ساكته مو لأني خايفه .. بس عشان امي ساكته ما ابيها تحس إني متعذبه.
يارب وفقني بدراستي ورجعني ديرتي بالسلامه:
يعني مرة خالك ساكنه معكم؟
تــــــــــــــــــــــــــعــــــــــــــــــبـــ ـــــــــــــــــــــــــــــــــــت:
لا حنا ساكنين معها من يوم تطلقت ابوي توفي بجلطه دماغيه وامي من فقد ابوي ومصيبة طلاقي انشلت وطردنا صاحب العماره وسكنا عند خالي عن الشوارع
يارب وفقني بدراستي ورجعني ديرتي بالسلامه:
وخالك ساكت على اللي تسويه زوجته؟؟
تــــــــــــــــــــــــــعــــــــــــــــــبـــ ـــــــــــــــــــــــــــــــــــت:
لا مايدري عن هاللي يصير .. قدامه تصير طيبه حسبي الله عليها حسبي الله عليها يااااااااااااارب انتقم منها يارب
يارب وفقني بدراستي ورجعني ديرتي بالسلامه:
ماعندك أخوان؟؟
تــــــــــــــــــــــــــعــــــــــــــــــبـــ ـــــــــــــــــــــــــــــــــــت:
لا انا وحيدة امي وأبوي .. ابوي راح من اربع سنين وامي اللي باقيه لي
((عبد العزيز مو مصدق انه يكلم خواطر))
يارب وفقني بدراستي ورجعني ديرتي بالسلامه:
طيب وماتزوجتي؟
تــــــــــــــــــــــــــعــــــــــــــــــبـــ ـــــــــــــــــــــــــــــــــــت:
اصلا من يبي وحده تطلقت بليلة عرسها ؟؟ من يبيها قوليلي؟؟؟
يارب وفقني بدراستي ورجعني ديرتي بالسلامه:
بليلة عرسك؟؟؟؟؟؟؟؟؟
تــــــــــــــــــــــــــعــــــــــــــــــبـــ ـــــــــــــــــــــــــــــــــــت:
لا تظنين فيني الشينه .. والله حتى زوجي كان يموت علي بس بليلة العرس كرهني تخيلي دخلنا الشقه مبسوطين أول ماقفلنا الباب طاح فيني ضرب بالعقال وكان يصارخ بشكل هستيري .. وطلقني وهو والله مالمسنى والناس طلعو علي اشاعات
يارب وفقني بدراستي ورجعني ديرتي بالسلامه:
حسبي الله على الناس .. يمكن عين ولا شي؟؟
تــــــــــــــــــــــــــعــــــــــــــــــبـــ ـــــــــــــــــــــــــــــــــــت:
ما ادري ..
يارب وفقني بدراستي ورجعني ديرتي بالسلامه:
وانتي ما تزوجتي بعده
تــــــــــــــــــــــــــعــــــــــــــــــبـــ ـــــــــــــــــــــــــــــــــــت:
ما اكذب عليك جوني خطاب كثير بس ما اقدر اوافق .. خلاص ما ابي اتزوج
يارب وفقني بدراستي ورجعني ديرتي بالسلامه:
وهو؟؟؟
تــــــــــــــــــــــــــعــــــــــــــــــبـــ ـــــــــــــــــــــــــــــــــــت :
وهو .. هو للحين ماتزوج على ماسمعت
يارب وفقني بدراستي ورجعني ديرتي بالسلامه:
يعني يحبك....أكيد يحبك
تــــــــــــــــــــــــــعــــــــــــــــــبـــ ـــــــــــــــــــــــــــــــــــت:
ما ادري .. بس صارت قطاعه بيننا كبيره اهلي واهله
يارب وفقني بدراستي ورجعني ديرتي بالسلامه:
تحبينه؟؟
تــــــــــــــــــــــــــعــــــــــــــــــبـــ ـــــــــــــــــــــــــــــــــــت:
ودي أقول لا ..
يارب وفقني بدراستي ورجعني ديرتي بالسلامه:
اصلا باين في كتاباتك انك مجروحه جرح كبير من أحد تحبينه حيل
وريف ما استحملت اللي تقرا غطت يدينها ودخلت بدوامة بكاء كبيره ...
عبد العزيز كان يتكلم ولا ترد عليه .. ياربي اش فيها؟؟ ارسل لها شارة تنبيه
تــــــــــــــــــــــــــعــــــــــــــــــبـــ ـــــــــــــــــــــــــــــــــــت:
هلا أسيرة اسمحيلي بس بطلع
يارب وفقني بدراستي ورجعني ديرتي بالسلامه:
اوكي ربي يحفظك .. وربي اللي خلقني ان سرك ماراح يطلع .. واللي لايوفقني بدراستي انه ماراح احد يدري
((وريف حست انها صادقه))
تــــــــــــــــــــــــــعــــــــــــــــــبـــ ـــــــــــــــــــــــــــــــــــت:
انا ما ادري اصلا ليش عورت راسك بهالسوالف .. واتمنى من جد محد يدري
يارب وفقني بدراستي ورجعني ديرتي بالسلامه:
الوحده اذا ماطلعت اللي بداخلها بتنفجر .. يالله ما اطول عليك وكوني متأكده ان ربي ماراح يخيب صبرك
تــــــــــــــــــــــــــعــــــــــــــــــبـــ ـــــــــــــــــــــــــــــــــــت:
ان شاء الله وابيك يالغاليه تدعين لوحده من صديقاتي في مشكله يالله مع السلامه
طلعت وريف من الماسنجر.. سبحان الله اشكثر ارتحت يوم كلمت اسيره كلامها بلسم سبحان الله .. فعلا هالانسانه طيبه .. الحمد لله اني اضفتها
حطت جوالها تنبيه الساعه 9 وغطت نفسها ونامت
عبد العزيز قفل الماسنجر وهو ماسك راسه وشلون يصير في انسانه كذا .. طلاقها بليلة عرسها .. وفاة ابوها .. سكنهم عندوحش مو انسانه .. يااااااااااااالله وفوق هذا التجريح بالمنتدى .. وانا جاي بعد ابطيح راسها .. اقسم بالله اني حقير .. حقير .. حسبي الله عليك يا ابليس
فيصل بهالوقت داخل من برا
فيصل : هههههههههههه عزوز هيثم برا يقول ممكن يدخل
عبد العزيز وجهه مخطوف: فيصل .. خواطر مسكينه
فيصل : عزوز اش فيك؟
عبد العزيز : دخلت الماسنجر وهي شكلها مالقت احد
تفضفض له وقالت لي قصة حياتها والله ولا اقوى رجال يستحمل
فبصل : اشدعوه
عبد العزيز : والله ما أبالغ
فيصل: وش صار لها؟؟
عبد العزيز : أنا حلفت لها ما أقول لاحد
فيصل : الا هي تدري إنك رجال؟؟
عبد العزيز : لاااااااااااا وهذا اللي ذابحني
فيصل سكت ماعنده شي يقوله
عبد العزيز : انا حيوان شلون بغيت العب بالبنت وربي مسكينه والله العظيم مسكينه .. لازم اقولها ..
فيصل: انت مالك ذنب .. ولا كنت بتضرها
عبد العزيز سند راسه عالكنبه ولا رد بكلمه وحده ..
الساعه 9 قامت وريف من النوم متخرعه على اتصالات فجر ..
وريف: هلا فجر
فجر: اسمحيلي بس امي قلقانه على سلمان
وريف: لالالا عادي بس اصحي زياد ونجيكم
قامت وريف ميته نوم تسحبت من غرفتها راحت لغرفة زياد اللي رجع لها من يوم صارت وريف اخته وفتحت الباب
زياد: ميــــــــــــــــــــــــــــــــــــن<<<نومه خفيف
وريف: اشوى انك صحيت قوم يالله ودنا المستشفى
زياد: عسى ماشر من تعبان
وريف: يوووه شكلك مضيع ياخوي بنودي اهل سلمان لولدهم
زياد: تعبان والله
وريف جازفت وفتحت الانوار .. زياد عصب وقام بيمسكها وانحاشت
بعد ما انحاشت دخل ياخذ له دش يصحصح فيه طلع لقى وريف لابسه عباتها وواقفه برا الغرفه
زياد كان شعره للحين مبلول وبلوزته كت مبينه عضلاته وجنز لبس نظارته العريضه على وجهه: يالله مشينا
ركبو السياره وتحركو على بيت ام سلمان وضرب بوري((هرن)) وطلعو له بسرعه وركبو ورا
ام سلمان: سامحني ياولدي بس ماعندي احد يوديني ويجيبني
زياد صوته نوم: لا ياخاله بس الحمد لله على سلامتك
وريف: فجر دهنتي رجولها بزيت زيتون؟؟
فجر: ايه .. والحمد لله جاب نتيجه
جوري قربت من فجر وهمست: اخوها يجنن
فجر كتمت ضحكتها : ايه ماشاء الله بس اوص لا يسمعنا
وصلو المستشفى وراح زياد يفطر بالكافتريا ينتظرهم ..
دخلو كلهم ماعدا وريف
وريف: انا بنتظركم برا
ام سلمان: مايصير يابنتي تقعدين بالأسياب كان قعدتي مع اخوك طيب
وريف: ماجاء في بالي
فجر: سلمان مثل اخوك امشي يالله
دخلت وريف ترجف
سلمان كان متسند على مخده والمغذي بيده : هلا هلا ببناتي
جوري راحت تركض وبكت على صدره : ليش تخوفنا عليك
ام سلمان توها وصلت عنده باسته على راسه: يمه حمد لله على سلامتك
فجر كانت تحاول ماتبين دموعها ابتسمت وقالت من بعيد: حمد الله على السلامه يافندم
سلمان وابتسامته التعبانه: ماودك تسلمين
فجر ما استحملت حضنته وبكت من قلبها .. ووريف لمحت دمعة سلمان
سلمان انتبه لوريف: من هذي؟
فجر: هذي صديقتي
ام سلمان: هي وأخوها ما قصرو جابوك هنا وسهرو معنا لين طلعت من العمليات ورجعونا البيت واللحين جايبينا نزورك
سلمان وابتسامة شكر : ماتقصرون .. مشكورين
وريف صوتها يرتجف: لا شكر على واجب
سلمان ضحك بنفسه .. مسكينه تستحي: طيب وينه اخوك لازم اشوفه
وريف: فجر تعالي
راحت فجر عند وريف: نعم
وريف: امشي انادي زياد مانيب رايحه بلحالي
فجر: طيب
طلعو البنات من الغرفه وجوري تقرق على راس سلمان
وريف زهمت على زياد وطلع لهم وهو يضحك
وريف: خير عساها دوم البسمه
زياد: هنا بعض المعجبين ههههههههه ضحكوني واحد يسوي نفسه مغمى عليه من الفرحه هههههههههههههههههههه
وريف: اهاا طيب وخر شوي على ورا معنا غريبه
زياد: اؤؤؤ اسف على بالي شادن
وريف: ههههههههههه يالله بس امشي الرجال يبي يسلم عليك ويشكرك
زياد: يالله اتحمد له بالسلامه ونروح
راحو واول ما دخل على سلمان ضحكو الاثنين وسط ذهول الباقين
سلمان: يالله حيه
زياد: الله يحييك
سلمان: فجر يبه صبي للرجال قهوه
فجر تفشلــــــــــــــــــــــــــت .. وش ذا
زياد حس بإحراج فجر : لا والله ما ابي الا سلامتك
فجر كان ودها تحب راسه على هالإنقاذ
سلمان: هههههههههه يعني تردها لي الحركه
زياد: هههه يمكن ... يالله وريف بنمشي
وطلعو زياد ووريف محركين عالبيت
سلطان جار ابو زياد كان طالع من الدوام الساعه 2 .. اليوم بيبدأ اول يوم بالبرنامج الصحي اللي بيسويه ..آآآه ان شاء الله ألتزم فيه ويصير بعد 4 شهور وزني تمام وأتزوجك يا وريف بالصيف .. يااااارب حقق لي مناتي بقربي منها يااارب
وريف كانت بغرفتها الساعه 4 العصر .. ياربي انا وشلون قلت للبنت الكلام اللي أمس؟؟؟ والله اني مجنونه شلون فرطت السالفه كلها .. بس لولا الله ثم كلامها كان اللحين انا صاير لي شي يا منتحره .. ولا ميته بحسرتي ..
وريف ماتدري ليش حست ان ودها تفتح الماسنجر
فتحته وماكانت اسيرة الذكريات اون لاين .. قامت ارسلت لها ايميل
((سلام اسيرة شخبارك؟؟ بغيت اقولك شي انا ابنزل خاطره مهمه ابي رايك فيها .. واهداء مني لك على وقفتك معاي امس .. كلامك كان بلسم والله على قلبي مشكوره))
وحولت حالتها لمشغول وفتحت المنتدى وسجلت دخول خواطر مكسوره وفتحت صفحة موضوع جديد بقسم الخواطر والنثر
((مساء صافي كصفاء الذي تحملونه بين أضلعكم..
مساء الروعه كتلك التي تحتفظون بها في دواخلكم..
مساء مفعم بالبياض كلون البدر في منتصف الشهر..
مساء يعزف به قلبي أنشودة الحزن..
اليوم .. أتيت هنا .. كمصافحة لذكرى اربعة سنين مضت عرفتكم من خلالها .. أتيت هنا .. وفاء لجرح أظهرني للبشريه ..أتيت هنا .. أمام الملايين أشهد بأن القلب لازال ينزف وسيبقى نازفا مادام ذلك الجرح لم يطيب..
اليوم 15/7/1424هـ ذكرى أول حرف خططته هنا .. وأول دمعة ذرفتها أمام الملايين .. لست هنا اليوم لأنظم الشعر .. ولست هنا لأسطر الأسى .. ولست هنا لأُدمي قلوبكم.. انا هنا لأقف دقيقة حداد على نبرة حزينة سكنتني .. لأقف دقيقة حداد على أشياء فقدتها ولم يعد بإستطاعتي إستعادتها.. انا هنا لأنحني لشعرة قصمت ظهري .. انا هنا لأُفصح عن سكاكين إستغلت سقوطي وعرفت طريقها الى متني الذي لم يعد قادرا على التحمل..أنا هنا لأقول شكرا..
شكرا لتلك الظروف التي أنهكت روحي وجسدي.. شكرا لظروف قتلتني قبل موتي أربعون مره.. شكرا لقلوب قست على قلبي .. شكرا لإبتسامة تهزأت بدمعي.. شكرا لمن إنتقدني .. شكرا لمن أحبني .. شكرا لجرح وهبني الكثير والكثير من حب الناس .. شكرا لمن قرأني..
شكرا لأختي أسيرة الذكريات والتي رغم معرفتي القليله بها إلا انها كانت نعم الاخت ..
شكرا لقلمي الذي كان نعم الصديق لي طيلة الاربع سنوات ..
كنت بصدد إعلان ما أرغب به ولكن .. قررت تأجيله لأنتهي حيثما بدأت ..
بدأت عام 15/7/1420.. وقررت الانتهاء 15/7/1424
ليس لي مكان هنا بعد اليوم .. سألملم شتاتي .. وأرتب أوراقي وأرحل بعيدا ..
لكم كل الحب ..
اختكمـ خواطر مكسوره))
حطت العنوان وإعتمدت الموضوع وطلعت من المنتدى .. خلاص انا ما اقدر استحمل هالمصايب اللي تصير بالمنتدى ابريح راسي من النت بكبره انسحب وأحتفظ بخواطري أحسن لي ..
عبد العزيز اللي دخل الماسنجر بس كان حالته اوف لاين نوى يكلم وريف بس شيك عالايميل شاف ايميل منها قراه وإستانس وطار عالمنتدى كان مسجل دخول بإسم كبرياء الجرح عشان يقرا هالخاطره .. قراها وكانت الصدمه .. ليش بتنسحب من المنتدى؟؟؟ لالا هذي بتنسحب من النت بكبره .. قرا الردود الي وصلت صفحتين وكلها يطلبون منها الرجوع عن هالقرار .. قرا رد لمشرف الخواطر والنثر اللي دايم كان يتهاوش مع خواطر مكسوره يقول فيه:
((أحسدك على ذكائك .. عندما أعلنت قريحتك الإفلاس إنسحبتي كي تحافظي على جمهورك ..أقدر فيك هذا الحب للجمهور.. واقدر فيك رقيك بالإنسحاب ..وإسمحيلي أختي أنقل الموضوع لقسم الترحيب .. بعد إذنك طبعا بما أنه آخر موضوع لك))
عبد العزيز ركبت راسه مليون جنيه.. هذا فرحان إنها بتنسحب لا ويتتريق يقول اعلنت قريحتك .. وبدون شعور حط رد وكتب..
((اخي الغبي جدا بإنتقاء مفرداته ..اتمنى عدم حذف أي حرف من ردي كـ مثال عن احترام الراي الآخر الذي دوما ماتنادي به..
لأن خواطر مكسوره باتت أكبر ممن حولها .. قررت الإنسحاب .. لان خواطر مكسوره لاتجد فيمن حولها من يحفزها على العطاء قررت الإنسحاب.. لأن خواطر مكسوره آثرت الإنسحاب والهدوء على المهاترات التي لا تصدر من عاقل !! قررت الإنسحاب ..
كل هذه الاسباب قد تكون كافيه للرد على تساؤلك السقيم عن أسباب إنسحابها ..
تحياتي .. كبرياء الجرح))
توقعاتكم وارائكم لاهنتو