" المعازيم "
يوم أقبلت .. صوّت لها جرحي القديم
يوم أقبلت .. طرنا لها انا و شوقي و النسيم
و عيونها .. آه آه
عين لمحتني و شهقت ..
و عين احضنت عيني و بكت
يا فرحتي ..
الحظ الليلة كريم ..
محبوبتي معزومة من ضمن المعازيم

في زحمة الناس صعبة حالتي ..
فجأة اختلف لوني و ضاعت خطوتي
مثلي وقفت ..
تلمس جروحي و حيرتي
بعيد وقفت .. و أنا بعيد بلهفتي

محد عرف شاللي حصل ..
محد لمس مثلي الأمل
كل ابتسامة مهاجرة جت و رجعت لشفتي ..
كل الدروب الضايعة منى .. تنادي خطوتي
و يا رحلة الغربة .. وداعا رحلتي ..

و يا فرحتي ..
الحظ الليلة كريم ..
محبوبتي معزومة من ضمن المعازيم ..

يا عيون الكون غضي بالنظر ..
اتركينا اثنين عين تحكي لعين ..
اتركينا الشوق ما خلى حذر ..

بلا خوف بنلتقي .. و بلا حيرة بنلتقي
بألتقي في عيونها ..
و عيونها أحلى وطن و كل الأمان ..

و يا فرحتي ..
الحظ الليلة كريم ..
محبوبتي معزومة من ضمن المعازيم

" عطشان "
عطشان اسمع يا نهر ..
عمر الصحاري و الجفا ..
عمري انا ما مر على عمري مطر ..
عطشان لدموع الشتا .. مشتاق للون الخضر

صبري عزف .. صبري نزف
أنا النخيل و أنا ارتجافات السعف

ناديتك بصوت العطش
شلال صوتي ياللي ما تسمع نشف ...

شوقي لوح لك وقف ..
ترابي لوح لك وقف

منين أرتوي .. و الدنيا صحرا و بس !! ..
النار تحتي و فوقي عين الشمس ..
الشتا بالصيف اختفى و الغيم ما عنده وفا

يلاحقني الورق ..
تاخذني هموم الوقت من وقتي
اسكت و السكوت انتِ
أحاول و الحلول انتِ
شسولفلك .. و انتِ سالفة صمتي
بسمرت الشفايف .. بين صمت و صمت
تحديت الزمن .. حتى نساني الوقت
خطيتك على الاصرار .. على التكرار
و شلتك في سكوت الحب .. حبيبة آخر المشوار
حبي فوق تعريفي ..
حبي فوق تحريفك و تحريفي
و أنا ملزوم اتصبّر
نسيانك ماهو بكيفي
و عيونك نجوم الليل .. و كل الليل في صيفي
أحارب عالم عيونك
أحارب ينكسر سيفي
أبحر فيك يا حلوة .. تغرقني مجاديفي
أنا بصحرا سكوتي انتحر وحدي
أعاني الصمت
أعاني الخوف
أعاني وجدك و وجدي
بهاجر من جديد أبدي
بحارب بالجمر بردي
بأصمم أوفي في وعدي
أصمم أحكي ما عندي
و لما يرتفع صوتي .. أحس حتى الورق ضدي
أنا المقسوم للسكتة .. أنا المقسوم
أنا العايش .. أنا المعدوم
أنا غيمة مطر .. و أنا العطش كل يوم
كنت آكل من أشعاري
كنت أشرب من أشعاري
و كنت أعزم على المقسوم
كنت أتعاطى هم الناس
كان بيتي بيوت الناس
و ياما بدفتر بيوتي ..طاردني السهر و النوم
و ياما بليلي ضاع الليل .. في سكة قمر مهموم
و ياما بشعري و أشعاري .. غفت ياما كثير نجوم
أمشي في شوارع ليل ..غريب حتى عن ثيابي
غريب حتى عن احساسي .. عن اعجابي
أضيع في غربة الألوان .. أسير الصمت و أعصابي
أضيع تحت المطر غابة .. ارفضتني أصغر أعشابي
أضيع مثل الطفل في البر .. حزن الليل ألعابي
أمشي .. أمشي .. طول الليل
الماضي يوقفني
الذكرى تصادفني
أمشي .. أمشي .. طول الليل
تتعب مني أتعابي
أمشي .. أمشي .. طول الليل
يبكي دربي و ترابي
أنا أوّل شجر .. أغصانه ممنوعه
أنا أوّل شجر .. يشرب من دموعه
يهاجر ظلي من تحتي ..
يترك صوتي حنجرتي
تصير السكتة مشروعه
و بين الهجرة و الهجرة .. يموت الحب من جوعه
و تبكي خطوة عيوني
تبكي .. تبكي .. مخدوعه
أحاول أمشي و أتردّد
جميع دروبي مقطوعه