| كانت ليله صعبه على بدر ومناير وشوووووق....مها كانت طول الليل تدق على شوق بس للأسف ماكانت تسمع غير [ الجهاز مغلق او خارج منطقة التغطيه يرجى الإتصال في وقت لآآآحق]..
بدر: شفيج مها ؟؟ صوتج تغير فجأه
مها: احاتي شوق...امسكره جهازها ومادري شصار عليها
بدر: بعد شووووووووووووق..مادري متى بنخلص منها..يمكن طافي واهي نايمه مافيه شحن..لاتحاتينها انشالله باجر تكلمج
مها: قلبي ناغزني هالمره يابدر..احس صارلها شي
بدر: شبيصير لها يعني...مايصير الا الخير انشالله نامي ياقلبي غمضي عيوووونج..
مها: وانته..بتنام؟!
بدر: اي دامج نايمه اكيد بنام...وتدرين بعد ..وراي كليه
مها: نوم العوافي حبيبي..
========================================
ثاني يوم بعد ماصحى بدر 7 الصبح وكعادته شاور ..وطلع لبس...وراح الكليه..
الساعه 11 الضحى..
ام بدر كانت تقرا الجريده ..يابت ها الخدامه فنجان القهوه( فنيان).....وفجأه.
ام بدر: شارلي..شارلي...شوفي منو بالباب
شارلي: اوكي ماما
وتفتح الخداامه الباب......وتدخل ام مناير ونوره وفيصل( فوزيه..)..والنار ماكله قلبها..وتقدرون تقولون مو نايمه من البارح...ام بدر استغربت زيارة ام مناير في هالوقت...حطت فنيان القهوه ع الطاوله و قامت وقفت...
ام بدر: هلا والله فوزيه حياج الله وخيتي ( بقلق بعد ماشافت ملامح فوزيه متغيره عليها..) زين انج ييتي قاعده ابريحاتي من الصبح..( بروحي..)
فوزيه: لو اني اختج صج ...جان مارضيتي لبدر اللي سواه..انا اللي غلطانه يا ام بدر..جاني عديتج وحده من اقرب خواتي..وجاني عديت بدر ولدي اللي مايابته بطني...
ام بدر: انتي شتقولين يافوزيه ؟..قعدي خلينا نتفاهم..شلي قاله بدر ولدي..
فوزيه: طبختيها انتي و ولدج والحين يايه تسأليني..جانج ماتبينها جان نطقتي امس يوم كنت ببيتكم..مو تدزين ولدج يروح يدز رساله حق هالمسيجينه( المسكينه) مناير اللي مانامت من البارحه من الصدمه.جذي يا ام بدر؟..جذي تسوين فيني؟؟ جذي؟؟؟
ام بدر: وغلاتج يا فوزيه ما ادري عن شنو قاعده تتحجين..اي رساله هاذي اللي تتكلمين عنها..بدر ولدي انا داز رساله لمنايررر..شقال فيهااا قوليلي وانا اعلمج فيه اليوم
فوزيه: مابغينا ولدكم والله يرزق بنتي ولد الحلال اللي يستاهلهااا..ولا تحلفيين بغلاتي..انتي عمرج ماحبيتي و عزيتيني..بس قلبي كبير ونيتي الصفايه كانت عاميتني يا ام بدر..بيتج هاذا ماراح ندخله لا انا ولا بناتي من اليوم ورايح..
لفت فوزيه ورايحه صوب الباب بتطلع...
ام بدر: لحظه يافوزيه ..لحظه ..والله يافوزيه لأعلمج فيه..جانه مايبيها جان قال لي..بس البارحه قعد معاي و كلمني عن المهر...وقالي انه كان يبيها من زمااان ..تعوذي من ابليس يافوزيه...لا تخلين الشيطان يدخل بينا..
طلعت فوزيه بره البيت بعد ماعطتها نظره وجنها تقولها خاب ظني فيج يالغاليه....
ام بدر بدت تصييييح من كل قلبهاا..ليش جذي سويت يابدر ليش ...فشلتني و بهذلتني جدام المره ...ذبحت البنيه و ذبحتني معاها ليش يابدر ليييييييييييش..
===============================
مها فتحت عيونها الساعه 12 الظهر..على طول سحبت فونها لقت رساله جديده :1
(( صبآآآآح الحب يا احلى حب..))
ابتسمت مها بس غلقت بسرعه من تذكرت ان شووق ماتدري عنها من البارحه...
دقت عليها لا زال الجهاز مغلق...
حاولت تقوم من فراشها و تشغل روحها بقراءة مجله....بس تفكيرها كان ينحرف غصبن عنها..ويروح صوب شووق..وينج ياشووق..شلي صارلج؟...
قامت مها لبست بدي ابيض جبنيز..وتنوره جينز قصيره...رفعت شعرها كله فووق...وماحطت ولا شي بويهها..كان ابيض اكثر من كل مره...
نزلت لقت امها تحت مع جراح اللي كان لابس شكله طالع...
جراح: وين وين وين..انتي لا والي لج ولا اهل ..كل مابغيتي تطلعييين سحبتي السويج و رفعتي هالكشه
مها ماكانت امعبرته ولا امعبره كلامه: صباح الخير يمه
ام جراح: اي صباح هاذا ..الناس كلهم منثبرين ببيتهم هالحزه..الا اللي عنده داوم او شغله ضروريه ..محد طايق الطلعه بهالقايله
مها: انا طايقتها..عن اذنج يممه
جراح: لما اكلمج تووقفين.. ..واذا ماتربيتي اربيج من يديد
ام جراح: صعدي دارج يلاا اشوف...صعدي
مها: جراااح يكون بعلمك..انا تربيت بهذا البيت..واللي رباني ..صاحب هاذا البيت..وان كنت مو تربيه..انت بعد مو متربي...
جراح قام من مكاااانــه..: هديني يايمه هديني خل ألسب هالعقال على ظهرها اعلمها شلون تحاجي الريايييل..
مها: فكنا ززززين يلا انا رايحه..
ام جراح: خلها يمه محنا ناقصين مشاكل ..وان يه ابوك انا بكلمه عن اختك..يننتوني يايمه يننتوني..بسكم مناجررر..
طلعت مها و لبست نظارهااا..اللي غطت عيوووونها...ركبت سيارتها و حركت..
==============================
بدر كان توه طالع من المحاضره دق على مها..فديتها ..اكيد قعدت الحين...
مها: ألوو هلا بدر
بدر: هلا بهالصوت ..شلونج اليوم
مها: احسن بدر
بدر: عسى دوم..جنج مو بالبيت!
مها: اي رايحه حق شوق...
بدر: شنو؟؟؟ رايحه حق شوق..وليش مادقيتي قلتيلي
مها: وليش اقوولك..مايحتاي اقول( كان مزاجها خايس و ترد بنفسيه)
بدر: لا حبيبتي يحتااي..ومن اليوم ورااايح خطوه ماتخطين بره البيت الا بعلمي انا فهمتي
مها: اي انشالله ..ابوي ماقالي لأ انته ياي تقولي لأ و تمنعني
بدر: انا مو ابوج يامها..انا زوجج
مها: لي خطبت تعال كلمني
بدر: انتي متى بتحسنين اسلوبج و تفكينا من طوالة هاللسان
مها: اسلوبي ماكو احسن منه..ولساني مو طويل..
بدر: يصير خير يامها..
مها: اي انشالله يصير خير
بدر: حاجيني عدل لما اكلمج
مها: واانا قاعده احاجيك بالمقلوب؟
بدر: مها كبري ..كبري سنه بس
مها:الكبر لله حبيبي
بدر: ونعم بالله بغيتج بموضوع لازم اشوفج
مها: ماتشوفني حبيبي..شايفني خبله وكنت ألحقك من مكان لي مكان قلت هاذي متى مابغيتها اقدر اشوفها.لا حبيبي عندي اهل انا
بدر: سمعيني زين يامها قبل لا لانخطي الخطوه الكبيره في شغلات لازم تتعدل
مها: وشنو فيني مو عدل..
بدر: اول شي اسلوبج يتعدل لما انا اكلمج ماني اصغر عيالج
مها: اي وغيره حبيبي
بدر: ماتطلعين خطوه بره البيت االا بعلمي
مها: وغيره؟
بدر: من باجر بشوف الحجاب عليج.وملابسج تنحط بجيس وتنقط بالزباله
مها: ماعوزك حبيبي تغصبني على شي ما ابيه
بدر: خلاص عيل مها..الظاهر انا غلطت من البدايه لما شفتج بصورة الملاك..
مها: وانا غلطت لما رجعت حق واحد مثلك يبي الناس تمشي على مزاجه
بدر: عيل شوفي طريجج والحمدلله اني فتحت قبل لا اغلط الغلطه الكبيره
مها: فتح مره ثانيه حبيبي زين..يلا باي
بدر: ذلفي زين
سكرت مهاا الخط واهيا مو مستوعبه اللي صااار..كانت متوتره تحاتي رفيجتهااا...وافكارها متضاااربه...وجراح ضايقها بكلاااااامه..ماكانت مستوعبه شقالت ..وليش قالت هالحجي...تحبه....تموت بقلبه..بس ماتقدر على لساااانها...خلاص!!.بدر خلاص مايبيني...!؟؟ بدر ...انا..انا شقلت ..ليش جذي زعل...والله اتحجب وخلاص توبه....رد بدر رد.....تمت تدق عليه بس كان حاقرهاا..واخيرا" ( الجهاز مغلق او خارج منطقة التغطيه...)
بدر من جهه ثانيه..كان يقول احسن بخليها تتأدب شوووي و تترك عنها سوالف اليهال و قلة الادب هاذي....
مها كانت تدق و تدق وتدق .. نزلت دمعه حاره على خدها..والله بس ما اعيدها بس تكفه رد....
سفطت صوب بيت شووق..ونزلت وقلبها كان يدق بسرعه....
دخلت البيت .فاضي كالعاده...صعدت فووووق...
لقت شووف..بحاله يرثى لهاا...لقت شووووق على ملابس البارحه ....والمكياج مختلط بدموووع القهر....كانت ماخذه زاويه بغرفتها وقاعده ع الارض...وحاابسه راسها بين ريووولها...
مهااا انصدمت من شكل شووق...بدت تتنفس بصعووبه..
مها: شووق ..شوق حياتي شفيييج..شوق رفعي راسج و كلميني..انا مها..انا مها شووق..
شوق( تبجي): آآآآآآآ يامها آآآآ وينج عني يامها
مها: جهازج كان مسكر شوق...وامس ماقدرت انام قلبي ناغزني تكفين قوليلي شصار امس....
شوق ( بكلام غير مركب):حمد ..يكرهني مها..حمد...حمد قال مايبيني..حمد جرحني يامها...( وبدت تبجي بحسررررره..)
مها حظنت رفيجتهااا وظمتها على صدرها: خليه يوووووولي الحقير مايستاهلج....خليه يولي وانشالله الله يعوضج بوااحد يعرف قدرج..خليه يوولي شوووق فكري بنفسج الحين ..
شوق: ماآآآآآ اقدر يامها ما اقدر..احبه ..مها احبه
مها(تصرخ): حتى بعد اللي قاله....حتى بعد ما اهانج و جرحج...خلاص خلييييييييه..خليه يوووولي شوووق
حظنت رفيجتهااا ومها تذكرت بدر...وقعدوا الثنتين يبجووووون .....وتدخل عليهم ام شوق بعد ساعتييين..
ام شوق: شهالصياااح ..عزا انتوا قاعدين بعزا؟؟؟
محد رد عليها
ام شوق: خلااااص الريال وقال مايبيج ..دموعج ماراح تغير شييي..انسيه وقومي غسلي ويهج..الخميس عقب صلاة العشا ياييينا ناس..والأكيد انهم يايين يخطبوون..جهزي روحج من الحين وانسي سوالف اليهال هاذي وخلي الريال لحاله
شوق: طلعي بره ..مابي اشوفج طلعي
ام شوق: والله ومالت يالمينووونه لو فيج خير جان ماقال انه مايبيج ..ذلفي بس خليج مجابله ست الحسن والدلال....
بعد ماطلعت ام شوووق..
مها: قومي حبيبتي قومي..غسلي ويهج و بدلي هدومج ..قومي يلا حبيبتي..والاحسن انج تدخلين تاخذين شاور..يغسل همومج..وبعدها تصلين ركعتين ..وابيج توعديني انج تنسينه من الحين ..والله مايستاهل دمعه من دموعج
شوق قامت بعد ماسحبتها مها من ايدهاا..خذت الفوووطه و دخلت تتسبح...
مهاا لما صارت بروحهااا..بدت تفكر ببدر...آآخ يابدر والله ما اعيدها طوفها هالمره...وسامحني...والله اسمع كل كلمه تقوووولها والله..
========================================
بدر كان توه رآد البيت....لقى امه ناطرته عند الباب....ولما دخل بدر..قامت من مكااانها لي عنده....
بدر: السلام عليكم يمه..
ام بدر: لاتقول يمه لا بارك الله فيك من ولد...جذي تسوي بأمك يابدر...جذي تسوووي
بدر( قاطعها): شفيج يمه؟؟..انتي شقاعده تقووولين...شسويت اانا
ام بدر: وتسأل بعد ..؟..ليش يابدر ليش...
بدر: يمه انتي تتكلمين عن شنووو
ام بدر: ليش سويت جذي بمناير مو حرام علييييك
بدر : يمه ..اجرحها من البدايه.احسن من اني اظلمها بعدين..يمه ما أبيهاااا ..انا ما ابيهاااااااا
ام بدر ( مسكته من ملابسه):تبيها و غصبن عليك يالردي...اليوم بعد الصلاة تروح انت و ابوك تخطبوونها سمعت ؟؟
بدر: ما اروح ولا اخطبها..انا اللي بعيش معاها اخترتها ..وانتي اللي بتروحين تخطبينها لي اليوم
ام بدر: بدر انا بريه منك لي يوم الدين ان خذيت وحده غير مناير ..انت فاااااااهم
بدر: حرام عليج يايمه تفرضين علي وحده ما ابيها....حرام عليييج يايمه ذنبج عند الله كبيرررر ..مناير مثل اختي ..وما اتخيلها زوجه لي
ام بدر: اترك عنك هالحجي تروح وتخطبها و ريلك فوق راااسك..انت مالك راي بعد رايي والريال يسمع كلام امه ولا يكسر بخاطرها...والبنت اللي قاعد تتكلم عنها تنساها من الحين يابدر جانك تبي رضاااي
بدر: يمه احبها يمه انتي شقاعده تقوووووووولين شلون انساها شلون عبالج سهله
ام بدر: حبك عزرائيل و اهله..اي حب اللي قاعد تتكلم عنه..كاني انا خذيت ابوك ولد عمي وحبيته بعد ماخذيته...لا يغسلون مخك عيال الحرام ..عمره الحب مايي قبل الزواج
بدر: يمه هاذي حياتي رحميني يايمه رحميني
ام بدر: انت ماتدري بمصلحتك واليوم تروح تخطب البنت ..سمعت
بدر ترك امه و صعد فووووق ...شلي قاعد يصير بحياتك يابدر..عمرك ما انجبرت على شي انت ماتبيه....ليش لي بغيت اختار شريكة حياتي تنفرض علي وحده ما ابيها...ما ابيها يا يمه ما ابيــــــــــــها...انا شمسوي بدنيتي ..ليش جذي يايمه ليش...يمه انا احب ..ولدج يحب يمه..يحب......حس بعوار براسه انسدح ع الفراش يفكر شراح ييسوي..
ماراح ينفرض عليك يابدر شي انت ماتبيه .. مها حبيبتي وزوجتي ...واهي اللي راح اخطبها اليووووم..
انتظروا الجزء الثامن
|