السلام عليكم ورحمة الله وبركاته
أعتذر عن هذا التأخير.. آتيتكم اليوم ومعي حكاية من حكايات جدتي..
سأرويها بالليبي..
عنوانها.. ( أم بَسِــــيسِـــي بَسِــــيسِــيَّـــهْ,, أم كَرَايَـــعْ مَلـْو ِيّـــة ٌ) "الكرايع الملوية= السيقان المعروجه"

كان ياما كان في قديم الزمان..
كان مرّة في مراء ( إمرأة) إسمها ( أم بَسِــــيسِـــي بَسِــــيسِــيَّـــهْ,, أم كَرَايَـــعْ مَلـْو ِيّـــة ٌ) كانت تخدم في البسيسة
(نوع من أنواع التوابل المختلطه معا بالزيت)ومرة من المرات جاها(جاءها) الفار (الفأر) وقاللها إتسلــّم عليك أمي وقالتلك أعطيني الغربال
(صحن خشبي أرضيته مصنوعه من التل بحيث يلتصق ببعضه مكوّنا ثقوب صغيره يستخدم لغربلة الدقيق من الشوائب)
قالتله تلقاه في وسط الدار إمغطّي به الحليب ( غطاء فوق قدر الحليب) ووصاته(أوصته) رد بالك (إياك)تشرب من الحليب,, قالها باهي (حسنا)
إمشي الفار خش (دخل) الدار وخدي (أخد) الغربال لكن لما شاف الحليب زها في عينه إمشي شرب منه شويَه .. ولما عجبه كمَّله كلَه.. ومسح فمّه وطلع..
لما بيروّح قالتله أم بسيسي ماشربتش من الحليب قالها لالا إمشي لما شافت فمه لقت نقطة حليب على شنابه إِتْكَنْطِتْ منّاه (غضبت منه) وقصّتله ديله (قطعت ذيله) قالها ردّيلي ذيلي (أعيدي ذيلي)
قالت ما إنردّاش لين(لن أعيده حتى)إتجيب الحليب من البقرة ,, قالها باهي..(حسنا)
وصل للبقرة قالها يابقرة أعطيني الحليب باش(لأجل) نعطيه لأم بسيس بسيسة أم كرايع ملويه وإتردلي ديلي إلي نرقص بيه في الأعراس..
قاتله البقرة جيبلي الصفصفة من الثور باش تاخد الحليب,, قالها باهي..
وصل للثور قاله ياثور أعطيني الصفصة للبقرة والبقرة تعطيني الحليب والحليب نعطيه لأم بسيسي بسيسة أم كرايع ملوية وإتردلي ذيلي إلي نرقص بيه في الأعراس..
قاله الثور جيبلي الشعير من الفلاح نعطيك الصفصفة ,, قاله باهي..
وصل للفلاح قاله يافلاح أعطيني الشعير والشعير نعطيه للثور والثور يعطيني الصفصفة والصفصفة ناخدها للبقرة والبقرة تعطيني الحليب والحليب نعطيه لأم بسيسي بسيسية أم كرايع ملوية وإتردلي ديلي إلي نرقص بيه في الأعراس..
قاله لا مانعطيكش لين إتجيبلي الميه (الماء) من الوادي,, قاله باهي..
وصل للوادي قاله ياوادي أعطيني الميه والمية للفلاح والفلاح يعطيني الشعير والشعير للثور والثور يعطيني الصفصفة والصفصفة للبقرة والبقرة تعطيني الحليب والحليب نعطيه
لأم بسيسي بسيسية أم كرايع ملوية وإتردلي ديلي إلي نرقص بيه في الأعراس
قاله لا مانعطيكش لين إتجيب الزمزامات (فرقة من النساء يأتون ليحيون الأفراح) باش يزغرطو ( الزغردة) ع الوادي,, قاله باهي..
وصل للزمزامات قالهم تعالو زغرطو ع الوادي .. فرحو (بمعنى الفرح) وإمشو معاه ( ذهبوا معه) للوادي باش (لأجل) يزغرطو عليه والوادي أعطاه الميه والمية أعطاها للفلاح والفلاح أعطاه الشعير
والشعير أعطاه للثور والثور أعطاء الصفصفة والصفصفة أعطاها للبقرة والبقرة أعطاته الحليب والحليب أعطاء لأم بسيسي بسيسية أم كرايع ملوية وردتله ( أعادت إليه) ديله إلي يرقص بيه في الأعراس
وتمت الحكاية وزوّت الزوّايه..

طبعا الخلاصه إن الفأر كذب على المرأة التي خدمته وأعطته غربالها مع أنها أوصته أن لا يشرب من الحليب إلا أنه لم يستمع لها .. ولهاذا نال جزاته بأن قطعت ذيله ولم تعده له حتى تعب من جديد ليحضر لها الحليب..

القصة طويلة بعض الشيء لكنها ممتعه,,
أتمنى أن تعجبكم..

تحياتي
ولي عوده^^






بصراحة في الجزائر نحكي نفس القصة مع بعض التعديلات

__________________