03-20-2013, 09:05 PM
|
| |
** البارت السابع **
علي : اذا مو مرتاحه خليها وقت ثاني
منار : لا انا بقول الحين
منار : ( تتكلم بهدووء عشان تسيطر على نفسها ) انا كنت اعيش مع امي وما اشوف ابوي الا نادر يمر دقايق ويمشي وماعندي خوال ولا اعرفهم لأن امي بحرينية وتزوجت ابوي واهلها مو راضين فقاطعتهم من يومها وعاشت بالكويت بس ابوي طلع متزوج وصارت مشاكل بين امي وابوي وبعد سنه من زواجهم طلقها وخلانه نعيش بروحنا
ماكان لي الا اهي وأحمد .. ( تدمع عينها ) .. هذيله اللي كنت معتبرتهم عايلتي الوحيده
علي : أحمد منو بالظبط؟
منار : ( تمسح دموعها وتتكلم بهدوء بدون بجي ) أحمد شخص حبيته عرفته من اربع سنين ماكان يقصر علي بأي شي .. ( تبتسم وعيونها كلها دموع ) والله كان يحبني اتعرف الشخص اذا يحبك او لأ من تصرفاته واهو والله كان يحبني
علي : ( ساكت يسمعها )
منار : ( تفرك اصابعها عشان تخفف من رجفة ايدها ) و قبل سنتين ... الحمدلله على كل حال امي توفت ( تبلع ريجها تكمل له السالفه وتتذكر)
(( قبل سنتين ))
- بالمستشفى -
منار يم فراش امها وقاعده تهزها : ( بصراخ وبجي ) يمه .. يمه قومي .. يمه انا مو مصدقه كلامهم انتي مايصير تروحين وتخليني
الدكتور : يا بنتي استغفري ربج وتعالي معاي
منار : ( اتدز ايد الدكتور وتصرخ ) وخر عني .. كلكم وخرو عني انتو جذابين امي ماماتت فاهمين ما ماتت
( تلم امها وتبوس عيونها وراسها وخدها ) : يمه حبيبتي قوومي انا منو عندي من لي من بعدج ماعندي اهل يا يمه
( الدكتور يحاول ياخذها بره الغرفه واهي مو راضيه توخر عن صدر امها )
منار : ( تصرخ واهي ميته بجي ) انت ماتفهم اقولك وخر عنيييي لحد يقرب مني اطلع بره اطلع من اهنييي
منار : يمه يالحنون يا كل دنيتي ليش خليتيني حتى ابوي ماعرفه عدل اشلون اعيش معاه يمه اشلووون
( الدكتور أشر حق الممرضه عشان يطلعون من الغرفه ويخلون منار شوي مع امها )
بطلعة الدكتور دش أحمد الغرفه
أحمد : حياتي منورة
منار : ( لمت احمد وميته بجي ) أحمد امي راحت وخلتني .. شسوي الحين اشلون اعيش
أحمد : ( واهو لامها ) أدري ماكو احد يعوضج عن امج بس انا موجود وماراح اخليج تعوذي من ابليس وهدي نفسج
منار : أحمد لاتخليني مالي احد الحين الا انت
أحمد : اخلي أهلي وربعي ودنيتي وما اخليج .. يللا الحين امشي قعدي بره
منار : ( وخرت عنه وارجعت عند امها و انسدحت يمها ) لأ روح انا شوي بنام عندها .. بنام يمها للمره الاخيره ( لمت امها و غمضت عينها والدموع تنزل على الفراش )
أحمد : مايصير تسوين جذي بنفسج قومي منورة قومي معاي
منار : ( واهي مغمضه عينها ) خلني شوي بنام
أحمد : على راحتج انا بنطرج بره
- - - -
- عند منار وعلي –
منار : ( تمسح دموعها ) أحمد تم واقف معاي وماخلاني
بس بعد العزا ابوي خذاني اعيش في بيته اللي ماشفته ولا مره بحياتي يعني اول مادشيت بيت ابوي وشفت اخواني عالطبيعه كان عمري 21
اخوي الكبير عمره 26 اسمه ناصر والثاني عمره 24 اسمه فهد من شفتهم وانا مارتحت لهم كانت نظراتهم فيها حقد وخصوصا مرت ابوي لأن محد كان يدري ان ابوي تزوج وعنده بنت فالكل كان كارهني حتى ابوي لأني سببت له وايد مشاكل .. مرت ابوي كانت تغلط علي وايد
وابوي مايقولهم اي شي مخليني جني قطعه من اثاث البيت ولا يسأل عني واخواني امنعوني من الجامعه وقعدوني بالبيت وما اطلع كلش
( تبجي وتمسح دموعها وتتنفس عشان تهدا شوي )
علي ( لأول مره طبعا حط ايده على ايدها عشان تهدا وقلبه يعوره كاسره خاطره )
منار ( وخرت ايدها واقعدت تفرك اصابعها ) : علي انا بنت وعندي احتياجاتي الخاصه ماقدر اكلم اخواني فيها ومرت ابوي ماكنت اتجرأ اطلبها لأنها تقومني بالسب وتنومني بالسب
كنت فاقده امي فاقده حنانها وفاقده الراحه بس اللي خلاني اتحمل اهو احمد
ومها رفيجتي بالكليه قبل .. أحمد كان يكلمني بالتلفون كل يوم يشجعني اني استحمل واهو كان بيكمل دراسته بره وماكان يتحمل فراقنا والمعامله اللي يعاملونياها وقبل شهر قرر اني انحاش معاه ونتزوج ( تسمح دموعها ) انا على طول وافقته لأني والله أحبه وابيه يطلعني من اهناك بأي طريقة
( تبجي وتسكت شوي وترد تكمل ) و انحشت معاه بس ماقدرنا نتزوج
لازم ولي امري موجود .. فكر معاي بطريقة نجبرهم يزوجونا حتى لو زواج مخفر .. علي انا .. ( تبجي ) .. انا كنت ابي اي طريقة تخليني اعيش مع احمد انا بهالسنتين اللي كنت فيها عند ابوي والله مادري اشلون عشتهم .. كنت راح اموت
علي : ( حس شي يعصر قلبه وكان متضايق وايد ) زين هدي شوي
كمليلي باجر حاولي ترتاحين وتنامين الحين
منار : لا .. ابي اكمل الحين
علي : ( ما وده يسمع اكثر لأن كان متضايق بس مابغى يكسر فيها ) اوكي كملي
منار : ( تمسح دموعها وخشمها ) بس ناصر لقاني ( تبجي حيل )
علي : ( حط ايده على جتفها ) خلاص منار مو لازم تكملين الحين .. يللا عفيه قومي روحي الغرفه ارتاحي
منار : لا علي خلني اكمل تعبت وانا خاشه بقلبي تعبت ( اقعدت تبجي أكثر )
علي : ( علي يهديها بأي طريقة يقدر لين اسكتت )
منار : حاول أحمد يوخره عني بس آخر شي ناصر قدر يرجعني البيت .. ( تكمل اللي صار وتتذكر)
- في بين ابو ناصر -
ناصر : ( يصرخ على ابوه ويدز منار عالارض ) هاك بنتك الوصخه ماحبيت اضيع عمري بالسجن بسبة هال.... ( مسبة عيب تنقال حق البنات الموزينين ) ورفيجها
( منار طايحه عالارض وميته بجي من اللي صار ومن الطق اللي طقها اياه ناصر بالسيارة )
ابو ناصر : ( قومها من شعرها ويوم صارت واقفة جدامه عطاها طراق قوووي خلاها اتطيح عالقنفة ) يالحقيرة انا يبتج اهني بعد ماماتت امج عشان لا تنقطين بالشارع .. تفو عليج وعلى امج اللي ماعرفت تربيج
منار : ( تبجي وماقدرت تسكت يوم سب امها ) لا تتكلم عن امي .. امي ماتخلت عن ضناها مثل ماتخليت انت عني
ابو ناصر : ( توه بيطقها ولا توقفه ام ناصر )
ام ناصر : يابو ناصر لا تتعب صحتك اقعد انت ارتاح اخوانها يربونها لك من يديد
فهد : ( يمسك منار من شعرها ويطقها كف ) يبه انت بس اشر وانا اذبحها.. عادي انا مستعد ادش سجن فيها
- - - -
- عند علي ومنار –
منار : ( تناشق ) ما انسى الطق اللي طقونياه وخذو تلفوني مني واحبسوني بالبيت حتى غرفتي نارد اني اطلع منها بس بعد جم يوم قدرت انحاش
منار : ( تتكلم وتبجي و ايدها ترجف ) كنت ميته خوف يا علي تخيل انحشت وفهد نايم بالصاله محد كان بالبيت الا اهو والله كنت بموت وانا اتسحب على اطراف اصابعي بس الحمدلله قدرت اطلع من البيت
علي : ( يمسك ايدها الاثنين ويضغط عليهم ) بس خلاص منار لاتكملين شوفي اشلون قاعده ترجفين خلااص مابي اسمع شي وابيج تطردين كل هالذكريات من راسج .. انتي بأمان الحين
منار : ( تسحب ايدها وتمسح دموعها ) اللي قلته لك كله شي تافه مقارنة باللي سواه أحمد .. ( تطق على صدرها ) طعنة الحبيب ماتروح
علي : ( يمسك ايدها ) خلاااص منار رحمي نفسج لاتسوين بعمرج جذي اللي راح راح انسي الحين
منار : ( تعلي صوتها ) شنسى؟؟ قولي شنسى؟؟ انسى اني وقفت على باب بيتهم وطلعلي اخوه وطردني واهو يقول : أحمد راح يكمل دراسته ويشوف مستقبله روحي بيتكم الله يستر عليج .. (تسمح خشمها ) انا اول شي ماصدقته وقلتله ماراح اتحرك الا لين تنادولي أحمد ولا افضحكم بالفريج كله بس بعدين ... ( اسكتت مده عشان لا تنفجر بالبجي مره ثانيه ) بعدين دق عليه جدامي وكان فتح الخط خارجي وحطه سبيكر وكلمه
قاله اني عالباب ومو راضيه اتحرك
- تتذكر –
منار : أحمد انت صج سافرت وخليتني؟
أحمد : منورة انا رحت عشان اشوف مستقبلي .. وانتي بعد شوفي مستقبلج
منار : ( دموعها تترس عينها ) أحمد والاتفاق اللي بينا .. شاللي صار؟ مو نفذت كل اللي تبيه بس عشان نتزوج؟؟؟
أحمد : ( ساكت )
منار : رد علي لا تسكت أحمد والاتفاق اللي بينا؟؟ احمد انت تدري اني أحبك ليش سويت جذي فيني ليييش؟؟
أحمد : انا بروح الحين الله يوفقج بحياتج ( سكر الخط )
اخو أحمد : يللا سمعتي ب بذنج ان مسافر وقالج روحي مايبيج توكلي على الله .. ( سكر الباب بويه منار )
منار ( واقفه مصدومه وادموعها تنزل على خدها )
- عند علي ومنار –
منار : وبس اهني صرت امشي بالشوارع مثل المينونه مو مصدقة اللي صار واغمى علي جدام سيارتك ( تبجي وتطالع علي ) علي انا تعبانه حيل ليش سوه فيني جذي؟؟
علي : (يمسح دموعها بيده ) خلاص منار لاتبجين هالعيون من اليوم راح تظحك ماراح تبجي ان شاءالله
منار : أكيد؟؟؟ أكيد ماراح يصيرلي شي بعد؟؟ اذا صار ماظنتي بتحمل اكثر من جذي راح اموت والله
علي : بعيد الشر عنج .. لا تطرين الموت .. والله ماراح أأذيج ولا اخلي احد يقرب لج
منار : ( بهدوء ودمعتها طاحت على خدها ) اشلون اصدقك وحبيب الاربع سنين طلع جذاب
علي : ( حس بطعنه بصدره ) منار انتي ماتعرفيني عدل ومن حقج تشكين بكلامي .. بس أحمد غير وعلي غير
علي : ( يبتسم لها ) يللا قومي معاي غسلي ويهج ومن اليوم تنسين كل اللي صار وتقطينه وراج
( غسلت ويهها وخلاها اتدش الدار وتنسدح وماطلع من الشقه الا يوم نامت )
( غسلت ويهها وخلاها اتدش الدار وتنسدح وماطلع من الشقه الا يوم نامت )
- - - - -
علي بالطريج : ( يكلم نفسه ) لازم القى حل .. مابي اخليها عايشه كل ايامها خايفه من باجر
( بهالوقت رن تلفون علي )
علي : الو
محمد ( رفيج علي ) : وينك يا اخي مو مبين مختفي مره وحده اشسالفتك
علي : لا ماكو بس لاهي شوي
محمد : عليوي اللي يسمعك يقول داير الحلال
علي : ( ماله خلق ) خلص الحين اشتبي
محمد : افا اشفيك ؟؟ اقول تعال عندي الدوانية الربع موجودين والكل يسأل عنك
علي : اوكي نص ساعه واكون عندكم
- - - -
منار نامت ثلاث ساعات وقامت عالساعه 7 بعد المغرب
اطلعت من الغرفه وراحت الحمام وعقب ما خلصت لقت بالصاله عالكوميدينا فاتورة البيتزا مكتوب عليها :
( اذا قمتي من النوم كلميني ناطرج على رقمي ******** )
ابتسمت وخذت لورقة وراحت الغرفة
- - - - - - -
محمد : لا انا حاس و اعرفك عدل والله .. اكيد ورا غيبتك سالفه جايده
علي : يا محمد فكني خلاص عاد زين اني ييت والله مالي خلق تحقيق
محمد : يعني منت قايلي اشسالفتك؟
علي : لا ماراح اقول .. الا وين صلوح ؟
محمد : كان اهني بس طلع قبل لا اتيي بشوي
علي : منحاش مني لأن بايقني
محمد : افا ؟؟ صلوح بايقك جم باق منك؟؟
علي : باق سي دي من سيارتي الخسيس
محمد : خسيس مره وحده .. والله عبالي عندك سالفه كله سي يدي اشتر غيره اشكثر فلوسك
علي : احسدني بعد .. وانا عناد ابيه اهو نفسه مابي غيره
( يرن تلفون علي )
علي : ( يقوم ويطلع من الدوانية ) عن اذنكم انا ماشي يللا فمان الله
محمد ( يكلم واحد من الربع ) : ويقول ماعنده شي شاغله .. شكله طيحته بنت .. عاد عليوي مدمغ البنات يبون فلوسه واهو عباله ميتين عليه
- - - - - - - -
علي : ها ليش قمتي مانمتي شي
منار : بلى خلاص أحسن قمت عشان اقدر انام بالليل
علي : عيل زهبي نفسج انا يايلج
منار : وين بنروح ؟
علي : بنروح السوق تشترين ملابس ولا جذي بتعيشين على هاللبس اللي عليج
منار : ( حست باحراج وماردت عليه )
علي : الو .. منار معاي ؟؟
منار : اي معاك
علي : خلاص انا كاني قريب و اوصل
منار : اوكي ناطرتك .. مع السلامه
منار سكرت الخط واتحس انها منحرجه حييل من علي ..
منار : ( بقلبها ) ماقدر ارفض وما اروح محتاجه ابدل ملابسي خست عليهم بس جد فشله لي متى بيصرف علي
طرا على بالها احمد واللي صار لها بس على طول تعوذت من ابليس حاولت تتناسى
( رن جرس الشقه قامت تبطل الباب حق علي )
علي : يللا امشي
منار : ( اطلعت وسكرو الباب وراهم )
- بالسيارة -
منار : علي انا خايفه يشوفني احد اشلون انزل السوق ؟؟
علي : شوفي انتي فكري ان اللي تعرفينهم كلهم اربع اشخاص يعني ان شاءالله ماراح تصادفينهم
منار : بس قبل ناصر شا...
علي : ( يقاطعها ) منار انا اشقلتلج .. خلاص من هاللحظه اللي فات مات ماينطرى مره ثانيه اوكي؟
منار : ( تمت اتطالع علي وماتدري اشلون تردله جميله )
علي : ( لف عليها شافها تطالعه جان يبتسم ) اشفيج؟
منار : ( طالعت الطريج من الفشله ) لا مافيني شي
( وداها سيتي سنتر الشويخ )
منار : مو جنه اهني وايد زحمه
علي : بس احسن من المجمعات وبعد في اشياء بشتريها من اهني
( انزلو ومنار مرتبكه وكل شوي تتلفت وماكانت ماخذه راحتها بس علي كان يسولف معاها ويحاول يشغلها عشان لاتخاف وراحو عند قسم الملابس وقعد يختار معاها )
( منار خذت جينزين و 3 بديات )
منار : خلاص انا خلصت جذي
علي : لا والله حلفي؟؟
منار : ( تبتسم ) اي والله صج خلصت
علي : لأ ماخلصتي يا آنسه منار وراح تشترين هذي
( خذه تنوره توصل تحت الركب على طول لونها أبيض بأزرق وايد حلوه قصتها وناعمه وحطها على جسمه )
علي : ها حلو شكلها علي انا ؟
منار : ( تظحك ) لا طبعا مو حلو كلش .. ومابي تنوره جذي كافي
علي : لا لا انا ابي تنوره اعجبتني بشتريها لي
منار : ( تظحك ) خلااص فشله شيلها عن جسمك شيقولون الناس الحين
علي : ( يغني لها ) اشعلي انا من الناس واشعلى الناس مني
علي : اتصدقين الاغنية لايقه علينا حيل .. سمعي ( قعد يغني لها بصوت واطي )
شوّيخ من أرض مكناس وسط الاسواق يغني .. اشعليّ انا من الناس وشعلى الناس مني
علي : شفتي احنا بالشويخ وبالأخص بالسوق صح ولا لأ؟؟ وقاعد اغني اشعلي انا من الناس واشعلى الناس مني .. والله سبحان الله اشلون تحققت كلمات الاغنيه جنه يدري عنه وألفها
منار : ( اظحكت بصوت عالي ) علي اشفيك خلاص اسكت شوي لاتظحكني جدام الناس فشلة
علي : ( استانس وايد لأنها اضحكت بصوت عالي حس ان سوه انجاز ) عسى دووم يارب
منار : ( استحت واسكتت )
علي : الحين بنقي بدي ابيض حق تنورتي اليديده
منار : ( تظحك ) علي خلاص والله مابي جد
علي : انتي شكو انا ابي شي حلو حق تنورتي هذي ( وتم ماسك التنوره بيده ويدور عليها بدي حلو )
علي : اييي هذي روعه ( خذا بلوزه جمها ثري كوارتر – تحت الكوع على طول – لونها ابيض وقصتها اللي فوق سبعه وكانت ناعمه وحلوه )
علي : بس تهقين قدي ؟؟
منار : ( ابتسمت ) خل اشوف ( خذتها منه وشافت السايز وردتها له ) اي قدك
علي : ( يظحك ويحط الملابس بالعربانه ) يللا عيل باقي الحيين الصندل
منار : علي عاد والله جذي بزعل عليك
علي : يبه اشفيج اختي عالية تبي صندل ابيض اهي وصتني قبل لا اطلع من البيت
منار : عاد علي جد جد مابي
علي : ( يروح صوب الصنادل والجواتي – عزكم الله - ) مو حقج حق عالية
( يمشي ويشوف الصنادل البيض وكل ما يمسك واحد يسألها اذا حلو او لأ )
منار : وانا شكو ماتعرف ذوق اختك ؟؟؟؟
علي : لا اهي قالت اللي تشوفه حلو ييبه وانا ابي رايج .. زين هذا حلو صح؟
منار : ( تبتسم ) اي حلو بس عاد جم مقاس ريلها
علي : اهي ريلها كبر ريلج
منار : ( تظحك ) وااي علي خلاص عااد مابي صج
علي : أقول خليج خوش بنت و قوليلي جم مقاسج شكلج 37
منار : ( تبتسم ) اي صح
( كملو يتشرون وعلي خذه ملابس حلوه حق عمور )
علي : منار اخذي اي شي محتاجته لاتستحين مني
منار : وانت خليت شي ماشريته لي والله مابي شي بعد خلاص مشكور
علي : لا بلى تبين .. شوفي انا الحيين بروح اشتري جم شغله وراجع
منار :اشفيك علي مابي شي صج
علي : اففف منار خلاص عاد لاتخليني اعصب يعني انتي ماتلبسين ملابس داخليه ؟؟ الا تخليني ابطها يعني؟؟ كنت اشحلاتي اقط نغزات مني مناك وانتي أبد على راي واحد وكله مابي ومابي
منار : ( اسكتت وحست باحراج وويها صار احمممر )
علي : يللا انا بروح اشتري موس حلاقه وشوية اشياء وراجع
منار : ( ميته احراج ) اوكي
( منار خذت طقمين وادعستهم تحت الأغراض بالسله شوي ورجع علي )
علي : بس بعد اكييد ماتبين شي؟؟
منار : ( للحين منحرجه حيل ) اي اكييد مابي شي
علي : ( يبتسم ) ولا حتى شي خاص بالبنات
منار : ( داخت من الفشله ) علي الله يخليك مشينا
علي : زين بس كنت بفيدج يعني
منار : لا تسلم لا تفيدني كافي جذي فدتني وايد وشريت السوق كله
علي : ( يبتسم ) زين اوكي خلاص كيفج انتي اللي بتتوهقين بعدين
منار : ( معصبه ) علي خلااص عاااد
علي : زين زين والله بسكت خلاص .. زين اخر شي الحين قسم الأجهزة الكهربائية
منار : ليش شنو تبي من اهناك ؟
علي : ( يبتسم ) ثلاجة حق شقتي
( راحو خذو الثلاجة وشره ككاوات وعصاير و بطاط نايس وخرابيط وايد )
منار : خلاص علي اشفييك ليش كل هذا ؟
علي : كيفي بجيل شقتي اشتبين انتي مناشبتني
منار : اوكي على راحتك
( خلصوا وحاسبوا الأغراض طبعا منار حدها مستحية من علي لأن شاف الملابس الداخلية واهو واقف عند الكاشير بس طوفهم بسرعه عشان لا يحرجها )
( أول ما حركوا السيارة رن تلفون علي )
علي : الو
عمر : علييي تعااال
علي : ( يظحك ) هلا بالبطل هلا بعمووري شريتلك ملابس حلويين على سبايدر مان
عمر : سبايدر ماااان
علي : اي سبايدر مان .. اذا رجعت البيت اعطيك يللا عطني ماما
ام علي : قاعد يحن الا بيكلمك .. وينك يمه كل ما اتيي يكون نايم يعني مايصير كله عند ربعك هم بيتك له حق عليك
علي : يمه اللي يسمعج يقول عايش بره
ام علي : اي بس يا يمه انت طول اليوم بره البيت و ماترد الا متأخر يعني البيت صار عندك فندق حتى الفندق احسن عالأقل الناس ياكلون فيه
علي : زين يمه اذا رديت البيت اكلمج اوكي؟
ام علي : ماشي يمه دير بالك ( سكرت الخط )
منار : اشفيها امك؟
علي : مافيها شي .. بس الامهات جذي دايما يحاتون على كل شي لو كحيت تحاتي
منار : ( تنهدت ) الله يخليها لكي ارب
علي : ( حس ان ذكرها بأمها وحاول يغير الموضوع ) ها اشرايج بمشوار اليوم ؟
منار : حلو بس يتعب
علي : عادي اعتبريها رياضه
( كملوا سوالفهم لين اوصلوا ونزل معاها عشان يوصلها )
علي : مصطفى عندي اغراض ابي احد يصعدهم لي فوق
مصطفى : مايهمكش يا باشا توكل انت على الله واطلع واستريح وكل حاجه هتوصلك لغاية عندك
علي : بس تره في وايد اغراض وفي ثلاجة صغيرة يعني ديرو بالكم
مصطفى : ماتخفش بعينيا دول
علي : تسلم تفضل امسك ( عطاه السويج وخمس دنانير )
مصطفى : متشكر يا باشا متشكر اوي ربنا يفتحها بوشّك
علي : يللا سلام ( و صعد فوق مع منار )
- في بيت علي –
ام علي : عثمان يمه دق على اخوك شوفه وينه صاير ماينشاف كلش والله قمت احاتي هالولد
عثمان : يمه خليه كيفه اي شي يصيرله اهو يتصرف ريال اشكبره احنا شكو فيه
ام علي : لا يمه بس اهو ماكان جذي صارله جم يوم مو على بعضه اعرف ولدي انا
عثمان : يمكن يحب
ام علي : عثمان استح على ويهك كلمني عدل انا امك
عثمان : اي يمه وانا اشقلت يمكن يكلم وحده وحابها
ام علي : الله يستر على وليدي من بنات هالوقت
عثمان : اي والله ادعيلي انا بعد
ام علي : ويي الله يستر عليكم يا اعيالي يا بعد قلبي انتو .. دق عليه يمه عشان خاطري شوفه وين فيه بس لاتقول اني انا اللي وصيتك
عثمان : ان شاءالله
- - - - - -
منار قاعده تحط الأغراض بالثلاجة وعلي واقف يمها يسولف معاها وياكل شبس ليز .. ورن تلفون علي
علي : لحظه هذا اخوي
علي : الو هلا عثمان
عثمان : وينك
علي : ليش اشبغيت؟
عثمان : بس بعرف وينك ؟
علي : امي مطرشتك عدل؟
عثمان : اي اي
علي : اشفيها امي جني ولد بو 10 سنين .. قولها انا بالدوانيه ويمي لويه وشباب
عثمان : زين بس تردلياها
علي : زين طس الحين باي ( سكر الخط )
منار : خلاص علي روح الحين امك تحاتيك صج صاير ماتقعد معاهم
علي : ( يبتسم لها ) تطرديني ؟؟؟
منار : لا بس امك تبيك
علي : ( ساكت ويطالعها )
منار : ( توخر ويهها وتحط بطول الماي بالثلاجة )
علي : منار
منار : ( ماتطالعه وتكمل اتحط البطول ) هلا
علي : طالعيني شوي
ادري واايد طولت بس النت بطيء عندي وهم للحين مادرست بسرعه بحطه واطيير ادرس ..
ادري ان مو طويل بس شسوي امتحانات وشغل ماقدرت اكتب اكثر بس اول ما اخلص الدراسه اكتب لكم وانزل يمكن عالفير
|
__________________  آلبَكِيْ مهمَآ " بكيِنَآ ’ مآيخَفِفْ الألَمْ , مآيخَفِفْ الألَمْ , مآيخَفِفْ الألَمْ , )
:glb::rose::glb: النيم القديم ,,,,,ملامح مزيفهه
:wardah::wardah: ♫•ηαηα
:wardah::wardah: احبها لانه صديقهه رائعهه
|