فهد (انا لازم اعرف شنو ورا ابوي بالظبط ؟ يكون متزوج ؟؟ وعنده ولد بعد !!.. انا لازم اعرف وببحث في الموضوع بهدوء وبدون ماحسس احد بشي )
رجع فهد يكمل شغله قبل مايروح الشركة واخذ شور ولبس وطلع
---------------
في بيت بو ساره
ام ساره : ميري .. شوفي ساره صحت او لا واذا صاحيه ناديها
الخدامه : ساره في نوم
ام ساره : رحتي غرفتها ؟
الخدامه: انا في يقوم من نوم ساعه 6هيا مافي نوم
ام ساره : غريبه تسهر .. طيب انتي روحي جيبي دواي بالثلاجه
"كانت ساره سهرانه تفكر في فهد مع انها حاولت انها تطرده من بالها بس ماقدرت صورته انطبعت في بالها وخافت ينطبق عليها الحب من اول نظره لانها ماتتمنى الشي هذا ابد .. "
كانت ساره موقته جوالها عشان مايفوتها ميعاد دوا امها لكنها اكثر من مره تقفله من غير شعور.. وبعد نص ساعه جلست وانتبهت انها تاخرت على امها فزت على طول وغسلت وراحت تركض لان امها مصابه بمرض القلب والسكر وصارت ملازمه السريرعلى طول ولازم تاخذ الدوا بميعاده
ساره خايفه : يمه اخذتي دواج ؟؟
ام ساره : أي اخذته .. ليش خايفه يمه مافيني شي لاتخافين علي روحي كملي نومج
راحت ساره وجلست جنب امها : يمه اخر مره بتأخر عليج سامحيني
ام ساره: ياساره لا تخافين علي دواي وباخذه انتي شوفي نفسج شوي .. لاتشغلين نفسج فيني
ساره : يمه اذا انا ما اهتم فيج منو يهتم فيج
حست ام ساره انها حمل ثقيل على بنتها وخايفه يجي اليوم الي يجي فيها نصيبها وترفض بسببها
----------------
كعادته اول مايصحى من النوم يتمرن ,يجري على جهاز السير وبعدها على طول يرفع حديد وبعدها اخذ شور وانتبه لغرفته كيف مقلوبه حط ايده على راسه وقال في نفسه : اففف هذه غرفتي ؟!! مقلوبه كلها على بعضها صج اني فوضواي .. وجلس يرتب فيها وانتبه لشي يلمع تحت السرير . . : شنو هذا ؟
حاول يطلعه ماقدر فرفع السرير وطلعت سواره .. جلس يدقق فيها : سواره وبغرفتي ؟
منو حقته؟؟ .. منو دخل غرفتي ؟!! امي لايمكن تدخل ترتبها .. "تذكر ان غنا دخلت قبل يومين "
اها اكيد لغنا اروح اعطيها اياها
وراح ينادي على غنا
غنا : هلا يوسف
يوسف : غنا مافقدتي شي ؟
غنا : فقدت شي ؟!! مثل شنو ؟
يوسف : فكري
غنا :امممممم ماذكر اني فقدت شي
يوسف : طالعي ايدج
شهقت غنا : الاسوااااره
يوسف : من شهقتج الاسواره هذه مهمه
غنا : وينها شفتها ؟
يوسف :بالاول شنو اهميتها عندج ؟
غنا : هذه من جدتي الله يرحمها
يوسف : اها طيب انتي وين رميتيها ؟
غنا : مادري بس بما انك سألتني اكيد لقيتها
يوسف : وشنو جائزتي ؟؟!!
غنا : الي تطلبه
يوسف : رتبي غرفتي
غنا : من غير الاسواره مابقولك لا .. والحين عطني اياها
يوسف : خذي
غنا : مدت يدها بتاخذها
يوسف : عطيني ايدج البسج اياها
استغربت غنا من تقلبات يوسف
يوسف : مو تقولين تبيني اصير مثل اخوج ؟ عطيني ايدج
مدت غنا يدها ولبسها الاسواره ابتسمت غنا : تانكيو يوسف والحين يلا بروح غرفتك ارتبها
يوسف: ادري انج مستغربه ليش قلت لج رتبيها .. بصراحه ماعرف ارتب مثل البنات واستلمت للامر الواقع
ضحكت غنا : تستاهل عشان مره ثانيه ماتصرخ علي وتمنعني
يوسف : بلا هذره زايده ويلا يلا روحي رتبي الغرفه
جلست غنا ترتب غرفته وطول الوقت تعلق ويوسف يهزأ فيها على تعليقاتها وميتين ضحك
جلس فهد يراقبهم من بعيد وهو مبسوط من يوسف وارتاح نوعا ما
فهد : غنوءه
التفت غنا على فهد: هلا فهد
فهد : اذا خلصتي تعالي ابي اكلمج
غنا : ان شاء الله
يوسف: شكله فهد عنده سالفه مهمه
غنا : أي والله حتى انا عندي نفس الشعور
يوسف : الا احمد وينه ؟
غنا : والله مادري يمكن طالع مع اصدقاءه تعرف احمد محبوب وربعه كثار
يوسف : شتقصدين بالظبط بتعايريني لان ماعندي ربع ترا الف من يتمنى يرافقني بس انا الي ما احب
غنا متفاجئه ومصدووووومه من تفكير يوسف وتركت منظف الزجاج وقطعة القماش الي بأيدها: يووووووسف ليش انت كذا دايما تشك في كلامي واني احاول اجرحك متى تفهم ان انت وفهد واحمد عندي واحد
يوسف : ها الحين فهمت انتي تفكريني اني اغار من احمد مو ؟
تركت غنا الغرفه وفي طلعتها : اللهم طولك ياروح اسفه يوسف ما اقدر اكمل كمل لحالك
مسك يوسف غنا : سوري غنا بس مادري ليش تنرفزت
غنا : مقبوله بس اسفه صدقني مو زعلانه بس مو قادره اكمل بعدين

--------------------------
مشت غنا وهي متنرفزه وواصله عندها لراسها ودخلا غرفتها وسكرت الباب بقوة ورمت بنفسها على السرير ( يوسف هذا بيجيب لي الجنون مره وحده اول كان احسن على الاقل عارفته زين .. الحين مو فاهمته ابد مره عسل 0 بصل .. تعبت من افكاره الغبيه )
سمعت صوت فهد من برا كان يكلم جوال وتذكرت ان كان يبي يكلمها
: اوه نسيت فهد يبي يكلمني .. كله منك يايوسف نسيتني
طلعت على طول وراحت مكتب فهد
فهد : تعالي جلسي جنبي ابي اكلمج في موضوع
غنا : خير فهد
فهد خجلان ومو عارف يفتح الموضوع معاها
غنا : شفيك فهد كاني فهمت شي
فهد : لا والله مانتي بسهله .. المهم انا قررت اني اكمل نص ديني وكلمت امي تختار لي البنت الي تناسبني .. وهي وصفت لي بنت فأبيج تقولين رايج فيها بكل صراحه .
غنا : ومنو سعيدة الحظ هذه
فهد : امممم ياربي شنو اسمها .. هي بنت ام رائد
غنا انصدمت : مناااااال ؟
فهد : أي أي هذا اسمها
غنا متفاجئه " لان البنت هذه مغروره وهي عارفه زين مو من البنات الي ممكن يعيش معاها فهد .. مطالبها ماتخلص وماعندها احترام للي قدامها وتستصغر كل شي حولها ومافي شي يقنعها "
فهد : من ملامحج البنت هذه ماتناسبني
غنا : شقولك يافهد .. انت تبي رايي بصراحه وانا من واجبي اني اكون صريحه معاك
فهد : انا واثق فيج ياغنا عشان كذا قلت ابي رايج
غنا : والله يافهد انت تستاهل احسن من هذه البنت
فهد : طيب شرايج انتي تختارين لي البنت ؟
غنا : المشكله ان امي اكيد بترفض البنت الي بختارها لك
فهد : وصديقتج الي امس جات ؟
ضحكت غنا وتذكرت ساره : لايكون انت الي طلعت بوجهها
ابتسم فهد : والله هي الي دخلت مكتبي
فطست غنا من الضحك : وانا اقول ليش معصبه وتقولي انتي مخبية غرفتك وين اثاريها هي الي دخلت مكتبك
فهد : طيب البنت هذه تناسبني ؟
غنا : مو عشانها صديقتي .. بس ساره البنت الي تناسبك كثير قايمه بأمها وحنونه وطيبه ووبعدين سارونه حلوه
فهد( من ناحية حلوه فهي حلوه )
غنا : ايه انت شفتها شرايك فيها ؟
احمر وجه فهد مو متعود على كذا اسأله
ابتسمت غنا : اول مره اشوف فهد خجلان كذا
فهد : هيه عطيتج وجه
غنا : بس ها ماقلتي لي شكلها عجبك ؟
فهد : ما اذكرها
غنا : عليييييينا
فهد : طيب حلوه ها رضيتي الحين ؟
غنا : ياااااااااااااااارب تكون من نصيبك
فهد في قلبه ( امين ) " رغم ان فهد ماعرف عنها شي بس دخلت قلبه خصوصا بعد ماوصفتها غنا "
فهد : بس مو كأنها صغيره ؟
غنا : ساره اكبر مني بسنتين هي تأخرت سنه وعادت سنه يعني الفرق 8 سنوات
فهد : مو كثير؟
غنا : لا مو كثير بعدين ساره بنت ذكيه وواعيه وماتهتم بكذا
فهد : خلاص خلينا نتوكل على الله ونكلم امي
" غنا كثير متخوفه ومتوقعه ردة فعل عنيفه من ام فهد خصوصا غنا عارفه ان ام فهد مجرد ماراح تسمع اسم ساره راح تعرف ان الي كلمت فهد هي غنا وهي الي خلته يشيل منال من راسه "
------------------
بعد ماطلعت غنا من مكتب فهد .. اتصل فهد على طول بأبوه
فهد : هلا يبه
بو فهد : هلا فهد شلونك
فهد : بخير يبه .. انت شلونك
بو فهد : الحمدلله ..
فهد : يبه وصلت ؟ ولحقت على شغلتك ؟
بو فهد : ايه .. " فجأه وهو يكلم ابوه سمع صوت حرمه جنبه تناديه "
مجرد ماتكلمت ام بدر قفل بو فهد الجوال
" اكيد كلكم تسألون منو ام بدر .. ام بدر هي زوجة بو فهد الثانيه تزوجها قبل 7 سنوات وجاب منها بنت سموها جوري .. اما بدر بتعرفونه من خلال الروايه من هو "
فهد زادت شكوكه وقرر ينبش في الموضوع ويعرف شنو ورا ابوه
دخل مكتب بو فهد وجلس يفتش فيه ولقا اوراق لفتت انتباهه
" كانت اوراق من دار الايتام .. وهي عباره عن ختم بموافقة خروج طفل عمره 7 سنوات واسمه بدر.. وهو طفل معاق "
فهد : بدر ! الاسم هذا سامعه من قبل .. بدر؟ ..بدر؟
:ايه تذكرت بدر هذا الاسم الي سمعت ابوي في هذاك اليوم يسأل عنه عند الحرمه الي كان يكلمها
بس منو هذا بدر وليش من دار الايتام (شنو السر الكبير هذا يايبه شنو مخبي وراك .. انا لازم اتانى وما استعجل )
" طبع نسخه من الاوراق لهدف بعدين راح تعرفونه "
شافت ام فهد فهد في المكتب وحست فيه انه مو على بعضه ومرتبك
ام فهد : فهد في شي ؟
فهد : لا يمه مافي شي بس في اوراق ابوي طلبها مني
ام فهد : الا صحيح ابوك من الصبح ماشفته
ضحك فهد بسخريه : توك تسألين ؟!! ولا المصيبه ان حتى ابوي ماقال لك
وترك الغرفه وهو يقول ابوي مسافر يقول... يقول انها لشغله ضروريه
ام فهد : مسافر !! مو توه راجع شنو روا سفراته هذه
--------------
ام بدر : بو فهد منو الي كان يكلمك
بو فهد : هذا فهد
ام بدر : حس بشي ؟
بو فهد : والله هذا الي خايف منه انا مابي يعرف او يشك بشي قبل لا اقوله
ام بدر : اسفه يابو فهد
بو فهد :الغلط مو منج وانتي نصحتيني قبل اني افاتحهم بالموضوع بس الحين صعب
ام بدر : بس اذا عرفوا انك تزوجتني عشان بدر ماراح يزعلون ان شاء الله
بو فهد : انا صحيح تزوجتج في البدايه عشانه بس صدقيني يا ام بدر انج غاليه علي ولايمكن افرط فيج .. انا مارتحت الا معاج
ابتسمت ام بدر : الله يخليك لي يابوفهد ويخليك ذخر لعيالك ويخليك للبدر
بو فهد : بدر امانه عندي وادري انج تعذبتي معاه بس اكيد الله مابيضيع اجرج
ام بدر: لاتقول كذا يابو فهد بدر ولدي واحبه مثل ولدي بالظبط ربيته على ايدي 8 سنوات ماقدر استغنى عنه
بو فهد : لو مو اعاقته ولا ماكان تركته بدار الايتام لـ7 سنوات وعشت تانيب الظمير طول السبع سنوات هذه لحد ماتزوجتك وريحتيني من تعذيب الظمير هذه
ام بدر: بو فهد خلاص صار الي صار الي فات مات انسى مو على طول تذكر والحين بدر تحت رعايتك وهذه اهم شي ... بس شنو راح تقول لفهد اذا رجعت واسألك ليش سافرت ؟
بوفهد : لما اتصلتي وقلتي لي ان بدر في المستشفى جن جنوني ماعرفت اتصرف وفهد حس ان فيني شي مو طبيعي وانا خايف ان شك في شي .. وفهد انسان فطن يفهمها على الطاير ومتأكد ان راح يسأل بس ماعليج اقدر ادبرها .. والحين نامي ولا تحاتين
------------------------
اليوم الثاني الساعه 10 الصبح
غنا كعادتها تجهز لنفسها الفطور
دخلت ام فهد عليها بالمطبخ وجلست على الطاوله : صباح الخير غنا
غنا : هلا يمه صباح النور " وباست راسها "
ام فهد : غنا الي اتفقنا عليه اليوم اوكي
غنا تذكرت وملامح الزعل على وجهها : يمه ممكن بس تصبرين علي شوي
ام فهد : افف انا ما افتح موضوع الا بعد ما اشاور نفسي فيه مليون مره واذا فتحته ما اتراجع فيه
غنا عضت على شفايفها " دلالة على التعصيب والعجز بنفس الوقت " : على امرج يمه الي تامرين فيه
ام فهد : انا بروح غرفتي وقولي للخدامه تصعد فوق غرفتي
غنا : ان شاء الله

واهي تصب الشاي في الكاس كانت ترتجف وكبته وطاح على قدها وصرخت من قوة الحراره
سمعها يوسف الي كان داخل من بره بعد ماجرى ودخل ركض وقرب من غنا
يوسف مرعوب : غنا صار فيج شي ؟
غنا تتألم : لا كله حرق خفيف
يوسف : وريني رجلج خليني اتاكد
غنا : مافيني شي بحط مرهم عليها وبتخف
نزل يوسف ومسك رجل غنا وشافها منفوخه ومحمره والحرق مو عادي ونادى الخدامة تجيب عباية غنا
غنا : والله مايحتاج
يوسف : هذا حرق مو شي هين لاتستهينين فيه وبعدين انا كلمتي ما اثنيها
غنا : ان شاء الله
-------------------------
في السياره
"شافت غنا في يوسف اول مره خوفه عليها حسته مو يوسف الي تعرفه وان هي جالسه تظلمه والغلط منها الي مو قادره تصبر عليه "
غنا : يوسف اسفه
يوسف : وعلى شنو تعتذرين وكذا فجأه؟
غنا : على امس لما عصبت عليك وماكملت ترتيب الغرفه
يوسف : ماصار شي عادي انا كنت عصبي والمفروض ماقلت الكلام الي قلته ..
لفت غنا راسها للنافذه وهي تفكر في كلام ام فهد ومتخوفه منه
" وصلوا المستشفى وضمدو الحرق وقالوا لها انها تغيره كل4 الى 6 ساعات لحد مايخف "
يوسف : تقدرين تمشين عليها ؟
غنا : أي عادي
يوسف : اكيد ؟
غنا : اكيد
يوسف : اوكي وانتبهي ياغنا المره الثانيه .. ممكن مانصير بالبيت بعدين منو يوديج المستشفى
غنا : ان شاء الله انتبه المره الثانيه

-----------------------------

بعد مارجعوا البيت
يوسف: غنا اكيد دختي من الشمس روحي ريحي
غنا : ان شاء الله وانت بعد .. ماخليتك تكمل تمارينك
يوسف :عادي التمارين تفداج كم غنا عندنا
غنا : تسلم ياخوي
" يوسف يكره كلمة ياخوي من غنا وهو مو لاقي تفسير لكراهيته للكلمة هذه يحس ان مشاعره اتجاه غنا مختلطه .. مره يحس بالمسؤوليه اتجاهها ومرات يحس انها مثل اخته واحيانا يحس ان هو يحبها مو كأخت وهذا الشي مخوفه كثير عشان كذا يتصرف معاها احيانا بعجرفه وعصبيه عشان يقنع نفسه انه هو مايحبها ويعتبرها كاخت واحينا كدخيله عليهم !!"
يوسف : طيب انا بروح وانتي روحي نامي
--------------------
دخلت ام فهد على فهد في مكتبه وجايبه معاها كاس شاي لفهد
فهد : تسلمين يمه
ام فهد : ابوك الله يهداه سافر قبل لا اكلمه في موضوعك
فهد : عادي انا مو مستعجل
سكت شوي وبعدين قال : يمه انا بصراحه مابي البنت الي قلتي لي عليها
استغربت ام فهد ( وفهد شنو يعرف عن هالبنت حتى قال مايبيها ) : ليش ؟
فهد : يمه انا اعرف اخوها رائد ورائد مايعجبني تصرفاته وخوفي ان اخته تكون مثله
ام فهد : لا هذاك اول طيش شباب الحين رائد تغير صار خوش رجال
فهد : يمه لاتستعجلين والي خلق هالبنت خلق الف غيرها .. انا مو مرتاح للخطبه هذه
ام فهد : وانت شدراك عنها انا امك ماعندك ثقة فيني .. يعني بختار لك بنت مو من ثوبنا ؟ ولاتناسبنا
فهد : بصراحه يمه في بنت انا ابيها
ام فهد : وانت من وين تعرف هالبنت ؟
فهد : شفتها مره وحده وبالصدفه وسألت غنا عنها ولما قالت لي مواصفتها لقيت فيها صفات البنت الي اتمناها
ضحكت ام فهد بسخرية : قلتي لي غنا امم وانا اقول منو فر مخك
فهد : يمه انا رجال مو غنا ولا أي احد يفر راسي وقراراتي اتخذها عن وعي وافكر الف مره قبل لا اخطي خطوة وحده
ام فهد : بس غنا تبيك تاخذ صاحبتها عشان تلقى من يرعى امها المريضه
فهد : وانتي كيف عرفتي ان المقصوده هي البنت الي امها مريضه
ام فهد : مايبي لها غنا كانت دايم تقول لي عنها وانها شفقانه على صاحبتها وصاحبتها كانت دايم تتمنى زوج يرعى امها قبل لايرعاها
فهد : غنا قالت كذا ؟!!
ام فهد : اسألها بنفسك اذا مو مصدقني " طبعا ام فهد ما في اذكى منها في هذه المواقف "
فهد : اممم لو تفكرين بصراحه هذه تنحط على الجرح يبرى وانا ان كنت متردد في خطبة هالبنت فأنا متيقن الحين انها البنت الي تناسبني لان الي مافيه خير لاهله مافيه خير للناس
عصبت ام فهد : البنت هذه ماراح تاخذها الا على موتي والا طول عمري ماراح ارضى عليك
نزل فهد راسه وهو يستغفر ربه من عقلية امه وتفكيرها السلبي والغير متحظر
" طبعا ام فهد اشتعلت النيران داخلها وراحت على طول غرفة غنا "
غنا كانت نايمه وتعبانه وباكيه بعد الموضوع الي قالت عنه ام فهد .. بس ام فهد ماتعرف الرحمه توجهت لغنا وهزتها من خصرها بقوة
فزعت غنا خصوصا انها كانت مزعوجه من منام شافته : بسم الله " وجلست تزفر بحده "
ام فهد : شنو الكلام الي جالسه اسمعه من فهد ياقليلة الادب ياناكرة الجميل
غنا متفاجئة : أي كلام يمه
ام فهد : لاعاد تسميني يمه .. دور البنت المطيعه والمحبه مايناسبج ابد
غنا : فهميني شنو صاير
ام فهد : انتي ليش فريتي مخ فهد ضد منال بنت ام رائد
غمضت غنا عيونها ووهزت راسها تعبير على ان الي توقعته فعلا صار : يمه البنت هذه ماتناسب فهد هي دارسه معاي بالثانويه بنت الكل ماسلم من شرها وحركاتها صبيانيه وتصرفاتها تافهه
ام فهد : كأني جالسه اسمع مواصفتج ؟
غنا : يمه صدقيني الي سويته لمصلحة فهد
ام فهد : ومصلحته برايج مع ساره ؟ الي بتتزوجه بس عشان امها ؟
غنا : ساره الي مو عاجبتج متأكده انها بتهتم في فهد وبتحبه وبتحطه في عيونها .. انا اعرفها من لما كنا بأبتدائي حرصها على امها واهتمامها بصديقاتها ومساعدتها لكل من حولها يأكد لي انها بتكون نعم الزوجه الي بتريح فهد .
ام فهد : احلمي على قدج ساره لايمكن تاخذ فهد .. واليوم اليوم بتجي ام رائد بتشوفج وبتخطبج لرائد بأذن الله وافتك منج ومن افكارج واحتلالج لعقول عيال عمج
دخل احمد عليهم وهو قمة التعصيب بعد ماسمع اخر جمله من امه : يمه ان جات ام رائد اليوم وخطبت غنا لحش رجولها وحش واحرجج قولي لها ماعندنا بنات للزواج
ام فهد : نعم هذا الي ناقصني انتي شسويتي في عيالي .. سحرتيهم مو غريبه عليج امج ايطاليه تربت على الكفر..
ماتحملت غنا الكلام و قامت تبكي بحرقه بدون ماترد
احمد : حرام عليج يمه الحرمه متوفيه وهي على الاسلام وانتي تنعتينها بالكفر ؟ استغفرالله .. بس يمه صدقيني ان لو ابوي درى انج اتفقتي مع ام رائد انهم يجون ويخطبون غنا راح يقوم الدنيا .. انتي تعرفين من رائد هذا ؟؟
اذا ماتعرفين انا اقولج .. رائد هذا الي تبين ترمين غنا عليه مدمن اعوذ بالله .. وغير كذا عاصي عاق كم مره صرخ على ابوه الشايب المسكين قدام الله وخلقه..كم مره حاول يرمي ابوه دار المسنين من غير شفقه .
زادت غنا في البكا ولمت المخده وهي تدعي ربها ان يهدي ام فهد
ام فهد : هذا كله طيش اذا تزوج بيتغير
------------------------
دخل عليهم يوسف بعد ماكان مار وسمع الصراخ
يوسف : خير شصاير ؟ صوتكم لاخر الدنيا
احمد : يوسف انت تعرف رائد مو ؟
يوسف : أي الله لايوفقه شفيه هذا بعد
احمد : قبل لا اقولك شفيه .. لو جا وقال يبي يناسبك شنو ردة فعلك ؟
يوسف : بكل بساطه اقطع رجله واحوسه حوس هذا الي ناقصنا بعد اخر شي يفكر فيه اصلا
بس ليش هالسؤال فجأه
ام فهد : رائد بيجي يخطب غنا " ام فهد توقعت ان يوسف بيكون اسعد انسان بالخبر هذا بس صار عكس الي توقعته تمااااااما"
يوسف بصوت عالي: رائد قبل لايوطي هالبيت بتوطى فبطنه .. فقبل لاتجي ام رائد وتنحرجين قولي لها ماعندنا بنات للزواج ولا راح يصير شي عمركم ماشفتوه
احمد : ويايمه انتي سويتي الشي هذا بدون ماتستشيرين احد .. حتى ابوي ماقلتي له
ام فهد : وابوك من متى يهتم .. هذا هو على طول مسافر .. ولايسأل عن شي
ابتسم احمد بسخريه : ابوي بس ؟!! على العموم ابوي اذا سافر فهو لمصلحتنا واذا كان هنا فهو مستحيل مايدير امورنا ومايشوف احتياجاتنا ابوي مو مقصر لا معانا ولا مع غنا
يوسف : ماراح يصير الي تبينه اتصلي بام رائد واعتذري منها
ام فهد : صج انكم عاقين كلكم وقفتوا بوجه امكم عشان بنت وحده غريبه
يوسف : هههههه غريبه !! ليش غنا مو بنت عمنا ؟؟
ام فهد : عمكم لما تزوج ام غنا جدك تبرى منه بس شفقة من ابوكم اخذ غنا
انصدمت غنا ومن كثر مانصدمت صرخت : بسسسسس خلاص خلاص

كان فهد بغرفته وسمع صرخة غنا وراح يركض : شصاير ليش هالفوضى .. وغنا شفيج ؟
احمد يهمس في اذن فهد بتوتر : فهد تكفى طلع امي .. امي تمادت اليوم كثير
فهد : ليش شصاير ؟
يوسف : بعدين نقولك بس طلع امي من الغرفه الحين
مسك فهد امه وطلب منها بهدوء تطلع من الغرفه
ام فهد : اتركني بروح غرفتي رفعتوا ضغطي
رجع فهد لغنا : ممكن ادخل
غنا تمسح دموعها : تفضل
جلس جنبها وجلس يكلمها ويهديها
فهد : انا للحين مادريت شنو صاير بس الي متأكد منه ا ن امي جرحتج بكلامها .. بس كل الي ابيج تعرفينه ان احنا وراج وماراح نتركج .. ولا تخافين وبعدين اذا امي جرحتج بالكلام لاتهتمين فيه الكلام الي يأذيج اسمعيه من هنا وارميه من هنا
" غنا طول مافهد يتكلم كانت عيونها تدمع وهي تذكر كلمة ام فهد امج تربت على الكفر .. وجدج تبرى من ابوج "
جلس فهد يمسح دموع غنا : شكل الكلام الي قالته ماتقدرين تتحملينه صح
هزت راسها بالنفي وصوت مبحوح وحزين : لا ياخوي اقدر انساه عشانكم انسى كل جروحي
" طبطب فهد على راسها وحطه على المخده وطلب منها ترتاح وماتفكر في أي شي وتركها وطلع "