|
عند شلة سامي .. كانوا في الكافتيريا جالسين ياكلون ..
سامي: ابي اعرف وين اختفوا ..
يزيد: يمكن عندهم محاضره ..
سامي: ومتى تنتهي محاضرتها ..؟!
ريان: ما اقول إلا الله يعين غيدا .. شكلك ناوي عليها نيه مو سهله ..
سامي: والله لاوريها واعلمها منهو سامي عشان تبطل تسوي هالحركات ..
صالح: اللحين انت ليه مصر انها هي .. يمكن احد غيرها ..
سامي: محد حاقد علي غيرها ..
صالح: طيب مو شرط يكون الشخص حاقد عليك .. يمكن مثلا واحد غلط بالسياره وفقع كفرة سيارتك بدل سياره ثانيه ..
فهز سامي راسه بإصرار وقال: مستحيييييل .. ماكو غير غيدووه ..
يزيد: طيب لو ما طلعت هي ..؟!
سامي: إلا هي ..
يزيد: انا اقول لو ..
سامي: مافي لو .. هي يعني هي ..
ريان: الاخ مصر بزياده ..
عماد: ان شالله ما تطلع هي ..
سامي: لو تدعي من اليوم لين باجر .. ما راح يكون غيرها ..
فسمعوا ازعاج عند باب الكافتيريا .. فلفوا وشافوا شلة غيدا داخلين ..
سامي: واخيرا يت ..
فوقف وقال بصراخ: غيــــــــــــــــــــــــدا ..
فلفت غيدا وشافته .. فقالت بإبتسامه: يا عيون غيدا ..
سامي بعصبيه: ممكن اعرف شنو ساويتي امس ..؟!
غيدا ببراءه: ما ساويت شي ..
وطلاب الكافتيريا يطالعون فيهم .. لأن غيدا واقفه عند الباب وسامي واقف في وسط الكافتيريا ويتكلمون بصوت عالي ..
سامي: غيــــــــــــدا بلا جذب ..
فتفاجأت غيدا ولفت على صاحباتها وقالت: انا .. اجذب ..؟! بليز يا رفيجاتي قولوله اني صاجه .. انا عمــــــــــــري ما جذبت .. صح ..؟!
تهاني: حرام عليك يا سامي .. رفيجتنا ما تجذب ..
سامي بعصبيه: غيــــــــــــــــــــــــدا يا حمــــــــــــاره .. ابي افهم ليــــــــــــش فقعتي كفرة سيارتي امس ..؟! ليـــــــــــش ..؟!
غيدا ببراءه: سامي حرام عليك .. انا اصلح حركات زي جذي .. هذي حركات عيال مو بنات ..
سامي: ياسلام .. على اساس ان حركاتج حركات بنات .. اصلا انتي وشلتج ذي كلها شاذين .. فاهمه ..؟!
خلود بعصبيه: هيه هيه هيه احترم نفسك ولا تغلط ..
غدير: تراك مو عارفنا عدل يا سامي ..
سامي: انا ما قلت شي غلط .. احترموا انتم نفسكم عشان الناس تحترمكم .. وغيروا من ستايلكم ذا المنحرف ..
غيدا بإستهزاء: والله ما ادري من فينا المنحرف ..
سامي: فاهم قصدج عدل .. بس فيه فرق بيني وبينج .. انا عالفطره .. بس انتم غيرتم فطرتكم وحولتم لمسترجلات ..
فتنرفزت خلود وقالت بعصبيه: سامي لا تحدني اسوي شي ما ابي اسويه ..
غيدا: وقف يا خالد ..
فلفت على سامي وقالت بخبث: كلامك وايد حلو .. بس يا حبيبي قبل لا تقول هذا الكلام عننا شوف نفسك .. عالأقل احنا لنا مركزنا وشرفنا في المجتمع .. مو مثل حثاله غلط مثلك يا ولد سيليسيا ..
فتح سامي عيونه بصدمه ..
غيدا: اتوقع انك فاهم قصدي .. ولا تبغاني اوضح اكثر ..
سامي بصدمه: انتي .. انتي .. انتي كيف ...
غيدا: اشوف الصدمه على ويهك .. ليه كنت متوقع اني ما اعرف ..؟! اذا خبيت هذا الشي عالناس ماتقدر تخبيه عن غيـــــدا ..
فحط سامي ايده عالطاوله وطالع في الطاوله بصدمه ..
يزيد: سامي شسالفه ..؟!
صالح: شتقصد غيدا بكلامها ..؟!
فرفع سامي راسه ولف على غيدا وقال بعصبيه: انتي شدراج ..؟!
غيدا بإبتسامه: مافي شي يتخبى على غيدا ..
فجاء سامي عندها ومسكها من بلوزتها وقال بعصبيه: تحجي .. من فين عرفتي ..؟!
غدير: هيه هيه شتحسب نفسك ..
غيدا: لا احد يتدخل ..
وطالعت في سامي ومسكت ايده وبعدتها عن بلوزتها وقالت: ما راح اقولك من فين عرفت .. بس حبيت ابين لك انه مافي شي يتخبى عني .. وما دام حطيتك في راسي فراح تندم .. تعرف شنو يعني تندم ..؟!
فعض سامي على شفته بقوه بعدين قال: غيدوه .. اقسم بالله لو تفتحي فمج بشي راح تشوفين شي عمرج ما شفتيه .. تراج ماشفتي ويهي الثاني ..
غيدا: ومين قال اني حأسمع كلامك ..؟! لو بغيت اتحجى راح اتحجى بكيفي وفي اي وقت ابغاه وما احتاج امر منك ..
فرفع اصبعه قدامها بتهديد وقال: انتي بس جربي .. حياتج من بعدها حتصير اسود في اسود .. راح تتعبين كثير وياي ..
غيدا: سامي .. سامي لا تهدد .. انا ما احب احد يهددني .. لا تحدني اني اقول جدام طلاب الكافتيريا عن كل شي .. كلها ثلاث كلمات .. لا تحدني اني انطق هالكلمات لأنه من بعدها حتصير فضيحه كبيره للراهي وولده .. ترا كلها ثلاث كلمات انطقها واخلص .. انتبه انك ترفع اصبعك جدامي لا اتهور واقولها .. فهمت يا بابا ..؟!
فمسك قبضة ايده بقوه لا يتهور ويضربها .. لف وراح لطاولة اصحابه .. اخذ جواله وطلع من الكافتيريا .. فضحكت غيدا والطلاب كلهم يطالعون فيها والفضول ذابحهم .. وصارت حكاية سامي مع غيدا هي حديث الطلاب ..
يزيد: شسالفه ..؟!
عماد: باين ان السالفه جايده ..
صالح: غيدا ما يي من وراها إلا المصايب ..
وريان كان يطالع في غيدا نضرات غريبه .. هذي شدراها ..
غيدا: ياهــــــــــــو .. قولوا لرفيجكم اني انا اللي فقعت كفرة سيارته هههههههه ..
يزيد: طيب مبروك ..
غيدا: الله يبارك فيك .. عقبالكم ..
فقام ريان وقال لأصحابه: انا بروح اشوف وين سامي ..؟!
غيدا: لا تنسى تسلملي عليه ..
ريان بعصبيه: انتي شفيج حاشره انفج بيننا .. تعدلي لا اعدلج ..
فطالعوا اصحابه فيه بإستغراب .. مو من عادته يعصب بسرعه ..
خلود: له له له .. ريانوه المريض صار عصبي مثل خويه ..
تهاني: غريبه .. كان ينرفزنا ببروده .. سبحان مغير الاحوال ..
فمشي ريان وطنشهم وخرج من الكافتيريا .. فطالعوا فيه وبعدين جلسوا عالطاوله ..
غدير: غيدا ..
غيدا: هلا ..
غدير: شهالشي اللي ماسكته ع سامي ..؟!
تهاني: ايه صح .. ايش هو ..؟!
غيدا: نو نو نو .. ما راح اقولكم .. هذا شي سري وخاص ..
خلود: باين انه جايد ..
غيدا: جايد وبقوه ..
خلود: كان نفسي اضربه ..
غدير: حتى انا ..
غيدا: مين ..؟!
خلود: سامي .. نرفزني كلامه ..
تهاني: عادي لاتهتمون .. اصلا الاولاد يتنرفزون لمن يشوفون بنات مسترجلات .. يكرهونهم وبقوه ..
غدير: شدراج ..؟!
تهاني: في ولد اضفته عندي في البيبي .. سألته إيش اكثر شي يرفع ضغط الاولاد قالي لمن نشوف بنت تقلدنا ..
خلود: ههههههههههههههههههههه ..
غيدا: اقول .. انا امس فكرت في شي .. بس من كلام تهاني تحمست ..
غدير: ايش هو ..؟!
غيدا: شرايكم كل وحده فينا تاخذ لها اسم ولد .. ونصير ننادي بعض بهالاسماء .. انا فكرت واخترت حمود ..
غدير: خوش فكره .. وانا ابي محسن ..
غيدا بعصبيه: وما لقيتي غير هالاسم ..؟!
غدير ببرود: وليش ..؟!
غيدا: انتي عارفه ليش فلا تتغابين ..؟!
غدير: عشان اخوج .. عادي ..
غيدا: غديروه غيري الاسم ..
غدير: نو .. الاسم عاجبني ..
غيدا بعصبيه: غديــــــــــــروه ..
خلود: خلاص عادي مافي مشكله ..
غيدا: لا مو عادي .. انا اكره محسن .. فلا تحديني اني اكرهج بعد ..
غدير: عادي .. انا ما اهتم ..
تهاني: خلاص .. لا تطولونها وهي قصيره ..
غدير: خلاص بغير اسمي .. ابي عبد المحسن ودلعي يكون محسن ..
غيدا: لا ما ينفع ..
خلود: خلاص يا غيدا ..
غيدا بضبط اعصاب: اوكي خلاص ..
خلود: انا بكون خالد زي اول ..
تهاني: انا نادوني تهاني .. لأن شكلي ما يأهل اكون بوي ..
فمسكت خلود شعرها من عند رقبتها وقالت: يبيلك تقصين هذا الشي ويصير تمام ..
تهاني: لا حرام .. شعري بيروح ..
خلود: هو مو طويل عشان تنقهرين .. اسمعي ..
مسكت خصل من شعر تهاني وقالت: قصي هذا لين هنا .. والجزء الخلفي قصيه لين هنا .. وهذي الخصل تنقص لمن هنا .. وبعدين اصبغي شعرج اشقر .. وحطي عليه بخه خضرا او زرقاء ويطلع خقق .. لأن غيدا صابغه احمر وغدير ثلجي وانا اسود .. عيل اصبغي انتي اشقر او ......
سكتت شوي بعدين قالت: اليوم بييج البيت واروح انا وياج المشغل واصلح كل شي ..
تهاني: احس نفسي تحمست .. طيب متى بتيي ..؟!
خلود: الساعه خمس ..
غدير: وااااااو .. باجر بتيينا تهاني بلوك يديد ..
غيدا: طيب اختاري لج اسم ..؟!
تهاني بتفكير: امممممممم ..
خلود: عزوز .. وايد حلو ..
تهاني: لا .. احس عزوز اسم ولد ولد من يد ..
خلود: ليه .. تبين اسم ولد بنت ..؟!
غدير: هههههههههه حلوه ..
تهاني: لا اقصد ابي اسم ولد ويكون الاسم ناعم .. اما عزوز احسه خشن ..
خلود: ومتى امداج تلمسينه ..؟!
غدير وغيدا: هههههههههههههههه ..
تهاني: لا ما اقصد اني لمسته .. اقصد المعنى .. يعني .. يوه كيف اشرحلك ..؟!
خلود: عزوز يعني عزوز .. اوكي ..
تهاني بإستسلام: اوكي مافي مشكله .. محد يقدر على خالد ..
خلود: ههههههههههههههه .. اهم شي اني قدرت اقنع عزوز هههههه ..
================================================== ==================
في قاعة اسيل .. كانت حاسه بضيقه مو طبيعيه ..
حاسه نفسها راح تنفجر من شدة هذي الضيقه .. وتنفسها تحسه قليل مره .. وتحس ان ودها تبكي وتصارخ بأعلى صوتها ..
فحط شنطتها عالطاوله وحطت راسها عالشنطه .. بعد شوي رفعت راسها وهي حاسه انها بتبكي وتشق بلوزتها من الضيق .. فلاحظوا ندى ولين تغيرها ..
ندى: اسيل شفيج ..؟!
اسيل بصراخ: مافينــــــــــــي شــــــــــــي ..؟!
فأنفجعت ندى من صراخها .. حتى الكلاس كله سمعوها .. فطالعت الدكتوره شاديه فيها وهي حاسه ان اسيل ماهي طبيعيه ابدا ..
فلفت اسيل وجهها ناحية الشباك والدموع بعينها .. حاسه نفسها كارهه الحياه ومافيها ..
د.شاديه: ياللا طلعوا دفاتركو واكتبوا الواجب دا اللي عالسبوره ..
ففتحت اسيل شنطتها وخرجت الدفتر ورمته بقوه على طاولتها .. فانفجع طلاب الصف من الصوت ..
د.شاديه: حبيبتي اسيل اذا حاسه نفسك مش كويسه تقدري تطلعي برا ترتاحي ..
فوقفت اسيل ولمت اغراضها بسرعه في الشنطه ومشيت بسرعه وخرجت برا الفصل وقفلت الباب بقوه وراها ..
اسندت ظهرها ع الباب وبكت وهي تقول: شفيني ..؟! شفيني جذي ..؟!
مسحت دموعها بإيدها ومشيت بسرعه وهي حاسه بخنقه تخنقها وبضيقه ونفسها تطلع برا الكون بأكمله ..
مرت من عند الفراشه ام محمد .. فأبتسمت ام محمد وقالت: صباح الخير يا اسيل ..
اما اسيل فمشيت من جنبها لدرجة انها صكت رجلها في دلو المويه وانكب .. استغربت ام محمد من اسيل .. هذي مو عادتها ..
نزلت اسيل من الدرج وصكت في الدكتور عمار بقوه ..
فطالع الدكتور عمار فيها وقال بعصبيه خفيفه: انتبهي المره اليايه ..
نص كلامه ما سمعته لأنها راحت من عنده وهي تشهق وتبكي .. مرت من جنب الطلاب وتصارخ عليهم عشان يبعدون من طريقها ..
فصاروا الطلاب يبعدوا عن طريقها وهم مستغربين من حالة هذي الطالبه .. فصكت في طارق بقوووه ..
طارق بعصبيه: عمياء انتي ما تشوفين ..
اسيل بصراخ: ابعــــــــــــد عنــــــــــــي ..
ودفته بقوه .. فاستغرب من شكلها ووجهها اللي كان احمممممر ودموعها على خدها وصراخها المفاجئ ..
فمسكها من ايدها قبل لا تروح وقال: اسيل شفيج ..؟!
فلفت عليه وبعدت ايده عن ايدها وهي تقول بصراخ مع بكى: ابعــــــــــــد ايــــــــــــدك عني .. ابي اروح ابعــــــــــــد ..
طارق: ما راح افكج إلا لمن تقولين لي شفيج جذي .. وليه تصيحين وتبجين ..؟!!!؟!!!!!!!!
فسحبت ايدها بقوه وهي تصيح بهستيريا وتقول: ابعــــــــــــد يا حمــــــــــــار .. ابعــــــــــــد يا ملعــــــــــــون .. اللــــــــــه يلعنـــــــــــــــــــك ابعــــــــــــد ..
والطلاب كانوا متجمعين حولهم ويطالعون فيهم ..
فاستغرب طارق اكثر .. هذي شكلها مجنونه .. وهي تحاول تسحب ايدها بقوه وبجنون .. وتحس ان الضيقه كل ما لها تزيد عندها .. فحست ان رجلها ما تشيلها فطاحت عالارض ..
فجلس طارق قدامها ومسكها من كتفها وهزها وهو يقول: اسيل شفيج اصحي ..؟! هدي من نفسج وقولي لي شفيج ..؟! اسيــــــــل تحجـــــــــي ..؟!
هزت راسها بلا وهي تصارخ: ابعــــــــــــدوا عني .. اكرهكــــــــــــم كلكــــــــــــم .. ابــــــــــــي امــــــــــــــــــــــــوووووت .. ابي امــــــــــــوت ..
فانصدم طارق من كلامها ومن انفعالها وصراخها وبكائها .. البنت اكيد فيها شي .. وشي كبير كمان ..
فسحبها لناحيته وحضنها بقوه عشان يهدي منها .. صارخت بقوه ودفته .. بس كان اقوى منها وما تحرك ..
شوي بدت مقاومتها تهدأ .. وشوي هديت حركتها .. وطارق حس فيها انها هديت بس يسمع وناتها وشهقاتها .. حس ان حالتها صعبه مره ..
فسمع صوت دكتور يدخل من بين الطلاب .. فبعد طارق عن اسيل بسرعه ..
الدكتور: شسالفه ..؟!
طارق بإرتباك: ها .. آ آ .. هذي الطالبه ما ندري شفيها ..
جاء الدكتور عند اسيل وقال: شفيج ..؟!
فطالعت اسيل فيه ومن بعدها ما عاد شافت شي قدامها .. هزها الدكتور وعرف انها اغمى عليها ..
فلف عالطلاب وقال: ممكن اعرف ايش التجمهر هذا ..؟! ابعدوا بسرعه ..
فبعدوا الطلاب بس قاعدين يراقبون من بعيد .. فأخذ الدكتور مويه ورش على اسيل عشان تصحى ..
فجاء الوكيل وقال: شفيه ..؟! يقولون فيه طالبه تتصرف تصرفات غريبه ..
الدكتور: هذي هي الطالبه .. بس اغمى عليها ..
الوكيل: ليه شصار بالضبط ..؟!
فلف الدكتور على طارق اللي كان واقف ويطالع في اسيل ..
الدكتور: ايش اللي صار لها ..؟!
فانتبه طارق للدكتور وقال: ها ..
الدكتور: شصار للطالبه ..؟!
طارق: ما ادري .. بس كانت تصارخ وكأنها كانت معصبه او متنرفزه من شي ..
وقال في نفسه: "لا .. اللي فيها مو نرفزه او عصبيه .. اللي فيها شي اكبر من جذي" ..
الوكيل: عيل خلنا نوديها لغرفة الاستراحه ونتصل على اهلها ونخبرهم بحالتها ..
الدكتور: اوكي ..
فشالها ووداها لغرفة الاستراحه ..
حطها عالسرير بهدوء وبعدين خرج من الغرفه ..
جاء انس وفهد عند طارق وقال فهد: طارق شفيه ..؟!
وطارق كان واقف في نفس مكانه ويطالع في الارض بتفكير ..
انس: طــــــــــــــــــــارق ....
فانتبه طارق لهم وقال: نعم ..
فهد: ايش السالفه ..؟!
طارق: مافي شي ..
ولف عشان يروح .. فطالع في الطلاب وكانوا يطالعون فيه ويتهامسون .. فتضايق من نضراتهم وخرج برا الجامعه كلها ..
انس: شفيه ..؟!
فهد: ما ادري ..
اما ريما فكانت واقفه مع صاحباتها وشافوا كل شي ..
شذى: غريبه اختج حالتها جذي ..
مرام: روحي شوفي ايش فيها ..
ريما: لا ..
ريناد بإستغراب: ليش ..؟!
ريما: بس ..
مرام: بس هي اختج ..
شذى: ريما شفيج .. روحي شوفي اختج ايش فيها ..
ريما: مدلعه واكيد هذي وحده من حركاتها الماسخه ..
مرام: مستحيل .. باين ان اللي فيها صج مو دلع ..
ريناد: طيب اتصلي على ابوج او امج ييون يشوفونها ..
ريما: انتم شكو .. هذي اختي وانا حره .. لا احد يتدخل ..
شذى: اوكي بكيفج ..
ولفت ريما ووجهها وهي تفكر ..
فسكتوا فتره .. بعدين قالت ريناد: ايه صح يا ريما .. عرفت مين حبيبة آرثر .. سوري لأني تأخر بس انتي كنتي غايبه وموبايلج مغلق ..
فتنرفزت ريما وقامت وقالت بعصبيه: شكرا ..
وراحت .. وقالت ريناد بإستغراب: ايش فيها ..؟!
شذى: هي طلبت منج اسم حبيبة آرثر ..؟!
ريناد: ايه ..
مرام: طيب مين هي ..؟!
ريناد: اختها ..
فانصدموا وقالت مرام: اختها ..؟!!!!!!!
شذى: عشان جذي قامت معصبه ..
مرام: وليه تعصب ..؟!
شذى: ها .. آ آ يمكن عشان ريما حذرت اختها من آرثر بس اختها ما سمعت كلامها ..
ريناد: يمكن .. لانها قالتلي انها بتحذر حبيبة آرثر منه ..
شذى في نفسها: "ايه هين" ..
================================================== ==================
في ذا الوقت كان سامي في سيارته .. كان سادح مرتبة السياره للاخير ونايم فوقها .. ماكان نايم .. كان مغمض عيونه ويفكر بعمق ..
ركب ريان السياره جنب سامي وقفل الباب وراه ..
ريان: توقعتك رحت ..
سامي: .......................
ريان: مو معقوله تكون نايم .. هيــــــــــــه ســــــــــــامو ..
سامي: اطلع برا ..
ريان: لا ..
ففتح سامي عيونه وقال: ريان ابي اقعد لوحدي .. رجاءا اطلع ..
ريان: لا ..
سامي بعصبيه: ريـــــــــانووه احسن لك تطلع ..
ريان: معقول بنت زي جذي تهزك يا سامي ..
فغمض سامي عيونه وقال: مالك دخل ..
فحرك ريان المرتبه حقته وسدحها زي سامي .. وانسدح عليها وحط رجله عالطبلون ..
ريان: واااااو .. والله حماس ..
سامي: ....................
ريان: غريبه ما رحت .. انا اعرفك اذا تضايقت تروح تلف في السياره لين تتعب ..
سامي: البنزين فاضي ..
ريان: اها عشان جذي .. مسجين ..
سامي: عساك بسجين ..
ريان: افا .. اهون عليك ..
سامي: ....................
ريان بتنهيده: آهه .. اقول سامي اضحك .. ترا شكلك بايخ وانت متضايق ..
سامي: شلون يجيني الضحك وهذي حالتي ..
ريان: سامي خلاص سكر عالموضوع .. منت اول واحد ولا اخر واحد ..
سامي: انت تقول هذا الكلام لأنك مو مجرب حالتي يا ريان .. لو كنت مجرب جان حسيت فيني وما قلت هالكلام ..
ريان: ..............................
سامي: شلون عرفت شلون ..؟!
ريان: يمكن جذابه ..
سامي: مستحيل تكون جذابه .. مستحيل تقول كلام من راسها .. حسيت بشي يطعني وهي تقول هذا الحجي .. هه غيدا عرفت .. عقبال العالم كله يعرف ..
ريان: سامي انت مينون .. لو كنت عاقل جان نسيت هذا الماضي وعشت عادي ..
سامي: ماضي ..؟!!!!!!!! ههههههههههههههههههههههههههههههههههههه شر البلية ما يضحك .. قال ماضي قال ..
ريان: ايه ماضي .. هو ماضي وانتهى .. بس انت اللي مو راضي تنهيه ..
فجلس سامي وقال بإنفعال: انتهــــــــــــى ..؟؟!!!!!!!!!! انت مو حاس فيني فلا تقول انتهى .. كيف انتهى وهو ملازمني لين اموت ..؟! كيف انتهى وهو ما غاب عن بالي لحضه ..؟! كل ما اشوف نفسي اتذكر هالماضي .. كيف انتهى وهو صاير كابوس ييني في احلامي ..؟! هذا الماضي ما انتهى .. هذا الماضي هو ماضي ممتد للحاضر والمستقبل .. هذا الماضي خرب كل شي حلو بحياتي .. اصلا حياتي بنفسها خربها .. ماضــــــــــــي ملعــــــــــــــــــــــــون ..
وضرب بإيده بقوه عالدركسون .. فجلس ريان وعدل مرتبته وقعد يطالع في سامي ..
ريان: سامي .. يمكن ما يكون انتهى .. بس بنفسك تقدر تنهيه وما تخليه عقبه في حياتك .. سامي سوري عالكلام اللي بقوله بس .. بس ترا انت مينون .. انت انسان مو صاحي .. لو انك صاحي وعاقل وفاهم جان قدرت تدعس عالماضي وتنساه بكل ما فيه .. جان قدرت تبعده عن حياتك وتتناساه .. انت قاعد تحطم نفسك بنفسك .. انت تودي نفسك للهاويه بتشاؤمك .. انت واكيد الوحيد بالعالم اللي ما يقدر يواجه مشاكله ويحلها .... انت بنفسك قلت لي انك مو الوحيد اللي يصير له هذا .. طبعا مو الوحيد .. بس اكيد كل اللي بنفس حالتك قدروا يساعدوا نفسهم .. قدروا يطلعوا نفسهم .. قدروا يحطموا كل عقبه بطريقهم .. انت الوحيد اللي تتشكى وما تسوي شي .. قاعد تقنع نفسك بإشياء تخرب حياتك .. انا ما انكر ان حالتك صعبه .. انا اعرف ان حالتك صعبه زي ما اعرف انك غبي وما قدرت عليها .. سامي اذا قعدت على هالحال يمكن تصير مينون .. لا تضغط على نفسك اكثر من جذي .. فهمت علي ..
فلف سامي وطالع فيه فتره طويييييييييييييله بعدين قال: الكلام سهل ..
ريان: والفعل اسهل ..
فهز سامي راسه وهو يقول: لا مو سهل .. هذا مستحيل ..
ريان: لا تقول مستحيل .. تبيني اعطيك محاضره عن الاراده والتصميم للوصول إلى الغايه ..؟!
سامي: لا شكرا .. المحاضره اللي قبل شوي تكفي ..
ريان: تتطنز انت وويهك ..
فهز سامي راسه بلا وهو سرحان ..
ريان بتنهيده: خلاص يا سامي لازم تنسى ..
سامي: صعب اني انسى شي زي جذي ..
ريان: طيب تناساه وبعد مرور الوقت راح تنساه ..
فتنهد سامي وسكت .. فرن جوال ريان ..
ريان: اصحابك دقوا علي .. شكلهم بيسألوني عن حالتك ..
فابتسم سامي ..
فرد ريان وقال: هلا بزيود ..
يزيد: زيود بعينك .. اصغر عيالك انا ..
ريان: حرام عليك .. قاعد ادلعك ..
يزيد: لا شكرا ما ابي دلعك .. بغيت اسألك سامي عندك ..
ريان: ايه عندي .. والحمد لله حالته تمام .. شوي وايي انا وياه ..
سامي: لا ..
فأشر له ريان انه يسكت ..
يزيد: حلو .. خلاص انتضركم ..
ريان: ان شالله .. باي ..
وقفل الجوال ..
سامي: ما ابي ارجع ..
ريان: وليش ..؟!
سامي: نفسيتي ما تساعدني ..
ريان: ما علي في نفسيتك .. حتيي يعني حتيي ..
سامي: غصب هو ..
ريان: ايه غصب .. ترا الشله راح يشكون ان عندك شي جايد ..
سامي: اووووف ..
ريان: لا تتأفف ..
سامي: يصير خير ..
وعدل مرتبته بعدين قال: اقول ريان ..
ريان: نعم ..
سامي: بعد ما رحت ما قالت غيدا شي ..
ريان: ما ادري .. لأني طلعت بعدك ..
سامي: شلون طلعت بعدي وانت ييت عندي بعد حول ربع ساعه ..
ريان: لأني وقفت في ساحة الجامعه شوي ..
سامي: ليش ..؟!
ريان: تعرف اسيل ..؟!
سامي: مين اسيل ..؟!
ريان: متى امداك تنساها .. اسيل البنت اللي كرشتك ..
سامي بعصبيه: محد كرشني ..
ريان: اوكي اوكي .. طيب تعرفها ..
سامي: ايه .. شفيها ..؟!
ريان: اسمع .. << وحكى كل شي شافه <<< .....
================================================== ==================
في بيت عبد الرحمن الرملي .. ابو فيصل .. استأذن من شغله لأنه يحس بتعب .. فدخل البيت ولقى ام فيصل تكلم ابوها في التلفون ..
دخل وجلس عالكنبه وهو يفك ازارير ثوبه .. قفلت ام فيصل التلفون ..
الاب: ها .. كيف ابوج اللحين ..؟!
الام: تعبان وايد .. يقعد يوم في البيت وعشر في المستشفى ..
الاب: انا لله وانا إليه راجعون .. ما يشوف شر ان شالله ..
الام: ان شالله ..
فسكتوا فتره وبعدين قالت الام: غريبه راجع مبجر اليوم ..
الاب: حسيت بتعب وقلت برتاح في البيت ..
الام: طيب تبيني احط لك اكل او شي تشربه ..؟!
الاب: لا لا مشكوره ..
فطالعت الام فيه وقت طويل بعدين قالت: عبد الرحمن ..
الاب: هلا ..
الام: ابي اكلمك في موضوع ..
الاب: بخصوص شنو ..؟!
الام: الموضوع يخص اسيل ..
فلف الاب يطالع فيها وقال: وش هالموضوع ..؟!
الام: صراحتا حرام .. الى متى بتخبي عنها كل شي .. البنت مصيرها تعرف ..
الاب: شفيكم انتي واخوي فاتحين هالموضوع ..؟!
الام: ليه عبد الغني فتح معاك هذا الموضوع ..؟!
الاب: ايه امس ..
الام: عبد الرحمن حرام تخليها عميا جذي .. لازم تعرف كل شي .. احسن انك تقولها بنفسك بدل ما تسمعه من برا ..
الاب: والله نفسي اقولها .. بس اخاف حالتها تتدهور ويصير لها شي .. وفوق هذا اخاف تسألني مين هم اهلها وكيف لقيتها ..
الام: عادي قولها ..
الاب: لا .. مستحيل اخبرها مين اهلها ..
الام: وليش ..؟!
فتذكر الاب كل شي حصل قبل 17 سنه بعدين قال: من دون ليش ..
الام: بس حرام تحرمها من حضن امها وحنان ابوها وعطف اخوانها إذا كان عندها ..
الاب: تنحرم منهم اهون من ان تعرفهم ..
الام: ليش مين هم اهلها ..؟!
الاب: مو لازم تعرفين ..
الام: طيب متى بتقولها عن حقيقتها ..؟!
الاب: ما ادري .. وكمان افكر اني ما اقولها ..
الام بصدمه: شنــــــــــــو ..؟!!! حرام يا ابو فيصل .. حــــــــــــرام ..
فتنهد الاب وقال: وفوق جذا راح تصير مشاكل اذا خبرتها .. اولا الله العالم وش بيصير لها لو عرفت .. وثانيا الشرطه ..
الام: وليه وش فيهم الشرطه ..؟!
الاب: نسيتي ان اسيل مو بنتنا ومع هذا حطيناها في كرت العائله على اساس انها بدل تؤام فارس اللي ماتت .. هذي اسمها جريمه ..
الام: ايه صح .. نسيت ذي السالفه ..
الاب: وعشان جذي ما ابي اقولها ..
الام: بس تخيل نفسك مجانها .. والله حرام تعيش وهي مو عارفه من تكون .. راح تتعاقب عند الله لأنك اخفيت عنها ..
الاب: متردد ..
الام: لا تتردد .. انت شوف وقت مناسب وقولها ..
الاب: لا لا .. ذي الايام لا ..
الام: ليش ..؟!
الاب: ما راح اقول إلا لمن يصير عمرها عشرين سنه ..
الام بصدمه: ايــــــــــــش ..؟!!!! بس باجي وقت طويل .. باجي اكثر من شهر ..
الاب: هذا آخر كلام عندي ..
الام في نفسها: "اووووف .. يعني ما راح افتك منج بدري يا اسيلووه .. يارب صبرني على هالعله" ..
فدق جوال الاب .. فخرجه وشاف فارس المتصل ..
الاب: غريبه .. مو من عوايد فارس يتصل هالحزه ..
الام بسرعه: طيب رد .. يمكن صار له شي او ريما ..
الاب: انا قلت .. الاهتمام بموضوع اسيل مو لله .. تبين تفتكين منها وبس ..
فاندهشت الام وقالت: لا ابدا ما افكر جذي ..
الاب: يصير خير ..
ورد وقال: هلا ..
فارس: يبه ..
الاب: شفيك ..؟!
فارس: تقدر تيي الجامعه ..؟!
الاب بدهشه: وليش .. ايش صار ..؟!
فارس: اسيل ما ادري ايش فيها ..
الاب بصدمه: شفيها اسيل ..؟!
فارس: اللحين هي نايمه .. بس يقولون انها كانت تبجي وتصارخ .. فتقدر يا يبه تيي الجامعه وتاخذها معاك .. ريما عندها محاضره وما تقدر تييبها ..
الاب: طيب ربع ساعه واكون عندكم ..
وقفل الجوال فقالت الام: شفيها اسيل بعد ..؟!
طنشها الاب وخرج .. ركب سيارته وراح ..
================================================== ==================
الساعه 3 .. في بيت راشد .. في غرفة شهد ..
كانت تجهز نفسها عشان تروح لامها واخوانها .. خرجت من الغرفه وشافت راشد جالس عالكنبه ويقلب في التلفزيون بطفش ..
مرت من قدامه بخوف عشان تروح للباب وهي تدعي في داخله انه ما يوقفها ..
راشد: شهد ..
فغمضت عيونها .. وبعدين فتحتها ولفت عليه وقالت: نعم ..
راشد: على وين ..؟!
شهد: بروح لأهلي ..
راشد: اللحين امج واربع بزران تسمينهم اهل ..؟! هذولا بقر مو اهل .. حتى البقر لها فايده وتييب الحليب .. اما اهلج فمامن وراهم اي فايده غير لهف الفلوس ..
حست بالعبره تخنقها وقالت: طيب تبي شي قبل لا اروح ..؟!
راشد: ايه ..
شهد: ايش ..؟!
راشد: ييبي لي قلاس ماي ..
شهد: طيب ..
دخلت داخل وصبت له مويه في كاسه وبعدين جت واعطته ..
اخذ المويه وشرب .. وشهد واقفه عنده تنتضره يخلص عشان ترجع الكاسه ..
راشد: شهد ..
شهد: نعم ..
راشد: ايش معنى اسمج ..؟!
فاستغربت من سؤاله وقالت: ما اعرف ..
راشد: في احد ما يعرف معنى اسمه ..؟!
شهد: .....................
راشد: عيل انتي دلخه .. وابوج وامج دلخين كمان لأنهم سمووج اسم من دون لا يدرون معناه .. عائلتكم عائلة دلوخ ..
فمسكت نفسها وقالت: شكرا ..
راشد بتفكير: بقر ودلوخ ..؟!!! لا اسمعي في شي احلى .. عائلتكم عائلة ابقار دلخه .. وبجذي ربطنا الدلاخه بالبهايم .. شرايج ..؟!
فلفت وطلعت برى البيت بسرعه .. خلاص ما عاد تقدر تستحمل ..
راشد: هههههههههههههههههههههههههههههههههههههههههههههههههه هههههههههههههههههههههههههههههههه يا لبى هالبنيه .. مسليه جدا ..
وكالعادة استأجرت لها تاكسي وراحت لبيتهم ..
بعد ثلث ساعه وصلت للحاره اللي عايشين فيها .. نزلت من السياره وكملت طريقها للبيت مشي لأن الحاره ضيقه وصعب تدخل السياره لداخل ..
وصلت للبيت وشافت شادي يلعب مع اولاد الحاره بالكوره .. اول ما شافها جاء عندها ..
شهد: كيفك شادي ..؟!
شادي: بخير .. بس عائلتنا ماهي بخير ..
شهد بخوف: ليش ..؟؟؟!
شادي: امي تعبت علينا وايد يا شهد .. صارت كثير تتعب .. اول كانت تتعب مره كل اسبوعين واللحين تتعب مره كل يومين ..
فدخلت شهد البيت بسرعه وشافت قدامها اثير ..
اثير: اهلين شهد ..
شهد بسرعه: امي وينها اللحين ..؟!
طالعت اثير في شادي وقالت: وانت عالطول قلت لها ..
شهد: مو وقت هالكلام وين امي ..؟!
اثير: في حجرتها ..
فدخلت شهد غرفة امها وشافتها عالسجاده تدعي بعد الصلاه ..
جت شهد وسلمت على راسها وقالت: كيفج يمه ..؟!
الام بتعب: هلا بشهد .. هلا ببنتي ..
شهد: يمه انتي بخير ..؟!
الام: ايه الحمد لله بخير ..
شهد: يمه انتي متأكده ..
الام: ايه متأكده شفيج ..؟!
شهد: بس صوتج وايد تعبان يايمه ..
الام: لأني قبل شي كنت نايمه ..
شهد: لا مو عشان هذا السبب .. شدوي قالي انج صايره تتعبي وايد صح ..؟!
الام: يووه من شادي ذا .. لا تصدقين حجي هذا البزر ..
شهد بخوف: يمه بليييز قوليلي شفيج وليش تتعبي وايد .. يمه واللي يخليج لا تخبي عني شي ..
فكحت الام بقوه وقالت: مافيني شي ..
فطالعت شهد فيها ودموعها في عينها وقالت: يمه .. الدكتور قالي اذا تعبت امج مره ثانيه يمكن تموت .. يمه الله يخليج لا تتعبين كمان .. لو متي احنا وين نروح .. من لنا غيرج .. يمه انا راح اهد شغلي وايي عندج عشـ.......
الام بسرعه: لا .. لا يا حبيبتي لا تهدين شغلج عشاني .. انا بخير ان شالله ..
فبكت شهد وطاحت في حضن امها وهي تبكي .. فمسحت الام على شعرها وظهرها ..
الام بتعب: خلاص يا حبيبتي لا تبجين .. ما يصير تصيحين جذي انتي كبيره ..
وشهد ما زالت تبكي .. والام تطالع في بنتها وهي تحس بشي في داخلها .. تحس كأنه في شي يقبض على صدرها ..
الام في نفسها: "اخاف اموت وانا ما خبرتهم بالسالفه .. لازم اقولها .. بس لمن تهدأ اقولها" ..
في الصاله كانت اثير وشادي جالسين وساكتين .. اما وسيم فكان نايم وشادن نفس الحاله نايمه ..
شادي: اثير ..
اثير: هممم ..
شادي: كلام شهد صح .. لو ماتت امي وين نروح ..
اثير: شادي لا تقول كلام زي جذي ..
شادي: البيت هذا اجار .. وصاحبه من اول يبي يطلعنا منه بس ما طلعنا عشان امي .. لو ماتت امي اكيد راح يطلعنا ..
اثير: شادي امي ما راح تموت ..
شادي: وانتي شدراج ..؟!
اثير: ما ادري .. بس اكيد ما راح تموت وتخلينا زي ابوي ..
شادي: بس امي كل شوي حالتها تزداد .. وكل شوي تدوخ وتتعب وتستفرغ وكل شي ..
اثير: شادي خلاص سكر هذي السيره ..
شادي: ........................
اما شهد فبدأت تهدأ شوي .. فقالت الام: شهد ..
فجلست شهد وقالت: نعم يمه ..
سكتت الام فتره بعدين قالت بتردد: شهد حياتي انا ابي اقولج عن شي ..
شهد: ايش ..؟!
الام: اممم ابوج عمر ..
شهد: شفيه ..؟!
فسكتت الام .. وشهد تطالع فيها تنتظرها تتكلم ..
الام بتردد: من زمان ودي اقولج عن هذا الشي بس ......
شهد: كملي يمه ..
الام: ابوج لـ......
وسكتت فجأه وحطت ايدها على جنبها بسرعه وبقوه من الالم الفضيع اللي جاء فجأه ..
شهد بخوف: يمه شفيج ..؟؟؟؟!!
والام عاضه على شفتها ومقفله عيونها من الالم وهزت راسها بلا ..
شهد: لا يمه فيج شي صح ..؟! اثيــــــــــــر شــــــــــــادي ..
فجووا بسرعه للغرفه ..
شهد: اثير بسرعه روحي جري عند ييراننا ام عيسى وقولي لولدهم يي بسرعه عشان يشوف امي شفيها ..
اثير: طـ طيب ..
وراحت .. قالت شهد لشادي: شادي روح الصاله وخذ موبايلي من جنطتي واتصل بالاسعاف بسرعه ..
فهز راسه وراح للصاله ..
فلفت على امها وقالت: يمه استحملي شوي الله يخليج .. اللحين يي عيسى ويشوف شفيج ..
والام كل شوي يزيد الالم عليها .. وبدت تدوخ والدنيا تلف عليها .. وبعدين طاحت عالسجاده ..
فانفجعت شهد وهزت امها وهي تقول: يمـــــــه شفيج ..؟! يمه ليش ما تردين علي ..؟!
فانفتح باب الغرفه وقالت اثير: ياء عيسى ..
شهد: خليه يدخل بسرعه ..
فدخل عيسى وقال: السلام عليكم ..
شهد: وعليكم السلام .. عيسى واللي يسلمج تعال شف امي .. اكلمها وما ترد علي ..
فجلس عيسى عالارض وفتح الشنطه اللي جنبه وقال: طيب بعدوا شوي ..
فبعدوا شوي .. وجاء شادي في هالوقت وقال لشهد: اللحين بييون ..
فهزت شهد راسها وهي تطالع في امها بخوف عليها ..
ففحصها عيسى .. فحص نبضها وتنفسها ودقات قلبها .. بس ....
نزل راسه ولف عليهم بأسى وحزن ..
خافت شهد لمن شافت ملامح وجهه كذا فقالت بحذر: شفيها امي ..؟!
طالع فيهم وفي نضراتهم وقال: والله ما ادري شقول .. بس عظم الله اجرج يا شهد ..
طالعت فيه بصدمه .. نزلت دموعها وبكت ..
شهد: عيسى انت اكيد تمزح .. شوفها مره ثانيه .. قبل شوي كانت تكلمني .. مستحيل تموت بسرعه ..
حطت اثير ايدها على فمها وراحت جري برى تبكي .. وشادي مو قادر يستوعب حقيقة الحياة بدون ام ..
راحت شهد عند امها وهزتها: يمــــــــــــه اصحي .. يمه .. يمه انا احاجيج كلميني ..
عيسى: شهد لازم تستهدي بالله .. كلنا ماشين على هذا الطريج .. ما يصير جذي ..
شهد بصراخ: يمــــــــــــه اصحــــــــــــي انا شهــــــــــــد .. انا شهــــــــــــوده يمه .. يمه انا بنتج .. يمه كيف تروحين وتخليني ..
فبكت اكثر وهي تهز امها ..
طالع عيسى فيها وهز راسه وطلع برى ..
رمت شهد نفسها فوق امها وقالت بصياح: يمه حرام عليج جذي .. كيف قلبج يهون انج تروحين وتخلينا .. يمه قعدي معانا لا تموتين .. يمه انا احتاجلج حيل .. مافي ام تترك عيالها وتروح .. يمه احنا اولادج لا تخلينا .. يمه ما يصير تخلينا يتامى من دون ام ولا ابو .. يمه شنسوي واحنا لحالنا .. لا تكوني قاسيه علينا .. احنا نحبج حيل ..
فرفعت راسها وطالعت في وجه امها وقالت: يمه انا آسفه لأني جذبت عليج .. يمه انا تركت الدراسه سامحيني لأني جذبت .. يمه والله العظيم ماراح اجذب بس قومي .. والله والله آخر مره اجذب بس اصحي وخليج معنا .. حنا عيالج ونبغاج .. اذا انتي ما قعدتي معنا منو بيقعد .. يمه بليز قوليلي عند مين نروح ولمين بنشتكي وعشان مين نعيش .. يمه حرام عليج انا جدامج واترجاج .. ما اهون عليج .. اصحي واحضنيني .. يمه عفيه بس احضنيني .. يمه طيب بس ابتسمي لي .. بطلي عيونج وقولي انج تتغشمرين معنا .. يالله انا احتريج يمه ...
وتطالع في امها .. تنتظر اي شي منها .. اي شي يقول ان كل شي كان كذب ..
جاء شادي عندها وعيونه مليانه دموع .. شهق وقال: شهد امي ما ردت عليج .. يعني امي ماتت صح ..؟!
طالعت في شادي .. فمسكته وحضنته بقووووه .. فبكى في حضنها وقال: اللحين هي ماتت وهي زعلانه مني ..
شهد بصوت مخنوق: لا مو .. مو زعلانه ..
شادي: إلا زعلانه .. باجر علي اختبار رياضيات وقالت لا تلعب في الشارع .. انا ما سمعت كلامها وقالت انها بتزعل مني اذا طلعت الشارع ..
فجت شهد بتتكلم وتواسيه بس ما قدرت .. البكى وصل لحلقها ومو قادره تتكلم ..
يواسيني وانا الميت وحالي يجبر الدمعات
تسيل من اللي فيني ويبكي وهو يواسيني
وانا ابكي واتنهد وارسم بالحزن لوحات
يجبروني عشان امشي ورجلي ما تمشيني
ماتت رعايتي بيدي ماتت الحب والرحمات
حرمت النفس من حقها وانا ابكيها وتبكيني
وكنه حلم قدامي يقيدني من الصرخات
ابي اصحى ولكني عجزت القى ال يصحيني
فداك القلب يايمه ومهما قلت من كلمات
صغيره في كبر حقك بس اتمنى تعذريني
يظنوا حزنهم اكبر وهم اصحاب هالمأساة
وانا اتحدى اذا فيهم ربع ما يحترق فيني
نقص قدري بعد موتك وغابت نشوة اللذات
وصار الهم عكازي اباكيه ويباكيني
عطيتيني بدون حساب ولا سمعتك تقولي هات
وانا اشرب حيل من دمك ودمك ما يكفيني
يايمه ارجعي كافي ابجلس معك لو لحظات
واقبل ايدك ورجلك وافرش لك رمش عيني
يايمه ما تحملهم يقولوا فات ما قد مات
تعالي غيري هالقول واطيعك باقي سنيني
يايمه ارجعي تكفين وطفي شمعة الآهات
ابيك انتي ولا غيرك على موتك تعزيني
وضميني وداويني مثل ما كانت الهقوات
ما ابي احدن يواسيني ابيك انتي تواسيني
دخيلك بس لا تبكي اذا شفتي بي الدمعات
انا مقوى ابكيك اذا انتي تبكيني ..
انا مقوى ابكيك اذا انتي تبكيني ..
================================================== ==================
في كندا .. كان فيصل مع جوزيف ورينا عند شاطئ البحر ومعاهم اوراق الصفقه والشغل ..
رينا: تقريبا الامور بتنتهي بعد اسبوعين ..
فيصل: حلو .. طيب الشحنه متى بتكون بالضبط ..؟!
رينا: في وقت مره رائع .. يوم الاثنين من الاسبوع بعد الجاي ..
فيصل: شمعنى الاثنين ..؟!
رينا: عشان في هذا اليوم راح يعقد مؤتمر لرؤساء امريكا .. والشرطه اكثرهم بيهتمون فيهم وفي سلامتهم .. فإحنا نستغل الفرصه ونروح بالمطار الثاني وتقدر تسافر بإطمئنان .. وكل شي بيكون تمام ..
طالع فيصل فيهم فتره وقال في نفسه: "عندهم ذكاء مو طبيعي .. لازم انتبه منهم واتغدا فيهم قبل لا يتعشوا فيني .. لأن نضرات جوزيف ما ريحتني .. كأنه ناوي على شي" ..
رينا: وين رحت يا استاذ فيصل ..؟!
فيصل: حلوه الفكره .. خلاص بجذي كل شي بيكون عال العال ..
فلفت على جوزيف وقالت بالانجليزي: لقد اتفقنا على يوم الاثنين ..؟!
جوزيف: رائع .. رائع جدا ..
فلم فيصل الاوراق وهو يقول: طيب متى بنشحنها ..؟!
رينا: يوم الاحد .. يعني قبل اليوم اللي بتسافر فيه ..
فحط فيصل الاوراق في الملف وقال: طيب تمام ..
قام وقال: طيب استأذن ..
رينا: اقعد معانا شوي ..
فيصل: المره الجايه ان شالله ..
رينا: اوكي ..
فراح فيصل وركب سيارته .. طلع جواله واتصل على امه .. بس كان مقفل .. فأتصل على فارس .. وبعد رن طويل رد ..
فيصل: هلا فارس ..
فارس: هلا .. كيفك يافيصل وشخبارك ..؟!
فيصل: الحمد لله بخير .. كيف امي وابوي وريما ..؟!
فارس: بخير ..
فيصل: طيب ايش اخبار اسيل ..؟! اشتقت اخاصمها واهزأها .. اللحين اكيد فرحانه اني رحت وقاعده تلعب بذيلها ..
فارس: لو سمحت يا فيصل .. اسيل مو من هذا النوع .. هذا بدل ما تقولها سلامات ..
فيصل بإستغراب: سلامات ..؟! لا يكون انضربت كمان وهي ما تدري ..؟!
فارس: لا ..
فيصل: عيل شفيها ..؟!
فارس: تعبت في الجامعه وما ندري ليش .. يبناها البيت ونادينا الطبيب .. واللحين هو وابوي عندها ..
فيصل: ان شالله يطلع بخبر موتها ..
فارس بصدمه: ايــــــــــــش ..؟!
فيصل: لا ولا شي .. اكلمكم بعدين .. سلملي على الاهل .. باي ..
فقفل فارس الجوال فقالت امه: هذا فيصل ..؟!
فارس: ايه فيصل ويسلم عليكم ..
ريما: متى بيرجع ..؟!
فارس: ما سألته .. اصلا يقول بيكلمنا بعدين ..
الام بطفش: آهه ..
فارس: شفيج ..؟!
الام: لا مافي شي .. اقول فارس ..
فارس: نعم ..
الام: متى بتدخل العشرين ..؟!
فارس: بعد اربع اشهر وشوي ..
الام: اوووووف طويل ..
فارس: ليش ..؟!
الام: مافي شي مهم ..
فطالع فارس فيها بإستغراب .. وشوي سمعوا صراخ اسيل ..
طالعت الام في الدرج وقالت: انا متأكده ان البنت انينت ..
فارس: لا ما انينت ..
الام: إلا انينت .. وش تفسر صراخها وبجيهها ..؟! هذا كله يدل على الينون ..
ريما: يبغالنا نوديها مستشفى الامراض النفسيه ..
الام: لا .. نوديها لمستشفى الميانين احسن ..
فنزل الاب والطبيب في هالوقت ..
الطبيب: زي ما قلتلك البنت مافيها اي مرض داخلي .. الحاله اللي فيها مو طبيعيه .. انا افضل انكم تعرضوها على طبيب نفسي ..
الاب: طبيب نفسي ..؟! شلون طبيب نفسي ..؟! البنت ما تعاني من اي ضغوط عشان تتعب نفسيا ..
الطبيب: صراحتا ما ادري .. انت ييب لها طبيب واكيد راح يعرف ايش فيها بالضبط .. ياللا انا استأذن ..
الاب: مع السلامه ..
فراح الطبيب وخرج برى ..
الام: شفت .. انا قلت ان البنت مينونه .. هذا اللي ناقصني مينونه في بيتي ..
الاب: بــــــــــــس يا احــــــــــــلام ..
فطالعت فيه بعدين سكتت .. وريما تطالع في امها بإستغراب .. اسيل بنتها فليش تقول عنها كذا ..
فطلع الاب ودخل لغرفة اسيل .. وكانت على نفس حالتها .. جالسه عالسرير وحاطه راسها على رجلها وتبكي وتشهق ..
جاء وجلس فوق السرير قدامها وقال: اسوله حياتي ليش تبجين ..؟!
رفعت راسها وشافته فقالت وهي تبكي: شتبي ..؟! انقلع برا ما ابي احد ..
الاب: طيب ابي اعرف ليش تبجين ..؟!
اسيل بصراخ: مالك شغـــــــل فيني .. اطلــــــــــــع بــــــــــــرا .. ما ابي اشوف احــــــــــــد .. اطلــــــــــــع ..
الاب: اوكي حياتي بأطلع .. بس انتي هدي نفسج ولا تساوين في نفسج جذي ..
اسيل: لا تتدخــــــــــــل فينــــــــــــي .. اطــــــــــــلع ..
الاب: لا حول ولا قوة إلا بالله ..
قام وطلع برا .. واسيل تطالع فيه لين طلع ..
انسدحت عالسرير وبكت ..
اسيل: اسيل بس .. بس وقفي .. ابي اعرف ليش انا جذي .. ابي اموت خلاص .. ما ابي اعيش .. اكرهكم واكره الدنيا كلها .. ابي امــــــــــــــــــــــــــــــــــــوت ..
حطت ايدها على وجهها وبكت ..
نزل الاب من الدرج وقال: لا احد يدخل عندها الغرفه ..
فارس: طيب يبه هي كيفها ..؟!
الاب: حالتها جدا سيئه ..
مشي وطلع برا البيت .. فجلس فارس ع الكنبه بتفكير في حالة اسيل ..
حطت ريما ايدها على راسها .. رجع لها الصداع مره ثانيه .. فقامت وراحت لغرفتها .. فتحت الدولاب وطلعت كيس الحبوب ..
ريما: اووووف .. عمري ما شفت صداع زي جذي .. بعد كل اربع ساعات اخذ اكثر من حبه .. ايش اللي فيني بالضبط ..؟!
طلعت الحبوب واخذت كم حبه وبلعتها .. بس جسمها واعصابها خلاص تعودت على هذي الحبوب القويه .. صارت ما تأثر ابدا ..
*وش تتوقعي بيصير لج ياريما ..؟!
================================================== ==================
في بيت ياسر .. كان جالس في الصاله ومعاه الجوال حقه ..
ياسر: اتصل عليها ولا لا ..؟! انا ابي اتصل بعد ما تصير حالتها جدا سيئه والصداع ميننها ومو مخليها قادره تنام .. بس المشكله اني ما ادري متى تصير حالتها سيئه .. اووووف .. خلاص انتضر ثلاث ايام كمان عشان اتأكد انها من جد تعبانه ..
جت اخته وداد وقالت: شفيج تحاجي روحك جنك يني ..؟!
ياسر: وداد اذا ما بعدتي عني راح تشوفي شي مو زين لج .. فأبعدي احسن لج ..
وداد: سمعتك وانت تحاجي روحك .. شكلك بتصيد بنت صح ..؟!
ياسر: مالج شغل وابعدي ..
وداد: ياسر اذا ما بطلت هذي الحركات بعلم ابوي عليك ..
فأخذ الريموت ورماه بقوه عليها .. بس هي كانت اذكى منه وبعدت قبل لا يرميه ..
وداد: مستحيل تصيدني مستحيل ..
ياسر بعصبيه: ودااادوه طلعي لغرفتج قبل لا اقوم .. واذا قمت راح تشوفين شيطان جدامج .. طلعي بسرعه ..
وداد: بيي يوم وراح تندم على هالحركات اللي تسويها ..
وطلعت لغرفتها ..
ياسر: اوووف .. مافي احد صاحي .. بطلع مع رفيجي خالد ابرك لي ..
خرج برا البيت ومر على صاحبه خالد وركب معاه السياره .. راحوا لمطعم محترم وجلسوا فيه ..
خالد: ههههههههه .. وبعدين ايش صار ..؟!
ياسر: لا ابد بس اعطيته الفلوس وافتكيت منه .. صج انه نشبه ..
خالد: اهم شي انك ارتحت منه ..
ياسر: فعلا هذا هو اهم شي ..
خالد: اقول ياسر ..
ياسر: نعم ..
خالد: انا واحمد والشله اللي في الاستراحه اتفقنا نسوي بارتي ..
ياسر: كيف يعني ..؟!
خالد: نصلح حفله كبيره وكل واحد ييب خويته معاه .. يعني نستانس .. اخر مره سوينا بارتي قبل سبع شهور ..
ياسر: فكره وايد حلوه .. ومتى اتفقتم تكون ..؟!
خالد: لمن يرجع صاحبنا فيصل من سفره .. عشان تكون احلى ..
ياسر: بس فيصل ما عنده وحده يخاويها ..
خالد: صحيح ما عنده بس يكفي انه يكون معانا .. لا تنسى انه هو اللي يمول الاستراحه .. هو بيكون المسؤول ييب لنا المخدرات والويسكي والبيره وشي زي جذي ..
ياسر: حلو .. ومتى بيرجع من السفر ..؟!
خالد: يقول اسبوعين او ثلاث ..
ياسر: لا ما يمديني اصيد ريما واييبها معاي ..
خالد: مو لازم ريما .. فيه ميلون بنت غيرها ..
ياسر: لا .. انا ابي ريما .. ومستحيل ايي ببنت غيرها ..
خالد: براحتك ..
ياسر: لا بأس .. اقدر اتمكن منها في ثلاث اسابيع ..
خالد: وكيف .. مو انت تقول انها عنيده جدا ..
ياسر: استعملت حركتك ..
خالد: اي حركه ..؟!
ياسر: بأدمنها مخدرات .. واكيد بعدين بتسوي اي شي عشان حبه وحده بس ..
خالد: يا خسيس .. وكيف خليتها تدمن ..؟!
ياسر: اسمع ..
<<<< وحكى له كل شي <<< ......
================================================== ==================
عند دانا .. كانت في غرفة العمليات عشان تسوي العمليه الثانيه المكمله للأولى .. وامها وعادل برا ينتضرون النتائج ..
الام جالسه عالكرسي وتدعي لبنتها انها تخرج بالسلامه .. وعادل كان سرحان ويفكر في كلام الطبيب ..
:::::::::::::::::::::::::::::::::::::::::::::::
الطبيب: اختك ..؟!
عادل: ايه ابي اسأل عن حالة اختي كيفها ..؟!
الطبيب: واخيرا ياء واحد صاحي .. دكتورها في الجامعه مصر انها ولد .. واصحابها اللي يووا امس مصرين انها ولد .. انت الوحيد الصاحي اللي عارف انها بنت .. صج ناس غريبين .. اختك حالتها اللحـ.....
:::::::::::::::::::::::::::::::::::::::::::::::
عادل في نفسه: "امس يووا اصحابها في الجامعه .. اخاف يكونون عرفوا شي عنها .. لا اخاف ان الطبيب نفسه يكون عرف .. ان شالله ما يصير لج شي يا دانا" ..
الام: عادل ..
عادل: نعم يمه ..
الام: مو كأنهم تأخروا ..
عادل: طيب هذا شي عادي .. هذي عمليه مو فحص ..
الام: بس انا خايفه عليها ..
عادل: لا تخافي يمه .. الطبيب طمنا ان العمليه سهله وناجحه بأذن الله ..
الام: ان شالله ..
مر الوقت ببطئ .. وبعد ساعه ..
طلع الطبيب .. فجوا عنده ..
عادل: ها كيف دانا اللحين ..؟!
الام: شصار لبنتي .. صارت بخير ..؟!
الطبيب: اطمئنوا العمليه نجحت والحمد لله .. انتم بس ادعولها انها تصحى زي الحصان ..
الام: الله يبشرك بالخير ان شالله ..
عادل: الحمد لله ..
الطبيب: ياللا انا استأذن ..
الام: لحضه ..
الطبيب: نعم ..
الام: ما اقدر اشوفها اللحين ..؟!
الطبيب: لا ما تقدرين اللحين .. بس تقدرين بعد يومين .. صحيح اننا قلنا بعد عشر ايام لأننا توقعنا انه بيصير مضاعفات .. بس الحمد لله كل شي تمام ..
الام: يعني بعد يومين تطلع ..؟!
الطبيب: لا لا لا .. احنا قلنا تقدرون تشوفونها بعد يومين .. اما موعد الطلوع ان شالله بعد اربع ايام ..
عادل: مشكور يادكتور ماقصرت ..
الطبيب: العفو .. هذا واجبي .. ياللا استأذن ..
الام: اذنك معك ..
فراح الدكتور .. جلست الام عالكرسي وقالت: الحمد لله ..
فأبتسم عادل .. فهديت ابتسامته وقال: يا دكتــــــــــــــــــــــــور ..
فلف الدكتور وجاء عنده وقال: نعم ..
عادل: مو صح يووا الشرطه عشان تحقق بس قلتم لهم بعد عشر ايام ..
الدكتور: ايه صح ..
عادل: واللحين ..؟!
الدكتور: اكيد راح نتصل عليهم واقولهم تعالوا بعد يومين او ثلاثه ..
عادل: بس يا دكتور ..
الدكتور: نعم ..
عادل: فيه مشكله ..
الدكتور: ايش ..؟!
عادل: اختي تخاف من الشرطه .. يعني ما ابيك تتصل عليهم .. بعد ما تخرج اختي من المستشفى انا بنفسي راح اوديها المخفر بعد ما امهد لها الموضوع .. ممكن ..؟!
الدكتور: اوكي مافي مشكله ..
عادل بابتسامه: مشكور ..
الدكتور: العفو ..
وراح .. ابتسم عادل براحه .. هذا الموضوع كان شاغل باله كثير .. بس اللحين صار الموضوع سهل ..
================================================== ==================
في الليل .. كان سامي جالس في الحديقه ومعاه كتابه يذاكر لأختبار بكره ..
رمى الكتاب وقال: اووووف .. شذا الكلام .. والله صعب والله صعب .. اتحدى احد ييب درجه كامله .. محد يقدر إلا عبير لأنها ذكيه وشاطره .. عيل راح اشبك عبير عشان تغششني في الامتحان ..
ريندا: وهل هذا هو الحل برايك ..؟!
لف ورى وشاف ريندا واقفه ومعاها كوب عصير برتقال ..
سامي: ريندا .. من امتى وانتي هني ..؟!
ريندا: منذ ثواني .. تفضل ..
وحطت العصير على الطاوله قدامه ..
سامي: بس انا ما طلبت عصير ..
ريندا: اعلم هذا .. لكن عصير البرتقال يساعد على تثبيت المعلومه في العقل ..
سامي: اها .. طيب شكرا ..
فجلست على كرسي وقالت: عفوا .. لكنك لم تجب عن سؤالي ..
سامي: اي سؤال ..؟!
ريندا: عندما يكون لديك اختبار صعب .. هل الحل هو ان تتقرب الى احدهم حتى يقوم بتغشيشك ..؟!
سامي: ايه اكيد .. يعني وشو الحل برايج ..؟!
ريندا: ان تذاكر ..
سامي: اقولج صعب كيف اذاكر ..؟!
ريندا: لماذا .. هل تضن ان مواد الجامعه سهله ..؟! بالتأكيد ستكون صعبه .. ذاكر كما يذاكر جميع الطلاب .. ذاكر من دون تذمر .. واياك ان تفكر في الغش ..
سامي بطفش: طيب طيب .. بذاكر وإذا باجر ما عرفت احل راح اغش ..
ريندا: لا تغش ..
سامي: ماراح اغش إلا اذا احتجت شرايج ..؟!
ريندا بإستهزاء: وااااو فكرة رائعه ..
سامي: شفتي كيف ..؟! عندي عقل بسم الله علي ..
فقامت من فوق الكرسي وقالت: هل ستغش ..؟!
سامي: اذا احتجت ..
ريندا: اذا سوف اخبر الدكتور المسؤول عن الاختبار حتى يكثف المراقبه عليك ..
سامي بدهشه: من يد ..؟! لا اكيد تتغشمرين وياي ..
ريندا: انا لا امزح ..
سامي: طيب ريندا شفيج صدقتي .. كنت اتغشمر وياج .. ما راح اغش صدقيني ما بغش ..
ريندا: سنرى ..
وراحت ..
سامي: يووووه .. ان شالله ما تسويها ..
فاخذ كتابه وقال: بذاكر احسن لي .. بذاكر سطر واشرب شوي من العصير عشان السطر يثبت في مخي ..
فقرأ السطر الاول وشرب شوي وقرأ الثاني وشرب شوي .............................. وقرأ السطر التاسع وشرب آخر شي في الكاسه ..
قام وقال: خلاص حفضت تسع اسطر ودخلت مخي .. يعني لو اذاكر في السطور الباقيه لين الصبح ما راح يثبت في مخي لأن العصير خلص ..
اخذ كتابه ودخل للبيت .. طلع الدرج واتجه لناحية جناحه .. فوقف لمن مر من عند جناح ابوه .. وقف لأنه سمع ابوه يتكلم في الجوال ..
وقف لأنه سمع كلمه وقفته .. سمع كلمة اخوي .. قرب من عند الباب وحط اذنه عالباب عشان يسمع ..
الاب: واخيرا اتصلت علي يا اخوي ..
الاخ: ................................
الاب: صحيح انك اتصلت قبل فتره وما رديت تعرف ليش ..؟! كنت زعلان منك ..
الاخ: ................................
الاب: لا لا .. انا من حقي ازعل .. يعني من بعد اكثر من 17 سنه وتوك تتصل ..
الاخ: ................................
الاب: انت اللي كنت غلطان في ذاك الوقت .. يعني انت اللي مفروض تتصل مو انا .. ولا تنسى اني اخوك الكبير ..
الاخ: ................................
الاب: اوكي براحتك .. طيب شخبارك ..؟!
الاخ: ................................
الاب: الحمد لله تمام .. طيب شخبار بنتك ..؟!
الاخ: ................................
الاب بإستغراب: شتقصد ..؟!
الاخ: ................................
الاب بنص عين: متأكد ..؟! انا اعرفك عدل .. قول الصج بنتك وين ..؟!
الاخ: ................................
الاب: اقول شرايك تيي باجر عندي انت وبنتك عشان افهم ايش تقصد ..
الاخ: ................................
الاب: لا مو معقوله تكون ماتت ..
سامي في نفسه: "ماتت ..؟!!!!!! لا اكيد عمي يمزح .. شلون تموت وانا ما شفتها" ..
الاخ: .................................................. .................................................. .................................................. ..........
الاب: يعني انت تقصد ان بنتـ....
انتهى الجزء الثالث .. ونكمل سواليفهم في البارت الخامس الجزء الاول ..
هذا الجزء كان حماس صح ..؟!
* شفتم ايش صار لبطلتنا اسيل .. ايش تتوقعون السبب وبيستمر لمتى ..؟!
* اللي صار بين سامي وغيدا .. تتوقعون غيدا كيف عرفت عن مشكلة سامي ..؟!
* اسيل .. لمن توصل عمرها عشرين سنه .. بتعرف حقيقتها ولا بتعرف قبل هذا الوقت ..؟!
* شهد .. امها ماتت .. كيف تتوقعون بتكون حياتها هي واخوانها الاربعه ..؟!
* ياسر والبارتي اللي بيسوونه الشله .. فيصل بيكون هناك .. تتوقعون حتى ريما بتكون موجوده ..؟!
* واخيرا سلطان والد سامي واخ والد اسيل .. مكالمته مع اخوه بتوصل لأيش ..؟!
انتضروني في البارت الخامس الجزء الاول ..
مع تـحـياتي // r5t Almushta8h 6 ..
|$[ نهاية البآرت ]$|
__________________  |