|
|$[ البآرت الخامس الجزء الثاني ]$|
دخلت شهد من الباب وهي منزله راسها بإنكسار ..
قام راشد وقال: شهد ..؟!!
رفعت راسها له وعيونها مليانه دموع ووجهها احمر ..
شهد بصوت ضعيف وتعبان: انا آسفه على تأخري ..
طالع راشد فيها فتره ومستغرب من حالتها .. كان باين عليها انه صار لها شي خلاها تبكي وبقوه ..
راشد: خييــــــــــــر ليش هذا البجي .. شصار ..؟!
فبكت بس مسكت نفسها بعدين بقوه وسكتت عشان ما تبكي اكثر ..
طالع فيها بإستغراب اكبر .. وش اللي يخلها تبكي كذا ..؟! فتح عيونه بصدمه اول ما خطر بباله انــ......
جاء عندها بعصبيه ومسكها من شعرها وقال بعصبيه: شنو اللي صار يا شهد ..؟!
انصدمت من حركته ونزلت دموعها اكثر وقالت: آآااه ..
راشد بعصبيه: في احد اعترضلج في الطريج .. في احد قرب منج ..؟! ياوبي في احد اذاج ..؟!
هزت راسها بلا وهي تتألم من مسكته لشعرها ..
لمن شافها قالت لا .. فك شعرها وقال براحه: حلو ..
طالعت فيه بإستغراب ..
طالع فيها فتره وقال: لا تحسبيني خايف عليج او شرفج يهمني .. لا انتي غلطانه .. انا خايف على سمعت عائلتنا ..
فنزلت راسها بعدين قال: لا تبجيــــــــــــن يالجلبــــــــــــه .. اكره مافي حياتي لمن اشوف بنت تبجي ..
فعضت على شفتها وبكت ..
لف وجهه للجهه الثانيه عشان لا يشوفها وقال: يا لييــــــــــــل انا شقلت ..
مسكت نفسها بقوه وقالت: آسفه ..
لف عليها وقال: واللحين ممكن اعرف ليش تأخرتي خمس ايام ..؟! خمــــــــــــس ايام يالجلبه وين كنتي فيها ..؟!
شهقت وقالت: كنـ كــ كنت فـ امـ امـ مــ..........
وما قدرت تمسك نفسها وبكت بقوه وشهقت وهي تتذكر امها ..
لف وجهه للجهه الثانيه وقال بعصبيه: اوووووف .. انتي ما تفهمين ..؟! اقسم بالله اذا بجيتي راح تنضربين ضرب عمرك ما شفتيه في حياتك يا شهدوه ..
حطت ايدها على فمها تمنع بكائها وقالت: آسفه ..
راشد: واللحين ممكن اعرف الخمس ايام وين كنتي فيها ..؟!
ضغطت على نفسها وقالت: كنت عند اهلي ..
لف عليها وصفقها كف طاحت من قوته وقال بعصبيه: بعد كل هذا الحجي والبجي تقولين كنت عند اهلي .. حسبالي عندج مشكله جايده يا الحماره .. يعني خمــــــــــــس ايــــــــــــام كنتي عند اهلج .. رحتي لأهلج وقعدتي عندهم وصفطتي كلامي واوامري على ينب ..
بكت وقالت: حرام عليج يا راشد انت غلطان ..
ضربها برجله وقال: جــــــــــــب ولا كلمه .. انا عمج وفوق راسج ولازم تقولين سيد مو راشد حاف .. وانا اذا قلت كلمه محد يقولي غلطان يا الحيوانه ..
فبكت اكثر .. يعني امها وحياتها ماتت وفوق هذا ذا يضربها ومو مقدر حالتها ..
راشد بصراخ: لا تبجيــــــــــــن ..
نزلت دموعها وبكت اكثر وهي تقول: امـ مـ مـــي مـمـ مـا تــــت يا راشد مــــــــــــاتــــــــــــت ..
وبكت .. فطالع راشد فيها وقال: وإذا ماتت شفيها ..؟!
رفعت راسها وطالعت فيه بصدمه ..
راشد: كل الناس امهم تموت .. ما يبتي شي يديد ..
هزت راسها بلا وهي مصدومه من كلامه ..
راشد: انا امي ميته ورفيجي كمان امه ميته .. ما انتي اول ولا آخر وحده تموت امها .. بالعكس ارتحتي من فرد يزيد المصاريف في كوخكم الصغير ..
حطت ايدها على فمها وشهقت وهي تسمع كلامه .. لا مستحيل مو قادره تصدق .. هذا مو انسان ..
راشد: وإذا كانت امج ماتت فهذا مو عذر لغيابج عن البيت خمس ايام .. انتي صلحتي وقاحه عمري ما راح انساها .. انا قلت لج ان اجازتج بس يوم الثلاثاء .. بس انتي تماديتي يا الجلبه وغبتي الاربعاء والخميس والجمعه واليوم هو الخامس ..
مسحت دموعها اللي تنزل بإستمرار وقالت وهي تشاهق: مســـ ـتـ ـحـ ـيــ ــل ..
راشد: شنو اللي مستحيل ..؟! ليه كنتي متوقعه اني باخذج في الاحضان واهدئ منج واقولج احسن الله عزاج ..؟! او يمكن كنتي متوقعه اني بأعطيج اجازه عشان تهدئين .. تحلمين يا ماما .. حسبالج اني بهتم لموت ذي اللي اسمها امج ..؟! انتي ميرد خادمه .. تعرفين شنو يعني خادمه ..؟! يعني وحده حقيره انتي وامج واهلج كلهم .. وحده زباله وامورج الشخصيه محد يهتم فيها .. اللي مثلج المفروض ما يبجون على موت امهم .. ابي اعرف ليش تبجون ..؟! معقوله تعرفون كيف تحسون ..؟! مستحيل .. المجتمع اللي انتي تعيشين فيه مجتمع واطي ولا يفهمون شي في الحياة .. صراحتا شي غريب ..
حطت ايدها على اذنها وبكت وهي تقول: حرام حراإاااام حــــــــــــرااااام .. انت قــــــــــــاســــــــــــي .. اكرهــــــــــــــــــــــــك ..
جلس عندها ومسك يدها ولفها بقوه وقال بتهديد: حشمي لسانج واعرفي انتي منو تحاجين ..؟! انتي تحاجين شخص انتشلج انتي واهلج من الضياع .. انتي تحاجين شخص لولاه جان متم من الجوع والفقر .. اعرفي قدر نفسج يا شهدوه ..
عضت على شفتها من الالم .. الم مسكته والم كلامه ..
فك ايدها وقام وقال: بيتكم الآن مافيه شخص اكبر منج صح ..؟!
طالعت فيه .. وش بيقول بعد ..؟!
راشد: عيل من الآن مافي روحه عالبيت مفهوم ..؟! ما عندنا شغالات يروحون لبيت مافيه محرم ..
شهد بسرعه: لا واللي يسلمك .. اخواني هناك لوحدهم ..
راشد: جـــــــــب .. انا لا قلت كلمه تمشي .. راح تشتغلي هنا من دون لا تطرين سالفة اخوانج على لسانج .. ولا اسمعج بعدين تقولين ابي اترك الشغل لأنه ممنوع يا شغاله .. اما اخوانج فيدبرون نفسهم بنفسهم .. هذا غلط امج ماتت في وقت مرره غلط وانا ما راح اتحمل هذا الخطأ فاهمه ..؟!
شهد ببكاء: واللي يسلمك ما يصير جذي ..
راشد بعصبيه: بــــــــــــس .. انا لا قلت كلمه تمشي .. لا اسمعج تفتحين هذا الموضوع مره ثانيه ..
وطلع الدرج ودخل غرفته وقفل الباب بقوه وراه ..
شهد: مستحيل مستحيــــــــــــل ..
وحطت ايدها وراسها عالارض وبكت .. انحرمت من كل شي .. ابوها وعطفه وامانه .. وامها وحنانها وطيبتها .. اخوانها واخوتهم وحسهم .. بيتها وذكرياتها وحياتها .. وانحرمت من الحياة براحه ..
عايشه في حاله جدا صعبه من حياة صعبه وحرمان من اهل وقسوة شخص .. مستحيل احد عاش مثل اللي عاشته شهد ..
================================================== ==================
الظهر .. ركبت دانا سيارتها واتجهت لمركز الشرطه بعد ما قالها عادل انهم يبغون يستجوبونها عن حادثه معمل الكيمياء ..
وصلت للمركز ودخلت وبعد فتره من الاجراءات وصلت عند المحقق المكلف في ذي السالفه .. جلست قدامه وبدأ يسألها ..
المحقق: ايش اسمك بالكامل ..؟!
دانا: عادل عبدالعزيز الـ****** ..
المحقق: اوكي يا عادل .. اللي عرفته انك كنت غايب في اختبار الكيمياء اللي كان يوم السبت .. فممكن اعرف ليش ..؟!
دانا: كان عندي موعد في المستشفى عشان يصلحون لي عمليه في عيوني ..
المحقق: اعطانا الدكتور محمود عذرك .. طيب ممكن تعطينا التقرير الخاص بالمستشفى ..؟!
دانا: ايه يبته معاي ..
فتحت الملف اللي جابته معاها واعطته الاوراق .. اخذها وقعد فتره يتفحصها ودانا حدها خايفه مع ان الاوراق ماهي مزوره لأن صاحب عادل اخذ نسخه من تقرير لمريض وحط اسمها بدل عنه ..
المحقق: اوكي تمام .. نفس الاوراق اللي اعطوناها ادارة المستشفى لمن حققنا معاهم .. طيب يا عادل ممكن اعرف ليش دخلت الامتحان وانت مو بكامل صحتك ..؟!
دانا: خفت ان الدكتور ما عاد يختبرني بعدين ..
طالع المحقق فيها وهز راسه بتفهم وقال: ابي اعرف شنو اللي صار بالضبط ..؟!
دانا: دخلت و كنت حاس بتعب وصداع و و والم في عيوني .. بعدين لخبطت بين محلولين وحطيت الخطأ .. فتصاعدت ابخره وغازات ولمن ييت بخرج واعلمهم حسيت بدوخه وبعدين ما ادري شصار ..؟!
المحقق: تمام تمام .. اسمع يا عادل .. اللحين بيكون كل شي بخير لأن اوراقك سليمه ولأنه ما صار أي حالات خطره او موت لا سمح الله .. فأبيك المره اليايه تنتبه في شغلك وفي كل شي .. عادل ترى الكيمياء وايد خطره ويبيلها تركيز وانتباه .. فهمتني يا عادل ..؟!
هزت راسها بإيه ..
فقعد يقلب المحقق في الاوراق وقال: اللحين باجي بس اجراءات بسيطه وكل شي بيكون تمام .. انت اللي عليـ........
فوقف فجأه يطالع في تقرير المستشفى حق دانا وكأنه شاف شي ما انتبه له من اول ..
وقف المحقق من الكلام من جهه ودانا وقف قلبها من جهه ثانيه .. تطالع فيه بخوف .. لا يكون شاف شي خطأ ولا شي مو طبيعي ..
رفع المحقق راسه يطالع في دانا وملامحه ملامح دهشه .. بلعت دانا ريقها بخوف وهي تشوفه ..
المحقق: لحضه لحضه .. انت متأكد انك عادل عبدالعزيز ..؟!
خافت وبقوه .. لا يكون شك في شخصيتها الحقيقيه ..
بلعت ريقها وقالت بتردد: ايه ..
ابتسم المحقق وقال: معقوله انت ولد رفيجي عبدالعزيز حسن .. لا ما اصدق ..
طالعت فيه بفهاوه .. بعدين حست انها بتضحك من خوفها اللي ما كان له داعي ..
دانا: ليش ابوي كان رفيجك ..؟!
المحقق: رفيجي من ايام المتوسط .. كيفه وكيف اخباره ..؟!
نزلت دانا راسها وقالت: مات من قبل اكثر من سبع سنوات ..
المحقق بحزن: انا لله وانا اليه راجعون .. احسن الله عزاك يا ابني .. وانا آسف ما كان قصدي اذكرك بأبوك ..
دانا: لا عادي مافي مشكله ..
المحقق: خلاص تقدر اللحين تروح واحنا راح ننهي الامر وقبل لا تروح مر على المكتب اللي ينب مكتبي وتلقى هناك واحد معاه اوراق .. وقعها وتيسر على بيتك ..
قامت وقالت: طيب ..
خرجت ووقعت الاوراق وبعدين ركبت السياره وراحت للبيت ..
دخلت البيت ولقت امها وعادل يتغدون ..
الام: دانا .. غريبه ييتي بسرعه .. توقعناج راح تتغدي برى ..
جلست دانا وقالت: كان التحقيق وايد سهل ..
الام: الحمدلله ..
عادل: يعني خلاص انتهى كل شي ..؟!
دانا: يمه اعطيني كوب ماي من عندج ..
صبت لها امها مويه واعطتها .. فاخذتها دانا وشربتها وعادل يطالع فيها ..
قامت دانا فقالت الام بسرعه: وين وين باجي ما كليتي شي ..؟!
دانا: اعرف .. بس انا بآخذ اكلي وادخل غرفتي ..
الام: وليش ..؟!
دانا: القعده في الغرفه اريح من الطاوله ذي .. باااي ..
اخذت اكلها ودخلت غرفتها وعادل يطالع فيها فقالت الام: عادل ..
عادل: ها ..
الام: فيك شي ..؟!
عادل: لا لا انا تمام ..
اما دانا فجلست واخذت جوالها واتصلت على صلاح وبعد فتره رد وقالت: الو هلا صلاح ..
صلاح: هلا بدانا كيفج ..؟! وينج من الاثنين وانا احاول اتصل فيج .. سلامات صارلج شي لا سمح الله ..؟!
دانا: بعدين احكيلك كل شي .. المهم شخبار الشغل ..؟!
صلاح: والله الرئيس مشاري دوم يسأل عنج .. وانا قلت انج تعبانه ..
دانا: يعني باجي ما فصلني صح ..؟!
صلاح: لا باجي .. بس لازم تييبين عذر عشان ما ياخذ موقف منج ..
دانا: عندي عذر ..
صلاح: حلو .. طيب متى راح تيين ..؟!
دانا: يمكن باجر او بعده لأن الطبيب قال لازم ارتاح يومين في البيت وباجر بيكون اليوم الثاني ..
صلاح: عيل تعال بعد باجر عشان صحتج وسلامات ما تشوفين شر ان شالله ..
دانا: الشر ما ييج .. خلاص انا اتصلت عشان اخبرك عني وما ابي اطول عليك ..
صلاح: اوكي ياللا باااي ..
دانا: بااي ..
فقفلت الجوال وبعدين بدأت تاكل غداها ببطئ وهي تفكر في موضوع الشغل ..
دق دق دق .. دق الباب فقالت: ميــــــــــــن ..؟!
عادل: انا ..
فطنشت ولا ردت ..
عادل: دانا افتحي الباب ابي اتحجى معاج ..
دانا: ....................... ..
عادل: دانا تركي العناد وفتحي الباب ..
دانا: لو سمحت اللي بيننا انتهى ورجاءا لا تزعجني ..
عادل: طيب فتحي الباب ابي اكلمج ..
دانا: ...............................
عادل: دانا ..
دانا: ...............................
عادل: دانا انا اناديج ..
دانا: ...............................
عادل: دانا في موضوع ضروري ابي احاجيج فيه ..
دانا: ...............................
عادل: يعني ما راح تردين ..؟!
دانا: ...............................
طالع عادل في الباب فتره بعدين لف ومشي بالكرسي المتحرك ودخل غرفته ..
قامت دانا وفتحت الباب شوي وشافته وهو رايح لغرفته .. حست بألم وهي تطالع فيه ..
قفلت الباب وقالت: خليج قويه يا دانا عشان يسمع كلامج ..
مشيت وجلست تكمل اكلها وهذي المره تاكل وهي تفكر في عادل ..
================================================== ==================
في بيت ابو فيصل كانوا جالسين في الصاله .. الاب ماسك جريده ويقرأ والام تتابع برنامج على التلفزيون وفارس ماسك كتابه ويذاكر وريما ماسكه البلاك وكل شوي تبنق ياسر عشان يرد وتدق على الجوال والمسن بس من دون فايده ..
الام: ايه صح نسيت اقولكم .. فيصل الصباح اتصل ويسلم عليكم ..
الاب: متى بيرجع ..؟!
الام: يقول بعد حول اسبوعين ..
فارس: والله وحشني ..
الام: حتى انا والله .. ايه صح سأل على اسيل ويقول اتصل عليها من اول ليه ما ترد .. كان معصب وايد ..
الاب: شقلتي له ..؟!
الام: قلت تعبانه في المستشفى بس ما صدقني ويقول ما صارت كل شوي تتعب ..
الاب: ما عليج منه ..
فارس: يبه ..
الاب: هلا ..
فارس: متى تطلع اسيل ..؟!
فتنهد الاب وقال: لمن تشفى وتصير بخير ..
فارس: وليش هي مينونه ..؟!
الاب: عندها مرض نفسي مو ينون ..
فارس: صدقني يا يبه انه حرام عليك لأنك ظلمتها ..
الاب: فارس انا ما ظلمت احد ..
فارس: الذنب في رقبتك يا يبه اذا انينت من جد .. لأنك انت السبب في دخولها لهالمستشفى ..
وقام وطلع غرفته .. وريما تطالع فيهم وفي كلامهم عن اسيل ..
اخذت جوالها وطلعت لغرفتها ..
انسدحت على سريرها وحطت راسها ع المخده بألم .. صارت تجلس في غرفتها اكثر من 20 ساعه في اليوم .. يادوبك تروح تحضر محاضره او نص وبعدين ترجع للبيت ..
ولها يومين وهي تحاول تتصل في ياسر بس من دون فايده ..
اما في الصاله فقالت الام: عبد الرحمن ..
الاب: نعم ..
الام: منت ملاحظ على ريما شي غريب ..؟!
نزل الاب الجريده وقال: إلا .. صارت ترجع بدري من الجامعه واضطر انا استئذن من شغلي عشان اييب فارس واسيل ..
الام: مو بس هذا .. انا ملاحضه اشياء كثيره .. دايم تيلس في غرفتها وما تنزل إلا للأكل وبعض الاحيان ما تنزل .. واحس صارت كئيبه شوي وكلامها قليل ودايم تروح للصيدليه .. واحس ويهها باين عليه التعب وصاير لونه اصفر .. وكمان تغيرت كانت اول تتكشخ وتحط فل ميك اب واللحين اهملت نفسها .. حتى الاسواق ما صارت تروح لها كالعاده .. ريما تغيرت كثير يا ابو فيصل ..
فطالع فيها الاب بإستغراب وتفكير ..
الام: خايفه تكون طايحه في مشكله ومو قادره تطلع منها ..
الاب: لازم احاجيها .. باجر برجع من شغلي بدري واشوف شفيها ..
الام: ايه واللي يسلمك شوف وش فيها ..
الاب: ان شالله ..
اما فارس فرمى كتابه على السرير واخذ جواله واتصل ..
بعد رنتين رد وقال: هلا وائل ..
وائل: اهلين ..
فارس: شخبارك ..؟!
وائل: تمام وانت ..؟!
فارس: الحمد لله بخير .. خلاص عرفت كل شي ..
وائل: حلو .. المهم وش اخبارها ..؟!
فارس: تمام .. وائل شكل توقعاتك صح ..
وائل: من جد ..؟! كيف تأكدت ..؟!
فارس: من كلامها ..
وائل: طيب بسرعه قول لي هي في اي غرفه ..
فارس: غرفه 57 في الدور الخامس .. افضل وقت تروح هو في المغرب لأن العصر تكون الزيارات كثير وبعد العشا تكون الحراسه مشدده .. يعني لازم تطلعها بدون لأحد يدري ..
وائل: اوك .. وانت عاد قول لأبوك يزورها في العصر .. اخاف يزورها في المغرب وننكشف ..
فارس: اطمئن راح اقوله .. وائل بليز لا احد يدري .. وبليز انتبه لها لين ايي خلاص ..؟!
وائل: عيب عليك يا فارس .. انا ولد عمها واكيد راح انتبه عليها اكثر من نفسي ..
فارس: عارف بس ابيك ما تنسى .. واي شي تبيه اعطها اياه ولا تزعلها ..
وائل: تصدق يا فارس اني حسيت نفسي بزر ..
فارس: هههه المهم انتبه لا احد يشوفك ولا يشوف اسيل لأني اخاف حالة اسيل تدهور اكثر اذا صار شي فأنتبه زين ..
وائل: اقسم بالله ان ما سكتت لأييب اختي لمار عندك ..
فارس بسرعه: لا لا لا لا واللي يسلمك خلاص بسكت ..
وائل: حلو .. المهم ما ابي اطول عليك ومع السلامه ..
فارس: مع السلامه ..
قفل وائل الجوال وهو يفكر في اسيل .. طالع في الغرفه اللي استأجرها فتره بعدين قال: استأجرت في افخم فندق في الدوحه وان شالله تعجبها ..
فتح جواله وشغل على اغنية "لأمشيلك حافي لفارس كرم" وقعد يتسمع لها ..
هذا النوع من الاغاني ما كانت تهمه .. بس عشان اسيل صار يعشق هالاغنيه واللي غناها كمان ..
حط سماعات البلوتوث في اذنه والجوال في جيبه ونزل لسيارته وراح للسوبرماركت يشتري اشياء مهمه ..
================================================== ==================
في مكان آخر خارج الدوحه .. عند شخص من زمان ما جبنا عنه .. عند بسام ..
كان في الجناح الخاص بالمسبح .. كان جالس عالكرسي وفي حضنه كتابه ويطالع في المسبح بشرود ..
مرت وحده من الخدم من قدامه فأنتبه لها وقال: لحضه لحضه ..
وقفت الخدامه وقالت: نعم ..
بسام: وين ماما ..؟!
الخدامه: ماما في الغرفه حقها ..
بسام: ليش ..؟!
الخدامه: ما يدري ..
بسام: اوكي خلاص روحي ..
الخدامه: حادر ..
فراحت لشغلها .. ففتح كتابه يطالع فيه فتره بعدين سكره وقال: مالي نفس اذاكر ..
رمى الكتاب ع الكرسي اللي جنبه وسند دقنه لإيده يطالع في المسبح ..
بسام بطفش: آآآآآآآآآآآآآآه ..
الام: سلامتك من الآه .. شفيك ..؟!
لف ورى وشاف امه فقال: يمه وينج من اول ..؟!
جلست الام على الكرسي وقالت: في غرفتي ..
طالع بسام في امه فتره طويله بعدين قال: يمه .. ذي الايام تقعدين في غرفتج كثير ودوم سرحانه وصرت نادرا اشوفج .. فيج شي يمه ..؟!
لفت الام عليه فتره وقالت: لا ما فيني شي ..
بسام: احس ان فيه شي شاغل بالج .. لانج بس تسرحين وتتأملين كثير .. انا متأكد انه فيه شي شاغل تفكيرج ..
الام: يتراوالك ..
بسام: اقولج انا متأكد وما يتراوالي ..
طالعت الام في المسبح وقالت: كيف دراستك ..؟!
بسام: يمه لا تغيرين الموضوع ..
سرحت الام فتره في شي وهي تطالع في المسبح ..
بسام: يمــــــــــــه انا احاجيج ..
الام: بسام ..
بسام: هلا ..
الام: تعرف مفسر احلام ..؟!
استغرب بسام من سؤالها وقال: ليش ..؟!
الام: تحلمت في حلم وابي اعرف تفسيره ..
بسام: ههههه مو لازم ..
الام: ليش تضحك ..؟!
بسام: مدري بس اللحين محد يحاول يعرف معنى حلمه .. انتي انسي السالفه ولا تشغلي بالج لأنه ميرد حلم ..
الام بإصرار: إلا ذا الحلم ابي اعرف معناه .. هذا الحلم غير وابي اعرف معناه يا بسام ..
استغرب من اصرارها فقال: رفيجي وليد اخوه الكبير مفسر احلام .. شنو هو حلمج عشان اقوله ..؟!
سكتت فتره بعدين قالت: اعطني رقم المفسر ..
طالع فيها وقال: وليش ما تقوليلي شنو هذا الحلم ..؟!
الام: بسام اعطني رقم اخو رفيجك ..
بسام بعناد: ما راح اعطيج إلا لمن تقولي شنو هالحلم ..؟!
الام: بسام عن حركات البزارين واعطني الرقم ..
بسام: وانا اقول ما راح اعطيج وشوفي مين فينا راح يفوز ..
الام بنفاذ صبر: بســــــــــــام ..
بسام: هلا ..
الام بعصبيه: انا امك وغصب عنك تعطيني الرقم ولا ترى والله راح اغضب عليك ليوم الدين ..
طالع بسام فيها فتره بعدين قام وراح قدام المسبح ولف عليها وقال: يمه بتقوليلي شنو هالحلم ولا اقط نفسي في المسبح ..؟!
الام بخوف: بسام حبيبي لا لا تسويها ..
بسام: الا بسويها .. شبغى بالدنيا ما دام امي تكرهني وتقول انها راح تزعل علي لين يوم الدين ..؟!
الام: لا حبيبي بسام كنت امزح .. تعال واطرد الشيطان من راسك ..
بسام: ماني ياي .. مافي غير خيارين .. يا اما تقوليلي شنو هالحلم ولا اقط نفسي في المسبح ..
الام: تعوذ من الابليس وتعال ايلس .. خلاص انسى سالفة الحلم .. انا ما تحلمت ولا ابي اعرف تفسير شي .. بس المهم تعال هنا ..
بسام: معليش انا آسف .. ما راح اتحرك من هنا إلا لمن توعديني انج بتعلميني شنو ذا الحلم ..
الام: ....................................
رجع خطوه لورى لين صار على الحافه وقال: ها اقط نفسي ..؟!
الام بسرعه: لا لا لا ..
بسام: عيل شنو ..؟!
الام: بسام لازم تفهمني .. انا ما ابغى اقولك لأنه ........
بسام: عيل جذي .. اوكي ..
فميل جسمه بهدوء على ورى فقامت الام بخوف وهي تقول: يمه بسام ولدي ..
وما امداها توصل عنده إلا بعد ما طاح في المسبح ..
الام بصراخ: بســــــــــــــــــــــــام .. بســــــــــــام ولــــــــــــدي رد علـــــــــي ..
وهو كان في المسبح من دون اي حركه ..
لفت الام حوليها بعدين قالت بصراخ: نورمــــــــــــا نورمــــــــــــــــــــــــا ..
جت الشغاله وقالت: نعم ..
الام: بسرعه روحي نادي الحراس اللي برى بســــــــــــرعــــــــــــه ..
نورما: حادر ماما ..
وراحت الشغاله جرى برى .. والام تحاول تنادي بسام وتكلمه بس من دون فايده .. كان يمثل دوره ببراعه ..
جووا الحراس فقالت الام: بسرعه طلعوا ولدي من المسبح .. طاح واخاف يموت .. بسرعه طلعوه ..
الحارس: حاضر طال عمرج ..
نزل الحارس وطلع بسام من المسبح وحطه عالارض عند الام ..
جلس الام عنده وهزته وهي تقول بخوف: بسام حبيبي .. بسام رد علي .. انا امك يا بسام .. قوم وراح اقولك شنو هالحلم بس المهم قوم .. بسام .. بسام انا احاجيج ..
لفت على الحارس وقالت: بسرعه روح ناد الدكتور الخاص بسرعه ..
هز الحارس راسه وراح ..
مسحت الام على شعر بسام وهي تقول: يمه ولدي قوم .. يمه انا امك رد علي ..
نورما: بابا بسام قوم لا تموت .. انا في يحب انت لا تموت ..
نزلت دموع الام وباسته وهي تقول: حبيبي بسام لا تتركني مثل اختك .. انا من لي بعدك يا حبيبي .. بسام حرام عليك رد علي .. انا امك رد ..
فجلس بسام وباس راسه امه وقال: يمه خلاص لا تبجين انا آسف ..
فطالعت الام فيه فتره بعدين بكت وحضنته وقالت: حرام عليك يمه ليه سويت فيني جذي ..؟!
بسام: والله آسف بس ترى انتي قلتي قوم واقولك الحلم لا تنسي ..
فبعدته الام عن حضنها وقالت: لا تسوي هالحركات مره ثانيه ولا بزعل منك ..
نورما: ايوه بابا بسام لا تسوي كدا .. انا في خوف واجد ..
بسام: خلاص آخر مره بس المهم اني فزت وراح اعرف شنو هالحلم ..
الام: حبيبي بسام ..
بسام: هلا ..
الام: حبيبي ما تقدر تنسى سالفة الحلم ..؟!
بسام: اقط نفسي مره ثانيه ..
الام بسرعه: لا لا لا كنت اتغشمر ..
بسام: حلو ..
فقام وقوم امه معاه وراحوا للكراسي يجلسون ..
الام: ما راح تروح تبدل هدومك عشان لا يصيبك البرد ..؟!
بسام: ما بروح إلا لمن اسمع الحلم ..
الام: بسام العناد مو زين ..
بسام: اذا خايفه علي قوليلي الحلم بسرعه عشان اطلع ابدل هدومي ..
فتنهدت الام وقالت: بعد ما اقولك الحلم تعطيني الرقم وانا اتصل ..
بسام: من عيوني ..
سكتت فتره طويله فقال بسام: يمه بديت احس بالبرد ويمكن اصخن وازكم ..
الام بخوف: بسم الله عليك اللحين بقولك الحلم عشان تطلع تبدل ..
فابتسم بسام .. يقدر يوصل للي يبغاه بطرقه الخاصه ..
الام: تحلمت عن اختك الكبيره ..
بسام: تقصدين سميه ..؟!
الام: ايه .. تحلمت ان رقبتها مليانه دم وفيه بنت لابسه ملابس بيضاء مررررره لدرجه ما قدرت اعرف ايش هو شكلها وكانت البنت ماسكه سلسله وتشدها ....
بسام: وبعدين ..؟!
الام: السلسله كانت حول رقبة اختك .. كانت البنت تشد فيها واختك تحاول تستنجد وتنادي بأسم زوجها بس ما قدرت .. والبنت كانت تطالع في اختك بنضرات غريبه .. قالت اختك للبنت مستحيل مستحيل اتراجع انا ابي اعيش .. تعرفين شنو يعني ابي اعيش .. فشدت البنت السلسله بقوه فماتت اختك .. وبعدين لفت البنت علي وطالعت فيني وقالت .....
وسكتت الام فقال بسام: شنو قالت ..؟!
الام: ...................... قالت ذنبي في رقبتكي انتي كمان .. راح اقتلك مثل ما قتلتيني .. راح اموتك مثل ما موتيني .. راح اذبحك مثل ما ذبحتيني .. وكلام زي جذي .. وبعدها قدمت مني وانا ارجع بخوف .. فصحيت من النوم ..
طالع بسام في امه فتره جدا طويله وقال: يمه شمعنى الحلم ..؟!
الام: ما ادري ..
بسام بهدوء: إلا اكيد تعرفين شي له علاقه بالحلم .. يمه انتي قد ظلمتي احد في حياتج ..؟!
الام: .............................
بسام: ليه ما تردين علي ..؟!
قامت الام وخرجت برى ..
تنهد بسام وقال: الحلم يخوف .. وردت فعل امي تخوف كمان ..
اخذ كتابه وطلع وراح لجناحه وهو يفكر في امه وحلمها ..
حط الكتاب على المكتب وقال: امي فيه شي سوته زمان وهذا الشي جايد لدرجة ان امي خايفه منه .. واكيد اختي لها يد في الامر ..
سكت شوي بعدين قال: لازم اعرف شنو هالشي ..
اخذ ملابسه ودخل الحمام ياخذله دش ..
================================================== ==================
كان سامي جالس في غرفته ويفكر في كلام قالته اروى اليوم ..
سامي: غريبه مو من عادة اروى تطلب مقابلتي برى الجامعه .. وتقول انها تبيني في شي واايد مهم ..
هز كتفه وقال: يمكن فعلا الشي مهم ..
طالع في الساعه وقال: باقي ساعه ونص عالموعد ..
فتذكر شي وقال: كيف راح اروح لها من دون سياره ..؟!
فقام وخرج وهو يقول: لازم اقوله لا يتدخل في اموري ويتركني لحالي .. ما صارت هذي كل شوي يملي اوامره علي من يوم رجع ..
راح لجناح ابوه ودق الباب فسمع ابوه يقول: ادخل يا سامي ..
استغرب سامي وقال: نفسي اعرف وش اللي يدريه اني انا اللي ادق ..
فتح الباب فشاف ابوه جالس في صالة الجناح عالكنبه وفي ايده دخان الكوبيه وفاتح التلفزيون يطالع في اخبار التجار والمتاجرين ..
قفل سامي الباب وراه وقال: انا ابي سـ.......
الاب بمقاطعه: سيارتك ..
طالع سامي فيه بدهشه وقال الاب وهو يطالع في التلفزيون: ليش تبي سيارتك ..؟!
سامي: ما فيها ليش .. انا ابي سيارتي عشان استعملها ..
الاب: عندك بدل السواق ميه ..
سامي: انا ما ابي سواقين .. ابي اقضي اموري بنفسي ..
الاب: لا ..
سامي: مو بكيفك ..
فلف الاب وطالع فيه .. فحس سامي بخوف من نضراته وسكت ..
فلف الاب وطالع في التلفزيون وقال: تبي شي ثاني ..؟!
سامي: في سيارتي اوراق مهمه وابغاها ..
فأخذ الاب نفس بسيجارته بعدين قال: كل الاغراض اللي كانت في سيارتك هناك ..
واشر ورى سامي .. فلف سامي عالطاوله وشاف اغراضه جنب الاباجوره .. فعصب .. هو كان يبغى يقول كذا عشان ياخذ سيارته بس ......
الاب: هههههههههه ماكو فايده يا سامي .. خطتك ماتمشي علي ..
فلف سامي عليه بدهشه وقال في نفسه: "ويقرأ الافكار كمان .. ذا يني مو بشر" ..
الاب: تبي شي ثاني ..؟!
سامي: اذا كنت ما راح تعطيني سيارتي راح اشتري سياره يديده ..
الاب: راح آخذها كمان ..
فعصب سامي وخرج برى الجناح ..
نزل وقابل بوجهه مراد فقال بعصبيه: وانت دايم دايم في ويهي .. ما ترتاح إلا لمن تنكد علي يالجلب .. اقلب ويهك قبل لأشوتك بالجزمه ..
فصفر مراد وقال: الاخ زعلان من ابوه وحط القهر فيني انا ..
سامي: اووووووووووووووف ..
ونزل وخرج برى القصر كله وراح للشارع .. وقف له تاكسي وراح للمطعم اللي اتفقوا عليه ..
بعد نص ساعه وصل للمطعم وجلس على طاوله رقم سته ينتظرها ..
اخذ جواله وحط السماعات في اذنه يسمع له اغنيه تهدي من نفسه اللي دايم عصبيه ..
بعد نص ساعه جت اروى واستغربت لمن شافته لأنه بقي نص ساعه عالموعد ..
اروى: اهلين سامي ..
لف عليها وقال: هلا بحياتي اروى ..
مشيت وجلست ع الكرسي وقالت: ييت بدري ليش ..؟!
سامي: كنت فاضي .. وعشانج راح افضي نفسي لو كنت مشغول ..
اروى: تحب تشرب ايش ..؟!
سامي: لا لا حياتي ما يصير .. انا اللي ادفع ..
اروى: طيب انا ما قلت بأدفع .. انا قلت تحب تشرب ايش ..
سامي: طيب اوكي .. اللي تبينه اطلبيلي مثله ..
اروى: انا حأشتري عصير برتقال عادي ..
سامي: مافي مشكله راح اشرب مثلك ..
فأبتسمت وطلبت العصيرات وقالت بعدين: كيف هي نفسيتك قبل الاختبارات ..؟!
سامي: ما فكرت ..
اروى: هههههههه ..
سامي: يا لبى هالضحكه ..
اروى: تسلم .. اممم سامي ..
سامي: عيونه ..
اروى: صراحتا انا كنت ابغاك في موضوع ..
سامي: شنهو ..؟!
اروى: راح اتكلم معاك بكل صراحه .. انا لمن كنت اولى جامعه انت كنت ثاني .. صراحتا انا اول ما دخلت الجامعه وشفتك حسيت بشي غريب .. اجذب عليك لو قلت حب .. يعني بصراحه اول ما شفتك اعجبت فيك وفي شكلك وكل شي .. بس كنت خايفه اني احبك ..
فاستغرب سامي وقال: ليش ..؟!
اروى: سامي انت لعاب .. خفت اتعلق فيك واحبك وبعدين تتركني اتعذب ولا تهتم فيني .. وعشان جذي نقلت الترم الثاني لجامعه ثانيه عشان ابتعد عنك .. وفعلا صرت لمن اكلمك كان شعوري ميرد اعجاب لا اكثر .. فرديت ذي السنه للجامعه بعد ما تأكدت اني مستحيل احبك .. مرت الايام عادي وشعوري زي ما كان اول .. بس .. بس لمن ساعدتني في ذيك اللحضه شعوري انقلب فوق حدر .. تتذكر لمن انكتمت من الغاز .. في ذاك الوقت توقعت ان نهايتي الموت بس ييت انت وساعدتني .. ارتبكت وتوترت لمن شفتك وما ادري ليه ..
سامي في نفسه: "حتى انا ارتبكت واتلخبطت .. بس ما كان السبب هو اني حبيتها .. لا السبب على ما اظن هو انـ................
اروى: ومن ذاك الوقت كنت اقنع نفسي اني ما احبك واني واني بس ما قدرت .. فعلا يا سامي انا من جد حبيتك من ذيج الساعه .. انا بنفسي ما توقعت اني احبك بس توقعاتي ما كانت في مكانها .. سامي انا احبــــــــــــك ..
طالع سامي فيها فتره وقال: اروى .. انصحك تبعدين عني ..
اروى: وليييييش ..؟!
سامي: اسمعي هذا الشي ما قد قلته غير لرفيجي ريان .. اروى انا مستحيل اتزوج .. تعرفي شنو مستحيل ..؟! صدقيني ما اقدر اتزوج ابدا ..
طالعت فيه وقالت: وش السبب ..؟!
فلف سامي وجهه وقال: لي اسبابي الخاصه ..
نزلت راسها وهي حاسه بالعبره وقالت: صدقني يا سامي مو بإيدي بس انا صج احبك ..
لف سامي عليها وقال: اروى .. انسيني فهذا في مصلحتج ..
نزلت دموعها وقالت: مو قادره يا سامي مو قادره .. والله حاولت بس ما قدرت .. سامي لازم تفهمني لـ.....
فقاطعها سامي: انتي اللي لازم تفهميني .. اروى حتضيعين اذا استمريتي تحبيني .. تعرفين شنو مستحيل ..؟! انا مستحيل احب او اتزوج .. لأني ما استحق احب وحده واتزوجها ..
رفعت راسها وقالت: شتقصد بما استحق ..؟!
سكت بعدين قال: اذا تبين تنسيني حاولي تحبين واحد غيري وراح تقدرين تنسيني ..
فنزلت دموعها مره ثانيه وقالت: ما اقدر .. سامي اصلا انا مو قادره اسوي اي شي .. انت دوم في بالي .. لمن آكل اتذكرك ولمن انام اتذكرك ولمن اصحى اتذكرك ولمن ادخل او اخرج او اتعب دايما اتذكرك .. سامي ليه انت مو راضي تحس فيني ..؟!
سامي: تحبيني ..؟!
فهزت راسها بإيه ..
سامي: اذا تحبيني من جد لازم تدورين راحتي .. صدقيني راحتي هي لمن اشوفج مرتبطه مع واحد ثاني ومرتاحه معاه .. اروى طالعي حواليك .. اكيد في احد يحبج بس ما تدرين عنه .. وعد مني اني راح اكون اول واحد يحضر زواجك ..
اروى: سامي نـ.......
سامي بمقاطعه: اذا رفضتي يا اروى فراح يكون هذا آخر ما بيني وبينج .. راح اسافر واكمل دراستج برى ولا راح تشوفيني ابدا ..
اروى بسرعه: لا يا سامي ..
فابتسم سامي وقال: توعديني انك تنسيني ..؟!
طالعت فيه وعيونها مليانه دموع وقالت: وش اللي يخليك رافض الزواج ..؟!
سكت فتره طوييييييييله بعدين قال بهدوء: لانه مافي عائله في العالم راح تقبل بواحد مثلي ..
اروى بسرعه: لا تقول جذي .. انا راح اقبل فيك بكل عيوبك اذا كان عندك ..
سامي بصراخ: مستحييييييل .. انتي بنفسج لو عرفتي ما راح تقبلي فيني ابدا .. بلييييييز ابعدي عني وريحيني ..
حبست شهقتها واخذت شنطتها وطلعت من المطعم ..
طالع سامي فيها وهي تطلع بعدين اسند راسه لإيده وقال: حرام عليك يا يبه حرام .. الله لا يسامحك ..
اخذ جواله وحط الفلوس وبعدين طلع برى المطعم ..
================================================== ==================
في المغرب .. وقف وائل سيارته ورى المستشفى ونزل .. دخل داخل وراح لجهة العاملين وشاف واحد منهم ..
وائل: لو سمحت ..
العامل: نعم ..
وائل: بغيت اسألك سؤال ..
العامل: تفضل ..
وائل: شنو هي طبيعة عملكم في المستشفى ..؟!
العامل: عادي ننقل الاغراض الزائده من الغرف واغسل شراشف المرضى واعمال كثيره ..
وائل: يعني تدخلون غرف المرضى عادي ..؟!
العامل: ليه تسأل ..؟!
وائل: ولد خالي يدور له شغل فبغيت اسأل عن هذا الشغل واشوف يناسبه ولا لا ..
العامل: اها .. ايه ندخل غرف المرضى ..
وائل: طيب فيه اشياء ترمونها برى المستشفى ..؟!
العامل: ايوه بعض الاشياء اللي ما نحتاجها ..
وائل: كيف ..؟!
العامل: تعال اوريك ..
فراح وائل معاه وراحوا للمكان الخاص بأغراض العاملين وقال: هذي العربيه يشيل فيه الاشياء اللي ما نحتاجها ونرميها برى .. وفي بعض الاحيان .........
قعد العامل يتكلم ووائل يلف عيونه في المكان يدور عالشي اللي يبغاه بس للأسف ما لقاه ..
وائل: طيب انتم تبدلون ملابسكم هنا ولا من البيت ..؟!
العامل: في ناس يبدلون من هنا وناس من البيت .. شفت الباب اللي وراك هو خاص بتبديل الملابس ..
لف وائل وقال: اها ..
العامل: آسف والله بس انا تأخرت وايد عن البيت .. من رخصتك ..
وائل: لا عادي ..
فراح العامل لبيته .. لف وائل حواليه بعدين دخل لغرفة تبديل الملابس .. فتح الدواليب ولقى اكثر من لبس .. اخذ له لبس على مقاسه ولبسه .. وبعدين اخذ لبس اقصر من مقاسه .. واخذ له قبعتين خاصه باللبس ..
خرج وحط ملابسه في العربه وطلع مع الباب الخلفي وحط ملابسه في السياره وبعدين دخل وطلع بالعربيه للدور الخامس ..
وصل الدور الخامس وقعد يمشي يدور غرفة 57 ..
...........: يا عبد الرحمن ..
فلف وائل وشاف واحد من الدكاتره فقال وهو ينزل القبعه شوي على وجهه عشان لا يبان شكله: نعم ..
...........: خلاص العامل اللي قبلك خلص هذا الدور .. اطلع للدور السادس ..
طالع وائل فيه بعدين قال: بس هو قالي قبل شوي انه في غرفتين ما نضفها ..
الدكتور: كيف قالك قبل شوي وهو راح من العصر ..
حس وائل بالورطه فقال: اتصل علي لأنه تذكر بعدين ..
الدكتور: آها .. طيب بسرعه اخلص ..
وائل: طيب ..
فدخل الدكتور لغرفه رقم ثلاثه وخمسين .. فمشي وائل يدور سبعه وخمسين وبعد فتره لقى الغرفه ولقى المفتاح في الباب ..
رفعت اسيل راسها ولفت تطالع في الباب وهو ينفتح وقالت في نفسها: "يا رب فارس" ..
دخل وائل للغرفه فأنقهرت لأن اللي دخل هو عامل مو اخوها ..
اسيل بعصبيه: نعــــــــــــم خير شتبي ..؟! اطلــــــــــــع برا ..
فقفل وائل باب الغرفه وراه بسرعه عشان لا يسمع الدكتور صراخها ..
اسيل بصراخ: اطلــــــــــــع بــــــــــــرى انت ما تفهــــــــــــم .. اطلــــــــــــع ..
جاء وحط ايده على فمها وهو يقول: هذا انا وائل يا اسيل شفيج ..؟!
طالعت فيه وهي مو مصدقه ..
بعد وائل ايده عن فمها وقال: اتفقت مع فارس اني اطلعج من هنا ..
اسيل: فارس ..؟!
وائل: ايه فارس ..
فنزلت دموعها وقالت: وائل الله يخليك طلعني من هنا بسرعه .. بختنق حاسه نفسي بختنق ..
وائل: خلاص يا تبجين انا راح اطلعج بس لا تصيحين ..
فمسحت دموعها وقالت: كيف ..؟!
راح وائل عند العربيه وطلع اللبس والقبعه وقال: انتي اللحين البسي هذا اللبس بعدين اقولج كيف ..
فطالعت اسيل في اللبس بعدين قالت: فارس قال جذا ..؟!
وائل: ايه ..
فأعطاها وقال: انا اللحين بلف ظهري وانتي بدلي بسرعه ..
اسيل: طيب ..
فلف وائل ظهره وهي بدلت الملابس وبعد ما خلصت قالت: خلصت ..
لف عليها وقال: تمام ..
فجاء عندها وقعد يلم شعرها عشان يخفيه تحت القبعه ..
اسيل: وائل ..
وائل: هلا ..
اسيل: احس نفسي بموت ..
فوقف وطالع فيها وقال: اسيل لا تقولين مثل هذا الحجي ..
اخذ القبعه وقعد يضبطها على راسها فقالت: طيب وائل انا ابي اموت ..
عدل قبعتها لين صارت تمام وقال: اذا متي فهذا يعني انج تكرهيننا وتتمنين لنا الموت ..
اسيل: ليه ..؟!
وائل: احنا كلنا نحبج .. فأذا متي فهذا يعني اننا كلنا راح نتضايق وايد ونكره العالم لأنج مو موجوده فيه ..
اسيل: اصلا انا اكره الكل وما يهموني ابدا ..
وائل: حتى انا ..؟!
طالعت فيه وقالت: مدري ..
وائل: خلينا نأجل الكلام في السياره .. اللحين انتي لازم تكونين هادئه و ......... ليه ليه نزلت دموعج ..؟!
مسح دموعها وقال: ما ابيها تنزل يا اسيل ..
نزلت راسها وقالت: مو بإيدي يا وائل ..
وائل: خلاص انسي السالفه .. المهم خليج هاديه ولا تصارخين ولا تنفعلين عشان تقدرين تخرجين من هنا .. خذي هذي العربيه واخرجي وانزلي لين توصلين آخر دور وبعدين اخرجي انتي والعربيه من الباب الخلفي للمستشفى وبتلقين جدامج سيارتي الحمرا .. اركبي فيها وخذي الموبايل اللي فيها واتصلي على رقم مكتوب عليه وائل خلاص ..؟!
اسيل: طيب ..
وائل: هيا خذي العربيه وانزلي ..
اسيل: طيب ..
حط وائل ملابسها في العربيه واخذتها اسيل ونزلت ..
جلس وائل على السرير ينتضرها ويطالع في جواله .. وبعد خمس دقايق شاف المكالمه .. فحط الجوال في جيبه وخرج من الغرفه واتجه بخطوات سريعه للمصعد ..
الدكتور: عبد الرحمن ..
فوقف وائل ولف ورى وهو يقول في نفسه الله يستر ..
وائل: نعم ..
الدكتور: وين العربيه اللي كانت معاك ..؟!
وائل: نزلتها ..
الدكتور: طيب ايش اللي طلعك مره ثانيه ..؟!
وائل: لأني نسيت موبايلي في حمامات هذا الدور ..
الدكتور: مو الموبايلات ممنوعه في وقت العمل ..
وائل: اعرف بس كنت احتاجه ..
الدكتور: في ايش تحتاجه ..؟!
وائل: زوجتي على وشك الولاده واخاف تتعب وتتصل علي وما تلقاني ..
الدكتور: اها .. اوكي روح لزوجتك ومو لازم تكمل شغلك ..
وائل: ان شالله ..
فنزل وخرج من الباب الخلفي وراح لسيارته بسرعه ..
ركب وقال: هاااي ..
طالعت فيه وقالت: تأخرت ..
وائل: سوري بس واجهتني شوية مشاكل ..
اسيل: وين بتوديني ..؟!
وائل: بوديج عـ.......
اسيل بمقاطعه: لا توديني البيت ..
وائل: ليش ..؟!
اسيل بصراخ: بــــــــــــس .. انا ما أحبهــــــــــــم .. ذولا مو اهلي .. لو كانوا اهلي بجد جان ما قطونــــــــــــي بمستشفى الميانيــــــــــــن ..
وائل: خلاص خلاص اهدأي ما راح اوديج عندهم ..
اسيل: عيل وين بنروح ..؟!
وائل: استأجرت لج غرفه في الفندق تقعدين فيها لين تهدأ الاوضاع ..
اسيل: لا تقول لأحد وين انا ..
وائل: اطمئني .. محد يعرف غيري انا وفارس ..
بعد فتره وصل للفندق فلف على اسيل وشافها نايمه ..
فنزل وركب ورى وبدل ملابس العامل ولبس ملابسه وبعدين فتح الباب من جهة اسيل عشان يصحيها ..
وائل: اسيل ..
صحيت اسيل وقالت: ها ..
وائل: خذي ذي العبايه والبسيها عشان لحد يشوف الملابس اللي عليج ويشك في الامر ..
فهزت راسها ولبست العبايه بعدين نزلت وطلعوا لغرفه رقم 112 .. دخل ووشغل اللمبات .. مشيت اسيل ورمت نفسها على الكنبه ونامت على طول ..
جاء عندها يصحيها عشان تدخل الغرفه تنام .. بس من دون فايده .. فاخذ بطانيه من الغرفه ولحفها .. قعد فتره يطالع فيها وبعدين خرج من المكان ..
================================================== ==================
آخر من قام بالتعديل صْرٍخِہَ’ إآلمُشِتآقہ ¸¸«; بتاريخ 14-09-2012 الساعة 10:31 am.
__________________  |