الموضوع: رواية / واكتشفت اني لقيطه للكاتبه صرخة المشتاقه
عرض مشاركة واحدة
  #60  
قديم 12-28-2013, 04:14 PM
 





مرت ايام الاختبارات بسلام ومن دون مشاكل ..
((: اسيل )
رجعت تمام وكل ما شافت آرثر بعدت عن طريقه عشان لا تقابله وهو كل شوي يتصل عليها ويرسل رسايل بس من دون فايده ..

((: وصايف )
انجنت وصارت كل شوي تدور على اسيل بس ما شافتها ولا لقيتها ابدا ..

((: ريما )
حاولت قد ما تقدر انها تبعد عن المخدرات بس ابدا ما قدرت .. شافت انواع العذاب والالم فاستسلمت للقدر وتفكر انها راح تلعب على ياسر قد ما تقدر عشان تحافظ على نفسها .. وصارت تاخذ من ياسر مخدرات ثانيه ..

((: دانا )
اكثر من مره حاولت تتأسف من عادل بس ما رضي ودايما يصد عنها .. نفسيتها تعبت لأنها تكره احد يزعل عليها او يتضايق منها .. وكمان صارت تفكر بسامي كثير لأنها ماشافته طول ايام الاختبار ..

((: ام فيصل )
كل يوم تكره اسيل اكثر .. وعلاقتها بأم غيدا صارت قويه للغايه .. ومره ام غيدا عزمت ام فيصل لزواج ولد اخوها فراحت ام فيصل وهذا دليل انهم صاروا مثل الاخوات واكثر ..

((: راشد )
عــــــــــــــــــــــــــــآاآدي الوضع عنده .. قدر يدخل علي السجن لمدة شهرين وصاير هادي وما يخاصم بسبب توتر الاختبارات .. وحتى اخوان شهد ابدا ما حس فيهم .. بس اخته روان شكت انه في احد في البيت بس مافيها حيل تدور ..

((: فارس )
تأكد في قرارة نفسه انه حب لبنى وبقوه .. شافها اكثر من مره بس يحس انها مهمومه وكأن عندها مشاكل .. ما علم احد انه يحب لبنى ويبغى فيصل يرجع من السفر ويقوله عنها ..

((: آرثر )
كل شوي حالته تدهور اكثر من قبل والسبب هو صد اسيل عنه .. حاولوا اصحابه وامه انه يتركها وينساها بس حلف انه ما راح يتركها لين يموت ..

((: وباقي الابطال لا جديد في حياتهم )

.................................................. ......

نبدأ في وصايف .. كانت جالسه في غرفتها وتفكر في اسيل ..
اصلا من يوم شافتها وهي تفكر فيها وبس ..
طلعت جوالها واتصلت بسيف اللي اخذت رقمه قبل كذا ..
بعد كم رنه رد: هلا ..
وصايف: اسمع ..
سيف: مافي السلام عليكم ولا شي ..
وصايف: اسكت بس .. المهم انت قبل جذا قلت انك يبت معلومات عن اسيل صح .. ابي اعرف عنوان بيتها ..
سيف: ايه بس ما اعرف العنوان ..
وصايف: وليش ..؟!
سيف: وصايف شفيج ..؟! صعب اطلع العنوان ..
وصايف: طيب ايش المعلومات اللي تعرفها اكثر ..؟!
سيف: اللي اعرفه ان اسمها اسيل عبد الرحمن الرملي وانـ....
وصايف: ايش ..؟! الرملي ..؟!
سيف: ايه الرملي ..
وصايف بصدمه: مو معقول .. هي لقبها الراهي مو الرملي انا متأكده ..
سيف: لا اسمها اسيل عبد الرحمن الرملي ..
وصايف: ما اصدق ..
سيف: طيب يمكن تكونين غلطانه ..
وصايف: وش تعرف عنها اكثر ..؟!
سيف: اعرف ان لها ثلاث اخوان .. اثنين اكبر منها وواحد تؤامها ..
وصايف بصدمه: لااااااا .. هي وحيدة امها .. والله ما عندها اخوان ..
سيف: وصايف انا حاس انج غلطانه بالبنت ..
وصايف: والله مو غلطانه .. انا متأكده .. سيف انا مو متأكده انا واثقه ..
سيف: مدري ..
وصايف: بااي ..
وقفلت الجوال وهي مو مصدقه ..
وصايف: انا متأكده ان اسمها سجى الراهي .. قلت يمكن غلطت في الاسم بس مستحيل اغلط في اللقب مستحيل .. وكمان كانت لوحدها مع امها .. شلون لها اخوان وشلون لها تؤام شلــــــــــــــون ..؟!
حطت راسها على ايدها وهي مو قادره تصدق ابدا ..
قامت ونزلت تحت وهي تسأل نفسها مليون سؤال ..
جلست عالكنبه وقالت: ابوها اسمه كان قصير مو طويل زي عبد الرحمن .. انا بنين ..
اخذت جوالها واتصلت على امجد وقالت: الو امجد ..
امجد: اهلا يا طويلة العمر ..
وصايف: ييب لي معلومات عن وحده اسمها اسيل عبد الرحمن الرملي ..
امجد: حاضر ..
وصايف: بسرعه ..
قفلت الجوال وهي تفكر باسيل .. وتفكير يجر تفكير لين سرحت في عالم افكارها ..
رفعت راسها فجأه لمن تذكرت شي .. هذا الشي صار يوم الاحد يوم الغاز اللي انتشر ..

" فارس: اثنين اكبر مني ووحده تؤامي .."

"سيف: اها عرفته .. هذا فارس الرملي .."

وصايف: فارس اللي شفته في الكلاس .. لقبه الرملي واسيل لقبها الرملي .. عنده اخت تؤام واثنين اكبر منه واسيل عندها اخ تؤام واثنين اكبر منها .. معقوله هي اخت فارس ..
سكتت فتره بعدين قالت: بس سميه ما عندها غير بنت وحده و .......
فسكتت لمن تذكرت شي في الماضي ..

"ام وصايف: هذا الكف يستحقج ويستحق الناس اللي من نوعيتج .. معقوله انتي ام ..؟! مافــــــــــــــي ام بالدنيــــــــــــــا ترمــــــــــــــي ضناهــــــــــــــا .."

وصايف: صح .. امي كانت تحاجي سميه وتهاوشها لأنها رمت بنتها في الشارع ..
طالعت في التلفزيون فتره وقالت: رمتها فشافها واحد ورباها مع اولاده .. هذا يعني ان اسيل هي بنت سميه .. يعني فعلا لقيتها ..
فتذكرت شي وقالت: بس كيف لها تؤام وكيف اسمها مقرون بأسم عبدالرحمن الرملي .. في العرب عندنا مافي شي اسمه تبني .. البنت الضايعه يكتبون اسمها من دون لقب ابدا ..
عضت على شفتها بقوه .. مقهوره لآخر درجه .. كل ما جت فرصه تلقى باب مقفل في وجهها ..
وصايف: كلمت اسيل اول بس ما تعرف شي .. لو كانت تعرف جان بان على ويهها ..
طالعت في انحاء البيت بحيره وتفكير فقالت: اكيد .. اكيد اخوها فارس يعرف شي اكيد ..
قامت وطلعت غرفتها .. راح تنتظر المعلومات من امجد عشان تعرف تعدل تفكيرها ..





⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄ ◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄ ⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊




كانت دانا جالسه في الصاله تنتظر رهف تجيها ..
جالسه وكل شوي تطالع في غرفة اخوها .. صار لها اربعه ايام ما شافته ..
البنت ندمت وخلصت وهو ما زال ميبس راسه ..
قامت ووقفت قدام مراية المغاسل تطالع في شكلها ..
صارت نحيفه وحتى لون وجهها صار شاحب .. حطت ايدها على جبهتها ..
تنهدت وقالت: إلى الآن ما انخفضت الحراره ..
سمعت صوت الجرس يدق .. فراح وفتحت الباب ..
رهف: هاااي ..
دانا: هلا .. تفضلي ..
استغربت رهف من ردها البارد .. فدخلت وجلست في مجلس الحريم ..
جلست دانا وقالت: كيفج ..؟!
رهف: الحمد لله تماااام .. وافكر اسوي حفله بمناسبة انتهاء ايام الاختبارات والهم ..
فهزت دانا راسها وقالت: طيب كيف كانت اختباراتج معاج ..؟!
رهف: بليييز دانا لا تذكريني ..
دانا: اوكي ..
طالعت رهف فيها وقالت: لاااااااا انتي اكيد فيج شي ..
دانا: غلطانه ..
رهف: لا مو غلطانه .. انتي شفتي ويهج في المرايه كيف صار .. انتي مو دانا اللي شفتها قبل ايام الاختبارات .. دانا شفيج ..؟!
طالعت دانا فيها وقالت: عادل ..
رهف بخوف: شفيه ..؟!
دانا: مافيه شي .. بس سمعني وانا اكلم صلاح .. بمعنى آخر عرف اني اشتغل من وراه ..
انصدمت رهف وقالت: من جد ..؟؟!!!
دانا: ايه ومن يومها وهو مو راضي يطالع في ويهي .. حاولت بس من دون فايده ..
رهف: صراحتا انتي تستاهلي .. لو من البدايه ما خبيتي عليه يكون احسن ..
دانا: لو قلت له من البدايه ما راح يوافق وانا لازم اشتغل .. فلوس الشغل ساعدتنا وايد .. لو اني ما اشتغلت جان كنا محتايين فلوس ..
رهف: طيب اعتذري منه ..
دانا: اقولج حاولت بس هو يبتعد عني اول ما يشوفني .. اصلا ما يطالع فيني ابدا .. رهف ابيج تساعديني ..
رهف: حاولي بأكثر من طريجه .. كلمي امج عشان تساعدج ..
دانا: امي راح تخاصمني لو عرفت ..
رهف: اعرف امج .. تراها وايد طيبه .. ابجي شوي وراح تحن عليج ..
دانا: ما اتوقع ان عادل راح يسمع لأمي .. لأنه مطنشها لمن تسأله عن اللي بيني وبينه ..
رهف: طيب كلمي عادل مره ثانيه .. انتي جربي وما راح تخسري شي ..
دانا: طيب بأيش راح ابرر له .. انا غلطانه ومافي اي عذر ..
رهف: اعترفي بغلطج وقولي انها غلطه وما راح تتكرر ..
دانا: مستحيل يسامحني .. اصلا مستحيل يخليني احاجيه ..
رهف: انتي روحي لغرفته وكلميه من ورى الباب وغصب عنه راح يسمع لج ..
دانا: .................................
رهف: ها اقتنعتي ..؟!
دانا: لا .. بس بحاول ..
رهف: اوكي حاولي اكثر من مره ..
دانا: ان شالله ..
طالعت رهف فيها فتره فقالت: يا عيني عليج .. عندج طيبه تسوى بلد .. عشان بس اخوج زاعلج صار فيج جذي عيل لو امج شنو راح يصير ..؟!
دانا بإبتسامه: فاضيه ..
رهف: طيب بسألج سؤال .. لو واحد زعل منج وانتي ما تعرفينه إلا معرفه سطحيه شنو راح تساوين ..؟!
دانا: ببرر موقفي ..
رهف: ههههه صج انج غبيه ..
دانا: انتي الغبيه مو انا .. انا ما احب احد يكرهني ..
رهف: هههههههه طيب خلاص نغير الموضوع .. امممم كيف شلة الاولاد معاج ..؟!
دانا: بخير و..........
فسكتت ..
رهف: شفيج ..؟!
دانا: سامي ..
رهف: مين سامي ..؟!
دانا: واحد من الشله ..
رهف: شفيه ..؟!
دانا: ما حضر ولا يوم من الاختبارات ..
رهف بدهشه: وليييش ..؟!
دانا: ما ندري .. حاولنا نتصل فيه بس موبايله مغلق ..
رهف: وليه ما تروحون له البيت ..؟!
دانا: يقولون ان ابوه انسان شري .. يعني محد يقدر يروح يزوره ..
رهف: يا حياتي والله مسجين .. طيب وامه ..
دانا بإستغراب: امه ..؟!!!
رهف: ايه امه شفيج مستغربه ..؟!
دانا: لا مو مستغربه بس .. مدري ..
رهف: شنو اللي مدري ..؟!
دانا: عمري ما سمعته يتكلم عن امه .. حتى ابوه نادرا يتكلم عنه ..
رهف: وليه ما سألتيه عن امه ..؟!
دانا: ما ادري .. ما ياء على بالي ..
رهف: طيب اسأليه ..
دانا: خلينا اولا نعرف مجانه وبعدين يصير خير ..
رهف: طيب محد فكر يروح له البيت ..؟!
دانا: محد يقدر لأن الاب صارم وما يرضى اصحاب ولده ييون البيت .. بس سمعت ريان يقول انه مو قادر يستحمل وراح يروحله البيت واللي فيها فيها ..
رهف: طيب روحي معاه ..
دانا: اقول تلايطي عن ويهي .. قال ايش قال اروحله البيت .. انا مو مينونه .. يكفي اني مقابله خشتهم في الجامعه ..
رهف: يا عيني على اللي ينحرجون ..
دانا: تصدقي يا رهف .. اول ما كنت استحمل اشوفهم عشانهم اولاد واللحين خلاص احسن نفسي تعودت لأني دايما معاهم .. حتى شغلي كان بين اولاد .. يعني احس الوضع صار عادي .. بس ما زلت اعاني من مشكلة الخوف الشديد وما اقدر آخذ راحتي بالكلام ..
رهف: حلو ..
دانا بحماس: رهف تصدقين .. في واحد في الشغل اللي اسمه نايف تتذكرينه ..
رهف: ايوه ذاك الحيوان ..
دانا: تصدقين اني لمن رحت اقدم استقالتي قابلته .. وقتها كان يتحرش فيني بس انا تفلت في ويهه ودفيته وهربت .. اول مره بحياتي اتجرأ واسويها ومدري ايش هالسبب اللي خلاني اتجرأ ..
رهف: اخس يا القويه محد قدج ..
دانا: ههههههههههههه والله اني مبسوطه حدي ..
رهف: ههههه صج صج انج غبيه ..
سكتت دانا فتره بعدين قالت: رهف ..
رهف: نعم ..
دانا: في شي يخوفني ..
رهف: شنو ..؟!
دانا: وحده اسمها غدير ..
رهف: شفيها ..؟!
دانا: <<حكت كل شي صار معاها<< ..
طالعت رهف فيها وقالت: طنشيها ..
دانا: كيف اطنشها .. اخاف تعلم الشله عني او تعلم الاداره ..
رهف: انتي خليج دايما مع ذا اللي اسمه ريان وهو راح يساعدج زي دايمـ......... لحضه تعالي ..
دانا: نعم ..
رهف: ريان ليه يدافع عنج ..؟! هو يعرف انج بنت ..؟!
دانا: لا ما يعرف ..
رهف: عيل ليه يدافع ..؟!
دانا: ريان انسان وايد طيب وسمعته يقول للشله انه شاك ان غدير ماسكه علي شي وتهددني فيه .. فريان يكره هالاسلوب وعشان جذي يساعدني ..
رهف: اها .. حسبت انه يعرف ..
دانا: لا ما يعرف .. لو يعرف راح انجلط ..
رهف: ههههههههههه عيل ان شالله الشله كلها تعرف ..
دانا: ويع ان شالله .. لا تدعي يالجلبه ..
رهف: هههههههههههههههههههههههههههههههه ..






⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄ ◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄ ⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊








في داخل اسوار السجن .. عند علي صاحب عادل ..
كان جالس ويفكر في راشد .. كلمة حاقد قليله ..
علي: والله لتشوف يوم اسود يا رشود وما اكون انا علي ولد عليان .. المره الاولى كنت ابي اخرب الفرامل .. بس المره الثانيه غير .. المره الثانيه راح احط لك شي عمرك ما حلمت فيه .. والله راح تندم .. هههه هذا اذا بقيت على الحياة ..
سند راسه ورى عالجدار وقال: اول مره كنت مستعيل وما اهتميت بالسواقين المويودين بس المره الثانيه راح انطر لين يي اليوم المناسب وبعدها حتشوف يا رويشد ..
ابتسم وقال: انا علي ومو واحد مثلك يدخلني السجن ..
طالع في اسوار السجن وقال: انت دخلتني ورى قضبان حديد قويه ومجان شبه مظلم والخروج بعد شهرين .. بس انا راح ادخلك داخل حفره عميقه وفوقك تراب كثيف ومجان مظلم تماما والخروج لا يوجد ..
ابتسم وهو يقول: والله لأوريك ..






⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄ ◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄ ⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊




في شقة انس وطارق .. جلس انس عالكنبه قدام طارق وطالع فيه ..
انس: إلى متى وانت سرحان ..؟!
فأنتبه له طارق وقال: نعم ..
انس: انا اسأل واقول إلى متى راح تقعد سرحان وانا اهرج مع نفسي ..؟!
طارق: طيب انا اسمعك وانت تهرج .. كمل هرجك ..
انس: لا يا شيخ .. طيب ممكن تقولي في ايش كنت اتكلم ..؟!
طالع طارق فيه بعدين قال: نشبه .. خلاص عيد سالفتك وراح اسمعك ..
انس: ما راح اعيد سالفتي .. ابي افهم ليش تغيرت ..
طارق: تغيرت ..؟! في ايش تغيرت يا استاذ انس ..؟!
انس: شوف حالك هالسنه وقارنها بحالك السنه اللي فاتت ..
طارق: عادي مافي فرق ..
انس: امبلا فيه فرق .. اولا صاير تسرح بكثره .. ثانيا صار في اشياء كثيره تخبيها علي وتقول راح تعرفها قريب .. ثالثا صرت تخرج من البيت كثير وإذا سألتك وين رايح تقول بتنفس شوي ومابي احد معي .. رابعا تصرفاتك على بعضها متغيره ..
طالع طارق فيه وقال: السرحان هذا شي عادي والكل يسرح .. ثانيا الاشياء اللي اخبيها راح تعرفها قريب .. ثالثا انا فعلا ابي اتمشى بروحي بعض الاحيان .. رابعا لابد ان الانسان تتغير تصرفاته مع مرور الزمن يا حبيبي ..
انس: بس معليش انت مو طارق اللي اعرفه ..
طارق: انت بعد يا انس تغيرت .. انت مو انس اللي اعرفه ..
انس: طاااارق لا تقلب السالفه لصالحك ..
طارق: اقول غير السالفه لأنه ما عندك سالفه .. الانسان لابد انه يتغير بس انت مدقق بزياده ..
انس: اوووف .. طيب هذي الاجازه وين بتروح ..؟!
طارق: افكر اروح المريخ او عطارد .. انت ايش تنصحني اروح ..؟!
انس: طااارق عن الهرج الغبي ..
طارق: والله ما ادري مين هرجه غبي .. يعني وين بروح اكيد لأهلي ..
انس: طيب متى ..؟!
طارق: باجر .. وانت متى ..؟!
انس: حتى انا باجر ..
طارق: وراكان ..؟!
تفاجأ انس من سؤاله وقال: شفيه ..؟!
طارق: متى راح ترجع علاقتك فيه ..؟!
انس: مالك شغل ..
طارق وهو يقلد انس: صار في اشياء كثيره تخبيها عني ..
طالع انس فيه فقال طارق: يا شيخ شوف نفسك قبل لا تتحجى علي ..
انس: مالك شغل ..
طارق: ههههههههههههههههههههه ..
انس: شفيك تضحك ..؟!
طارق: مافي سبب .. بس حسيت ان ودي اضحك ..
انس: صج انك تافه ..
طارق: لا تضيع السالفه .. علاقتك السيئه براكان متى راح تنتهي ..؟!
انس: ما راح تنتهي ابدا ..
طارق: تقصد انك مرره تكره ..
انس: ايه ..
طارق: طيب تبيني اذكرك بأشياء ..؟!
طالع انس فيه بأستغراب وقال: ايش ..؟!
طارق: يوم الاحد لمن كنت سرحان تطالع فيه وتراقبه .. ولمن راح وتأخر قلت لي: طارق راكان راح وله 17 دقيقه مارجع .. ابي اسألك هذا الكلام يدل على ايش ..؟!
عصب انس وقال: مالك شغل ..
طارق: انت مو حاس ان "مالك شغل" ماسكه معك اليوم ..؟!
فطنشه انس فقال طارق: انت كنت وايد طيب وتسامح الناس فليش ماتسامح راكان ..؟!
انس: مالك دخل ..
طارق وهو يقلد انس: رابعا تصرفاتك على بعضها متغيره ..
طالع انس فيه فقال طارق: حبيت ابين لك انك انت بعد تغيرت .. صاير عصبي وصاير تحقد عالناس وصاير تخبي اشياء عني .. عالاقل انا تغيراتي طفيفه مو مثلك .. وكمان انا قلت راح اخبرك بعدين وما قلت مالك شغل ..
قام طارق ودخل المطبخ وهو يقول: ها استوعبت ..؟!
سكت انس فتره بعدين قام ودخل المطبخ وشاف طارق يسوي له نسكافيه ..
انس: انا مو عصبي بس انت اسلوبك ينرفز ..
طارق بإستنكار: انا ..؟!!!!!
انس: لا انا ..
طارق: اشوه انك علمتني ..
انس: شايف كيف اسلوبك بارد وينرفز ..
فهز طارق كتفه وقال: انا ما قلت شي غلط ..
فعصب انس ومسك نفسه وهو يطالع في طارق ..
طالع طارق فيه بإبتسامه وقال: طيب تبي مالتيزر ..؟!
طرطع انس وقال بقلة صبر: طااااااااااااااااااااااااارررررررررررق ..
طارق: ههههههههههههههههههههههههههههههههههههههههه طيب شسوي فيك صاير كبريت وما تستحمل شي ..؟!
مسك نفسه انس واخذ له بيبسي من الثلاجه وجلس عالطاوله يشرب ومطنش كل شي ..
طارق: انا نازل شوي ..
انس: اكيد تتنفس ..
طارق: هههه لا .. بس ابي اشتري مالتيزر .. تبي معاي ..
انس: لا عندي ..
طارق: آآه تقصد اللي في الدرج الثاني في الغرفه ..
طالع انس فيه بحذر ..
طارق بإبتسامه: اكلته ..
عصب انس بس مسك نفسه وشرب الببسي كله دفعه وحده ..
طارق: ههههههههههههههههههه الله يقطع ابليسك والله بتوحشي في الاجازه ..
انس: انا لا ..
طارق: افآا يعني ما راح اوحشك ..؟!
انس: لا ..
طارق: احسن ..
صلح كوب النسكافه وجلس عالطاوله وقعد يحرك النسكافيه بالملعقه وهو سرحان وانس يقرا الكتابات الموجوده عالبيبسي ..
طارق: انس ..
طالع انس فيه وقال: نعم ..
طارق: افرض ان عندك اخ او اي احد يقربلك مات لا سمح الله .. وهذا اللي يقربلك عنده بنت صغيره وانت ودك تسعدها .. كيف تسعدها وتفرحها وما تخلي شي ناقصها ..؟!
استغرب انس وقال: ليه مين مات عندكم ..؟!
طارق: ياوب عالسؤال واقولك ..
انس: اتقرب من البنت واعرف ايش الاشياء اللي تحبها واييبها لها .. اوديها كل مجان يفرحها .. اسألها واقول ايش تبين عشان اييبه .. يعني اشياء زي جذي ..
فحرك طارق النسكافيه بالملعقه وهو يقول: طيب .. طيب لو كنت انت السبب في موت ابوها ..؟!
انصدم انس وقال: طارق مين قتلت ..؟!
حط طارق الملعقه جنب الكوب وقال: ياوب على سؤالي ..
طالع انس فيه فتره وهو مصدوم بعدين قال: اعوضها عن حنان ابوها اللي فقدته قد ما اقدر ..
طارق: طيب لو .. يعني لو كنت السبب في فقدان اخوها كمان ..؟!
انصدم انس بقوه وقال: حتى اخوها قتلته ..؟!
شرب طارق من الكوب وقال: ياوب عالسؤال ..
انس: ما راح اياوب الا لمن تياوبني انت .. طارق من جد انت قتلت شخصين ..؟! طارق بليز ياوبني ..
طالع طارق فيه فتره بعدين قال: الثاني ماقتلته .. كنت السبب في ضياعه ..
انس: طيب ليش وايش السبب يا طارق ..؟!
قام طارق وحط الكوب فوق المغسله وقال: بعدين ..
وخرج من المطبخ .. طالع انس فيه بصدمه ومو قادر يستوعب ..
طالع في علبة البيبسي وقال: قاتل .. طارق قاتل .. مستحيل ..
رمى علبة الببسي في الزباله وقال: دايم اشوفه سرحان بس ما توقعت السبب جايد زي جذي ..
خرج الصاله وشاف طارق توه يخرج من الشقه ..
انس: طارق ..
لف طارق عليه وهو ساكت .. تردد انس انه يسأله بعدين بطل ..
انس: آآه لا تنسى تييب لي مالتيزر بدل اللي اكلته ..
طالع طارق فيه بعدين ابتسم ابتسامه باهته وقال: كنت اتغشمر وياك .. ما اكلته .. تبي شي ..؟!
انس: ها .. لا ..
فخرج طارق وقفل الباب وراه .. جلس انس عالكنبه وهو يفكر ..
انس: مو قادر استوعب ان طارق قتل مو قادر .. اكيد في سوء فهم ..
فقام ودخل غرفته يرتب اغراضه لبكره عشان يسافر لأهله ..





⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄ ◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄ ⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊





في اليوم اللي بعده وعند عائلة ابو وائل ..
كان جالس الاب عالكنبه في الصاله ويقرا جريده .. ولمار ولارا جالسين قدامه ..
الاب: وانتم ما تطفشون ..
لارا: لا ما نطفش ..
لمار: بابا نزل الجريده عشان نقدر نحاجيك ..
الاب: وتعلن شركة الـ**** عن طرح اسهمها في السوق بتاريخ 15 / 7 عام الـ.........
لمار: بــــــــــابــــــــــــــا ..
الاب: هلا حبيبتي ..
لمار: اترك الجريده وحاجينا ..
لارا: بسرعه يا بابي ..
الاب: طيب دقيقه خلوني اقرا هالخبر ..
لمار: جست ون مينت اوكي <<دقيقه واحده فقط<< ..
الاب: اوكي ..
طالعوا فيه وهو يقرا .. مرت دقيقه ودقيقتين وثلاث ..
لمار: بابا ..
الاب: لحضه لحضه باجي ما انتهيت ..
لارا: لك ثلاث دقايق يا بابي وما امداك تخلص ..
سحبت لمار الجريده وقالت: انت قلت دقيقه وحده .. خلنا نقول اللي عندنا وبعدين كمل ..
الاب: ههههههههه اوكي قولي ..
لمار: هذا آخر اسبوع لنا في الامتحانات .. بابي نبي نروح المزرعه مع آنكل ابو فارس ..
لارا: ايه .. انت اول كنت بتروح بس اسيلوه الحماره تعبت .. اللحين كلنا بخير .. نبغى نروح الاربعاء ونرجع بعد اسبوع ..
لمار: ايه يابابا .. لا تقول لا ولا تقول انا مشغول .. هذي اجازه ونبي نستانس فيها ..
لارا: اتصل بانكل وقول له جهز نفسك انت وعائلتك عشان نروح ..
لمار: واذا ما عندك مانع ابي ييراننا يروحون معنا .. ييراننا ام رولا .. عشان يكون احسن ..
لارا: عادي لو انكل نادى اصحابه بس المهم انه يي معنا ونتمشى ..
لمار: ها يا بابا شقلت ..؟!
طالع الاب فيهم وقال: انتم خليتولي فرصه اتحجى ..
لمار: اهو اعطيناك فرصه .. بسرعه دق على انكل عشان تعطيه خبر من بدري ..
الاب: وهذي هي الفرصه برايك .. انتم ما تاخذون رايي انتم تؤمروني ..
لارا: مو قصدنا ..
لمار: احنا واثقين انك ما راح ترفض ..
نزلت الام من الدرج وقالت: اكيد تبون شي من ابوكم .. لأنكم ما تيلسون معاه إلا لمن تبغوا شي ..
الاب: يبغون يروحون المزرعه مع عمهم عبد الرحمن ..
جلست الام وقالت: ايه والله صح .. ودنا نتجمع .. لنا فتره طويله ما تجمعنا ..
الاب: عيل خلاص انا موافق ..
لمار: يعنني وافقت لمن امي وافقت ..
الاب: هههههههههههه ..
لارا: بابا اتصل بعمي اللحين ..
الاب: لا لا اللحين هو بشغله .. بدق في العصر ..
لفت لمار على امها وقالت: ماما اعزمي ام رولا معانا ..
الام: ام رولا ..؟!
لمار: ايوه يا ماما الله يخليج ..
الام: طيب اذا ابوج وافق ..
لمار: بابا ما عنده مانع ويقول اللي يبي يعزم ييرانه ما عندي مانع ..
الاب: ايوه عادي ..
الام: اوكي خلاص .. بأتصل على ام رولا وبعدين على ام فيصل ..
راحت الام عند التلفون واتصلت ..
لمار: يسس .. بروح اقول للمى ..
وطلعت فوق ..
دخل وائل البيت وقال: السلام عليكم ..
الاب: هلا بوائل .. شفيك تأخرت اليوم ..؟!
جلس وائل وقال: كان عندي شغل ..
لارا: وائل سمعت آخر خبر ..؟!
وائل: ههههه حتى ذي البزره عندها اخبار ..
عصبت لارا وقالت: انا ماني بزززررره ..
وائل: اوكي اوكي مو بزره .. شنو هالخبر ..؟!
لارا: بنروح المزرعه يوم الخميس .. حتى انكل عبد الرحمن بيروح معنا ..
وائل: ما يبتي شي يديد .. اعرف من امس ..
لارا: جذاب .. كيف تعرف من امس وبابا اليوم وافق ..؟!
وائل: ابوي قالي امس انه راح يروح المزرعه مع عمي ..
لفت لارا على ابوها اللي يقرا بالجريده وقالت: بابا .. مقرر من اول وتخلينا نتعب في اقناعك ..
الاب بإبتسامه: احسن .. لازم تتعبوا وانتم تطلبوا ..
عصبت لارا وطلعت فوق ..
اما الام فقفلت من ام رولا بعد ما اقنعتها واتصلت على ام فيصل ..
الام: هلا بأم فيصل ..
ام فيصل: هلا شخبارك ..؟!
الام: الحمد لله تمام .. شخبار الاولاد واختباراتهم ..؟!
ام فيصل: والله بخير ويقول الاختبار عادي .. شيعني عادي مدري ..
الام: طيب فيصل متى بيرجع ..؟!
ام فيصل: مدري بس احتمال الاسبوع الياي ..
الام: طيب اسمعي حبيت اعزمكي ..
ام فيصل: على شنو ..؟!
الام: والله الاولاد يبوننا نتجمع يوم الخميس في مزرعة عبد الغني اللي تفتح عالبحر .. فحبيت اعطيك خبر عشان تتجهزون ..
ام فيصل: الخميس ..؟! لا صعبه ..
الام: وليش ..؟!
ام فيصل: انا يمكن اسافر الثلاثاء مع عبد الرحمن .. ابوي بيسوي عمليه خطيره ولازم اكون عنده ..
الام: اووه سلامات ما يشوف شر ان شالله .. طيب متى ترجعون ..؟!
ام فيصل: احتمال الاسبوع الياي يوم الثلاثاء او الاربعاء ..
الام: طيب شرايج ناخذ اولادج معنا وبعدين لمن ترجعون تييون انتم ..
ام فيصل: مقدر لأن فيصل راح يرجع واحنا مو موجودين .. ما يصير يرجع ويلقى البيت فاضي .. لازم اخواته يكونون موجودين عشان يرتبون اغراضه وكل شي ..
الام: عيل خلاص نأجل الروحه .. يعني مو الخميس هذا .. الخميس الياي ..
ام فيصل: حلو كذا تمام ..
الام: ايه تتذكرين ام رولا .. ييراننا اللي شفتيهم السنه الله راحت ..؟!
ام فيصل: ايه اذكرها .. شفيها ..؟!
الام: راح تيي معانا عالمزرعه .. وانتي اعزمي ييرانكم ام مايد .. من كثر ما تسولفين عنها صرت اتمنى اني اشوفها ..
ام فيصل: اوكي من عيوني راح اعزمها ..
الام: حلو واعزمي اولادها عشان يستانسون مع اولادنا ..
ام فيصل: اللحين حأدق عليها واعزمها واكيد ما راح تقول لا ..
الام: اوكي حبيبتي مع السلامه ..
ام فيصل: مع السلامه وسلميلي عالاولاد ..
الام: ان شالله ..
قفلت ام فيصل التلفون وقالت: حلو والله ..
اتصلت على ام مايد بس محد يرد ..
ام فيصل: اكيد مشغوله .. اوكي اتصل عليها بعدين ..
قامت وطلعت فوق .. دقت الباب ففتح فارس ..
فارس: هلا يمه ..
الام: هلا حبيبي كيفك ..؟!
فارس: تمام ..
الام: عمتك ام وائل اتصلت وتعزمنا يوم الخميس الياي للمزرعه كلنا ..
فارس بصدمه: مع لمــــــــــــــار ..؟!!!
الام: ايه .. بس هالمره غير .. راح يروحون معانا ييراننا ام مايد وحتى ييرانهم بييون .. يعني بتكون عزيمه حلوه ..
فارس: اوكي ..
الام: ياللا بروح اقول لخواتك ..
راحت وفتحت الغرفه على اسيل وقالت: اسيلــــــــــــــوه ..
لفت اسيل عليها وقالت: نعم ..
الام: شتسوين عاللاب ..؟!
اسيل: اكلم صاحباتي ..
الام: قفليه بسرعه ..
اسيل: ليه ..؟!
الام: من دون ليه .. قفليه وانتي منطمه ..
اسيل: طيب ..
الام: بروح انا وزوجي نسافر وبتقعدون لوحدكم في البيت .. اقسم بالله ان سمعت انج تلعبين بذيلج يا ويلج ..
اسيل: طيب ..
الام: واذا كنت فاضيه رتبي جنطتج وجنطة اخوج لأن الخميس الياي بنروح لمزرعة عبد الغني .. فاهمه ..
اسيل: طيب ..
قفلت الام الباب وراح تقول لريما ..
فتحت اسيل اللاب وهي تقول: اووف .. يعني لازم نقابل خشة بنات عمي الماصخات ..
فتحت اللاب وسجلت خروج وطفت النت وبعدين قفلته ..





⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄ ◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄ ⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊




.. في قصر راشد الشعلان ..
كانت شهد في المطبخ اللي كان فاضي من الخدم لأنه وقت استراحتهم ..
كان معاها علبة حليب الاطفال وتصلح لاختها شادن حليب في الرضاعه ..
دخلت وحده من الخدم ولمن شافتها قالت: اكيد هدا حق بيبي صغير ..
طالعت شهد فيها وابتسمت وقالت: ايه ..
الخدامه: شهد .. انت ما يخاف راشد يمسك اخوان انتي ..
شهد: ان شاء الله ما يمسكهم .. بس عاد تكفون لا تقولوله واذا شفتم اخواني رجعوهم للغرفه لأنهم ميانين وانا اعرفهم ..
الخدامه: ان شالله ..
كل الخدم عرفوا عن اخوان شهد بس يسترون عليها لأنهم يحبونها ويكرهون راشد ..
حطت علبة الحليب في الدولاب وراحت لغرفتها .. فتحت الباب وشافت اثير تذاكر لأن المدارس باقي ما انتهت اختباراتهم ..
وشافت وسيم وشادي ماسكين دفتر ومقص ويقصقصون اشكال ما تعرفها ..
جت عند شادن اللي كانت على وشك البكاء .. اعطتها حليبها عشان تشرب وتنام ..
شهد: شادي وسيم وش تقصقصون ..؟!
وسيم: نقص اشكال اللي فـ......
شادي بسرعه مسك فم اخوه وقال: لا لا لا تقولها .. خلها مفاجأه ..
وسيم: طيب ..
عقدت حواجبها وقالت: مفاجأه ..؟! مفاجأه بمناسبة شنو ..؟!
شادي: مافي مناسبة .. بس جذي من راسنا .. اقول شهد ..
شهد: نعم ..
شادي: طفشت من الغرفه .. نبغى نسكن في غرفه اكبر ..
شهد: صدق من قال شحاذ ويتشرط ..
وسيم: ايوه صح .. هذي الغرفه ما يصلح نلعب طيره فيها ..
شهد: تبون ترجعون بيتكم القديم ..؟!
وسيم وشادي: لا لا مانبي لا ..
شهد: عيل احمدوا ربكم واسكتوا ..
شادي: شهد .. إلى متى نقعد هنا ..؟!
طالعت شهد فيه بعدين قالت: والله مدري .. بس ان شاء الله قريب نطلع ..
شادي: يعني متى ..؟!
شهد: شادي خلاص لا تسأل لأني ما اعرف ..
فسكتوا .. سرحت شهد بأفكارها وهي تنوم اختها .. فعلا إلى متى بتقعد هنا ..؟! حاولت تلقى جواب بس ما لقيت ..
اجرتها الاسبوعيه ما تكفي استئجار شقه .. ولازم تجمع اجرة سنه عشان تشتري بيت صغير لأخوانها ..
بس مو معقوله تقعد هنا سنه كامله .. في خلال اسبوعين بالصعوبه قدرت تهجد اخوانها بسبب حركتهم الكثيره .. الله العالم في خلال سنه وش بيسوون ..
تنهدت وهي تفكر .. راح تترك كل شي على الله وتتوكل وان شاء الله ما يصير شي ..
شادي: شهد ..
طالعت شهد فيه وقالت: نعم ..
طلع شادي ورقه مرسوم عليها رسمه ومقصقصه وقال: اتحداج تعرفين مين هذا ..؟!
طالعت في الرسمه فتره اللي كانت طريقة رسمها تموت ضحك وقالت: مدري ..
شادي: هذا هو راشد رسمناه ..
طالعت شهد في الرسمه وبعدها فقعت ضحك: هههههههههههههههههههههههههههههههههههههههههههههههههه ههههههههههههههههه ..
شادي: احنا شفناه اول فقلنا راح نرسمه .. شرايج في الرسمه ..
اخذت الرسمه وهي مازالت تضحك .. طالعت فيها وكانت الحواجب معقوده يعني كأنه معصب .. وحتى لبسه مرسوم عليها ماركة فيراري لأنه يحب هذي الماركه وتسريحة شعره راسمينها عدل وبشكل يضحك .. الرسمه على بعضها تضحك ..
شهد: ههههههههههههه الله يقطع ابليسكم ..
وسيم: شوفي هذي كمان .. هذي صورتكي رسمناها ..
اخذت شهد الرسمه وكانت تضحك كمان وكان شكلها فيها كأنها وحده طيبه وهاديه ..
شهد: ههههههههههههههههههه صج انكم فاضين ..
وسيم: اللحين احنا نقصص الباجين .. انا وشادي واثير وشادن ..
لفت اثير عليهم وقالت: لا .. لحد يرسمني بليز .. اخاف اكره نفسي ..
شهد: ههههههههههههههههه ..
شادي: خلاص يا وسيم باجر نكمل لأني تعبت من الجلسه ..
وسيم: طيب ..
شهد: شنو شنو ما سمعت .. شنو اللي تعبت من الجلسه .. غصبا عنكم تيلسون لأنه ماكو طلعه برى ..
شادي: الله يخليج يا شهد بس لفه ..
شهد: ولا نص لفه ..
شادي: طيب ربع لفه ..
شهد: انتم ما تفهمون .. قلت لا يعني لا ..
وسيم: امانه يا شهد امانه ..
شهد: لا ..
شادي: واللي يسلمج والله تعبنا ..
شهد: انتم تبون تنضربون من راشد ..؟!
شادي: احنا مو اغبياء عشان نخليه يشوفنا ..
وسيم: ايه حنا اذكياء ..
طالعت شهد في ساعتها وشافت انه جاء وقت انها تغسل شراشف الاسره والمخدات ..
شهد: شوفوا .. انا اللحين رايحه .. لو قالت اثير انكم طلعتم راح ازعل منكم مفهوم ..
شادي بترجي: شهد ..
شهد: لا ..
حطت اختها عالسرير بعد ما نامت واخذت حليبها وقالت: ومابي ازعاج عشان اختكم لا تقوم ..
اعطت الحليب لأثير وقالت: اذا صحيت وبجت اعطيها خلاص ..
اثير: طيب ..
فخرجت شهد وقفلت الباب وراها ..
شادي: والله لأطلع ..
وسيم بحماس: شادي شادي نصلح هذيك اللي قلتها اول ..؟!
شادي: اذا كان راشد الدب في الصاله نسويها ..
اثير: شادي وسيم ما سمعتم شهد شقالت ..؟!
شادي: قالت اذا اثير قالت لي انكم طلعتم بأزعل منكم .. بس ما قالت لا تطلعون .. يعني نطلع وانتي لا تقولين لها وكل شي يصير تمام ..
اثير: شــــــــــــــادي ..
شادي: وسيم انا بشوف اذا كان الدب في الصاله بأيي واقولك خلاص ..؟!
وسيم: طيب ..
اثير: اقسم بالله ياشادي لو طلعت يا ويلك ..
شادي: ما تخوفيني ..
وسيم: ههههههههههه ..
خرج شادي بسرعه لمن شاف اثير بتمنعه ..
مشي في سيب مليان غرف للخدم لين وصل للباب الرئيسي اللي يفتح على جناح المطبخ ..
فتحه ومشي في الجناح لين وصل للباب اللي يفتح مباشرة على الصاله الرئيسيه ..
فتح الباب بشويش وطالع في الصاله فشاف روان جالسه وماسكه كتابها تذاكر ..
شادي: اووووف وين الدب ..؟!
لف بعيونه الصاله كلها بس ما شاف احد .. فرجع ودخل غرفتهم ..
وسيم: ها شصار ..؟!
شادي: مافي غير بنت .. شكلها اخت الدب ..
وسيم: يعني ما شفته ..؟!
شادي: لا ..
وسيم: طيب عادي نسويها في البنت لأنها اخته ..
شادي: خوش فكره .. ياللا ياللا ..
فتحوا الدرج وطلعوا مطاطات واوراق مقفله ..
اثير بتفاجئ: وش بتسوون ..؟!
وسيم: بنمططهم من بعيد ..
شادي: ترى هذي الاوراق داخلها حجران عشان يوجعهم بقووه ..
اثير بصدمه: مينون انت وياه .. بذي الطريجه حيمسككم يا هبل ..
شادي: احنا مو اغبياء .. نبغى ناخذ حق شهد لمن خاصمها قبل امس .. انا ما ارضى اختي تتخاصم وانا ساكت .. وكمان لو رمينا عليهم ماراح يدورون علينا لأنهم عيال نعمه ويخافون على نفسهم وما راح يلحقونا ..
اثير: لا صج انكم ميانين .. والله ماراح اخليكم تطلعون ابدا ..
شادي: وسيم خلينا نطلع بسرعه ..
جاء شادي عند الباب بس اثير جت قدامه فرمى وسيم عليها ورقه فمن الخوف حطت ايدها على وجهها .. فتعاونوا شادي ووسيم وبسرعه دفوها من عند الباب وطلعوا جري عشان لا تلحقهم ..
دخلوا جناح المطبخ وقفلوا الباب وراهم ..
شادي: يسس والله سويناها ..
وسيم: ههههه حلو قدرنا نهرب ..
شادي: ياللا خلنا نروح نرمي على اخت الدب .. هي ايش اسمها ..؟!
وسيم: مدري ..
شادي: ههههههه اللحين اسمها اكيد رشيده ..
وسيم: ههههههههههه لا لا راشده ..
شادي: ههههههههه اووم التخلف ههههههه ..
وسيم: هههههههه صح ..
شادي: ياللا امش .. اذا الدب مو موجود فراح نختلص من رشيده ..
وسيم: ياللا ..
فتح شادي باب الصاله وشاف روان مازالت جالسه ..
شادي: ياللا نبدأ ..
فمسك كل واحد فيهم ورقه وحطها في المطاط ورموها في وقت واحد .. وحده طاحت بعيد عنها والثانيه قدامها بشوي وهي ما انتبهت ..
شادي: يوووه يبغالنا نمط زين وبقوه ..
وسيم: طيب ..
فمطوا الورقه بقوه هذي المره .. وحده صقعت في رجلها والثانيه في الكنبه ..
رفعت روان راسها عن الكتاب وقالت: شذا ..؟!
جلست عالارض ورفعت الورقه بإستغراب وفكتها فلقيت داخلها حجره ..
روان باستغراب: منين يت ذي ..؟!
شوي ما تحس إلا بذيك الصقعه القويه براسها ..
روان: آآآآه من فين تيي هذي الاشياء ..؟!
شوي صقعت وحده بإيدها والثانيه طاحت قدامها ..
مسكت ايدها وقامت وهي تقول: راشد ما يصلح حركات سخيفه زي جذي .. عيل منو ..؟!
لفت تطالع في انحاء الصاله وفي الدرج وفي مداخل المكان بس مافي احد ..
مسكت كتفها لمن صقعت فيها ورقه بقوه ..
روان: آآآآآه لا هذا الوضع ما ينسكت عنه ..
مشيت في الصاله تطالع عدل يمكن يكون في احد متخبي ولا شي ..
روان: ميــــــــــــــن الجلــــــــــــــب اللي يرمــــــــــــــي .. الاحسن انه يعتــــــــــــــرف قبل لأقول لراشــــــــــــــد ..
وشوي جتها صقعه قويه جدا في رقبتها ..
مسكت رقبتها بقوه من الالم ولفت على ناحية جناح المطبخ .. اول مالفت لاحظت احد هرب ..
فجريت بسرعه وفتحت الباب فشافت باب غرفة طعام الخدم ينقفل ..
روان: كنت حاسه انه في آدميين هنا في القصر ..
جت عند الباب وفتحته .. كان المكان فاضي ومافيه غير كراسي وطاوله كبيره للأكل وباب يودي للمغاسل ..
قفلت الباب وراها وقالت: يا انا يا انت .. والله لأطلعك وما اكون انا روان الشعلان ..



انتهى الجزء الثاني من البآرت .. اشوفكم ان شالله في الجزء الاخير من البآرت السادس ..
توقعاتكم وارائكم وانطباعكم حول كل الشخصيات ..
انتظروني في البارت الجاي ..
محبتكم ::
::"+ صـ‎رخـ‏‎ة الـ‏مـشتاقـ‏‏‏‎ه +"::

|$[ نهاية الجزء ]$|