|
|$[ البآرت السادس الجزء الثالث ]$|
اسندت روان ظهرها عالباب وقالت: اطلع احسن لك ........ اطلع يالجبان ........ انا حأنتظرك لين تطلع ..
كان شادي ووسيم متخبين تحت الطاوله ورافعين شوي من المفرش يطالعون فيها ..
وسيم بصوت واطي: مسكتنا .. انا خايف يا شادي ..
شادي بنفس الصوت: عمى في شكلها ما اتوقعت تلحقنا ..
وسيم وهو على وش البكاء: شادي انا خايف .. اكيد بتقول لراشد ..
شادي: اصص خفض صوتك .. احنا متخبين وماراح تلقانا ..
فبكى وسيم وقال: ياويلنا .. ياليتني سمعت كلام شهد ..
شادي: اسكت يالبزر .. لو كنت ادري انك بتبجي جان ما اخذتك معي ..
حط وسيم ايده على فمه بقوه عشان ما يبكي ..
روان: يعني ماراح تطلع .. اوكي انا انادي راشد اللحين وهو راح يطلعكم ..
فبكى وسيم بصمت وقال: راشد بيي .. الدب بيضربنا ويضرب شهد ..
حط شادي ايده على فم وسيم يسكته ويقول: بس اسكت .. احنا راح نحاول نهرب من دون لا تشوفنا ..
هز وسيم راسه وهي مازال خايف ..
شال شادي ايده وقال: لا تنطق بأي كلمه فاهم ..
هز راسه بايه ..
قدمت روان وقالت: ترى انا اسمع همساتك بس مدري مع مين تتكلم .. لا يكون معاك موبايل وانا مدري ..؟!
وقفت قدام الطاوله وقالت: اخرج من تحت الطاوله ..
خافوا بس مسكوا نفسهم وقعدوا هادين لعل وعسى تروح وتتركهم ..
روان: ياللا انا انتظرك تتطلع ..
طالع شادي في وسيم وقال في اذنه: خلنا نزحف لين نوصل طرف الطاوله الثاني ..
هز وسيم راسه وبدأوا يزحفون بهدوء لين وصلوا الطرف المقابل لروان ..
شادي: لمن تجلس عشان ترفع المفرش راح نسرع وندخل الباب حق المغاسل خلاص ..؟!
وسيم: طيب ..
روان: ليه ما تطلع ..؟! شكلك تبيني انا اطلعك صح ..؟! اوكي براحتك ..
جلست عشان تفتح المفرش .. فتحركوا وسيم وشادي وراحوا جري للمغاسل ومن شدة السرعه دقت رجلهم في الكرسي وقلبته ..
رفعت روان راسها ووقفت تطالع في باب المغاسل فقالت: والله كأني اطارد فار ..
راحت عند الباب ودخلت .. كان المكان عباره عن عشر مغاسل وست حمامات ..
طالعت في الحمامات وكانت كلها مقفله ..
روان: ماراح اتحرك من عند الباب لين تخرج .. ترى انا من صنف البشر يعني مسالمه ولا آكل ..
انتظرت فتره بس ما سمعت ولا صوت ولا حركه ولا حتى نفس ..
قربت من الحمامات وفتحت اول حمام ..
خرج شادي ووسيم من ورى الباب اللي كانت واقفه عنده وخرجوا جري ..
لفت بسرعه وسمعت قرقعت الكراسي من الجري ..
روان بقهر: عمى ..
خرجت بسرعه وشافت باب الغرفه توه ينقفل .. جريت وخرجت من الغرفه وانتبهت لأصوات من جهة غرفة الاواني الخاصه ..
فتحت الباب وقالت: انا قلت قبل جذي اني اطارد فيران مو آدمي .. بسرعه اخرج لأني فعلا عصبت ..
خاف وسيم وقال: والله ما نقدر نهرب هذي ينيه ..
شادي: بنحاول يا وسيم بس انت لا تخاف عشان لا اخاف زيك ..
وسيم: بس هي تقول انها عصبت وهذا يعني انها بتلقانا ..
شادي: ان شالله ما تلقانا بس انت خلك هادي ..
فتحت روان دولاب الخاص بالصواني وقالت: لقيتـ...... اثنيــــــــــــــــــــن ..؟؟؟!!!!
اول ما شافها وسيم بكى على طول .. وروان واقفه مصدومه .. ما توقعت انها بتلقى بزران واثنين كمان ..
شادي: مافي احد .. دوري في دولاب ثاني ..
طالعت روان فيه وقالت: لا يا شيخ .. تستهبل ..؟!
شادي: لا ..
وسيم وهو يبكي: لقتنا لقتنا .. ياويلنا منها ومن الدب ..
دخلت خدامه وقالت: ماما روان .. اشفي انتا هنا ..؟!
شهقت الخدامه اول ما شافت الاولاد وخرجت جري تعلم شهد ..
لفت روان على جهت الخدامه بس استغربت لمن ما شافتها .. وين هجت ..؟!
لفت عليهم وقالت: مين انتم ..؟! ومن فين ييتم ..؟!
وسيم وهو يبكي: آسف والله آخر مره .. احنا اخوان شهـ.....
مسك شادي فم وسيم وقال: احنا من عيال الييران .. ولد عمي تحدانا اننا ندخل هنا فسوينا التحدي ودخلنا وصدقيني هذي آخر مره يا رشيده ..
عقدت حواجبها وقالت: رشيده ..؟!!! يععع الله يقرفك .. شهالاسم ..؟! انا اسمي روان مو هالاسم اللي احس نفسي بستفرغ اذا سمعته .. وكمان ليه تسكت اخوك وما تخليه يكمل كلامه ..
شادي: انا الاخ الاكبر وانا المفروض اللي اتكلم ..
روان: عيل قوم انت وياه اوديكم عند راشد يتصرف وياكم ..
انفجعــــــــــــــــوا وقال شادي بسرعه: لا لا لا لا إلا راشد ..
وسيم وهو يبكي: امانه لا تقولين له ..
روان: لازم يا حبيبي عشان بعدين تتأدبون وتبطلون تدخلون البيت و ....... ايه صح ممكن اعرف ليش كنت تنبلون علي ..؟!
شادي: ما كنا ننبل .. كنا نمطط ..
روان: شذي التعابير ..؟! المهم ليش كنت ترموا علي اوراق واحجار ..؟!
شادي: ولد عمي تحدانا ..
روان: ياذا التحدي اللي بيقطعم .. امش انت وياه لراشد عشان تحرمون تنفذون تحدي في حياتكم ..
فبكى وسيم وقال شادي: لا خلاص آخر مره ..
روان: نو نو نو لازم تتأدبوا ..
دخلت شهد الغرفه بسرعه وانصدمت لمن شافتهم ..
اول ما شافها وسيم جاء جري لحضنها وهو يبكي ..
وسيم: انا آسف يا شهد ..
لفت روان على شهد وهي مستغربه وقالت: تعرفينهم ..؟!
نزلت شهد راسها وقالت: ايه ...... اخواني ..
انصدمت روان وقالت: شنو ..؟! اخوانج ..؟!
طالعت في وسيم اللي حاضن شهد ويبكي وبعدين طالعت في شادي اللي واقف ومنزل راسه بندم ..
طالعت في شهد اللي كانت ماسكه راس وسيم بيد واليد الثانيه متكيه على حافة الباب ومنزله راسها بإنكسار ..
روان: ما اصدق ..
رفعت شهد راسها والدموع في عيونها وقالت: روان بليييز لا يوصل هالكلام لراشد .. الله يخليج ياروان لا تقولين له شي .. قاسي .. انا اعرفه وراح يبهذلني ويبهذل اخواني .. انا ما عندي مشكله بس اخواني لا .. واللي يسلمج لا يعرف راشد بشي .. راشد اكيـ......
جلست شهد وغطت وجهها بإيدها وبدت تبكي .. طالع وسيم فيها وقالت: شهد خلاص لا تبجين ..
جاء شادي عندها وسلم على راسها وقال: شهد انا آسف .. والله هذي آخر مره ..
طالعت روان فيها .. صحيح انها عمرها ما كلمت شهد إلا كلام سطحي بس حزنت لحالها .. هي تشوف كيف معاملة راشد لها ..
جت عندها وجلست قدامها وقالت: خلاص يا شهد .. ماراح اقول لراشد اي شي .. بس انتي اهدأي وانا اوعدج ان راشد ما راح يدري ..
مسحت شهد دموعها بالصعوبه وقالت: مشكوره يا روان ..
قامت وقالت: امشوا ..
خرجت وخرج اخوانها وراها ..
وقفت روان وطالعت فيهم لين راحوا ..
روان: مسجينه .. لو ان راشد يحنن قلبه شوي .. بس هذا من سابع المستحيلات ..
قفلت باب الدولاب وخرجت من الغرفه وراحت للصاله ..
روان: ميـــــــــــــــري ميــــــــــــــــري ..
جت ميري وقالت: نأم ..
روان: رتبي الصاله من الحجران والورق فاهمه ..
ميري: حادر ماما ..
اخذت كتابها وطلعت غرفتها ..
⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄ ◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄ ⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊
في صباح الثلاثاء وفي بيت ابو فيصل .. كانت ام فيصل في غرفتها وتلم اغراضها في الشنطه .. وابو فيصل يتكشخ قدام المرايه ..
الام: والله قلبي قارصني وما ودي اخلي اولادي لوحدهم في البيت ..
الاب: الاولاد كبار يا احلام .. بطلي ذا الخوف اللي ماله داعي وخلصي بسرعه ..
الام: لو ان فيصل معاهم جان ارتحت .. بس من دون فيصل ماني مرتاحه ..
عدل الاب الغتره وهو يقول: اذا كنتي خايفه قد جذي فليش ما اخذتيهم معاج ..؟!
الام: ما راح افضالهم لأني بنشغل بأبوي وراح انساهم .. فيقعدون هنا احسن ..
الاب: عيل رتبي الجنطه واذا خلصتي انزلي .. انا انتظرج في الصاله ..
الام: طيب ..
نزل الاب في الصاله وشافهم كلهم موجودين .. فارس يطالع في مصارعه ومتحمس واسيل تطالع وهي طفشانه .. وريما ماسكه البلاك ومشغوله فيه ..
جلس الاب وقال: صاحين من بدري ما شاء الله عليكم ..
اسيل: ايه عشان نودعكم .. ابوي قول لفارس يقلب .. انا مابي مصارعه ..
فارس: يووه ساعه وحده ما راح تضرج ..
اسيل: اووووف ..
الاب: ولا يهمج تعالي ايلسي ينبي وسولفي معاي ..
قامت وطالعت في فارس وقالت بدلع: برووح عند بابي ..
حرك يده بلا مبالاه وهو يقول: روحي محد ماسكج ..
جلست اسيل جنب ابوها فقال: كيف كانت الاختبارات معاج ..؟!
طالعت اسيل في ابوها وقالت: يبه شذا السؤال القديم ..؟! خلاص انتهوا الناس وانت توك تسأل .. بطلوا ذي الاسئله بطلوها ..
الاب: ههههههههه طيب كيف الاجازه ..؟!
اسيل: يبه احنا تونا في بدايتها فشلون نياوب ..؟!
الاب: ههههه طيب وش تبيني اسألج ..؟!
اسيل: انا اللي بسأل ..
الاب: اوكي براحتج ..
اسيل: اممم متى بترجعون ..؟!
الاب: على حسب .. يمكن الاحد او الاثنين او الثلاثاء او الاربعاء ..
اسيل: او يمكن الخميس او الجمعه او السبت وتستمر الحياة على هذا النحو ..
الاب: هههههههههههههههههههه ..
اسيل: يبه انا اسألك متى بترجعون .. ما قلتلك عدد لي ايام الاسبوع ..
الاب: هههه طيب انا قلت مدري وقاعد احط توقعات ..
اسيل: ابوي .. تصدق ان اخوالي لي اربع سنوات ما شفتم وتقريبا نسيتهم ..
الاب: لأنهم بعيد عنا وصعب ييون .. وبما ان امج هي اصغر اخت فهي لازم تروح تزورهم مو هم ..
اسيل: ايه صح تذكرت سؤال كنت بسألك اياه بس نسيت ..
الاب: شنهو ..؟!
اسيل: السنه اللي فاتت قالتلي ريما انها تشبه خالتها فاطمه وفارس يشبه خاله .. طيب انا مين اشبه ..؟!
انصــــــــــــــــدم الاب من سؤالها وتلعثم لأنه مو عارف كيف يجاوبها ..
اسيل: حتى فيصل يشبهك .. لأن اللي نعرفه ان كل واحد يطلع يشبه واحد من عائلته .. انا طالعه اشبه مين ..؟!
الاب: آ اه انتي .. ا ما ما اتذكر ..
اسيل: ابوي شلون ما تتذكر ..؟!
الاب: ها .. لأنه .. اممم لأنه ..
اسيل: ابوي شفيك ..؟!
الاب: ما مافيني شي .. بس امج تأخرت وخايف ان الطياره تروح عنا .. الله يهديها .. صدق من قال ان الحريم بطيئات ويتأخرون كثير .. شرايج بهالقول ..؟!
طالعت اسيل في ابوها وقالت: ابوي ليه تضيع السالفه ..؟!
الاب: ها .. لا لا ما اضيع الموضوع .. انتي طلعتي .. ايه صح طلعتي تشبهين ابوي اللي مات ..
طالعت فيه وكلام ابوها مو داخل مخها .. ليش يرتبك ويتوتر .. اكيد فيه شي .. سكتت وما سألته لأنه اكيد بيضيع السالفه او يدور كذبه ..
كذبــــــه .. ما تدري ليش حست ان كلامه عباره عن كذبــــــه ..
نزلت الام من الدرج وهي شايله الشنطه وقالت: خلصت .. فارس تعال خذ الجنطه وحطها في السياره ..
قام فارس واخذ الشنطه من ايد امه وخرج برى يحطها في السياره ..
قام الاب وقال: ياللا احنا رايحين ..
قامت ريما وحضنت ابوها وقالت: ترجعون بالسلامه يا بابا ..
مسك الاب وجه بنته بين كفيه وقال: ريما حبيبتي انتبهي لنفسج وكلي عدل .. شوفي كيف ويهج صار اصفر وتحت عيونج سودا من اهمالج بنفسج .. خلاص حبيبتي ..
طالعت فيه وابتسمت بالصعوبه وهي تقول: ان شالله ..
الاب: واخيرا ابتسمت .. شكل الاختبارات كانت هم عليج صح ..؟!
هزت راسها بإيه ..
الاب: ياللا حبيبتي مع السلامه ..
ريما: باي ..
وراحت تودع امها .. جت اسيل عند ابوها وحضنته ..
الاب: انتبهي لنفسج يا حبيبتي ..
بعد فتره بعدت عنه وقالت: سلملي على يدي وخوالي ..
الاب: من عيوني حبيبتي ..
لفت على امها وقالت: يمه مع السلامه ..
طالعت الام فيها بإحتقار بس مسكت نفسها لمن تذكرت تهديد ابو فيصل ..
الام: مع السلامه وانتبهي لنفسج ..
طالعت اسيل فيها فأبتسمت بقوه وقالت: ان شالله ..
خرجوا واسيل تتابع امها بنضراتها .. صحيح انها ما حضنتها زي ريما بس استانست لأنها اول مره ما تخاصمها ..
" انتبهي لنفسج " .. انبسطت من هالكلمه اللي طلعت من ورى قلب امها ..
بعد فتره دخل فارس بعد ما ودع امه وابوه ..
فارس: يا بنات ..
اسيل: نعم ..
فارس: ما تحسون البيت فاضي ويخوف ..؟!
اسيل: في الليل من صج يخوف مو اللحين ..
جلس فارس وقال: امي تقول ان فيصل بيي الاسبوع الياي ..
اسيل: صراحتا افتقدته ..
فارس: حتى انا ..
لف على ريما وقال: وانتي ..؟!
طالعت ريما فيهم وقالت: ها .. ايه حتى انا ..
فارس: ريما شفيج ..؟!
ريما: مافي شي ..
فارس: تغيرتي كثير .. سواليف ما تسولفين .. طلعات ما تطلعين .. ميك اب ما تحطين .. ويهج صاير شاحب ليش ..؟!
ارتبكت ريما وقالت: آ آه عشان الاختبارات ..
طالع فارس فيها وقال: بس .. بس انا لاحضت هذا التغير من قبل الاختبارات ..
ريما بإرتباك: ا ا اه آ طبعا قبل الاختبارات لأني كنت خايفه منها ..
سكت فارس وهو يطالع فيها وقال: ريما اذا عندج مشكله قوليلي .. صدقيني راح اساعدج ..
قامت ريما وقالت بعصبيه: انت شفيك مصر ان فيه شي .. قلت لك عشان الاختبارات وخلاص .. ما تفهم ..؟!
اخذت جوالها وطلعت فوق ..
فارس: مو من عادتها تصارخ بذي الطريجه ..
طالعت اسيل في ريما وهي تطلع فقالت: فارس ..
فارس: نعم ..
اسيل بهدوء: بقولك شي ..
فارس: ايش ..؟!
اسيل بإبتسامه: نبي نتغدى برى ..
فغر فارس فيها بعدين ضحك وقال: الله يقطع ابليسج .. عبالي عندج شي مهم ..
اسيل: ليش في شي اهم من الغدا برى ..؟!
طالع فارس فيها وقال: بس انا مطفر ..
اسيل: ها ها ها ضحكتني .. علبالك اني ما شفت ابوي وهو يعطيك فلوس ..
فارس: ماشالله عليج ..
اسيل: اروح اجهز نفسي ..
فارس: بس الفلوس ما تكفي إلا لاحتياجات البيت وبس ..
اسيل: يلعن جذبك .. الفين تكفي لجيش كامل ..
فارس بدهشه: انتي كل شي تعرفينه ..؟!
اسيل: قول ما شالله ..
فارس: طيب قولي لريما .. اذا رفضت مافي طلعه اوكي .. واذا وافقت فبتكون هذي اول وآخر مره اطلعكم خلاص ..؟!
اسيل بحماس: آوككــــــــــــــــي ..
طلعت فوق وفتحت غرفة ريما وقالت: ريمـــــــــــا ..
لفت ريما عليها وقالت بعصبيه: غبيه .. استأذني قبل لا تدخلين ..
اسيل: آسفه .. بس فارس يقول اذا تبغين تتغدي برا فتجهزي ..
ريما: يصير خير واللحين اطلعي برا ..
قفلت اسيل الباب وقالت: فعلا صارت عصبيه بزياده ..
دخلت غرفتها وفتحت الدولاب تدور لها عن لبس .. وقفت شوي لمن شافت جاكيت طارق .. خرجته تطالع فيه ..
اسيل: هذا الشي لازم يرجع لصاحبه ..
جت بترجعه بس جاها فضول تفتش في الجيوب .. دخلت ايدها وطلعت مناديل وبينها ورقه ..
اسيل: وااااو لقيت شي ..
فتحت الورقه واستغربت وهي تطالع فيه ..
اسيل: شذا ..؟!
هزت كتفها ودخلت الورقه في جيبها .. رجعت ودخلت ايدها في الجيب الثاني من الجاكيت وطلعت عشره ..
اسيل: فلوس ..!! حلال علي ..
وحطته في جيبها .. فتشت الجاكيت مره ثانيه بس ما لقت شي .. رجعته في الدولاب ودورت لها عن لبس تلبسه ..
دق جوالها فردت وقالت: هلا مين ..؟!
سكت آرثر بعدين قال: واخيرا رديتي ..
انصدمت وقالت: آررثر ..؟؟؟!!
آرثر: الله يخليج يا اسيل لا تقفلين إلا لمن اخلص كلامي ..
اسيل: انا جم مره اقولك اللي بيننا انتهي ومافي بينا اي حجي ..
آرثر: اعرف انج شايله بخاطرج بس صدقيني اني غلطان واعترف اني غلطت ..
اسيل: خساره .. كنت اتوقعك تقول ان الكلام كان جذب .. يعني فعلا انت انسان واطي .. سوري انا ما اتعامل مع ناس نزلوا من قدر نفسهم ..
آرثر: تبيني اجذب عليج واقولج ان كلام سهى جذب ..؟! انتي قلتيلي انج ما تحبي الجذب وها انا قلت الصج ..
اسيل بانفعال: الصــــــــــــــــج ..؟! وينه هالصج ما ياء من البدايه ..؟! ياي اللحين وتقول انا اتكلم بصج .. هذا الصج انا ما ابيه خلاص عفته .. روح الله لا يردك ولا عاد تتصل ..
آرثر: اسيل صدقيني انـ....
طوط طوط طوط ..
قفل اسيل الجوال في وجهه ورمت نفسها عالسرير تبكي ..
اسيل: حرام عليك والله اني احبك فليش تسوي فيني جذي يا آرثر .. حرام عليك ..
⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄ ◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄ ⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊
عند دنو .. كانت في غرفتها وتفكر في كلام رهف .. قامت وخرجت من غرفتها وراحت لغرفة عادل ..
دقت الباب بس محد يرد فدقت مره ثانيه ..
دانا: عادل افتح .. ابكلمك ..
سكتت عشان تسمع رده بس محد يرد ..
دانا: عادل انا آسفه .. انا ما قصدت اني اعاند كلامك .. انا كان قصدي اساعد البيت .. عادل احنا ناس محتايين للفلوس وعشان جذي انا اشتغلت ..
انتضرت رده بس ما رد ..
دانا: آسفه لأني جذبت وقلت اني رايحه لرفيجتي رهف وانا اروح الشغل .. آسفه لأني ما علمتك بشغلي ولا قلت لك .. آسفه لأني ضيقت خلقك وزعلتك على حركتي الغبيه .. آسفه على كل شي يا عادل .. انا غلطانه .. والله انا غلطانه وابيك تسامحني .. عادل اذا انت ما سامحتني منو لي غيرك ..؟! انا كل يوم ابجي اكثر من اليوم اللي قبله .. انا ما استحمل اللي تسويه فيني يا عادل .. ندمانه والله اني ندمانه وماراح اعيدها ابدا .. عادل ياوبني وحاجني .. قول اي شي الله يخليك ..
انتضرته يرد بس ما سمعت غير صوت المكيف من غرفته ..
نزلت راسها وقالت بصوت باكي: عادل انا آسفه على اللي سويته قبل هذا .. صلحت نفسي زعلانه لأنك رفضت تعلمني مين اللي صدمك .. بس والله انه جان قصدي انك تروح وتعالج نفسك .. انا آسفه على كل شي ..
اسندت ظهرها عالباب تبكي بصمت وتنتظره يرد .. بس كالعاده مافي رد ..
مشيت وجلست عالكنبه بإنكسار ..
خرجت امها من المطبخ ولمن شافتها جت وجلست عندها وقالت: دانا ..
دانا: .........................
الام: دانا شفيج ..؟! حبيبتي قوليلي شنو اللي بينج وبين اخوج ..؟!
دانا: .........................
الام: الله يصلحج قوليلي عشان اقدر اساعدج .. ليش اخوج مو راضي يشوفج ..؟! دنو ياوبيني ..
لفت دانا وطالعت في امها .. وبعدها رمت نفسها في حضن امها وبكت ..
مسحت الام على ظهرها وشعرها وهي تقول: الله يصلحكم ان شالله ..
اما عن عادل فكان جالس في غرفته يفكر ..
ما يفكر بكلام دانا ابدا .. كان يفكر بصاحبه علي اللي دخل السجن بسبته ..
كان حاس بالذنب لأنه ما منع علي .. اصلا كيف يمنعه وهو مقعد ..
مقعد .. ياكثر ما تأذيه هذي الكلمه ..
لو ما كان مقعد كان قدر يمنع صاحبه ..
لو ما كان مقعد كان دانا ما اشتغلت ولا درست بدل عنه ..
لو ما كان مقعد كان كمل دراسته وصرف على بيته ..
لو ما كان مقعد كان استمر في حب البنت اللي حبها ..
لو ما كان مقعد كان الدنيا عنده سعيده مو تعيسه ..
لو ولو ولو .. اشياء كثيره راح تتغير لو .. لو ما كان .. مقعد ..
طالع في الارض وهو يفكر في كلام دانا واصحابه ..
كلهم يقولون عالج نفسك طبيعي .. نفسه يعرف ليش يرفض ..؟!
يمكن لأنه خايف يعلق نفسه بأمل وبعدين ينصدم بالواقع ..
ويمكن لأنه ما يبغى يزيد المصاريف عالبيت اكثر ..
هو فكر قبل كذا وقرر انه يعالج نفسه عشان امه وعشان اخته دانا بالذات ..
بس بعد ما عرف انها تشتغل انصدم .. انصدم ولعن نفسه لأنه كان بيسوي شي عشانها ..
هي بنظره ما تستحق بعد ما كذبت عليه وخدعته وعاندت كلامه ..
صحيح هي اخته بس ......
قطع حبل افكاره دق الام عالباب بقوه ..
الام بخوف: عادل .. عادل افتح الباب وتعال شوف اختك شفيها .. طاحت علي ولا ادري وش فيها ..
طالع عادل في الباب وبعدين جاء عنده وفتحه ..
الام: واخيرا فتحت .. تعال اختك طاحت وحرارتها نار وما ترد علي .. تعال شوف شفيها ..
عادل: .......................
الام: عادل انا احاجيك .. اقولك اختك تعبانه .. ذي اختك يا عادل ..
لف الكرسي لجهة سريره وقال: تستاهل ..
ودخل الغرفه .. طالعت الام فيه وهي مصدومه من رده ..
الام: حسبي الله عليك يا عادل .. حسبي الله على اللي تسويه بأختك ..
انصدم عادل ولف على امه يطالع فيها ..
عادل بصدمه: يمه ليه تتحسبين علي ..؟!
طنشته وراحت للتلفون ودقت على الجيران ..
وبعد فتره جوا وركبوا دانا السياره وراحوا للمستشفى وطبعا الام معاهم ..
اما عادل فما زال واقف في مكانه وهو مصدوم ..
هو ايش سوى عشان امه تتحسب عليه ..؟!
عادل: امي انتي ما تدري عن السالفه فليش سويتي جذي ..؟! والله دانا تستاهل والله انها تستاهل ..
سكت شوي وهو مصدوم من نفسه ..
عادل: ليش .. ليش صرت قاسي فجأه ..؟! انا مو من عادتي ازعل على دانا ابدا .. دانا اختي ودلوعتي فليش تغيرت ..؟!
طالع في الارض وقال: كل الناس يغلطون .. مافي انسان ما يغلط ..
عض على شفته وقال: بس غلطها كان كبير .. مو من عادتها تعصي كلامي .. والله ما اقدر اسامحها ..
⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄ ◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄ ⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊
يوم الاربعاء وفي العصر .. كان ريان جالس على حافة سريره ويلبس ساعته ..
اليوم راح يروح لبيت سامي عشان يشوفه .. صحيح ان ابو سامي شري بس شوفة صاحبه اهم ..
وقف بعد ما لبس الساعه وطالع في شكله كنظره اخيره ..
ابتسم برضى واخذ بوكه وحطه في جيب بنطلونه وخرج من الغرفه ..
نزل من الدرج فشاف اخته رشا تدقدق في الجوال واخوه رامي يطالع في سبيستون ..
ريان: ما شالله على اخواني هادين ..
طالعت رشا فيه وقالت: ريان بارك لي ..
ريان: للمره العاشره اقولج مبروك .. شكلج اول وحده تنهي اختباراتها ..
رشا: مبسوطه لآخر حد يا ريان .. افتكيت من هم الاختبارات والمذاكره والضغط والتعب وكل شي ..
ريان: هذا وانتي في المدرسه تقولين جذي .. عيل لو رحتي الجامعه شنو بتقولين ..؟!
رشا: هههههه لكل حادث حديث .. اممممم ريان ..
ريان: هلا ..
رشا: بتروح مجان صح ..؟!
ريان: ايوه .. ليش وش بغيتي ..؟!
رشا: تقدر توصلني مع طريجك لبيت رفيجتي روان ..
ريان: لا تكون اخت راشد اللي ما يتسمى ..؟!
رشا بحذر وخوف: ايه ..
ريان: لا سوري ..
رشا: هذا اللي كنت خايفه منه .. ريونتي بليز .. احنا رفيجات وش دخلنا في مشاكلكم ..
ريان: انا ماراح اوصل احد .. اذا يت رنا قوليلها توصلج ..
رشا: اوووف ريان ما يصير جذي ..
ريان: وليه رنا .. ابوي بيرجع اليوم قوليله يوصلج .. انا مستعيل وايد ..
رشا: ريان انا اختك ..
ريان: والله ..؟! معلومه يديده ..
رشا: لا تتطنز ..
ريان: طيب قوليلها هي تيي ..
رشا: آخر مره هي اللي يتني .. ما يصير تيني وما اييها ..
ريان: لا ما شالله اختي تعرف الاصول ..
رامي: حرام ريان وصلها ..
لف ريان على رامي وقال: انت خلك في السبيستون حقك .. شوف سابق ولاحق اليوم بتنكسر سياره واحد منهم .. تابعها لا تفوتك ..
رامي: انكسرت وخلصت من زماااااان ..
رشا: ما شالله عليك يا ريان .. من متى وانت تتابع افلام كرتون ..؟!
ريان: ما اتابع بس هذي قديمه واتذكر ان فيها سياره تنكسر ..
طالع في ساعته وقال: الله يهديج يا رشا اخرتيني ..
رشا: ريان ريان بليز وصلني انا جاهزه ..
ريان: ان شالله بس مو اليوم ..
رشا بحماس: متى ..؟!
ريان: لمن تحج البقره على قرونها ..
وخرج من البيت وركب سيارته ..
طلع جواله واتصل على سامي وكالعاده مغلق ..
فحرك السياره واتجه لبيت سامي ..
وبعد فتره وصل للقصر ووقف سيارته وطالع في القصر فتره طويله ..
وبعدها طلع جواله واتصل للمره الاخيره على سامي .. وكان مغلق ..
نزل من سيارته ودق باب ساحة القصر ..
خرج واحد وقال: نعم ..
ريان: ابي اقابل سامي ..
عقد الحارس حواجبه وقال: السيد سامي ..؟!
ريان: ايوه ..
الحارس: بس هو مسافر من مده ..
ريان بصدمه: شنو يعني مسافر ..؟!!
الحارس: زي ما سمعت ..
طالع ريان فيه وقال: انت متأكد ..؟!
الحارس: نعم ..
ريان: طيب ليش سافر ..؟!
الحارس: ما ادري ..
ريان: وين سافر ..؟!
الحارس: بريطانيا ..
سكت ريان وقال: سافر ..؟! مو معقول ابدا .. هو قال انه هذي الاجازه ما راح يسافر فيها .. وشلون يسافر ويترك اختباره ..
الحارس: لو سمحت ..
طالع فيه وقال: نعم ..
الحارس: السيد سامي ما سافر عشان يقضي اجازته برى ..
ريان بإستغراب: عيل ليش ..؟!
الحارس: ما ادري .. بس اللي اعرفه انه بيطول .. يعني بيقعد سنتين او ثلاث او خمس ..
انصــــــــــــــــــــــــــــــــدم ريان من كلامه وقال: شنـــــــــــــــو ..؟!!!!!! انت شقاعد تقول ..؟! اكيد تستهبل ..
الحارس: لا ..
طالع ريان فيه وهو مازال مصدوم وقال: مستحيل .. شلون يقعد هناك ثلاث سنوات .. طيب ودراسته ..؟! يعني خلاص بيدرس هناك ولا راح يرجع للجامعه ..؟! طيب ليش ..؟!
طالع في الارض ورمى حجره برجله وهو يقول: اكيد في سبب ..
سكت .. رفع راسه .. عقد حواجبه وهو يتذكر ..
ريان: مستحيل .. بس اكيد عشان سالفة بنت عمه .. من بعد ما ارسلت له وقلت دور في غرفة ابوك ما عاد كلمني .. معقوله ابوه شافه ..
طالع في الفراغ وهو يتذكر كلام سامي .. كان يرفض بشده انه يدخل غرفة ابوه .. كان يقول ان ابوه شخص مو سهل ..
ضرب ايده بالجدار وهو يقول: انا السبب .. كان يرفض وانا اصريت عليه وكأنه حاس باللي بيصير .. لو ما اصريت جان ما صار اللي صار .. انا السبب ..
لف على الحارس وقال: طيب ابي اشوف ابوه ..
الحارس: تقصد السيد سلطان الراهي ..؟!
ريان: ايوه ..
سكت الحارس فتره بعدين قال: طيب انتظر عشان اعطيه خبر ..
دخل الحارس وريان واقف ينتظره .. بعد عشر دقايق جاء الحارس ..
الحارس: ادخل ..
دخل ريان لساحة القصر الكبيره ومشي فيها لين وصل للباب وشافه مفتوح ..
دخل للقصر وشاف قدامه ابو سامي نازل من الدرج وهو لابس روب البيت ..
اول ما شافه ريان حس بالخوف .. شكل ابو سامي بصرامته ورزته ونضراته يجيب الخوف ..
نزل ابو سامي وجلس عالصوفا الكبيره واخذ له دخان وولعه وقال: اهلا بريان .. ايلس ..
استغرب ريان منه .. كيف عرف اسمه ..
ريان: انا مو ياي ايلس ..
نفث ابو سامي دخانه وقال: بس انا ما احب اكلم واحد واقف .. ايلس ..
ريان في نفسه: "خلاص ياريان لا تطولها وهي صغيره" ..
جلس وقال: ليه سامي مسافر ..؟!
ابتسم ابو سامي وقال: بيكمل دراسته برى .. هذا مستقبله وما اعتقد انك بتوقف في طريج مستقبل رفيجك صح ..؟!
ريان: كيف بيكمل دراسته برى وهو سافر في ايام الاختبارات .. مافي جامعه تستقبل طالب في وسط الامتحانات ..
ابو سامي: اكيد مافي جامعه بتستقبل طالب في وقت الامتحان .. بس سامي سافر بعد الامتحانات ..
ريان بإستغراب: كيف ..؟!
ابو سامي: اختبر هنا ..
ريان: ما اختبر لاننا ما شفناه ..
ابو سامي: اكيد ما بتشوفونه لأنه كان يختبر في غرفه خاصه بعيد عن بعض الاصدقاء اللي يسببون الازعاج ..
عرف ريان انه يقصدهم ..
ريان: بس اللي اعرفه ان سامي مايبي يدرس برى ..
اخذ نفس من دخانه الكبير ونفثه بعدين قال: مو هو اللي يقرر .. انا اللي اقرر ..
ريان: وهذا القرار ما ياء إلا اللحين .. وينك من بداية دخوله للجامعه ..؟!
ابو سامي: انت اصغر من انك تحاسبني .. اقرر في الوقت اللي ابيه ..
طالع ريان فيه وهو مازال محافظ على هدوئه وقال: بس قرارك كان فجأه ..
ابو سامي: انا حر ..
ريان: مستحيل تقرر من دون سبب ..
طالع ابو سامي فيه وهو ساكت ..
ريان: انا اعرف السبب .. وياي اقولك انه ماله ذنب .. انا اصريت عليه ..
ابتسم ابو سامي بسخريه وقال: اها .. انت اصريت عليه ..
ريان: ايوه انا اصريت عليه ..
ابو سامي: لهدرجه طلع ولدي غبي ويسمع كلام غيره بسرعه ..؟!
ريان: انا اصريت عليه .. هو ماكان موافق ابدا بس انا اصريت ..
ابو سامي: اوكي ولا تزعل .. انت اصريت عليه وهذا يعني ان اصحاب سامي اصدقاء سوء وانا خايف عليه منكم .. ها شرايك ..؟!
مسك ريان نفسه لا يعصب وبعدين قال: خايف على ولدك لا يصيع ها ..؟! عيل ليه سفرته برى ..؟! برى الصياعه تييه على طبق من ذهب .. ما تخاف عليه ..؟!
ضحك ابو سامي وبعدين قال: واذا صاع شفيها ..؟! فترة مراهقه وتعدي ..
عصب ريان بس مسك نفسه وقال بإستهزاء: ايه واضح انك خايف على ولدك .. ليه ما تخليه هنا .. يكمن أأمن له ..
ابو سامي: فيه فرق .. هناك محد راح يغيره على ابوه .. بس هنا اصحابه يسعون عشان يغيرونه ..
ريان: لو سمحت لا تغلط .. احنا ناس محترمين وما نصلح شي زي جذي ..
ابو سامي: هههههههه عيل منو اللي اصر على سامي انه يفتش غرفة ابوه ..؟!
طالع ريان فيه .. هذا الشخص محد يقدر يجادله ابدا ..
ريان: كانت غلطه مني .. شدراني انك ما تسمح له انه يفتش اغراضك ..؟!
ابو سامي بإبتسامه: بس انت قلت انه رفض وانت اصريت عليه .. ليش اللحين تقول انك ما تدري اني ما اسمح له يفتش غرفتي ..؟!
عض ريان على شفته .. فعلا ذا الشخص محد يقدر يمشي عليه الجذب ..
ريان: انا كنت اقصد اني ما توقعت انك حتسفره برى .. كنت اتوقع انك بتخاصمه وبس ..
ابو سامي: غريبه .. كل شوي تغير كلامك .. المهم انا ابو سامي ومو من حقك تدافع عن سامي .. محد ضربه على ايده وقاله فتش في اوراقي ..
ريان: اوراقك ..؟! انت غلطان لان سامي كان يبغى صور مو اوراق ..
عقد حواجبه بعدين قال: بس انا شفت معاه اوراق ..
ريان: يمكن يبغى يدور بينها عن صوره وهو صغير ..
ابو سامي: مو كأنك طولت ..
ريان: اوكي حأطلع بس حبيت اقول انك ظالم سامي .. مو بكيفه دخل .. انا خليته يدخل غصب عنه .. وحبيت اقول انك عمرك ما فكرت في مصلحة سامي .. مصلحته هي انه يروح المجان اللي يرتاحله مو مجان مجبور عليه .. مع السلامه ..
وخرج من القصر ..
طالع ابو سامي فيه وسحب نفس من دخانه وقال: من متى والصغار صاير لهم لسان يتفاصحوا ..
ركب ريان سيارته واتجه لبيته وهو يفكر بسامي .. معقوله خلاص ماراح يشوفه ابدا ..
فعلا صادق سامي لمن يقول عن ابوه شرير .. ابوه شرير في كل شي .. في تصرفاته وفي كلامه ..
اسرع بالسياره عشان يوصل البيت بسرعه ..
⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄ ◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄ ⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊
كان جالس في الصاله ويطالع في الارض بتفكير ..
يحبها وماراح يتركها حتى لو طلبت منه هذا ..
كان يفكر بطريقه يراضيها .. كثير قابل بنات وكثير زعلوا وراضاهم .. بس هذي بالذات مو داري كيف يراضيها ..
رفع راسه لمن شاف امه توها دخلت .. لف وجهه وطنشها .. من ذاك اليوم وهو ما يكلمها ..
طالعت الام فيه وجت عنده وجلست جنبه وحطت ايدها على كتفه وقالت: آرثر حبيبي خلاص .. اذا تبيني اللحين اخطبها لك انا موافقه ..
بعد ايدها وقال: توج توافقين .. صح النوم ..
الام: انا شدراني انه بيصير فيك جذي .. شوف كيف ويهك صار اصفر وتحت عيونك اسود .. كل هذا عشان اسيل ..
آرثر: قلتلج احبها بس انتي ما تفهمي ..
الام: سوري حبيبي كنت غلطانه .. مستعده اروح اخطبها لك اللحين ..
آرثر: تأخرتي ..
الام: ليش شصار فيها ..؟!
آرثر بحقد وقهر: اسألي بنت اخوج ..
الام: اليزا ..؟!
آرثر: وفيه غيرها ..
الام: ليش وش سوت ..؟!
آرثر بقهر: خربت العلاقه بيني وبين اسيل .. غبيه وجلبه ..
سكتت الام وقالت في نفسها: "الله يهديج يا اليزا" ..
الام: طيب عدل الوضع ..
آرثر: حاولت حاولت بس من دون فايده .. البنت كرهتني .. تعرفين شنو يعني كرهتني ..
الام: طيب مادام كرهتك في بدالها الف ..
عصب آرثر وقال: ابي اسيل وما ابي غيرها فاهمه ..؟! ابيها هي وبس ..
الام: اوكي اوكي خلاص اهدأ ..
قام آرثر وقال: لا تنتظريني على العشا ..
الام: وين رايح ..؟!
خرج وهو يقول: جهنم ..
فتنهدت الام وقالت: الولد بيضيع مني بسبب اسيل ..
فتحت شنطتها وطلعت جوالها واتصلت ..
الام: اهلين دكتوره شاديه كيفج ..؟!
د.شاديه: الحمدلله تمام إزيك ..؟!
الام: انا بخير .. اقول دكتوره انتي عندج طالبه اسمها اسيل صح ..؟!
د.شاديه: ايوه .. اسيل وحده من طلابي ..
الام: بغيت اسألج شسمها بالكامل ..؟!
د.شاديه: اللي بعرفه ان لقبها الرملي .. بس اسم ابوها ما بعرفش ..
الام: طيب ما عندج عنوان بيتها ولا رقم تلفونها ..
د.شاديه: لا .. بس انتي بتسألي ليه ..؟! في حاقه لا سمح الله ..
الام: لا مافي شي .. بس ابني يحبها وافكر اخطبها له ..
د.شاديه: بجد .. مبرووك ..
الام: الله يبارج فيج .. طيب ما تعرفين اي شي يوصلني لها ..؟!
د.شاديه: استني بسأل لك الدكتور تركي لأنه يعرفها اكتر مني ..
الام: طيب كلميه اللحين لأني مستعيله ..
د.شاديه: اوكي من عيوني ..
قفلت الام الجوال وطلعت فوق بتعب لأنها في الشهر السادس والحمل ثقيل عليها ..
دخلت غرفتها وبدلت ملابسها وبعد ما خلصت دق جوالها ..
رد وقالت: هلا شاديه ..
د.شاديه: اتصلت عليه وسألته ..
الام: ها .. وش قال ..؟!
د.شاديه: ابوها اسمه عبدالرحمن .. وما يعرف رقمها .. بس يعرف رقم اخوها فارس ..
الام: اخوها فارس ..؟!
د.شاديه: ايوه .. اصلو كان في اوراق اسئله بيعطيهم يوم الاربعا .. بس في طلاب كتير ما يقدرو يجوا .. فاخذ الدكتور تركي ارقامهم عشان يقدر يرسل لهم على الواتس آب .. وكان اخوها فارس واحد من دول الطلاب ..
سكتت الام فتره بعدين قالت: طيب ارسلي لي الرقم ..
د.شاديه: اول ما يرسل لي تركي الرقم راح ارسله ليك على طول .. اوكي ..
الام: اوكي .. مشكوره ..
د.شاديه: العفو .. مع السلامه ..
الام: مع السلامه ..
قفلت الام الجوال وهي تفكر .. هذا ولدها وراح تدور على راحته .. واذا كانت راحته مع هذي البنت راح تحاول تعدل العلاقه بينهم ..
اما عن اسيل فكانت جالسه في الصاله مع ريما وفارس ..
طالع فارس فيهم وقال: ما يصير جذي .. ريما بلييز ..
هزت ريما كتفها وهي تضغط بالجوال ..
لف على اسيل وقال: اسيل ..
اسيل: نو نو نو .. مافيني ..
فارس: هذا يزاتي اني مطلعكم تتغدوا برى ..
اسيل: محد ضربك على ايدك وقال طلعنا ..
فارس: بس انتم طلبتم مني ..
اسيل: كنت تقدر ترفض .. بس بكل سذاجه قلت اوكـــــــــــي ..
فارس: جزاء المعروف عشر كفوف ..
ريما: انا يوعانه ..
اسيل: وانا بعد ..
فارس: لو تموتون ماراح اييب عشا ..
ريما: بس انا قلت لك قبل شوي اني تعبت من طلعت اليوم وما اقدر اسوي عشا ..
اسيل: ايوه بعد الغدا مشيتنا لين تعبنا فأكيد ما فينا حيل نسوي عشا ..
فارس: توبه .. والله ما اطلعكم بعد جذي .. بس بليز سوا عشا .. ما يصير انام من دون عشا ..
هزت ريما كتفها للمره الثانيه وهي مشغوله بالجوال ..
طالع في اسيل فقالت: لا تطالع فيني جذي ..
عصب فارس وقال: يلعن اووم الحاجه اللي بتذلني .. ياليت امي ما اخذت الشغاله ..
ريما: فارس اقولك شي وما تزعل ..
فارس: قولي ..
ريما: تعرف الاندومي ..؟!
فارس: شفيه ..؟!
ريما: ما اعرف اسويه فكيف تبيني اسوي لك عشا ..؟!
انصدم فارس وقال: جذابه ..
ريما: اسأل اسيل ان كنت مو مصدقني ..
اسيل: من جد ما تعرف تسوي شي .. حتى غسيل مواعين صعب عليها ..
سكت فارس مصدوم بعدين لف على اسيل وقال: وانتي ..؟!
اسيل بإبتسامة انجاز: اعرف اسوي اندومي ..
فارس: وايش كمان ..؟!
اسيل بتفكير: اممم و اعرف اسوي ساندويتش بالجبنه وساندوتش بالمرتديلا واعرف اسوي بطاطس مقلي واعرف اسوي توست بالجبنه وتوست بالمرتديلا واعرف احط الحليب على الكورن فليكس واعرف اسخن الرز وبس ..
طالع فارس فيها وقال: متأكدين انكم بنات ..؟! يا جماعه ما يصير جذي انا يوعان ..
اسيل: تبيني اسويلك اندومي ..؟!
فارس: اللحين انتي وشكلج الاندومي يشبع واحد ميت يوع وقاعد يترجى اخواته ..
اسيل: اكيد لا ..
فارس: طيب اللحين وش اسوي ..؟!
اسيل بإبتسامه: يا انك تييب عشا او تعشينا برى ..
فارس بسرعه: مستحيل اعشيكم برى .. اييب عشا ابرك لي ..
اسيل: عيل لا تتاخر لأني يوعانه ..
فارس: يصير خير ..
لف عشان يطلع بس تذكر شي ..
لف عليهم وقال: صح نسيت .. السياره اليوم خلص بنزينها بعد ما وصلنا .. اللحين كيف بروح المطعم ..
اسيل: الله خلق لنا ريل عشان نمشي عليها ..
فارس: اوووف ..
لف وخرج من البيت .. السياره اللي خلص بنزينها هي سيارة ريما لأن الاب اخذ سيارته وراح فيها للمطار ..
طالعت اسيل في ريما وشافتها مشغوله بالجوال ..
اسيل في نفسها: "اووف ما تطفش من الموبايل" ..
دق جوال اسيل .. فطالعت فيه وشافته رقم غريب .. بس ما ردت لأنها عرفت ان هذا هو رقم آرثر اللي مسحته اول ..
دق الجوال اكثر من مره بس كانت تطنش وما ترد .. في النهايه سمعت دق رساله ..
اخذت جوالها وعرفت ان الرساله منه .. ترددت .. هل تفتحها ولا تمسحها زي دايم ..
قررت انها تفتحها .. ماراح تخسر شي لو قرتها ..
فتحتها وكان مكتوب فيها ::
(( اسيل انا ابي اقابلج .. في كلام ابي اقوله لج .. انا لازم افهمج .. صدقيني انا احبـــــــــج ومستحيل ابتعد عنج حتى لو طلبتي .. ايش الوقت المناسب اللي اقابلج فيه ..؟ ))
طالعت في الرساله بعدين عملت دلييت ومسحتها ..
حطت الجوال جنبها وهي تفكر ..
اسيل: جذب ورى جذب ورى جذب .. عباله اني بصدقه ..
طالعت ريما فيها وقالت: شقاعده تقولين ..؟!
اسيل بهدوء: ولا شي ..
هزت ريما كتفها ورجعت لجوالها ..
اسيل: ما تلاحظين ان فارس تأخر ..
ريما: اكيد بيتأخر مادامه بيروح للمطعم مشي .. وكمان توه طالع ..
هزت راسها وقامت وقالت: بأطلع في الحوش ..
خرجت الحوش ومشيت لين وصلت للمرجيحه الهزازه ..
جلست فيها وهي تفكر في آرثر وحياتها وكل شي حولها ..
دق جوالها .. طالعت في الشاشه وشافت ان لين هي اللي اتصلت ..
ردت وقالت: هلا لين كيفج ..؟!
لين: هلا والله .. الحمدلله تمام كيفج انتي ..
اسيل: تمام ..
لين: ههههههه لا تضحكين علي .. صوتج يقول انج مو بخير ..
اسيل: لا بس متضايقه شوي .. شبغيتي ..؟!
لين: هذي طرده غير مباشره ..
اسيل: لا مو قصدي بس بجد مالي خلق اكلم احد ..
لين: اوكي .. اسمعي احنا اتفقنا نروح باجر للنادي .. تقدري تيي معانا ..؟!
اسيل: بأكلم ابوي وباجر ارد لكم خبر ..
لين: اوكي .. باي ..
اسيل: باي ..
قفلت الجوال وهي تفكر .. بغت تتصل على ابوها بس بطلت .. يمكن نايم بعد تعب السفر ..
ففكرت انها ترسل له رساله .. فارسلت له رساله تستأذنه انها تروح مع صاحباتها للنادي ..
بعد ما ارسلت له رساله طالعت في رسايلها .. استغربت لمن شافت بين الرسايل رقم غريب ..
فتحت الرساله وكان مس كول .. فجت بتدق عشان تتأكد بس تذكرت شي ..
اسيل: لا يكون هذا الرقم هو الرقم اللي سألني فارس عنه ذاك اليوم ..؟! لمن يي فارس بتأكد منه ..
سمعت صوت جنبها .. لفت بحذر وبهدوء .. فلاحظت شي عالكرسي يتحرك .. دققت النظر فنطت من الخوف ..
اسيل: آآآآآآآ شذا ..؟!
فسمعت صوت واحد يضحك .. لفت على ناحية الضحكه فشافت انه آرثر .. انصدمت لمن شافته ..
ابتسم آرثر وقال: ماكنت اتوقع انج تخافين من عصفور ..
طالعت فيه اسيل وهي مازالت مصدومه .. شدراه هذا عن مجان بيتي ..؟!
تنهد وقال: سوري ما قصدي اني اخوفج ..
اسيل: ............................
آرثر: ارسلت لج رساله وقلت ابي اقابلج .. بس انتي مارديتي علي .. بس سمعت عندكم مثل يقول السكوت علامة الرضا وهذا معناته انه ما عندج مانع ..
اسيل بحده: كيف عرفت عن مجان بيتي ..؟!
طالع فيها فتره بعدين قال: سوري لأني ما نفذت وعدي .. اخذته من ندى ووعدتها اني ما اعدي عتبة البيت بس غصبا عني دخلت ..
اسيل بدهشه: ندى ..؟!!!!
آرثر: اسيل .. هذا الوضع اللي بيننا لازم ينتهي وبسرعه لأني مو قادر اتحمل ..
اسيل: اضن اني انهيت الموضوع يا استاذ آرثر .. جم مره اقولك انت بطريج وانا بطريج ..؟! انت روح دورلك على وحده ساذجه وانا راح ادور على واحد يقدر حبي له ومايدوسه ..
آرثر: كلامج مو عاجبني ..
اسيل بعصبيه: ومن تكون عشان تعطيني رايك بكلامي ..
ابتسم وقال بصوت واطي: انا حبيبج وروحج ..
انصدمت من كلامه وعصبت اكثر وقال: لاااا ياحبيبي .. الثقه ذي خلها على ينب ..
آرثر: انت قلتيها بلسانج .. حبيبي ..
اسيل بإنفعال: صج انك واحد غبي جدا .. انا ما قصدت اللي في بالك يا اهبل .. انت آخر واحد افكر فيك فاهــــــــــــــــم ..؟!
ابتسم وقال: يعني تكرهيني ..؟!
اسيل: من زمان توك تدري ..
قرب منها ومسك ايدها وقال: طيب ليش لابسه الساعه اللي اهديتها لج ..؟!
تفاجأت منه ومن سؤاله فقالت: وإذا لبستها وش فيها ..؟!
آرثر: فيها كثير ..
سحبت ايدها وقالت: لا غلطان لأني كرهتك .. انا لبستها عشان اتكشخ جدام الناس يا استاذ مو عشانك ..
آرثر بإبتسامه: يعني من جد تكرهيني ..؟!
عصبت وتنرفزت .. هذي اول مره يتكلم باسلوب ينرفز ..
اسيل بعصبيه: انت ما تفهم .. انا قلت اكرهك .. تعرف شنو يعني اكرهك .. اكرهــــــــــــــــك ..
آرثر: بس انا احبج .. ما يصير احبج وانتي تكرهيني .. يعني لمن بنتزوج راح نعيش حياة تعيسه ..
نتزوج .. كانت تتمني بس هو حطم هذي الامنيه ..
نزلت راسها ودمعت عيونها غصب عنها ..
اسيل بصوت خافت: اكرهك .. روح من هنا يا حمار مابي اشوفك .. روح عني ..
رفع راسها وايده ماسكه وجهها ومسح دموعها بإصبعه وقال: لا .. ما اتحمل اشوفج تبجي بسببي .. حياتي لا تبجين ..
نزلت دموعها اكثر .. بغت تتكلم بس هو سبقها ..
آرثر: لا تقولي شي .. انا بتكلم وانتي اسمعيني اوكي ..؟!
اسيل: ............................
آرثر: انا كنت اكلم بنات .. لا مو بس اكلم .. كنت اطلع معاهم وكنت اعزمهم لحفلاتي في قصري .. كنت مستمتع بحياتي .. لا مو مستمتع .. كنت امتع نفسي بنفسي .. وحيد .. امي دكتوره بالجامعه ومشغوله عني وابوي نادرا اشوفه بسبب تجارته اللي ما تخلص .. كانوا لاهين عني .. انا من صغري ربيت نفسي بنفسي .. صحيح انهم ما يقصرون عني بشي ابدا .. بس عيبهم انهم اذا شافوني على خطأ ما ينصحوني وحجتهم هي اني راح اعاند وماراح اسمع لهم .. طبيعي جدا اني انحرف بطريج خطأ .. كلمت وقابلت وعاشرت فوق ألف بنت من اشكال وجنسيات اخرى ..
نزلت دموعها وشهقت وهي تقول: خلاص لا تكمل ..
مسح دموعها مره ثانيه وقال: بأكمل وراح تسمعيلي .. انا صايع انا داشر انا منحرف انا حقير انا واطي انا وانا وانا .. اعترف وما انكر .. حياتي كانت كلها فساد في فساد .. بنات وحفلات وخمر وحشيش واغاني ورقص وكل شي .. صحيح كنت اصوم واصلي بس كنت متأكد انه ماراح يقبل اي شي مني وانا على هالحاله .. حاولت اغير من نفسي بس ما قدرت .. مافي شي يشجعني ومافي شي يدفعني للتغير .. استسلمت لحالتي وقلت ان هذا هو قدري وبس .. بعد فتره طويله .. فوق ست سنوات وانا على هالحاله .. شفتج .. شفتج وانقلب كل كياني .. ما ادري ايش صارلي .. اكتشفت اني حبيتج الحب اللي يسمونه الحب من اول نظره .. طنشت نفسي وقلت انساها .. حاولت بس ما قدرت .. فقلت لنفسي طيب خاوها وخلها وحده من خوياتك عشان ترتاح .. بس ما قدرت .. انت بنت بريئه ومحترمه ومو من هالنوع .. حسيت بشي يمنعني .. ما اقدر اضيعج زي ما ضيعت بنات غيرج .. حاولت وحاولت انساج بس كل ما حاولت حبيتج اكثر .. فقررت اني آخذج .. بس بالحلال ..
كمل وهو يمسح دموعها اللي ما توقف: عشانج انتي بس تغيرت .. قلت لازم اتزوجها واكيد مستحيل ترضى باللي اسويه .. اللحين لقيت لي دافع اني اتغير .. تركت البنات والخمر والحفلات المحرمه وكل شي عشانج .. قلت لازم اتغير عشان ترضى فيني .. اقسم بالله يا اسيل اني تركت كل شي كنت اسويه .. تركت كل شي وانا اقول في نفسي اني راح انسى وماراح اتذكر ذا الشي ابدا .. بس صدمتيني ذاك اليوم لمن سألتيني ان كنت اقابل بنات او اعمل الحرام .. انصدمت ذاك الوقت ولا اعرف كيف اياوب .. خفت اقولج وتتركيني وما ترجعي وكل شي بحياتي يموت .. فقلت لا .. لأني فعلا تناسيت الماضي وما راح ارجعه .. بس حبل الجذب قصير .. جت سهى وهي وحده من اللي كنت اعرفهم .. اسيل لازم تفهميني .. ها انا حكيت لج كل شي واكيد اللحين بتعذريني صح ..؟!
طالعت فيه وهي عاضه على شفتها عشان تمنع نفسها من البكاء .. بعدت ايده عنها وطلعت جري لغرفتها ..
دخلت غرفتها وقفلت الباب ورمت نفسها عالسرير تبكي ..
اما ريما فكانت مستغربه من دخول اسيل السريع وهي تبكي ..
فحطت جوالها عالكنبه وطلعت برى تشوف ايش السالفه ..
اول ما طلعت سمعت صوت سياره تشتغل .. وقفت عند باب الحوش وشافت السياره تمر قدامها بسرعه ..
بسبب ان الوقت ليل فما قدرت تعرف مين هو ..
استغربت ودخلت البيت ومسكت جوالها مره ثانيه وهي تفكر ..
ريما: مين اللي كان برى ..؟! يمكن وحده من صاحباتها .. طيب لو كان وحده من صاحباتها جان دخلت هنا ..
سكتت بعدين قالت: معقوله يكون آرثر ..؟!!
ضغطت جوالها بعصبيه وهي تقول في نفسها: "انسيه .. انسيه .. انسيه يا ريما خلاص .. انسيــــــــــــــــه" ..
قفلت الجوال بعد ما تذكرت الشي اللي كانت بتسويه ..
فتحت لاب توب فارس اللي كان في الصاله وفتحت النت ..
تعرفون ليش ..؟؟؟؟!!!
تدور عن احسن مستشفى لمكافحة المخدرات في قطر ..
راح تعالج نفسها بنفسها .. نجاحتها من ابوها ومن امها والنجاحه اللي بيعطيها اياها فيصل مع مكافأة الجامعه راح تكفي لأنها تسافر وتتعالج ..
بس المشكله انها ما قدرت تطلع عذر لسفرها برى ولفتره طويله ..
عصرت مخها لين تعبت بس مافي فايده ابدا ..
دخلت عالمواقع والمنتديات وبعد حول ساعتين من البحث لقيت لها مستشفى مناسب حسب المواصفات اللي بمخها ..
قفلت اللاب وسندت ظهرها على الكنبه وهي تفكر ..
شوي انتبهت للي حواليها .. مرت ساعتين وفارس ما رجع واسيل باقي ما نزلت ..
طلعت فوق وفتحت غرفة اسيل وشافتها تمشط شعرها ..
طالعت ريما فيها وقالت: فارس مارجع ..
انصدمت اسيل وقالت: كيــــــــــــــــف ..؟! ماني فاهمه .. مر اكثر من ساعتين ونص .. شلون مارجع ..؟!
هزت ريما كتفها ..
اخذت اسيل جوالها واتصلت عليه ..
دق ليــــــــــــــــن قفل ..
دقت مره ثانيه وكالعاده دق لين قفل ..
اسيل: مستحيل ..
فعلا حسوا بخوف شديد .. اخوهم تأخر كثير ..
.................................................. ......
__________________  |