|
قبل ساعتين .. كان فارس توه خارج من مطعم الطازج وفي ايده كيس عشا ..
مشي وهو متجه للبيت .. مرت من جنبه سياره ووقفت ..
استغرب ولف عالسياره الهمر السودا وطالع فيها ..
فتحت شباك السياره وقالت: فارس ..
طالع فيها فارس ويحاول يتذكرها .. فعرف انها هي البنت اللي قابلها واسمها وصايف ..
فارس: وصايف ..؟!
وصايف: اركب .. ابي اكلمك ..
سكت فتره بعدين قال: شتبين ..؟!
وصايف: اركب وراح اقولك ..
فارس: سوري انا مستعيل ..
وصايف بصراخ: خمـــــــــس دقايـــــــــــق ماراح تأثــــــــــــــــر عليك ..
انفجع فارس منها .. البنت من جد تفجع ..
فارس: اوكي ..
فتح الباب وركب جنبها وحط الكيس في المقعده اللي وراه ..
حركت السياره وقالت: اسيل ..
طالع فيها بإستغراب وقال: شفيها ..؟!
وصايف: اختك ..؟!
فارس: ايه اختي ..
وصايف: جذاب ..
تفاجأ فارس وقال: شتقصدين ..؟!
وصايف: اسيل ماهي اختك ..
فارس: انا ادرى بأختي يا آنسه ..
اسرعت وصايف بالسياره وبعد فتره وقفت عند الرصيف وقالت: انا اعرف هي بنت مين واعرف ان مالها اخوان ابدا ..
فارس: غلطانه .. هذي اختي وما اسمح لج انج تشككين في هويتها ..
وصايف بعصبيه: شفيكم انتم .. انا متأكده فليش تجذبون علي .. وش بينقص منكم لو قلتوا الحقيقه ..
فارس: انتي اللي شفيج .. ترضيني ايي عندج واقولج ان اخوج مثلا ماهو اخوج ..؟! ترضين ولا لا ..؟!
دمعت عيون وصايف وقالت: لو اسيل ما ولدت جان بيكون عندي اخوان كثير .. بس اسيل يات ويابت امها معاها وحرموني من امي .. حرموني منها .. اكرههم ..
استغرب فارس منها وقعد يطالع فيها فتره .. معقوله تعرف اسيل من جد ..؟!
واضح من اصرارها وثقتها انها تعرف اسيل .. احتار فارس ..
هل يكون اناني ويقول لا اسيل اختي ويحرمها من اهلها الحقيقيين ..؟!
او يتصرف من راسه ويقول اسيل مو اخته وبعدين يفقدها للابد ..؟!
وصايف: بلييز قول الصج .. اسيل مو اختك صح ..؟! لا تجذب وياوب ..
سكت ومو داري كيف بيجاوب .. ما يبغى يخسر اسيل وفي نفس الوقت ما يبغى يبعدها عن اهلها ..
اهلها ..؟! سكت بعدين ابتسم بإستهزاء .. اذا كانوا من جد اهلها فليش يرمونها ..
ببساطه اهلها ما يبغونها .. اصلا هم بحقارتهم هذي ما يستحقون بنت زي اسيل ..
فارس: جم مره اقولج اسيل اختي ..
وصايف: لا تجذب يا فارس .. هذي مو اختك وانا متأكده ..
اخذت الضرف من الدرج وطلعت صوره وقالت: شوف ذي الصوره وقول شرأيك ..
اخذ فارس الصوره وطالع فيها فتره .. يحسها صورة حرمه عاديه .. فبدأ يدقق بالملامح وانصدم لمن بدأ التشابه بينها وبين اسيل ..
طالعت فيه وصايف وانتبهت لصدمته فقالت: شفت .. شفت قد ايش انا متأكده ..
تردد فارس بعدين قال: مين هذي ..؟!
وصايف: هذي سميه .. ام اسيل ..
فارس: شصلت قرابتج منها ..؟!
طالعت وصايف فيه فتره بعدين طالعت قدام وقالت: كانت من ييراننا ..
فارس: كانت ..؟! ليه وينها اللحين ..؟!
وصايف: مدري .. سافرت ولمن رجعت ما لقيتها .. الجلبه الحقيره ..
استغرب فارس .. هذي ليه تسبها ..
فارس: ليش تسبينها ..؟!
وصايف: لأنها تستحق .. وتستحق القتل كمان ..
انصدم .. شلون تستحق القتل .. ام اسيل تستحق القتل .. طيب ليه ..
فارس: آسف عالتدخل بس ابي اسألج ليش تكرهينها قد جذي ..؟!
وصايف بقهر: قتلت امي .. قتلت الانسانه الوحيده بحياتي .. تيتمت بسببها .. تبهذلت بسببها .. اكرهــــــــــــــــها ..
طالع فارس فيها بصدمه .. ام اسيل قاتله .. مستحيل ابدا .. هذا شي ما يصدق .. اكيد السالفه فيها لبس ..
اسندت وصايف ظهرها عالمقعده وهي مازالت تطالع قدام ..
وصايف: ام اسيل كانت متزوجه من واحد بطران مرره .. هي بعد كانت بطرانه وبقوه .. بس مدري ليش سكنت في فيلا عاديه ينب بيتنا .. كانت ساكنه لوحدها مع بنتها اللي كان عمرها اقل سنتين .. راحت امي ورحت معاها عشان نزور الجاره اليديده .. استقبلتنا بكل حب وطيبه .. قوية علاقتها مع امي مرره وصاروا زي الاخوات .. امي لقيت لها شغل في المدرسه وصارت مدرسة ..
طالعت في فارس وقالت: صار صعب انها تروح المدرسه وتتركني لوحدي .. فحطتني عند سميه لين ترجع .. في البدايه كانت سميه تعاملني بطيبه .. بعدين تغيرت وصارت تطنشني .. وبعدين تغيرت وصارت تخاصمني على كل شي .. وبعدها صارت تضربني ..
رجعت تطالع قدام وقالت: بنتها في البدايه كنت اشوفها وبعدين اختفت فجأه .. مرت ثلاث سنوات ومعاملتها لي تزيد قسوه .. المشكله اني ما ادري ليش .. هددتني اني ما اقول لأمي .. كنت طفله عمري ست سنوات فسمعت كلامها وما قلت لأمي .. صارت امي كل ما يت تاخذني لبيتها ابجي واصارخ واقول ما ابي .. وكل ما سألتني ليش اتذكر تهديد سميه واقول مافي شي .. بعد فتره امي بدت تشك لأني كنت دايم ابجي وهاديه وماني حيويه زي دايم وفي يوم من الايام وهي تروشني انتبهت لأثر ضربه في ظهري .. فأنجنت وسألتني من فين هذي .. وقتها قلت لها كل شي ..
سكتت فتره بعدين قالت: راحت لبيت سميه وهي معصبه .. مدري شصار بينهم بس رجعت وهي معصبه وخاصمتني لأني ما علمتها من البدايه .. مر حول شهرين وعلاقتهم مقطوعه تقريبا .. بعدها اتصلت سميه على امي وقالت لها تعالي ابغاكي .. فراحت امي ورحت انا معاها .. يلست في الصاله وامي وسميه يالسين في الميلس يتكلمون .. بعد شوي بدأ الكلام بينهم يشتد وبدأ صوتهم يعلى .. وبعدها طلعت امي وهي تخاصم وسميه وراها تخاصم وتسب كمان .. وقفوا قدامي وكانوا يتخاصمون في مواضيع كثيره .. وبعدها صارخت سميه بهستريا و .....
دمعت عيونها غصب عنها وقالت: اخذت كاسه ينبها وضرب امي .. لا ما ضربتها .. قتلتها .. طاحت امي جدامي وهي تصارع الموت .. ماتت جدامي وسميه تضحك وتقول تستاهل .. طالعت فيني وقالت انتي كمان لازم تموتين .. هربت وتركت امي وراي .. هربت وانا خايفه من هالمتوحشه .. جريت على بيت ام عبدالله ودقيت الجرس بس محد رد ..
سكتت فتره وقالت: خلت موت امي يكون كأنه حادث .. حطتها وسط الطريج ويت سياره و.....
غمضت عيونها بقوه وهي تتخيل الموقف ..
وصايف: وبعدها يت عندي وهددتني اني ما اعلم احد .. واختفت .. ومن بعدها راحت واختفت عني ولا عاد شفتها ابدا .. قبل لا تموت امي وصتني اني اروح اعيش عند عمي الوحيد .. دخلت بيتنا واتصلت عليه وحكيت له السالفه بإختصار وانا ابجي .. قال شدخلني فيج وقفل التلفون في ويهي .. يلست في البيت لوحدي والخوف والرعب كانوا يعيشون معايا .. كان فيه حارس خاص لأمي اسمه امجد وهو اللي امي استأجرته عشان يقعد عندي لمن تروح المدرسه من بعد مشكلة سميه .. ياء عندي واخذني غصب عني من هذا البيت اللي في كل زاويه فيه اتذكر امي وابجي .. اخذي وسافر فيني لمدينة بعيده عن قطر وعشت حياتي هناك .. وعشان هذا الماضي صارت حياتي كلها اسود x اسود ..
طالع فارس فيها وهو مو مصدق ان اسيل الطيبه والحنونه والبريئه امها تكون قاتله وتكون سبب لتعاسة حياة انسانه .. ابدا مو مصدق .. مافي ام بالعالم تكون كذا ..
لفت وصايف عليه وقالت: فارس بليز قول الصج .. اسيل هذي مو اختك صح ..؟! ابي اعرف منها وين سميه ..
فارس: سوري بس اسيل اختي ..
وصايف: لا تجذب علي .. ا....
سكتت فجأه وقالت: فارس لحضه بقولك شي .. انت تقول ان اسيل اختي لأنها موجوده معاكم .. تذكرت شي .. امي كانت تخاصم سميه وقالت لها كيف ترمين بنتج .. هذا يعني ان سميه رمت بنتها .. اكيد ابوك رباها معاكم .. فارس اسأل ابوك .. لا لا تسأل ابوك .. اكيد انت عارف بس ما تبي تقولي عشان ما تخسر اختك صح ..؟!
فارس: للاسف اسيل اختي وانت غلطانه .. ومعي اوراق تثبت انها اختي وتؤامي كمان ..
وصايف بصراخ: مستحيــــــــــــــــل .. انت تجذب علي .. اسيل ماهي اختك فليش تجذب ..؟!
لف فارس على وصايف وطالع فيها فتره وقال: بسألج سؤال ..
وصايف: اسأل ..
فارس: انتي تقولين ان سميه رمت بنتها وان ابوي لقى البنت وانها اسيل صح ..؟!
وصايف: ايوه ..
فارس: انتي تبين تشوفين اسيل عشان تسألينها عن مجان سميه صح ..؟!
وصايف: ايوه ..
فارس: طيب نفرض ان هذي البنت هي اسيل من جد .. ابي اسألج هي كيف راح تعرف وين امها وهي تربت معانا ..؟!
طالعت وصايف فيه فتره وسكتت ..
فارس: اكيد تبين تعرفين عن مجان سميه عشان تنتقمين منها .. طيب اسيل ما تعرف وين مجان امها ..
سكتت وصايف وهي تطالع فيه فقال: انا اعرف ليش سكتي .. انتي تبين تنتقمين من سميه او من بنتها صح ..؟!
وصايف: ............................
فارس: اكيد ما راح تقولين صح لانج خايفه اني اقولج الجذب واقول ان اسيل اختي ..
طالعت وصايف فيه بعدين قالت: ايه .. ابي انتقم يا من سميه او من بنتها .. بغيت اقول هذا الشي من البدايه بس خفت انك تخاف على اسيل مني وتنكر انها بنت سميه .. بس اللحين انا متأكده وواثقه انها بنت سميه .. وراح اثبت انها بنت سميه حتى لو اضطريت اني آخذها للمستشفى يفحصونها ويثبتون من خلال التحاليل انها مالها تؤام ..
انصدم فارس وقال: نعــــــــــــم ..؟!
وصايف: ايه اسويها واثبت لأسيل وللعالم كلها انها بنت سميه مو اختك ولا من عائلتك اصلا .. اقدر اسوي هالشي فالافضل انك تقولها انت احسن عشان تتجنب المشاكل والفضايح ..
طالع فارس فيها وهو مازال تحت تأثير الصدمه .. من فين طلعت لهم هذي البنت اللي راح تخرب حياتهم وحياة اسيل ..
اللحين ايش بيقول .. في كل الحالتين راح تتأذى اسيل وتعرف حقيقتها وتنصدم ..
وصايف: انا انتضرك تتحجى ..
فارس بعصبيه: اسيل اختي فاهمه .. روحي دوري على بنت ثانيه تنتقمي منها مو اختي .. وإذا عالصوره فقد خلق من الشبه اربعين يا وصايف .. اختي ابعدي عنها وياويلج تقربي منها او تمسي شعره منها .. فاهمـــــــــــــه ..؟!
عصبت وصايف: جذاب جذاب .. اسيل هي سجى بنت سميه .. انت جذاب وايد .. اذا انت ما راح تتكلم .. انا بنفسي راح اثبت ذا الشي .. مستحيل اسكت وراح اطلع سميه وبنتها من تحت الارض فاهم .. اسيل حأثبت انها مو اختك ..
وشغلت السياره وحركتها بسرعه وبحركه مفاجئه وراحت عند المكان اللي كان فارس فيه ..
وقفت وقالت: تهديدك اللي قبل شوي ما يخوفني يا فارس .. انزل ..
طالع فارس فيها وقال: انتي مو متأكده .. لو كنتي متأكده ان اسيل هي بنت سميه جان انتقمتي من دون لا تسألين ان كانت هي اختي ولا لا .. وعشان تتأكدي قلتي انج راح تآخذيها المستشفى ..
اخذ اكياس العشا ونزل من السياره وقال بحده: للمره الاخيره اقول اسيل اختي وياويلج تآذيها ..
قفل باب السياره بقوه واتجه للبيت .. انفجع لمن شاف وصايف تحرك السياره بقوه وطلع صوت التفحيطه .. شكلها معصبه ..
راح للبيت وهو يفكر بكلام وصايف .. هذي البنت مجنونه وراح تسوي اللي في راسها ..
وقف قدام باب البيت وقال: لازم تعرف اسيل مين هي منا قبل لا تعرف من غيرنا ..
فتح الباب ودخل للحوش واتجه لباب البيت الداخلي .. فتحه وقفله وراه واستغرب من شكل ريما واسيل اللي يطالعون فيه بتفاجئ ..
ريما: فارس .. انت .. انت ييت ..؟!
نطت اسيل وحضنت فارس وهي تبكي وتقول: ليش .. ليش تأخرت جذي ..؟! والله خفنا عليك ..
بعدت عنه وقالت: هذي آخر مره .. والله بعدين انا بسوي الاكل وما راح تروح تييب من برى ..
ريما بخوف: وين كنت كل هذا الوقت يا فارس ..؟!
ابتسم وقال: هههه سوري قابلت رفيجي في الطريج واخذتنا السوالف ..
ريما بعصبيه: وليه ما ترد على موبايلج .. ما يصير تخلينا على اعصابنا وخايفين ..
فارس: ههههههههه آسف مادريت ان اخواتي يحبوني قد جذي هههه ..
اسيل: ها ها ها بايخه .. هات الاكل اصرفه ..
اخذت الكيس وراحت تجهزه في صحون عشان يتعشون ..
⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄ ◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄ ⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊
يوم الخميس والساعه تسعه الصباح .. كانت جالسه في الصاله وفي حضنها اللاب توب الاسود ..
فتحت على حسابها في الفيس بوك وطالعت فيه فتره بس طفشت وقفلته .. حاسه نفسها طفشانه وتبغى شي يشغلها ..
ففتحت على العاب وبدأت تلعب فيها .. كانت لعبة .. لعبة كوره .. اكيد بتكون لعبة كوره مادام انها بويه ..
حست بإستمتاع وهي تلعب .. فسرحت بخيالها .. آآآه لو تكون لاعبه في منتخب قطر وتتبارى ضد منتخبات عالميه وتفوز بالكأس ..
حط دقنها على ايدها وهي سرحانه تفكر في البطولات وتتخيل المعجبين والمعجبات وهم يشجعوا بأسمها ..
دخل محسن للصاله وابتسم وهو يشوف غيدا سرحانه ..
محسن في نفسه: "الاخت شكلها سرحانه في الاحلام الورديه .. لا الاحلام الورديه للبنات .. عيل هي سرحانه في الاحلام الزرقاء خخخخ" ..
قرب بهدوء منها لين صار وراها تماما ..
اخذ نفس بعدين صرخ بأعلى صوت عنده: غيــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــــــــــــــــــــــــــــــــــداااا ااااااااااااا ..
نطت غيدا من مكانها من الفجعه وطاح اللاب من حضنها ولفت ورى فشافت محسن فاطس ضحك عليها ..
عصبت ولفت تطالع في اللاب بخوف .. وحصل اللي ماكانت تتمناه يصير .. شاشة اللاب انكسرت ..
عصبت وبقوه وقالت بقهر: محسنـــــــــــــــــــــــــــــوووه يالجلــــــــــــــــــــــــــــب ..
محسن: هههههههههههههههه شكلج يضحك وانتي هههههههههه وانتي تنطين مفجوعه ههههههههههههههههههه ..
طالعت فيه ودمها فاير منه .. عقدتها في الحياة هو محسن .. جت عنده وهي ناويه شر ..
اول ما شافها جايه قام بسرعه وحط رجله وراح لغرفة الطعام وهي تلحق وراه ..
دخل وراح ورى ابوه وقال: ابوي غيدا بتضربني ..
دخلت غيدا وشافت كل العائله جالسين على طاولة الفطور .. لفت تطالع في محسن اللي واقف ورى ابوه ..
غيدا: ضربني وبجى سبقني واشتكى .. ابوي شف لمحسن شسوى ..؟!
الاب: شسوى ولدي محسن ..؟!
طالعت في محسن اللي يبتسم بإستهزاء .. هو دلوع ابوه ومستحيل يخاصمه ..
غيدا: كنت جالسه ع اللاب فياء من وراي وفجعني وطاح اللاب وانكسرت الشاشه ..
الاب ببرود: بس ..؟؟!! عبالي صلح شي جايد ..
غيدا بصدمه: ابــــــــــــــــوي ..
محسن: هههههههآاي تستاهلي ..
الام: محسن .. احنا ارسلناك تناديها مو تكسر اللاب عليها بصراخك ..
وقف محسن ومثل البراءه وهو يقول: انا ييت عندها وقلت غيدا اختي ترا الاهل ينتظرونج عالفطور بس هي ماردت .. فرفعت صوتي شوي وقلت غيدا امشي للفطور بس ماردت .. فرفعت صوتي اكثر وانا احاول انها تسمعني بس كمان ماردت .. فاضطريت اني اصرخ بأعلى صوتي .. اعرف ان هذا الامر غلط بس انا آسف وماراح اكررها ..
طالعت غيدا فيه بصدمه ..
معاذ: هههههههههههههههههه ..
الاب: شايفه كيف ان الغلط منج .. تتوقعين انسان مؤدب زي هذا يسويها .. ومع هذا يتأسف .. صج انج ما تستحقين اخو مثل محسن ..
ابتسم محسن ابتسامه كبيره شقت حلقه وهو يشوف غيدا تطالع في ابوه بصدمه ..
جلس محسن عالطاوله وقال: حبيبتي غيدا ايلسي وكلي .. الاكل حيبرد ..
غيدا بقهر: كل تبن ..
محسن: اوووه .. قويه .. انا شسويت يا اختي الحبيبه ..؟!
الاب: غيدا شذا الحجي .. اخوج يناديج عالاكل وانتي تسبيه زي جذي ..
غيدا: ابوي هو متقصد ينرفزني ..
محسن بإستنكار: انا .. انا يا غيدا ..؟! لا ما توقعتج تسيئين الضن فيني ..
الام: ايلسي يا غيدا وكلي .. اذا قام محسن وضربج قدامنا فراح يضل في عيون ابوه انه بريء وماسوى شي .. ايلسي وطنشي البزران ..
محسن: افا يمه .. انا بزر ..؟!
لف على ابوه وقال: ابوي .. امي تقول انا وانت بزران ..
الاب: طنش طنش .. حريم متخلفات ..
محسن: وانت الصاج ..
الام بحده: محســــــــــــــــن ..
محسن: ها يمه ..
الام: احترم نفسك وتأدب ..
محسن: طيب انا ما قلت شي .. هذا ابوي ..
الام: وانت تأيده ها ..؟!
محسن: شسوي .. هذا ابوي واخاف يضربني اذا ما ايدته ..
الاب: افا يا محسن .. تتخلى عني عشان امك ..
معاذ: محسن .. لو ظليت ساكت مو كان احسن ..؟!
محسن: وانت الصاج ..
غيدا تغير الموضوع: ابوي .. عندك شغل هذه الاجازه ..؟!
الاب: ايه .. بروح اعقد صفقه مع شركه برى الدوحه ..
غيدا: اووووووف .. وهذي الصفقه ما تتأجل ..؟!
الاب: ابدا ..
غاده: ابوي ما يصير جذي .. نبي نتمشى هذي الاجازه ..
مازن: الاجازه على بعضها كلها جم يوم .. وين تتمشون ..؟!
غيدا: اي مجان المهم نفتك من هالبيت ..
لفت غاده وقالت: عادي معاذ يمشينا ..
معاذ: قدمت طلب اجازه بس ما اعطوني .. يعني مشغول وما اقدر امشيكم إلا في فترة العصريه ..
غيدا: لاااااا .. ملييييت من البيت وابي اطلع منه اووووووف شذي العائله الممله ..
محسن: عادي .. اذا ما تبين هالعائله روحي سوق الحراج ودوري على عائله تناسبج .. الاسعار هناك خياليه وبتلقين بسرعه ..
غيدا: صج صج صج انك سخيييييف ..
محسن: هذا من ذوقج ..
الام: انا عندي مجان تتمشوا فيه ونسيت اقولكم عنه ..
غيدا: بجــــــــــــــــد ..؟!
غاده: وين ..؟!
مازن: يمه لا يكون سخيف ..؟!
محسن: ههههآاي البزارين متحمسين ..
لفت غيدا على محسن واكتفت بنظرة استحقار له وبعدين لفت على امها عشان تسألها وين بس تفاجأت من ضحك محسن ..
محسن: هههههههههههههههههههههههههههههههههههههههههههه والله وصارت تعرف تعطي نظرات هههههههه ..
طنشته وقالت: وين يمه ..؟!
الام: قبل امس اتصلت علي ام فيصل وقالت انها بتخرج مع اخو زوجها يقعدوا اربع ايام في مزرعه مفتوحه عالبحر وعزمتني معاها وانا وافقت .. شرايكم ..؟!
لف محسن يطالع في ردة فعل غيدا .. وضحك وهو يشوف نضرات غيدا لأمها ..
غيدا: يمه من صجك انا بروح مع المدعوه اسيل هذي .. اكيد تتغشمري صح ..؟!
غاده: لااااا ما نبغى .. ولدهم الكبير اكرهه .. قالي اول انج ولد وكرهته من بعدها ..
محسن: ابشري يا غاده .. انتي الولد السادس في العائله .. امي الله يهداها ما خلفت غير عيال .. مايد ومعاذ وبعدين المسماه بحمود وانا ومازن وانتي امممم وانتي مصلح ..
غاده: يعععع شذا .. الله يقرفك بهالاسم .. قول فهد احسن من مصلح ..
محسن: ههههههههه ومجهزه الاسم بعد ..
ضربت غيدا ايدها الطاوله وهي تقول: مستحيييل اروح مع اسيلووه .. مستواي مستحيل ينزل لمستواها .. اذا كنت صاجه يا يمه فأنا افضل جلسة البيت على الجلسه مع اسيل اربعــــــــــــــــه ايام ..
وكملت في نفسها: "واخوها هذاك اللي صفقني كف .. مستحيل انزل لمستواههم" ..
سكتت فتره بعدين قالت لنفسها: "اخوها .. ايه صح مو انا قلت اني برد الصاع صاعين .. شلون ارد له وانا ارفض اشوفه" ..
جلست وقالت: موافقه اروح ..
طالعوا فيها بصدمه من تغيرها المفاجئ ..
ابتسم الاب وقال: مو انا قلت ان الحريم متخلفات ..
محسن وهو فاغر في غيدا: وانت الصاج يا يبه ..
مازن: اختي غريبه وايد .. توقعت انج راح تعملي معركه بس سبحان مغير الاحوال ..
غاده: صج انج غريبه ..
اخذت التوست وقطعته نصين وهي تقول: شفيكم مستغربين .. محد يغير رايه .. ناس متخلفين ..
الام: حلو .. ريحتي حلجي من الصراخ عشان توافقين .. اول مره تصلحين شي حلو ..
حطت التوست في فمها وهي تقول لنفسها: "بس اسيل انا كارهه اشوفها .. ترفع ضغطي بكل شي .. حتى لمن ارفع ضغطها احس انها هي اللي رفعت ضغطي .. شلون بتحملها اربع ايام .. oh my God .. مستحيل اتحمل هالمليقه" ..
رمت النص الثاني في الصحن وقامت وهي تقول: مابي اروح .. روحوا لوحدكم وانا بقعد مع معاذ في البيت ..
وطلعت لغرفتها وهم فاغرين فيها ..
لف الاب على محسن وقال: اللحين يا محسن انا تأكدت ان الحريم متخلفات ..
محسن: وانت الصاج ..
لفت الام عليهم وقالت بعصبيه: وبعدين معكم انتم ..؟!
ابتسم محسن ابتسامة ترقيع وكمل الفطور ..
⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄ ◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄ ⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊
كانت دانا منسدحه عالسرير ترتاح بعد ما اعطوها مغذيات وابر عشان فقر الدم اللي عندها كان شديد جدا ..
كانت تسمع الاصوات حواليها يتكلمون بس ما فتحت عينها ولا هي قادره تفتحها .. حاسها بتخدر في كامل جسمها ..
الام: حسبي الله ونعم الوكيل ..
رهف: خلاص يا خالتي اهدأي .. ان شالله بالتقوم بالسلامه ..
الدكتور: اللحين هي تمام .. بس يبغالكم تنتبهوا على اكلها كثير .. الانيميا هذي يت من سوء التغذيه ..
الام: ايه والله من قبل الاختبارات وهي ما تاكل كويس .. ومعظم الاحيان تقول ما اشتهي ..
الدكتور: لا لا مرره مو زين لها .. لا تسمعون لها .. لازم تاكل وتتغذى غصب عنها .. اللحين نسبة الدم عندها هي 5 على 12 .. نسبه واطيه وايد واحتمال تدوخ في اي وقت ..
رهف: طيب ايش الاكلات اللي تنصحنا نأكلها ..؟!
الدكتور: كل الاكل المفيد .. ولازم تبعد عن المشروبات الغازيه لأنها تسبب اكبر ضرر لها .. والمأكولات السريعه والشوكولاته وانواع الحلويات كلها لازم تبتعد عنها .. ولازم تفطر الصباح .. الفطور هو اهم وجبه لها .. والاكل يكون مفيد واعطوها فواكه بين اللحين والآخر .. وانا راح اكتب لها فيتامينات وحديد تاكلها اللحين وبعدين نبدأ نعطيها ابر على فترات عشان ترجع زي اول ..
رهف: مشكور دكتور ..
الدكتور: العفو .. اهم شي الفطور تاكله والغازيات تبعد عنها ..
رهف: ان شالله ..
الدكتور: ياللا اترككم مع المريضه ..
خرج وقفل الباب وراه ..
الام: كله من عادل الله لا يوفقـ....
مسكت دانا ايد امها وقالت بضعف: لا تدعي عليه .. انا الغلطانه يمه ..
الام: صحيتي يا حبيبتي ..
رهف: سلامات دنو ..
دانا بإبتسامه وبتعب: الله يسلمج ..
رفعت رهف جوال دانا وقالت: من الصبح في واحد يدق عليج بس ما رديت ..
دانا: منو ..؟!
رهف: ريان ..
عقدت دانا حواجبها تفكر في السبب اللي يخليه يدق ..
الام: خلاص حبيبتي رهف .. تعبناج وايد معانا وتقدري تروحي البيت ..
رهف: هذي رفيجتي واذا ما تعبت معاها اتعب مع منو .. ورجعه للبيت ماني راجعه ابدا ..
الام: بس انتي من صباح الله خير معانا والساعه اللحين صارت ست المغرب ..
رهف: بقعد لين تصير بخير .. عندكم مانع ..؟!
ابتسمت دانا وقالت الام: لا يا حبيبتي .. بس اهلج اكيد قلقانين عليج ..
رهف: اهلي يعرفون اني هنا ومعطيني الحريه اني اقعد ..
الام: طيب ما معاج نوم ..؟!
رهف: خالتي انتي ليه مصره اني اروح البيت ..؟!
دانا: هههههه ..
الام: لا مو قصدي ..
رهف: اذا عندج سالفه مع دانا وما تبيني اسمع فقولي لو سمحتي يا رهف اطلعي برى شوي لين اخلص ..
الام: لا ما عندي ولا شي ..
رهف: ههههههههههههه اعرف .. ياللا خالتي انا بنزل تحت اشتري شي اكله .. تبيني اييب لج شي ..؟!
الام: لا ياحبيبتي تسلمي ..
رهف: وانتي يا دانا ..؟!
دانا: ابي شي اشربه ..
رهف: مثل ايش ..؟!
دانا: اي شي حتى لو كان بايسن ..
رفعت رهف حواجبها وقالت: بايسن ..؟! ما قد يربتي الجزمه على ويهج ..؟!
كحت دانا شوي وقالت: ههه لا .. بس ترى البايسن ما يأثر لأنهم توهم نقلولي دم ومغذي ..
رهف: تعرفي الحاشي ..؟! والله حتى لو اكلتي الحاشي ماراح تشربي بعده بايسن .. بايعه عمرج انتي ..؟! الدكتور قال ممنوع الغازيات وما قال اشربيها بعد الاكل ..
ابتسمت دانا وسكتت .. تمووت في البايسن بس بتحاول تتركه ..
رهف: بييب لج حليب المراعي اوكي ..
فتحت دانا عيونها وجت بتصارخ على رهف بس حست بالتعب في جسمها فسكتت ..
خرجت رهف من الغرفه ومشيت في الممر وقابلت في وجهها عادل خارج من المصعد ..
تفاجأت اول ما شافته بعدين ابتسمت بسخريه وقالت: اختك من امس في المستشفى وتوك تزورها ..؟!
طالع فيها ولف الكرسي لجهة غرفة دانا وهو مطنشها ..
مشيت رهف ووقفت قدامه وقالت: الناس يغلطوا والكل يسامح .. بس انت ما تعرف شنو يعني تسامح .. اختك اللي وصلها لهالحاله هو انــــــت يا استاذ عادل ..
عادل: ابعدي بمر ..
رهف: اوكي حأبعد .. بس تدري ان نسبة الدم عندها هي خمسه على 12 .. تعرف انها لو نقصة نسبتين كانت حتكون على مشارف الموت .. لا تستغرب .. انت عبالج انك جذي بتأدبها .. لا يا حبيبي انت يالس تدمرها .. طيب وبعدين .. بعد ما تزعل منها وش حتسوي ..؟! مافي في بالك شي .. انتبه هي اختك الوحيده وممكن تضيع منك وانت مجبس راسك ومسوي فيها انك زعلان ..
بعدت عن طريقه وقالت: واذا ضاعت ما تنفع كلمة ياليت ..
مر عادل من جنبها وراح لغرفة دانا ..
في غرفة دانا .. كانت دانا تطالع في السقف بسرحان والام جنبها جالسه تقرأ قرآن ..
لفت دانا بهدوء على امها وقالت: امي ..
الام: هلا حبيبتي ..
دانا: وين عادل ..؟!
تضايقت الام وقالت: حسبي الله ونـ....
مسكت دانا ايد امها وقالت: يمه مو انا قلت لا تدعين عليه .. والله انا الغلطانه وانا اللي لازم تدعين علي ..
الام: مشكلتج يا دانا انج طيبه وايد .. انا عارفه انج غلطانه على قولتج .. بس انتي اشوفج تعتذرين وهو ولا همه .. ما توقعت عادل يتغير جذي ..
دانا: يمه اعذريه .. انا غلطي وايد كبير ويمكن يكون عنده مشكله كمان لأني اشوفه دايم سرحان ويكلم بالموبايل ..
هزت الام راسها بأسف وهي تطالع في دانا ..
دانا: يمه انا صرت بخير وكمان رهف عندي .. يعني مو لازم تيلسين عندي .. روحي البيت اكيد عادل اللحين يوعان وما اكل ..
الام: خليه يتصرف .. الثلاجه مليانه اكل ..
دانا: بس حرام ييلس في البيت وحده .. يمه الله يوفقج روحي عنده البيت ..
طالعت الام في بنتها فتره بعدين قالت: خلاص لمن تيي رهف بخليها توصلني البيت ..
ابتسمت دانا وبعدين غمضت عيونها ترتاح ..
كان عادل واقف قدام باب الغرفه وساكت يفكر بعد ما سمع كلامهم .. بعد شوي دق الباب ودخل ..
عادل: السلام عليكم ..
فتحت دانا عيونها وطالعت فيه .. فرحت لمن شافته جاي ..
الام: عادل .. كيف ييت ..؟!
قفل الباب وقال: بالتاكسي ..
طالع في دانا وقال: كيفج ..؟!
ابتسمت وقالت: الحمد لله تمام ..
قرب الكرسي شوي وقال: اسمعي ..
دانا: نعم ..
عادل: لا تحسبي اني ياي عشان اطمئن عليج .. انت غلطانه لو ضنيتي جذي ..
اختفت الابتسامه عن وجه دانا وقالت بحزن: عيل عشان شنو ..؟!
عادل: انا بتكلم وما ابي احد يقاطعني ..
دانا: طيب ..
عادل: انتي بنفسج اعترفتي وقلتي ان خطأج كان كبير .. انتي غلطتي ولازم تتعاقبي .. طلعه من البيت ماكو .. روحه للجامعه ماكو .. موبايلج تعطيني اياه وتلفون البيت ما تلمسينه .. زيارات للبيت من رفيجاتج او اصحابج في الجامعه ماكو .. اذا فيه زواج او عزيمه ما تروحين .. حتى لو تعبتي نييب لج الدكتور للبيت .. تطالعين في التلفزيون ممنوع .. صحيح انه مافي دش بس ولو ممنوع تطالعين .. دريشة غرفتج ما تفتحيها وطلعه للحوش ماكو .. وهذا الامر راح يستمر لين يي نصيبج وتتزوجي وبعدين عاد بكيفج .. فاهمه ..؟!
طالعوا الام ودانا في عادل بصدمه ..
الام بعصبيه: شذا الحجي يا عادل ..؟!
نزلت دانا راسها وقالت: لو سويت هذا الشي راح تسامحني ..؟!
عادل: افكر ..
فسكتت وهي تجاهد دمعتها لا تنزل .. صح هي غلطت بس مو لهدرجه يسوي فيها كذا ..
هزت راسها وهي تقول لنفسها انها غلطت ولازم تتعاقب .. الشي اللي سواه عادل صح في رايها ..
بصراحه هو مو صح بس تحاول تقنع نفسها انه صح .. هذي هي مشكلتها .. اذا غلط الناس تدور لهم اعذار ..
طالع عادل فيها وقال: ما سمعت ردج ..
الام: دانا ماراح تسوي اللي قلته فاهم ..؟!
عادل: اذا ما سوته فأنا راح اتبرى منها ولا عاد بتكون اختي ابدا ..
رفعت دانا راسها تطالع في عادل وقالت: موافقه بس الجامعه ابي اروح لها .. ابي أأمن لك مستقبلك يا عادل ..
عادل: لا ..
فسكتت بعدين جت بتتكلم بس عادل اشر بإيده انها تسكت فسكتت ..
عادل بإبتسامه: افرضي ان الحجي اللي قلته قبل شوي كان صج .. يعني افرضي اني فعلا منعتج من كل شي .. وش بتكون نضرتج لي ..؟!
طالعت فيه ونزلت دموعها وهي تقول: حماااار ..
الام بعصبيه: صج انك سخيف .. اختك تعبانه وانت تستخف دمك ..
جاء عادل عند دانا وسلم عليها وقال: سلامات وانا فعلا آسف على كل شي ..
جلست بالصعوبه وحضنت اخوها وبكت وهي تقول: لا انا آسفه يا عادل .. والله ما اسوي شي من دون ما اقولك و.......
وما كملت كلامها لأنها كانت تبكي .. فتحت رهف باب الغرفه وجت بتدخل بس تراجعت لمن شافتهم ..
قفلت الباب وقالت بإبتسامه: اخس يا رهف .. والله كلامج يأثر .. المهم اللحين ان كل شي صار تمام ..
⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄ ◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄ ⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊
في الخور وعند عائلة طارق .. كانت سهام توها صاحيه من النوم ونزلت للصاله تدور طارق بس مالقيته ..
دخلت المطبخ وقالت: قوه يمه .. صباح الخير ..
الام: اي صباح الخير وانتي توج صاحيه .. شوفي الساعه جم ..
طلعت سهام جوالها وقالت: عشره ونص .. طيب الوقت بدري ..
الام: بدري في عينج ..
سهام: يووه يمه انا شسويت لج تخاصميني من صباح الله خير ..؟!
الام: الناس تصحى من الساعه تسعه او ثمانيه وانتي توج تصحين ..
سهام: يا سلام .. اللحين تخاصميني انا وطارق النايم فوق ما تخاصميه ..
الام: مالج شغل في طارق .. لو ينام لين الليل ما تدخلي ..
سهام: اووووف والله لاصحيه من النوم ..
وطلعت فوق وفتحت غرفته بقوه ..
كانت الغرفه مظلمه والستاير مقفله وثللللللللج .. كانت باررده مره وشكلها يجيب النوم والاسترخاء ..
سهام: ما شالله نايم ومستريح وانا اتلقى التهزيء .. لو ما سهرت معاه امس جان صحيت بدري وما تهزأت ..
جت عنده وسحبت البطانيه بقوه وتقول: طــــــــــــــــارق قوووووم ..
فتحت الشباك وطفت المكيف ونطت فوق السرير وهزت كتفه بقوه ..
سهام: طارق طارق قوم قوووم طارق ياللا قووم قوم قوم .. طارق بسرعه اصحى وقووم قووم يا طارق قوم ياطارق ياللا قوم ..
انزعج طارق وبعدها وهو يقول بعصبيه: ها .. ها .. ها ابعدي يالجلبه ..
رجعت تهز ظهره بقوه وتقول: قوم قووم الساعه عشره ونص ياللا قوم وبلا كسل قووووووم ..
جلس بعصبيه واخذ مخدته ورماها في وجهها وهو يقول: ابعــــــــــــــــدي يالجلبه قبل لا اراويــــــــــــــــج شغلج ..
سهام: ههههههه والله لازعجك ..
اخذ بطانيته وانسدح وحط البطانيه فوق راسه وهو يقول: طلعي وطفي الليت ..
قامت وفتحت التلفزيون وحطته على قناة فاضيه ورفعت الصوت لآخره وبعدين قلبت فجأه على قناة اغاني ودبكه ..
فز طارق من مكانه من الصوت المزعج اللي طلع فجأه ..
لف على سهام وقال بعصبيه: انتي اش اللي مسلطج علي .. طلعــــــــــــــــي برى قبل لا تندمي وطفي التلفزيون ..
سهام: ههههه والله ما اطلع إلا لمن تصحصح وتنزل ههههههههه ..
طارق بعصبيه: انا ترا ما العب معاج .. طلعي برى يالثوره ..
سهام: هههه ماكو شي اسمه ثوره .. انثى الثور هي البقره ههههه متخلف ..
فعلا عصب وتنرفز .. قام من فوق السرير وهو ناوي شر .. راح يأدبها عشان تبطل هالحركات ..
سهام: هههه عصب عصب ..
ونزلت بسرعه وهي تضحك ..
طارق من اعلى الدرج: سهــــــــــــــــاموه تعالي هني بسرعه ..
سهام وهي تحت وتمد لسانها: اذا فيك خير الحقني ..
طارق: سهامووه انا مو رايق لج .. تعالي قبل لأرمي الجزمه بويهج ..
سهام: ههههه طيب وين الجزمه ما اشوفها ..؟! ههههههه ..
طارق بعصبيه: سهاموه بتيين ولا لا .. انا ماني فايق لبزارين الآحقهم ..
سهام: وليه انا غبيه عشان ايي لحتفي بريلي ..؟!
زفر بعصبيه وغمض عيونه يهدي من نفسه وبعدين فتحها وقال: صج انج بزره ..
طلع ودخل غرفته .. اخذ منشفته ودخل الحمام يتروش ..
سهام: هههههه احمد ربي انه ما حطني في باله .. المهم اني ازعجته ..
طلعت الام من المطبخ وقال: سهاموه شذا الصراخ اللي سمعته قبل شوي ..؟!
سهام بتنهيده: ياذي السهاموه .. ابي اسمع كلمة سهام يا جماعه .. ارحموني ولبوا رغبتي ..
الام: اتوقع اني سألتج فياوبي ..
سهام: هذا ولدج الله يهديه .. يخاصمني ويضربني وانا ما سويت شي ..
الام: جذابه .. مستحيل تكونين بريئه ..
سهام: من جد يا امي .. قال والله لا اضربج مثل ما ضربتيني في الحلم ..
عقدت الام حواجبها وقالت بصوت منخفض: شصار لعقل طارق ..؟!
بعدين رفعت صوتها وقالت: تستاهلين .. مين قالج تضربينه ..؟!
فتحت سهام عيونها بدهشه وقالت: امي من صجك تتحجين ..؟!
الام: ايه .. وياللا قولي لأخوج يي يتريق لأن الريوق جاهز ..
سهام بخوف: ها .. لا لا وقت ثاني .. اقصد انا بحط الريوق عالطاوله وانتي ناديه ..
الام: اقول نادي اخوج وبلا هذره زايده ..
ودخلت داخل .. تنهدت سهام وطالعت فوق ..
سهام: الله يستر .. ان شالله ما يكون معصب ..
طلع الدرج وكان باب غرفته مفتوحه شوي ..
دقت الباب بهدوء وقالت: طارق ممكن ادخل ..
طارق: شذا الادب اللي هل عليج فجأه ..؟!
فتحت الباب ودخلت وكان لابس بنطلون بس وينشف شعره بالمنشفه ..
سهام بإبتسامه: نعيما ..
اخذ طارق قميص رصاصي ووقف قدام المرايه وهو يقفل الازارير وقال: لو عدتيها قسم بالله راح تشوفين يوم اسود .. فاهمه ..؟!
سهام: من عيوني وهذي آخر مره ..
طارق: مثل البزارين .. قدامي تسوين انج البنت المؤدبه ولمن تبعدين تقعدين تهددين وتنرفزين .. شكنتي تبين ..؟!
سهام: امي تقول الريوق جاهز ..
لبس ساعته واتجه للباب وهو يقول: لا تنزلين قبل لا ترتبين غرفتي ..
لف عليها وقال بحده قبل لا ترد: مابي اعتراض ..
سهام: حـ حاضر ..
ابتسم وبعدين خرج من الغرفه ونزل تحت ..
راح لعند طاولة الاكل وشاف امه توها تجلس ..
سلم على راسها وقال: قوه امي ..
الام: الله يقويك ..
جلس وقال: اكيد انتي اللي سويتي الريوق ..
الام: طبعا .. مو اختك اللي صحيت متأخر اليوم ..
طالع طارق في امه بعدين ابتسم وقال: الساعه عشره اسمها متأخر ..؟!
الام: ايه ..
طارق بصوت منخفض: احمد ربي اني ما ادرس هنا ..
الام: شقلت ..؟!
طارق: لا لا انا اقول الله يهداها سهام المفروض تصحى بدري ..
الام: ايه فعلا .. الا هي وينها اللحين ..؟!
طارق: انتي اتريقي ولا تهتمي فيها ..
فبدأت الام تاكل وقالت: كيف الجامعات في الدوحه ..؟!
طارق: تمام ..
الام: والله ما ودي انك تدرس هناك بس وش اسوي .. الجامعات هنا مليانه وكمان يمدحون جامعات الدوحه مره ..
طارق: خلاص كلها سنه ونص وارجع هنا ..
دخلت سهام وشهقت وهي تشوفهم ياكلون ..
سهام: نذااااالــــــــه .. ليه ما تنتظروني ..؟!
طالع طارق فيها وقال: انا اللي قلت خلنا ناكل ونطنشج .. عندج مانع ..؟!
ابتسمت وقالت: لا اكيد ما عندي ..
جلست وبدأت تاكل ..
الام: طيب انت مرتاح هناك ..؟!
طارق: الحمد لله مرتاح وايد ..
سهام: طارق كيف جامعتكم هناك ..؟!
طارق: حلوه وكبيره و......
سهام: لااااااا انا اقصد الطلبه اللي فيها .. يعني جم عدد اصحابك ..؟! ومين الناس اللي تهاوشت معاهم ..؟! والكافتيريا زحمه ولا لا ..؟! ومين من الطلبه الله تكرههم ..؟! وجم عدد الدكاتره المليقين ..؟! و ابي اعرف جامعتكم هاديه ولا فيها مشاكل ومضاربات واكشن ..؟! ياوب ..
طارق: تصدقي اني بشر ..
سهام: اكيد بشر .. تستخف دمك ..
طارق: حلو انج تعرفين اني بشر ومو آله عشان ارد على هالكم الهائل من الاسئله .. اسألي سؤال سؤال عشان اقدر اياوب ..
سهام: اوووف طيب .. الجامعه اكشن ولا دراما ولا رومنسيه ..؟!
طارق: لا مرعب ..
سهام: ها ها بايخه ..
طارق: ما البايخ إلا انتي واسئلتج .. هذي جامعه مو فلم ..
سهام: انا اقصد هل جامعتكم فيها مضاربات ومقاتلات ولا هاديه وحزينه وكئيبه ولا فيها حركات ورومنسيه وحب ..
طارق: اتوقع ان فيها اشباح ودماء .. سهــــــــــــــــام اسألي عدل عشان اياوب عدل ..
سهام: اووووف طيب جامعتكم من اي نوع ..؟!
طارق: اتوقع انه من نوع الحرير او القطن .. ما اتذكر صراحتا ..
سهام: طــــــــــــــــارق انا سألت عدل فياوب عدل رجاءا ..
لف على امه وقال: امي .. شخبار عمتي ام لمياء ..؟!
فغمزت سهام وقالت: عمتى ولا لمياء ..؟!
طالع طارق فيها وقال: سهام ان ما سكتي وبطلتي هالحركات ما تلومين إلا نفسج ..
فسكتت سهام لأنه باين عليه عصب ..
الام: الحمد لله تمام واولاد عمتك كلهم بخير و ..... اووووه حلو اني تذكرت ..
طارق: شنو اللي تذكرتيه ..؟!
الام: من اسبوعين كنت انتضرك تيي عشان اقولك عليه .. هذي امانه وابيك تساعدني ..
استغرب طارق وقال: شقصدج ..؟!
الام: سهام وين الضرف اللي اعطيتج اياه قبل اسبوعين وقلت لج ارفعيه ..
سهام بإبتسامه: واااو .. قلتي سهام وما قلتي سهاموه ..
الام بعصبيه: سهــــــــــــــــاموه وويع وين الضرف ..؟!
سهام: اووف ما اكتملت فرحتي ..
بعدين سكتت وقالت: اي ضرف ..؟!
الام: سهاموه لا تهبلين فيني .. الضرف اللي اعطيتج وقلت ارفعيه لين يي طارق وبعدين اعطيني اياه .. وينه ..؟!
سهام بإستغراب: بس انا ما اتذكر انج اعطيتيني اي ضرف ..
فأندهشت الام وقالت: الضرف البني اللي فيه اوراق تخص عمك .. الضرف هذاك وايد مهم وقلتلج احفضيه ولا تضيعيه .. تذكري وين حطيتيه ..
سكتت سهام وهي عاقده حواجبها تفكر وامها تنتظرها تتذكر .. وطارق يطالع فيهم مستغرب ..
طارق في نفسه: "عن اي ضرف يتكلمون وليش هو مهم .. وكمان عمي مات من فتره طويله فكيف تكون الاوراق تخص عمي" ..
سهام: ايييه صح تذكرت .. الضرف اللي قلت بقرا اللي فيه بس خاصمتيني وقلتي لا تلمسينه ابدا ..
الام بإرتياح: ايه هو .. واخيرا .. طيب قومي ييبيه ..
سهام بإبتسامه: بس ما اذكر وين حطيته ..
الام: ايــــــــــــــــش ..؟!!
سهام: اعطيني فرصه افكر اليوم وادور عنه واكيد بلقاه ..
الام: الشرهه مو عليج .. الشرهه على اللي يعطيج شي تحفضينه عندج ..
طارق: امي ..
الام: نعم ..
طارق: الضرف هذاك شفيه ..؟!
الام: خل اولا الست سهاموه تلقاه وبعدين اوريك الاوراق والاثباتات واقولك ..
عقد حواجبه .. اوراق واثباتات .. شي غريب ..
الام: وانتي بسرعه كلي وروحي دوري عالضرف في كل مجان .. لج فرصه لين باجر وإذا مالقيتيه ياويلج مني ..
سهام: حاضر ..
الام: بسرعه ابلعي وخلصينا ..
قام طارق وقال: الحمد لله شبعت .. ياللا انا رايح ..
سهام: وين رايح ..؟!
طارق: يلعن ام اللقافه ..
سهام: لا بجد وين بتروح ..؟!
طارق: بروح غرفتي ..
سهام: بايخ .. عبالي بيروح مجان حماس ..
طارق: ههههههه ..
طلع فوق وراح لغرفته ..
اما سهام فأكلت بسرعه وبعدين بدأت تدور على الضرف ..
⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄ ◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄ ⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊
على اراضي امريكا الشماليه .. وفي كندا بالتحديد ..
كان فيصل يمشي مع رينا رايحين يلقوا نضره اخيره على البضاعه قبل لا يشحنونها بطائرة نقل البضائع اليوم ..
رينا: استاذ فيصل ..
فيصل: نعم ..
رينا: اشتقت لأهلك ..؟!
فيصل: اكيد ..
رينا: حتى انا لمن اصلح شغل في اي دوله غير دولتي اشتاق لأهلي ..
فسكت فيصل لأنه ما عنده رد لكلامها ..
رينا: هذي الشحنه اللي بنشحنها اليوم تعتبر قليله مقارنه باللي بنشحنها الشهر الجاي ..
فهز فيصل راسه وهو يفكر في الشحنه الجايه .. لأن الشحنه الجايه بتكون كبيره وبتكون هذي الشحنه هي نهاية شغلهم مع هذي الشركه ..
ابتسم وهو عارف ان الشحنه الجايه راح تودي شركة نوسترادا في ستين الف يوم اسود .. لأن رئيسه ناوي ينتقم من شي صار اول ..
فيصل: وصلنا ..
راحوا عند البضائع واعطوا لها نضره اخيره وتأكدوا ان كل شي تمام وانه محد راح يشك في امرها ..
رينا: كذا كل شي تمام ..
لفت على واحد من العمال وقالت بالانجليزي: هل تعرضت البضاعه للتفتيش ..؟!
العامل: كلا فهم لم يشكوا فيها ابدا ..
رينا: رائع ..
لفت على فيصل وانتبهت انه سرحان ..
رينا: فيصل ايش فيك ..؟!
اشر فيصل براسه على واحد من رجال الامن وقال: باين من نضرات هالعسكري انه شاك بشي ..
طالعت رينا بعدين قالت: لا تطالع فيه وخلك طبيعي عشان ما يشك ..
هز فيصل راسه وبعد شوي عشان يتصل ويطمن رئيسه ان البضاعه راح تقلع اللحين ..
اتصل عليه .. كان سعد في هالوقت جالس على الطاوله الكبيره ويتغدى ..
جا عنده واحد من الخدم واعطاه الجوال وهو يقول: تفضل يا سيدي ..
استغرب سعد .. مين الرايق اللي بيدق عليه في الظهر ..
اخذ الجوال ورد بصوته الجهوري: الو ..
فيصل: الو .. اهلا ..
الرئيس بإبتسامه: اهلين .. كيفك ..؟!
فيصل: تمام .. اسف لو ازعجتك ..
الرئيس: لا لا عادي ..
فيصل: بغيت اقول اننا شحنا البضاعه وصحيح هم فتشوها امس بس كان التفتيش سطحي جدا ..
الرئيس: يعني كل شي تمام ..؟!
فيصل: ايوه ..
الرئيس: حلو .. ومتى بتتحرك الطائره ..؟!
فيصل: بعد نص ساعه ..
الرئيس: وانت ..؟!
فيصل: طيارتي بعد ساعتين ..
الرئيس: اوكي تمام .. انا اللحين برسل ناس يكون في استقبالك في المطار وفي استقبال البضاعه ..
فيصل: اوكي ..
الرئيس: تبي شي ثاني ..
فيصل: لا ..
الرئيس: عيل مع السلامه ..
فيصل: مع السلامه ..
قفل فيصل جواله ..
رينا: فيصل ..
لف وقال: هلا ..
رينا: متى موعد طيارتك ..؟!
فيصل: بعد ساعتين تقريبا ..
رينا: طيب انا راجعه .. بترجع معاي ترتاح قبل موعد الطياره ولا بتقعد ..؟!
فيصل: لا بقعد لين تقلع الطياره ..
رينا: هههه تبغى تطمن ..
فيصل: ...........................
رينا: خلاص انا بنتظر معاك ..
فيصل: لا مو لازم .. روحي ارتاحي ..
رينا: بس انا مو تعبانه ..
فيصل: بكيفج ..؟!
رينا: شخبار رئيسك ..؟!
فيصل: تمام ..
رينا: جوزيف نفسه يقابله ..
فيصل: طيب ليه ما يي جوزيف عندنا في الخليج عشان يقابله ..؟!
رينا: يوووه مشوار ..
فيصل: شركتكم كسوله ..
رينا: هههه مو لهدرجه ..
فيصل: اصلا رئيسي يمكن يزوركم ..
رينا: متى ..؟!
فيصل بنفسه: "وانتم في السجن" ..
فيصل: ما ادري ..
رينا: واحنا بننتضره ..
فيصل: اكيد بتنتضرونه ..
فحس بإيد على كتفه ..
.........: لو سمحت ..
لف وشاف شرطي امن ..
فيصل: اهلا ..
العسكري: آسف للازعاج ولكننا نريد تفتيش البضاعه ..
اخفى فيصل ارتباكه وهو يقول: لكن البضاعه قد تفتشت ..
العسكري: اعلم ولكننا نريد تفتيشها مرة اخرى ..
فيصل: ولكن موعد اقلاع الطائره بعد اقل من نصف ساعه ..
العسكري: سنفتشها قبل اقلاعها ..
فيصل: وهل لديك امر تفتيش ..؟!
العسكري: اجل لدي .. ولدي لجنة مختصه كامله ستقوم بالتفتيش الدقيق ..
حس فيصل بالخوف وبقوه .. كل شي حينكشف .. كل شي حينكشف ..
انتهــــــــــــــــى الجــــــــــــــــزء الاخيــــــــــــــــر من البــــــــــــــــارت الســــــــــــــــادس ..
اشوفكم ان شالله في البارت السابع في جزئه الاول ..
+توقعاتكم عن وصايف .. هل راح تنفذ تهديدها ..؟!
+علاقة آرثر واسيل متى راح ينتهي هالأمر ..؟!
+ريما هل من جد راح تعالج نفسها ولا ما بتقدر ..؟!
+وايش هالشي المهم الموجود في الضرف حق ام طارق ..؟!
+وتوقعاتكم عن حالة سامي الآن وفي المستقبل ..؟!
+وغيدا هل راح تروح مع امها او بتقعد مع معاذ ..؟!
+وآخر شي توقعاتكم عن فيصل والبضاعه المشبوهه ..؟!
ابيكم تجاوبون بما ان الاحداث قربت تنتهي ..
امزح بس ابيكم تجاوبون عنها ..
وايش هو احلى مقطع اعجبكم بالبارت ..؟؟!!
صديقتكم واختكم :: صرخة المشتاقه :: ..
|$[ نهاية البآرت ]$|
__________________  |