|
|$[ البآرت السابع الجزء الاول ]$|
فيصل: ولكن موعد اقلاع الطائره بعد اقل من نصف ساعه ..
العسكري: سنفتشها قبل اقلاعها ..
فيصل: وهل لديك امر تفتيش ..؟!
العسكري: اجل لدي .. ولدي لجنة مختصه كامله ستقوم بالتفتيش الدقيق ..
حس فيصل بالخوف وبقوه .. كل شي حينكشف .. كل شي حينكشف ..
رينا: لكنه لم يعد هناك وقت للتفتيش ..
العسكري: سنأخر الطائره ان لم ننتهي من التفتيش .. ولكن اطمئنا لأن الطائره لن تطير ابدا ..
عض فيصل على شفته لأن العسكري مو شاك .. العسكري واثق ..
رينا: ارني امر التفتيش ..
اعطاها الورقه وهي تقرا بعدين قالت: لما لم تفتشوا منذ البدايه ..؟!
العسكري: لقد فتشنا ولكننا ......
رينا: انتضر ..
اخذ جوالها واتصلت على رقم وبعدين بدأت تتكلم كلام فرنسي .. العسكري وفيصل ما فهموه ..
قفلت وقالت: اكمل كلامك ..
العسكري: لقد قمنا بالتفتيش لكنه لم يكن دقيق ..
رينا: اذا انه ليس خطئنا بل خطأكم ..
العسكري: مهما يكن .. لقد امرنا بالتفتيش وسنقوم بالتفتيش ..
رينا: ولما جاء هذا الامر فجأه ..؟!
العسكري: لانه جائنا بلاغ بوجود مواد ممنوعه في البضاعه ..
رينا: اتعلم ان هذا الاتهام خطير .. ان شركة نوسترادا هي اعظم شركه في كندا وشركة سعد هي اعظم شركة في قطر .. ان كان اتهامكم خاطئ فنحن لن نسكت وسنقوم بسجنكم .. اتعلم هذا ..؟!
العسكري: نعم اعلم .. لكننا واثقين من وجود مواد ممنوعه ..
رينا: ستعرض نفسك للسجن .. ارجو ان تعيد التفكير في الامر ..
العسكري: انني واثق يا آنسه ..
رينا: اتصل برئيسك وأخبره بالكلام الذي قلته .. بالتأكيد سيكون اعقل منك وسيترك امر التفتيش لأن فيه مخاطره كبيره جدا بحياتكم .. فنحن نمثل اعظم شركات في العالم تقريبا ..
العسكري: حسنا سأكلمه ولكن كوني على ثقه انه لن يتراجع عن التفتيش ..
اشرت بأصبعها وراها وهي تقول: هيا اذهب وكلمه ..
مشي لناحية اللي اشرت عليها وهو يدق على رئيسه ..
فيصل: رينا ما راح يمشي عليهم هذا الشي ..
رينا: اعرف .. بس انت اصبر شوي وراح تشوف دهاء وذكاء اصحاب شركة نوسترادا ..
فسكت فيصل وطلع جواله يدق على رئيسه ويقوله باللي صار ..
بس محد رد ..
بعد سبع دقايق جاء العسكري ..
العسكري: لقد قلت لك انه لن يتراجع .. وكلامك هذا لا داعي له لأنها حركه قديمه يستخدمها المجرمون لأخافة العسكر ..
رينا: ماذا ..؟! هههههههه لقد اضحكتني .. اذا انتم تعتقدون اننا نحاول اخافتكم .. اهذا جزائنا اننا نريد مصلحتكم ..
العسكري: سيتضح كل شي الآن .. ولكني اريد ان اعرف من هو الشخص اللذي اتصلتي عليه قبل قليل ..
طلعت جوالها واعطته وهي تقول: انه اخي .. خذ وفتش كي تتأكد ..
اخذ الجوال وضغط فيه وهو يقول: ماذا كنتي تقولين له ..؟!
رينا: اقول له لا تنتضروني على طعام الافطار لاني سأتخر .. وقلت ان كنتم تريدونني فستجدونني في مركز الشرطه لأني سأقدم بلاغا ضد اناس اهانوا سمعتنا ..
رجع لها الجوال وقال: لا تكوني واثقة الى هذي الدرجه يا آنسه ..
رفعت حاجبها ومشت وهي تقول: اذا الحق بي لنذهب إلى الطائره ..
طالع فيصل في رينا وهو مستغرب .. صحيح الشحنه رايحه لقطر بس شركتهم لها يد .. كيف بتروح وتورط شركتها كمان ..
فمشي وراها يشوف شتقصد .. والعسكري كان ماسك جهازه وينادي اللجنه اللي بتفتش ..
وصلت رينا للطائره وقالت: فتش ..
طالع في الطياره وقال: امتأكده انها هي الطائره نفسها ..؟!
رينا بإستهزاء: لا فلقد قمت بإستبدال الطائرات ..
نادت العامل المختص واخذت الاوراق منه واعطته العسكري عشان يتأكد انها نفس الطياره ونفس البضاعه ..
طالع العسكري في الاوراق بعدين امرهم يبدأون يفتشون .. فبدأوا يفتشون ..
فيصل يطالع فيهم ويطالع في رينا اللي تطالعهم بإبتسامه .. هو متأكد ان رينا سوت شي بس مو فاهم هالشي اللي سوته ..
مشيت رينا ووقفت جنب فيصل وقالت: الشرطة اغبياء ..
فيصل: رينا شسويتي بالضبط ..؟!
رينا: ابتسم ولا تظهر التوتر ..
فيصل: طيب انتي شسويتي ..؟!
رينا: طالع يمين شوي ..
طالع وقال: مافي غير طيارات وامن و......
رينا: اقصد طالع جنب الطياره اللي يفتشونها ..
طالع وقال: فيه طياره فاضيه ..
هزت راسها وقالت: مو فاضيه .. هذيك هي طيارتنا ومقفله واللي يشوفها يقول فاضيه ومو مستعمله ..
فيصل: والطياره اللي يفتشونها ..؟!
رينا: طياره وهميه .. اتصلت بواحد من العمال وامرته انه يعبي الطياره اللي جنب طيارتنا بأثاث وغيره .. واللحين هذا الشرطي الغبي يحسب نفسه انه يفتش الطياره الصحيحه ..
فيصل: بس كيف ما انتبه ان الاوراق ما تخص هذي الطياره ..؟!
رينا: الثقه .. انت اظهر الثقه ومحد راح يشك .. لمن شافني واثقه ما انتبه لأنه قرا الاوراق على سريع .. ولمن شافني واثقه ما اخذ الرقم عشان يتأكد اني كنت اكلم اخوي .. واللحين لو ما لقى شي فراح يستسلم لأنه شافني واثقه انه مافي شي ..
ابتسم فيصل .. هالاجانب عليهم ذكاء مو طبيعي ..
فسكت وهو يفكر .. اذا هم بهذا الذكاء فصعب انه يضحك عليهم في الصفقه الجايه ..
جاء العسكري وقال بإبتسامه: نحن آسفون يا آنسه .. يبدو ان البلاغ كان كاذبا ..
رينا: ماذا .. آسفون .. اني لا اسمع .. الم احذركم ان لا تشكوا في شركتنا .. الم احذركم وقلت انكم ستدخلون السجن ..؟!
العسكري: اعلم هذا ولكن نتأسف ونرجوا ان نغلق هذا الموضوع لأنه لن يتكرر ..
رينا: ههههههههآآآي آسفه .. امش امامي .. لن اسكت حتى ارد كرامة الشركتين ..
لفت على فيصل وقالت: يمكنك ان تذهب انت يا استاذ فيصل ..
طالع فيصل فيها وهي تكلم الشرطي والشرطي يحاول يهدأ الوضع ..
فمشي فيصل عند العامل وقاله انه يقلع بالطياره بعد ما تأكد ان رينا راحت هي والشرطه ..
طارت الطياره اللي كانت فيها بعض الاسلحه واتجهت لقطر ..
تنهد واخذ جواله واتصل على رئيسه .. بعد فتره رد وحكى له كل شي صار ..
بعد ما خلص راح للفندق يريح قبل موعد طيارته ..
⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄ ◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄ ⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊
بعد صلاة العصر بشوي كانت اسيل جالسه على طرف السرير وتربط حبل جزمتها ..
ابوها اذن لها انها تروح النادي مع صاحباتها .. واللحين هي تتجهز عشان بعد شوي بتمر عليها سارا ..
رفعت راسها بإستغراب ولفت ناحية الشباك ..
اسيل: انا متأكده اني سمعت صوت ..
طالعت في الشباك فتره فشافت حجره تصقع في الشباك وتطيح ..
جت اسيل وفتحت الشباك وطالعت تحت تشوف مين اللي يرمي حجار ..
...........: طالعي جدام يالخبله ..
رفعت اسيل راسها فشافت وحده متكيه على شباك المقابل لشباكها والفرق بينهم 3 متر .. واول ما لاحضت الشعر الاحمر الناري عرفتها ..
اسيل: غيدا ..؟!!!
غيدا: لا امها ..
اسيل: شتبين راميه الحجر على دريشتي ..؟!
غيدا: اطمئني مابي اشوف خشتج .. ابي اسأل سؤال وابيج تياوبين ..
اسيل: اياوب بصفتج مين ..؟!
غيدا بعصبيه: اسيلوه لا تنرفزيني لأني حدي متنرفزه ..
اسيل: ومين اللي نرفزج يا حبيبة الماما ..؟!
رفعت غيدا حاجبها بعصبيه بس ضبطت نفسها وقالت بلا مبالاه: سمعت ان امج يت عند امي تترجاها نروح معكم لمزرعة عمكم .. صحيح هذا الحجي ولا لا ..؟!
اسيل بصدمه: انتي بتيين معنا ..؟!
بعدين عصبت وقالت: رجاءا احترمي نفسج لأن امي ما ترجت امج يالجذابه ..
غيدا: بس هذا اللي سمعته ..
ابتسمت اسيل وقالت: ايه امي صلحت مثل ما صلحت امج لمن عزمتها لزواج ولد خالج .. انا ماسمعت بس شفت امج وهي تترجى امي لدرجة انها بغت تبوس ريل امي بس امي منعتها ..
ورفعت حاجبها بطريقه مستفزه وهي تطالع في غيدا اللي تغلي من العصبيه ..
غيدا وهي ضاغطه على اسنانها: انتي حقققققيره ..
اسيل: طالعه على بنت ييراننا ..
غيدا: اوكي .. عارفه ان كلامج جذب وتبين تنرفزيني وبس .. المهم ابي اعرف انتي بتروحين ولا لا ..؟!
هزت كتفها وقالت: شي طبيعي بروح لأنه عمي مو واحد غريب عشان اقط نفسي ..
غيدا: ومين قال اني بروح يالخبله ..؟! انتم مو من مقامي عشان اروح معكم ..
اسيل: خسسآآآره .. كان بودي انج تشرفينا يا آنسه غيدا ..
غيدا: لو سمحتي اسمي حمود مو غيدا ..
اسيل: اوكي اوكي براحتج يا .. يا حمووود ..
غيدا: ايوه يا شطوره .. لا عاد تغلطي ..
اسيل: من عيوني حبيبتي .. تامرين على شي ثاني ..؟!
غيدا: لا شكرا .. بس نسيت شي ..
اسيل: شنو يا حمود ..
غيدا: اهلي مصرين اني ايي بس انا رفضت لأن برستيجي ما يسمح .. حبيت اقولج انج لو شفتيني فأعرفي اني ييت وانا حدددي متقرفه منكم وما ييت إلا عشان خاطر اهلي .. اوكي ..
اسيل: آآها .. اختصري وقول انج مغصوبه يا حموده ..
غيدا بعصبيه: تخسين .. انا ما انغصب .. وخذيها كلمه مني اني ماني يايه .. باااااااااااااي ..
وقفلت الشباك بعصبيه .. ابتسمت اسيل وقفلت شباكها ..
اسيل: ان شالله ما تيي لأني مو ناقصتها هي ومشاكلها .. اوووف ..
بعد ما خلصت نزلت تحت الصاله وشافت فارس على اللاب ..
جلست وقالت: ايش تسوي ..؟!
فارس وهو مندمج: لقافه ..
اسيل: وين ريما ..؟!
فارس: مدري ..
فأخذت الريموت تقلب في التلفزيون ..
دق جوال فارس .. فأخذه وشاف الرقم غريب .. استغرب ورد ..
فارس: الو ..
المتصل: الو .. انت فارس ..؟!
فارس: ايوه .. منو وياي ..؟!
المتصل: انا الدكتوره جاسيكا .. دكتوره عندكم في الجامعه ..
فارس: اهلا ..
د.جاسيكا: اهلين كيفك ..؟!
فارس: تمام ..
د.جاسيكا: اكيد مستغرب من اتصالي ..
فارس: ايه ..
د.جاسيكا: صراحتا ابي منك رقم اختك اسيل ..
فارس بإستغراب: اسيل ..؟!
لفت اسيل تطالع فيه .. فقام فارس وخرج الحوش ..
فارس: ليش ..؟!
د.جاسيكا: بغيته في امر خصوصي ..
فارس: صحيح انج دكتوره عندنا بس اللي اعرفه انج ما تدرسين اسيل فايش تبين برقمها ..؟!
د.جاسيكا: طيب انت قولها ان الدكتوره التركيه جاسيكا تبغى رقمج وهي ماراح تمانع ..
فارس: طيب انتي شعرفج فيها ..؟!
د.جاسيكا: صراحتا انا ما اعرفها وهي ما تعرفني..
فارس: عيل ليه تبينها وانتي ما تعرفيها ..؟!
د.جاسيكا: انا ام آرثر وفي مشكله بينها وبين ولدي وابي احلها ..
فارس: اها ..
د.جاسيكا: لهذا السبب انا ابي رقمها عشان انهي الامر ..
سكت فارس شوي بعدين قال: طيب اوكي انا برسل لج الرقم ..
د.جاسيكا: مشكور حبيبي ..
فارس: العفو ..
د.جاسيكا: مع السلامه ..
فارس: مع السلامه ..
قفل وهو يتذكر آرثر لمن قابلوه ذاك اليوم .. كلامه كان يؤكد ان آرثر يحبها ..
فارس: طيب اسيل هي كمان تحبه ولا لا ..؟!
دخل البيت وهو يرسل الرقم برساله وبعدين رجع عاللاب ..
اسيل: مين كلمك ..؟!
فارس: لا تستعيلين على رزقج .. شوي وبيتصل فيج ..
استغربت ودق جوالها ..
اسيل: هههههه اكيد هذا الرزق اللي تتحجى عنه ..
اخذت جوالها وابتسمت وردت ..
اسيل: هلا سارونه ..
سارا: اهلين كيفج ..؟!
اسيل: تمام ..
سارا: انا عند الباب ..
اسيل: دقايق واكون عندج ..
سارا: بسرعه .. باااي ..
اسيل: هههه باي ..
قفلت جوالها وقالت: بروح ..
فارس: متى بترجعين ..؟!
اسيل: يمكن اتعشى هناك ..
فارس: انتبهي لنفسج ..
اسيل: اكيد .. باااايو ..
فارس: باااي ..
خرجت من البيت وشافت سيارة سارا واقفه .. دخلت وركبت جنب سارا ..
اسيل: هااي ..
سارا: ما شالله سريعه ..
اسيل: هههه كنت جاهزه من اول ..
سارا: ياللا حرك ..
فحرك السواق وراحوا للنادي .. وبعد فتره وصلوا وقابلوا البنات وسلموا على بعض ..
وبعدين جلسوا وطلبوا غدا لأن سارا وندى ما تغدوا ..
لين: حرام عليكم تطلبوا غدا وانا توني متغديه ..
ندى: طيب لا تاكلين ..
لين: ما اقدر اقاوم نفسي .. اسمعوا ان زاد وزني يا ويلكم ..
اسيل: طيب لا تاكلين ..
لين: اقولكم ما اقدر اقاوم نفسي ..
ليان: عيل هذي مشكلتج ..
اسيل: طيب انا ماراح آكل .. لين ليان تييوا معاي نمشي ..؟!
ليان: طيب ياللا ..
لين: سوري .. انا باكل واللي فيها فيها ..
سارا: ما تخافين على جسمج ..؟!
لين: إلا بس الاكل اهم ..
ندى: ههههههههه مالنا شغل ان متنتي ..
لين: طيب ..
اسيل: ياللا .. واذا خلصتم دقوا علي ..
راحوا يمشون هي وليان ..
ليان: شخبارج وشخبار الاجازه معاج ..؟!
اسيل: كل شي تمام و ........ يوووه ليان سمعتي آخر خبر ..؟!
ليان: وشو ..؟!
اسيل: بنروح للخور عند مزرعة عمي .. احزري مين بيروح معاي ..؟!
ليان: مين ..؟!
اسيل: غيدوووه المعفنه ..
ليان: معقوووله ..؟؟!!
اسيل: ايه .. اليوم عرفت .. وتقول ايش انها ما راح تروح لأن برستيجها ما يسمح ..
ليان: هههههههه نفسي اشوف اشكالكم في المزرعه كيف ..
اسيل: ان شالله ما تروح لأني حدي مو طايقتهـ......... آآآآآآه ..
لفت عالشخص اللي صقعها بكتفها بقوووه ..
اسيل بعصبيه: اعمى انت ما تشوف ..
طالع فيها وقال: ايه اعمى ..
طالعوا في بعض فتره وقالت اسيل: مو كأنك انت ناصر اللي في الكلاس معانا ..
ناصر: اووووه اسيل ورفيجتها .. يا مرحبا كيفكم ..؟!
ليان: الحمد لله تمام .. كيفك ..؟!
ناصر: عال العال .. وانتي يا اسيل ليه ما تردين ..؟!
طالعت اسيل فيه وهي كارهته لأن اسلوبه وقح وينرفز وحق مشاكل ..
اسيل بدون نفس: انا بخير ..
ناصر: يووه ما بغت تطلع ..
طالعت ليان فيهم .. ناصر يبتسم وهو يطالع في اسيل اللي تطالعه بكره وعصبيه ..
ناصر: غريبه .. ما توقعت اني اقابلج هنا يا اسيل ..
ماردت اسيل فقالت ليان: يينا نتمشى شوي ..
ناصر: اسيل انتي ليش تناظريني جذي ..؟! احس انج تكرهيني ..
اسيل: زين انك عرفت بنفسك ..
ناصر: قويه تقولينها في ويهي .. طيب انا شسويت لج ..؟!
اسيل: ولا شي .. بس جذي من الله اكرهك ..
حك خده وقال: بنت غريبه ..
اسيل: ما الغريب إلا الشيطان ..
ناصر: حلو اني قابلتج لأن في بالي سؤال ودي اسألج اياه ..
طالعت فيه وما ردت ..
ناصر: عيونج ليش رصاصيه وتهبل ..؟! اخوج فارس عيونه عسليه فليش ما تشبهيه ..؟!
طالعت فيه بإحتقار وقالت: مالك شغل .. واحترم نفسك رجاءا ..
ناصر: طيب انا ما قلت شي غلط .. شنو اللي سويته عشان احترم نفسي ..؟!
اسيل: كل تبن ..
ناصر بإبتسامه: بويهج الحلو ..
عصبت وقالت: رجاءا بيننا حدود لا تتعداها .. احترم نفسك واعرف مين تخاطب ..
ناصر: اخاطب اسيل الرملي .. مين تكونين عشان اعرف قدري جدامج يا آنسه ..؟! ميرد بنت لا يات ولا راحت ..
اسيل: بس ذي البنت تسواك وتسوى عشر من امثالك ..
ناصر: لا لا لا معليش .. بديتي تزوديها كثير .. لا تشوفيني ساكت معناته تاخذي راحتج .. تراني انسان عصبي شوي ..
ليان: امشي يا اسيل وخلاص ..
اسيل: ناس تافهه ..
ولفت مع ليان يمشون ..
ناصر: ما التافه إلا انتي وخشتج ..
مشيت اسيل مع ليان وكانت بتلف وتهاوش بس ليان وقفتها ..
ليان: طنش تعش تنتعش ..
اسيل: رفع ضغطي بحركاته وكلماته ..
ليان: وانتي ليش يرتفع ضغطج من اي شي ..؟! خليج بارده ..
اسيل: يععع الباردين يرفعون ضغطي فكيف اصير بارده ..؟!
ليان: الله يعينج على نفسج ..
دق جوال اسيل .. طلعته وشافت رقم غريب ..
استغربت وردت: الو ..
في جهه ثانيه ترددت ام آرثر وبغت تقفل الجوال وتنسى السالفه وتخلي آرثر يحل مشاكله بنفسه .. بس بطلت لمن تذكرت انها وبنت اخوها هم السبب في اللي صار ..
جاسيكا: اهلين اسيل .. كيفج ..؟!
استغربت اسيل وطالعت في ليان وهي تقول: تمام بس منو وياي ..؟!
جاسيكا: بقولج من انا بشرط انج ما تقفلين الموبايل وتسمعين كل اللي بقوله .. اوكي ..؟!
اسيل: طيب ..
جاسيكا: انا الدكتوره جاسيكا .. ام آرثر ..
انصدمت اسيل وقالت: آ آ آآ آرثر ..
طالعت ليان فيها فجلست اسيل عالكرسي ..
جاسيكا: انا عرفت عن اللي صار بينج وبين آرثر .. بس ما اعرف التفاصيل .. كل اللي اعرفه انكم متخاصمين وان اليزا هي سبب كل اللي بينكم .. حبيبتي اسيل ترى من يوم والاولاد صغار حددنالهم يكون لبعض .. اليزا لآرثر وآرثر لاليزا .. بس آرثر شاف حياته وشاف البنت اللي تريحه وقال انا ابي اسيل وبس .. انا احترمت رايه بس اليزا ما اعجبها الوضع وعشان جذي تخرب بينكم .. قد سمعت مكالمه بينه وبينها انها سحرتكي او شي زي جذي .. انا عمتها واتأسف عن اللي سوته لج .. حبيبتي بغيت اقولج شي واحد .. اقسم بالله ان آرثر يحبج .. انا اقولها بصراحه .. انتي بس شوفي ويهه كيف تغير .. صار شاحب ولونه اصفر وعيونه حمرا من قلة النوم وصار هااادي وقليل الكلام ومهموم .. حرام اللي تسوينه في الريال .. اللي انتي تسوينه ما ترضينه لعدوك صح ..؟!
طالعت ليان في اسيل اللي كانت ساكته وتسمع للمتصله فحست ان الامر خصوصي ..
ليان: اسيل اذا خلصتي تلقيني هناك ..
واشرت على مكان فهزت اسيل راسها وبعدها راحت ليان عشان تاخذ اسيل راحتها في المكالمه ..
جاسيكا: ياوبيني يا اسيل .. اللي تسوينه لآرثر يرضيج ..؟!
اسيل: خلاص يا خاله .. انا بطريج وهو بطريج .. هو ياء قبل امس وكلمني بس انا قررت .. اليزا تحبه وحرام ابعدها عنه .. ماني انانيه ..
جاسيكا: اليزا انسيها وشيليها من السالفه .. انتي عارفه ان آرثر حلف انه ما يحب احد غيرج حتى لو بعدتي عنه ..؟!
اسيل: حتى ولو حلف .. انا ما ابغاه .. مو حلوه انه يحب وحده ما تبغاه ..
جاسيكا: يمكن انتي من النوع اللي ما يثق في احد .. طيب حددي يوم ايي عندكم واخطبج من اهلج لآرثر ..
انصــــــــــــــــدمت اسيل وقالت: تخطبيني ..؟؟؟؟!!!
جاسيكا: هذا اللي يبغاه آرثر من زمان بس انا اللي رفضت بحكم انه صغير وابيه يهتم بدراسته لأن ذي هي آخر سنه له ..
سكتت اسيل وهي مو عارفه ايش تقول .. هي عارفه ومتأكده ان آرثر يحبها وهي كمان تحبه بس تحس بشي يمنعها ويقول لا ..
بس ابدا ما توقعت انه يموووت فيها لهذي الدرجه ..
جاسيكا: لو ما كنت متأكده انه يحبج جان ما اتصلت بس صدقيني انه صاج بأي كلمه قالها .. اعتبري نفسج في مجانه وتحبين احد بس هو يصد عنج بسبب مجهول او سبب تافه .. اسيل على الاقل ابي بس سبب مقنع يخليج تتركينه ..
سكتت فتره طويله وجاسيكا تنتظرها تتكلم ..
اسيل: ماكو سبب ..
جاسيكا بصدمه: ماكو سبب ..؟! حرام اللي ساويته .. تخلين حالته تسوء من دون سبب ..
اسيل: يا خاله ..
جاسيكا: نعم ..
اسيل: خلاص ان شالله كل شي بنتفاهم عليه انا وآرثر ..
جاسيكا: اهم شي انج تفكرين .. اقولج الصج اني لمن شفت حالته ساءت حاولت اني اخليه ينساج بس هو رفض وبقوه .. بلييز فكري بعقلانيه وتأكدي ان آرثر يحبج اكثر من اي شي ثاني حتى اخوه اللي انا حامله فيه ما صار يسألني عنه لان المشكله اللي بينه وبينج اهم ..
اسيل: طيب ..
جاسيكا: مع السلامه ..
اسيل: بااااي ..
قفلت الجوال وهي تعترف .. تحبه وتموت عليه بس ما تقدر ترجعله عشان سبب هي ما تعرفه بس يمكن عشانه كذب عليها وهي ما تسامح اللي يكذب عليها ..
<< تتوقعون لمن تعرف ان اهلها كذبوا عليها وانها ماهي بنتهم راح تسامحهم ..؟! <<
قامت وهي تفكر .. اليوم يصير خير ..
راحت عند ليان وبعدها راحوا للشله وكانوا توهم خلصوا اكلهم ..
ليان: ها خلصتم ..؟!
ندى: انتي ايش شايفه ..؟!
ليان: انكم خلصتم ..
ندى: هههههه عيل ليه تسألين ..؟!
اسيل: بنات بآخذ رايكم بشي ..
لين: شنهو ..؟!
اسيل: شعري طول وابي اقصه .. شرايكم ..؟!
لين: وووااااااااااو حمااااااس ..
سارا: حلو ..
ندى: بس حرام شعرج يروح ..
ليان: ندى معها حق .. شعرج جذي احلى ..
سارا: اسيل لا تسمعي لهم .. قصيه ويطلع روعه ..
لين: انا مع سارا ..
اسيل: انا محتاره واحترت اكثر لمن وافق اثنين واثنين عارض ..
سارا: اسيل حبيبتي شرايج نروح معاج المشغل اليوم ..
لين: ياللا ..
ندى: خلاص قصيه براحتج بس احس اللحين احلى ..
اسيل: بس يتعب ..
ليان: هههههههه كسوله .. خلاص قصيه براحتج ..
ابتسمت وقالت: طيب بستأذن من ابوي ..
اخذت جوالها وراحت بعيد عنهم شوي .. اتصلت على ابوها واستأذنت منه فوافق ..
جلسوا في النادي ساعتين وبعدين راحوا مع اسيل للمشغل ..
⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄ ◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄ ⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊
.. فــــــــــــــــي القصــــــــــــــــر الكبيــــــــــــــــر والفخــــــــــــــــم ..
وفي الجناح الخاص فيه .. كان واقف في البلكونه ويطالع في ساحة قصره ..
الساحه كبيره ونافوره عاليه ومرتفعه في وسطها وحولها تشكيله رائعه من الورود والازهار وشوي من الشجيرات ..
رفع راسه يطالع الجو .. كان جدا بارد فقال: الشتاء دخل واتوقع انه بينزل امطار ..
تنهد وقال: مو لهذي الدرجه .. ما كنت اتوقع ان امي تسوي شي زي جذي ابدا ..
رجع نضره للساحه وهو يقول: الحلم تفسيره واضح .. امي وسميه كانوا ضلموا البنت .. ابدا مو مصدق ان امي تسوي جذي ..
عصب شوي وقال: ابي افهم شنو اللي يخليهم يظلمون البنيه .. حــــــــــــــــراام ..
ضرب ايده عالسور بقوه وهو مو مصدق .. بعد ما قالت له امه عن الحلم اتصل بصاحبه وقاله الحلم عشان يجيب التفسير له .. واللي عرفه ان امه واخته ظلموا بنت وآذوها ووووو .............. الخ ..
بدأ ينزل رشاش من المطر فدخل للغرفه وقفل باب البلكونه وراه ..
نزلت تحت وشاف الخدامه الخاصه فيه ويعتمد عليها بكل شي ..
ناداها وهو يقول: رامــــــــــــــــا ..
جت عنده وقالت: نأم بابا بسام ..
ابتسم وقال: انا مو بابا .. المهم امي وينها ..؟!
راما: ماما كبير في غرفه ينام ..
فاستغرب .. من ايام الاختبارات وهو نادرا يشوفها ودايما في غرفتها ..
لا مو من ايام الاختبارات .. من يوم ما اعطاها الرقم وهي دايم في غرفتها ..
طلع فوق ودخل جناحها ودق باب غرفتها ..
الام بتعب: ادخل ..
دخل بسام وجاء عند سريرها الكبير بتصميمه الروماني وقال: امي شفيج ..؟! انتي تعبانه ..؟!
الام: لا .. بس ابي اقعد لوحدي ..
هز راسه بلا وقال: امبلا انتي تعبانه .. ليش حابسه نفسج في حجرتج ..؟! بنادي الدكتور يشوف ايش فيج ..
الام: لا لا مابي .. اطلع وخلني لوحدي ..
طالع فيها فتره بعدين طلع من الجناح وصرخ: رامـــــــــــــــــــــــــــــــــــــــــــــــ ـا ..
جت راما وقالت: نأم بسام ..
بسام: حلو ما قلتي بابا .. المهم نادي الدكتور بسرعه ..
راما: حادر ..
دخل بسام لغرفة امه وقال: شوي ويجي الدكتور ..
الام: لا .. قلت ما ابي دكتور انت ما تفهم ..
بسام: لا ما افهم .. بصلح اللي اشوفه صح وما علي من احد ..
الام: عنيد ..
طالع في امه الواضح عليها التعب والمرض وكمان واضح انها مهمومه من شي ..
بسام في نفسه: "شكلها ندمانه .. بس انا ابي اعرف شسالفه بالضبط .. ايش هو اللي سووه هي وسميه ومين هالبنت اللي بتنتقم منهم وليش .. مستحيل يمر هاليوم من دون لا اسألها" ..
الام: بسام ..
بسام: نعم ..
الام: متى بتتزوج ..؟!
تفاجأ من طلبها وقال: توني صغير .. لمن اتخرج راح افكر في الامر ..
حطت ايدها على ايده وهي تقول: حبيبي لازم تتزوج وتييب ولد ارعاه واكفر عن ذنوبي قبل لا اموت ..
بسام في نفسه: "فعلا سوت شي وجايد .. بس هذي امي .. مرره طيبه فكيف اصدق انها سوت شي" ..
بسام: عن اي ذنوب تقصدين ..؟!
فتغيرت ملامحها وهزت راسها بلا وهي تقول: لا لا ..
بسام: شنو اللي لا ..؟!
ضغطت على ايده بقوه ومغمضه عيونها بألم وهي تتذكر ..
بسام: يمه شنهو اللي لا ..؟! شنهي هالذنوب اللي تبين تكفرين عنها ..؟!!
فتحت عيونها ولفت راسها عليه وقالت: مافي شي .. لا تشغل بالك ..
بسام بإصرار: يمه لا تجذبين علي .. واضح ان فيه شي مخبيته عني .. مين هي الطفله في حلمج وليش تقول ذنبي برقبتكم ليش ..؟!
لمعت الدموع في عيون الام وقال: كافي يا بسام كافي .. اتركني لوحدي وبس ..
طالع فيها .. مستحيل يتركها .. لازم يعرف ايش هي السالفه ..
دق باب الغرفه فراح بسام وفتح الباب ..
بسام: هلا دكتور .. ادخل ..
دخل الدكتور وخرج بسام وهو يفكر .. جلس في صالة الجناح ينتظر الدكتور يخلص ..
سالفة حلم امه صارت هاجس في مخه .. بس يفكر فيها ويحلم فيها .. حتى وقت الامتحانات كانت تشوش تفكيره ..
خرج الدكتور فقام بسام وقال: ها شفيها ..؟!
الدكتور: بخير والحمد لله .. مجرد انخفاض في الضغط والسكر مع آلام بسيطه في الجسم وارتفاع طفيف في درجة الحراره بجانب انها مصابة بالرشح والانفلونزا ..
بسام: وهذا اسمه بخير ..؟!
الدكتور: انا كتبت بعض الادويه واللحين برسل الممرضه تعتني فيها .. لأن السيده امك مهمله نفسها كثير ويبغالها رعايه .. مع السلامه سيدي ..
بسام: باي ..
خرج الدكتور ودخل بسام لغرفة امه وجلس على حافة السرير عندها ..
بسام: ليه سويتي بنفسج جذي .. الدكتور يقول انج مهمله نفسج وايد ..
الام بتعب: بسام حبيبي ابي ايلس لوحدي ..
بسام: هذي رابع مره تطرديني بس استريحي لأني مب طالع ..
الام: انا امج يا حبيبي ..
بسام: لا مب امي .. امي ما تخبي عني شي ابدا ..
سكتت بعدين قالت: ماكو شي ..
بسام: إلا فيه .. بسألج من الآخر .. منو هالطفله في حلمج ..؟! وليش تبي تنتقم منج ومن سميه ..؟! انتي شنو اللي ساويتيه بالضبط يا يمه ..؟!
فكمل بنبرة ترجي: ابي افهم ..
دمعت عيون الام وقالت: بسام حبيبي انسى .. ما اقدر اقولك ..
بسام: وليه ..؟!
طالعت فيه وفي نضراته المصره فقالت: لا تهتم بالامر ..
بسام: امي انا مب صغير .. انا كبير وافهم .. اللي صار اكيد شي جايد وهو اللي وصلج لهالحاله .. شهالشي يا يمه ..؟!
فعضت على شفتها وقالت: بسام انا ندمانه وايد .. ندمانه ..
ضم ايدها بين اياديه وقال: شنو اللي ندمانه عليه ..؟! امي قوليلي كل شي وانا بكون معاج صدقيني ..
غمضت عيونها وقالت: كيف بتكون معاي .. مستحيل تكون معاي اذا عرفت شصار .. بسام انا متأكده اني اذا قلت لك ما راح تسامحني طول عمرك وعشان جذي انا ما ابي اقولك ابدا ..
فتحت عيونها وهي تقول: بس ما قدرت .. الكوابيس تلاحقني والذنب يلاحقني واخاف اموت قبل لا اصلح خطاي ..
فهز بسام راسه يحثها على الكلام ..
الام: واخيرا ياء اليوم اللي بقولك فيه .. كنت اتهرب بس اليوم راح اقولك .. بس رجاءا ما تقاطعني بأي شي يا بسام ..
بسام: حاضر ..
سكتت فتره طوووويله بعدين قالت: اختك سميه بعد ما تزوجت يابت بنت اسمها سجى ..
وقفت عن الكلام شوي وبسام في قمة استغرابه .. ما كان يدري ان عنده بنت اخت ..
وبعدها بدأت الام تتكلم .. قالت كل شي .. قالت عن اللي سووه بالبنت وعن السبب اللي خلاهم يسوون كذا وعن المقصد من اللي سووه وعن الطريقه اللي استعملوها وكل شي ..
وعلى كل كلمه تقولها ينصدم بسام اكثر ويعصب اكثر ويندهـــــــــش اكثر ..
الناس يغلطون بس مو لدرجة حياة طفله .. حس انه مو قادر يصدق ان اللي قدامه امه .. كأنها وحش مو انسانه ..
الام: وسميه وعشان كمان انا اقدر اسـ........
بسام بصراخ: بــــــــــــــــس كافــــــــــــــــي .. وش بتقولين بعد .. كافــــــــــــــــي المصايب اللي سمعتها وما ابي اسمع شي ثاني كمــــــــــــــــان .. يمه حرام عليج والله حرام .. مستحيل تكونين امي انا مو مصدق .. شذنبها البنت شذنبها ..؟! ما فكرتم في البنت كيف بتعيش .. طفله عمرها سنتين وش بتسوي وهي ملفوفه ببطانيتها ..؟! تتوقعون ذي البطانيه راح تحميها من البرد او راح تأكلها او راح تأمن مستقبلها ..؟! شلــــــــــــــــون بتعيش وشلون تاكل وشلون تنام ..؟! انتم مافي قلبكم رحمه او شفقه ..؟! انتم بتحملون ذنب حياة كامله .. لو هالبنت سلكت طريج مو كويس راح تحملون ذنبها .. لو هالبنت تعذبت وذاقت التعب والآلام اشكال والوان راح تتحملون ذنب اللي صار لها .. كيف بتخلونها بدون اصل او عائله ..؟! شلــــــــــــــــون راح تعرف مين هي شلــــــــــــــــون ..؟! انتــــــــــــــــي وسميــــــــــــــــه مو بشر ابدا ..؟!
طالع وقال بهمس: ما توقعتج جذي .. اكرهج .. اكرهج وايد يا ام سميه ..
خرج وصقع الباب وراه ..
الام: بســــــــــــــــام ولــــــــــــــــدي تعــــــــــــــــال ..
بس ما رد عليها .. خرج من هنا وامه بدت تبكي من هنا ..
نزل من الدرج وخرج من القصر .. يحس نفسه ضايق ويبي يفتك ..
مشى لسيارته ودخلها وقفل الباب بعصبيه ..
بسام: معقوله في ناس تفكر جذي ..؟! ناس ما همهم إلا نفسهم .. ماني مصدق ابدا ..
اسند راسه عالدركسون ودخل في دوامة تفكير ..
بعد عشر دقايق دق جواله فرد وقال: هلا وليد ..
وليد: اهلين .. كيف الاحوال عندكم ..؟!
بسام: تبي شي مهم ولا لا ..؟!
وليد: اوف قويه ذي التكسيحه .. اللحين انا متعب نفسي ومتصل عليك مع اني في بريطانيا والمكالمه دوليه وراح اخسر كثير ومع هذا تقولي تبي شي مهم ولا لا ..
بسام: بليز وليد انا حدي متضايق .. شتبي ..؟!
وليد: بغيت شي بس مع ذي الاخلاق مستحيل اقول شي ..
بسام: احسن ..
سكت شوي وقال في نفسه: "حتى لو كنت متضايق ما يصير اكلم وليد جذي لأنه ماله شغل" ..
بسام: هههههه كنت امزح معك .. كيف بريطانيا والدراسه ..؟!
وليد: والله انك غريب .. المهم الدراسه بخير والدرجات حلوه ..
بسام: كلمت ابوك ..؟!
وليد: ايه قلت درجاتي روعه فقال مالي شغل لازم تدرس برى قطر .. يعني مستحيل يوافق اني اكمل دراستي هنا ..
بسام: مسجين ..
وليد: طيب ليش ما تيي تدرس عندي يالدلخ .. انت قلت بفكر في الموضوع ..
سكت بسام فتره بعدين قال: فكرت وقلت يمكن ايي بس اللحين بطلت ..
وليد: وليـــــــــــــــــــــــــــش ..؟؟!!!
بسام: بكمل دراستي في الدوحه ..
وليد: شتبي بالدوحه ..؟! الدراسه في بريطانيا يمدحونها ..
بسام: عندي شغله هناك .. في وحده بدور عنها في دار رعاية الايتام ..
وليد بإستغراب: مين ..؟!
سكت بسام شوي وقال: بس هي عمرها فوق 18 وهذا يعني انها طلعت او يمكن يكون في عائله تكفلوا فيها .. اوووف الامر صعب ..
وليد: بسام عن شنو تتحجى ..؟!
بسام: بس لازم القاها .. باي وليد ..
وقفل الجوال وهو يفكر .. بيسافر للدوحه ويدور عنها .. هو خالها وهو المسؤول عنها ..
⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄ ◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄ ⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊
في صباح يوم السبت قامت من النوم من حول ساعه وفتحت باب بلكونتها وتطالع في الجو ..
كان جدا روعه .. امس الليل كان يوم ممطر وصار الصبح منعش مع بقايا قطرات المطر ..
بلكونتها كانت تفتح على الجهه الخلفيه من القصر ..
سمعت صوت فقربت من السور وطالعت تحت فأبتسمت وهي تشوف شادي ووسيم يلعبون ..
تذكرت ان شهد عندها اربع اخوان وجاها فضول تشوف الاخوان الثانين ..
بس ما تبي تسبب احراج لشهد وما تسألها كذا وخاصتا ان علاقتها بشهد سطحيه جدا ..
دخلت للغرفه ووقفت قدام المرايه وتطالع في شكلها..
روان: يقول راشد انه بيمشيني اليوم بس ما قال فين .. ودي اعرف فين بس لازم اصبر .. ماباجي غير شوي واعرف فين ..
دق الباب فقالت: ادخل ..
دخل راشد وقال: ما شالله صاحيه بدري ..
روان: الساعه 11 يعني مو بدري ..
جلس عالسرير وقال: بنتغدى برى ..
روان: وااااو روعه .. وين ..؟!
راشد: هههههههههه مدري .. اختاري انتي ..
روان: ودي في مأكولات بحريه .. نفسي آكل حبار .. وااااو لذيذ وخاصتا وانت تاكله ينب البحر ..
راشد: يعني تبغين التمشيه اليوم بحريه ..؟!
روان: ياليت ..
راشد: اوكي من عيوني ..
روان: واااااو شكرا لك يا خيو .. انت كتير كتير طيب ..
راشد: هههههههههههههههههههههههههههههههههههههههههههه ..
قام وقال: انا راح انتضرج في الصاله ..
روان: ثواني واكون جاهزه ..
جاء بيخرج بس وقف وقال: رونه ..
روان: نعم ..
راشد: تصدقين ولا لا ..؟!
روان: وشو ..؟!
راشد: اشتقت للجامعه ..
روان: يععع مين يشتاق للهم ..؟!
راشد: لان الجامعه اقدر في اي لحضه اني اضارب .. بس هنا ما اقدر .. كلهم يسمعون كلامي وما يواجهوني ..
روان: هههههه شف كيف تفكيرك .. ارحم نفسك من هالمضاربات ..
مشي خطوتين وقال: اعترفلج بشي ..؟!
روان: ايش ..؟!
راشد: انا طلعتج اليوم لسببين .. الاول عشان تستمتعي والثاني عشان اطلع روح القتال اللي في داخلي ..
روان: رشود حبيبي حاول تقلل مشاكلك شوي عشاني ..
وقف عند باب البلكونه وقال: ما اقدر .. واااااو الجو روعه ..
روان بإبتسامه: ايوه .. قبل شوي خرجت وكان الجو حماس ورايق ..
عقد راشد حواجبه وقال: شهالصوت ..؟!
روان: اي صوت تقصـ.....
شهقت لمن تذكرت وسيم وشادي ..
راشد: الصوت ياي من الساحه الخلفيه للقصر ..
جت روان ووقف قدامه قبل لا يقدم ويشوف مصدر الصوت ..
روان: راشد انزل شوي لاني ببدل هدومي عشان نتمشى ..
راشد: طيب انتضري دقيقه ..
وجاء بيمشي بس منعته وهي تقول: رشووووود ماكو وقت .. بسرعه بسرعه ..
قالتها وهي تدفه يطلع من الغرفه ..
راشد: بسم الله شفيج صاير جذي ..؟!
رمشت بعيونها وهي تقول: الناس تتغير ..
هز كتفه وخرج من الغرفه ..
راشد: والله كان فيه صوت كأنه صوت بزران ..
نزل وجلس في الصاله ينتظر روان ..
راشد: شهــــــــــــــــــــــــــــــدووه ..
جت شهد بسرعه وقالت: نعم ..
راشد: طلعي برى وشوفي مين اللي في الحوش ورى البيت ..
شهد: طيب ..
خرجت وتمسكت بالباب بسرعه لانها كانت تحس بدوخه وتعب في جسمها بس استحملته لأن راشد اذا عرف انها تعبانه راح يعطيها اشغال كثيره عنادا فيها ..
لفت ورى وانصدمت لمن شافت شادي ووسيم يلعبون ..
شهد: شــــــــــــــــادي وسيــــــــــــــــم ..
شادي بإبتسامه: هلا شهد كيفج ..؟!
وسيم: هلا شهد ..
شادي: ليه تقلدني ..؟!
وسيم: ما قلدتك لأني ما قلت كيفج ..
شادي: بس قلدتني لمن قلت هلا شهد ..
وسيم: المهم هي الكلمه الاخيره ما قلدتـ......
شهد: بــــــــــــــــس ..
طالعوا فيها وباين من ملامحها انها معصبه فخافوا شوي ..
شهد: مو انا قلت تقعدون في الغرفه .. ليه تخرجون ..؟!
شادي: طفشنا وكمان هنا ما يي الدب ابدا .. الخدامه قالت جذي ..
شهد: جــــــــــــــــب .. انتم تعرفون انه سمع اصواتكم وقالي روحي شوفي مين ورى ..
شادي بتفاجئ: من جد ..؟!
وسيم: يا ويلنا كان بيمسكنا ..
شهد: ادخلوا الغرفه ولا عاد تطلعوا منها .. واذا عرفت انكم طلعتم راح اوديكم عند عيسى ..
شادي: لا لا لا لا ..
وسيم: ما نبغى ..
شهد: بس اقسم بالله اني اسويها لو خرجتم من الغرفه .. اقعدوا فيها ..
وسيم: حاضر وهذي آخر مره ..
شادي: طيب بس المهم ما تودينا عند البيت المرقع هذاك ..
شهد: بسرعه على غرفكم ..
فراحوا الغرفه وهي رجعت ودخلت داخل ..
راشد: مين كان ورى ..؟!
شهد: ها .. آه كانت مجموعه من القطط ..
راشد بإستنكار: قطط ..؟! ايش هالدلع الماسخ .. قولي بسه ..
شهد: طيب .. كانو بسس ..
راشد بإستغراب: بسس .. بس الصوت كان صوت بزارين ..
خافت شهد وقالت: يمكن لان في هالوقت يلعبون البزارين حول القصر ..
طالع فيها بعدم اقتناع لان حوش قصره كبير واللعب بيكون برى الحوش يعني الصوت ما يوصلهم ..
لمن حست بنضرات عدم الاقتناع قالت: بقول شي .. مره قبل اسبوعين كان في اطفال نطوا من السور وكانوا يلعبون في الحوش فطردتهم .. يمكن اللحين كانوا موجودين وراحوا قبل لا اييهم ..
راشد بعصبيه: وليه ما قلتيلي من اول عن البزران اللي كانوا هني ..؟!
شهد بخوف: نـ نـ ـسيت ..
عصب منها ومن غباءها الزايد .. شلون تنسى شي زي كذا ..
راشد: تلايطي عن ويهي بسرعه ..
شهد: طيب ..
لفت ومشيت شوي بس حست بدوخه ومسكت بحافة الكنبه قبل لا تطيح ..
طالع فيها راشد وقال: تعبانه ..؟!
عدلت وقفتها وقالت بسرعه: لا لا بخير بس صكيت بحافة الكنبه وكنت بطيح ..
كشر بقهر .. يبغاها تتعب عشان يتعبها اكثر .. يافرحه ما تمت ..
دخلت المطبخ وجلست بسرعه عالكرسي ومسكت راسها بتعب ..
انصدمت لمن حسته حار .. لا هي ما تبغى تتعب ..
قامت وحاولت تشغل نفسها بأي شي .. لازم تقاوم المرض بس المشكله تحس جسمها متكسر من داخل وايدها ترتجف ..
راحت لغرفتها واخذت ملابسها عشان تتروش .. يمكن الحراره تخف ..
اما راشد فقلب في القنوات وقال وهو يقلد روان: ثواني واكون جاهزه .. الثواني صارت ساعات ..
بعد شوي سمع صوتها نازله وهي تقول: خلصت ياللا ..
راشد: تأخرتي ..
روان: سووووووري كان غصب عني ..
قام وقال: خلاص مافي مشكله ..
روان: اكيد مافي مشكله لانك ما تقدر تعصب على "رمشت بعيونها" رونه ..
ضحك غصب عنه .. دلوعته ويموت عليها .. يزعل العالم كله إلا هي ..
راشد: هههههههه امشي لا نتأخر ..
روان: اوكي ..
خرجوا وراحوا للسياره .. سبقته روان وركبت السياره وراشد وقف في نص الطريق يطالع الارض ..
انحنى ياخذ شي من الارض وطالع فيها: نبيله .. شيابها هني ..؟!
رماها وراه وقال: هذولا البزران اللي تحكي عنهم شهدوه ..
ركب السياره وراح لمطعم بحري على ظهر يخت كبير ..
كان الجو هادي وبارد ومافي اثر للشمس بسبب الغيوم اللي تغطيه ..
لفت روان في المكان وقالت: وواااو المجان رووعه .. شكرا رشودي ..
طلع جواله وهو يقول: عفوا واللحين لازم آخذ لج صوره ..
ابتسمت وعدلت نفسها بفستانها الازرق الرايق لين ركبتها وشعرها الغجري المفتوح يوصل اكتافها ..
روان: جذا تمام ..؟!
راشد: ايه تمام .. واللحين ابتسمي ..
روان: اكيد ببتسم .. مسوي فيها انك فاهم ..
ابتسم وصورها صورتين بعدين وقف وهو يطالع فيها وكانت سرحانه ..
راشد: رونه شفيج ..؟!
روان: تذكرت شي ..
راشد: وشو ..؟!
روان: انت يا استاذ وعدتني انك تخليني اسوق بس اشوفك نسيت السالفه ..
راشد: ههههههههه ما شالله عليج ما تنسي ..
روان باللبناني: رشودي بلييز انا بدي اسوق هلأ .. صايرلي فتره ما بحكي عن الموضوع مشان انت تفاتحني فيه ..
راشد: هههههههه من عيوني .. لمن تنجحين من ثاني ثانوي ..
روان: شنــــــــــــــــو ..؟! اكيد تستهبل ..
راشد: هههههههههه خلاص في اقرب فرصه ان شالله ..
روان: شكرررن خيو ..
ابتسم راشد لفرحها .. مستعد يسوي اي شي عشان ابتسامتها هذي وبس ..
⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄ ◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄ ⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊
__________________  |