03-18-2014, 08:42 AM
|
| |
|$[ البآرت السابع الجزء الثاني ]$|
سامي: الو عادل انت معاي .. ياخي رد ابي اسولف معك وآخذ ارقام الشله الباجين .. آآآه شكلك ما عرفتني .. انا سـ.....
سحب مراد الجوال وقال: حبيبي سامي ليش جذي .. مو ابوك حذرك انك ما تدق على اصحابك ..
لف سامي وعصب لمن شاف انه مراد ..
سامي بعصبيه: نعم خير شتبي ..؟! هات موبايلي وتقلع عن ويهي ..
قفل مراد الجوال في وجه دانا وقال: ابوك منعك انك تكلم اصحابك .. وحذرك انه لو عرف انك كلمتهم يا ويلك ..
ابتسم بخبث وكمل: تبيني اعلمه ولا لا ..؟!
عصب سامي بس ضبط نفسه وقال: اسلوب التهديد هذا ما احبه ..
مراد: عيل شنو تحب ..؟!
سامي: هات موبايلي وروح شوف شغلك اللي ابوي امرك تسويه ..
مراد: اكيد بشوف شغلي وما احتاج انك تذكرني ..
دق الجوال فطالع مراد في الشاشه وقال: منو عادل ..؟! رفيجك صح ..؟!
سامي: مالك شغل ..
قفل مراد الجوال وقال: من فين يبت الرقم ..؟!
سكت سامي ومارد عليه ..
مراد: عيل سوري راح اضطر اني آخذ الموبايل واعطيك بدل عنه عشان رفيجك ذا ما تقدر تتصل فيه مره ثانيه ..
ابتسم سامي بإستهزاء وهو يقول في نفسه: "حتى لو غيرت الموبايل عندي رقمه يا غبي" ..
بس في نفس الوقت عصب .. مين هذا عشان يفرض رايه عليه ويتحكم في تصرفاته ..
سامي: الموبايل موبايلي وانا سيدك وتاج راسك فلا تنفخ ريشك يا مرادوه فاهم ..؟!
عصب مراد بس ما بين الامر وقال: اوكي .. راح اتصل بأبوك هو يتفاهم معاك ..
طلع جواله وسامي انقهر وبغى يمنعه بس بيضحك عليه مراد ..
دق مراد وهو يطالع في سامي بإستهزاء ..
مراد: الو ..
ابعد شوي عشان يكلم ..
سامي بقهر: الجلب الحقير ..
بعد شوي جاء مراد واعطى سامي الجوال يكلم ..
اخذ سامي الجوال وقال: الو ..
الاب: سامي ..
سامي: نعم ..
الاب: صحيح الحجي اللي سمعته ..؟!
سامي: ...........................
الاب: ليه ما ترد ..؟! ولا لسانك ما يطول إلا على مراد والخدم وبس .. ابي اعرف من منو اخذت رقم رفيجك ..؟!
سامي: قبل لا اسافر كنت كاتب الرقم في ايدي ..
الاب: متأكد ..؟!
سامي: ايوه ..
الاب: اسمع .. مراد اللحين بيشتري لك موبايل غير اللي معاه .. تاخذه بدل اللي قبل شوي .. ولعلمك ترا اي رساله او مكالمه راح توصل لي عبر موبايلي .. حبيت اعطيك خبر عشان تنتبه .. اوكي ..؟!
سامي: طيب ..
الاب: كيف صحتك اللحين ..؟!
سامي: تمام ..
الاب: ياك الدكتور امس ..؟!
سامي: ايوه ..
الاب: ترى هذي ثاني مره تتعب واييب لك دكتور من برى .. انتبه على نفسك اكثر من البرد .. خلك داخل القصر ولا تطلع إلا لشي ضروري والبس لبس ثقيل اوكي ..؟!
سامي: طيب ..
الاب: ابعد شوي عن مراد عشان بكلمك بموضوع ..؟!
بعد سامي عن مراد وقال: نعم ..
الاب: صحيح اللي سمعته انك طولت لسانك على مراد ..؟!
سامي: ما طولت لساني بس هو نرفزني ..
الاب: سامي .. لو لسانك يطول على مراد مره ثانيه راح اقصه ..
سامي بصدمه: بس هـ....
الاب: لحضه انا ما كملت كلامي .. انا علمتك عالاحترام .. هذا اكبر منك ولازم تحترمه .. هو يشتغل عندي وانا لي الحق اني اعايره مو انت ..
عض على شفته بقهر وقال: يعني لو تدخل في خصوصياتي اسكت له ..؟!
الاب: مراد ما يتدخل في خصوصيات احد ..
سامي: إلا تدخل ومسوي فيها انه ولي امـ.....
الاب بحده: ســــــــــــــــامي ..
فسكت سامي وهو حده مقهور ..
الاب: خلني اسمع انك طولت لسانك عالخدم شوف وش حيصير .. اعطني مراد ..
راح سامي واعطى مراد الجوال .. وبعدها طلع غرفته ..
قفل باب الغرفه وهو يقول: مرادوه الحقير .. اكيد قايل لأبوي كلام ما صار .. اوووف اثنينهم اغبياء ..
جلس عالسرير وهو يفكر .. ما هو عاق إذا قال لأبوه غبي لانه يستحق ..
غمض عيونه بقوه يمنع الدموع تنزل وقال: سامي ايش تبغى بقطر .. خلك هنا عشان تقدر تعيش ..
فتح عيونه وقال: وتقدر تتزوج .. هنا محد راح يعـ...
سكت وما كمل .. ما عنده شجاعه حتى يتكلم مع نفسه ..
غمض عيونه مره ثانيه وقال: عندي رقم عادل ويمديني اتصل عليه من اي جوال ثاني ولا احد راح يدري عني .. بس انا ما عاد ابغى .. ما ابغى اي شي يربطني بقطر .. هنا احسن من كل النواحي واولها الناس ..
سكت شوي وبعدها جلس وقال: اخاف اضعف واتصل عليه ..
قام وطلع الشنطه وقعد يدور الدفتر .. لقاه وفتح الصفحه الاخيره وقطع الجزء اللي فيه الرقم ..
طالع في الرقم فتره طويله وتردد .. هو مقتنع برايه بس ما يبغى يقطع العلاقه نهائيا ..
اذا رمى الورقه ما راح يمديه يسمع صوت اي واحد من اصحابه ..
جاء عند الشباك و .. وطير الورقه في الهوا ..
طالع في الورقه وهي تبعد تماما .. حس بندم بس قال: احسن .. ما ابي احد موليه ..
قفل الشباك ورجع لسريره ..
......................................
اما دانا فطالعت في الرقم وقالت: ليه يقفل في ويهي مرتين ..؟! شكله لعاب ..
دخلت عالمكالمات المستلمه ومسحت الرقم وهي تقول: انا مب ناقصه ارقام دوليه وناس لعابه ..
رجعت الجوال عالشاحن ودخلت غرفتها ..
⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄ ◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄ ⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊
ام فيصل رجعت مع ابو فيصل يوم الاثنين بعد ما اطمئنت على حالة ابوها وصار بخير ..
جهزوا اغراضهم عشان يسافرون يوم الثلاثاء في الصباح ويرجعون يوم الجمعه في الصباح ..
اما غيدا فضغطت عليها امها انها تروح معهم فأضطرت انها تجهز اغراضها عشان يروحون ..
في صباح الثلاثاء كانوا يرتبون اغراضهم في السيارات ..
بياخذون ثلاث سيارات ..
سيارة فيصل يحطون فيها اغراض العائلتين ..
سيارة ابو فيصل لعائلته وسيارة غيدا لعائلتها ..
كانوا جدا مشغولين ومقروشين ومعتفسين وهم يرتبون الاغراض ..
نزلت اسيل من الدرج وهي شايله شنطه صغيره فيها اغراضها ومندمجه في الجوال ..
فارس: اسيل امي تقول وين جنطتج ..
رفعت اسيل راسها وقالت: فارس تعال ابيك ..
استغرب وجاء عندها وقال: ها شتبين ..؟!
اعطته جوالها وهي تأشر عالشاشه وتقول: هذا رقم مين ..؟!
استغرب وقال: وانا شدراني عنج ..؟!
اسيل: تذكر ذاك اليوم حق الغاز سألتني اذا كان في رقم اتصل عليج وموبايلج مغلق ومن ذا الحجي ..
فتذكر فارس انه رقم لبنى ..
فارس: هذا .. هذا رقم وحده .. ذاك اليوم كنت ابي اطمئن عليج بس ما عندي رصيد فاتصلت من موبايلها ..
اسيل: ومين هذي الوحده ..؟!
فارس: ها .. اسمها لبنى ..
اسيل بصرخة فرحه: وااااااو لبنــــــــــــــــى اللي تحبهــــــــــــــــا ..
حط ايده على فمها وهو يقول: اشش فضحتيني .. وكمان مين قال اني احبها ..؟!
اسيل: انا .. لا تجذب يا اخوي لأني مب غبيه .. دايم تسأل عنها بطريجه غير مباشره .. ههههههه حتى لبنى صارت دايم تسلم علي لأني اختك ..
فارس: من جد ..؟! قولي والله ..
اسيل: والله ..
غمزت وهي تقول: اشوفك انبسطت ..
فارس: ها .. لا لا انتي غلطانه .. السالفه هي سالفة صداقه او......
اسيل: لا لا ما تقدر تجذب علي .. واخيرا اخوي اعترف انه يحب وحده .. والله لأتشمت في لماروه لين اطفش وامل هههههههه ..
فارس: اسيل بليز لا احد يدري لأنه.....
اسيل: ههههههه يصير خير .. متى بتخطبها ..؟!
فارس: وين بدري .. لمن اتخرج ..
اسيل: عز الله طارت البنت من ايدك ..
فارس: شتقصدين ..؟!
اسيل: اقصد انها بنت حلوه وصغيره واكيد بييونها الخطاب كثير وانت يالس هنا ..
فارس: اسيل لا تخوفيني ..
اسيل: هذا الصج ..
الام: فــــــــــــــــارس اسيــــــــــــــــل تحــــــــــــــــركوا بسسسسرررعه ..
اسيل: طيب .. بااي فارس ..
وخرجت برى ووقفت عند سيارة فيصل تطالع فيه هو ومحسن وهم يرتبون الاغراض في السياره ..
اسيل: احم احم ..
لف محسن وقال: هلا اسيل ..
اسيل: اهلين .. هذي جنطتي ..
اخذها فقالت: محسن ..
محسن: هلا ..
اسيل: غيدا بتيي معانا ..؟!
محسن: ههههههه ايه ..
اسيل بقهر: عمــــــــــــــــى ليه ..؟!
ضحك وبعدين لف يحط الشنطه ..
ام مايد: اهلين اسيل ..
اسيل: اهلين خالتي كيفج ..؟!
ام مايد: تمام .. ها كيف الغدا اللي يبته ..؟!
اسيل: روعه .. بس بليز لا تدري امي لأنها حتستلمنا تهزيء ..
ام مايد: هههههههه طيب طيب ..
خرجت ام فيصل ومعها اغراض وقالت: اهلين بأم مايد ..
ام مايد: اهلين ..
ام فيصل: ها خلصتم كل شي ..؟!
ام مايد: كل شي صار في السياره وما باجي إلا نتحرك ..
ام فيصل: حلو .. وحتى انا خلصت ..
ام مايد: طيب بروح اقول لغيدا تشغل السياره وندخل الاولاد فيها ..
ام فيصل: اقول ام مايد شرايج تركبين معي عشان نسولف في الطريج ..؟!
ام مايد: لا ما يصير سيارتكم بتكون زحمه ..
ام فيصل: اسمعي .. فيصل بيروح مع محسن بسيارة الاغراض .. وسيارة ابو فيصل نركب فيها انا وانتي وريما وفارس .. واسيل تركب بدل عنج مع غيدا ..
اسيل بشهقه: لأأأأأأأأأأأأأأ ..
ام فيصل: اسيل عيب .. انتي الصغيره وانتي بتركبين .. سيارة غيدا بيكون فيها انتي ومازن وغاده وغيدا .. يعني تكفيكم بالراحه ..
ام مايد: وليه ما تبين يا اسيل ..؟!
اسيل بإحراج: لا بس احب اركب مع ابوي ..
ام فيصل: ما يمدي لأن سيارتنا بتكون فيها خمس اشخاص .. وغيدا سيارتها فيها ثلاثه وانتي الرابعه ..
ام مايد: اذا ما كنتي تبغين عادي اركب انا مع غيدا ..
اسيل بسرعه: لا لا ما قصدي ابدا ..
ام فيصل: لا اذا ما كنتي تبغي فأركبي مع فيصل ومحسن يركب مع اخته ..
اسيل: لا لا انا موافقه .. شي اهون من شي ..
ولفت بقهر .. تكره غيدا ولا تبي تركب معاها ابدا .. بس الضروف ..
اسيل: قالوا ايش حدك عالمر قلت اللي امر منه ..
شافت غيدا واقفه عند باب سيارتها وتنتظر اخوانها يخرجون ..
جت عندها وشاف غيدا تلعب بميدالية السياره وهي تغني: حبيـــــــــت لا تسألوني ليش .. يمكن عقل او طيش .. والحاله هي حاله .. سويــــــــــت في نفسي القصه .. وما فادت القرصه .....
اسيل: كح كح كح شذا الغبار المتراكم هنا ..؟! كح انا عندي ربو وما استحمل ..
طالعت غيدا فيها بنظرات احتقار وقالت: نعم استاذه اسيلوه .. شتبين يايه عندي ..؟!
اسيل: هيه احترمي نفسج ولمي نضراتج يا غيداؤؤه ..
غيدا: لو سمحتي انا اسمي حمممود مو غيدا ..
مازن: حمود خلصنا ..
لفت غيدا وقالت: طيب رح ناد امي ..
مازن: ماني سواق ابوج ..
وركب السياره .. واسيل تطالع فيهم بدهشه .. العائله كلهم لسانهم طويل ..
غيدا بعصبيه: مــــــــــــــــازن غــــــــــــــــاده واحد منكم ينادي امي بسرعه ..
غاده: عندج ريول .. روحي بنفسج ..
غيدا: والله اذا محد منكم قام ياويلكم .. اقسم بالله اني راح اوريكم شغلكم واندمكم ..
مازن: مع نفسج ..
اسيل: هههههههههههههههههههه انا قلت قبل جذي انه ما عندج شخصيه ..
عصبت غيدا من كلامها وطالعت فيها بنظرات تخوف لأنها عصبت من قلبها ..
انفجعت اسيل من نظراتها ولاحظت مازن يقول لغاده تروح تنادي امهم ..
اسيل بإستهزاء: يوومه خوفتيني ..
نزلت غاده وراحت ..
غيدا: نصيحه لج يا اسيل انج تبعدي عني عشان لا اييب اجلك هني .. انا ماسكه اعصابي قد ما اقدر عشان لا امد ايدي على بزززره مثلـــــــــــك ..
تنرفزت اسيل من كلمة بزره وقالت: ما البزر إلا انتي واشكالج ..
اشرت غيدا اصبعها بتهديد في وجه اسيل وهي تقول بضبط اعصاب: اسيلوه .. لمي لسانج ولا تحاولي تنرفزيني عشان ما اتهور واضربج .. انا لو حأتهور حأعور .. فحشمي نفسج ولسانج اطيب لج ..
جت بتتكلم اسيل بس سبقتها ام مايد وهي تقول: غيدا شفيج ..؟!
نزلت غيدا اصبعها وقالت: مافي شي يا امي ..
الام: طيب ياللا ابو فيصل بيحرك اللحين .. اركبي انتي واسيل بسرعه ..
غيدا: شتقصدين بأنا واسيل ..؟!
الام: انا تبادلت مع اسيل وبروح مع ام فيصل .. ياللا اركبوا بسرعه وامشي بشويش يا غيدا وانتبهي للطريج ..
راحت وغيدا واقفه مصدومه .. لفت على اسيل وقالت: انتي بتروحي معايا ..؟!
اسيل من طرف خشمها: ما ودي بس شسوي ..؟!
لفت بتركب بس ما لقت مكان فاضي غير قدام جنب غيدا .. فتأففت وركبت ولفت وجهها ناحية الشباك ..
غيدا: اووووف ..
ركبت وقالت بصوت عالي: اربطوا الاحزمه ..
مازن: من امتى حمود يهتم بحزام الامان .. لحضه لحضه بطلع موبايلي وبأتصل على مدرس التاريخ ويحطها درس لنا عنوانه "حمود يطلب من اخوته ربط الاحزمه لأول مره في حياته" ..
غاده: هههههههههه حماس .. يعني لمن اوصل ثاني اعدادي ادرس عن اختي ..
مازن: واكيد بتاخذين عشره على عشره ..
غاده: هههههههههههه ..
غيدا: ها ها ها سامجيييييين .. اربطوا الاحزمه من دون هرج غبي .. الكــــــــــــــــلام موجــــــــــــــــه للكل ..
عرفت اسيل انها تقصدها بس طنشت ..
غاده: مازن كيف يربطون الحزام ..؟!
مازن: مدري ما قد يربت اربطه ..
غيدا بعصبيه: في احد ما يعرف يربط الحزام يا غبيه انتي وياه .. حتى المينون يعرف يربطه ..
مازن: انتي قلتيها .. المينون .. الحمد لله انا مب مينون ..
غاده: ولا انا ..
غيدا: مازن غاده .. والله اذا ما سكتوا عن الاستهبال لأراويكم .. واللحين اربطوا الحزام وبلا حجي ماله داعي ..
مازن: حمود حمود تحركوا ..
طالعت غيدا قدام فشافتهم حركوا السياره ..
غيدا بقهر: تبن ..
حركت السياره ومشيت وراهم .. طول الطريق والوضع هادي .. اسيل تطالع من الشباك ومازن يدقدق في جواله وغاده تلعب بالايباد حقها ..
غيدا: مازن ..
مازن: نعم ..
غيدا: عند ريلك جنطه سودا صغيره .. ييبها ..
مازن: طيب ..
اخذ الشنطه واعطاها وكمل دق في جواله ..
غيدا: اسيل حبيبتي ..
استغربت اسيل وطالعت فيها وقالت: نعم ..
غيدا: ودي اشغل اغنيه .. شنوع الاغنيه اللي تحبينها ..؟!
رفعت اسيل حاجبها وقالت: خير .. شذا الادب اللي هل فجأه ..؟!
غيدا: لا بجد شتبغين ..؟!
اسيل: واضح ان وراج شي ..
غيدا: هيا قولي شتبغين اغنيه ..؟!
اسيل بلا مبالاه: اي شي ..
غيدا: عندي اشرطه كثيره ومحتاره .. طيب ايش الاغنيه اللي ما تحبينها عشان اتجنب آخذها ..؟!
اسيل في نفسها: "هذي ايش اللي تبغى توصله" ..
اسيل: اي اغنيه ما عدا اغاني اليسا لأني اكرها ..
غيدا: طيب شرايج اشغل اغنيه لشيرين ..؟!
ما كلمتها اسيل فقالت غيدا: بكيفج ..
دخلت السيدي في المسجل وشغلته ..
" واقف حبيبي للخجل ع حفت البسمه ..
كل ما اجى يحكي غزل بيضيع الكلمه ..
وبيستحي .. بعرف حبيبي بيستحي ..
وبأعز لحضات الهوى كل شي عباله بينمحي ..
وبيستحي .. بعرف حبيبي بيستحي ..
ياريت لو بت في القمر دا يحكي على عتمه "
طالعت اسيل في غيدا وقالت: كنت حاسه ان سؤالج واهتمامج وراه شي ..
غيدا: ههههههههه ..
اسيل: بلا عبط وقفلي المسجل ..
غيدا وهي تغني: وبأحس لما بيرتبك بيغير الموضوع .. بيغرق بموجة ضحك جوات بحر دموع ..
اسيل: غيدا قفلي قبل لأتصرف انا .. اكره هالغبيه اليسا ..
غيدا: اسمي حمــــــــــــــــود يا ماما ..
طفت اسيل المسجل وطلعت السيدي ..
غيدا: شسويتي يالحيوانه ..؟!
اسيل: انتضري باجي ما خلصت ..
فتحت الشباك ورمت السيدي وقالت: جذي خلصت ..
عصبت غيدا وقالت: يا الجلبه .. صج انج حقيره وما تربيتي .. الشريط مب حقج ..
اسيل: انا قلت لج طفيه بس مطنشه .. تستاهلي ..
غيدا: طيب يا اسيلوه .. والله لأندمج ..
اسيل: هددي من اللحين لين باجر ماراح اهتم ..
مازن: اخس يا القويه .. اتحداج توقفي في ويهها .. ترى اختي ضربها ضرب عيال ..
اسيل: محد كلمك ..
مازن: طيب انا عارف انه محد كلمني ما يبتي شي يديد ..
اسيل: عائله غثيثه افف ..
غيدا: الله واكبر يا العائله المثاليه حقتج ..
اسيل: سخيفه ..
ولفت وجهها عالشباك ..
دخلت غيدا سيدي في المسجل وشغلت على اغنيه رايقه ..
مازن: حمود شغلي اغنيه في بالي ..
غيدا: وشهي ..؟!
مازن: اعلن انسحابي ..
غيدا: مين يغنيها ..؟!
مازن: محمد عبده ..!!!
غيدا: طيب دقيقه ادور عليها .. اهو اغناني محمد عبده حقت السنه اللي راحت ..
دخلت وقعدت تدور عالاغنيه ..
اسيل: ههههههههههههههههههههههههههههههههههه ..
غيدا: سلامات .. ليه الضحك ..؟!
مازن: هههههههههههه تضحك على غبائج ..
طنشتهم غيدا وهي تدور ع الاغنيه واسيل ميته ضحك ..
مازن: ههههه خلاص وقفي .. الاغنيه مو هني ..
غيدا: شتقصد ..؟!
مازن: ههههههههه مو محمد اللي يغنيها .. هذا مايد المهندس هههه ..
سكتت تطالع فيه بعدين عصبت وقالت: طيب ليه تجذب ..؟!
مازن: تفاجأت من سؤالج عن المغني لأن هذي الاغنيه مشهوره فقلت بأستهبل وعبالي انج كمان تستهبلين .. ههههه بس صراحتا انتي هبله من صج .. يبغالي اكتب هالنكته في الجرايد عشان اوسع صدور الناس هههههههههه ..
غيدا: سخيف وايد ..
اسيل: هههههههههه صج انج مخفه .. ما توقعت انه في ناس بالغباء ذا هههههههه ..
غيدا: اسيلوه سكتي لا اقطج من الدريشه اللحين ..
اسيل: يربي يا حبيبتي تمدين ايدج وحتشوفين وش بسوي ..
غيدا: كأنج تهددين ..؟!
اسيل: ايه اهدد مثل ما انتي تهددي ..
قطت غاده وهي تقول بحماس: هيه هيه شباب شباب اسمعوا ذا المقطع ..
لفوا يطالعون فيها بحده فقالت باستغراب: شفيكم ..؟!
مازن: خليج في حالج لأن دخلتج غلط ..
غاده: اغبياء ..
ورجعت تدقدق في الايباد ..
لفت اسيل عالشباك وهي تقول: افف متى نصل .. باختنق هني ..
غيدا: اذا الوضع مو عاجبج انزلي لأني حتى انا بأختنق وانتي هني ..
اسيل: غبيه ..
غيدا: اسمعي .. ما دامج في سيارتي فلمي لسانج عشان ما ييج شي ما تحبينه ..
اسيل: ذليتينا بذي الخرده ..
غيدا: والله ما الخرده إلا انتي وخشتج اللي كأنها خشت ديك ..
لفت اسيل عليها وقالت: ما الديك إلا انتي .. صج انج وحده غبيه وسخيفه ..
غيدا: لفي لفي عالدريشه لأني مو طايقه اشوف ويهج ..
اسيل: عاد انا اللي بقطع نفسي عشان اشوفج ..
غيدا: اقول لفي ولا يكثر ..
اسيل بعصبيه: غيداؤؤه اقسم بالله لو ما انطميتي راح اراويج شغلج ..
غيدا: شوفي شوفي كيف ريولي ترتجف من الخوف .. اقول طيري وفكيني ..
مازن: حمود خلاص .. انتبهي للطريج .. سواقتج غريبه .. كل شوي تلفي شوي يمين وشوي يسار .. والله اخاف تصدمين ويضيع شبابي ..
غيدا: الله يا ذا الشباب اللي خايف عليه ..
دق جوال غيدا فردت وقالت: هلا يمه ..
الام: غيدا شفيج تسوقين جذي .. تعبانه ولا شي ..؟!
غيدا: لا مو تعبانه ..
الام: عيل ليش سواقتج مو متوازنه ..؟!
غيدا: في شوية مشاكل في السياره والسبه اسيل .. كل شوي تخاصم هذا وتمد ايدها على هذا ومسويه قلق ..
فتحت اسيل عيونها من الصدمه وقالت: يالجذابه ..!!!!
الام: معقوله ..؟!
غيدا: ايه وكل شوي تربكني في السواقه ..
اسيل: عن الجذب يا حماره ..
ومدت ايدها عشان تسحب الجوال .. بس غيدا بعدت عنها وزلقت ايدها عن الدركسون ولفت فيهم السياره ..
اسيل: غيــــــــــــــــــــــــــــــــدا انتبهــــــــــــــــي ..
رمت غيدا الجوال بسرعه ومسكت الدركسون وفحطت تفحيطه قويه عشان تثبت السياره ..
واسيل صرخت من الخوف لأنها تكره السرعه والتفحيط في السيارات ..
عدلت غيدا السياره ومشيت تمام ..
مازن: واااااااااااااااو حمــــــــــــــــاس .. عيديها مره ثانيه بلييييز ..
اسيل بسرعه: لااااا ..
غيدا: هههههههههههههه جبانه ..
اخذت الجوال وقالت: هلا يمه ..
الام بخوف: غيدا شصار وليه جذي وووووو << واسئله طويله عريضه <<
بعد فتره طويله جدا كانت شبه هاديه دخلوا حدود الخور وراحوا لمزرعة عبد الغني ..
المزرعه كانت كبيره مره ومفتوحه عالبحر وفيها بيت متوسط تقريبا بس حلو ..
فيه حول 12 غرفه  حمامات ومطبخين .. وكان مقسوم إلى قسمين ..
فحددوا ان قسم للرجال وقسم للحريم ..
الرجال كانوا ابو وائل وابو فيصل وابو رولا وفيصل ووائل وفارس ومحسن ومازن ..
اما الحريم كانوا ام وائل وام فيصل وام مايد وام رولا وريما وغيدا واسيل ولمار ورولا ولمى وغاده ولارا ..
وصلوا ودخلوا داخل المزرعه فكان بإنتظارهم ام وائل ..
سلموا وبدأوا يعرفون بعض على بعض وبعدين قالت ام وائل ..
ام وائل: في قسم الحريم ست غرف واحنا قسمناها .. غرفه لي انا وام رولا .. والغرفه الثانيه لأم فيصل وام مايد .. والغرفه الثالثه لغيدا وريما ..
اسيل: حلو فكه ..
غيدا: من ويهج ..
ام وائل: والرابعه كنت بخليها لأسيل ولمار بس لمار تقول انها تبغى تكون مع رفيجتها رولا .. والخامسه لاسيل ولمى .. والاخيره للبزارين ..
لارا: مــــــــــــــــامــــــــــــــــا ..
ام وائل: هههههه نسيت .. الغرفه الاخيره للارا وغاده ..
اخذت غيدا شنطتها وقالت: بروح اريح في الغرفه ولا احد يجعزني .. حتى لو ياء الغدا لأحد يقومني .. انا بقوم براحتي ..
اخذت شنطتها وراحت الغرفه ..
اسيل وهي تطالع في لمار: افتكينا من الاولى وعقبال الثانيه ..
رولا: هذي هي اسيل اللي تكلميني عنها ..؟!
لمار: ايوه ..
رولا: يوووه قد ايش هي غثيثه ..
رفعت اسيل حواجبها وقالت: ما الغثيث إلا انتي ورفيجتج .. انا بروح ارتاح كمان ..
لمار: افتكينا من الغثيثه الاولى وعقبال الثانيه ..
اسيل: غبيه ..
اخذت شنطتها وراحت الغرفه ترتاح هي كمان لأنها حدها تعبانه من السفر ..
⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄ ◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄ ⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊
على آذان العصر كان في غرفته يبدل ملابسه ..
بعد ما خلص نزل تحت وقابل في وجهه اخته الغثيثه ..
الاخت: على وين .. معقوله تطوعت وصرت تروح للصلاة من بدري .. سبحان الله ..
عصب وقال: اقسم بالله لو صلحتي هالحركه مره ثانيه ياويلج .. انا اخوج الكبير واروح في اي مجان وفي اي وقت ابغاه ولا يحق لج تسأليني .. فاهمــــــــــــــــه ..؟!
هزت راسها بخوف وقالت: طيب ..
ابتسم .. من عادتها تعاند وتهرب .. بس اللحين ما تقدر لأنه واقف قدامها ..
خرج من البيت وركب سيارته واتجه للمطعم اللي بيقابل فيه صاحبه ..
وصل ودخل فشافه ينتظره ..
جلس وقال: شكلك ياي من بدري ..
ابتسم صاحبه وقال: لا توي ييت .. ها كيف الاخبار ..؟!
فابتسم ابتسامه واسعه وقال: عال العال .. امس كلمتها وواضح انها تتهرب بس هددتها بطريجه غير مباشره وقالت خلاص بفكر ..
ضحك وهو يقول: والله منت بهين يا ياسر ..
ياسر: اكيد .. انا حلفت اني اييب راسها وخلاص باجي لي شوي واييب راسها ..
خالد: طيب انت حددت لها الموعد والاستراحه وكل شي ..
ياسر: لا .. قلت لها ابي اشوفج يوم الاحد الياي وبس .. يوم السبت بقول اني راح آخذها بنفسي .. لأنها مستحيل توافق لو قلت لها اني ابيج تيين لأستراحه مختلطه ..
خالد: وليش مستحيل .. تقدر تهددها ..
ياسر: انا اعرف ريما اكثر منك .. هي مو من النوع اللي يضيع نفسه بتهديد .. راح تختار انها ما تاخذ مخدرات ..
خالد: اها ..
ياسر: قلتم لفيصل عن الموعد ..؟!
خالد: امس انا كلمته ويقول ان الموعد حلو ..
ياسر: يعني راح يي ..؟!
خالد: اكيد ..
ياسر: طيب قلت له ايش الاستراحه ..؟!
خالد: ايه قلت له انها استراحة الـ***** فقال لي ليش غيرتم الاستراحه ..
ياسر: لازم نغيرها لأن صاحب الاستراحه اللي مستأجرينها اول بدأ يشك ..
خالد: ايه قلت له فقال سبحان الله عندكم ذكاء ..
ياسر: هههههههه ليه عباله اننا اغبياء ..؟!
خالد: مدري عنه ..
ياسر: طيب انت مين بتييب من خوياتك ..؟!
خالد: هههههههه بييب سحر ..
ياسر: طيب ليه تضحك ..؟!
خالد: هههههه تخيل لمن قلت لها انبسطت وبغت تنط من الفرحه بس مسكت نفسها بسرعه وقالت مدري بأفكر ..
ياسر: هههههههههههههههههههههه البنت شكلها كانت تنتظر من اول ..
خالد: هههههههه يمكن ..
ياسر: اقول خالد ..
خالد: نعم ..
ياسر: منت ملاحظ شي ..؟!
خالد: شي زي ايش ..؟!
ياسر: اسأل نفسك ..
خالد: لا مو ملاحظ ..
ياسر: انت اللي عزمتني عالمطعم وما شفتك قدمت شي ..
خالد: هههههههههه نسيت ..
ياسر: لا يا شيخ ..
طلب لهم شي ياكلونه وبعدين بدأوا يسولفون في اشياء ثانيه ..
في الطاوله اللي جنبهم بالضبط .. كان فيه اثنين ويتكلمون ..
رفع واحد منهم جواله وقال: الو .. هلا حضرة الرائد ................ خلاص قدرنا نعرف الموعد والمجان والاستراحه ................. ايوه ................ طيب خلاص ننسحب ولا ننتظرهم لين يقومون ..؟! ................. طيب حاضر ................. مع السلامه ..
قفل وقال: يقول انتظروا عشان يمكن نعرف معلومات اكثر ..
الثاني: اوكي ..
⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄ ◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄ ⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊
.. في احدى مطاعم الدوحه الفاخره ..
خرج هو وامه لهالمطعم من شدة فرحته ..
اسيل وعلاقته صارت تمام معاها وامه وعدته انها تخطبها له في اقرب فرصه .. فطبيعي انه ينبسط ..
آرثر: طيب يمه متى بتروحين ..؟!
الام: قلت لك في اقرب فرصه شفيك مطيور ..
آرثر: طيب شرايج الجمعه لمن ترجع من السفر ..؟!
الام: لا لا بيكونون تعبانين وما يصير ..
آرثر: طيب السبت ..؟!
الام: لا انا اقول يوم الخميس احسن ..
آرثر: لا يمه بعيد ..
الام: لا هذا احسن وقت .. انت كلمها السبت عشان يمديها تجهز نفسها ..
آرثر: طيب شرايج اكلمها اللحين ..؟!
الام: آرثــــــــــــــــر ..
آرثر: اوكي اوكي سوري ..
الام: خلاص غير السالفه ..
آرثر بإبتسامه: يمه ..
الام: هلا ..
آرثر: في اي شهر انتي ..؟!
الام: في السادس ..
آرثر: جم باجي لج وتولدين ..؟!
الام: ثلاث اشهر ..
آرثر: لا كثير ..
الام: هههههههه ..
آرثر: طيب يمه مين في بطنج .. ولد ولا بنت ..؟!
الام: شتتوقع ..؟!
آرثر: مدري ..
الام: طيب انت شتبغى ..؟!
آرثر: كله حلو .. بس ودي بولد اكثر ..
الام بإبتسامه: هو ولد ..
آرثر: من جــــــــــــــــد ..؟!
الام: ايوه ..
آرثر بفرحه: حلــــــــــــــــو .. طيب ايش بتسمينه ..؟!
الام: ما فكرت .. انت ايش تبغى ..؟!
آرثر: يعني انا اسميه ..؟!
الام: ايوه .. ابوج كلمته في هذا الموضوع وقال اللي يعجبكم وانا ما فكرت بس اللي تبغاه انت بسميه ..
آرثر: طيب بسميه اسم عربي ..
الام: براحتك ..
آرثر: اممم ابي رائد ..
الام: اوكي طيب ..
آرثر: طيب متى بتولدين ..؟!
الام: ههههههه قلتلك بعد ثلاثه شهور ..
آرثر: طيب اولدي بسرعه .. ابغى اشوفه .. هذا بيكون اول اخ لي ..
الام: شرايك اولد اللحين ..؟!
آرثر: لا مو اللحين .. انتضري لين اوصلج المستشفى ..
الام: ههههههههه آرثر انت تبي الولد يموت ..؟!
آرثر: لا .. بس ابي اشوفه بسرعه ..
الام: طيب اذا تبي تشوفه انتظر ..
آرثر: طيب .. اقول يمه ..
الام: نعم ..
آرثر: شدلع رائد ..؟!
الام: مدري .. انت اللي طلعت الاسم وانت اللي لازم تدور له دلع ..
آرثر: طيب شرايج برورو ..؟!
الام: ههههههه احسه زورو مو رورو ..
آرثر: طيب شرايج برئودي ..؟!
الام: هذا حلو ..
آرثر: طيب ايش ادلعه .. اقول رئودي او رئود ..؟!
الام: اللي يعجبك ..
آرثر: طيب .. لمن يضحك ويكون تمام اناديه رئودي ولمن يعصبني بسميه رئود ..
الام: هههههههه ..
آرثر: لا بسميه كل الاسمين في كل الاحوال لأنه مستحيل يعصبني ..
الام: شدراك انه مستحيل يعصبك ..؟!
آرثر: لأنه حتى لو عصبني انا مستحيل ازعل منه ابدا .. يمه ..
الام: نعم ..
آرثر: ايش اشتري له هديه ..؟!
الام: هههههه بدري ..
آرثر: انا بشتري غرفه نومه ..
الام: بس هو بينام معي ..
آرثر: ليش ..؟! طيب ليش ما ينام معي ..؟!
الام: لا ما يصير لأني انا بهتم فيه وانا بدخله الحمام وانا اللي بنومه .. المفروض يقعد معي لين يصير عمره سنه ..
آرثر: طيب عادي .. بشتري غرفته ولمن يصير عمره سنه بينام فيها ..
الام: مو حلو تشتريها بدري لأنها راح تنعدم بالغبار و.........
آرثر: بستأجر وحده تنظفها يوميا ..
الام: خلاص مخطط ..
آرثر: ايوه .. بروح الاثنين اشتريها ..
الام: شمعنى الاثنين ..؟!
آرثر: عشان بآخذ اسيل تختار معي .. بقولها السبت عشان تفضي نفسها يوم الاثنين ..
الام: هههههه الله يهديك بس ..
آرثر: اقول يمه ..
الام: نعم ..
آرثر: لا تشتري اي شي .. انا مقرر اني اشتري له كل شي ليين يتزوج .. بشتري ملابس والعاب واوديه الملاهي .. وانا بدخله للمدرسه وانا بعطيه مصروفه يوميا وانا بشتري اغراض الدراسه .. وانا بدخله الاعدادي واشتري له سياره وجوال وكل اللي يبغاه وفي الثانوي انا بساعده في دخوله للقسم اللي يبغاه وبعدين انا بدخله الجامعه حتى لو كانت جامعه خاصه .. ولمن يتزوج انا اللي بدفع المهر وانا باحجز القاعه واتكفل بكل شي .. بسوي كل هذا وما ابي احد يتدخل برائد غيري ..
الام: هههه مستحيل تقدر .. لأنك مصيرك تحتاج للفلوس وتاخذ من عندنا ..
آرثر: بآخذ قرض من البنك او استلف من اصحابي بس المهم ما تدفعون شي لرائد معاي ..
ابتسمت وقالت: الله يخليكم لبعض ..
قام آرثر وقال: ياللا بنروح اللحين نتمشى .. ما تعبتي من الجلسه في المطعم ..؟!
الام: إلا والله تعبت ..
فقامت وراحت معاه .. مشاها لين تعبت وبعدين رجعوا للبيت . .
قبل لا يطلع لغرفته قال: يمه ..
الام وهي تجلس عالكنبه: هلا ..
آرثر: شرايج نروح نخطبها الثلاثاء ..؟!
الام: شرايك اخطبها لمن تخلص 22 سنه يكون احسن ..؟!
آرثر: لا لا مشكوره ..
طلع لغرفته وشغل مسجله على وحده من اغاني جستن بيبر وبدل ملابسه وبعدين جلس عالسرير وطلع دفتره وكتب فيه ..
"" ينصب الكلام شهد بين شفتيك ويذوب الشهد رحيقاً . . .
ليروي ظمأ روحي المشتاقه إليك . . .
فنتعانق عناق الروح للجسد ... والنبض للقلب ... والنور للعين ..
فما أحب هذا إلي وما أروعه من شعور يمتزج الرحيق بالرحيق . . .
وتنصهر الروح بالروح . . . ويرتبط القلب بالقلب . . برباط أبدي يدوم
بدوام الحياة
ها أنا حبيبتي أقترب منك ... فأقتربي مني فاتحه لي
ذراعيك وأغمريني بنظراتك وحنان صدرك . . وأنظري في عيني ولا تتركينني حتى
تقرأي مجلدات الحب داخلها وترى صورتك فيها .. وأستمع لنبض قلبي
أقتربي .... فأنا بدون حبك جسد بلا روح ""
⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄ ◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄ ⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊
في مزرعة ابو وائل .. كان فارس واقف قدام البحر يطالع في الغروب وهو يفكر ..
مر حول يومين وإلى الآن ما تلقى اتصال من وصايف ..
يوم الاحد راح المستشفى واخذ الفحوصات وحط رقمه وقال اذا جت بنت عشان الفحوصات فأعطوها هذا الرقم ..
واليوم اللحين الثلاثاء ومحد دق ..
تنهد وقال: اخاف تتصل على اسيل ..
جت لمار عنده وهي تبتسم وقالت: كيفك فارس ..؟!
لف فارس عليها وقال: تمام ..
لمار: ايش تسوي هنا ..؟!
فارس: افكر ..
لمار: اكيد تفكر فيني صح ..؟!
طالع فارس فيها بإستنكار وقال: انتي ..؟! لا كنت افكر في شي ثاني ..
لمار: طيب في مين ..؟!
........: يفكر في لبنى ..
لفت لمار وشافت اسيل فقالت بإستغراب: مين لبنى ..؟!
اسيل بإبتسامه: وحده سنه اولى في كلاسي .. بنت قمه في الروعه والنعومه .. عليها بياض روعه وشعرها اسود يينن .. ملامحها ملامح براءه .. كلها على بعضها ملكة جمال .. امممم هي احلى منج بكثير ..
طالعت فيها لمار وقالت برتباك: ومين تكون لبنى هذه ..؟! وليش فارس يفكر فيها ..؟!
اسيل بخبث: فارس يحبها يا لمار ..
انصــــــــــــــــــــــــدمــــــــــــــــت لمار وقالت بسرعه: جــــــــــــــــذابه ..
اسيل: لا مو جذابه .. ليه عبالج انه يحبج انتي ..؟! اقول طالعي في شكلج بالمرايه واحكمي على نفسج .. ويهج مو ويه حب ومستحيل احد يحبج ..
فارس: اسيل خلاص ..
اسيل: لا مو خلاص .. خل ذي الآدميه تعرف قدر نفسها ..
لمار والدموع في عيونها: جذابه .. فارس ما يحبها .. انتي تجذبين ..
اسيل: لا يا حبيبي ما اجذب .. شيبي فيج عشان يحبج .. مدلعه ولسانج طويل ولزقه ومايعه وصوتج عالي ودوم تتمشكلين .. عكس لبنى تمام .. كل النعومه والاناقه فيها ..
لمار بصراخ: جذابــــــــــــــــه .. فارس مستحيل يحب اللي ما تتسمى هذه .. انتي تبين تقهريني وبس .. بس بالحقيقه انتي جــــــــــــــــذابه وجذابــــــــــــــــه وايد ..
اسيل: لا يا حبيبتي انا مو جذابه .. اذا انتي مو مصدقتني راح اتصل عليها اللحين عشان بس تسمعي صوتها وتعرفين الفرق بينج وبينها ..
فارس: بليز يا اسيل خلاص ..
لفت لمار عليه وقالت بترجى: فارس كلام اسيل صج ولا جذب ..؟! انت تحب هذي البنت ولا لا ..؟! فارس ياوبني ..
فسكت فارس ومو داري وش يقول ..
لمار: ليه ما ترد ..؟! رد وياوبني ..
فارس: لمار حبيبتي انتي لا تزعلين لأنه ........
لمار: بس خلاص ..
لفت وراحت جري وهي تبكي ..
لف فارس على اسيل وقال: انتي شسويتي ..؟!
اسيل: احسن تستاهل ذي وحده غبيه ومدلعه وانا حدي مو طايقتها ولا طايقه اشوفها ..
فارس: بس غلط اللي ساويتي ..
اسيل: اعرف انه غلط ..
فارس: بروح احاول اراضيها ..
وراح .. طالعت اسيل فيه وبعدين لفت تطالع في البحر فتره وهي سرحانه ..
جت غيدا من وراها وقالت: شفيها الانسه اسيل واقفه جدام البحر .. لا يكون عندها هموم وتبي تقطها في البحر ..؟!
طالعت فيها اسيل بقرف وقالت: واخيرا صحيتي من نومج .. تصدقيني اني فرحت لمن طولتي بنومج .. قاعده اقول لنفسي ان امنيتي تحققت ونومة اهل الكهف صابتج ..
غيدا: بسم الله علي .. عساه في اللي يكرهوني ..
اسيل: عيل كل الناس بينامون .. ببساطه الكل يكرهج ..
غيدا: لا يا حبيبتي انتي غلطانه .. رفيجاتي يحبوني واهلي يحبوني واقاربي يحبوني وخويتي تحبني وهذولا اهم ناس والباجي طز فيهم ..
اسيل باحتقار: وعندج خويه بعد ..؟!
غيدا: طبعا عندي .. ليه كنتي تحسبيني من التكه القديمه وما عندي خويه ..؟!
اسيل بقرف وتقزز: الله يقرفج انتي وياها ..
غيدا: لعلمج خويتي احلى وانعم وارق منج وايد .. واسمها بيشو .. ولو سمحتي لا تغلطي عليها لأني لو سمعتج تغلطين ولو بكلمه وحده حتشوفي جدامج وحش مو انا ..
اسيل: يمه خوفتيني ..
غيدا: استهزئي على راحتج بس المهم ما تجربين تغلطين ..
اسيل: طيب وينها ذي البيشو ما عمري شفتها ..؟!
غيدا: لأنها مو هني .. في الجامعه القديمه اللي كنت فيها ..
اسيل: طيب هي خويتج المفروض تلحقج وما تتركج ..
غيدا: ابوها قالها كملي الترم الاول وفي الثاني انا بأنقلج ..
اسيل: يعععع يعني حتيي جامعتنا ..؟! لا تكون سنه اولى ..؟!
غيدا: لا الحمد لله لأني ما اتشرف انها تكون في نفس صفج .. هي ثاني ..
اسيل: واااه ريحتيني يا شيخه ..
غيدا: لا بالله .. احلفي ..
اسيل: ما يحتاي لأني ماني جذابه ..
غيدا: تصدقين اني قاعده اسأل نفسي سؤال .. انا وش اللي موقفني مع خروف مثلج ..؟! اففف ..
وراحت .. طالعت اسيل فيها بعصبيه بس ضبطت نفسها .. هي اللحين مبسوطه انها بكت لمار وما تبي تخرب فرحتها ..
راحت بإتجاه البيت وهي داخل صادفت وائل وهو خارج ..
وائل: اهلين ..
اسيل: هلا .. غريبه داخل هنا .. شكنت تبي ..؟!
وائل: ههههه ليه يعني حرام ..؟!
اسيل باحراج: هههه لا مو قصدي جذي .. بس مستغربه ..
وائل: اوكي دخلت اسألهم اذا كانوا يبون عشاء من برى او نشوي هنا ..
اسيل بحماس: اكيد قالوا نشوي ..
وائل: ههههه لا .. قالوا باجر نشوي احسن ..
اسيل بقهر: اوووف منهم .. اغبياء ..
وائل: اقول اسيل ..
اسيل: نعم ..
وائل: مشغوله ..؟!
اسيل: لا ..
وائل بإرتباك: ط طيب ابيج بموضوع ..
اسيل بحماس: اكيد الموضوع حق السياره ..
وائل بإستغراب: السياره ..؟!!!!!!!
اسيل: ايوه .. تتذكر لمن وصلتني ذاك اليوم للجامعه .. كنت بتقول شي بس بطلت وقلت بعدين بقولج ..
وائل بإبتسامه: ما تنسين ..
اسيل: قول هو نفسه الموضوع صح ..؟!
هز راسه وقال: ايوه ..
اسيل: طيب ايش هو ..؟!
تردد وقال: ما يصلح هنا عند الباب ..
اسيل: طيب امش للبحر ..
سكت وهو يحس نفسه متردد ..
لف ورى لمن سمع صوت ابوه يناديه ..
وائل بسرعه: ابوي ينادينه .. اقولج بعدين ..
وراح .. استغربت وقالت: كأنه ما صدق احد يناديه عشان يتهرب ..
هزت كتفها ودخلت فشافتهم جالسين ويسولفون ..
كانوا لارا وغاده يتبادلون مقاطع في الايباد ومتحمسين .. ما شالله عليهم بسرعه تصادقوا ..
وكانت لمى تقلب في التلفزيون .. وريما كالعاده بجوالها اللي صار ظلها ..
طالعت اسيل فيهم بطفش .. بنات عمها وتكرهم .. اختها ومنشغله عنها .. يعني مافي احد تسولف معاه ..
اسيل: آآآه متى نرجع للدوحه .. اول مره اشتاق للجامعه بقوه ..
راحت لجهة غرفتها فمرت من جنب غرفة لمار وسمعتها تبكي ..
قربت اسيل وسمعت رولا تقول: خلاص اهدأي وطنشي .. اكيد اسيلوه تجذب ..
لمار وهي تبكي: لا مو جذابه .. كان واضح ان فارس يحب وحده ثانيه .. ليــــــــه يساوي فيني جذي .. اكرهها ذي اللبنى اكرهها .. ابي اشوفها عشان اقطعها ..
رولا: طيب هدي اللحين .. ما يصير تبجين وكأنج طفله ..
لمار: مابي اهدي مابي ..
مشيت اسيل لغرفتها وقالت: احسها مسجينه .. فعلا قسيت عليها وبقوه ..
دخلت غرفتها ومسكت جوالها تكلم صاحباتها ..
⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄ ◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄ ⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊
__________________  |