| البارت الخامس عشر
مها: لا وش هالصدف موب هو مستحيل
شهد: اقول كولي تبن
مها: ايش اسمه؟
شهد: شتبين باسمه؟
مها: بخطبه لبنتي يعني وش ابي بالاسم بتأكد هو او لا
شهد: بوسي راسي
مها انجنت: شهييدد ووجع
شهد: صقرر اسمه صقر
مها: كذابهه!
شهد قامت: انا الغلطانه جالسه معك وتكذبيني بعد مالت علي وعليك
مها: طسي طسي بجلس لحالي شوي
مها جلست فتره تفكر: قبل كم يوم مقابله ياسر واليوم شفت صقر الله يستر ان ما طلع لي راشد بكرا
..................................
راشد: هاه كيف حالك الحين احسن؟؟
عبدالرحمن: ان شاء الله احسن
راشد: ما قلت لي للحين ما رضى مؤيد؟
عبدالرحمن: ولا ناوي يرضى
راشد ضحك: ياخي شفيك عليه عطه البنت وخلصنا
عبدالرحمن: يلا بس لو ما يبقى غيره بذالدنيا ما زوجته اختي صاحي انت ولا مهبول! بيطير عقلها ذا اخطب له انا من عيوني بس يبي اختي بالذات لا
راشد: حرام عليك ياخي الرجال شاريها
عبدالرحمن: انت متغير بقوه لهالدرجه مها جمال عشان تخق عليها كذا هي والبعير واحد
راشد تحسس من هالموضوع: صك صك بالله خربت النفسيه الثور الي يسولف معك
عبدالرحمن: اوف اوف يا ساتر توك قبل كم سنه تحبها وش قلب حالك صرت تكرهها
راشد: متى قلت اكرهها
عبدالرحمن: ياخي انت جوك بيض رح ارقد ابرك لك
راشد: اقول وشو اليوم اللي تحس ان الناس كلهم ينبسطون فيه؟
عبدالرحمن: الخميس يمكن
راشد: اجل بروح الخميس
عبدالرحمن: على وين؟
راشد ابتسم: بعدين تعرف
........................
بعد يومين
مها: وش ذالكلام يبه تستهبل!!
ابو خالد: انا ما اطلب انا آمر ومن بكرا تعبنا وحنا نعطيك فرص
مها: بس انا مابي غصب هو
ابو خالد: ايه غصب يلا منب مطول مع السلامه وقفل بوجهها
مها تلفتت تدور احد تحط حرتها فيه
مرام: مها الزنجبيل وينه؟ بسوي حمسة دجاج يحبها بطنك
مها معصبه: انحمستي على براكين ي حماره قولي امين
مرام: جعلك للسكته لا تدعين علي
مها: اقول شمي تراب انا تافله ام العافيه توكلي على مطبخك لا يجيك شي ما يرضيك
مرام مشت: سخيفه وربي
لميس طلعت لهم لابسه بدله رجاليه: شرايكم ي عيال انفع بويه؟
مها ركبتها سبعة عفاريت ومسكت جزمتها ورمتها على لميس
لميس: وجعع خير
مها: اذلفووا عن وجهي مو ناقصتكم انتم بعد
لميس: شفيك صاير شي؟
مها: ابوي يبيني اسكن عندهم واترك هالمكان
لميس: طيب انقلي عندهم وتعالي عندنا كل يوم
مها: مو هنا المشكله ي بعد حيي
لميس: اجل؟
مها: طلع زياده على كذا ساحب ملفاتي من جامعتي ودخلهم بجامعه بالرياض بدون ما يشاورني حتى
لميس ومرام: حلفي
مها: والله شي يقهر صح
لميس فرحانه: بالعكس ما يقهر الا فله
مها: وش فلته ي بزر ما تبين الخير لي!
مرام: لا كذا بتجلسين معنا ما راح تسافرين
مها: ما ادري افرح عشانكم تبوني معكم ولا اعصب عشان وضعي معجبكم ولا ازعل عشاني منب ساكنه معكم ما علينا بروح للمول من تجي معي؟
رنا طلعت بعباتها: هذا سؤال بالله اكيد بنجي
مها: بسم الله من وين طلعتي انتي؟
رنا: يلا يلا مشينا مافيه وقت مها اتصلي على سواقكم بسرعه
لميس: جزمتي الرماديه ويينها اعترفوا
ريناد طلعت يلا مشينا
لميس شهقت: ي حراميه
ريناد: وشو؟
لميس: دا بتاعي جيبي الجزمه اشوف
ريناد: لبستها خلاص فات الفوت
لميس سحبت رجلها: اقول جيبي
وانتهى نص اليوم وهم هواش على جزم وعبايات
.............................
مر باقي الاسبوع وصار اليوم الخميس
والبيت انواع الخبه الخدم رايحين جايين وشيل وحط وحالتهم حاله لأنه راح يجي ضيف ابو العائله المنتظر
مها: احول احول بيجي صديق ابوي ولا الوليد بن طلال
فهد متزكرت وكاشخ: ي شيخه بيجي اخو المزه لزوم نقوم بالواجب
مها: وش دراك ان اخته مزه ي قليل الحيا
فهد: تقوله شهد مدري عنها عاد
مها: وانتي وش دراك؟
شهد: تقوله صديقتي
مها: وصديقتك وش دراها
شهد: بنت خالة صديقتي تقول ان اخوها يقول ان ولد عمتهم يصير ولد خالها وشافها بالغلط وخق
مها: ووووه مشواار
شهد: امزح بس صديقتي شافتها بعرس المهم هنا مو اخته المهم هو هذا رجل اعمال مشهوور ما تتخيلين شقد مشهور
مها: اقول اروح انام احسن لي
وبعد ساعتين وصل الضيف وجلس مع ابو خالد
ابو خالد: الا وش الموضوع الي بغيتني فيه
الضيف قام وراح لأبو خالد وباس راسه ويده: طلبتك لا تردني
ابو خالد: سم
الضيف باس يده: الله يسعدك قل تم
ابو خالد: انت قل الي تبيه والي اقدر عليه بسويه
الضيف: تعرف يا ابو خالد انا كبرت وعمري صار 27 وابي اسعد اهلي واكمل نص ديني باختصار انا جايك اليوم اطلب يد بنتك مها
ابو خالد تفاجئ من طلبه: والله انك ي ولدي رجال واصيل ومافيه مثلك ولو المسأله برضاي كان زوجتك بنتي اليوم قبل بكرا بس البنت رافضه تتزوج
توازن بجلسته وابتسم: قول لها راشد الـ.... جاي يخطبك وخلها تفكر على راحتها
ابو خالد: ابشر بس ما اضمن لك
راشد ضحك: انا ضامن لنفسي
ابو خالد ابتسم على ثقته الزايده
وكملوا سوالف عن الشغل
..........................
في المستشفى
عند عبدالرحمن
صقر انصدم: قول غيرها!
عبدالرحمن: سواء صدقتني او كذبتني راشد راح يتقدم لمها واكيد تقدم لها وخلص بس
صقر جلس: لا لا راشد انججن فقد عقله احد يخطب بنت ما تبييه؟ وانت ليش ما وقفته تبيه يعيش بمعاناة ثانيه بعد ما عانى منها اخر مره
عبدالرحمن بعصبيه: حاولت امنعه قال انه متأكد انها تحبه
صقر ابتسم بسخريه: اجل خله يسوي الي يبي هو الخسران وانا غلطان يوم اني اخاف عليه مها لعبت فيه وتركته (بحقد) مستحيل اسامحها
عبدالرحمن عقد حواجبه: اسحب كلمتك
صقر: الحين صرت تدافع عنها ي ولد العم
عبدالرحمن: انا اعرف مها مستحيل تعذبه ثانيه
صقر: بنشوف (طلع)
..............
في بيت ابو خالد
مها: مابيه
ابو خالد: على كل حال ما راح اجبرك بس هو وصاني اقول لك اسمه وانك لو سمعتيه بتفكرين
مها: مابي اعرف اسمه
ابو خالد تنهد: راشد الـ...... هذا اسمه
مها: يعني يحسبني بعرفه واوافق من اسمع اسمه
ابو خالد: فكري زين (طلع)
مها (لا يكون نفسه بس لا لا ما اتوقع يجيني بعد ما قلت له برفضك بس يمكن ليش لا اوووه خلاص بتصل على ياسر واتأكد)
مها اتصلت: هلا
ياسر: اهلين
مها: اا بسألك سؤال بس لا تفهمني غلط وجاوب بس
ياسر: اخلصي علي وراي شغل
مها: اا ووش عايلة راشد؟
ياسر ابتسم: ليه؟
مها: قلت لك لا تفهم غلط وجاوب بس
ياسر: الـ.....
مها انصدمت (لا مستحيل يمكن تشابه اسماء)
ياسر بقصد منه: وش بك سكتي؟ ااه نسيت اقول لك ترى راشد جاي لبيتكم اليوم يخطبك دريتي عنه؟
مها قفلت بوجهه وبدت تنزل دموعها بهدوء
شهد دخلت: مها اجل خطبك يالوصخه (شهقت) شفييك؟
مها ارتمت بحضن شهد واشتد بكيها: شهد انا ما عدت لقيطه صح؟ صار لي نسب صح؟
شهد: وش قاعده تقولين اكييد منتي لقيطه
مها: طيب لو درا اني كنت لقيطه بيتركني؟ بيقول ما ابيها؟
شهد: مين؟
مها زاد بكيها: رااشد
شهد انفعلت من الموضوع: لاا طبعا المفروض يفتخر بعد انه تزوج وحده مثلك
مها: جد؟
شهد: اكييد حبيبتي غسلي وجهك لو ما يبيك ما خطبك بس انتي تحبينه؟
مها استحت: كنت احبه
شهد: والحين؟
مها: مدري بس اذا تبين الصراحه انا خلال هالسنتين كنت اتعذب من شوقي له
شهد: كنتي تعرفينه اصلا؟
مها انتبهت لكلامها: هاه لا لا بس اقصد يعني من شدة ما كنت احبه وكذا يعني
شهد درت ان السالفه فيها شي بس ما حبت تسأل وطلعت
مها (اخاف اوافق واندم احسن لي افكر قبل واشوف اذا ما زلت احبه او لا)
..................
صقر بعصبيه: كيييف تخطبها بدون ما تشاورنا؟
راشد ببرودة اعصاب: وليش اشاوركم
صقر: تبي حالتك ترجع زي قبل؟
راشد: هالمره غير انا متأكد انها بتوافق
صقر: انت بتجنني اكيد مو هي رفضتتك قبلل
راشد ابتسم: بس انا اكتشفت انها تحبني
صقر: هه ومين قاله؟
راشد: هي قالته
صقر: لا تكذب علي
راشد: اسأل عبدالرحمن هي قالت له انها تحبني
صقر انصدم: اجل ليش رفضتك؟
راشد: ما اعرف الي اعرفه انها تحبني وبس
صقر: طيب لو رفضتك ايش بتسوي؟
راشد: مدري ما فكرت هي تحبني وما راح ترفض
ياسر: اكيد ما راح ترفض
راشد ابتسم: هلا والله
ياسر: هلا بك بساعدك هالمره بس
راشد: بإيش؟
ياسر: خذ من عندي رقم مها واتصل عليها
راشد: عندك رقمها!
ياسر: اكيد
راشد ما قدر يجمع كلمتين على بعض من الفرحه
ياسر ضحك: اعصابك
اخذ راشد الرقم وراح بعيد عنهم واتصل عليها بس ما ردت اتصل ثانيه ولا ردت: شفيها ما ترد!
اتصل مره ثالثه وردت
مها: من معي؟
راشد بهدوء: اشتقت لصوتك مها
مها: من انت؟
راشد: نسيتي صوتي؟
مها بتردد: ر راشد؟ صح راشد؟
راشد: ايه راشد ي عيونه
مها بدت تبكي: رااششد وييين كنت
راشد ابتسم: ما نسيتك ي مها كل الوقت افكر فيك وبس صح اني كنت ابي اعرف سبب رفضك لي قبل بس الحين ما عاد يهمني دامك تحبيني
مها ظلت تبكي ولا ردت عليه
راشد: تكفين لا تبكين انا صرت معك خلاص
مها تشهق مع البكي: ك كننت اقول يمكن ما عدت احبه ببس من سمعت صوتك كل شي تغير راشد ابييك احبك لا تتركني زي اهلي لا تعذبني بحبك
راشد: اترك كل الناس ولا اتركك زي ما ضيعوك اهلك مره وتخلوا عنك اهلك مره وعذبوك مراات جعلي اموت ان تركتك
مها انصدمت: انت تدري!
راشد: وليه ما ادري
مها: بطلب منك طلب راشد
راشد: قولي اسمعك
مها: خلك معاي لا تسكر الخط
راشد حس انه ملك كل شي: مجنون اسكر انا
وظلوا يتكلمون لوقت طويل
..............
في مكان آخر
....: هاه جبت الاوراق الي قلت لك عليهم
مد الاوراق: ايه طال عمرك
ابتسم بشر: والله وطحت ولا سمى عليك احد ي راشد ( وبدى يضحك)
انتهى البارت
كنت اكتب رواية ثانيه عشان كذا ما نزلت شي
بما ان الاجازه قريبه وانا فاضيه
بنزل بارتين يوم السبت انتظروني |