02-19-2008, 07:44 PM
|
| |
| رد: غلا
°¨*~¤¦ الفصل الرابع ¦¤*~¨°
بعد نص ساعه بصالة الانتظار جاهم الدكتور أخيراً
خالد على طول وقف وراح له
والدكتور علامات الخوف والارتباك عليه
وخالد بعد ..
خالد: ها بشر دكتور أخوي شفيه؟
الدكتور ماعرف شيقول؟
الدكتور: حمدلله كل شي تمام بس انتوا اهملتوا الولد كثير ، جاه هبوط حاد ،،
معقوله حد يتم اسبوع بدون أي أكل؟ ولارشفة ماي حتى !
خالد نزل راسه والحززن كله فيه على أخوه
الدكتور: حمدلله الحين هو أحسن بكثير ركبنا له مغذي واطلب منكم انكم
تعطونه كل يوم 3 وجبات كاااامله بالحلوو والحلو كثرو له منه واحرصوا على اكله
خالد: أكيد يادكتور مايبي لها كلام
الدكتور: حمدلله على سلامته وانها جات على جي ..
خالد: نقدر نشوفه دكتور؟.
(فهاللحظات لطيفه وغلا راحوا لخالد والدكتور، الدكتور طالعهم وشاف غلا تأتأ بكلامه ورد يحاجي خالد)
الدكتور: أأ..أك،، أكيد تقدرون تفضلوا..
دخلت غلا ولطيفه وخالد ...
خالد بسرعه ركض لعند اخوه ومسك بحدايد السرير باس راس اخوه
خالد: حمدلله على سلامتك يابوسعود ..
لطيفه يدها على جبينه ورقبته كانها تجيس حرارته
لطيفه: ماتشوف شر يمه، أحسن الحين
(عمر كان بس يحرك عيونه يشوفهم مايبي يرد على أي حد بس يبي غلا، حبه اللي ظاع!)
غلا كانت واقفه عند الباب تنشف دموعها وتحاول تمسك روحها
دخلت ..
شافت عمر وعمر شافها
كلام وايد كانوا يقولونه لبعض من نظراتهم ..
عمر(وينج غلاي! ولهاان عليج حيل): .........
غلا(انا هني بعيونك، ياااه شاللي سوا فيك جي! هالكثر تحبني؟):.....، ح .. حمدلله على سلامتك عمر..
عمر عيونه لمعت ونزلها ..
عقبها جاهم العم سعوود
بعد ربع ساعه ..
خالد : يلا عاد ماتبي ترد البيت؟
عمر بصوت واطي حيل: امبلا
خالد : خلاص انا اروح اجيب السياره
سعود: لا خلك انا بوديه معاي
عمر: بروح مع خالد اخوي يبا (وهو مرفع حاجب وشكله حيل تعبان)
سعود ومرته انصدموا...
خالد نزل عينه
لطيفه: خله يمه ياخذ مرته ويردون
خالد اندهش ولف ويهه غلا حطت يدها على حلجها وهي صاده
خالد( حرام عليج حتى وهو تعبان بتذبحينه)
خالد: ماعليه غلا ترد معاكم وانا باخذ عمر
لطيفه: عمر بيرجع معانا
عمر: يمه حرام عليج بس خلاص حتى وانا طايح جدامج هواش وصراخ خلوني ملتعن هني
ارحم لي ..
لطيفه ماردت عليه وخالد راح جاب السياره
غلا عاندت وركبت مع عمها وردت
خالد شال اخوه بشويش من على السرير وحطه على الكرسي وقعد يدزه
عمر كان مايطالع شي غير يده اليمين اللي شابكها فاليسار
بحظنه ويطالعهم اللي يشوفه يتقطع قلبه عليه
واحد بأول شبابه بحاله جي
فتح خالد باب السياره وشال عمر وحطه
سكر الباب عليه
عمر رجع الكرسي لورا شوي وريح روحه
بالطريق خالد كان يفرك حنجه بحره
عمر: شفيك خالد؟
خالد: لا حبيبي مافيني شي ، شتبي تتعشا؟
عمر: لا مالي نفس والله
خالد: يلا عاد شتبي أزعل عليك والله
عمر كان بهاللحظه يبي يلم اخوه ويصيح عنده يشكي له
مارد عليه ..
خالد: يلا عمر عشاني انا
عمر بصوت يرجف: كيفك
خالد كان بيوديه مطعم بس قال توه طالع من المستشفى
لاقدر الله صاده تسمم
خالد وداه البيت وقعده بالصاله
لاول مره راح يطبخ ولقى غلا بالمطبخ ظحك لها اول ماشافها بطيب نيه
خالد يدور شي بالارفف وكل مكان
مطبخهم كان كبير والفرن بالنص وكل شي بالفضه المعدن يعني
خالد : وين المعكرونه ؟
غلا تفتح الكبت وتطلعها وتعطيه
خالد : اممممممم انزين شلون اسويها
غلا ظحكت عليه : خلاص انت روح وانا ولا الخدامه تسويها
خالد كره هالتشبيه كانها تقول ياانا الخدامه يالخدامه الثانيه وعفس ويهه وطالع شكله فظيييع
خالد: مابي انا بسويها
غلا: براحتك ..
غلا مشت عنه ووقفت عند الباب لما قالها بصوت عذب
خالد :بس انا ماعرف يصير تعلميني؟
غلا فتحت عينها وهي صاده ولفت له
غلا انشالله
وقعدوا يسوون لعمر العشا تأخروا شوي وراح عمر شافهم بالمطبخ
خالد يظحك غلا وهي تظحك بس مبين انه بحزن
خالد المسكين كان كل قصده يبعد الجو المكهرب المشحون بالحزن والكآبه عن البيت كله
تمر الخدامه يغازلها وبعدها يسبها بالقطري وهي ماتفهم وغلا تنفجر ظحك عليه
خلصوا الغدا وحطوه بغرفة الأكل راح خالد وجاب عمر وقعدوا هم ال3 يتعشون
خالد ماخلى عمر يقوم الا لما حس ان عمر بينفجر من الأكل اللي كله ..
الساعه كانت 9 ونص الصبح خالد وقع بدوامه وعطا المدير طبيه ورجع البيت
امس خالد ماكان يبي يروح دوامه كره كل شي بدنياه ..
رفيجه كان دكتور كتب له طبيه وعطاها المدير ورجع البيت
دخل لقى امه تشرب جاي وتشوف التلفزيون
خالد: السلام عليكم (يحب راسها ويطلع لداره)
لطيفه : وعليكم ،،،،،،،، وين رايح تعال ابيك
خالد على الدرج رفع راسه ولف لها ومن على الدرج
خالد: آمري يمه !!
لطيفه : اقعد عندي لك كلام ..
خالد تنفس وراح قعد عندها ولع زقارته وقعد
دخن شوي وامه تهاوشه عليها بس هو مطنش
لطيفه : وانت شفيك صاير جي؟ ماتقولي؟
خالد وقف على حيله والزقاره بصبعه
خالد: ليش يمه احتريني لمن مارديت عليج مو حلوه صح
لطيفه ماعرفت شتقول : اا ،، انت شتقصد؟
خالد: يمه لاتخليني احس اني اكبر منج بتصرفاتي ، يمه حرام عليج عمر اخوي وانا والمسكينه بنت عمي كل
يوم ننذبح كل يوم يصير فينا نفس اللي صار لج بهاللحظه واعفسج كل يوم عمر يكلمج بس ماتردين عليه
رجعي له غلا وريحيه ..
لطيفه : كلمة ابوك ماتتثنى ولاتبي انت على اخر عمرنا نغيرها عشان يهال مطافيق!
خالد: الله يايمه صرت ياهل؟ وانا رجال ب 3 سنه!! مطفوق وانا شايل هم ماشلتيه بحياتج؟؟؟؟؟
لطيفه: اسمع باجر ملجتكم سنع روحك وجيب لمرتك هديه .. واظح كلامي
خالد (لاااااااااااااااااا) : يمه ترا خالد ولدج راح ومستحيل يرجع
عمر ولدج ضاع من ايدج وصعب تردينه
وغلا اليتيييمه اللي دومج كاسره بخاطرها صعب تكون مرت ريلج
اكسبينا يمه ..
لطيفه كلام ولدها هزها من داخلها الف مره مثل مااأي شي ينرج لكن اللي فبالها لازم تسويه
((هاي اللي ناقص ولدي يروح ياخذ بنت فيصل والله لو شنووووووووو ))
الله تتوقعون في ناس جي؟
بهالشر؟
اوف
الله يكفينا منهم ..
المهم
على المغرب غلا مرت على دار عمر لقت الباب مردود وعمر قاعد على كرسي ويطالع من الدريشه ..
عمر شاف ظلها وانمسك قلبه ..
غلا دخلت داره ..
عمر: نطرتج وايد ..
غلا : عمر
عمر: آآآآخ ياغلا ، تعبااان حيل محد حاس فيني
غلا تقعد على طرف السرير
غلا: لاتقول محد، انا وين رحت؟؟ عمر انا انذبح كل يوم من كل شي بحياااتي (ترفع عينها للسما) احس اني
صرت متعوده عل كل شي مر ، ماحسيت الفرح مره سكني كثر الحزن واللوعه تنزل عينها
لكن عرفت أحلى شعور وأحلى أيام مستحيل غيري يمرها ..
عمر متبع بكلامها: كملي
غلا: حبك لي وحبي لك مافي حد فالدنيا حسه مثلنا
عمر: ياه ياغلا تمنيت كلامج يكون بأول يوم لنا واحنا لبعض صج
غلا صاحت ...
عمر: الله عليج يايمه ، ماتوقعتها جي والله ..
غلا: طول بالك حب ( تنتبه) ،، عمر انت الحين تعبان لازم ترتاح وتريح عمرك ..
راحت غلا وعمر قالها
عمر: قبل لاانسى هاي هديتج ، ومو لشي عشان ملجتج باجر،، الله يهنيكم ..
غلا خذتها وهي تصيح من كل قلبها
عمر اللي مثل العاده مايبي يجيسها وقفها من طرف جلابيتها داس عليها
غلا ظحكت كانت هاي طريقته الدايمه ..
غلا: يااااااااااااعيوني انت آمررررررني ياولد عمي
عمر: لاتخليني احببببببببج ياغلا لاتروحييين عني
غلا: شلون اخلييييك؟ انا روحي فيك لكن كل شي علينااا
عمر نزلت دموعه .. : آآآآآآآآآخ منهم
غلا خدها تبلل
عمر: دموعج غاليه علي لاتنزلينها عشاني
غلا تنشف دموعها ..
عمر: الله يخليج لي ،(يتذكر) لنا انشالله ..
غلا طلعت عن داره وعمر حط راسه بالمخده يكتم صوته وهو يصرخ ويصيح غلا طول ماهي تمشي بدارها
وهي تصيح ودموعها تطيح على تغليفة عمر للهديه كان هو مغلفها بيده
التغليف كانت الوانه حلوه ورومنسيه وايد
الاحمر الفاتح والداكن مع الذهبي اللامع والاسود ..
فتحتها كان رابطها بنفس الخوص الاسود ..
فتحت العلبه
لقتها كلها اوراق رسمات قعدت تصيح
كان كل اسبوع يوريها هالاشيا
اوراق كلها اشيا علي غلا
راسمها بس دايمآ وهي صاده
كانت في ورقه حارق اطرافها وكات حرف العين بالعريض والنقطه على فوق بس من جنب
الحرف كان كله عباره عن اسم غلا صغار صغار مشكل حرف العين
وتذكر لما سألته ليش النقطه فوق وعلى اليسار؟؟
قال لها لان هاي مكان قلبي
قعدت تصيح ونامت وهي تصيح |