على المغرب .. خالد كان لابس و بيروح لعمر ..
غلا : وين رايح خالد؟؟
خالد : بزور بيت أبووي ، اشتقت لهم ، من زمان ماشفتهم
غلا : خالد اذكر ربك واقعد ، انا عارفه شفبالك
خالد بمكر : لا ، لاياحياتي ماتعرفين ولا ذره من "الاشيا" اللي فبالي
غلا وهي تبلع ريجها : خالد شبيوديك يعني ؟ خلاص السالفه انتهت رايح تشب الضو مره ثانيه ؟ ماخبرتك تحب المشاكل
خالد وهو يلم غلا وهي جنبه : صح كلامج حبيبتي ، انا ماحب المشاكل ، بس هاا ..! اللي يرد يفتح باب المشاكل بعد ماسكرته ، اكسر الباب على راسه ، فهمتي شلون !
غلا و قلبها طاير من مكانه ، شناوي عليه ، شبيسوي ، كلامه يخووف وايد !!
خالد : فهمتيييني؟
غلا : فهمتك ، بس الله يخليك لاتروح
خالد : لا الحين السالفه ركبت راسي ، رايح يعني رايح
غلا : انزين بروح معاك
خالد يغمض لها عينه على انه مب راضي ..
خالد كان يكلمها باعصاب باارده .. شكله متكتك لكل شي و عارف شبيسوي بس ماعليه الا انه ينفذ ..
رن التليفون و غلا تطالع خالد بخوف ، تخاف ترد يشرد منها
خالد : ردي
غلا : رد انت
خالد : لا انتي
غلا : مب ضروري
خالد : روحي ردي غلا
غلا بدون وعي ردت و خالد لما شافها راحت تسحب من البيت بشوويش
غلا : ارد اكلمج بعدين
و سكرت السماعه و طاحت على الكرسي
((ياربي استرر ، شلون بلحقه؟ شبيسوي خالد؟ شالمصيبه اللي يبي يسويها ، الله يسامحك ياعمر على اللي سويته )) ..

" تهقون عمر سوى او بيسوي شي يضر غلا ؟ " ..

غلا فكرت انها تتصل و تقول لهم يطلعون عمر بره البيت ، خالد شكله ناوي على مصيبه ، لكن خافت ، لان ان راح خالد و عمر محد بيدري انها متصله او معلمه حد ..و بتطلع بصوره مب حلووه كلش .
غلا مابقت فيها أعصاب .. خالد حرق كل اعصابها قبل مايطلع
خالد فالسياره كان توه يبي يطلع زقارته بس ردها ، و كان يحس بشي ثقيل على صدره ، يعني مايقدر يتنفس براحه .. رجعها خالد ، وهو يحس بالحزن بنفس الوقت ، يحس الدنيا ضايقه فيه ، شمعنى هالمصايب تصير له و من اخوه .!
ليش المصايب صارت ملازمتني ليش؟؟ شهالكدررررر يارب
وصل لبيت ابوه و كان لين الحين قاعد فسيارته ..
شبسوي فيك ياعمير ؟ شبسوي ..
نزل للحوش و راح عند دريشة دار عمرو لقاها مفتوحه و عمر فالدار و مدنع على ورقه فالمكتب كانه يلون شي بسرعه و يغني

لا هي نار ولا هي ما ..
لا هي غيمه ولا ضما ..
ان حكت غنت سنابل من رضا ..
و السكوت ان صار نيران الغضا ..
يارضاها وقف وناضر شووي ..
شف ( غلا ) وشسوت بشخص حي !! ..
كيف حي ولا لقاها ! !
وان لقاها مابقى بايدينه شي ,,,,,, غير انه يحتريها .!.

خالد فثواني صار داخل الدار
و عمر ولا حس له و عقب لحظات قام من المكتب و بشهقه وحده حس قلبه سااح فبطنه
خالد : بسم الله عليك تخرعت وايد؟
عمر بصدمه: خالد؟
خالد : عيل
عمر : لا ،،بس ، ،،،مادري، شلون دخلت؟
خالد : الباب ، فتحته ، دخلت ، قعدت ، واسمعك وانت تغني على مرتي..
عمر يبلع ريجه: شتقول انت ؟ استخفيت ؟ حياك اقعد ..!
خالد وهو مطنش لآخر كلامه: لا بالعكس ، انا قبل كنت مستخف و واثق حتى ، ومأمن أخوي،، بس حساف الحين بس و عيت و صرت اشوف كل شي ، كل شي كنت تغطيه انت تفتحت عيوني عليه .
عمر : خالد ،، بسك عاد وشوف عمرك شقاعد تقول ، انت قاعد تخون فيني و تخون فام عيالك
خالد وهو يحط ريل على ريل : ماشالله لا عارف ، بعد بعد كمل ، لاايق الدور عليك والله
عمر : انت بتحترم نفسك ولا
خالد : اووه ، و بتعلمني درس الاحترام هالمره .. زين يلا اسمعك ، يمكن فعيونك تربية أمي و أبوي لي غلط ، ماكفتني و ناطرك انت تربيني و انت شنبك توه خاط
عمر قرب من خالد و العرق يهطل من جبينه ماهو عارف نفسه خايف ولا معصب ولا مرتبك ؟!
عمر : انا لين الحين محترمك لانك اخوي الكبير بس
خالد وقف و دز عمر من جدامه : الحين انت تعرف شي فالاخلاق ؟ انت ياللي ماستحيت على وجهك و قلت خلاص بعد اللي صار احشم عمري ، لا رجعت العن من قبل ، اللي مكانك بعد مايرفع عينه فعيني ، ماتستحي انت ؟ لعنبوك انت ( خوااااااان) و ترد لنفس الموال؟ انت شنو ؟. شصادك؟ شاللي قلبك مره وحده
عمر زعق فيه مره وحده : بسبتك ، كله منك
خالد و الغضب حقن وجهه : شنو اللي بسبتي انا؟
عمر اللي من يجي طاري غلا يصير واحد ثاني : بسبتكم و بسبتك كنت تقدر ترفض لو انك تحب اخوك ، تشرد ، تسافر ، خذتها مني لانك اصلآ كنت تحبها و ماتحبني ، كنت تبي سعادتك على تعاستي ، خذتوها و جريتوها من مكان لي ثاني و هي ماتبي و مع كل ذي سكتت و رضت بكل شي لان فيها اشيا ماعندي اياها ، قدرت تصبر و تحبك و تتأقلم معاك و تنساني؟
بس انا ماقدرت اعيش بدنيا مافيها غلا .. ماعرف انساها وهي كل يوم تصير فبالي اكثر، ساممحني خالد ، بس غلا تمكنت مني ، يمكن مثل ماقلت لي ، لاني صغير و ماعرف اتحكم بمشاعري ، جات اهي ولعبت بحسبتي و خلتني مثل القلم فاصابعها تكتب فيني و تشطب و تمسح و انا ماعلي الا انفذ ..
انا حبيتها و ماقدر اكرهها ، حاولت و جذبت عليكم و على عمري بس الجذب حبله قصيييييير ، و انت اللي كشفت كل شي .......
خالد : ..........
عمر يلف وجهه عن خالد(انت قلتها تبيني احط عيني فعينك ولا ارد عليك بعد)
خالد : بعتبرك خلصت و برد على كلامك ،، ترا انا لين هالثانيه و اعصابي متجمده و ماسك عمري عنك و مابي احط بنت عمي فمشاكل ولا ابيها تدخل فعوار راس هي جاهله فيه ..هي توها تتعلم اللي انا متعلمه من زمان
عمر يرفع حاجبه و هو يغلي على خالد ..
يكمل خالد : اسمعني ، انك تقول لي خذتها منك واني احبها و اكرهك ماراح يجدم و لا يأخر ولا يغير أي شي ولاني بمصدقه لانك تقوله و انت ماتدري شتقول .. اسمع الكلام اللي طلعت روحي وانا اعييده على راسك ،،غلا اول ماشفتها كانت هي آخر وحده من اللي يقربون لي اشوفهم ، لانها كانت بعيده عنا و اهلها الله يرحمهم ماخلوها هني ، يعني ماكنا نعرفها عدل ، اتذكر كل شي بالتفصيل يوم توصل بيتنا مع عمي و قعدتها حتى تحركاتها اذكرها و اذكرك انت و شلون متسبل فيها .. انا اول ماشفتها اكيد شفتها حلوه ، بس بعدها طنشتها ، لانها كانت صغيره و صج كنت معتبرها اختي ، لاني شفتك منسجم معاها، حسيتكم صغار .. انا ماعلقتني فيها كثر ماتعلقت انت فعيوووونها .. و بعدين تطورت المسائل و امي خطبتها لي و بدت امي بطريقتها الخاصه تدخلها فراسي ، انا رفضت و رفضت و كلمت ابوي و بينت لهم رفضي و ليش رافض لدرجة اني قمت ادخن صبح و ليل عشان اذبح روحي ، لكن هاللي سويته بينت نتايجه الحين ..
عمر : الحين؟
خالد يكمل ولاجنه سمعه وهو يتنهد بحزن واضح : و ماقدرت اقنعهم و ماقتنعوا حتى بدموعي اللي طاحت لأن فكرة اني آخذ و حده عين (اخوي الوحيد ) عليها صعبه حيييييل ..
بس كل شي صار غصب علينا بس انا ماكسرت بخاطر غلا المنهمش ، و قدرت افرحها مع اني ادري اني فكل لحظه كنت فيها مع غلا انت فبالها ماغبت مثل ماانا اغيب عنها ..
عمر : استغفر ربك خالد
خالد ماقصد اللي قاله ونزل راسه : استغفر الله ، بس انت مانك حاس باللي فيني ،ولا بتحس وانا اليوم كان المفروض اجي و اخلص عليك ، لكن انا ضعيف و ماقدر اسوي شي فاخوي ، بس انت اللي اصغر مني اقوى مني و قادر تسوي كل شي مايعوقك حد .. فباقول لك كلمتين ،، بعد عن غلا هذي كلمتي الأخيره فاهمني !! ترا كثر ماستحملت هالسنين ماني مستحمل بعد ..حط نفسك مكاني ،، وين غيرتك ؟؟