| وهذي قصة حكاتهالنا خالتي على جدي الله يرحمو
بكري جدي كان عندو فرس ويروح يحارب الاستعمار فوقها
ايا واحد النهار ركب الفرس تاعو وقصد الدوار اللي ساكنة فيه خالتي بغى يزورها
والطريق بعييييييييييييييييدة وخالية
تقريبا 30 كم
ماكانش وقتها سكان ياسر في هذيك الاماكن
المهم وهو يمشي في الطريق بالفرس تاعو
وصل لمنطقة خالية وقت الظهر
ايا لقى حمار فوقو الدنبيل اي البردعة والزاد
وكان الحمار يشرب من قلتة تاع ماء
ايا جدي سراح ليه وهبط من الفرس تاعو وشاف منومن مالقى حتى واحد مع الحمار
ايا قال في قلبو لعلاه مول الحمار كاشما وين راح وراح يرجع
ايا قعد بحذا الحمار وقال نعسو حتان يرجع مولاه باه واحد ما يسرق الحمار
وقعد يستنى ويستنى ويستنى
راحت قوايل في قوايل وهو يستنى وماجاش مول الحمار
حتان وصل وقت العصر
جدي حار قال وهذا السيد نسى حمارو؟
ايا شاف في الحمار لقى الحمار بداو رجليه يطوالو ويطوالو ويطوالو وولى الحمار كبير
جدي عرف انو هذا الحمار هو ام السيورة
ايا ركب الفرس تاعو وراح يجري هارب والحمار عملاق يجري من وراه
قطع مسافة كبيرة وصد وراه لقى الحمار ماكانش
ايا صد لقى روحو جدي غلط في الطريق من الخلعة
ايا شاف خيمة وعائلة بحذاها
راح بالفرس تاعو قعد على بعد امتار منهم متونس بيهم ويريح من الجري اللي كان فيه
ايا شاف الراجل مول الخيمة يدق في الاوتاد تاع الخيمة باه يثبتها
ومرتو طيب في الماكلة
وابنهم قاعد يلعب
وجدي متونس بيهم
وفجاة شاف الراجل هز المطرقة وراح لمرتو ضربها بيها على راسها
والمراة حكمت راسها ودخلت تجري للخيمة ولحقها راجلها وابنهم
جدي قال في قلبو: واش بيه هذا هبل ضرب مرتو؟
ايا وفجاة بدات الخيمة تتضخم ويكبر حجمها اضعاف
ثم جدي حكم زرب ركب فوق الفرس تاعو وراح يجري من الخلعة عرف انها ام السيورة الي كانت في هيئة حمار تبعاتو وتجسدت على هيئة هذيك العائلة
المهم وصل لخالتي وهو على اخر روح من الخلعة  |