أرتولي ..حبنا الأبدي
كلمات / عماد خالد حاج علي
أرتولي القديمة..
ريحة الخضار..
وتمر شامخ
يرقص ..
مع النسيم طربان
صوت القمري والكورجية
والنجّامة والطورية
ودقّ العيش ..
بعدو فطيراً
بلبن..
لقمة هنية ..
تكفي المّية
من أرتولي و للمحميّة..
وجدول موية جاري
وسط البيوت
يسقي الزرع
ويروي الضرع..
وحاتك تب ..
دي ياها
الفيكا محّرية ..
وسماحة الطير
مهاجر لى وليداتو
في آخر العصرية
وموية الجر طعم تاني..
صاقطة شديد ..
برودة
أصلو ما عادية
وشدرة حرازة كبيرة
تسمع في حصص المدارس
وصوت الطلبة
سمح بالحيل
في عز الصباحية
وصوت البوري
وكت يصدح بأغنية
يبشّر برجعة الحبّان
وااا شوقنا
لما نشوفم نازلين
من العربية
صوت المقداف يسّوي..
سييك .. سييك.. سييك
وخضار القيف نايم طربان
فُراشو دُرابّاً وثير
وكمان كوركوجية
وشعاعاً ضاوي
وكت الصباح يادوب
يقش في عويناتو
يقالد موية البحر
بشوق وحنيّة
الله عليك
ياعروس النيل..
البى الجمال مكسّية
وهنااااك
فوق في الشرق
تراها دبك
راجينا عربية.
وسواقاً يدوزن في بوريهو
ناوي المشية بفوق
وداير الرجعة ضهريّة
منو القال
تكون دي لحظة منسية..
الماشي لبربر والغاشي
لفتوار ..
والماشي للمشرع
كلو حاجتو مقضيّة
حجاوي فاطنة السمحة
أصلها راقدة في الذاكرة
خالدة .. أبدية ...
وعشان خاطر عيون أم راس
والله كان تمراً محشكن
طعنة الشوكة
أصلو ما هميّة
حليل القنقر والحنقوق
حليل الساقية والمحرات
حليل أجدادنا ماتوا عزاز
قلوب طيبة
ونفوس راضية مرضيّة
حليل أمي خديجة
وكتين يهل هلال رمضان
تقول ليها نشيداً
أحلى من أغنيّة
( وجب السخور يا صايم )
شوفوا الخفر كيف حايم
وشيخ البلد ما نايم
سحوراً ظريف
لبن ورغيف
( يا رمضان حليلو
يا القام بليلو
يا رمضان بدورك
وعاد أنا عِن فطورك)
حليل بت تورشكا
في رمضان
تبشّر بقدوم العيد
والجهال همّهم
كلّو في العيدية
أكان أب قرشين مافي ..
قرش واحد مكّفينا
نجيب منو حلاوة ..
نجيب منو هنبوكة
وكمان
معاها طحنية
وفي الكاب الوراني
حوشاً ليهو مترة كبيرة
ساكنوه جنيّة
نِخيلة الطيّبة
طبْ ما روّعتْ إنسان
ولا في يوم سببتْلو أذيْة
حتى طيرنا حنين
أوعاك تقول شرفان
أكلو بظرافة ومفهوميّة
وجنّوناً في البحر عايمين
واحد غاطس جوه ما ليهو أتر
والتاني عايم بضهرو
والتالت عاملو حركة فنيّة
حليل عشيشاً
يناتل في تيار الرّيح
فيهو فرخ
أكان وليداً لدباسة
والله قمريّة
حليل الطّرفا والواقود
حليل السعدة والباجور
حليل جدولاً رويان
حاضن عشبة برّية
حليل المنقة مغمولة
وبليلة لوبيا
في النار مدفونة..
ورغيفة حنّونة
حليل بنوتاً واردات ..
ضحكتن رايقة
زينة فطريّة
تخلي الزول حالاً
يقطعلو قصيّدو وكتيّة
وعيشة هنيّة مرضيّة..
حليل الحلفا و العنبج
حليل النبلة والبنبر
وحتى المعيوقا يا حليلها
حلييييل الطوطحانية..
يا حليل حجرا
في البحر نرميهو
يبرج ويعرض زين ..
مسويّلو دورانيّة..
حليل ناساً سادرين
كرعينون مخضبّها طين
كأنها بالحّنة مكسيّة
حليل سمكة هايشة
تناتل الجبّادة
زي مجرم خطير
واقع في شراك الضبطيّة
حليل زولاً حرد العشا
جاهو الرد سريع مستعجل
التقول برقيّة
( دحين في كلام الهوا
داير تبيت القوا )
يا زول هوي !!!
الختيتها أمانة ما رقدت
أدمسو كلامك دا
واخيرلك تبيّض النيّة
وشفخانتنا حكيمها ضليع بالحيل
ما بغلبو مرض
حبّة سلفة تطيّر الوِردة
أكان مرضتَ صباح
تطيب قبّال العصيريّة
وحبّوبي هناك
صلى الصبح حاضر
وفي أيدو التقروقة مطويّة
وفي ديوانو الكبير
معلّقة لوحة تركيّة
فيها آيات من القرآن
سورة لقمان
وسورة الرحمن
( واقيموا الوزن بالقسط
ولا تخسرو الميزان)
وأحاديث للمولى قدسيّة
وفجأة تجيك نهرة شديدة
زي الرصاصة طالعة قوية
يا جنا هوي !!!
قووم عصّر الكرعين ديل
عُقب حيلنا فتر
من يوم دفنا الحاجة علويّة
وهناك فوق حيطة قديمة
تلاقي رتينة مرسومة
وبالخط العريض
( إنتخبوا مرشحكم
فارس الختميّة)
وفي الجزيرة الطيبة
تلاقي حاحاية
وحَبْ العيش غولاد بالحيل
وفلاناً ود فلان
كمان راعيلو سعيّة
والقطارة بالحيل مؤانسانا
شيتاً محلي
وشيتاً إكسبريس
وشيتاً كريمة
وبضاعة مشريّة
دحين يا قطار
حلفّناك
بالخلق النور والنار
أوعاك تمر بسراع
إنتَ في حضرة ملوك النيل
ناساً حُنان بالحيل
وبرضو صافيين نيّة
وتحت النيمة الكبيرة
في نص الدار..
تحلى الونسة ضحوية..
منو المات..
منو السافر..
منو العّرس..
أخد بت عمو حمرة
عين وزندية..
وكت الفندك يسوي
دق _دق_دق...
تحلى القعدة بالجَبنة
وريحة البن طاقّة مقلية..
وشوية شويتين تجيك
الكسرة..
من إيد أم ضفاير ..
فوقها حبّة ملوخية..
ولساحة سيدي
تلاقي خلقاً كتيرة قاصداها
رايحة تلحق الحوليّة
مديحاً بالطار
ودرويشاً غرقان
في ملكوت ربنا الغفار
ونوبة حارة
فايح منها عبق صوفيّة
الليلة ما أصلو
يوماً سعيد وبخيت
يوم مولد خير البريّة
حليل شيوخك الصُلّاح
الأغبش
ود جاد الرب
وكمان ود اللّخية
ود حسين كمان
فوق الشرق
هناك عندو بنيّة
وفي إيد البنيّة كمان
حلاة السعفة
مضفورة
متنيّة
حليل بيوت الطين
السمحة مبنيّة
شامخة بعزّة
وشاربة أصالة عربية
وديك هناك
شاغلن رادي
تحلف يمين تقول
قطع شك تكون دي
ستالايت
والله محطة فضائية..
مين الزيّك
إنتي يا أرتولي
عروساً زينة..
طبْ مافيها كلام
زايناك التقوى
والايمان
وناسك كاتلن ريد..
وماليهن الحنيّة..
ما أهلك ناس الكرم
وأصلو الكرم هيِلُن
وعروقهم
بيهو مرويّة
دحين يا نيل
العملتو تبْ ما هو عديل
وكتين غدرتَ فجريّة
أمانة ما هجولتً ليك بلداً
رادوك ناسها من تبّوا
ختّوك في ضّي العين
وروك أحجية
وفي بعادك
كم يا غالية ..
كم وكم قاسينا أسيّة
ورغم القسا
والنار القايدة في قلوبنا
بنغني ليك
كل المووايل الحلوة
في صباحاتنا
وفي العصاري
وفي العشيّة
سلامنا ليك
من صميم قلوبنا
يانور عيونا
ويا زاد شجونا
ليكِ ألف ألف تحية