06-17-2016, 06:18 AM
|
| |
_قبل شوي تذكرت ذكرى من ايام الثورة 
من 2011 لما بدت الثورة و الحرب, اتذكر وقتها إنجبرنا نمشو للجبل
لأن صار فيه ضرب في العاصمة, و ابي صارلته سفرة مفاجئة في عمله
لذا رحنا للجبل مع خالي 
اتذكر وقتها كانت سيارته قديمة و صغيرة و خربانة بمعنى الكلمة 
كنا انا و إخواتي و امي و خالي و إبنه, انا لحد الآن مستغربة كيف السيارة تحملتنا 
المهم وقتها كان لازم نمروا على المناطق إلي مسيطر عليها القذافي, و طبعاً بما اننا امازيغ
معناها يا إما بيقتلونا او يخطفونا او يحرقونا
لذا كان لازم نكذبوا و نقولوا اننا عرب, و في السيارة كان تحت رجلي لابتوب اختي فيه
صور الثوار من الجبل و غلافه صورة لعلم الإستقلال قديما, صار علم ليبيا توا
و تحت رجلين امي كان فيه ذهب و فلوس, و انا عندي اخت الدجاجة اشجع منها 
لذا لما وقفنا على بوابة لكتائب القذافي صارت ترعش بمعنى الكلمة و انا بموت من الضحكـ عليها 
المهم خالي قاللهم ان نحنا من العرب و رايحين لتونس, في البداية الراجل صدق بس لما شاف اختي
شكـ فينا, وقتها اختي كانت رح تبكي بدموعها
الراجل فتش صندوق السيارة و بعدين شاف من روشن السيارة شن فيه تحت رجلينا
و انا ما عرفت شو اسوي لانه لو شاف الابتوب بنصيروا كلنا في خبر كان x.x4
لكن انا تصرفت بعبقرية و بسرعة خارقة رميت الابتوب تحت الكرسي و ما شافه الراجل
و تركنا نروحوا و كملنا طريقنا و اول ما إبتعدنا اختي صار تبكي و انا اضحكـ ابن خالي قالي اني من غير قلب هع5
بعدها مررنا ببوابات بس ما فتشونا و آخيراً وصلنا لأرض الثوار المسيطرين عليها, فتنا اول بوابة
و الإبتسامة على وجوهننا اكبر من الطريق إلي قدامنا
فجأة خالي وقف السيارة على جنب بدون اي سابق إنذار, كلنا إستغربنا بس طلعت عجلة السيارة
إنفجرت في الطريق و ما احد لاحظ لأن اختي كانت تبكي
و ما كان بده يوقف حتى ما يهاجمونا كتائب القذافي و ما قاللنا لأن لو اختي سمعت رح تنتحر
و بعدين صلح العجلة و كملنا طريقنا و وصلنا للجبل سالمين و اختي تبكي
مستحيل انسى هذا اليوم كان روعة
من ذكريات الحرب
~
|