بس ببلدي الناس تموت بمجرد أنه تحاول تعيش ..
بس ببلدي صارلنا 13 سنة كل يوم لازم أكو إنفجار أو إثنين أو سلسلة تفجيرات أقل واحد بيها ياخذ مئات الناس ..
بس ببلدي صار الموت شي عادي .. صار شي كلش عادي تطلع ومترجع ..
كلش عادي يصير جسمك أشلاء وحتى يحصلون شي يدفنوه بالقبر يجون يجمعوهة بكيس!..
بس ببلدي .. كل يوم لازم أكو مجموعة أمهات عايشين الجحيم لأنه إبنهم إنفقد .. مات .. صار دم ولحم مطشر بكل مكان بالشارع .. مخطوف لو رايح يقاتل داعش فينتهي بيه الحال مثل اللي فوك ..
بس ببلدي الناس تحاول بكل جهدهة تعيش .. تضحك .. تحاول الناس بس أنه ماتبجي بس والله تعبوا ..
والله بعد ميكدرون .. المقبرة صارت أكبر من أي مدينة .. المقبرة بعد متكفي! ..
الناس بالعيد صارت بدل ما تعيد تروح للمقابر تواسي أبنائها .. الناس صارت بدل الفرحة تبجي لأن فقدت أعزائها ..
وبعدين ؟ .. شحيصير أكثر؟ ..
داعش ؟ .. صارت بينة .. طائفية؟ .. صارت بينة .. مفخخات؟،أحزمة ناسفة؟،إنتحاريين؟،هاونات؟،صواريخ؟ .. كلهن صارن ..
زين منو المسؤول؟ .. الشعب لإن ساكت؟ .. الحكومة لأنها طائفية؟.. رجال الدين لأنهم ما عدهم أي علاقة بالدين؟ .. لو المسؤول هو الطفل اللي رايح وية أهله يشتري ملابس العيد وبالصدفة صار إنفجار مسح بيه أي أثر لجسمه بسبب قوته؟ ..
.
.
.
بس هم عادي .. كل يوم يموتون المئات عادي ..
الموت صار كلش عادي .. كلش عادي .