الحين ليه بالجامعه لازم أختار تخصص واحد ؟
ليه الغباء ذا ، ليه النظام التعيس هذا ، بالثانوي يعطونك ميتين ألف ماده
ويخلونك تدرس أحياء غصباً عن خشمك ، وخلال هالفتره اللي تنغصب فيها تكتشف
ان جميع المواد مفيده : ) ! وتبي تتعلمها كلها وتتعمق فيها وبالأخير يحطوني
بتخصص واحد ، ليه التعنت والخياس هذا ؟ /: ، طيب انا أحب الكيميا أكثر شي
وأحب الفيزياء بعد واستمتع فيها، مع ذلك لما أبغا ادخل الجامعه مابدخل اثنينهم
عشان " ماله مستقبل " !
وأتورط وانكبي يا خزامى ، لا انتِ درستي كل المواد اللي تحبينها ولا أخذتِ واحد
منهم لأن " ماله مستقبل " ولا انتِ دارسة كل المواد بالغصب زي ماتعودتِ ، عالاقل
لما كنت أدرسها بالغصب، وعلى الرغم من وجود الاحياء الغثيثه إلا إني كنت
عايشة وسط علوم أحبها ، بالرغم من غلاسة المواد الباقية : ) .
وبالنهاية أدرس بتخصص أبو كلب ومالي مزاج أفهمه عشان " له مستقبل " .
هالحين كلهم يقولون لي ادخلي طب وأنا م ا ط ي ق ه ، مؤهلاتي تؤهلني له
وبقوه ولله الحمد بس م أطيقه فعلا، انا بس انجرح جرح بسيط يجيني غثيان
من الدم واقعد طول اليوم أفكر ان هالجرح بيتلوث وأموت : ) ، بالله عليكم
هذي تصير طبيبة ؟ لأ طبعا .
ولما أجي ابغا ادخل انجليزي لأنه اسهل وأتفه ماده بالنسبه لي " التخصص
مليان ومأخوذ بقوة " ، والمشكله مين اغلب اللي داخلينه ؟ وحده لو اقول لها
عرفيلي اسمك بالانجليزي بينطق الحجر قبل ماتقدر تسويها : ) .
صراحه سالفة اني ادرس تخصص واحد وسالفة كل من هب ودب تدخلونه الجامعه
وتقللون من فرص الناس التعبانه مثلي هذي قلة أدب ولا يقبلها العقل والمنطق : ) .
الله يرزقني مكتبه فيها كل كتب العالم وأغرد بأكثر من ميتين لغة يارب .
فله .
|
__________________
-
يارب، فردوسك لأمّي وأبي وأحبتي أجمعين.
𝐖𝐡𝐚𝐭 𝐰𝐞 𝐝𝐨 𝐧𝐨𝐰 𝐞𝐜𝐡𝐨𝐞𝐬 𝐢𝐧 𝐞𝐭𝐞𝐫𝐧𝐢𝐭𝐲.
|