آآخخ من أوّل ما قرأت أوّل كم فصل فكرت بـ:
من أين أتيتي؟ وكيفَ أتيتي؟ وكيفَ عصفت بوجداني؟
مش معقول شو حبّيتك من خلال روايتك!
ومش فاهمة أنا كيف فاتني كل هاللإبداع!!
روايتك من النّوع اللي تجذبك وما تقوم إلّا لتخلّصها..
مو متل اللي تقعد تقرأها غصب عنّك وأول ما تكمل قراءتها تكون نسيت شو قرأت فيها
قرأتها ع دفعتين بيومين بس رغم إنّه كان فيه كتير فصول متراكمة عليّ.
وصدقيني الفاصل اللي صار بين المرتين مو إنّي زهقت بس عيوني دبحوني وأنا عم إقرأ
ما كان خاطري أقطع بس عيوني كتير وجّعوني
وأصلاً روايتك من النّوع اللي لازم يكون تركيزك 1000%
(متل ما حكت وردة // ترى وردة مُتابعة نادرة وجميلة، محظوظة إنّك كسبتيها ^^)
وتقدر تربط بين الأحداث والشخصيات وعشان تعرف إنتا بأي زمن
لأنه انتي كتير بتتنقّلي بين الماضي والحاضر وبتربطي الشّخصيات بطريقة
يعني الصّراحة ما بعرف كيف قدرتي تركزي بكل هالأحداث وهالألغاز والشخصيات..
طبعاً أنا بحكي ومتحمسة بس ما ببان بالكلام
بس كنت بجد أفرح معهم وأزعل معهم وأضحك كتيير من كل قلبي رح بنرجع نحكي عن هاد الكلام
وتحملي ردّي لأنه هيكون طويل.. لأنّي جاية متأخرة وفي إشيا كتير متراكمة علي
يا ريت لو كنت أتابع أوّل بأول لكنت قدرت أعبّر أحسن وأختار الأحداث والشّخصيات وأتكلم عنها بالتفصيل
بس يلّا مو مشكلة بحاول أحط نبذة مختصرة عن يلي ببالي
كان باين إنّه غموض وألغاز.. استبعدت يكون رومانس مثلاً :heee:
بس كان ملفت للانتباه.. وبدك الصّراحة أنا كنت بشوف اسم روايتك من زمان بس كنت مشغولة
وما كنت عارفة بهالكم من الإبداع اللي لو عرفت عنّه كنت تركت كل شي بإيدي وقرأتها
فالعنوان ملفت ومناسب جدّاً لروايتك
(باحثاً عن ظلّي) >> فيه كتير ناس ومن ضمنهم أنا لازم يبحثو عن ظلهم لأنه لمّا توصل لحالة من الإحباط والفشل
بتكون بحاجة لظلّ يتصرّف تصرفات ممكن ما تكون انتا مأيدها لكنها الصواب في هديك الحالة >> إشياءات نفسية ما تهتمي فيها :heee:
في بداية الفصول حسيت إنّه فيها قيمة أدبيّة وكنتي متقنة الأسلوب الرّوائي بشكل ممتاز
مع الأحداث طبعاً لكن الأسلوب كان هو المهيمن..
امممم طريقة وصفك كانت وعلى طول الرّواية جميلة ودقيقة يعني أنا لمّا أقرأ بحس حالي عم شوف فيديو
والصورة فيه كاملة ومن المشاهد اللي حسيت فيها هاد الشي
هو مشهد خروج شاادو من الأرض.. ولووو شو رهيب انحبست أنفاسي معاه.. تنهانيّ عزيزتي 
في باقي الرّواية سيطرت الأحداث مع جمال وصف الشّخصيات وحركاتها وكيفيّة كلامها
وطبعاً كانت الأحداث رهيبة وكل مرّة مفاجئة وكل مرّة لغز، وكل مرّة روابط جديدة تنتج ما بين الشخصيات
وقبل ما أنسى نقطة احتمال ما أعرف أوضحها بس يلّا بحاول :heee:
وهي بالنسبة لطريقة تنقلك بين الأحداث
أعجبني جدّاً كيف إنّه القصة الواحدة كنتي تتحدّثي عنها أكثر من مرّة لكن كل مرّة بجانب أو من جانب مختلف
أحط مثال عشان أفهم أنا قبل ما أفهمك ههههه
وهو بخصوص مدرسة النجوم المضيئة
انحكت أكتر من مرّة بالرّواية لكن كل مرّة تم تناولها من جانب
فأوّل مرّة (ممكن ما تكون أول مرّة بس نفرض إنها الأولى ههه)
تناولتيها من جانب إنها مدرسة سيئة وكيف إنها بتاخد الأولاد غصب بعد ما تقتل أهلهم
وركزتي ع هاي الفكرة أكتر من غيرها
ركزتي على آلويس وكيف إنّه دمّرها مع جماعته مع ربط جميل
وفيه كمان جانب بس والله نسيته مع الحماس
إذا تذكرته برجع أحكي عنه ههه
آسفة ذاكرتي بتخونّي لما أكون متحمسة لأنه الأفكار بتكون عم تزاحم ببعضها
قصتهم برضه انحكت كتير لكن،
المرة الأولى تناولتي جانب العتاب منها
وبعد فترة رجعتي لتوضحي كيف صارت العلاقة وكيف أنقذته
وطبعاً بهاي الطريقة بتكوني شوّقتي القارئ مرتين لكن لو سردتيها من كل جوانيها مرّة وحدة بتكوني شوقتي
كمان تعقيب لي على هاي النقطة وهو إنّه كل جانب إجى متوافق مع قصّة تانية يعني كان فيه رابط ما بين القصّة اللي ورد فيها وقصة تانية.. هممم هاي النقطة صعبة أنا نفسي ما فهمتها هههه
أتمنى تكوني فهمتي علي فأنا عكسك ما بعرف أوصف شي :heee:
ولاحظت كمان فيه كتير جمل بتمرّ بليغة كأنها حِكم، لو تابعتك أوّل بأول لكنت ذكرت كل شي بالتّفصيل
أمّا يا ستي العزيزة بالنّسبة للشخصيات
ولووووووو.. آلويس 
يا قلبي بدي منّه 
الغريب إنّي أغرمت فيه وهو طفل أكتر من وهو كبير.. شكله عندي مشاكل هههه
عيونه العسليّة تجنن .. أقرب شي إلها الكهرمان بلمعانه
ولّه حركااته يا قلبي وصفك إلها تجنن نظراته ورمشاته وضحكاته وكيف عم يبتسم وكيف عم يتكلّم
أخ.. قتلتي متابعاتك بهالشخصية .. لقيت الأغلب حابّه وهو فعلاً بينحب شفت حد حاكي إنّه لو تنعمل روايتك مانغا أو أنيمي
هي الصّراحة بتستاهل وبتستاهل كتير كمان لأنها ما بتقل روعة عن الأنيميات اللي بنحضرها
بل على العكس فيه أنيميّات بايخة وبتعمل غثيان
لكن فكّرت وقلت لو إنّه عن جد لنعملت أنيمي مين اللي كان رح يرسم آلويس بشكل يستاهله فعلاً
ما حد رح يقدر يعطيه حقّة >> هيك فكّرت ههه
بس روايتك بتستاهل حبّي وفيه كمان شخصيّة عجبتني.. آخ نسيت اسمه برضه بس هو العبقري اللي بنضارة وكان بالمستوى السادس مع آلويس
المهم هو لزيز وأمور وكنت بركّز بكلامه كتيير خخخ
وكمان واحد نسيت اسمه وهو اللي قال لماريان وأتنبيرغ إنه الكونت متعصب وإنه طلب مسدس وفي النّهاية طلع بضحك عليهم.. كمان هاد عجبتني شخصيته..
آخ بلحظة طاروا كل الأسماء بتذكر لمحة من الاسم بس
هاد طبعي حتّى بحياتي العمليّة، صاحباتي بدّي سنة لأتذكر اسم الوحدة منهم عشان أناديها >> ما تاخدي ببالك بس معي زهايمر خخخ
بشكل عام العقارب كلهم أمّورين وحبّوبين
نيجي للمشاهد القتالية.. رهيبة بوصفك إلها..
كانت ممتعة وخصوصاً لما تعاركو مع حرّاس القائد الأعلى..
فيه كمان شغلة حلوة وهي إنّه فيه كتير شخصيات بتآمن بالعقل أكتر من القبضة
وأكتر شخصيّة بانت عليها هاي الصفة هي آلويس بالطّبع وهاد اللي بيخلّيه هو المسيطر دائماً
وكتير الشّخصيات بتعتمد عالذّكاء وع التحدّي الفكري وهاد دليل إنّه الكاتبة ذكيّّة
وذكاءك أصلاً باين من طريقة ربطك للأحداث والشّخصيات
شخص غيرك ما عنده قدرتك كان ضاع ما بين كل هالشّخصيات وهالأحداث
وما كان عرف من وين بدأ ولا كيف هينهي
بس بعرف إنّي بعد ما أحط هالرّد رح أصير أقول: يِهْ! نسيت أحكي عن كذا! يه وعن كذا..
يلّا مو مشكلة ما بدي أثقّل عليكِ بالحكي
طبعاً أنا متابعة إلك من الآن وحتّى النهاية وما بدي عمري أسمعك بتقولي محد متابعني وبدي أروح
واقرأوا القصّة بمكان تاني ومدري وين ومدري شو..
سببتيلي اكتئاب لمّا حكيتي عن هاد الموضوع
صحيح معك حق والإشي مستفز إنه الواحد يكتب ويتغلّب وما حد معبره (مجربة)
بس تأكدي هو إنهم ما بتابعوكِ لأنهم مش عارفين بكميّة هالإبداع اللي عندك
والأغلب بده دعوة لحتّى يقرأ!!
ومن ناحيتي أنا رح أقوم بالواجب وزيادة ههه
تحياااتي لكِ يا قلبي أحببتك بصدق.. حتّى من ردودك على الرّدود ق
1
لي عودة لأعلّق ع آخر بارتين