10-16-2016, 08:46 PM
|
| |
(( 2 ))
*
دخلت المقلط ابي ابرر اللي اتصال اخو ريم لنايف بالذات ..
قلت : السلام عليكم ..
التفتوا اثنينهم يناظروني استحيت وجلست على الكنبه ..
تكلم فيصل : سلامات ؟! .. مين اللي ذق على نايف ؟
انقهرت منه : هذا مو شغلك .. رجاءا لا تتدخا ..
ناظر بنايف ورجع ناظرني : ليه بالله ؟؟
بدأ العد التنازلي لصبري : هو دق عليك ولا دق على نايف ؟؟ .. خلاص مو شغلك فيه !!
اشر فيصل لنايف : اسألها يانايف ..
ناظرني نايف : مين اللي دق ؟! وابتسم ..
ذبت خلاص : أخو ريم خويتي ..
فيصل مستنكر : خويتك ؟؟
اشرت عليه : أنت ماتسألني مو شغلك .. حسيت بالضحكه من الوضع فعلا ..
تكلم نايف : وأخو خويتك ذا يدرس معكم في المدرسه ؟!
فتحت عيني ذا مستحيل نايف اللي مايتكلم ولا كلمه .. انقهرت منهم اثنينهم ..!
وقلت : دام ذا اسلوبك يا أخ نايف أعذرني مابجاوب ..
عصب فيصل : غصب عنك تقولين .. مو بكيفك تطلعين مع أخو خويتك بدون لاندري .. اش السالفه ماعندك حد يراقبك أو يحاسبك ؟؟
هنا انفجرت : جب .. مو انا اللي اطلع مع عيال .. واعذرني أقول لك كيفي مو متكلمه معك .. ولو تحرقني كلي مو بس ايدي ..
تكلم نايف : قل لا اله الا الله ..
فيصل بزهق : لا اله الا الله ..
قال نايف : اعذريني لأني تلقفت .. ثانيا ممكن أسأل مين اللي دق علي ؟!
قال فيصل : مو ممكن الا غصب ..
قال نايف : فيصل !! اسكت .. هااهـ اش اسمه ؟!
قلت : قسم بالله ما اعرف اش اسمه ..
قال : طيب كيف ماتعرفين اسمه وطالعه معه ؟!
انقهرت من اسلوبه : احترم نفسك أول شي ثانيا مو انا اللي اطلع معه !!
تكلم بهدوء : طيب اجلسي ..
جلست وانا ماسكه راسي لا ينفجر ..
كمل كلامه : طيب احكي لنا القصه وحنا بنصدقك ..
ارتجفت حسيت شوي واموت من التعب قلت : أنا تعباانه .. وأستأذنت وطلعت من المدرسه .. شفت ريم كمان مثلي واتصلنا على اخوها وجاء لنا .. بعدين قا لي وين بيتكم ؟ .. أنا ماأدله .. سألوني عن الارقام عطيتهم رقمك .. وبس ..
تكلم فيصل : طيب ليه بالذات رقم نايف ؟!
سكتت عنه .. قال نايف : طيب ليه بالذات رقمي ؟
هنا انحرجت : لأن انا متهاوشه مع فيصل .. ضغطت على راسي : ومالي خلق مشاكل ..
قال بهدوء : طيب اش به راسك ؟! الصبح ماتتكلمين واليوم راسك ؟!
قلتبهدوء مثله : مدري ..
وجيت بقوم مسكني فيصل .. قلت : اتركني انتا مو شغلك فيني ..
قال بهدوء : بس انا اخوك ..
مالي خلق هواش معه فسكتت وتركت يده وأبعدتها عني وطلعت غرفتي .. رميت جسمي على السرير وفيني الصيحه .. معقول ماعندهم ثقه فيني ؟ اش سويت ياربي ؟ وربي مالي خلق لذي الدنيا .. طيب مروى تكلم عيال مايشكون فيها .. مسكت راسي وجلست ابكي مالقيت اي مبرر يخليهم على طول يشكون فيني .. ناظرت بالساعه عشر بالضبط ..
نزلت تحت الى المطبخ وعملت الغذا .. فتحت الثلاجه لقيت الجبنه عملت خبز وجبن أكلتي اللي اموت عليها .. جلست على الطاوله وأكلت .. سمعت صوت فيصل من وراي طنشته .. شفته جلس بالكرسي اللي جنبي قمت عنه وصلحت لي عصير ..
قال لي : اعذريني مو قصدي ..
قلت : لا تعتذر واعتذارك من الحين مرفوض ..
قال بعصبيه : بربك ساره لو حد يتصل ويقول ذا نايف ولد خال ساره .. مابتشكين ؟
دمعت عيني : اذا جاي تصارخ انا راسي مصدع مالي خلق ..
تكلم : اعذريني ..
قلت : فيصل انت فيك شي ؟! متغير كثير .. كله تعصب ..
فيصل : لأني خفت صاير لك شي ..
مسحت دمعتي : تشك فيني ؟! لو هي مروى حبيتها على راسها .. صح ولا انا غلطانه ؟؟
فيصل : ألف مرة قلت لك لاتحطين نفسك بمقارنه معاها .. وقلت لك أعذريني وماعاد اشك فيك ثاني ..
قلت : طيب ألحين وشكيت .. والبارح وشوي وتحرقني علشان خفت عليك مارجعت .. طيب انا آسفه اذا مره خفت صاير لك شي ..
تكلم بهدوء : لا تبكين .. أنا مااحب حد يسألني وين رايح ؟ وليه رايح ؟ ومن فين جاي ؟ كل ذا الموضوع .. واعذريني كنت تعبان ..
ابتسمت له : فيصل احبك ..
لاشعوريا نزلت دموعي مدري عندي دموع زياده ولا ايش ؟
قال : طيب عذرتيني ؟
رديت : معذور ..
جلس : طيب اش حكاية راسك ذا المصدع من الصبح ؟! ..
قلت : لأني مانمت البارح إلا الساعه واحده .. كنت انتظرك ..
ابتسم لي : وأحلا أخت ..
جاوبت : وأحلا أخو ..
بالرغم اني مقهوره منه الا انه بكلمتين عذرته .. لأن مالي غيره في ذي الدنيا .. والله احسد مروى عليه صادق حتى بمشاعره مايحب أحد يكون زعلان عليه .. عنده حنان كبير .. بعكس مروى مدري اش لقى فيها والله ..
همست له : أقول لك شي ماتعصب !! ..
رد بنفس النبره : ايش ؟! ..
جاوبت : تمنيتك تتزوج ريم .. بس حسافه انخطبت ..
ماتوقعت ردت فعله : ههههههههههههااااي احلفي انتي بس ..
مالقيت غير اني اضحك عليه ..
*
الموهم صليت الظهر وجات مروى طبعا وهزءتني لأني ماقلت اني طلعت وانتظروني وصارت مشكله .. وعدت على خير .. ونمت وصحيت على اذان العصر وذاكرت الين اذان العشا .. صليت وصلحت العشا وتعشيت وغسلت المراييل ورحت نمت ..
*
مضت الايام عادي مايتغير فيها شي .. يوم الاربعاء اعترفت لي ريم بإعتراف .. تدرون ايش ؟ .. بتتزوج بعد شهر .. بتسافر مع زوجها الى الدمام للأبد لأن وظيفته كيذا .. ألحين يوم اني تعلقت في بنت وصارت كل شي حتى تتنافس مع فيصل في المحبه .. تروح ؟! وماعاد اشوفها ابد ؟! ليه الدنيا كيذا ؟! مضيت يوم الاربعاء كله في الأسئله وريم كمان لأني تقربت لها كثير .. بصراحه كأننا عشاق بيفترقون عن بعض .. بس فعلا بطيبتها مقدر ابعد عنها ..
الموهم ما جاء يوم الخميس أحلا يوم تصدقون أكتشفت اني صرت مدمنه بلايستيشن وانا اللي قبل استغرب منهم ؟ .. ونااسهـ .. يوم الاربعاء الساعه ثمان الليل جاتنا ام سامي .. تستغربون لأني ماقد ذكرتها لكم .. هذي اخت ام نايف وجات معاها بناتها سلمى وسلوى وسهام .. اساميهم فلله .. أحمد ربي واشكره انهم مافكروا يسمون مثل اسمي ولا كان قسم لأغير اسمي .. المهم عملت لهم القهوه ودخلتها ..
قلت : السلام عليكم !!
كلهم : وعليكم السلام والرحمه ..
جلست جنب فيصل ونايف وانا ابي اذبح سلمى .. تقز نايف من فوقه الين تحته ..
تكلمت سلوى : الا ساره انتي دخلتي اي كليه ؟!
قرصني فيصل لا ارد عليهم ..
قلت : أممم مادخلت الجامعه باقي ثالث ثانوي ..
تكلم فيصل : هاا ياسلمى اش اخبارك ؟
ردت : مبسوطه بشوفة ولد خالتي والله ..
قسم لولا الحيا قمت وعطيتها كف .. سكت وانا اسمع كلامهم ..
قالت ام سامي : هااه ياوخيتي متى تتقدمون رسمي ؟!
ردت : والله ننتظر نايف يوم يخلص على طول بيده الشهاده ونجي لكم ..
قمت بهدوء : اجيب لكم الحلا اللي سويته ..
وقف فيصل : بروح معك اساعدك ..
رحت المطبخ واول مادخلنا قال لي ..
فيصل : هدي اعصابك .. لاتسوين فضيحه تندمين على اليوم اللي جابتك امك
ناظرته بانكسار : امي ؟ وينها امي ؟ ومين قلك اني مو ندمانه ؟!
قال بهدوء : اللي اعرفه انك بنت عاقله وتدرين انها الحين عند ربك .. وابوك معها .. ماله داعي كل ذا .. لو الدمع يرجعهم ماترددت ..
مسحت دموعي وكأن كلام فيصل اعطاني ثقة بنفسي ..
بعدين قلت : طيب ساعدني اقطع الحلا ..
ابتسم : شرايك نرفع ضغطهم شوي ؟!
تحمست للفكره : كيف ؟؟!
قال : اسمعي .. تبدين مني وتنتهين فيهم وطبعا انا بدوري بمدح فيه يعني كيذا .. اش رايك ؟!
ابتسمت من قلبي : من شاور ماعطى .. يلا روح للمقلط وانا وراك ..
فكره مجنونه .. بس والله قاهرتني ذي السلمى ماأقول لكم مو حلوه بس مغروره .. صحيح يحق لها بس ماتناظر الناس من طرف خشمها وكأنهم اقل منها مستوى .. المهم قطعت الحلا ووزعته على الصحون ورحت للمقلط .. عطيت فيصل ومريت جنب نايف استحيت من نظراته والله لو خالتي شافته .. قسم لتذبحني .. المهم واخيرا وصلت لسلمى ..
قلت بهدوء وكأنه مو صاير شي : بالعافيه حبيبتي حرم نايف ..
كح كح ..
التفتت وراي لقيته نــــايف !!
قلت بجرأه لأول مره : سلامات نايف ؟!
جاوبتني سلمى بهمس : يمكن من نظرتي له ..
بغيت افلعها بالصحن اللي عندي بس سكتت لأني تذكرت كلام فيصل ..
وقلت : يمكن من قزك له ..
وابتعدت وانا مبتسمه .. والله كلمه واحده وانفجر عليهم .. المهم وصلت وجلست جنب فيصل اللي كان جنب نايف مباشرة ..
فيصل : ولا اروع حبيبتي تسلم ايدينك ..
قلت بدلع : مشكور قلبي من ذوقك ..
قسم اني مسكت ضحكتي .. وين جالسين حبيبتي وقلبي هههههااي بس والله لو تشوفون وجيههم تموتون ضحك ..
رجعت قمت : شوي بقوم انادي مروى ..
فيصل : طيب اجلسي شوي كل شوي وتقومين .. نحتاجك ..
تكلمت سهام : خذيني معك ..
قلت لها وانا مبتسمه : أجل يلا ..
صعدنا السلم بهدوء .. ثم تكلمت سهام : عادي سؤال ؟؟
ابتسمت : آآمري ؟!
همست : خطيبك اللي كان جالس جنب نايف ؟!
والله بغيت اعطيها كف .. والله خطيبي لو يجلس بس يناظرهم ذبحتهم كيف يجلس معهم ؟!
ابتسمت : أخوي ..
قالت : مبين العلاقه بينكم قويه ..
ابتسمت : أخوي الوحيد وأخته الوحيده .. ياحظها فيه مروى ..
ابتسمت : الله يوفقهم ..
قلت : ليش اخوانك مايسوون كيذا ؟!
جاوبت : ياليت لو ربع المعامله ..
كملت وانا مبتسمه : تعوضينها مع زوجك ان شاء الله ..
سهام غير اخواتها رغم صغر سنها ( 14 ) سنه طيبه كثير .. لو عندي اخو ثاني زوجتها له ..
مضت الليله بحلوها وبمرها رغم اني اشك ان فيه حلوها .. المهم ورجع الكل لبيته .. استغربت خالي اليوم ابد ماشفته .. بس احسن لايفتح لي محاضره ( اذبحك اذا مانجحتي ) اللي يسمعه اول مره يقول انه يخاف على مصلحتي بس والله انه غير .. المهم مو جايه أسب في خالي آخر الليل خلني انام وبكره يصير خير ..
/
\
/
مقآطع من الجزء القآدم /
همس لنا : ماتعلمون امي ؟ .. هزينا روسنا .. قرب مننا : حبّي !!
*
قلت بصوت مسموع : اشهد ان لا اله الا الله ..
*
صرخت : فيصــــل .. فيصــل !! ..
.: نهاية الجزء الثاني :.
|