| خايف عليها من الثّرى غطاها وإلّا الحصى حافي أخاف آذاها
أكرم عليها بالكفن يا مطوع بالبيت ظلّ فراشها وغطاها
أكرم عليها بالكفن هذي أمي وشهد عليها في ما عطت يمناها
هذي الضّحى واللّيل يتحرّونها هذي السّماء ونجومه تنعاها
هذي السوالف مثلنا تبكيها والأرض تنشد عن أثر لخطاها
هذي الكبيرة كبر هذي الدّنيا، هذي العظيمه جلّ من سواها
أبكي عليها مو نهار وليله ولا سنة تمشي وعد قضاها
أبكي عليها كثر ما شالتني وكثر الحنين إلّلي اختلط بغناها
وكثر الأسامي وكثر من سموها وكثرالنّجوم وكثرمن يرعاها
أبكي عليها من القهر يا دنيا من لي أنا من لي عقب فرقاها
من فتحت عيني ولا خلتني وشوفو ولدها بالقبر خلاها
هل التّراب بوجها ما قصر شفتو ولدها كيف هو جازاها
لو أنها مكاني ماسوتها لكن أعزّ عيالها سواها |