فقت اليوم الصبح بكير وتحت عيوني اسود من القلق كل الليل ما قدرت نام منيح، اخذت اول قطع تياب طلعو ادامي ولبستهم عالسريع، اخذت شنطي واسرعت لبرا وامي تلحقني: "طالعة بكير اليوم اريج!... ما اكلتي بعد..."
- سوري ماما مستعجلة، عندي شي ضروري بالمدرسة لازم اوصل قبل رفقاتي، باي...
قبل ما تحكي اسرعت وطلعت وعالطريق وصلت لمطرح ما بتنطرني نوال عادة، كانت بعدها مش واصلة، مش رح اقعد انطرها، الشغلة طشغلة حياة او موت، بس اذا ما نطرتها اكيد رح تضل تنطرني لحد ما اجي ورح تتأخر كتير، كنت لازم اتصل فيها قبل ما اطلع من البيت وخبرها اني رح اسبقها وما تنطرني، خلص هلاء برجع بعد ما اخذ دفتر الذكريات لنرجع سوا عالمدرسة
اسرعت لكمل عالمدرسة والصدمة اني لقيت نوال ماشية ادامي، مش بالعادة تسبقني، ومن دون ما تخبرني كمان، هالبنت شو عم يصير معها؟ اسرعت لعندها وانا عم عيطلها بس ما وقفت ولا تطلعت فيني حتى شكيت انها مش هي، بس اسرعت واطلعت بوجهها ولقيت انها هي بالفعل، هون انا عصبت، قربت لعندها وكمشتها من ايدها وسحبتها لعندي وانا عم صرخ:
"فيني افهم شو صاير معك؟... ليش هيك عم تعامليني؟..."
اطلعت فيني باحتقار وراحت، زادت صدمتي، انا كنت مستعجلة على كل حال، كرمال هيك تناسيت امرها وركضت عالمدرسة، جيت بدي اطلع عالصف الا بخبط بحدا، رجعت لورا وانا عم اعتذر الا بلاقيه قمر الليل، احمر وجي وهو راح بلا ما يحكي، يا زلمي اي ساعة بيطلعو التلاميذ من بيوتهم ليوصلو هلائد بكير، انا طالعة لا مجهزة حالي ولا اكلة ولا شي، مدري اي ساعة بيفيقو هالبشر، رجعو احمرو خدودي وانا عم فكر، على كل حال مين بيهتم اي ساعة بيطلعو، اذا فكرنا بالي صار هلاء، انا اصتدمت بقمر الليل، حطيت ايدي عقلبي وغمضت عيوني مبتسمة رجعت تذكرت دفتر الذكريات، اسرعت لاخدو، وصلت عالصف وما لقيتو بطاولة الاساتذة، مين يمكن يكون اخذو؟ اصفر لوني وانا عم فكر انو يمكن يكون حدا شافو واخذو وقراه وهلاء رح ينشر الخبريات بين كل التلاميذ، اذا ما فهم عالالغاز اقل شي رح يتمسخر عليهم لان بتحسهم شخصيات كرتونية للاطفال...
فكرت مين يمكن يكون رجعت تذكرت اني من شوي شفت قمر الليل جاي من تجاه الصف، اكيد بيكون هو، هو لا سلم علي ولا شي، معقول يكون مصدوم من الي قراه؟...
معقول يصير يكرهني بعد ما قرا فيه؟ انا كاتبة اشيا بشعة كتير عن نوال، وحطيتلها لقب بشع كتير، علما ان وقح البرية ما اكتشف انها بنت، كاين مفكرها صبي، بس قمر الليل ذكي، كمان بيعرف معارفي بالمدرسة، الاغلب يتكهن، شو بعمل هلاء؟ اذا صار يكرهني بكون خسرت حبو عن عطول، تأففت منزعجة رجعت واسيت حالي بفكرة سخيفة "اصلا حبنا ميؤوس منه من الاول، هو بيحب صديقتي المقربة، مستحيل يشوفني اكتر من صديقة..."
رجعت خطوات لورا ورجعت عالملعب، قعدت مع شلتي والكل يلطش على الي صار مبارح بحصة الفيزيك بينما ايمن يطلع فيني نظرات غريبة لاول مرة بشوفو هيك عم يطلع فيني، حسيت كأن في شي غلط، اكيد قرأ دفتر الذكريات ويا قاتل يا مقتول، ضليت حاول اتجنب النظر لعيونو وكل شوي اعترض على كلام التلاميذ بسبب لطشاتهم السخيفة لحد ما وصلت نوال، خبرني عن وصولها عيون ايمن الي صارت تلاحقها لحد ما قعدت بعيدة عن الشلة، تطلعت لمطرح ما عم يطلع لشوفها مطلعة كتاب وقاعدة تقرا، قمت ورحت لعندها مع اني مش متفائلة بسبب الي صار الصبح، بس فضلت اهرب لعندها على اني ضل هون عم واجه نظرات قمر الليل، حملت حالي وركضت لعندها وقعدت حدها، طلعت في نظرة سريعة ورجعت لكتابها وانا ضليت ساكتة احلى ما تعصب علي وتروح من حدي متل الصبح، مر الوقت تقيل كتير لحد ما رن الجرس اخيرا وطلعنا عالصف، وبالصف نفس الشي، كان ممل كتير، انا ونوال بالكاد كنا نحكي مع بعضنا الا لما بدي اطلب منها محاية، عملت حالي ناسيتها بالبيت حتى اقدر افتح معها موضوع، بس للاسف ظلت منشفة وج وما قبلت تتجاوب معي، وضلينا هيك لوقت الفرصة وقبل ما احكي معها اسرعت لبرا الصف، تأففت من هالنهار الاسود، جيت بدي طلع ساندويشتي من الشنطة بس ما لقيتها، تذكرت اني كنت مستعجلة لدرجة نسيت لف ساندويشة، وقفت لانضم للشلة بس وقفني قمر الليل وطلب من الشلة تسبقنا عالملعب، هون قعدت ارجف، شكلو اجا وقت الحساب، قرا الي بدفتر الذكريات وجاي هلاء ليعيط علي، بس شكلو مش شكل واحد جاي يعلق مشكل، شكلو جاي يحكيني كرمال نوال، رفعت راسي معصبة وقلتلو:
"اذا جاي تطلب مني احكي مع نوال حتى تسامحك وترجعلك يفضل تروح تفتش عغيري، لان هي اساسا مش عم تقبل تحكي معي..."
عقد حواجبو مستغرب: "ومن قلك اصلا بدي استسمح منها؟ هي الغلطانة هي الي لازم تستسمح مني...؟ "
وطيت راسي وانا عم فكر بكلامو:
"بشو بتكون غلطت معو نوال، نوال بنت طيوبة ما بتغلط مع حدا، طب اذا مش هيدا السبب الي جاي كرمالو فاذا شو بدو مني؟..."
" شو مشاعرك تجاهي..."
رفعت راسي بسرعة وانا عم اطلع فيه مصدومة، هيدا السؤال ابدا ما كان متوقع، بعدت وجي عنو وانا عم حاول استنتج، لشو عم يخطط هالزلمة وشو خطر ببالو يسأل هالسؤال، رجع قلي:
"اظن ارتباطي من نوال كانت غلطة، كنت مخدوع فيها، كنت مبينة بنت قلبها طيب بس لما ارتبطت فيها بينلي العكس، قلت بما انك مبينة شريرة لو طلعتي العكس حيكون هالشي كتير منيح، واذا ما طلعتي عنجد شريرة ما رح انصدم، ما رح كون مخدوع على كل حال..."
عضيت على شفافي ورجعت سألتو:
"هيدا سبب اننفصالكن؟ وكرمال هيك معاش عم تقبل تحكي معي؟..."
- يعني تقريبا... فيكي تقولي شي من هالنوع
الصراحة الشغلة بعد ما فاتت مخي منيح، مش قادرة استوعب لهلاء انو قمر الليل فضلني على نوال، مش عارفة اذا بنبسط لهالشي او ازعل على رفيقتي، اذا زعلت مني معها حق لان سرقت حبيبها، بس هي بالفعل زعلانة مني، يعني ما شي رح يتغيير، بس اذا رفضتو يمكن نرجع اصدقاء، بس هي كانت تعرف اني بحبو لما خبرها وما فكرت بمشاعري، يا ربي شو بعمل؟ حاسة عقلي رح ينفجر...
لحسن حظي قبل ما ينفجر عقلي صار في انفجار وراي لما حدا غبي فات عالصف معصب وخبط الباب بالحيط وصرخ باسمي، اطلعنا انا وقمر الليل مصدومين وشفنا وقح البرية، فات عالصف عم يحكي مش فاهمة شي عليه لحد ما وصل لحدي وطلب من قمر الليل يطلع ليحكي معي، ايمن ما رد عليه، اطلع فيني كأن عم يسألني اذا بدي اياه يروح او بدي اياه يبقى معي، انا احترت ومعاش عرفت شو جاوب، اكيد بدي ضل مع ايمن بدل وقح البرية بس بنفس الوقت الموقف الي كنت فيه مع ايمن كان محرج كتير وفضلت اتهرب اقل شي لاقدر استوعب كلامو، طلعت فيه وطلبت منو يأجل الكلام لبعدان، ما كأن ايمن استوعب كلامي وجمد محلو، قام الوقح المزعج مسكني من ايدي وجرني وراه هو وعم بيقول:
"مش وقت تعمل هلاء مرسال حب، عندي شي اهم لاحكي معها "
فات عصف تاني وسكر الباب وقلي بعصبية:
"بقدر افهم عقلك من شو بيشكي؟ ليش بيحلل عزوقو وبيستنتج عزوقو..."
عبست وانا مستغربة، عن شو عم يحكي هالاهبل؟..
كمل معصب:
"كيف بتتهميني اني بكرهك بس لانك بتشبهي خطيبتي السابقة، ولاني ما قدرت انتقم منها مباشرة عم انتقم منها فيكي بس لانك بتشبهيها؟... ولك انت شو مفكرتيني..."
شديت عاسناني معصبة وصرخت عليه:
"انت من لما تعرفنا وانت بتتمسخر علي وبتهيني وبتضلك تحاول تأذيني..."
"انا عم اعمل هيك!..."
- مش اول ما تعرفنا قعدت تتمسخر علي لاني فتت ع برية بيوم شتت، وقعدت تتمسخر علي لاني مفكرة حالي ذكية وحاطة الغاز صعب تنفهم؟
- وشو خص هالشي بهالشي؟ شو ذنبي اذا انت غبية؟ انا بطبعي هيك بتعامل مع الغباية...
واول يوم علمتنا فيه هددتني انك رح تكشف اسرار دفتر الذكريات إدام الكل...
- لانك من الاول ما احترمتيني متل ما التلميذ لازم يحترم استاذو، كان الحق عليك من الاصل...
- وليش بدي احترمك وانت ما احترمتني من لما التقينا؟
- لان انا الاستاذ وانت التلميذ، هيدا واجبك بغض النظر عن طريقة تعاملي معك
- انت استاذ بديل مش استاذ
- طالما انا الاستاذ لازم تحترميني، بديل او غير بديل، لان رفقاتك رح يتأثرو من تصرفاتك وبصير مسخرة الصف، وانا مش ناوي كون مسخرة
- لما بدك غيرك يحترمك جاهد لتحصل على هالشي، مش تعمل الي بدك اياه بعدان بدك الكل يعاملك متل ما بدك، ما بياخذ الواحد اكتر مما بيستاهل...
- شو ما كان، المهم تكوني فهمتي اني ما بعاملك هيك لانك بتشبهي خطيبتي ولا عم انتقم منها فيكي، قد ما كنتي بتشبهيها بعامل كل انسان حسب شو هو مش حسب من بيشبه، وانت غبية وبعاملك متل الغبايا...
عبست وانا اطلع فيه معصبة بدي اقتلو، جاي عم يوضح موقفو باتهامي بالغبى! يعني ما بعرف شو الاضرب، مدري ليش فجأة ابتسم هالغبي رجع قلي:
"سمعت انك ضربتي خطيبتي السابقة كف" قالها وفرط ضحك، فنجرت عيوني وانا بتطلع فيه:
"من وين جبت كل هول المعلومات؟..."
اطلع فيني نظرة مريبة وانا عم حاول حللها حتى رجعت فنجرت عيوني وقلتلو:
"دفتر ذكرياتي! ما تقول قريتو مرة تانية؟..."
رجع هالمزعج فرط ضحك وانا معصبة وصرخت عليه:
"ولك امتى رح تتعلم انو هيدا شي خاص؟ مش لازم تتدخل بخصوصيات غيرك..."
- طيب اعترفي... ليش ضربتيها...
- هيك، هواية
- او انك بتحبيني متل ما قالت
جملتو هاي طلعتلي ضغطي، فقعتو بقس بكتفو وانا قول:
- انت اخر من كنت بتوقع اني اسمع منك هالكلام، انو بتعرف اني بكرهك، وبتعرف منيح مين بحب...
رفع حاجبو بمسخرة وقال:
"قمر الليل !...
لي بيحب رفيقتك الانتيم
حبكن ميؤوس من البداية..."
تكتفت ورفعت حاجبي بتحدي وقلتلو:
"ليكون بعلمك انو اليوم طلب يرتبط فيني"
عبس مستغرب:
"اليوم طلب منك؟
عم تكذبي علي لتدافعي عن كرامتك..."
ابتسمت ابتسامة عريضة وانا عم خبرو بالي كان عم يصير من شوي، بس استتغربت انو الموضوع ما عجبو، كان المفروض بنبسطلي، قلي:
"اريج... مستحيل قمر الليل يحبك، عرفت هالشي من يوم قريت مذكراتك، وتأكدت من هالشي يوم شفت تعاملو معك مباشرة..."
- هيدا الشي كان بالماضي، هلاء كل شي تغيير...
- كيف تغيير مبارح كان ضاهر من نوال ومبسوطين، ما لحق ينساها
- وانت شو بعرفك؟
- اسمعي... شو ما كان الي خبرك عنو من اسباب، ما تصدقي هالزلمة، من اول يوم جيت علمكن عمل فيكي مقلب اذا ذاكرة، يوم سألتك عن مسألة وما عرفتي تجاوبي وساعدك، انت اخذتي مساعدتو عن حسن نية، وشو كانت النتيجة؟ تضحك عليك كل من بالصف، هالمرة اذا عمل فيكي مقلب النتيجة ما رح تكون مجرد انو يتضحك عليك كل لي بالصف، رح تطلعي محطمة من هالتجربة، صدقيني ما رح تكوني مبسوطة بالي رح يصير، هيدا الصبي ما بيحبك صدقيني..."
- صرخت عليه معصبة:
- انا جاي بشرك بهالخبرية وانت قاعد تعطيني مواعظ، انا بحبو بدي ارتبط فيه عجبك او ما عجبك، ما انت من الاول بدك تبعدني عن قمر الليل بلا سبب، او يمكن يكون في سبب، ما قدرت تبعد خطيتك السابقة عن هيداك الشاب فجاي بدك تمنعني الي من الشاب الي بحبو... بعد إذنك بعد عن حياتي...
- ولك كم مرة بدي قلك مش هالشي الي عم يصير
اجا معصب لعندي وهو عم يحاول يهدي اعصابو قبل ما يفقعني شي بقس يغير فيه تضاريس وجي، انا من فزعي رجعت لورا بس للاسف كان الباب وراي مباشرة مسكر فما قدرت ارجع اكتر من هيك وهو بعدو بهاجم او بالاحرى بيدافع عن حالو وهو عم يهاجم حتى اخيرا خلص حكي وبلش يسترجع انفاسو وضلينا ساكتين معصبين لحد ما فجأة انفتح الباب، طرت انا، والابشع انو كان ادامي الغبي وقح البرية، وخبطت فيه، طلعت معلمة الكيميا من ورا الباب واطلعت فينا مصدومة:
"شو عم تعملو هون لوحدكم؟..."
دفشتو لبعد عنو بس للاسف اندفشت معو، طلع شعري معلق بسنسالو(سلسلة الرقبة)، وكل ما حاول بعد او هو يحاول يبعد تطلع صرختي، برمت لعندو معصبة بس فجأة احمرو خدودي، كان قريب اكتر مما توقعت فسكتت وبسرعة بعدت وجي مستحية لحد ما جمدنا تنينا واتفقنا انو نهدأ لنشفلنا حل، طلب من اختو تجي لتشيل الشعر عن السنسال بس الشغلة كانت صعبة ونحن مربطين ببعض فاقترحت اختو انو يشلح السنسال حتى تشيل شعري بهدوء بس هو ما عجبت الفكرة وعصب وصار يصرخ ويتلئمن عليها واقترح انو يقص شعري بدل ما يشلح السنسال، انا عصبت منو وضربتو وكنت رح امسح فيه الارض بس لو انو شعري مش معلق فيه، وبعد خناقات بينو وبينها فك السنسال وطلع من الصف معصب عم يسبسب، اطلعت فيه مصدومة، كلو هيدا كرمال سنسال! عالسريع فكت معلمة الكيميا شعري عن السنسال وحتطو بيدي وقالتلي بصوت واطي:
"خيدي هيدا وكبيه باول مزبلة بتلاقيها، من زمان عم اطلب منو يتخلص منو ومش عم يقبل..."
انصدمت انا من كلامها، قالتلي:
"كان سنسال مشترك بينو وبين خطيبتو السابقة، هلاء افترقو ومش عم يتقبل الفكرة، كرمال هيك ما عم يقبل يشلحو وحلف ما يتزوج من بعدها... اهلي كتير زعلانين كرمالو بس ما قادرين يعملو شي..."
زادت صدمة على صدمتي، ما كنت اتوقع انو وقح البرية بيقدر يحب بهالقوة ويكون وفي لهالدرجة، كان مبييني انسان بلا مشاعر، اطلعت بالسنسال، عبارة عن قلب مقصوص مقسوم نصين والجزئين حد بعضهم بسلسلتين، حطيتو بجيبتي وقلتلها:
"اوك، على كل خطيبته ما بتتستاهل منو هالحب..."
اطلعت فيني مستغربة:
"خبرك عن خطيبتو؟..."
- لا... تعرفت عليها بالصدفة... وخبرتني عن قصتهم، كانت هبلة ولعبو رفقاتها بعقلها
- لعبو بعقلها ما رح نختلف، بس لما رجع كرمالها ليش ما صدقتو؟ حكينا كلنا معها وما قبلت ترجعلو، الكذابة كانت بتتحب واحد تاني وتحججت برفقاتها...
انصدمت من كلامها، هي خبرتني انو ارتبطت بواحد تاني مجرد ما تركتو، بس ما قالت انو كانت تحبو من قبل، مين يمكن يكون الي عم يكذب؟ على كل حال انا ما دخلني... يسطفلو...
حطيت ايدها على كتفي وقالتلي:
"ما تخبري جواد اني خبرتك عن خطيبتو، ما بيحب حدا يتدخل بمشاكلو، اذا سألك عن السنسال قوليلو انو هو معي...
قالت كلامها واخذت كتاب كانت تركيتو بالطاولة ورجعت طلعت لبرا، شوي وبسمع صوت جواد عم يسألها عن السنسال، خبرتو انها كبتو من الشباك، اسرع لعندي عالصف وطل من الشباك وصار يفتش متل المجنون لحتى برم لعندي وسألني معصب:
"وينو؟... وين كبتو؟..."
بلعت ريقي وانا فزعانة، هاي تاني مرة بشوفو هلائد معصب، شكلو كل شي بيخص خطيبتو السابقة بخليه يعصب هيك، قلتلو اني ما بعرف وين صار، اطلع فيني باحتقار وقلي:
"ما بيجيني منك الا المشاكل، بدك تروحي ترتبطي بهيداك الغبي روحي... وخذي الي بتستاهليه..."
حمل حالو وراح معصب، وانا عشوي كنت رح ابكي، شو يعني الي بستاهلو؟ شو عملت انا ليش؟ بعدان شو قصدا علقت السنسال بشعري؟... شديت بيدي على السنسال بجيبتي وانا مش مصدقة امتى اوصل عاول برميل زبالة بالشارع لكبو احلى ما يلاقيه اذا كبيتو هون بالمدرسة...
